Oqaluuserisassani immikkoortoq 61-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq pingajuat, marlunngorneq aprilip 30-at 2002
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Jakob Sivertsen, Atassut.
Qujanaq. Tassa una saqqummiussara
allanngortinneqarsimammat imaluunniit oqaatsigissavara
aaliangiiffigisassanngorlugu saqqummiunnikuugaluarpara, kisianni
Siulittaasoqarfimmit tassa naalakkerneqarsimavunga nalorninartut pillugit
apeqquteqaat nassiunneqassasoq, kisianni taanna soqutaanngilaq,
malersoqqissagakku.
Inatsisartut suleriaasiannik '36 naapertorlugu Naalakkersuisunut apeqqut
imaattoq matumuuna saqqummiuppara: Nunat iluani timmisartuutitsisarnermut
atatillugu timmisartoqarfinnut ukuusunut Kulusuk, Narsarsuaq, Kangerlussuaq
aamma Nuuk tikinnermi aallarnermilu ilaasut nioqqutissanik
akitsuusigaanngitsunik pisisinnaanissaannut periarfiuussinissaq Naalakkersuinut
sulissutigissaalerneqarsoq.
Nunarput ima isorartugivoq nunatta iluanni
silaannakkut angallannermi billetillu ima akisutigilersimapput
toqqaannanngikkaluami arlaatigut akikillisaaffigineqarnissat. Soorlu
timmisartunut ilaasut akileraaruteqanngitsunik pisisinnaalernissaat
anguniarneqartarialinnginnerluni.
Aammalu nunatta takornarissanut
ussassaarutigineqarneranut nunatta iluani angalanermi akileraaruteqanngitsunik
pisisinnaalernissaq ilapittuutigineqarsinnaasoq takusinnaagatsigut.
Siunnersuummi taamaattumik
Naalakkersuisunut isummersorfigisassanngorlugu saqqummiuppara.
Nunatsinni takornarissat angalaartartut
minnerunngitsumik aamma nunatsinni nunaqavissut nunatta iluani silarsuarmi
billet-inik akisunerpaamik akiliillutik angalaartartut ukiuni kingullerni
apeqqusertuartalerpaat billetit taama akisutigisut sooq
akileraaruteqanngitsunik pisisinnaatitaannginnertik.
Isumaqarpunga mittarfeqarfiit ilaasunik
tikinneqarnerpaallutillu aallartarfiunerpaasut akileraaruteqanngitsunik
pisinniarfiusalernerisigut suliffissanik nutaanik pilertitsiffiusinnaasut.
Minnerunngitsumillu mittarfeqarfiit
aningaasatigut ukiumut kaaviiaartittarisartagaat aamma qaffariateqartussaatutut
nammineernerulersinnaanissaannik ilapittuutaasumik.
Taamatut apeqquteqarlunga
Naalakkersuisunut akineqarnissaa kissaatigaara.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Jakob Sivertseni qutsavigaara. Taava
tulliulluni akissuteqassaaq Aningaasaqarnermut naalakkersuisoq.
Augusta Salling, Aningaasaqarnermut Naalakkersuisoq, Atassut.
Inatsisartut 2002-mi upernaakkut
ataatsimiinnissaannut atatillugu apeqquteqaatigisimavat timmisartunut
ilaallutik nunatsinni angalasut Kulusuup, Narsarsuup, Kangerlussuup Nuullu
mittarfiini nioqqutissanik akitsuuteqanngitsunik pisisinnaalernissaat
Naalakkersuisuni sulissutigiumaneqarnersoq.
Nunaniit allaniit matumani aamma
Danmarkimiit Savalimmiuniillu Kalaallit Nunaannut tikinnermi nioqqutissanik
assigiinngitsunik akitsuuteqanngitsunik eqqussisinnaaneq Namminersornerullutik
Oqartussat nalunaarutaat nr. 23, 25. oktober 1996-imeersukkut
aalajangersagaavoq.
