Ullut ataatsimiiffiusut arfineq-pingajuat, tallimanngorneq oktobarip 5-aat 2001, nal. 13:05

Oqaluuserisassani immikkoortoq 33

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut.

(Ineqarnermut, Attaveqarnermut Pilersuinermullu Naalakkersuisoq)

(Siullermeerneqarnera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit:

 

Jørgen Wæver Johansen, Ineqarnermut, Attaveqarnermut Pilersuinermullu Naalakkersuisoq, Siumut:

Naalakkersuisut sinnerlugit Inatsisartut peqqussutissaattut siunnersuut Inissianik attartorneq pillugu Inatsisartut peqqussutaata allannguutigisassaa matumuuna saqqummiuppara.

 

 

Peqqussutissatut siunnersuummik saqqummiussinerup ineqarnermut akiliutinik iluarsartuusseqqinniarluni suliat maanna ingerlasut, matuma ataani ineqarnermut immikkoortortaqarfinni iluanaarutitaqanngitsumik ajunaarutitaqanngitsumillu kiisalu immikkoortortamut kisimi tunngassuteqartunik aningaasatigut siumut missingersuusiortalernissap qularnaarneqarnissaanut maleruagassaliornissaq periarfississavaa. Tassani taamaallaat pineqarpoq oqaasertatigut allannguinissaq, taamaaliornikkut qulakkeerneqassammat ineqarnermik tapinik nutaamik aaqqissuussinermut atatillugu ineqarnermi akiliutit pillugit paasissutissanik tatiginartunik maleruagassiornissaq, aammattaaq siunnersuutip periarfississavaa ineqarnermut immikkoortortaqarfiit naatsorsuutaannik tamakkiisumik kukkunersiueqqusisarnissamut maleruagassaliorsinnaaneq.

 

Peqqussutissatut siunnersuummi maanna saqqummiunneqartumi oqaaseqaatit aammattaaq innersuussutigalugit Inatsisartut peqqussutissaattut siunnersuut inissianik attartorneq pillugu Inatsisartut peqqussutaata allanngortinneqaatigisassaa matumuuna Inatsisartunut oqallisisanngortippara. Siunnersuutigissavara siunnersuut aappassaaneerneqannginnermini Ineqarnermut Attaveqaateqarnermullu ataatsimiititaliamit oqaluuserineqaqqaarallassasoq.

 

Ole Lynge, Inatsisartut Siulittaasuat, Inuit Ataqatigiit:

Qujanaq. Taava partiit oqaaseqartuinut ingerlaqqippugut.

 

Tommy Marø, Siumup oqaaseqartua:

Inatsisartut Inissianik attartortitsisarneq pillugu inatsisaata allanngortinneqarnissaanik Naalakkersuisut saqqummiussaqarnerat Siumumiit oqaluuserereerlugu ilassilluarparput.

 

Upernaaq manna inissiani attartortitsisarneq pillugu peqqussutit annertuumik sukumiisumillu ullutsinnut naleqqussarlugit peqqussusiornerisa malitsigisaanik Naalakkersuisunit pisariaqartinneqarsimasoq tassalu peqqussutit immikkoortortaata oqaasertamigut allanngortinneqarnissaanik imaqartoq. Siumumiit misissoreerlugu paasilluarlugu akuersaarparput.

 

Taamaasillunimi peqqussutissap akuerineratigut ersarinnerulissammat tunngaviusumik malittarisassanik suliaqarsinaanermi qulakkeerniarneqarmat, inissianik attartortitsisarnermi ineqarnermi tapinik nutaamik aaqqissuussinermi ersarissunik paasissutissiisinnaaneq.

 

Taamatut naatsumik oqaaseqarluta Naalakkersuisut innersuussutaat, tassalu peqqussutissatut allannguutissap aappassaaneerneqannginnermini Ineqarnermut, Ataaveqarnermilu ataatsimiititaliami samminneqaqqaarallarnissaa taperserparput.

