Oqaluuserisassani immikkoortoq 96-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq
pingajuat, marlunngorneq aprilip 30-at 2002
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Josef
Motzfeldt, Inuit Ataqatigiit.
Siunnersuutima
qulequtaa eqqortoq imaappoq. Piffissaq siulleq atorlugu innuttaasut
atukkamikkut naligiinnerulernissaat nunallu karsiata isertiitaqarnerulernissaa
siunertaralugit akileraartarnermut inatsisip allanngortinneqarnissaanik
Naalakkersuisut siunnersuuteqaqqullugit aamma Inatsisartut
aalajangiiffigisassatut siunnersuut.
Akileraartarnermut
inatsisip allanngortariaqarneranik Inatsisartuni partiit amerlanerit isummaminnik
saqqummiussisareersut maluginiarlugu siunnersuut makkunatigut allannguinernik imaqassasoq
saqqummiupparput.
Siullermik
inummut ilanngaat 8.000 kr-nik 48.000 kr-ninngorlugu qaffanneqassasoq.
Aalajangersimasumik ilanngaat 2.000 kr-nik 10.000 kr-ninngorlugu
qaffanneqassasoq. Taakkununngalu peqatigitillugu kommunit akornanni ataatsimut
akileraarut 2%-imik aamma nuna tamakkerlugu akileraarut 1%-imik
qaffanneqassasut.
Tamanna
pisariaqarpoq ilanngaatinut qaffaanikkut akileraarutitigut isertitassat
annaaneqartussat matussuserniarlugit. Akileraartarnermut Pisortaqarfiup
naatsorsuinerit najoqqutaralugit siunnersuutigineqartutut siunnersuut
akileraartartoq kisermaaq 192.000 kr-nit angullugit ukiumut isertitaqartartoq.
Aappariillu 384.000 kr-nit angullugit isertitaqartartut akileraarummikkut
oqilisaaffigineqarsinnaapput illuatungaatigut taakkunannga qaffasinnnerusunik
isertitaqartut isertitamik qaffakkiartornerat peqatigalugu akileraarutaat
qaffakkiartussasut.
Iluaquserneqartussat
siulliit tassaapput isertitakinnerit soorlu pensioninik pisartagallit
piniarnermik aammalu sulinermik inuussutissarsiuteqartut siunnersuut
pisariitsumik piviusunngortinneqarsinnaavoq. Kommunit isertittagaannut sunniuteqassanngilaq.
Landskarsimulli minnerpaamik ukiumut 11 million kr-nik
isertitsinerussutaassalluni.
Aappaattut
landskarsip isertissinnaasai qaffasinnerussasut angujumagaanni nunamut tamarmut
akileraarut 1 %-iinnarmik pinnani 2 %-imik qaffanneqarsinaavoq. Tamatuma
kinguneranik landskarsip ukiumut isertittagai minnerpaamik 60 million kr-nik
qaffatsinneqarsinnaapput. Kisiannili isertitakinnerusut ukiumut 158.316 krnit
angullugit kisermaat aappariillu eqqarsaatigalugit isertitaqartuinnaat
oqilisaassivigineqassapput.
Augusta
Salling, Aningaasaqarnermut Naalakkersuisoq, Atassut.
Aningaasarsiat
agguaataagaanerulernissaat anguniarlugu allanngortitsinissamik tassungalu
ilutigitillugu ilanngaatinik aammalu procentinik akileraarusersuutinik
qaffaanissamik Inatsisartunut ilaasortap siunnersuutigisat Naalakkersuisuni
isummersorfigineqarput.
Naalakkersuisut
taama allannguisinnaaneq paasisinnaalluaraluarlugu marlunnik patsiseqarlutik
2003-mi ilanngaatissanut il.il. tunngasut allannguuteqannginnissaat
siunnersuutigerusussinaavaat.
Soorlu
tamanna oqaaserisassani immikkoortortaq 13-imi takuneqarsinnaasoq. Tassa 2003-mi
akileraarutitigut ilanngaatissat ilaalu ilanngullugit aalajangersarneqarnerat.
Januarip aallaqqaataani 2002 aallarnerfigalugu ineqarnermut akiliutinik ineqarnermullu tapiissutinik qaffaanerit
maanna isornartorsiuneqaraluttuinnarput pingaartumik akunnattunik
aningaasarsialinnit. Soorlu atorfilinnit il.il.
Akileraarutit
siunnersuutigineqartutuut allanngortinneqassagaluarpata akunnaattumik
aningaasarsiallit aningaasarsiaqarnersaat eqqorneqaqqittussaapput. Tamatumalu
kingunerissavaa ineqarnermut akiliutinik allannguinerup sunniutaanik
sakkortusisitsineq sulilu annertunerusumik isornartorsiuineq.
Naalakkersuisut
isumaat malillugu siunnersuutigineqartutuut allannguinissaq
pingaaruteqarluinnartoq annertoorlu aalajangiunneqartariaqaranilu atuutsinneqartariaqanngilaq
ineqranermut akiliutinik allannguineq sunniutaalu ineqarnermut tapiissutit
aamma ineqarnermut meeqqanut tapiissutit peerneqartut ilanngullugit
tamakkiisumik paasineqarsimatinnagit.
Aammattaaq
aalajangiinerit taamak annertutigisut ingerlanneqassappata Inatsisartuni
namminneerlutik aalajangiinerminnik akisussaaffeqartunik
atuutsilersinneqartariaqarput tassa imaappoq 2003-mi upernaakkut qinersinissap
kingorna Inatsisartunngortussanik. Naalakkersuisut tamakkuninnga
tunngaveqarlutik siunnersuut tapersersorsinnaanngilaat.
Nuna
tamakkerlugu akileraarutip ilaatigut qaffanneqarneratigut akileraarutitigut
ilanngatit allanngortinneqarsinnaanerat pillugu aalajangiiffigisassatut
siunnersuut.
Siullermeernera.
Daniel
Skifte, Inatsisartut Siulittaasuat, Atassut.
Aningaasaqarnermut Naalakkersuisumut
qujanaq. Maannakkullu partiit, Kattusseqatigiit attaviitsullu oqaaseqartuinut
nuuppugut.
Simon Olsen, Siumup oqaaseqartua.
Siumumit Inatsisartunut ilaasortamit
Josef Motzfeldtimit Inuit Ataqatigiinneersumit siunnersuutigineqartoq imatut
oqaaseqarfigissavarput. Siumumit akileraarutitigut qaffaanerit imaluunniit
qaffaateqarnerit tunngavigalugit isertitaqarnerulernissamik siunnersuut
akuersaaruminaatsipparput.
Siumumit ineqarnermut akiliutinut
tapiissutit pillugit aaqqissuussineq boligsikring ukiamut
naliliiffiigineqaqqittussaavoq. Malunnarpoq ineqarnermut akiliutinut
tapiissutit allanngortiterneqarneranni pingaartumik akunnattumik
aningaasarsiallit Naalakkersuinikkut ingerlatsinermi Siumumiit
siunertarineqanngitsumik eqqorneqarsimasut. Aammalu massakkut aningaasarsianit
akileraarutit pillugit allanngortitsinissamik Josef Motzfeldtip Inuit
Ataqatigiinneersup siunnersuutaa akuerineqassagaluarpat akunnattumik
aningaasarsiallit eqqorneqaqqittussaapput. Tamannalu akuerisinaanngilarput.
Taamaattumik Siumumit
Naalakkersuisut isumaqatigaagut tapiissutinut tunngasut tamakkiisumik
qulaajaaffigeqqaartinnagit paaseqqissaartinnagillu mianersoqqusimmata.
Jakob
Sivertsen, Atassutip oqaaseqartua.
Qujanaq.
Innuttaasut assigiiaanerusumik akileraartinneqartarnissaat aammalu landskarsip
isertitaqarnerulernissaa anguniarlugu aningaasarsianit akileraarutit pillugit
Inatsisartut inatsisaata periarfissami siullermi allanngortinneqarnissaanik
Naalakkersuisut siunnersuummik saqqummiussaqarnissaat pillugu Inatsisartut
aalajangiinissaannik Josef Motzfeldtip Inuit Ataqatigiinneersup siunnersuutaa
Atassummit imatut oqaaseqarfiginiarparput.
Siunnersuummik
saqqummiussaqartup akileraartarnermi aaqqissuussinerup ullumikkut atuuttup
annertuumik allanngortinneqarnissaanik kinguneqartussaq saqqummiuppaa. Tassa
inummut ilanngaatip qaffalaarnerisigut isertitassaagaluanit annaasassat
matussuserniarlugit kommunini tamani akileraarutip 2 %-imik kiisalu nuna
tamakkerlugu akileraarut aamma 1 %-imik qaffanneqarnissat siunnermi
anguniarneqarpoq.
Ullumikkut
nunatsinni innuttaasut aningaasaqarnerat ataatsimut tamaat eqqarsaatigalugu
aningaasarsiornerullu qaffakkiartorunnaarnissaanik mianersoqqussuteqartarnerit
eqqumaffigineqartariaqarnerannik innersuussutigineqartut eqqarsaatigissagaanni
akileraarutit ataasikkut 3%-timik tassanngaannartumik qaffanneqarnissaannik
siunnersuut innuttaasut aningaasqarnerannut annertuumik attuisussaasoq
takoreerlugu maannangaaq Atassummit akuerisinnaanagu oqaatigeriissavarput.
Kiisalu
januarip aallaqqaataani 2002 aallarnerfigalugu ineqarnermut akiliutinik
qaffaaneq Atassummit akerlerisimasarput eqqarsaatigalugu ineqarnermut
qaffaanerup qaavatigut akileraarutit 3%-imik qaffanneqarnissaat
oqareernitsituut Atassummit akuerisinnaannginnatsigu matumuuna
oqaatigeqqissavarput.
Taamatut
oqaaseqarluta siunnersuut Atassummit tapersersinnaannginnatsigu matumuuna
oqaatigaarput.
Lars
Sĝrensen, Inuit Ataqatigiit oqaaseqartuat.
Qujanaq.
Inatsisartunut ilaasortaq Josef Motzfeldt Inuit Ataqatigiit aningaasarsianit
akileraarutit pillugit Inatsisartut inatsissaat ukiumut 2003-mi
atuutilertussaq inummut ilanngaatit ammalu aalajangersimasumut ilanngaatip
qaffanneqarnissaanut siunnersuutaanut Inuit Ataqatigiit tapersiinitsinnut
makkuninnga tunngavilersuuteqarpugut.
Aallaqqaasiullugu
oqaatigissavarput tamatta ilisimalereernikuugatsigu nunatsinni ilaqutariit
isertitaqarnermikkut assigiinngitsorujussuarnik atugaqarnerput aamma
Inatsisartuni tamannami ersertarpoq Inatsisartut utoqqaat atugarisaat meeqqat
inuusuttullu atugarisaat kisimiillutik pilersugaqartut atugarisaat piniarnermik
aammalu sulinermik inuussutissarsiuteqartut atugarisaat pillugit
misissuisimanerit aallaavigalugit inimi maani eqqartuinerpassuartigut. Tamanna nassuerutigineqartarluni
uppernarsarneqartareermat.
Inuit Ataqatigiit isumaqarpugut
ullumikkut piffissanngortoq inuuniarnikkut atugarisat pillugit misissuisimanerit
aallaavigalugit maanilu nunatsinni akissarsiakinnerpaartagut suli
oqilisaaffigineqarsinnaanissaat eqqarsaatigalugit minnerunngitsumillu
aningaasarsiatigut isertitatigullu nalimmaanissaq siunertaralugu
iliuuseqartoqartariaqartoq.
Tamanna akileraartarnikkut nutaamik
aaqqissuussisoqarneratigut Inuit Ataqatigiit sinnerlugit Josef Motzfeldtip
siunnersuutaatigut anguneqartussaavoq.
