Ullut ataatsimiiffiusut 21-at, ataasinngorneq 5. november 2001, nal. 13:08

Oqaluuserisassani immikkoortoq 33

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut.

(Ineqarnermut, Attaveqarnermut Pilersuinermullu Naalakkersuisoq)

(Pingajussaaneernera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

Ole Lynge, Inatsisartut Siulittaasuat, Inuit Atqatigiit.

Tassunga tunngatillugu oqaatigilaassavara immikkut Attaveqarnermut, Pilersuinermut Ineqarnermullu Naalakkersuisoq, Jørgen Wæver-Johansen, oqaaseqarumalluni qinnuteqarsimammat.

 

Jørgen Wæver Johansen, Attaveqarnermut, Pilersuinermut Ineqarnermullu Naalakkersuisoq, Siumut.

Tassa immikkoortut tulliuttut pingasut 32, 33, 34-ilu ineqarnermut tunngassuteqartut, ataatsimoortillugit taasinnginnitsinni oqaaseqarfigilaarusuppakka.

 

Katersuunnermi matumani ineqartunermut tunngasuni sulianut Inatsisartut akuersortumik pisimanerat Naalakkersuisut sinnerlugit Inatsisartunut qujassutigaara. Periarfissaq iluatsillugu periarfissat ineqarnermullu tunngasuni naalakkersuinikut ingerlatsinermi suliassat ornitagut tamanut tunngatillugu oqaaseqarfigilaarusuppakka.

 

1990-ikkunni aallartilaarneranni inissianik attartortut piginneqatigiilluni inissianik nutaanik sanaartornissaminnut imaluunniit inissiat attartukkamik piginneqatigiilluni inissianngortinneqarnissaannut periarfissinneqarput. 1995-imi inissianik attartortittakkani najugaqartut oqartussaaqataalersippagut inissiallu najugaqarfinnut nammineq aningaasaqartitanut agguataarneqarput. 2002-p imaluunniit 2002-mi inissianik attartornermut akiliutit iluarsaavigaagut ilaatigut siunertaralugit siullermik: Akissaqarnerusut pilliuteqarnerunissaat.

Aappassaattut akissaqarnerpaat imminnut inissaqartinnissaminnut piumassuseqalertinnissaat, kiisalu pingajussaattut namminerisamik inigisamut aningaasaliinikkkut ileqqaarnerulersitsinissaq.

Tassunga atatillugu Naalakkersuisut nuannaarutigalugu paasivaat kommuunit arlallit inissianik attartorisamik attartukkaminnik tigusisinnaalernissaat tapersersornerulerniarlugu soqutiginnimmata. Nuup Kommuunia pilersaarummi attartumiit piginnittumut piareersimanerpaavoq, tamannalu Naalakkersuisut soqutiginnilluarlutik malinnaavigisimavaat.

Piffissami aggersumi pilersaarut pitsaasusissamigut qularnaarneqassaaq, tamatumuuna attartortut pisinnaatitaaffii pisussaaffiilu imminnut malinnaasussanngorlugit.Attartortutut piginnittutullu aningaasat atugaat nalilersorneqassapput aammalu tamakkiisumik ilumoortumillu paassissutissiisoqassalluni. Tamatuma saniatigut pilersaarut iluanaarniutigineqarataarsinnaanerminut isumannaallisaavigineqassaaq.

Naalakkersuisut aamma pingaartorujussuartut isumaqarfigaat ilutsip, tassa attartumiit piginnittumut kommuuninit arlalinnit atorneqarsinnaanissaa.

 

Taamaattumik pilersaarutip piviusunngortinneqarnissaanut atatillugu pisariaqartitsineq malillugu inatsisitigut suliniutissat piffissarlu eqqarsaatigalugu naatsorsuutigineqarsinnaasut qulaajaaffigineqarnerat Naalakkersuisut aallartereerpaat.

 

Piginneqatigiilluni inissianut piumasaqaatit malillugit attartortut attartukkaminnik tigusinissaminnik soqutiginnikkiartuaarnerisa Inatsisartuni tapersersorneqarnissaa Naalakkersuisut pingaartippaat. Taamaattumik Naalakkersuisut matumuuna nalunaarutigissavaat tamatumani sulineq nanginneqalersaartoq kommuuniit soqutiginnittut tamarmik suleqatigalugit.

Attartortut attartukkaminnik piginneqatigiilluni inissianut piumasaqaatit maillugit tigusinissaminnik aalajangiisimasut ukiut arlalinnguit qaangiunneranni aamma soqutiginnissinnaapput inigisamik piginneqatigiilluni inissianiit piginnittutut inissiamut allanngortinnissaannut. Tamanna aamma atuuppoq piginneqatigiilluni inissiaatilinnut 1900-ikkut aallartilaarneranni piginneqatigiilluni inissialiorsimasunut.

 

Naggasiullugu oqaatigissavara ineqarnermut tapersiissuteqartarnermut tunngasut Naalakkersuisut malinnaaffigeqqissaaraat. Iluarsaassineq siulleq Naalakkersuisut naammassisimavaat kapitali 4 malillugu taarsigassarsinikkut illuliorsimasut akiuliutissaminnullu ineqarnermut tapiiffigineqartarsimasut akiliutissaasa akiitsuisalu sinneruttut akileriigassaagaluit isumakkeerfigineqarsinnaasunngornerannut atatillugu.

 

Ineqarnermut tapiissuteqartarneq aqqutigalugu illuutillit atugarisaasa aningaasaqarnikkullu piginnaasaasa tamakkiisumik misissuiffigineqarneranni tulliuppoq taarsigassarsisimasut sinnerisa aningaasaqarnikkut piginnaasaasa aamma ineqarnermut aningaasat atugaasa misissuiffigineqarnissaat. Misissuineq taamaattoq tunngavigalugu atugassaritit suli oqinnerulerseqqinnissaat pillugu siunnersuummik siunissami saqqummiussisoqassanersoq eqqarsaatigineqarsinnaavoq.

 

Taamatut oqaaseqarlutik Naalakkersuisut inassutigaat inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut aamma piginneqatigiilluni inissiat pillugit Inatsisartut peqqussutissaata allanngortinneqarnerani Inatsisartut peqqussutissaattut siunnersuut, kiisalu inissialiornermut tapiissuteqartarneq pillugu Inatsisartut peqqussutaata allangortinneqarnerani Inatsisartut peqqussutissaattut siunnersuut massakkutut iluseqarlutik akuersissutigineqassasut.

Qujanaq.

 

Ole Lynge, Inatsisartut Siulittaasuat, Inuit Ataqatigiit.

Qujanaq. Tassalu allanik oqaaseqarniarluni nalunaartoqanngilaq. Taamaalilluni taasinialissaagut, taavalu erseqqissassavara aamma immikkoortut taakkua pingasut immikkut taasissutigineqaqattaartussaammata.

Utoqqatserpunga, Jakob Sivertsen, Atassut oqaaseqarusuppoq.

 

Jakob Sivertsen, Atassut.

Immikkoortut pineqartut 32 aamma 33 siornatigut immikkoortillugit sammineqarput. Siullermeerlugu aappassaaneerneqarlugulu. Taamaattumik uagut kissaatigisimavarput immikkoortoq 34-p immikkuullarinnera peqqutigalugu, taanna immikkut taasissutigineqassasoq peqqutigalugu immikkoortut marluk akuerseqataaffigisimavagut. Ataaserlu taanna akerlilersimallugu, taamaattumik taakku marluk immikkoortinnissaat kissaatigaarput. Immikkoortinneqanngippata taava oqaaseqartariaqassaagut, kisianni immikkoortinneqarpata, taava kingullerpaamut taamaallaat oqaaseqassaagut. Qujanaq.

 

 

 

Ole Lynge, Inatsisartut Siulittaasuat, Inuit Ataqatigiit.

Qujanaq. Tassa paatsooqqunasi aatsaannguaq paatsuunganartumikoqarsimanerama immikkoorlugit taakku taasissutigisussaagatsigit erseqqissaatigaara.

 

Tassa siulliullugu immikkoortoq 33 taasissutigissavarput.Tassalu Inatsisartut aappassaa-neerinninnermi Inatsisartut Attaveqarnermut, Pilersuinermut Ineqarnermullu Ataatsimiititaliaat amerlanerussuteqartumik Siumup, Atassutip Inuit Ataqatigiillu taamatut iluseqarluni akuerineqarnissaa inassutigaat, Kattusseqatigiit tassani akerliusimasut.

 

Taamaalillugu apeqqutigissavara, oqaatigissavara inissianik attartornik pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut pingajussaaneerneqarneranik taamatut iluseqarluni akuerineqarnissaanut isumaqataasut qinnuigissavakka nikueqqullugit.

25-t.

Akerliusut qinnuigissavakka nikueqqullugit.

3.

Taaseqataanngitsut qinnuigissavakka nikueqqullugit.

  1.