Maliinannguaq M. Mølgaard, Inuit Ataqatigiit:

Upernaaq manna inissianik attartorneq pillugu inatsit inimi maani suliaraarput. Inuit Ataqatigiinniillu maluginiarparput uuma peqqussummut allannguutissatut siunnersuutip siunertarigaa Namminersornerullutik Oqartussat, kommunillu inissiaataasa attartortittakkat aqunneqarnissaanut Naalakkersuisut malittarisassiornissaat.

 

Tamanna Inuit Ataqatigiinniit pisariaqartutut isigaarput, paatsuungasoqannginnissaa pissutigalugu sumiiffiit assigiinngitsut aningaasatigut missingersuusiornermi, naatsorsuinermilu maleruagassanik assigiimmik toqqammaveqarlutik nalilersuisarnissaat pingaaruteqarmat.

 

Tassanissaaq allaffisornikkut aqutsinermut akileeqataassutip akiliummut, akileeqataassummullu inigisap m2-ikkaarluni angissusianut annertussusiliisarnissap aalajangersaavigineqarnissaa siunertaapput.

 

Tamanna pillugu peqqussummut allannguutissatut siunnersuut Inuit Ataqatigiinniit iluarisimaarparput maluginiarluguli suliaq tusarniaassutigineqarsimanngitsoq. Tassunga atatillugu Inuit Ataqatigiinniit kaammattuutigissavarput peqqussutip malitsigisaanik maleruagassanik suliaqartoqalerpat inissianik attartortitsisut, kommunit, Namminersornerullutik Oqartussat, A/S INI-lu kiisalu attartortut peqatigiiffiisa tusarniaqqaarneqarnissaat.

 

Inuit Ataqatigiinniit taamatut oqaaseqarluta peqqussummi allannguutissatut siunnersuutigineqartoq tapersersorparput, ineqarnermullu ataatsimiititamut aappassaaniinnginnerani ingerlateqqinnissaa kaammattuutigalugu.

 

Godmand Rasmussen, Atassutip oqaaseqartua:

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaanut siunnersuummut imatut oqaaseqassaagut.

Inissianik attartorneq pillugu Inatsisartut peqqussutaata allanngortinneqarnissaanik Inatsisartut peqqussutissaanut siunnersuummut 2001-imeersumut Atassummiit imaattumik oqaaseqaateqassaagut.

 

Peqqussutissiatut siunnersuut quppernerpaalussuarnik imaqarpoq. Taannalu sukumiisumik Atassummiit misissorsimavarput, oqaatigisariaqarlutigulu Inatsimmut peqqussutissaq ippinnartoqartippallaarnatigu. Nuannaarutigaarpullu inatsimmi nammineq nuunniartuni, tassa inigisamut taamatuttaarlu inigisamiit paarlaasseqatigiissinnaalerneq Atassummiit siornatigut saqqummiussarisimasarput ersarissumik takussutissaalermat pitsanngoriaatituut.

 

Ukiunili arlaqalersuni maannamut ajornartorsiupput eqaatsumillu aaqqiivigineqanngitsoq unaavoq, tassalu inissiat inueruttut sivisuginartumik inoqanngittarnerat pitsaasuunngilaq, illoqarfinnilu tamani pissuseq taanna takornartaanani.

 

Nalunngilarpummi inigisaq atorneqartillugu akilersuineq aamma atuutilersarmat. Nunarput ataatsimut isigissagutsigu qularutissaanngilaq ukiumut aningaasat ikinngitsut ineqarnermi annaasaqaatigisarivut. Tassalu tassuuna suli pikkorinnerusariaqarlutalu eqaannerusumik periaaseqartariaqalerpugut.

