Oqaluuserisassani immikkoortoq 53-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Tallimanngorneq 19. april 2002
Atatsimiinnermik aqutsisoq: Siulittaasoqarfimmi ilaasortaq Anders Andreassen.
Olga Poulsen, Inuit Ataqatigiit.
Qujanaq. Aappaatigut tuċigilaarpara
ippassaanikkunni siunnesuutit tullissaanut ingerlateqqinneq ajorput
tullissaanut ingerlatsisinissamut inimi issiasut amigarineqarlutik, soorluli
aamma massakkut inimi issiasut tullissamut oqaluuserisassat tullissaanut
amigangajakkaluartut kisianni Siulittaasoqarfimmiit piumaffigineqarnera
tunngavigalugu saqqummiussissaanga.
Anders Andreassen, ataatsimiinnermik
aqutsisoq.
Nangeqqitsinnagu oqaatigilaarlara
tassa isersimasut, affai sinnerlugit isersimammata aalajangiivugut
ingerlaqqissinnaasugut, tassalu isersimasut 16-ummata aatsaannguaq.
Olga Poulsen, Inuit Ataqatigiit.
Qujanaq. Kommunalbestyrelsimut
ilaasortaq napparsimanini, naartunini, meerartaarnini meeravissiartaarnilu
pisortanit pisussaaffinnit allamik suliaqarnini, niuernermik ingerlatsinini
assigusumilluunniit pissuteqarluni qinikkatut pisussaaffimminik
naatsorsuutigisaminik sivikinnerpaamik qaammatini marlunni
isumaginnissinnaanngippat pineqartup sinniisussaa borgmesterimit
aggersarneqassaaq.
Malittarisassat atuuttut
naapertorlugit tamatuma kingorna sinniisussaq kommunalbestyrelsip
ataatsimiinnerinut peqataasarpoq kommunimili ataatsimiisitaliani
ataatsiinnerunngitsuni. Tamanna pissuteqaarpoq ataatsimiititaliani
ilaasortaaffinnut tamanut ataatsimiititaliamut ilaasortaq ataaseq aamma
ataatsimiititaliami sinniisussaq ataaseq qinerneqarsimasarmata. Ataatsimiititaliami
ilaasortaq ataatsimiititaliap ataatsiminiinneranut peqataasinnaanngippat inuk
ataatsimiititaliami sinniisussatut qinigaq aggersarneqartarpoq.
Kommunalbestyrelsimut ilaasortap
sivisunerusumik peqannginnerani taamatut aaqqissuussinerup kingunerisimavaa
ataatsimiisitaliami sinniisussanut tamanna peqatigalugu kommunimi ataatsimiititalianut
allanut ilaasortaajutigisumut annertuumik suliassaqalertarneq. Pingaartumik
partiit qinigaatitaannuut ikinnerusunik inuttalinnut aammalu
kattusseqatigiinnut tamanna ajornartorsiutaasarsimavoq.
Ajornartosiut tamanna Inatsisartuni imatut
aaqqiivigineqarsimavoq partiit ataasiakkaat kattusseqatigiilluunniit
Inatsisartut Siulittaasoqarfiannut qinnutigisinnaallugu sulinngiffeqarallartup
sinniisussaata ataatsimiititaliani sulinermut peqataatinneqarsinnaaneri.
Taamatut qinnuteqaatit nalinginnaasuumik akuersaarneqartarput.
Taamatut kommunalbestyrelsimut
tunngatillugu periutsitut ittumik pilersitsoqarsinnaanissaa siunertaralugu
maanna siunnersuut saqqummiuppara.
Ataatsimiinnermik aqutsisoq: Inatsisartut Siulittaasuat Daniel
Skifte.
Jonathan Motzfeldt, Naalakkersuisut Siulittaasuat.
Inatsisartuni ilaasortaq Olga
Poulsenip kommunalbestyrelsit aamma nunaqarfinni aqutsisut pillugit
Inatsisartut inatsisaata allanngortinneqarnissaanik inatsisissatut siunnersuut
maani saqqummiussaa taamaalilluni sivikinnerpaamik qaammatit marluk
peqanngitsoorneratigut siniisussaq ilaasortanngorallarnermi peqtigisaanik
ataatsimiititaliani ilaasortaaffinnik tigusisinnaanngussalluni saqqummiunneqarpoq.