2003-mut inummut ilanngaat 8.000-nit
tassa ukiumut 48.000-nngorlugu qaffanneqarneratigut aammalu aalajangersimasumik
ilanngaat 2.000 kr-nik tassalu 10.000 kr-ninngorlugu qaffanneratigut tamanna
nunatsinni innutaasut minnerpaamik 80 %-iisa iluaqutigissavaat.
Nunatsinni inuuniarnikkut atugarisat
pillugit misissuisimanerup aamma takutippaa inuit qulit 100 kr-ni
agguaatissagunikku taakkunannga tallimat 90 kr-nit pissarsiarisaraat
sinnerisalu tallimat taamaallaat 10 kr. sinneruttoq agguaattarlugu.
Aamma nunatsinni innuttaasut
sisamararterutaat ukiumut 100.000 atallugu isertitaqartarput. Aammalu innutaasut
affaat sinnerlugit ukiumut 200.000 ataallugu isertitaqartarput.
Tamanna misissuisimanerup aamma
takutippaat. Tamanna maannakkut iliuuseqarfigineqartariaqartoq Inuit
Ataqatigiit isumaqarpugut. Misissuinerit qulaajaanerit ilami innuttaasut atugarisaat
pillugit misissuisimanerit qulaajaanerillu qassimmiaava aatsaat
ingerlanneqareerpata iliuuseqarnissat inuiaqatigiit utaqqikatataat
Naalakkersuisut Inatsisartunillu nalimmassaavigineqassappat. Imaluunniit
timitaliivigineqassappat.
Nunatsinni inuuniarnitsigut
assigiinngitsunik ajornartorsiuteqarnerput nalunngilarput aamma nalunngilarput
ilaatigut tamanna pissuteqarmata aningaasarsiatigut isertitatigullu
assigiinngippallaamik atugaqarnitsinnik.
Taamaattumik Inuit Ataqatigiit isumaqarpugut
inuiaqatigiit ullumikkut aningaasatigut killiffipput eqqarsaatigalugu aatsaat
taamak pisariaqartigisoq inuiaqatigiinni ajornartorsiutit annikillisarniarlugit
ataatsimut kivitseqatigiinnissaq.
Tamanna inuiaqatigiinni
sanngiinnerusortatta inuuniarnerminni atugarissaarnerulernissaatigut
anguneqarsinnaasutut Inuit Ataqatigiit isumaqarpugut. Tamannalu tamatta aamma
akisussaaffigisariaqarparput. Taamaattumik Inuit Ataqatigiit Inatsisartunut
kaammattuutigissavarput Inuit Ataqatigiit sinnerlugit Josef Motzfeldtip
akileraartarnermut inummut ilanngaat 8.000 kr aammalu aalajangersimasumik
ilanngaat 2.000 kr-nik qaffanneqarnissaanut taakkunuunalu peqatigitillugu
kommuni takornanni ataatsimut akileraarut 2 %-imik aamma nuna tamakkerlugu
akileraarut 1%-imik qaffanneqarnissaanut siunnersuutaanut akuersaartumik
isummersoqqullugit.
Inatsisartullu akileraartarnermut
akitsuusiisarnermullu ataatsimiititaliaani siunnersuut sukumiisumik
nalersoqqissaarneqassasoq ilanngullugu aamma kaammaattuutigaarput.
Mogens Kleist, Kattusseqatigiit
oqaaseqartuat.
Qujanaq. Nuna tamakkerlugu akileraarutip
qaffanneqarneratigut akileraarutitigut ilanngaat allanngortinneqarsinnaanera
pillugu aalajangiiffigisasssattut Josef Motzfeldtip siunnersuutaanut
Kattusseqatigiinniit imatut oqaaseqaateqassaagut.
Naalakkersuisut akissuteqaatai
taperserlugit siunnersuutaasoq akuersaassanagu. Kattusseqatigiinniit
oqaatigissavarput. Tassami ullumikkut ineqarnermut peqqussutip nutaap sunniutai
suli annertunerusumik naliliiffiginngilagut. Aammattaaq ineqarnermik akiliutip
innuttaasuniit annertuumik akerliuffigineqarnera tunngavigalugu.
Ullumikkut akileraarutip
allanngortinnissaa eqqortuusorinngilarput. Ullumikkut akunnattumik isertitallit
ineqarnermut akiliutip allanngortinneratigut eqqorneqareerput. Aammattaaq
ullumikkut akissakinnerit kisiisa eqqarsaatigalugit taamatut akileraarutitigut
allannguinissat eqqortuusorinngilarput.
Ilaqarpugummi ilinniarsimasunik sivisuumik
ilinniareerlutik naammassisartunik taakku qanoq iliussavagut ingerlaannartumik
eqqussagutsigit.
Ullumikkummi ilaqarpugut
ilinniarsimasunik. Taakkua ulluinnarni meeraqarunik annertuumik
akiliuteqartartunik meeqqerivinnut ineqarnermut ulluinnarnilu inuuniutinut.
Taakku puiguinnassavagut? Aperisariaqarpugummi
sooq taava ilinniartissavagut kingornatigullu naammassippata annertuumik
eqquiffigalugit. Inuusuttut arlalissuit oqartarput akissakinnerit sooq
kisisiisa aaqqiiviginiartuassavagut oqartarlutillu taavami uagut immaqa
pitsaanerussaaq ilinnianngikkaluarutta.
Eqqaamasariaqarparput inuusuttut
ilinniarsimasut pisariaqartippagut ilinniareerpata sooq aammattaaq taamatut
pillassavagut. Ilinniareerunik aallartisarnialerpata. Taamaattumik
akileraarutitigut aaqqiiniarutta eqqarsarluaqqaarluta iliuuseqartariaqarpugut.
Ullumikkut aningaasaqarnerput
qissimissagutsigu oqartariaqarpugut aatsaat pilersaarusiorluarnikkut
anguniagassagut anguniartariaqaratsigit. Imaanngitsoq ullormiit ullormut
aaqqiinissat tunngavigalugit. Aatsaat pitsaasumik pilersaarusiornikkut
aningaasanik tunngasunik iluamik ataatsimoorluta aaqqiisinnaavugut. Taamatut
oqaaseqarluta aalajangiiffigisassatut siunnersuut Kattusseqatigiinniit
akuersaarniarnagu oqaatigissavarput.
Otto
Steenholdt, attaviitsoq.
Siunnersuut
atuarlugu oqaatigisariaqarpara ussernartorsiornaraluartoq. Tassa siullermik
soraarnerussutisiallit piniarnermik sulinermillu inuussutissarsiuteqartut
siunnersuutikkut tamatumuuna iluaquserneqartussaagaluarmata. Aamma landskarsip
isetitaqarnerulaarnissaa siunnersuutikkut kissaatigineqarluni.
Tassa
uanninngaaniit kissaatigineqartartut siunnersuuteqartup kissaatigimmagit.
Taamaattorliuna nunap aningaasaqarluarnissaa akileraarutit
qaffattuaneqarnerisigut ingerlataq uanga isumaqatigineq ajoriga.
Siunnersuuteqartup siunnersuutaa atuarlugu politikki suna ingerlanneqartoq
ilisarnarpoq. Pissaqarnerusut ersukkerlugit pissakinnerusullu oqilisaaffigalugit.
Isuma
assortuinnagassaanngilaq. Inuit assigiinnerusumik aamma akileraarutitigut
pineqartariaqarnerat oqarta naleqquttuuvoq. Akissuteqaalli isumaqatigaara.
Ukioq manna januarip aallaqqaataaninngaaniit akiliutissanik tapiissutinillu
ataatsikkoortumik qaffaanerit taamak innuttaasunut pingaartumik akunnattumik
akissarsialinnut malunnarluni isornartorsiutigineqarlualersut aamma suli
ilallugit periuseqarnissaq isumaqarpunga mianersuutigisariaqarallartoq.
Taamali
aamma oqaraluartillunga maluginianngitsuunngilara akissuteqaatip mianersornera.
Naak akissummik oqaatigineqaraluartoq siunnersuutip assinga Naalakkersuisunit
eqqarsaatigineqaraluarsimasoq. Ilami qinersinissaq ungasigunnaarpoq.
Pisarnerlu malillugu sapinngisamik akileraarutinik qaffaanaveersaarnissaq aamma
ukiuni makkunani Naalakkersuisuutitaqartut mianersuutigilluinnaraat
malunnarpoq.
Pisarnerlu
malillugu soorunami tulliani inatsisartunngorumaartunut suliassaq
miloriutiinnarlugu. Taamaattumik siunnersuuteqartoq
nersualaanngitsoorsinnaanngilara qinersinissaq pinnagu pissutsilli piviusut
aaqqinneqarnissaminnillu pisariaqartitsisut isigimallugit taamak siunnersuuteqarsimammat.
Ajoraluartumilli
taamaattoq aamma uanga nassuerutigisariaqarpara Naalakkersuisut akissutaat
isumaqatigigakku. Pissutsit akissuteqaammi tunngavilersuutigineqartut
naammagisimaarlugit tunaartariumallugit.
Josef
Motzfeldt, Inuit Ataqatigiit.
Oqaaseqartut
amerlanerit, tassalu Siumukkut, Atassutikkut Kattusseqatigiillu aamma kisimiittoq
aamma immaq taamatut nipilimmik oqaaseqarunarpoq paasiuminaakuluppoq, kisianni
oqaatigineqartut tassaavoq Inatsisartut siorna ukiakkut ineqarnermut
tunngasunik aaqqissuussinermik paasissutissat eqqunngitsut toqqammavigalugit
Inatsisartut aalajangertinneqarsimapput.
Taanna
Naalakkersuisooqatigiit minnerunngitsumik nassuerutigaat. Taamanikkut
Naalakkersuisut uagut peqataaffigisagut Naalakkersuisoqarfiit arlaqarlutik
suliaannik Naalakkersuisut tamatumunnga akisussaasoq saqqummiisinneqarpoq
innuttaasunik ineqarnermut akiliisarnerup allanngortinneqarneratigut
innuttaasut 10%-ii isertitaqqortunerpaat eqqorneqassasut. Tamannalu upperalugu Inatsisartut maani
aalajangerpugut.
Massakkut qanoq oqaluserpat
Naalakkersuisuusoq aamma eqqunngitsumik aalajangiisimavugut Inatsisartut
eqqunngitsumik salluliorluni aalajangiisinneqarsimapput. Tassa taanna Inatsisartuni
uparuartorneqassappat uanga tupigisassarinngisaraluara.
Massakkut siusinnerusumik siorna
kingusinnerpaamik siorna ilanngaatit akileraartarnermut ilanngaatissat
aalajangersaaffigigatsigit aamma aningaasarsiornikkut pissutsinik killiffik
siorna majimi oqaluuserigatsigu Siumukkut Atassutikkut Kattusseqatigiit
ilanngullutik Inuit Ataqatigiit peqatigalugit akileraartarnermik pissutsinik
nutarterisariaqarneq eqqartorpaat.
Innuttaasut atukkamikkut
naligiinnerulernissaanik illersuisuullutik oqalugiaqattaarput periarfissanngormat
naak utoqqarnik isertatikkinnerusunik illersuinersi. Ilinniagaqartut
atugarissaarnerulernissaannik aningaasarsiaat qaffanngikkaluarlugit, kisianni
pisinnaasortagut nammakkernerulaarlugit.
Ullumikkut annaanniarneqartut tassaapput
isertaqqortunerpaat maani Kattusseqatigiinninngaaniit Mogens Kleistip
oqalugiaataa najoqqutaralugu ilinniarsimassuseq akilersinnaajunnaarsimasutut
oqalugiaatigineqaqattaarpoq.
Siumup oqaluttuata Atassutillu oqaluttuata
sakkortuumik oqaaseqarfigaat akileraarutininngoooq qaffaanialeqisugut.
Akileraarutitigut oqaluuserinnittarnermi soorunami teknikkertaqaqimmat
paasinnissinnaaneerput assigiinngiiartorujussuuvoq aamma tamanna
tupigineqassanngilaq paasisimasagut tamatigut annertoorsuuneq ajormata.
