Ullut ataatsimiiffiusut arfersaneq arfineq-aappaat, pingasunngorneq oktoberip 24-at 2001, nal. 13:14

Oqaluuserisassani immikkoortoq 33

Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut, aappassaaniigassaq.

(Ineqarnermut, Attaveqarnermut, Pilersuinermullu Naalakkersuisoq)

(Aappassaaneernera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

Tassunga oqaaseqarniarluni qinnuteqartoqarsimanngilaq. Isumaliutissiissuteqarpoq kisianni nappaasoqarpoq.

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Inatsisartut Attaveqarnermut Pilersuinermullu aamma Ineqarnermut Ataatsimiititaliaa isumaliutissiissutaanut Naalakkersuisut sinnerlugit qujarusuppunga. Isumaliutissiissutip pissutissaqalersippaanga paatsuuinertut isikkoqartut marlussuit qaangerniarlugit oqaaseqaatinik marlussunnik saqqummiussinissara.

 

Peqqussutissatut siunnersuutip taamaallaat imaraa teknikkikkut allannguineq. Maleruagassat kommunit aamma Namminersornerullutik Oqartussat inissiaataanni najugaqatigiiffiit missingersuusiornerisa naatsorsuutinillu saqqummiussinerisa naatsorsuuserinermi tunngavissat assigiissut akuerisaasullu malillugit pisarnissaannik ilaatigut qulakkeerisussat suliarineqarnissaannut tunngavissiisussaq.

 

Aammattaaq qularnaarneqassaaq najugaqatigiiffiit naatsorsuutaasa kukkunersiorneqarsinnaanissaat. Siunnersuut saqqummiunneqarpoq nalunaarut julip qaammataanili KANUKOKA-mut kommuninut inissiaatiminnik nammineq aqutsivigineqartunut SIK-mut sulisitsisut peqatigiiffiannut Grønlandsbankimut Deloitte & Touchemut kommunernes revision-imut aammalu A/S inissiaatileqatigiiffik INI-mut tusarniaatigalugu isummerfigeqquneqarsimasoq tunngavissaqalersinniarlugu. KANUKOKA-mit isumaqatigiinniarnerit inaarutaasussat massakkorpiaq ingerlanneqarput.

 

Nunatta karsiata kukkunersiuisuisa Deloitte & Touchep tusarniaaffigineqaramik akissuteqarnermini ilaatigut oqaatigaa, issuarpara: "Ataatsimut isigalugu isumaqarpugut nalunaarut tamakkerluni pitsaasuusoq, isumatuujusorlu aammalu aqutsisumut piumasaqaataasut naleqqutinngitsutut isumaqarfigineqarsinnaanngitsut. Kommunernes Revisionip ilaatigut oqaatigaa ineqarnermut inatsit attartortut soqutigisaannik qularnaarissasut najugaqatigiiffiit piginnittuinit tunngaviatigut immikkooruteqanngitsumik pitsaasumik aningaasaqassasut isumaqatigaara." Issuaaneq naavoq.

 

Siunnersuut manna nalunaarummut imminut atasussamut tunngavissiinissaq siunertaralugu taamaallaat teknikkikkut allannguinerummat siunnersuutip tusarniaassutigalugu isummerfigeqqunissaa Naalakkersuisut pisariaqartissimanngilaat. Pingaartinnerusimalluguli nalunaarutip nammineq piffissaqarfiulluarluni angusaqarfiulluartussamik tusarniaassutigineqarnissaa.