Oqaatigissavara kommunalbestyrelsit
ataatsimiititaliaanni ilaasortamut aalajangersimasumik sinniissussaqartitsineq
nutaamik aaqqissuussinikkut, tassa 1994-imi atulersinneqarmat. Aalajangersakkakkut
peqqussutaavoq pissutissaqavissumik sivikinnerpaamik qaammatini marlunni
sivissusilimmik pisinnaanngitsoqarneratigut sinniisussap ingerlaannartumik
ilaasortanngorallartinneqartarnissaa. Maleruagasssiaq atuutsinneqalerpoq
piffissami sivisulaartumi sivikinnerpaamik qaammatit marlunni imaluunniit
kommunalbestyrelsip ileqquusumik ataatsimiineranut agguaqatigiissillugu
marlunnut sivisussusilerneqartumik, kommunalbestyrelsimi ilaasortatut
suliassanik pissutissaqavissumik isumaginnissinnaanngitsoqarpat sinniisusanik
ilaasortanngorallartitsisarnermik periuseq eqaannerulesinniarlugu. Tassa
piffissami pissutissaqavissumik isumaginnissinnaannginneq pineqarpoq.
Assersuutigalugu imaattoqarpat
kommunalbestyrelsip ataatsimiinneranni ilaasortaq peqaataasinnaanani
kisiannili ataatsimiititaliap ataatsimiinnerani peqataasinnaalluni taava
ilasaortap tunuarallarnissaa pissutissaqanngilaq.
Pisinnaanngikkallartoqartillugu
suleqatigiit ilaasortamik ataatsimiititaliami ilaasortanngortitsisimasut
aalajangersinnaavaat ilaasortap sinniisussaa pisinnaanngikkallarnerup nalaani
ataatsimiititaliami ilaasortaagallassasoq. Taamaattumik qinersinermi
suleqatigiit pineqartut aalajangertussaavaat sinniisussanik
ilaasortanngortitsigallarnissamut pissutissaatitaasut eqquutsinneqarnersut.
Ataatsimiititalimi ilaasortaaffiup inuttaqanngikkallartup ilaasortaa
pisinnanngikkallartup kommunalbestyrelsemi sinniisussaanut tunniunnissaanut
qinersinermi suleqatigiit pisissaaffilerneqanngillat, tassa ullumikkut
tuuttumi.
Inatsisartuni ilaasortap Olga
Poulsenip inatsisip allangortinneqarnissaanut siunnersuutaa aqutsinissamut
inatsimmi sinniisussanik aggersaanissamut pisinnaatitsisutaasunut
aalajangersumik periutsinut naapertuuppoq, taamaattoq siunnersuut kommuninut
siunneruummui pineqartunut isummerfigeqqusissutigineqartinnagu inaarutaasumik
Naalakkersuisut isummerfignianngilaat.
Taamaattumik siunnersuutip
kommuninut ataasiakkaanut KANUKOKA-mullu isummerfigeqqusissutigineqarnissaanik
siunnersuutillu aappassaaneerneqarnerat pingajussaaneerneqarneratalu 2002-mi ukiakkut ataatsimiinnermi pinissaata
aalajangiunneqarnissaanik Olga Poulsenip siunnersuutaa Naalakkersuisut
tapersersorpaat.
Tommy Marĝ, Siumup oqaaseqartua.
Inatsisartuni ilaasortap Olga
Poulsenip kommunalbestyrelsit aammalu nunaqarfinni aqutsisut pillugit Inatsisartut inatsisaata
allanngortinneqarnissaanik inatsisissatut siunnersuutaa Siumumiit oqaluuserilluareerlugu
imaattumik isummerfigalugu oqaaseqarfigissavarput.
Siunnersuuteqartup siunnersuumini
ersersinniagaa Siumumiit paasilluarparput, tassani pineqarmat sivisuumik
kommunalbestyrelsimi ilaasortap sulinngiffeqarluni peqannginnerani tassalu
qaammatini marlunniit sivisunerusumik sulinngiffeqarneq pissappat
kommunalbestyrelsimut ilaasortaanngitsumik sinniisussatut suliamillu
tigusissusatut aggersaasinnaanermut inatsisiliornikkut periarfissiinissamik
oqariartuut.