Apeqquteqaatit ima paasivara nalunaarut
taanna allanngortillugu timmisartunut ilaallutik nunatsinni mittarfinniit
mittarfinnut angalasut aammattaaq periarfissiuunneqassasut nioqqutissanik
tupanik, imigassanik aalakoornartulinnik, tipigissaatinik il.il.
Annertussusaannut nalunaarummi
taaneqartuni pisisinnaanngorlugit.
Nunanit allaniit Kalaallit Nunaannut
tikinnermi nioqqutissanik assigiinngitsunik akitsuuteqanngitsunik
eqqussisinnaanermut nunat tamat akornanni angalanermi angallatip suunera
apeqqutaatinnagu maleruagassanut atuuttunut naapertuuttunngorlugit suliaapput.
Naalakkersuisut isumaqarput nunat marluk
akornanni angalanerni nioqqutissanik akitsuuteqanngitsunik eqqussisinnaanermut
maleruagassat nunat tamat akornanni atuukkunnaariartortut. Tamannalu
kingullermik takuarput EU-mi tassanimi aaliangiunneqarnikuuvoq nunat EU-mi
ilaasut akornanni angalanermi nioqqutissanik akitsuuteqanngitsuni
eqqussisoqarsinnaanngitsoq.
Aammattaaq Naalakkersuisut isumaqarput
nunatsinni angalasunut akitsuuteqanngitsumik nioqquteqarsinnaalertitisoqassagaluarpat
angaalariaatsimik ataasiinnarmik aammalu mittarfiit ilaannaanik
periarfissiinissaq tunngavilersoruminaatsuussasoq. Aningaasanummi inatsit
naapertorlugu tassa sullissinissamik isumaqatigiissutit assigiinngitsut
aqqutigalugit Namminersornerullutik Oqartussat timmisartunut umiarsuarnullu
billetit akiinut apparsaatissanik tapiissuteqartarput. Kiisalumi aamma
mittarfinnut umiarsualivinullu.
Tamatuma saniatigut Naalakkersuisut
isumaqarput akitsuuteqanngitsumik eqqussuisinnaanermut nioqquteqarsinnaanermullu
maleruagassanik maanna atuuttunik qasukkaanissaq Landkarsip isertitassaraluinik
annaasaqarnermik kinguneqassasoq.
Tassa nioqqutissat akitsuusikkat
ulluinnarni nioqqutigineqartartut akitsutaasigut isertakinnerulernikkut.
Taamaattoqassappat annaasassa taakku
isertitassanit sipaarutissanilluunniit allanit matussuserneqartariaqassapput.
Kiissalu aningaasatigut sunniutaasussaq
Naalakkersuisut qularaat. Tassami nioqqutissanik akitsuuteqanngitsunik
pisisinnaasut amerlineqarnerisigut isertitassat amerleriaatissaat mittarfinni
ataasiakkaani ilangaaserisut nakkutilliinerannut
aningaasartuutaanerulersussanit annertuumik illua tunngilerneqartussaassammata.
Maleruagassammi maanna atuuttut qasukkarneqassappata taama nakkutilliineq
pisariaqalersussaammat.
Naggataatigut minnerunngitsumik
Naalakkersuisut isumaqarput siunnersuut tunngavimmigut Kalaallit Nunaanni
imigassamik aalakoornartumi atuinerup tamarmiusup appartinneqarnissaannik
Naalakkersuisut Inatsisartullu anguniagaanut akerliusoq.
Taamaammat akitsuuteqanngitsumik
eqqussuisinnaanermut pisisinnaanermullu maleruagassat maanna atuuttut
Naalakkersuisunit allanngortinniarneqanngillat. Qujanaq.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Aningaasaqarnermut naalakkersuisoq
qutsavigaarput. Taava apeqquteqartoq maannakkut oqaaseqassaaq Jakob Sivertsen.