 

Taamatuttaaq aserfallatsaaliornermut tunngatillugu § 26-imi imm. 3-mi pineqartoq ersarikkaluartoq, issuaaneq:

"Piffissami attartorfiusumi attartortup akisussaaffigaa inissiami qilaat, iikkallu qalipanneqartarnissaat, tapetilersorlugillu, kiisalu lakkerlugit, aningaasartuutillu akilertassagaat".  Aammattaaq nalunngilarput inoqarmat arnanik kisermaanik inissianik atuisunik, taakkulu ima inuuniarnermikkut tamaviaartigisinnaasarlutik aserfallatsaaliisinnaangitsunik namminnerlu qalipaasinnaanngitsunik. Eqqornerusumik oqaatigalugu aserfallatsaaliinissamut akissaqanngitsunik. Taamaattut immikkut ikiorsiiffigineqartalernissaat kiisalu immikkut aalajangersaaffigineqarsinnaaneri ammaffiginerusariaqarpagut. Inimik sivisuallaamik aserfallattaalineqanngitsoq atuisumut attartortitsisumulluunniit akikillisaataasanngimmat.

 

Aammattaarlu eqqaarusupparput inissianik sanaartorneq pipallatat tusarsaajuarneri takornartaajunnaarmata. Taamaattumik sanaartornermi nakkutilliinerup sukanganerusumik malittarineqalernissaa Atassummiit pingaarluinnartutut isigaarput.

 

Ove-Karl Evaldsen, Kattusseqatigiit:

Inissianik attartorneq pillugu Inatsisartut peqqussutaata allanngortinneqaatissatut Inatsisartut peqqussutissaattut 2001-imeersussatut siunnersuut pillugu Kattusseqatigiit imatut oqaaseqassaagut.

 

Inatsisartuni ineqarnermut tunngasut eqqartoratsigit aalajangiinermi ilaavugut. Maannakkullu Naalakkersuisut ineqarnermut peqqussutissamut nutaamut allannguutissatut siunnersuummik saqqummiussipput. Saqquumminerup takutippaa peqqussutissani allannguutissatut siunnersuut annikikkaluartoq, taamaattoq imarisamigut annertuumik atuisumit sunniuteqarsinnaanera qularutissaanngitsoq.

 

Taamatut allannguiniarnerit inuiaqatigiinnut annertuumik eqquisussat Kattusseqatigiinniit imaaliinnaarlugit akuersaarsinnaanngilagut, minnerunngitsumik atuisut tusarniaqqaarsimatinnagit. Malunnarpormi inuit akissarsiaqqortunerit annertuumik eqquiffigineqartut aammalu minnerunngitsumik akunnattumik akissarsiallit taamatorluinnaq eqqorneqassasut naatsorsuutigineqartariaqarmat.

Eqqarsaatigisariaqarpagummi tassa taasagut tassammaata inuiaqatigiinni annertuumik eqqorneqareersut, meeraqarsimagunik annertuumik meeqqerivinnut akiliuteqartareersut aammalu ineqarnikkut meeqqat tapiinik piiaaffigineqartareerlutik. Qaffasinnerusumik ilinniarsimasut naammasseqqaallu annertuumik eqqorneqartussaapput, taamaattumik ineqarnermut peqqussutissap nutaap kingunerisinnaasai inuiaqatigiinnut immikkoortiterinermik suli ersarinnerusumik saqqummersitsinissaa Kattusseqatigiinniit takusinnaaleratsigu akuersaarsinnaanngilagut.

 

Tassami peqqussutissatut siunnersuut upernaaq suliarineqarmat naatsorsuinerit assigiinngitsut ilisimaneqarsimanngitsut maanna aatsaat saqqumiunneqarmata. Ullumikkut aningaasat kaaviaartinneqartartut ingerlariaasaat politikkikkut aqutsinermi saamiup tungaanut sammisumik siunnerfigineqartuaalernerat malunnarsiartulerpoq. Taamaattumik inuiaqatigiit iluani toqqissisimannginnermik pilersitsisoqalerluni.