Siumumiit oqaatigissavarput
ullumikkut kommunalbestyrelsini aammalu nunaqarfinni aqutsisut Inatsisartut
inatsisaatigut periarfissaat atuuttut allanngortinnissaannut maannakkuugallartoq
tunngavissaaleqigatta. Tassami ullumikkut inatsisitigut maleruagassat
malillugit qinikkat akornini sinniisussanik toqqaasarneq periutsitut eqaatsutut
taasariaqarmat.
Taamaattorli Siumumiit siunnersuut ammaffigalugu
siunersuuteqartup siunnersuummini taakkartugaattut sinerissami kommunit
ilaannit ajornartorsiutaasinnaanera paasiniarlugu tusarniaanissamik kommuninut
aammalu KANUKOKA-mut ammatitsinerput oqaatigissavarput.
Taamatut Siumumiit oqaaseqarluta siunnersuuteqartup
aammalu Naalakkersuisut aappassaaneerneqannginnermini
tusarniaasoqaqqaarnissamik innersuusinerat ilalerparput.
Godmand Jensen, Atassutip oqaaseqartua.
Inatsisartuni ilaasortaq Olga
Poulseni siunnersuuteqarpoq Inatsisartut inatsisaat tassalu kommunalbestyrelsip
aamma nunaqarfinni aqutsisut il.il pillugit Inatsisartut inatsisaata
allanngortinneqarnissaanik siunnertaqartumik. Siunnersuutigineqartoq
Atassummiit paasisinnaalluarparput aamma ilaatigut misilittagaqarfigigatsigu,
sinniisussanik atuinermi sinniisussat aammalu ataatsimiititaliami sulinermi
ilaatigut tamakkiisumik atorneqarsinnaasannginnerat eqqarsaatigalugu.
Taamaakkaluartoq aamma
nalunngilarput ilaatigut ataatsimiititaliani suliat matoqqarsunik ilaqarsinnaasarnerat,
tassa kommunalbestyrelsini tamannarpiaq pissutaaqataasoq tamakkiisumik
sinniisusanik atuisinnaasannginnermut.
Atassummiit siunenrsuuteqartup
siunnersuutaa paasisinnaalluaratsigu eqaallisaaniarnermik siunertaqartoq
takusinnaallutigu. Siunnersuut pillugu naalakkersuisut akissuteqarnerminni
siunnersiat tassalu siunnersuut ukiakkut 2002-mi Inatsisartut
ataatsimiinneranni aappassaaneerlugulu pingajussaaneerneqassasoq, tamannalu
sioqqulugu sussaqqartunut tassa kommunalbestyrelsinut KANUKOKA-mullu tusarniaassutigineqassasoq
isumaqatigaarput.
Atassummiit taamatut oqaaseqarluta
Naalakkersuisut akissuteqaataat taperserparput siunnersuullu appassaaneerlugulu
pingajussaaneerneqannginnerani Inatsisit Atortinnerannut Ataatsimiititaliami
suliarineqassasoq innersuussutigalugu.
Maliinannguaq Markussen Mĝlgaard, Inuit Ataqatigiit oqaaseqartuat.
Qujanaq. Inatsisartuni ilaasortaq
Olga Poulsenip kommunalbestyrelsit aamma nunaqarfinni aqutsisut pillugit
inatsisaata allanngortinneqarnissaanik siunnersuutaa Inuit Ataqatigiinninngaanniit
tamakkiisumik tapersersorparput tassami kialuunniit kommunalbestyrelsemi
sulisimasup sulisulluunniit nalunngilaa kommunalbestyrelsemi ilaasortaq
napparsimappat imaluunnit allamik peqquteqarluni ataatsimiititani
ilaasortaaffimmini peqataasinnaanngippat maanna inatsit atuuttoq malillugu
kommunalbestyrelsemi sinniisussat peqataatinneqarsinnaanngitsut.
Tassami taamaattoqartillugu
kommunalbestyrelsemi parteeqat qinigassanngorteqalluunniit issiareersoq
ilaatigullu ataatsimiititani allani ilaasortaaffeqarsinnaasartoq
sinniisussaatinneqartarpoq paarlalluguli ilaasortaanngikkaluarluni
sinniissussaq kommunalbestyrelemut isertoq ataatsimiititani
peqataasinnaatitaassanani.