Matumani eqqaamaneqartariaqarpoq
siunnersuummik saqqummiininni tassaavoq ilanngaatit qaffanneqartariaqartut
10.000 kr-nik taamaalilluni isertitakinnerit akunnarttumillu isertitaqartut
oqilisaassivigineqaqqusaasut Inatsisartunit tamanit oqilisaassivigineqassammata.
3%-imik akileraarutit qaffannerat
katillugu 2% kommunit akornanni naligiissaarinermi 1%-ilu nuna tamakkerlugu
akileraarummut tassaasussaavoq matusissutissaq karsip annaasassaanut
taakkununngalu nammattussat inimi maani oqaaserineqartut upperigaluaratsigit
tassaasussaapput isertitaqqortunerpaat.
Assersuutitut taaneqarsinnaavoq
isertitakinneq SIK-mi immaqa isumaqatigiissut malillugu akissarsiaqarpoq.
Akissarsiaqarput aappariit 130.000 missaani ukiumut akissarsiaqarsimagunik
ullumikkut 13.600-nik akileraartartut siunnersuut manna najoqqutaralugu
7.580-nik ikinnerusunik ukiumut akileraartalissagaluarmata.
Aappariit immaqa akunnattunik immaqa
akunnattumik isertaqartutut taaneqarsinnaasut ukiumut 500.000-nik aappariillutik
isertitaqartartut ullumikkut 161.600 kr-nik akileraartartut nutaaq
eqqunneqarpat ukiumut 3.500 tassa qaammammut 300-t inorlugit
akileraarnerulissapput. Tassalu taakkua maani amerlanerit isumaqarput taakku
artukkerujussuassagigut.
Naak isertitakinnerusunik
illersuisuunerarluni oqaluttarneq. Atorfissaqartitatsinnik
isertitsinerulaarnissaq inuiaqatigiit naligiinnerusumik pitsaanerusunik
atuarfitsigut allatigullu atugaqarnissaanik isertitaqalaarnissaq
siunnersuutigineqarpoq reformimilluunniit allannguerujussuarnermik
taaneqarsinnaanngilaq pisariingaarami.
Naligiinnerulernissamik
oqartuusaartarsimanerit maani ersarissorujussuupput 3 %-iminngooq
qaffaaniarpugut 3%-imik qaffaaneq qaffaanermut sanilliullugu
ataasiarluniluunniit oqaaseqartunit taaneqanngilaq inummut ilanngaatip
nalinginnaasumillu ilanngaatip qaffaanneqarneratigut isertitakinnerpaat
akunnattumillu isertitaqartut annertuumik oqilisaassivigissagatsigit.
Aammalu uppernarsaatitut ullumikkut maani
ataatsimiinnermi aqutsisuusoq tassalu Inatsisartut Siulittaasuat siorna
akileraarutitigut ilanngaatit aalajangersaaffigissallugit oqaluuserinninnermi
partiini sinnerlugu siulittaaffigisamini taamanikkut oqaaseqarami majip arfineq
aappaani partiini sinnerlugu ilaatigut ima oqarpoq. ANaggasiullugu Atassummiit periarfissaq
manna iluatsillugu ukiuni kingullerni oqaatigiuarsimasarput tassani pineqarpoq
Naalakkersuisut pisortatigoortumik pimoorussamillu nunatsinni akileraarutitigut
iluarsaasseqqinnissamut suliniuteqalissasut. Aammattaarlu
akileraaruserneqartussanut iluarsaaqqinnissamullu suliniuteqalissasut
oqallisissiatut siunnersuutigineqarsinnaasunik@.
Massakkunngooq Inatsisartut
nutaanngortussat tamanna akisussaaffigissavaat uagut isumaqarpoq maani innuttaasut
naligiinnerunissaanik sunniuteqarnermut akisissaaqataarusunngitsugut
amerlanerit ullumikkut taamak oqarput. Ajoqaaq.
Augusta Salling, Aningaasaqarnermut
Naalakkersuisoq, Atassut.
Naalakkersuisut sinnerlugit qujavunga
partiit Kattusseqatigiit Attaviitsullu aapaata oqaaseqaatitsinnut aamma
akissuteqarnerannut. Aammalu amerlanerussuteqarluartut Naalakkersuisut
siunniussaannut tapersiimmata assut qujavunga.
Tassami Naalakkersuisuni
pingaartissimavarput assut innuttaasut siunertarineqanngikkaluamik
eqqorneqarsimasut tassa ineqarnermut akiliutit allanngortiterneqarneranni
taakkununnga annertunersumik aamma eqqueqqinnissaq taanna aamma
pinngitsoorniarlugu misissuinerit annertunerusut pisariaqartut
Naalakkersuisuninngaaniit siunniussimavarput.
Tassami eqqortoq taannaavoq akunnattumik
isertitaqartut aamma taakkua eqqorneqaqqittussaapput uani siunnersuut
akuersaarneqassappat. Tamannalu pissutigerpiarlugu uagut
pisariaqartissimavarput misissuineq suli annertunerusoq ingerlattariaqartoq.
Aamma ilumoorpoq akunnattumik isertitaqartut aamma taakkuupput aappariillutik
akunnattumik isertitaqartut aningaasartuutit annertuut aamma nammatarisarpaat.
Tassa meeqqerivinnut assigisaanullu aamma tamakkiisumik akiliisarnerat tassani
pisarpoq.
Taamaattumik misissuinerit isertitanut
tunngatillugu akileraarutitigut allannguiniarnermi soorunami tamakku
peqqissaartumik aamma nalilersorneqartariaqarput. Tamannalu tunngavigalugu
Naalakkersuisuninngaaniit pissusissamisoortutut isigisimanngilarput maani
ilanngaatip qaffanneqarnissaanik siunnersuuteqarneq.
Tassalu aamma erseqqisaatigineqareerpoq
ineqarnermut akiuliutip nalileqqinneqarnissaa ukiumut ingerlanneqartussaavoq.
Tamannalu aamma oqaaseqartunit amerlanernit toqqammavigineqarmat quassutigaara.
Tassalu annertunerusumik
oqaaseqarfigisariaqartutut isiginngilara pissutigalugu isummat Inuit
Ataqatigiinninngaaniit aamma saqqummiussuunneqartut taakku
ilisarisimalluarpapagut soorunami. Aamma isummat aamma misissueqqinnissami
akileraartarnermut tunngatillugu ukioq manna allannguisoqannginnissaanik
siunnersuuteqarpugut. Taannalu toqqammaviussaaq, kisianni isertitat
annertussusaanut tunngatillugu ilumut akileraarutitigut taanna aaqqiisarneq
ingerlanneqassanersoq misissuinerni nalilersuinernilu aamma
ingerlanneqartussaavoq tamanna pinngitsoornani. Qujanaq.
Simon Olsen, Siumut.
Aap akileraarutissanik qaffaanissamut
Siumumit akuersaannginnerput oqaatigeerparput tassalu akunnattunik
aningaasarsiallit ullumikkut akileraarutaannaanngitsutigut kisianni
assigiinngitsutigut nammataqarnerujussuat mianersorfigilluinnartariaqarmat.
Assigiinngitsut Naalakkersuisuniit
oqaatigineqartut misissuinissamut tunngasut isumaqarpugut pimooruttariaqartut
aammattaarlu taassumap saniatigut isiginngitsuusaassanngilarput millionit
affai qulaallugit aningaasarsiallit akunnattunik aningaasarsiaqartutut
taanissaat aamma mianernalaartussaammat. Taamaammat oqareernitsitut
aalajangiusimavarput Naalakkersuisut misissuijumallutik qulaajaajumallutik
suliaqarumanerat uppernartutut aammalut tatigisariaqartutut tamatsinnit
Siumuminngaaniit isigisariaqaripput.
Taamaammat maannakkumut aningaasarsianik
akunnattunik isertitaqartut eqqugaaqqinnginnissaat maannakkut
eqqorneqareersimanerat pissutigalugu misissuilluarfigineqarnissaat
piumasaraarput.
Jakob Sivertsen, Atassut.
Qujanaq. Tassa naatsunnguamik
erseqqissaateqalaarniarama tassa erseqqissumik oqaatigeereerparput ukiaq
2001-imi ineqarnermut tunngasunik oqallikkatta eqqaamaneqassaaq uagut partiimit
isumaqataasimannginnatta. Ilaatigut akunnattumik akissarsiallit meeqqerivinni
akisunerpaamik akiliisartut meeqqat tapisiaannik pissarsineq ajortut
ineqarnikkut akisunerpaamik akiliisartut taakkua eqqorneqartusaanerat
ilaatigut peqqutigalugit akuersaarsimanngilarput.
Taamaattumik aamma siunnersuut manna
taakkununnga attuumassuteqarluinnarnera eqqarsaatigalugu akuerisimanngilarput.
Aamma erseqqissaassutigissavara
nunarsuarmi sumiluunniit pissakinnerusoqarlunilu pissaqarnerusoqartarpoq pissaqarnerusut
tassaagajuttarput aamma ilungersorlutik ilinniarlutillu angusaqarsimasut.
Tamakku nunatsinni amerlanerulerpata taava nukissaqalernerusimassaagut
ikiortarialinnut. Taamaaliornitsigut taava aningaasat amerlanerusut
pikkorissut amerlanerulerpata taava aningaasat amerlanerusut
isertissinnaanngussavagut.
Qaffalaartullu pitsaasumik ingerlasut
mangiarutsigit taava aamma nungullartissavagut ingerlaqqeriarnissaannik
allatut ajornartumik nakkaattoortillugit. Ilaatigullu oqartoqartarpoq nammineq
pisuullutik taamaaliortut, kisianni mianersuutissavarput nammineersinnaaneq
ataqqissagatsigu.
Nammineersinnaasut amerlanerulerpata taava
pissakinnerusunut nukissaqarnerulissaagut ikiuunnissatsinnut. Qujanaq.
Lars Sĝrensen, Inuit Ataqatigiit.
Siullermik partiit oqaaseqartui
oqaaseqarfigissagaanni ilaatigut aamma ineqarnermut ukiarmi Inatsisartut
amerlanerussuteqartut allannguineranut tunngatillugu taamanikkut
Naalakkersuisuusut isumaginninnermut ineqarnermullu Naalakkersuisut
Inatsisartut ataatsimiititaliaani ilaasortat arlallit ulloq naavillugu
nassuiaaffigivaat taamanikkut ineqarnermut akiliutit allanngortiternerisa
kingunerisinnaasaat pillugit. Taamanikkut ersarissorujussuarmik
oqaatigineqartut eqqorneqartussat tassaasut tamaallaat innuttaasut 10%-tiisa
missaannaat.
Taamaakkami aamma eqqunngitsunik
nassuaasimasinnaanissaat soorunami misissorneqartariaqartutut
isumaqarfigineqartariaqassooq.
Atassutip oqaaseqartuata ilaatigut
oqaatigivaa ullumikkut atuuttut annertoorujussuarmik allanngortinneqarnerata
massumap siunnersuutip kingunerissagaa. Kisianni taanna teknikkimut tunngasoq
taannaavoq. Tassa kommuninut kommuninut kinguneqartussaanngilaq nunatta
karsianut 11 million kr-nik isertitaqarnerulernermik kinguneqartussaavoq soorunami
innuttaasut ilaat akileraarnerulertussaapput kisiannili 80%-tiisa aamma
iluaqutigisssagaat aamma misissuisimanerit oqaatigaat.
Partiinut Siumukkormiunut
aperisariaqarnerput unaalerpoq akunnattumik isertitat qanoruna aningaarsartaat
amerlatigisut. Tassami ineqarnermut tassa boligsikringimut tunngatillugu
tassalu Inatsisartut aalajangerpaat ineqarnermut tapiissutit 428.000 angullugit
tapiiffigineqarsinnaasut. Imatut oqaatigalugu taakkua
oqilisaaffigineqarsinnaasut.