Jakob Sivertsen, Atassut.
Qujanaq. Tassa naatsunnguamik.
Neriussutigissavara ukiamut
aliangigassanngortillugu saqqummiuteqqissagakku, Iluatinnaatertortaqarmat.
Akileraaruteqanngitsumik mittarfiit
taakkua tikinneqarnerpaajusartut pisiffiusalernerisigut ilaasuni tamarmit
misissorneqartalissapput sunik nassataqarnersut.Ullumikkut ilaatigut soorlu
ikiaroornartut eqqarsaatigalugit misissuisarnerit killilimmik ingerlanneqarput.
Aamma taakku saniatigut oqaatigissavara
uani kukkunerummat EU-p akornanni piseqqusaanngitsoqanngimmat cigaret-inik
imaluunniit imigassamik akileraaruteqanngitsunik. Taanna naqqiussuteqarfigilaarpara.
Naggataatigut oqaatigilaassavara
assersuutigalugu Grĝnlandsflyp timmisartorsua Danmark-iminngaanniit
Kangerlussuarmut mittoorpoq silarlummat. Taava ulikkaarpoq Danmarkimiit aammalu
Narsarsuarmukartunut. Tikikkunik takornerissat pisinialersut AA-llit Kangerlussuarminngaanneeravit A uffa angallat taanna ilaaffigalugu
akileraaruteqanngitsumik pisisinnaatitaaneq ajornanngikkaluartoq. Soorlu
tamakkua aaqqissuussinerit ullutinnut naleqqukkunnaarsimapput assigiimmik
pinnissagutta taakku periarfissat ilaatigut tamakkua aqqutigalugit
akikinnerusunik pisisinnaaneq ammaanneqarsinnaagaluarpoq. Uffa tamakkisumik
ilaatigut ammaasinngikkaluarlugu, kisianni pissutsit pisariaqartitsinerilli
naapertorlugit ukiamut aaliangiiffigisassanngorlugu saqqummiuteqqissavara. Qujanaq.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Taava periarfissaariaqarpoq
Naalakkersuisunut ilaasortaq naatsuararsuarmik akissuteqaqqullugu.
Augusta Salling, Aningaasaqarnermut Naalakkersuisoq, Atassut.
Naatsuararsuarmik oqaatigissavara
soorunami uanga oqarfigisinnaangilakka ukiamut saqqummiutissanngikkit
aaliangiiffigisassanngorlugu, taanna uanga oqaasissaqarfiginngilara. Kisianni
akissuteqaaterput neriuppunga misissorluassagit aammalu isummat tassunakkut
nalilersoqqillugu.
Unalu erseqqissaatigilaaginnassavara EU-p
iluani akitsuuteqanngitsunik eqqussuisinnaaneq nunamiit nunamut taanna
qimakkiartuaarneqassasoq, qimakkiartuaarneqartoq taanna ilumoormat
erseqqissaatigiinnassavara. Taanna tassa isumaqatigiissutigineqarnikuuvoq
qimakkiartuaarneqassasoq.
Daniel Skifte, ataatsimiinnermik aqutsisoq, Inatsisartut
Siulittaasuat, Atassut.
Taamaalilluni taanna immikkoortoq 61
apeqquteqaat naammassineqarpoq.
Isumaqarpunga aamma pissusissamisoortoq
aamma pissuserissaarnerusoq Siulittaasutuut oqaatigissagukku. Imatut nipilimmik
oqaatigineqarmat Siulittaasoqarfimmiit pinngitsaalineqarluni taamaalissasoq.
Siulittaasoqarfiup sulisuisa oqaloqatigisimavaat taannalu akuersisimavoq
taamatut iluseqarluni saqqummiunneqassasoq.
Aappassaanik apeqquteqaatinngorluni
ukiamut saqqummiunneqarnissaa malittarisassa malillugit ingerlasussaammat
taanna naatsorsuutigaarput.