 

Inuit arlalissuit oqassapput, sooq uagut eqqugaassaagut allallu uagutsinnik inigissaanerusut akikinnermik akiliisalissappat. Kattusseqatigiinniit oqaatigissavarput ullumikkut Nuup Kommuneata misissuiffigalugu ingerlannialigaa, qallunaatut "Lejer til ejer" Inatsisartuniit annertunerusumik misissuiffigineqarnissaa Kattusseqatigiinniit malersorusukkatsigu.

 

Kattusseqatigiinnniit isumaqarpugut inuiaqatigiinnut saassutai ujartortariaqarivut, minnerunngitsumillu Nuup Kommuneata misissuinera malinnaaffigalugu.

 

Apererusunnarpoq ineqarnermut tunngasoq sooq pisortat tigummiuaannassaneraat, innuttaasullu annertunerusumik piginneqataalersinnaanissaat Inatsisartuniit ujartortariaqaleratsigu. Taamatut innuttaasunit inigisat pigineqalissagaluarpata illuatungaani iluaqutai sukumiisumik takusinnaalissagatsigit, taamaattumik Nuup Kommuneata misiligutitut anguniagai Inatsisartutigoorlugu qanimut malinnaaffigisariaqarpagut.

 

Naggataatigut pissusissamisoorsorinngilarput peqqussutissamut siunnersuummut allannguutissat minnerpaamik atuisunut, kommuninullu tusarniaassutigineqarsimanngimmata, minnerunngitsumillu inissianik attartorneq pillugu peqqussutip 1. januar 2002-imiit atulersussap maannamiit kinguneriumaagai pillugit ernummatigineqartut ilaatigut imaannaanngitsut pillugit.

 

Taamatut oqaaseqarluta Kattusseqatigiinniit peqqussutissatut siunnersuut akuerinianngilarput, inuiaqatigiinnut kingunerisassai ersarissut takusinnaannginnatsigit.

Otto Steenholdt, attaviitsoq:

Allannguutissaq Inatsisartunut saqqummiunneqartoq ? tassa peqqussutissaq, naatsoralaannguanik imaqarpoq iluarsartuusseqqinniarluni suliat maanna ingerlasut pineqarput aammalu siumut missingersuussaliornissat qularnaarneqarnissaanut maleruagassiornissaq periarfissillugu, taamaallaallu pineqarpoq oqaasertatigut allannguinissaq, tassa paasissutissanik tatiginartunik maleruagassiornissaq, taavalu aamma kukkunersiueqqusisarnissamut maleruagassiornissaq.

 

Taamak naatsigisoq takisuuliutissarujussuunngimmat akuersaarpara aammalu oqallisissagut marlut tulliuttut taamatorluinnaq isikkoqartut massakkuminngaanniit oqaaseqarfigilaarusullugit, oqaaseqarneq ajortut landstingimi periarfissinneqarnerat qutsatigaara, kisianni takisuuliuutigerujussuarnagit akueriinnagassaapput.

 

Ole Lynge, Inatsisartut Siulittaasuat, Inuit Ataqatigiit:

Tassa immikkoortoq 33 sammigallassavarput, ataatsikkoortittussaannginatsigit, kisianni Ineqarnermut, Attaveqarnermut Pilersuinermullu Naalakkersuisoq Jørgen Wæver-Johansen akissuteqarallassaaq.

 

Jørgen Wæver Johansen, Ineqarnermut, Attaveqarnermut Pilersuinermullu Naalakkersuisoq: Siumut:

Siullermik maluginiarpara Inatsisartuni amerlanerussuteqarluartut tassalu Siumut, Inuit Ataqatigiit, Atassut kiisalu attaviitsoq Otto Steenholdt saqqummiunneqartumut tapersersuinerat aammalu kissaateqartut amerlanerussuteqartut aappassaaneerneqartinnagu ataatsimiititaliami suliarineqaqqaarallassasoq. Taamaaliortoqarnissaa aamma uanga siunnersuutigeqqikkusuppara.