Taava akunnattumik isertitat sumut
killilerneqassappat tassami siunnersuuteqartup ilaatigut erseqqissaatigivaa
ukiumut 200.000-it ataallugit isertitallit taakkua ilanngullugit ugguuna
siunnersuutikkut oqilisaaffigineqassapput. Aamma Naalakkersuisunut
apererusunnarpoq Naalakkersuisut oqaatigivaat akileraartarnermut tunngatillugu
misissuilluaqqissaarnerit aallaavigalugit ingerlatsisoqartariaqartoq.
Taava Naalakkersuisut aamma
aperisariaqarparput immikkoortoq siusinnerusukkut suliarereernikuusarput
rejeafgift tamaalillugu suliarisimassavaat. Taamaassimanavianngilaq tassami
regnskabinik tunngaveqanngitsumik rejenut akitsuut taanna ilaatigut
Inatsisartunut aalajangigassanngortinneqarpoq.
Taamaattumik eqqortuusinnaanngilaq
misissuilluarnerinngooq aallaavigalugit tamakkua suliarineqartarmata.
Pisariitsunnguuvoq aaqqiinissaq allaffissornikkut annertunerusumik
sammineqartussaanngilaq. Aammali Naalakkersuisut mianerisariaqarpaat
innuttaasut utoqqaat atugaat pitsanngorsarniarlugit neriorsornikuuvaat
inuusuttut meeqqat inuusuttullu atugaat aamma pitsanngortinniarlugit aamma
neriorsuutiginikuuvaat taakkua ukiut arlallit taamatut neriorsuuteqarput.
Aamma Naalakkersuisut oqaatigeereerpaat
ingerlatsinermut aningaartuutit pillugit qaffatsaaliorneqassasut. Taamatut eqqarsarsimagaanni
taava ataasinnarmik periarfissaqarpoq. Tassalu akileraarutitigut allannguineq
taanna aningaasarlersuinermut aqqutaasariaqarpoq. Allamik aqqutissaqanngilaq.
Maannakkummi oqaatigineqartareerpoq
ilaatigut nunatta aningaasaqarnera pillugu nassuiaasoqarmata 261 million
kr-nik maannakkut pissutsit allangortineqanngippata qaffakkiartuutaassooq.
Tamakkua ataasinnarmik aaqqinneqarsinnaapput. Tassalu akileraarutitigut
assigiinngitsutigut nutarterinermik. Una maannakkut siunnersuutigineqartoq tamatumap
kingunerisussaavaa.
Inatsisartunut aamma
oqaatigisariaqarparput ila pikkorippallaartaaqaagut aningaarsartuutissanik
amerlanerusunik ujartuinermik pikkoriffeqartaratta. Aamma Naalakkersuisut
siusinnerusukkut kaammattuutigisarpaat isertitaqarnerulernissamik kingunilimmik
Inatsisartut pikkoriffeqarnerusariaqarnerat.
Tamannalumi isumaqarpunga
siunnersuuteqartup ersariffaarissumik aammalu ajornanngitsunnguamik
siunnersuuteqarnermigut ilaatigut angusimagaa. Ataatsimut suliassagut
tamaviisa nalilersunngikkutsigu taavalu ataasiinna isigalugu
aaqqiinnniarsarigutsigu qaquguluunniit inuiaqatigiit atugaat
assigiinngitsutigut pitsanngorsarsinnaanngilagut. Taamaakkami aamma
neriuutigilluinnarpara Inuit Ataqatigiinninngaaniit akileraartarnikkut tassami
tamaavitta kissaatigigatsigu inuiaqatigiit nammaqatigiittariaqartugut.
Akileraartarnermut ataatsimiititaliami tamakku sukumiisumik
eqqartorneqartariaqarput.
Ajornartorsiutit assigiinngitsorpassuit
nalunngisagut aaqqittariaqartut taakkua aningaasalersussagutsigit
aningaasanillu nutaanik nassaarsinnaanata. Naalakkersuisuninngaaniit
oqariartuuteqartoqartareermat. Taava akileraartarnikkut nutaamik
aaqqissuussineq allanngortiterineq taanna aqqutissatuaavoq. Allamik
aqqutissaqanngilagut.
Taanna neriuppunga ataatsimiititaliami
sukumiisumik nalilersorneqarumaartoq.
Pakatsivunga Inuit Ataqatigiit
oqaaseqartuattut soorlu siunnersuuteqartup oqaatigereeraa pissakinnerit
oqilisaaffigineqarnissaanik Inatsisartut oqalunnerat asuleerneruvoq.
Piffissanngormat aammalu inuiaqatigiinni pisariaqartitsisut
aaqqiiniartoqalermat taava Inatsisartunut ilaasortat Naalakkersuisullu
qimarratiginnipput.
Mogens Kleist, Kattusseqatigiit.
Qujanaq. Josef Motzfeldtip taamatut
akileraarutitigut qaffaasinnaanermut siunnersuutaa paasisinaakutsoorparput
tungitsinninngaaniit. Aaqqissuiniarutta taava maani inimi aaqqissuiniarutta
pingaaruteqarpoq pitsaasumik pilersaarusiornikkut aaqqiniarnerit. Kommunit
qanimut suleqatigalugit KANUKOKA qanimut suleqatigalugit. Innuttaasut
tusarniartariaqarparput. Taakku innuttaasut qanoq isumaqarpat.
Ineqarnermut ukioq manna qaffaagatta
nalunngisa ilaat ilinniartitsisoq kisimiittoq qaammammut 500 kr-nik
inigisaminut akiuteqartalerpoq. Ukiumut 6000-it tassunga inummut aningaasarparujussuupput.
Akunnattumik taamatut isertitaqartuugaluarluni. Ullumikkut taamatut
siunissarlu ungasinnerusoq isigalugu pilersaarusiorniarutta pitsaasumik
qissimeqqaartariaqarparput nunatta aningaasaqarnikkut qanoq ingerlanera.
Naalakkersuisut saqqummiipput ukioq
2001-imut landskarsip naatsorsuutaanik pilersaarutininngaaniit
illuatungerluinnaanut mumillutik 80 million sinnerlugit isertitat amerlanerupput.
Aammaluu taassumap qaavatigut amigartoorutissaraluit naatsorsuutigalugu 160
millionit tikillugit.
Aningasaqarnerput taamatut ingerlatillugu
pitsaasumik pilersaarusiortariaqarpugut. Taamaattumik aaqqiiniarutta
innuttaasunut pitsaanerpaamik aaqqisinnaasariaqarpugut politikki una
pissakinnerit pissakinnerit, pissakinnerit, pissakinnerit. Qasseriarlugu maani
inimi eqqartulerparput. Pissakinnerit aamma qaffaaqataarusunnginnamik
arlaatigut. Sooq aamma taakku tusarniaaffigissanngilavut? Sooq aaqqiiniarutta
aaqqinniassavagut akileraarutitigut? Aasiit akileraarutit,
akileraarutit. Sooq allatigut aaqqiiniarsinnaanngilagut misissuilluarluta?
Taamaattumik pingaaruteqarpoq pilersaarusiorniarutta aningaasaqarnikkut aamma
periarfissarisinnaasagut assigiinngitsullu tamaasa qulaajassallugit.
Taamaattumik
qaffaaniarnissamut Josef Motzfeldtip taanna oqaatigisaa uagut
tungitsinninngaaniit oqaatigissavarput qaffaaniarnissamut soorunami
ilaaniassaagut, kisianni arlaatigut pitsaasumik inuiaqatigiinnut tamatsinnut
nalimmassaasinnaasumik peqartilluta periarfissarisinnaasagut tamaattut ujartortariaqarpagut.
Ullumikkut
aningaasaqarnerput qissimeriarutsigu tassa 160 millionit tikillugit taamatut
landskarsip ukioq kingulleq ilimaginngisaminngaaniit pitsaanerusumik
naatsorsuuteqarpoq. Ukioq mannamummitaava qanoq inissisimassava?
Pilersaarusiorniarutta
ungasinnerusoq isigalugu pilersaarusiortariaqarpugut aamma maani
oqaluttarfimminngaaniit oqaatigisareernikuuvarput ukiuni tulliuttuni qulini
15-ni angallannermut ilinniartitaanermut ineqarnermut takornariaqarnermut
aalisarnermut qanoruna ittumik politikkeqarniartugut.
Qalaserpugut
isigiinnarnagu taamatut pilersaarusioqattaarnata. Ataatsimoorluta
ungasinnerusumut pilersaarusiorniarta taakkulu toqqammavigalugit
aaqqeeriarsinnaanerit akileraarutitigut assigiinngitsutigullu. Taakkua
toqqammavigalugit anguniarutsigit pitsaanerpaajuvoq. Qalaserput isiginagu
ullormiit ullormut qaffaniarata. Aallaanngiivippoq qineqqusaarnermi una
assorujorujussuaq atorneqartoq appartitsiniarnerit, kisianni pitsaanerpaamik
aaqqiiniarutta ungasissumut pilersaarusiortariaqarpagut. Taanna
pingaaruteqarluinnarpoq. Qujanaq.
Josef
Motzfeldt, Inuit Ataqatigiit.
Siorna
Inatsisartuni akileraarutitigut allannguiminernerit isertitaqqortunerpaanut
ilaatigut akileraarutitigut akiligassanik kinguartiterisarnerit killeqanngissusianik
soraajuitsumik atuuttussanik atuisinnaaneq killilerneqarpoq. Taamanikkullu
Naalakkersuisut piareersimasuutitaat tassaavoq uanga ullumikkut Inuit
Ataqatigiit sinnerlugit allannguutissatut siunnersuutiga siunnersuutinnut
assingusorujussuaq Naalakkersuisut taamanikkut piareersimasuutigaat. Kisianni
ataatsikkut tamaasa piumannginnatsigit isumaqatigiippugut ukioq tulleq
upernaakkut ataatsimiinermi akileraartarnermut iluarsaasseqqinnissamik
siunnerfeqartumik saqqummiiniarluta.
Okay,
naalakkersuisooqatigiit allanngorput, kisianni naalakkersuisooqatigiit affaat
suli aaffaanik amerlanerit suli Siumukkormiuupput. Siumukkut taamanikkut
ukiakkut ataatsimiinneq ilanngullugu allannguinissamik upernaaq manna saqqummiinissamik
neriorsuuteqartunut peqataapput, kisianni massakkut paasinarpoq Atassutip
kaasarfianut toqqorlutik pisuusaarnertik matumuuna saqqummersikkaat.
Imaluunniit kiinavitsit saqqummersiinnarnerpaat.
Simon
Olsenip Siumut sinnerlugu apeqqusiinera millionit qeqqininngooq
isertaqartunngooq akunnattumik isertitaqartutut taassanerpagut. Naluara immaqa
ilissi akissaatikinnertut taarusussimagassigit taamak apeqqusiivusi. Apeqqutit
paasinanngilaq.
Inuunermik
isiginneriaaseq tassalu pilimanerusut pissakinnerusunut sanngiinnersortaminnut
ikiuisarnerat inuunermik isiginneriaaseq inuiaat kalaallit qangaaniilli taanna
ilisarnaatigisimavarput. Nikanarsaatitut massakkut isigitinniarneqarpoq
pilimanerusut pissakinnerusunik ikiuussinnaanerat matumuuna ilaatigut
timitaliiviginiarneqarmat nikanarsaatitut. Tulluusimaarutissaq, taamatut
piginnaaneqaramik tulluusimaarutissaat, qanga tulluusimaarutaasoq ullumikkut
nikanarsaatitut oqaluttunit saqqummiunniarneqarpoq Siumukkunnit
Atassutikkunnit minnerunngitsumik Kattusseqatigiinnit.
Tupiginngilara
Atassutikkut taamatut eqqarsartaaseqarnerat ullumikkut uppernarseqqiinnaratsigit
nalunngereerparput. Tupinnartoq aajuna Siumukkut Kattusseqatigiit utoqqarnik
ataatsimiinnerit tamaasa utoqqarnik oqilisaassinissamik oqaluttut matumuuna
siunnersuuteqarnikkut oqilisaanneqarnerpaasussat ilaat utoqqaat matumani
oqilisaanniarneqalermata qanoq oqalulerpat. Tamaaliorsinnaanngilagut
allatigut iluarsiissariaqarpugut. Sutigut, Mogens Kleist?
Innuttaasut
atugaat piareersarluaqqaarluginngooq allannguutissat tamakku saqqummiunniartigit.
Innuttaasut atugarisaanik Inatsisartut misissuisitsisarsimanerat Naalakkersuisut
misissuisitsisarsimanerat nalunaarusiat tamakku takutereerpaat atukkatigut
innuttaasut maani nunami atukkamikkut qanoq assigiinngitsigisunik
atugassaqartitaasut.
Taamaattumik
suna misissorniarneraat Kattusseqatigiit taavalu allatigunngooq
oqilisaanneqarsinnaasunik oqalunnerat oqaatiginagulu isumassaaleqineq asuli
oqarluartaarneq maanngaaniit ullumikkut atorfissaqanngilaq.
Inuit
Ataqatigiit oqaaseqartuata oqarneratut ataatsimiititaliami manna suliassaavoq
aamma Mogens Kleistip oqarneratut tusarniaavigineqartussat
tusarniaqqaartariaqarput allannguinerit annertuujummata. Aap ataatsimiititani
suliassat pingaarnerit tassaapput ataatsimiititaliap maani oqaaserineqartut
najoqqutaralugit susassaqartunik tusarniaasussaanera. Taanna
naammassineqarsinnaavoq.
Taavalu
Atassutip oqaluttuata naak tamanna eqqarsartaaseq Atassutikkut
ilisarnaatigigaat nalunngikkaluarlugu tupigusuallaqaanga killuullungalu immaqa
kanngusuallappunga nunarsuarmigooq piitsoqarlunilu pisooqarpoq.
Taamaattuassoorooq qanoq iliuuseqarfiginissaagooq soqutaanngilaq
iliuuseqarfiginngikkaluarutsigu.
Augusta
Salling, Aningaasaqarnermut Naalakkersuisoq, Atassut.
Qujanaq.
Siullermik erseqqissassavara Inuit Ataqatigiinniit oqaatigineqartoq
eqqunngitsumik nassuiaateqartoqarsimasinnaaneranik pasilliuteqarluni. Tassa
ineqarnermut tunngasut maani Inatsisartuni siorna ukiakkut aalajangersarneqarnerannut
tunngatillugu Naalakkersuisuusup eqqunngitsumik nassuiaateqarsimasinnaaneranik
oqaaseqarneq. Tamanna oqaatigisariaqaratsigu tunngavissaqanngitsoq.
Tassami
paasissutissat tunniunneqarsimasut assigiinngitsut ataatsimiititaliani marlunni
aamma kisitsit assigiinngitsut qanoq sunniuteqassanersut tunniunneqarnikuupput,
kisianni allanngortitsineq annertuujusimavoq.
Taamaattumillu
aamma sunniutissai naatsorsuutigineqarsinnaasimanngitsut annertuut aamma
takkussimapput. Tamannarpiarlu pissutigalugu aamma taamanikkut Inatsisartut
neriorsoqatigeereernikuupput naliliinissaq ukiamut ingerlanneqarumaartoq.
Naalakkersuisooqatigiilernermi
Siumut Atassutillu tamanna pillugu aamma naqissuseqqillugu
isumaqatigiissutigaat ineqarnermut allannguinerit nalilersoqqinneqassasut.
Tunngavigerpiarlugu naatsorsuutaasimanngitsumik aamma ineqarnermut
eqqorneqartut aaqqiivigineqartariaqarnissaat misissorneqartariaqarmat.
Taava
akileraartarnerup massakkut atuuttup allannguallatsinneqarnissaa pissappat
misissueqqissaarnissaq pisariaqartutut oqaatigigatsigu tunngaviuvoq
eqqorneqartussat tassa annertunerusumik akileraartalertussat soorunami qanoq
annertutigisumik eqqorneqassanersut tassuunakkut
nalilersoqqissaarneqartariaqarmat.
Ineqarnermut
allannguinermi aqqusaarsimasagut aqqusaaqqinneqassanngippata taava
assigiinngitsut imaaginnanngilaq akileraarnermi taamatu qaffaavigineqarnermi
oqimaaqusersuutit taakku kisiisa nammanneqartussaasut, kisianni
allarpassuarnik aamma aningaasat isertakkatik taakkua aallaavigalugit
aningaasartuuteqartussaapput. Taamaattumik aamma nammatassaat allat
assigiinngitsut nalilersuinermi peqataatinneqartussaammata tamanna
pingaaruteqarluinnartutut Naalakkersuisuninngaaniit isigisimavarput.
Aamma
rejenut akitsuut uani assersuutiginiarneqarpoq. Sooq annertunerusumik
misissorneqarsimasinnaannginnersoq? Annertuumik misissuineqarpoq taamatut
rejenut akitsuutip rejet avammut tunineqaranik nalikillisimanerat
tunngavigalugu aamma taamatut tunisassiortut atugarisaannut tunngasut soorunami
misissorneqarnikuupput tamannalu tunngavigerpiarlugu aamma Naalakkersuisut
siunnersuuteqarput.
Taannaalu
aappassaanneerneqartussaammat maani siullermeereerneqarnikuulluni maani
uteqqissanngilara, kisianni pisariaqartutut oqaatigisariaqarpoq inuit
annertunerusumik akileraarnissaannut kinguneqartussamik suliaqassagaanni taava
soorunalimi misissuineq annertooq aamma pisariaqarmat.
Inuit
Ataqatigiinninngaaniit utoqqarnik ikiuijumanngitsutut oqaatiginninniarneq
tunngavissaqanngilluinnaqqissaarpoq erseqqissartariaqarparput ippassaaninnguaq
aamma oqallinnermi utoqqaat atugarisaasa pitsaanerulernissaat anguniarlugu
qanoq iliuusissanik maani aamma oqallittoqarpoq annertuumik.
Aammalu
Naalakkersuisooqatigiit Naalakkersuisooqatigiilernerminni
isumaqatigiissutiginikuummassuk utoqqaat atugarisaanik aaqqiiniutissanik
suliaqartoqassasoq. Taava aamma Naalakkersuisut massakkut misissuillutillu
suliaqarput ukiamut Inatsisartut ataatsimiinnissaannut aamma utoqqarnut
pitsaanerusumik aaqqiissuteqarnissamut saqqummiussaqassallutik. Qujanaq.
Mogens Kleist, Kattusseqatigiit.
Qujanaq. Josef Motzfeldt, Inuit
Ataqatigiinninngaanneersoq, oqarmat suunngooq taava oqaaseqarata taamatut
arlaatigut qaffaaniarsinnaanermut toqqammavigisinnaasatsinnik
saqqummiussaqanngitsugut.
Aap, saqqummiussaqanngilagut, kisianni
oqaatigerusupparput ukiat tamaasa uani oqaluttarfimminngaaniit illit
Aningaasaqarnermut Naalakkersuisuugallaravit qaffaassutissat akitsuutit assigiinngitsut
ukiap tamangajaaviisa uanngaanniit oqaluttarfimminngaaniit Inatsisartutigoorlugu
qaffaassutigineqartarput. Akitsuutit assigiinngitsut tupamut akitsuutit
biilinut akitsuutit selskabinut akitsuutit.
Tamakku qissiminneqarsinnaannginnamik? Ujartuisariaqarpugut
arlaatigut inuiaqatigiinnut pitsaanerpaamik. Aamma pissakinnerit
oqarsinnaavugut biileqarnissaminnut soorunami aamma aningaasatigut
inissisimanertik toqqammavigalugu akunnattuungassapput.
Biilinut akitsuutit assigiinngitsutigut
akitsuutit. Taakkua ujartortariaqarpagut ataatsimoorluta. Una pingaaruteqarpoq
uani oqaluttafimminngaaniit qassissaani taassavarput. Pilersaarusiorniarta
maannakkuminngaaniit siunissaq ungasinnerusoq isigalugu.
Taamatut isiginngikkutta
aningaasaqarnerput taamatut ingerlajuassaaq. Sanipoortuarluta aningaasatigut
isertitassagut naatsorsuutigisaminngaaniit illuatungerluinnaanit
pisoqartuaannarpoq ukiut tamaasa. Pingaaruteqarpoq aningaasatigut aqutsineq
pitsaasoq ingerlanniarutsigu aamma pilersaarusiorsinnaaneq pitsaasoq.
Uani 11 millioninik, Josef Motzfeldt
oqaaseqarpoq taanna 11 millioninik taanna naleqassasoq. Aningaasaqarnerput
massakkut ingerlavoq 160 millionit tikillugit nikingasoornikuuvugut
pitsaanerusumik naatsorsuutininngaaniit ukioq kingulleq isertitaqarluta.
Taamaattumik pitsaasumik pilersaarusiortariaqarpugut
aningaasaqarnerput pitsaasumik patajaatsumik ingerlanniarutsigu,
ataatsimoorluta inuiaqatigiit ataatsimut nammassinnaasaannik iliuuseqarluta
aatsaat. Qujanaq.
Mikael Petersen, Siumut.
Tassa oqaaseqartutta avataatigut
pinngitsoorusunngilanga oqaaseqalaassallunga Inuit Ataqatigiit sinnerlugit
siunnersuuteqartup Josef Motzfeldtip oqaaserisai kingulliit aallaavigalugit
tassani partiini assigiinngitsuni minnerunngitsumik Siumumut sakkortuumik
saassussivoq. Akileraartarnikkut aaqqissuussinissamik siunertaqarneq pillugu
piumassuseqannginnermik isumalinnik taakkartuilluni.
Eqqaamaqqussavara Inuit Ataqatigiit
Siumullu 1999-imi qinersereernerup kingorna isumaqatigiissutaat tassani aamma
ilaammat akileraarutinik nutarterinissaq. Taanna tamatta ilusilersorparput
peqataaffigaarput. Tamatuma kingorna aamma Inuit Ataqatigiit akileraartarnermut
akisussaasut Naalakkersuisuupput. Siunnersuuteqartup nammineq tassani
Naalakkersuisuuvoq.
2000-imi septemberimi
Naalakkersuisut saqqummiuppaat siunissamut takorluugaq taanna tamanit
ilisimaneqarpoq. Naalakkersuisut suliniutissaat assigiinngitsunik sammivillit
tassani saqqummiunneqarput. Inatsisartut tamatta tusaatissatut tigullugit siunnerfiit
tassaniittut peqataaffigissallugit nalunaarpugut. Aamma illuatungiliuttut
allaat taamanikkut Atassutikkut ilanngullutik aamma nalunaaruteqarput.
Unneqqarissuseq tassaniippoq.
Tassani allassimavoq akileraartarnermut tunngasut qanoq nutarteriffigineqarnera
ingerlassasoq. Tamanna akuersaarparput. Ilaatigut oqaatigineqarpoq
akileraartarnikkut aaqqissuusseqqinneq reformi tamarsuat ataatsikkut
pinngikkaluarlugu iluarsisassat ataasiakkaarlugit iluarsaanneqassallutik.
Tamanna ingerlavoq aamma massakkut
Naalakkersuisunngortut uani massakkut ataatsimiinnermi ilanngullugit aamma
saqqummiussaannik ilaqarput tamakkuninnga. Aamma ukiarmi Inatsisartut
ataatsimiinnitsinni tamatta eqqaamassavarput ingerlatseqatigiiffinnut
akileraarutit pillugit aaqqissuusseqqinnerit ingerlanneqarmata.