Tamanna allanngortinneqartariaqartoq
Inuit Ataqatigiinniit isumaqarpugut tassami sumiluunniit politikkimi
suliaqqarnermi sinniisussaagaluaraanniluunniit tamakkiisumik qinikkatulli
allatut pisinnaatitaaffeqarneq atuuttariaqarmat. Imaanngitsoq
kommunalbestyrelsip ataatsimiinneri kisiisa peqaataffigisinnaassallugit aammali
ataatsimiititani sulinermi peqataasinnaanissaq eqaatsumik
ammaffigineqartariaqartoq Inuit Ataqatigiinniit isumaqarpugut. Taamaalilluni
kommunalbestyrelsemut ilaasortaareersut suliamik saniatigut
suliakkersorneqartarneri unitsinneqassammat peqqissaartumillu sulinerit
pisinnaassammata.
Tassunga ilanngullugu
Naalakkersuisut akissuteqarnerminni kommuninut tusarniaassoqarnissaanik
innersuussinerat oqaluuserisap ukiamut aappassaaniinnginnerani pissaosq Inuit
Ataqatigiinnit kaamamttutigerusupparput.
Taamatut oqaaseqarluta Inuit
Ataqatigiinniit Olga Poulsenip siunnersuutaa tamakkiisumik tapersersorparput.
Mads Peter Grĝnvold, Kattusseqatigiit oqaseqartuat.
Inatsisartuni ilaasortap Olga Poulsenip Inuit Ataqatigiinneersup inatsisip allanngortinneqarnissaanut siunnersuutaa Kattusseqatigiinninngaanniit imatut siullermeerneqarnerani oqaaseqarfigissavarput.
Kattusseqatigiinni isumaqarpugut kommunalbestyrelsemi nunaqarfinnillu aqutsinermut inatsit taamatut allanngortinneqassappat sinniisutut qinikkanut pitsaasumik kinguneqassaoq. Sinniisutut qinikkat kommunalbestyrelsemi aammalu nunaqarfinnut aqutsisunut annersuumik ataatsimiititaliani ataavartunut ataatsimiittarnernut peqataattinneqarneq ajorput tassa qinikkat akronanni sinniisoqartarneq pissutaalluni.
Kattusseqatigiinniit isumaqarpugut kommunalbestyrelsemi nunaqarfinnullu aqutsisunut sinniisussat ataatsimiititaliani ilaasortanngorallartarsinnaanissaat periarfissinneqartariaqartoq soorlumi Inatsisartuni sinniisussat ataatsimiititaliani ataavartuni ilaasortanngorallartinneqarsinnaasut.
Taamatut kommunalbestyrelsenut aammalu nunaqarfinnut aqutsisunut sinniisussat ataatsimiititaliani ilaasortanngorallarsinnaanerat periarfissiissaaq sinniisut suliassanut suli qaninnerusumik suleqataasinnaanissaat.
Naak Kattusseqatigiinniit siunnersuut tapersersoraluarlugu pineqartup aappassaaneerneqannginerani susassaqartunut KANUKOKA-mullu tusarniaassutigineqrnissaa isumaqarpugut.
Taamatullu oqaaseqarluta siunnerssuutip 2002-mi ukiakkut Inatsisartut ataatsimiinnissaani aappassaaneerneqarnissaa pingajussaaneerneqarnissaa pitinnagu Naalakkersuisut kaammattuutaat Kattusseqatigiinniit taperserparput.
Per Berthelsen, Attaviitsoq.
Qujanaq. Uanga tunginninngaaniit
Inatsisartuni ilaasortap Olga Poulsenip Inuit Ataqatigiinneersup
siunnersuutaanut atatillugu Naalakkersuisut akissuteqaataat iluarisimaarpara,
pingaartillugu tusarniaanissaq kisianni aamma nalunaartutigeriissavara
siunnersuutigineqartut iluini ilaatigut iserfigineqartut assigiinngitsut
nammineq iliallaannarlunga akuersaaruminaatsikkakkit, tassnimi ilaatigut
sinniisoqarnermut ullumikkut ingerlasut aammalu qinikkatut inissisimanermi
illersorneqarnermut attuumassuteqartut ilaatigut sanngiillisarneqarsinnaanerat
malugisinnaagakku imaluunniit tamakku pisinnaaneri ernumassutigisinnaagakkit.