 

Inuit Ataqatigiinniit ilaatigut oqaatigineqarpoq kissaatigineqarluni maleruagassat siunissami uumap malitsigisaanik pilersinneqartussat tusarniaassutigineqartarnissaat ilaatigut kommuninut, A/S Inissiaatileqatigiiffik INI-mut kiisalu attartortut peqatigiiffiinut, taanna qularutissaanngitsumik taamaassaaq, kisianni aamma qujarusuppunga Siumukkormiunut, Inuit Ataqatigiinnullu paasilluarsimammassuk uani pineqartoq tassaammat attartortut piginnaatitaaffiisa pitsaanerusumik illersornissaannut maleruagassiorsinnaaneq. Tassa allannguutissaq taannatuaannaavoq, tassalu § 9 imm. 4 oqaasertamigut allanngortiallanneqarnera.

 

Taamaattumik uani Kattusseqatigiit oqaaseqartuata saqqummiussai, taakkua Naalakkersuisut allannguutissaannik pineqanngillat, taakkua Inatsisartut tamavimmik tamarmiulluta upernaaq akuersaarpagut. Taamaattumik taakkua uani siunnersuuteqarnitsinni pineqanngillat akuerineqareermatami.

 

Atassummiit Godmand Rasmussenip peqqussutissatut siunnersuutip matuma siunissami aamma soorunami nalilersortuarlugu ingerlatsinissatsinni eqqumaffigineqartariaqartoq assigiinngitsut taakkartorpai, neriorsuutigissavaralu taakkua peqqussutissap naliliiffigineqaqqinnerani aamma ilanngullugit misissorneqarumaarmata.

 

Taamatullu oqaaseqarlunga oqaaseqartunut qujarusuppunga neriuutigissallugulu Ineqarnermi ataatsimiititaliami pitsaasumik suliarineqarumaartoq.

 

Johan Lund Olsen, Inuit Ataqatigiit:

Tassaanna apeqquteqaannarniarlunga aamma una suliaq ataatsimiitialiamut ingerlaqqittussaammat ataatsimiititaliami aamma aappassaaneerisoqartinnagu eqqarsaatigineqalaarnissaa aamma una kissaatigigiga. Tassa ulluni kingullerni tusagassiuutitigut allatigullu tassa malinnaavugut A/S INI qanoq annertutigisumik sukatiterinialernersoq. Tusartarparput aamma malinnaavugut allaat akiitsullit, tassa A/S INI-mut naafferartumik akilersuisinnaajunaarsinneqassasut aammalu akiitsoqalersimasut anisitaasalertussaassasut, allaat qaammammik ataasiinnarmik akiitsullit. Sukatiterineruvoq annertoorujorujorujussuaq taamaammat isumaqarpunga ataatsimiititaliamit aamma eqqumaffigineqarfigineqarumaartoq tamanna. Naapertuuppa peqqussutip taamatut attartortut piginnaatitaaffiinik pingaartitsisup taamatut ingerlanneqarneranut? Aamma kommunit taamatut pisoqartalissappat, tassa akiitsullit aammalu attartortut ima amerlatigisut soorlu ippassaq Qanoruumi takusatsituut amerlatigisut anisitaasalissappata, kommunit piareersimappat?

 

KANUKOKA-p isumaa qanoq ippamitaava" Tusarniarneqarnikuunerlutik" Allatut oqaatigalugu taamatut A/S INIP sukatiterilernissaanut kommunit piareersimavippat? Isumaqarpunga, ataatsimiititaliap sukumiilluinnartumik nalilersortariaqaraa.