Uanga isumaqarpunga tamakku
uniornagit Naalakkersuisut sulinertik ingerlakkaat. Taakkartorsinnaagaluarpakka
uani Naalakkersuisut siunniussaat arlalipparujorujussuit. Soorlu
assersuutigalugu umiarsualivimmiititsinermi akileraarutip allanngortinnera. Aamma tassani ilaavoq siunertanut.
Massakkullu taanna upernaaq manna suliaralugu ingerlapparput.
Isumaqarpunga taamatut ingasappallaartoq pissutsit
piviusup Inatsisartut aallaavigisagut qimaannarlugit partiinit
assigiinngitsunit minnerunngitsumik Naalakkersuisooqatigisimasama Siumumut
pisuutitsinerit ingasappallaarujussuartut. Nammineq siunnerfeqartitseriarluni
taamannak taanna siunnerfeqartitsineq qimariarlugu taava suleqatigisimasaq
pisuutillugu.
Pissuserissaarnerunngilaq taanna
taamaattumik pisuutitsineq utertitertariaqarpaa.
Jakob Sivertsen, Atassut.
Qujanaq. Tassaana
erseqqissaqqinniaannarlugu nunarsuarmi sumiluunniit pissakinnerusoqarlunilu
pissaqarnerusoqartarpoq paatsoorneqassanngilaq isumaqanngilanga pissakinnerusut
ikiorneqassanngitsut, kisianni tassa pissaqarnerunermut tunngavippiaasartoq
sulilluarneq suliffimmi paarsilluarneq, ilungersorneq aamma malugineqassaaq
nuannaarutigigatsigu maannakkut aningaasaqarnikkut qaffariaatigineqartartut
tassaapput suliffissaaleqisut ikiliartornerat. Taamaattumik suliffissaqarneq
annertunerpaamik tapersersortariaqarparput.
Inuk nammineerluni pilersornermigut
aatsaat nunami aamma nammaqataaneq angussammagu.
Taamaattumik taanna pingartipparput
Atassumminngaaniit suliffissanik aamma inunnik ingerlalluartunik
suliffigissaartunik paarsilluartunik nunarput ingerlanneqalerpat taava
aningaasaqarnikkut aamma ingerlaneq ilorraap tungaanut aallassaaq.
Naggataatigut tassa siunnersuuteqartup Naalakkersuisooqataasimanermini
pingaartissimaguniuk sooq maannakkut piffisami kingullermi saqqummiussisimanera
apeqquserneqarsinnaavoq.
Maannakkut aatsaat
Naalakkersuisuujunnaarami pingaartissimagunikku taava 1999-iminngaaniit
pimoorullugu saqqummiussimasinnaasariaqaraluarpaat. Qujanaq.
Lars Sĝrensen, Inuit Ataqatigiit.
Tassa aningaasaqarnermut Naalakkersuisup
ilaatigut rejeafgiftip kaputartuunneqarnissaa kissaatiginngimmagit tassuuna isumaqatigissavarput,
kisianni aamma Naalakkersuisut rejeafgiftimut tunngatillugu erseqqissaatigivaat
ingerlatseqatigiiffiit naatsorsuutaat suli tunniunneqarsimanngimmata.
Tamakkuuppullu aamma uagut
misissuilluarsimannginnermik tunngavilersuutiginikuusagut, kisianni aamma
akileraartarnermut eqqartuisarnermut inuiaqatigiinni ajornartorsiutigivarput
qaffaaneq pillaanertut isigineqartarmat. Oqaatigeerpara naligiinnerusumik
atugassaqassagutta taava maannakkut aaqqissuussimaneq eqqarsaatigissagaanni
akileraartarnikkut nutarterinikkut tamanna taamaallaat akissaqartinneqarpoq.
Utoqqaat atugarisaat
pitsanngorsarneqassammata taanna Inatsisartut 1997-imili tassa ukiut tallimat
matuma siornatigulli piumasarereernikuuaat. Maannakkumut misissuinerit qassit
hundredissaat ingerlanneqalernerput ilaatigut ilisimaneqarmat tamakkua tamarmik
aningaasatigut naleqartussaammata.
Taakkua piviusunngortinneqassappata aamma
Naalakkersuisut siusinnerusukkut oqaatigisareernikuuvaat aningaasanik nutaanik
ukiunut tulliuttuni amerlanerusumik ingerlanissatsinnik takkuttoqarnavianngilaq.
Taanna ilisimavarput. Taava pitsanngorsaanerit assigiinngitsut
pimoorunneqarsimassappata taava aqqutissat ajornannginnerpaaq
aqqutigineqarsinnaasoq tassaavoq akileraartarnikkut nunatsinni allannguineq.
Tupinnartuuvoq nunani avannarlerni
akileraartarnikkut aaqqissuussisimaneq maani nunatsinnut eqqunniarneqanngimmat.
Tassami inuiaqatigiinni nammaqatigiittariaqarneq taanna tamatta
oqariartuutigivarput. Taamaattumillu aamma aaqqissuussinissami pillaanertut
isiginagu. Kisiannili assigiinnerusumik atugassaqarnissatsinnut sakkussatut
allamik sakkussaqannginnatta. Maannamut Inatsisartut oqallinneranni atugarisat
pitsaanerusumik aaqqissuussinissamut tunngatillugu qanoq iliortoqarsinnaaneranik
saqqummiisoqanngilaq. Tassami uagut Inuit Ataqatigiit takunnissinnaanerput
naapertorlugu taanna kisiat sakkugisinnaavarput.
Aamma neriuutigivara ataatsimiititaliami
tamakku ilanngullugit sukumiisumik eqqartorneqartariaqartut Siumukkormiut ippassaaneq
oqaatigereerpaat pinngitsoornani akileraartarnermut nutarterisoqartariaqartoq.
Josef Motzfeldt, Inuit Ataqatigiit.
Tassa naggataarutaasumik oqaaseqassuunga.
Qujavunga oqallisissiaq oqaluuserineqarmat ammalu naatsorsuutigaara
ataatsimiititaliami nalilersuiffigineqassasoq. Mogens Kleistimullu
oqaatigerusuppara ukiat tamaasa akitsuutinik saqqummiisarsimanera ukiut
aningaasanik inatsisissamik suleqataaninni peqataaffigisimagiga pisuutitsimmat.
Taamaallaat eqqaamavara biilinut akitsuutit taakkua qaffaavigineqartut
pissutigalugu Inatsisartut aningaasaliiffigeqqullugit suliniutigerusutatik
akissaqartinngimmatigit aningaasanik allatut ajornartumik taamatut
ujarlertariaqartarsimavugut ataasiarluta.
Kisianni eqqaamassavarput akitsuutit
tassaammata aningaasat pisissutaasinnaanerannik qarajaasartut. Sulinermik
inuussutissarsiuteqartut pisissutigisinnaasaanik akissarsianik qaffaatinik
nungusaataasut. Naalagaaffiup nunatsinnut aningaasaliissutigisartagaannut
appartitsisartut aningaasat nalikilliartornerat Mogens Kleistip tamanna
ilisimassavaa.
Akileraartarnermili qaffaanerit aningaasat
nalikilliartortarnerannik kinguneqarneq ajorput. Mikael Petersen Siumup
sinnerlugu oqaaseqartup avataatigut oqaaseqarneranut ilumoornerassavara
inuiaqatigiit aaqqissugaanerata nutarterniarneranut periutsit naafferartumik
akilerniarneqarmata. Aamma akileraarutitigut ilumoorpoq. Aamma ukiarmi taamatut
aaqqiissuteqarpugut. Taavalu taamanikkut isumaqatigiissutigaarput upernaaq
manna saqqummiissasut.
Taamaattumik Inuit Ataqatigiit
kissaatigisimavaat akileraarutitigut iluarsaaqqiinissamut Naalakkersuisut
saqqummiinissaat ilimagigatsigu uagut aamma tassuuna sunniuteqaqataanissarput.
Taamaattumik taamaattunik siunnersuuteqarpugut.
Aamma suleqatigiinniaraanni suleqatinut
ataqqinninneq eqqaaneqallattaarmat oqassuunga soorunami Siumukkut Inuit
Ataqatigiillu suleqatigiikkallaratta suliassat tulleriiaarneri isumaqatiginninniutigisarsimavagut.
Taavalu upernaaq manna taamatut killiffik eqqarsaatigalugu siunnersuuteqartoqassasoq
isumaqatigiissutigisimavarput.
Kisiannili Mikael Petersen uanga
isumaqatiginngilara paasinngilara aamma oqarmat Inatsisartut suleriaaserput
qimallugu massakkut suleriaaseqarniarsarisugut massakkut matuminnga siunnersuuteqarnitsigut.
Sunaana Inatsisartut suleriaasianni
qimakkipput. Innuttaasut atugarisaannik aaqqiiniutaasinnaasunik matumani
saqqummiussaqarnitsigut. Atassutip, utoqqatserpunga.. naggaterpiaatigut
Atassutip nutarterinissamik oqaluuseqartarnermini oqaatigisarsimasaa manna
tikillugu ilisimasarput tassaavoq Atassutip siunnersuuteqarfigisimammagu
tipigissut amerissaatillu pisiniarfeeraatilinni pisiniarfiutilinni
persaqusersuutaavallaaqimmata akitsuutaat peerneqassasoq 1,5 millioninik
nalilik.
Anthon Frederiksen, Kattusseqatigiit.
Qujanaq. Tassa soorunami
Kattusseqatigiit Inuit Ataqatigiillu politikkia assigiinngitsorujussuusoq
tassani takuinnarparpunaasiit.
Uagut Kattusseqatigiinni nunatta
aningaasaqarnikkut pitsaanerusumik ingerlalernissaa akileraarutit
nikisinnerinnaasigut angunianngilarput. Isumaqaratta utoqqaat pissakinnerusullu
pitsaanerusumik ikiussagutsigit taava ilinniartitaanikkut nunatta iluani
nunatta pissarititaanik atorluarnerisigut.
Minnerunngitsumillu aamma avammut
niuernitta pitsanngorsarnerisigut nunatsinni aningaasat amerlanerusut
kaaviiaartinnerisigut utoqqaat pissakinnerusut ilinniartullu allat
ikiorseqarneqarsinnaanerat pitsaanerusumik angusinnaavarput. Inuit
assigiinnerusumik qaquguluunniit aningaasatigut
atugassalersinneqarnavianngillat politikki Inuit Ataqatigiit politikkiat
nunatsinni atulerneqanngippat
Tassa kommunistit periusaat atorlugu
iliuuseqarniarnermi isumaqarpunga ulorianartoq aqqut atuallanneqarsinnaasoq
inuit qulaaniit naqillugit aalajangerlugit politikkikkut aalajangerneqartalerpata
illit imaaliussuutit illit imaaliussanngilatit. Taanna niuernikkut
sulisinnaanikkut kiffaanngissuseq uagut Kattusseqatigiinninngaaniit
ataqqivarput. Tassaagunarporlu aamma taanna Inuit Ataqatigiit
Kattusseqatigiillu politikkikkut assigiinngissutaat qularnanngitsumik annerpaat
ilaat.
Nakorsaq
ilinniagaqarsimanngitsorluunniit qaquguluunniit aningaasatigut
atugassaqalernavianngillat. Taanna takunngitsuusaarneqarsinnaanngilaq.
Nalunngilarput nunatsinni ilinniarluarsimasut nakorsat inatsisilerituut
allarpassuillu amigaatigivagut.
Tassa qaffassarniartariaqakkagut
nunarput namminiilivissappat. Pisortat pigisaat pisortat atortitassaat
pisortanit isumalluuteqarneq kisiat isumalluutigiinnarnagu. Tamanna
nukatsitsineruvoq inuiaqatigiinnut pisortanit isumalluuteqarpallaanersuaq
uungaarannguaq isigineq atorsinnaanngilaq. Piffissaq ungasinnerusoq siumut
isigaluni pilersaarusiortoqartariaqarpoq.
Aningaasat 600-700 millioninik
akileraarutitigut isertitat taakkua kisiisa kaaviiaartinneri
annertusineqarsinnaannginneriluunniit taakkua kisiisa
eqqarsaatigisariaqanngillat.
Isertitassagut amerlanerusariaqarput
taamaattumillu suliffiit nunaqavissunit ingerlanneqartut aamma inuillu
nammineersinnaasut nunatsinnut aningaasarsioqataasinaasut taakkua
kaammattortariaqarpagut. Pissakinnerusut ikiorneqarsinnaanerat anguniarlugu.
Taamaaliorutta aatsaat pissakinnerusut utoqqaat ilinniartullu
akissaqartilissavagut nammineerluta. Pisortat kisiisa isumalluutiginagit.
Nalunngilarput ullumikkut pisortanut
akiligassat assigiinngitsorpassuit kinguaattoorfiusut annertoqisut tamakku
akilersorneqassappata taava ikiuisarnermi periutsit aamma allanngortinneqartariaqartut.
Oqaannarsinnaanngilagut AImannak
akiitsoqarama pisortat akilerumaarpaat. Pissakinnerugavit illit issiavimmut
ingiinnarlutit sulisut ikku isiginnaassavatit taakkua akiliukkumaarpaatit@.
Aamma qangaaniilli pissuseq Inuit
Ataqatigiinninngaanniit eqqaaneqartoq AQangagooq kalaallit imminut ikioqatigiilluarput@. Aap ilumut! Taamanikkut aningaasat
ilisimaneqarpianngikkallarmat kalaallit imminut ikioqatigiipput.
Kisianni ullumikkut ukiullu 100-t
matuma siorna pissutsit qassit 100 %-imik allanngorsimappat ? Ullumikkut
pissutsit piviusut qiviartariaqarpagut. Qangamut pissutsitoqqanut
utertoqarsinnaanngilaq. Qajaq atorlugu piniartoqarsinnaanngilaq ullumikkut.
Ullumikkununa nutaaliaat muteerniusut angallatit atorlugit inuusugut
computer-eqarnerup nalaani inuuvugut. Unaaq atorlugu kisiat isummalluutigalugu
ingerlasinnaanngilagut.
Daniel Skifte, Inatsisartut Siulittaasuat,
Atassut.
Anthon Frederiksen qutsavigaarput.
Tulliulluni oqaaseqassaaq Simon Olsen pingajussaaniineranik naatsunnguamik.
Simon Olsen, Siumut.
Siunnersuuteqartup Josef Motzfeldtip
Siumup oqaaseqartuata oqarluartaaruteqarnerarlugu upissuppaa.
Taamaalluinnarsinnaavoq, kisianni Siumumi anguniagarput aammalu uanga nammineq
peqataaffigisara taamatuttaarlu Mikael Petersenip aamma siunnerfiusumi
aatsaannguaq uparuaallatsiarnermini eqqorluinnartuliornera erseqqissartariaqarpara.
Taamaattumik angumerisinnaasagut
angumerissavagut uani qinersivimmi. Taanna miserratigineqassanngilaq.
Taamaammallu siunissami takorluukkatsinni akileraariaaseq pillugu
eqqaasissutigisariaqartoq ilaanni eqqaasitsilaassaanga. Tassami
akileraarutinik akitsuinersuisarnermillu aaqqissuussineq nunat tamalaat
akornanni unammillersinnaasussuseqassasoq pingaartipparput anguniarparput
aamma taanna.
Aammattaaq imminut akilersinnaasariaqartoq
annerusumik sulineq aammalu suliffeqarfinnik nutaanik pilersitsineq
taamatuttaarlu akileraarutit pillugit aaqqissuussineq atoruminartuulluni
eqaatsuullunilu paasiuminarluartuussasoq anguniagaraarput.
Taamaammat ullumikkut Naalakkersuisut uparuaataat
misissuilluaqqaarumallutik Siumumiit taperserparput.
Taannaluuna tunngavigalugu oqaatsigut
naakkaluarlutik oqarluartaarunaanatik taamatut oqaatigineqartut. Qujanaq.
Daniel Skifte, Inatsisartut Siulittaasuat, Atassut.
Simon Olsen qutsavigaarput. Tulliulluni
oqaaseqassaaq Naalakkersuisut siulittaasuat.
Jonathan Motzfeldt, Naalakkersuisut Siulittaasuat, Siumut.
Nunatta aningaasarsiornikkut
inissisimanera qiviassagaanni aningaasarsiornikkut inissisimanerput
pisarnermikkut kingusinneruvoq. Aamma taamaattumik aningaasatigut ingerlatsineq
peqqissaartumik Naalakkersuisuninngaanniit alaatsinaanneqarpoq.
Akileraarutit akileraarutinilluunniit
taanngikkaluarlugit inigisat nutaamik aaqqissuussinerit aamma inunnut
akileraarutittut isigisariaqartut taasariaqartut annertuumik qularnanngitsumik
eqquisimanerat misissoqqullugu Naalakkersuisuniit aamma qinnutaasimavoq.
Taanna naammassiniarneqarpoq.
Aammalu inunnik annertuumik
eqquisimaneranik taamatut misissuinissaq Naalakkersuisut akissutiminni
nalunaarutigaat. Taanna naammassineqassaaq.
Aammalu ilisimaneqareerpoq Naalakkersuisut
aamma Siumukkunni peqatigineqartut siulliit aammalu maannakkut akileraarutit
qaffakkiartuinnarnissaannik siunertaqartumik sulinissaq orniginngikkaat. Taanna
ilisimaneqarpoq aamma qinersinerulli nalaanik kingullermik aamma maannamut
atorneqarpoq, kisianni oqaatigisariaqarpoq akileraarutit aamma akitsuutit
taakkua marluk Inatsisartut maani periarfissaattut qaninnerpaatut
pitsaanerpaattullu isigineqartut.
Ukiumoortumik Inatsisartut aningaasanik
akuersiniarnerannut isigillugit oqaatigissavara pi
sariaqassappat taakku periarfissatuaapput
Naalakkersuisunut aamma qiviarlugit innuttaasunik suleqatiginninnissamut
aningaasatigut aallarniarnermut sakkugineqarsinnaasut.
Taamaattumik aningaasartuutissagut
utoqqarnut atuarfinnut napparsimavinnut allanullu qanoq isikkoqartumik
ilusilernissaat ukiumoortumik aningaasanik akuersissutit ilanngullugit
nalilersorneranni pisariaqassappat taanna oqaatigissavara pisariaqassappat
taamaattuarpoq Naalakkersuisut ukiut tamaasa akileraarutit akitsuutillu aamma
atorsinnaanerlugit naleqqussaanerminni eqqarsaatissaannut ilaajuartarput.
Aamma ukioq manna taamaaliortoqarumaarpoq.
Daniel Skifte, Inatsisartut Siulittaasuat, Atassut.
Naalakkersuisut siulittaasuat
qutsavigaarput. Taava tulliulluni oqaaseqassaaq naggataarutaasumik Johan
Lund-Olsen partiimi oqaaseqartup avataatigut.
Johan Lund-Olsen, Inuit Ataqatigiit.
Qujanaq. Siullermik una oqaatigilaarlara akileraartarneq
imaluunniit akileraartalernissaq eqqaamanerlunngikkukku januarip
aallaqqaataani 1975-imi maani nunatsinni eqqunneqartoq.
Taamani eqqunniarneqalermat
kommunisterpalaartumik systemimik eqqunniarneqarnissaannik ataatsimilluunniit
oqaatsimik eqqartuisoqanngilaq. Landrċditoqqamiit aammalu taamani suli
namminersornerulersimannginnatta danskit naalakkersuisuisa tungaaninngaanniit.
Taamaammat kommunisterpalaartumik
pissuseqarluni akileraartarnermik eqqartuisoqartillugut taamatut
assersuuteqarniarsarineq Kattusseqatigiinniit taanna atorneqartoq soorunami
pututitsiniutaannaavoq aamma atorsinnaanngilluinnarpoq.
Taava aamma Kattusseqatigiit
oqaaseqartuata saniatigut oqaaseqartumut tassa oqaatigisariaqarpoq una
neriuppungalu aamma oqaaseqartoq pineqartoq tassa qinigaaffik aappassaa
massakkut Inatsisartuni maani suleqataalluni qinigaaffik manna ingerlakkamiuk.
Soorunami nalunavianngilaa qinigaaffik
aappassaa massakkut nunatsinni qinikkat qullersaanni suleqataammat.
Tusarniaasarnerit qanoq ingerlattarneqarnersut
taakku imaapput: Naalakkersuisut Inatsisissatut siunnersuutinik Inatsisartunut
saqqummiussileraangamik aammalu peqqussutissatut siunnersuutinik
saqqummiussileraangamik tusarniaaneq ingerlatereersimasussaavaat Inatsisartunut
saqqummiunniagartik siullermiigassanngorlugu Inatsisartut
ataatsimiittarfiannut eqqunneqartinnagu.
Tusarniaanerit taakku ingerlanneqartarput
Kattuffinnut, soqutigisaqaqaatigiiffinnut assigiinngitsunullu inatsisissatut
siunnersuutigineqartumut atatillugu kalluarneqartussat tassa
tusarniaaffigineqartarput.
Inatsisartut aalajangiiffigisassatut
siunnersuutaat taanna uteqqilaarlara tassa taakkua Inatsisartut inatsisaattut
aammalu Inatsisartut peqqussutissaattut aamma suliarineqartussaapput. Kisianni
allaassutigivaa tassa taakkua Inatsisartut aalajangiiffigisassatut
siunnersuutitut ilusilerneqarsimasut maani Inatsisartunit
marloriaannarneqartarmata inatsisissatullu siunnersuutitut pinnatik pingasoriarneqartaratik.
Inatsisartut aalajangiiffigisassatut siunnersuutitut
ilusilerlugu suliarisaat maani Inatsisartuni siullermeerneqareeraangamik
aappassaaneerneqarnissaat tungaanut taava aatsaat tassani Inatsisartut
namminneq tusarniaassallutik periarfissinneqartarput.
Inatsisartut tamarmiullutik tusarniaaneq
taanna ingerlanniarsinnaavaat kisianni naliginnaaneruvoq Inatsisartut
ataatsimiititaliatik aqqutigalugit suliap aappassaaneerneqarnissaata tungaanut
taava tusarniaanernik ingerlatsisarlutik.
Tassalu taanna aajuna
periarfissatsialassuaq uani akileraartarnermi tunngatillugu Josef Motzfeldtip
siunnersuutigisaanik atatillugu tusarniagassat tassa tusarniarneqakutsoorsinnaapput
aappassaaneerinissatta tungaanut. Tassa KANOKOKA assigiinngitsut uani
siunnersuummut atatillugu kalluarneqarsinnaasut ataatsimiititaliaminngaanniit
tusarniaavigineqakuttoorsinnaapput tamanna ajornaquteqanngilluinnarpoq.
Taava aamma ilinniagaqassuseq
Kattusseqatigiinninngaanniit sukataarutigineqarpoq isumaqarluinnanngippugut
Inuit Ataqatigiinninngaanniit assersuutigiinnarlugu nakorsaq taavalu nakorsatut
ilinniarsimasoq taavalu alla annikinnerusumik ilinniagaqarsimasoq
isumaqarluinnanngilagut assigiimmik akissarsiaqarlersinnaanissaannik, kisianni
nalimmassaasoqarsinnaasoruna aamma nalimmaassaasoqartariaqartoq tassami Inuit
Ataqatigiit oqaaseqartuata erseqqilluinnartumik oqaatigivaa maani nunatsinni
innuttaasut atukkamikkut inissisimanerat qanoq naligiinngitsiginersut. Tassa
taanna misissuinerpassuiartigut Inatsisartut namminneq aallartissimasaatigut
aammalu Naalakkersuisut ingerlassimasaatigut tamanna upernarsaatitaqarluarpoq
ukiut kingulliit 1994-imi sukumiinerpaaq aammalu tutsuiginarnerpaaq taamani
Inatsisartut namminneq noqqaassuteriigaat Inatsisartunut inuiaqatigiinnullu
taanna tunniunneqarpoq.
Tassalu taassumap misissuitsisimanerup
takutippaa aamma Inuit Ataqatigiit oqaaseqartutta erseqqilluinnartumik
assersuusiorneratigut tassa tassuunga takuarput inuit qulit 100 kruuniinnannguaq
agguassagaluarunikku tassa imaappoq inuit tallimat 90 kruunit tallimaallutik
agguartussaavaat. Inuit sinneri tallimat sinnimininngua 10 kruunit taanna
avittussaavaat.
Taanna misissuisitsineq 1994-imi
Inatsisartuniit saqqummiunneqareerpoq inuuiaqatigiinnut saqqummiunneqareerpoq nunatta
naatsorsueqqisaartarfiata annertuumik misissuisitsisereerneratigut.
Misissuititsineq taanna qalleqqillugu
allat misissuisitsinerit aamma ingerlanneqartareernikuupput Isumaginninnermi
ataatsimiititaliarsuaq Inatsisartut aamma namminneq pilersereersimasaat
tamakkuninnga aamma sammisaqarluni ingerlareernikuuvoq. Tassanilu aamma
takoqqipparput inuuiaqatigiit maani atukkamikkut qanoq naligiinngitsigisumik
inissisimanersut.
Nunatsinni innuttaasut sisamaraarterutaat
ukiumut 100.000-it ataallugit isertitaqartuupput. Misissuititsinerit tamakkua
aamma namminneq noqqaassutigisimasatta
taanna takutereerpaat. Aamma innuttaasut affaat sinnerlugit ukiumut 200.000-it
ataallugit aamma isertitaqartarput. Tassa misissuisitsinerit tamakkua
tutsuiginartut namminneq noqqaassutigisarsimasagut tassa tamanna
takutittareerpaat.
Taamaammat Inatsisartunut ilaasortap Josef
Motzfeldtip una siunnersuutaa taanna aqqutissiuunniartariaqarparput. Ilami
atukkatigut assigiinnginnerujussuarmik inissisimanerput nunanut allanut sanilliutissagutta
allaanngivippoq Indiamut pissutsinut nallersuulluta inissisimaannartugut.
Indiami pissutsit taamatorluinnaq aamma
maanisut ipput isertitat agguaanneqarsimaneri eqqarsaatigissagaanni.
Taavalu una naggataarutaasumik aamma
oqaatigilaarlara Anthon Frederiksenip nunatta nammineeriartulernera
namminersorusunneralu eqqartormagu. Ila nunarput namminersortoq aammalu
namminiileriartortoq nammaqatigiinnerminguna pingaartitsiffiusoq taanna
pilersittariaqaripput. Nammaqatigiinnermi pingaartitsiffiusoq imaanngitsoq:
Naammattorsuarmik pissaqareersut suli annerusumik tuniorarneqarnissaannik
siunertaqartumik taanna nunarput namminersortoq taamatut anguniagaqartoq taanna
kissaatiginarsinnaanngilaq, kisianni tassa ajuusaarnartumik tamannaavoq
Naalakkersuisooqatigiit tamanna anguniagaat.
Assersuut kingulleq tassa raajanut
akitsuut eqqarsaatigalugu tassa siunnersuutaareerpoq rajanut akitsuut 2%
pointinik apparneqassasoq. Tassa maani inuuiaqatgiinni kalaallini
ajorsaateqannginnerpaarpaartaat inuiaqatigiinnut nammaqatigiinneq
tunngavigalugu tunniussassamininnguat sumineeraarannguaq 15 millioninik nalilik
taanna aamma erligilermassuk.
Ila tupinnaqaaq maani Inatsisartuni
misissuisitsinerpassuit taakkua oqaatigeriikkakka uffa takutereeraat qanoq
iliuuseqartoqartariaqartoq. Taava Naalakkersuisooqatigiit killormorluinnaq
maannakkut ingerlatsiniarsaripput.
Daniel Skifte, Inatsisartut Siulittaasuat, Atassut.
Johan Lund-Olsen qutsavigaara.
Siulittaasoq kaammattuutigeqqissavara maannakkut partiit Attaviitsullu
oqaaseqaataat erseqqissorujussuarmik inerneqartussat tamatta tusareerpagut
tamatta nalunngilagut. Taamaattumik oqaaseqartussat kingulliit
kaammattussavakka naatsuararsuarmik oqaaseqaqqullugit tassaapput siullermik
Mads-Peter Grĝnvold partiimi oqaaseqartup avataatigut aammalu Lars-Karl Jensen
partiimi oqaaseqartup avataatigut kiisalu Anthon Frederiksen taamaalillunga
taava ilimasaarutigissavara kaajalukaaginnalerutta '49 atorlugu allamut nuussagatta.
Periarfissippakka kingulliit Mads-Peter Grĝnvold Kattusseqatigiit.
Mads Peter-Grĝnvold, Kattusseqatigiit.
Ilimasussuunga naappallaassanngitsoq.
Johan Lund-Olsenimut Inatsisartunut suliassat qanoq suliarineqartarnissaat Kattusseqatigiinniit ujartunngilarput taamaattumi Johan Lund-Olsenip ileqqua taanna ajoqerssuussiniaalulluni maani oqalorujoortarnera isumaqarpunga piffissaajaatigineqartariaqanngikkaluartoq.
Nunatsinni akileraartarneq eqqunneqarmat taamani oqaatigineqarpoq 25%-ii qaangernagu akileraartarneq nunatsinni ingerlanneqartassasoq, kisianni maannakkut Inuit Ataqatigiinni ilaasortat ilaat siunnersuuteqarnermigut kommuneqarfinni ilaanni 47-48%-it tungaannut akileraartalernissaq anguniarneqarpoq. Taamaatumiguna uagut Kattusseqatigiinniit taamatut akileraarutit qaffappallaannginnissaat anguniarlugu siunnersuut tapersersunngikkipput. Tassa malitsigisassai inunnik ilanngaatit aaqqinnerisigut akileraarut 3-4%-imik qaffanneqarpat kommuneqarfiit akileraarnerpaat allaat 47-48%-imik akileraartussanngortussaapput.
Taamannak akileraaraluarlutik innuttaminnut atugarissititaat kommunini aningaasarissaarnerusuniit pitsaanerunngilluinnarput. Taamaattumik isumaqarpunga siunnersuummut akuersaannginnertinnut pissutigisarput paasinngitsuusaaneqartariaqanngitsoq. Ersarilluinnarpoq! Killormut saatinniarsaralugu ajortisartariaqanngilaq!
Nunatsinni akileraartarnermut tunngasut ukiuni kingullernut naleqqussarneqarnissaat pinngitsoorneqarsinnaanngitsoq Kattusseqatigiinniit aamma isumaqarpunga aamma akileraartarnermut ataatsimiititaliamut annertuumik eqqartortarparput. Taamaattumik akileraartarnermut ataatsimiititaliami piumasarisarsimavarput nunat nammineernerusut assersuutigalugu Island-ikkut akileraartarnermut atugaat tusarniaaffigissallugit. Taamaaliornikkut akileraarutitigut allatigut isertissinnaasat assigiinngitsut misissuiffigineqarniassammata. Imaanngitsoq inuit akileraartartut akileraarutaannaasigut arlaat tamakkua iluarsineqarsinnaasut.
Tunisassiat assigiinngitsullu eqqarsaatigigaanni qanoq iliorluni aningaasarsiornerit nunap ingerlatseriaasia takullugu tusarniaaffigalugu taamaaliornikkut suliassat peqqissaatumik ingerlanneqarsinnaammata aamma soorlu oqaaseqattartutta saniatigut Anthon Frederiksenimut oqaatigigaa nunatsinni pisuussutitsinni atorluaanertigut nunatta aningaasaqarnera nukittorsarsinnaagipput. Aamma tunisassiat assigiinngitsut suli atorluanngilagut tamakkua atorluarnerisigut suli aningaasani amerlanerusunik nunarput isaatitsisinnaavoq. Taamaaliorutta akissaqalissaagut utoqqaat atugaasa pitsanngorsarneqarnissaannut imaanngitsoq akileraarutit qaffannerinnaasigut utoqqaat atugaat pitsanngorsarneqassasut nunatsinni. Taamatut ingerlatseriaaseq unitsinneqartariaqalerpoq! Akileraarut eqqunneqarmat 25%-i angullugu akileraartarnissaq taanna siunnerfiunikuuvoq. Taamaattumik 25%-ip 50%-i sinnerlugu angujartorneqarnissaat uagut maannakkorpiaq tapersersunngilluinnarparput Kattusseqatigiinniit.
Daniel Skifte, Inatsisartut Siulittaasuat, Atassut.
Mads-Peter Grĝnvold qutsavigaarput. Tulliulluni oqaaseqassaaq Lars-Karl Jensen, partiimi oqaaseqartuat avataatigut.
Lars-Karl Jensen, Siumut.
Qujanaq.
Tassa oqallinneq maanga sangujartuinnarmat una aamma uanga ilanngutilaarniarpara isertitakinnerusut kikkuunersut taanna iluamik erseqqissarneqanngilaq. Taakkuunerlutik ullumikkut suliffissaaleqisut? Suliffissanik pilersitsiniarneq aamma imaanaanngitsuusoq nalunngilarput.
Aamma
pissakinnerusunik ikiuisarneq siulitta ileqqorisimasaat nalunngilarput
tusaamalluarlugulu inuuiaqatigiinni ilisimaneqarluartoq kisiannili aamma
oqaatigineqartarpoq taakkua pissaqarnerusut nunguutsigaangamik tamakku
pissarluttut allaat illuminngaanniit anisittaraat nerisuutaaginnartalermata. Aamma illuatungeqarsimavoq taanna.
Nammaqatigiinneq aallaavigalugu
oqalunnermi akileraarutit taakkua taakkartorneqarmata tupiginngilakka kisianni
aamma ilaatigut eqqarsaatigisariaqartoq tassaavoq nammaqatigiinniarneq inunnut
nukatsitsilersarmat. Nalunngisatsituut maannakkut illoqarfiit ilaanni
suliffissaaleqisoqarpoq illoqarfiillu ilaanni sulisussaaleqilluni. Tamakkunuuna
aaqqissuussinngikkutta isumaqarpunga aamma qaqugorsuarmut suliffissatigut
aaqqiisinnaanngitsugut. Ilaatigullu aamma maannakkut immaqa pissakinnerusunut
ikiuinerput isertuunneqasinnaangitsumik ima atorneqalernikuuvoq suliffissami
tunigaluarlugit inuit ilai ullut marluinnaat suleriarlutik angerlartarsimapput
oqarlutik ASuliffeqarneq
akilersinnaanngilaq! Sulinngikkuma ininnut innaallagissamut imermut
akiligassanik akiliisarnerisa saniatigullu kaasarfimmioqartitaallunga.@
Taamaattumik aamma immaqa
uumateqarpallaarneq aamma inunnut nukatsitsisarneq taanna
eqqaamaneqartariaqarpoq aamma oqallinnermi.
Uani uagut Siumuminngaanniit
oqariartuutigut saqqummiussisutta oqaaseqartutta ersarissumik oqaatigereerpai
aammalu kikkulluunniit oqaaseqartut siullermeernermi ersersereerpaat nunat
tamakkerlugit akileraarutip ilaatigut qaffanneqarneritigut akileraarutini
ilanngaatassanik Josef Motzfeldt-ip allannguuteqartitsinissamut siunnersuutaa
tapersersorneqanngitsoq.
Taamaattumik formand-erput
aarlerisaareerami isumaqarpunga pissusissamisuuginnassasoq uani
suleriaasitsinni '49
malillugu suliassaq taanna itigartinneqartoq taamaalillugu naammassineqassasoq
pappialannguanngorlugu tunniutinneqassasoq.