Taamaattumik tassa uani tungininngaanniit iallerumavara tusarniaanikkut uumap
oqaluuserisassanngortinneqartup ingerlariaqqinnissaanut ammaasiumaneq.
Olga Poulsen, Inuit Ataqatigiit.
Qujanaq. Siullermik Siumup oqaaseqarneranut tunngatillugu, tassa taanna sinniisussat imaluunniit sivisuumik peqanngissatillugu kommunalbestyrelsemi ilaasortaq taava sinniisussaq aggersarneqartarpoq aamma soorlu siunnersuut saqqummiukkakku oqaatigiginga tassa borgmesterimit aggersarneqartarpoq. Tassalu aggersarneqartarpoq kommunalbestyrelsip ataatsimiinnerini. Aggersaasoqarneq ajorpoq ataatsimiititaliat ataatsimiinnissaannut, tassa suli napparsimanerup iluani, taannajuna allanngortikkusukkinga.
Siumup oqaaseqarnermini oqaatigivaa soorlu ajornartorsiutaavallaartanngitsoq kisianni aamma taanna nalunngilara ilaatigut kommunini ajornartorsiuttaatinneqrneq ajorpoq kisianni aamma kommuneqarpoq ajornartorsiutut isigineqartarluni. Taamaattumik uagut ilaatigut aamma ataasiaannarnata misigisimavarput maani kommunimi. Taamaattumik aamma allami kommunimi nalunngisaqarpunga aamma misigitinneqartartumik.
Taamaattumik ataatsimut assigiimmik atortussanngortinneqarnissaa taanna pingaaruteqartorujussuuvoq kommunalbestyrelsmi, uanga isumaqarpunga illersuinerusoq partiimut imaluunniit qinersisartut qinigaannut illersuinerusoq taamatut piffissami sivisuumi peqanngittoqartillugu taassumap inissisisimaffigisaanik illersuinerusussaammat.
Taamaattumik nuannaarutigivara tapersersorneqarnera. Uani Atassumminngaanniit saqqummiunneqartut soorlu ataatsimiititaliani oqaluuserineqartartut matoqqasuusarnerannut tunngatillugu isumaqarpunga annertunerusumik ajornartorsiutaannavianngitsoq. Kinaluunniit taamaattumut suliassamut ikkunneqartoq nipangersimasussaatitaanermut inatsit malillugu inissinneqartarmat, taamaattumik naatsorsuutigisariaqarparput tassunga atorfimmut inissinneqartoq nipangersimasussaatitaanermillu pisussaaffilerneqartoq taanna eqqortikkumaaraa.
KANUKOKA-mut taamatut tusarniaassutigalugu ingerlaneqarnissaa qujassutigivara, taamaalillunilu ukiamut aappassaaneerneqarnissaanut utaqqissallunga.
Jonathan, Motzfeldt, Naalakkersuisut Siulittaasuat.
Annertunersumik oqaaseqarfigissanngilakka tapersiisut, tassani qutsavigissavakka aamma suliassaq taamaalilluni ingerlaqqissinnaanngormat, tamanit tapersersorneqarmat taamaallaat aamma Olga Poulsenip nammineerluni oqaatigitsiagaa Atassutip oqaaseqartuanut tunngatillugu sinniisussap matoqqasumik ilaasinnaannginneranik misissueqqusisutut oqaatigineqartoq, oqaatigissavara taanna maannakkut pissuseq najoqqutaralugit ajornartinneqanngimmat.
Uani misissorneqarneranni aamma ataatsinaanneqarnerat nalunngilara kommunalbestyrelsit styrelseslovemi maannakkut misissorneqarnissaani immikkut ataatsinaanneqarumaartoq tassa ' 18, imm. 2-mi, tassa udvalgimut suppleant (taama qallunaatut taaguuteqarpoq) taanna nammineq pisinnaanngippat aammalu taanna sinniisussami isernissaanut isumaqataanngippat, ajornartorsititaqarpat tassani aamma udvalgip immikkut taanna misissorsinnaagaa naatsorsuutigaara.
Imaappoq suliassaq naammaginartumik Olga Poulsenip siunnersuutaatut siunnerfiusumik naammassineqarnissaa ukiaru aappassaaneerlugu pingajussaaneerlugulu naammassiniarneqassaaq.
Tommy Marĝ, Siumup oqaaseqartua.
Naatsunnguamik una erseqqissaassutigilaaginnarlugu tassa siunnersuuteqartup oqaaseqarnermini aamma uani Siumup oqaaseqaataa pillugu imatut erseqqissaassutigilaaginnarniarlugu,t assa Siumup ammaffigilluinnarmagu una siunnersuuteqartup oqariartuutimini kommunit ilaasa ajornartorsiutigineqarsimappat taava taanna uagut Siumumi piareersimaffigallugu ammaffigalugulu. Taanna kommuninut aammalu KANUKOKA aqqutigalugu tusarniaassutigineqarnissaa.
Kisianni aamma una eqqumiigikululluguuna maannga oqaluttarfimmut qaqisunga ilaa. Nuup kommuniani ajornartorsiutigineqarsimappat, soorlu siunnersuuteqartup oqaaseqarnermini, taava kattuffeqarmata aamma kommunit Inatsisartut aqqutigeqqaanngikkaluarlugit ajornartorsiut taanna ajoranartorsiutaasimappat taava kattuffitsik aqqutigalugu taanna Inatsisartunut taanna apuunneqarsinnaammat. Taanna periarfissaavoq maanna apuuteqqanngikkaluarlugu kisianni susassaqartunut ingerlateqqaartarnissaa aamma taanna pingaartikkatsigu Siumuminngaanniit.
Olga Poulsen, Inuit Ataqatigiit.
Qujanaq. Tassa uanga
ilisimatitsissutigissavara Tommy Marĝmut uanga maani Inatsisartuni
ilaasortaagama. Soorunami una ajornartorsiut naapittarparput inatsisitigut
tunngeqarluta inatsisitigut akimmiffeqarluta, taava inatsisitigut
akimmiffeqarutta inatsit allanngortittariaqarpoq, taamaattumik uanga suliassara
sularivra Inatsisartutut, taamaattumillu aamma inatsisip allnngortinneqarnissaanut
isunnresuuteqarlunga.
Per Berthelsen, Attaviitsoq:.
Qujanaq. Uani siullermik
taalaassavara tassa Siumuminngaanniit oqaaseqartup saqqumiussai
eqqorluinnarmata, ilaatigut pisariaqanngitsumik oqaluttarfimminngaanniit maani
suliakkersuisusarpugut allatigut aqutissat atorlugit suliarereerluigt immaqa
naqissuserneqartussaannarnik ingerlatsisinnaanermut. Aamma uani iluatsillugu
naak toqqartaarineq pinngilluinnarniaraluarlugu uani taalaassavara aamma
marloqiusamik politikkeritut inissisimagaangatta nammineq nalilersortariaqartaratsigu
artunnginnerlugu nammassallugu tamanna.
Taamaattumillu aamma
kommunalpolitikkeritut maani landspolitikkeriulluta oqalukkarluarluta
kommunalpolitikkeritut inissisimanitsinni landspolitikkeritut nuna
tamakkerllugu sullissinissamut inissisimanitsinni ilumut immitsinnut
artukkinnginnerluta nalilersortariaqaratsigu. Ajornartorsiorneq
qularnanngitsumik nammineq aallaavigalugu saqqummiussaammat uanilu
saqqumiussagut sapinngisamik nammineq misigisagut aallaavigalugit
pinaversaartussaagatsigit.
Olga Poulsen, Inuit Ataqatigiit.
Naatsunnguamik. Uani Siumukkormiut
oqaaseqaataat uparuanngilara. Taamannanguna erseqqissaalaaginnartunga.
Per Berthelsenimut tunngatillugu
soorunami uani misilittakkannik tunngaveqarpoq. Uagut Inuit Ataqatigiit
misilittagarigatsigu kommunini arlalinni - uani arnatut qinikkatut
misilittagaraarput meerartaarsimalluta taassumap kingunerisaanik
sulinngiffeqarnerup nalaani kommunalbestyrelsemi ilaasortaaqatitta suliassaasa
annertusisarnerat. Aamma pisussaaffigivarput arnaagaluaruttaluunniit
tamakunninga peqquteqarluta imaluunniit uniffigissanngikkipput aamma
suleqatitta uniffigissanngikkaat imaluunniit suliassaannit
annertusitsissanngitsoq.
Aamma uanga isumaqarpunga
utaqqiinnarsinnaanngitsigut kattuffinnut arlaannut, uanga aamma Inatsisartuni
ilasortaagutta saqqummiussisariaqarpugut siunnersuutinik ima
suliakkiissutiginanngitsigaaq una siunnersuut allaat inatsisissanngoreerlugu
tamaasa allareerlugit siunnesuut saqqummiunneqarpoq.
Loritha Henriksen, Kattusseqatigiit.
Tassa siullermik erseqqissaatigilaarusullugu taanna ajornartorsiut kingullermik ajornartorsiutaasimasoq - ilumoorpoq kattuffimmut paasiniarneqarsimavoq kattuffimmilu paasiniaanikkut inatsisitigut oqarfigineqarsimavoq taanna sinniisussaa ataatsimiititaliami ilaasinnaasimanngitsoq inatsisit aallaaviglugu. Taamaattumik tupinnanngitsumik arnaassueq aammalu meerartaranerup meeqqmillu paarsisinnaaneq sivisussusia aallavigalugu isumaqarsimavugut aamma uagut nammineq tapersersukkatsinnik taanna inatsisitigut eqqatsumik erseqqivissumillu allassimalertariaqartoq aamma inuk nammineq sinniisussaalluni soqutiginnilluni politikkikkut iseriartornernermini suliassaminut piareersarfigisassamigullu malinnaanissaa taanna ataqqiumalllugu.
Taamaattumik isumaqarpunga qassiiliuutiginagu massakkut taanna pisoq aammalu pisimasut aallaavigalugit oqallissiassangnortup ingerlanissaa aammalu sukumiisumik misissorneqarnissaa tamatta ilersortariaqaripput aamma arnat tassa sukkut pilitikkikkut aporfeqarnatik sulinissaat eqqarsaatigalugu.
Per Berthelsen, Attaviitsoq.
Uani tusarniaanissamut ammaassineq taanna tapersereerakku aamma qassiulitigissallugu tunngavissaqanngilanga. naatsumik taalaaginnassavara taanna arnaaneq angutaanerlu samineqalermat tulluutsippallaannginnakku, tassami oqartariaqarama arnatut meerartaartoqarpat taava qularinnginnakku angummik aamma peqataasoqarsimassasoq.
Maliinannguaq Markussen Mĝlgaard, Inuit Ataqatigiit oqaaseqartuat.
Ilumullimi anguit milutsitisinnaangaluarunik. Uani oqartoqarmanuna soormi kattuffeqarmata taakku siunnersuuteqarniarlik. Qasseriarluta inimi maani siunnersuuteqarpugut tamatta kattuffiit allaat apereqqaanngivillugit aamma Siumukkormiut taamaattarput, Atassutikkut partiit tamarmik taamaattarput. Taamaattumik taamannak oqarneq, soorunami utaqqineqarsinnapaput, kisianni aamma kattuffik eqeersimaasimanngippat soormi maluginiakkavut toqqammavigalugit maani pitsaasumik siunnersuuteqarsinnaagutta siunnersuuteqarutta.
Aamma taanna isumaqarpunga assortuussutigineqartariaqanngitsoq, aammalu siunnersuutip imaa ersarereermat assortorneqaranilu tamanit aamma tusarniaasoqassoq. Aamma pissuserisarparput qangalili siunensuuteqaraangata attuumassuteqartunut tusarniaasarluta. Uumap suna allaassutigi
gamiuk?
Daniel Skifte, ataatsimiinnermik aqutsisoq.
Maliinannguaq Markussen Mĝlgaard qutsavigaarput. Tassalu allanik oqaaseqarumasoqanngimmat taamaalilluni immikkoortoq 53 taassumap siullermeerneqarera naammassivoq iamtullu inerneqarluni. Partiit Kattusseqatigiit attaviitsillu siunnersuummut tamarmik tapersiipput, taamaattumik siunnersuutip Naalakkersuisut aappassaaneerneqannginerani pingajussaaneerneqannginneranilu tusarniaassutiginissaat inassutigaat.