 

Jørgen Wæver Johansen, Ineqarnermut, Attaveqarnermut Pilersuinermullu Naalakkersuisoq, Siumut:

Qujanaq. Tusagassioriaatsit assigiingitsut sivisuumik oqaluuserisinnaagunaraluarpagut, aamma taakkua pitsaassusaat inuiaqatigiinni eqqartorneqarluarsinnaasut ilagigaluarpaat. Uani paasissutissat piffissami kingullermi saqqummiunneqartut tassaapput maleruagassat siunissami atuutilersinnaasut, tusarniaassutigineqarnerini qisuariaatit. Saqqummiunneqarnerinili allaavinngilaq tassa taakkua aalajangiunneqareersimasut. Taakkua maleruagassat tusarniaassutigineqarput massakkut suliluunniit Naalakkersuisunut aalajangiiffigisassanngorlugit saqqummiunneqanngillat. Taamaattumik inuuttaasunik ernusaarineq suliluunniit suliaq Naalakkersuisunut aalajangiiffigisassanngorlugu apuunneqarsimanngitsoq, taanna uggornarpoq ? ajuusaarnarpoq. Tassanilu soorunami neriuutigaara siullermik uagut ilaatigut pisooqataavugut pitsaanerusumik tusagassiuutit tungaatigut paasissutissiisariaqaratta, kisianni aamma tusagassiorfiit assigiingitsut pitsaanerusumik misissueqqaarlutik saqqummiussisarsinnaagaluarput.

 

Ole Lynge, Inatsisartut Siulittaasuat, Inuit Ataqatigiit:

Tassa nappaaqattaalermata una oqaatigerusuppara amerlanerit isumaqatigiissutigereermassuk sapinngisamik allannguutissatut siunnersuut kisiat pulaffigineqarnissaa.

 

Otto Steenholdt, attaviitsoq:

Aatsaaqqissaaq Naalakkersuisunut Ilaasortap oqaasii nangeqqitariaqanngilakka, isumaqatigilluinnarakku. Maligassagut uaniittarput Inatsisartuni oqallisigisagut tunngavigalugit ataatsimiititaliat suliassittarlugit maani oqallisigisarput ataatsimiititalianut suliassiinerunngilaq, taamaattumillu Johan Lund Olsen isumaqatiginngilara.

 

Daniel Skifte, Atassutip:

Üangattaaq Otto Steenholdti taperserlugu oqassaanga maannakkut oqallisigisarput allaalluinnarpoq, Naalakkersuisup akissutaa aammalu Johan Lund-Olsenip oqaasii taakkua pissaqqaarput immikkoortoq 26-mi, taamaattumik Inatsisartuni oqallisissagut siulliuniuffigalugillusooq pilissagutta taava tavanneqalissaaq, taamaattumik oqalliserput teknikikkut allanngortiterinnaavoq annerunngitsoq, kisiannili oqallittariaqarpugut ulluni makkunani pisut soorlu Johan Lund Olsenip taasai pillugit ? piffissamili allami. Tulliata tulliani immaqa.

 

Johan Lund Olsen, Inuit Ataqatigiit:

Kisianni aamma OttoSteenholdtip aammalu Daniel Skiftep eqqaamasariaqarpaat Inatsisartuni suleriaaserput malillugu imaammat; Inatsisartut ataatsimiititaliaat suliassaqarfimminnut aammalu susassaqarfimminnut tunngassuteqartunik suugaluinilluunniit ataatsimiititaliami aamma eqqartuisinnaallutik. Taannaana iluatigalugu aammalu matumani eqqartukkatsinni pineqarmata inissianik attartortut aamma pisinnaatitaaffii. Taakkuukua eqqarsaatigalugit suliaq ingerlaqqinnerani ataatsimiititaliamit aamma nalilersorneqarnissaa kissaatigigiga una: INI A/S-ip maannakkut sakkortoorujorujussuarmik sukatiterinialernera, taanna isumaqarpunga ataatsimiititaliap aamma sukumiilluinnartumik eqqartortariaqaraat, tassami imaannaanngitsuuvoq. Tassanilu apeqqut pingaaruteqartoq aamma tassaavoq kommunit ilumut piareersimappat? Anisitaasorpassuit taakkua inissaqartinniassallugit piareersimappat? Taanna qularnarpoq.

 

Ole Lynge, Inatsisartut Siulittaasuat, Inuit Ataqatigiit: