Ullut ataatsimiiffiusut arfersaneq arfineq-aappaat, pingasunngorneq oktoberip 24-at 2001, nal. 13:20

Oqaluuserisassani immikkoortoq 34

Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut.

(Ineqarnermut, Attaveqarnermut Pilersuinermullu Naalakkersuisoq)

(Aappassaaneernera)

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

 

Ole Lynge, Inatsisartut Siulittaasuat, Inuit Ataqatigiit.

Tassani Attaveqarnermut Pilersuinermullu Ataatsimiisitaliaq aamma Ineqarnermut Ataatsimiititaliaq isumaliutissiissuteqarpoq, kisianni qinnuteqartoqarsimanngilaq maani saqqumiussaqarnissamut. Apeqqutigissava oqaaseqartoqarniarnersoq.

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Naalakkersuisut sinnerlugit Inatsisartut attaveqarnermut pilersuinermullu aamma ineqarnermut ataatsimiititaliaat isumaliutissiissuteqarneranut qutsavigaara. Isumaliutissiissutip marlussunnik nassuiaateqarnissannut pissutissaqalersippaanga.

 

Piffissat tunniussivissat qaangertoorneqaraangata tamanna tamatigut ajuusaarnartuusarpoq. Siunnersuutip matumani pineqartup piffissaq tunniussivissaq qaangiutereersoq nassiunneqarneranut pissutaavoq inatsisip pitsaassusissaata ataatsimiititaliamittaaq ujartorneqartup qulakkeerneqarnissaa. Tassami aningaasaqarnermut tunngasunik kingunerisassai annertunerusumik paasiniarneqaqqaartariaqarsimammata.

 

Naalakkersuisut tusaatissatut tiguaat Inatsisartut attaveqarnermut pilersuinermullu aamma ineqarnermut ataatsimiititaliaanni amerlarnerussuteqartut oqaatigimmassuk siunnersuutikkut tamakkiisumik aningaasatigut matussusiisoqassammat kapitali 4 malillugu inissialiornermut tapersiissuteqartarnermut aaqqissuussinermit taarsigassarsillutik illuutillit aprilip 30-ata 2002-p kingornatigut ineqarnermut tapinik pisartagaqarunnaarnissaannut tunngatillugu.

 

Ataatsimiitialiamit isumasioqateqarninni isumaqatigiissutigaarput Naalakkersuisut Inatsisartut ineqarnermut tungasutigut Naalakkersuinikkut sulinerannut iluaqutaassasoq ataatsimiititaliaq uangalu ineqarnermut tunngasutigut Naalakkersuinikkut ingerlatsineq pillugu ulloqartitsisinnaassagutta. Ilaatigut suliassat aggersut pingaarutillillu oqaloqatigiissutiginissaannut periarfissaqarluta. Tassani eqqarsaatigaakka ineqarnermut tunngassuteqartut aqunneqarnerat aaqqissuussaanerallu aamma tapersiisarnermik aaqqissuussinerit atuuttut misissorneqartariaqalersimammata.

 

Nunat kangimut kimmullu sanilerisavut ukiuni qulikkaani kingullerni pigisaralugit inissiaqariaatsit assigiinngitsut attartortuunermiilli piginnittuulernermut ikaarsaariarnerit eqqarsaatigalugit uagutsinnit siuarsimanerulersimapput. Naalakkersuisut ataatsimiititaliamit suleqateqarnissartik qilanaaraat attartortunut inuiaqatigiillu ataatsimut isigalugit iluaqutaasumik nuaannaarutaasumillu.

 

Naalakkersuisut sinnerlugit taamatut oqaaseqarlunga matumuuna inassutigissavara inissialiornermut tapersiissuteqartarneq pillugu Inatsisartut peqqussutaata allanngortinneranik Inatsisartut peqqussutissaatut siunnersuut taamatut iluseqartillugu pingajusaaniigassanngortinneqassasoq.

Jakob Sivertsen, Atassut.

Tassa ataatsimiititaliamit ikinnerussuteqartut Atassummit isumaqatigigatsigit erseqqissaatigilaarniarparput. Aamma tusarnaartunit paatsuuisoqaqqanagu oqaatigissavarput uani BSU-nut illoqartunut tunngasumik peqqussutissaq pineqarmat.

 

Nunatsinni illoqarfinni nunaqarfinnilu pingaartumik avalliunerusuni inissisimasuni tassalu Qaanaami,Illoqqortoormiini, Tasiilami, Upernavimmi, Uummannami nunattalumi sinnerani BSU-mik illoqartorpassuit illumut atukkamut erniaasa qaffasinnerujussuat pingaartumik ukiuni kingullerni qulini erniata qaffaateqarnerisa kingorna illumut akilersuiniarnerminni assut atorsartitaasimapput. Taamatumalu kinguneralugu BSU-mik illut ikigisassaanngitsut qimararneqarsimallutik.

 

Piffinni siuliini oqaatigisanni pingaartumik nunaqarfinni aningaasarsiorniarneq nunatta sinneranut naleqqiullugu periarfissalunnerujussuuvoq. Ilaatigut puisip amiinnaanik ullumikkullu akilersinnaajunnaarsimasumik aningaasarsiornerup toqqammavilernera peqqutaalluni. Pingaartumillu ukiuni kingullerni nunaqarfinni tunitsiviit tunisassiorfiillu matoorarnerisa kingunerisaannik innuttaasut akiligassanut assigiinngitsunut akilersuiniarnertik assut ilungersunartorsiutigigaat nalunnginnatsigit.

 

Ataasummi BSU-mik illoqartunut aaqqiiniutissamik siunnersuummik saqqummiussaqarnitsinni ullumikkut inissialiortiternermi aaqqissuussinerit nutaat periarfissallu nutaat avalliunerusuni najugalinni iluaqutigineqarsinnaanngitsut nalilersuinitsinni misissoqqissaarsimavagut soorlu piginneqatigiilluni inissialiorsinnaanerit avalliunerusuni periarfissaqartitaanngillat. Taamaallaat nammineq illuliat BSU-mit atorluni illuliat, kiisali 60/40 atorlugu pisortanit inissialiat killeqaqisumillu innuttaasut inissaqartinniarnerannut kisimik periarfissatuaallutik.

 

Aammalu kommunip qanoq akissaqartiginera inissialiortarnermi apeqqutaasartorujussuulluni. Assersuutigalugu ullumikkut illoqarfinni anginerusuni namminerisamik ineqarsinnaanermut oqilisaassilluni periarfissat nutaat aqqutissiuunneqarsimapput soorlu inuit akissaqarluartut piginneqatigiilluni inissialiortiternerminni inissialiat akiviata 67%-ianik tassa inissiap akiata affaa sinningaatsiaqalugu pisortanit tassa Namminersornerullutik Oqartussanit kommuninillu tapiiffigineqartarput erniaqanngitsunik akilersugassaanngitsunillu. Taamaattumik tupinnanngilaq BSU-nik illoqartut illumik namminerisaminnik pigisaqalernissaminnik piginneqatigiilluni inissialiortarnermut assingusumik oqilisaassiffigineqarnissaminnik piumasaqaateqaleramata. Inissialiortarnermi periarfissat innuttaasunut tamanut assigiinnerusumik periarfissaqartitaanissat Inatsisartut pisussaaffigigatsigit.

 

BSU-mimmi illutaarsinnaanermut aaqqissuussineq 1953-imeersoq ullumimut annertunerusumik nutarterneqarsimanngilaq. Tamannarpiaq tunngavigalugu upernaaq Inatsisartut ataatsimiinnitsinni BSU-mi illoqartunut akerlersueriaatsit pingaartumillu ernialersuinermut tunngassuteqartut ullumikkut nunatsinni inissialiortarnermut aningaasalersuinermullu aaqqissuussinermut nutaamut naleqqussarlugit allanngortinneqarnissaannik Atassummit Inatsisartunut ilaasortat sinnerlugit siunnersuummik saqqummiussaqarsimavunga.

 

Tamannalu tunngavigalugu maannakkut peqqussutip allannguutissaa aappassaaneerlugu oqaluuseraarput. Atassummit upernaaq Inatsisartuni oqallinnermi BSU-mik illoqartunut akerlersueriaatsit minnerunngitsumillu atukkat erniaqqortunersuat peqqutaallutik BSU-mik illoqartut illut akilersorsinnaajunnaarlugit qimaannartagaasa aaqqiiffiginiarneqarnissaannik Naalakkersuisunut suliakkiissutaat maannakkut allanngortilluinnarlugu saqqummiuneqarnera misissorluareerlugu Atassummit suliarilluagaanngitsutut nalilerlugu siullermeerinninnermi kinguartinneqarnissaa piumasaqaatigisimavarput. Maannamullu isummernerput aalajangiusimallutigu.

 

Peqqussutissammi BSU-mik illoqartut akilersuilluarsinnaanngitsut isumakkeerfigineqartarnissaat taamaallaat kingunerisussaagaa takusinnaavarput. Tamanna isummamigut ajunngikkaluarpoq. BSU-millu illoqartunut amerlanerpaanut ilungersorlutillu akilersuijuartunut minnerpaamilluunniit iluaqutigineqartussaanngitsoq Naalakkersuisup peqqussutissamik saqqummiussaqarnermini oqaatigaa.

 

Soorlu saqqummiussaqarnermini ilaatigut ima oqartoq, issuarpara: "Tamanna taarsigassarsisimasunut allanut akiligassaminnik akilersuilluartunut mamianarsinnaagaluarpoq." Peqqussutissamut siunnersuut akuerineqassappat BSU-mik illoqartorpassuit akilersuiniarnerminni ilungersunartorsiuteqareeramik aamma isumakkeerfigineqarnissaminnik nillialissapput. Tamanna Inatsisartuni ilaasortaasugut naatsorsuutigereertariaqarparput.

 

Atassummit erseqqissaqqissavarput nunatsinni innuttaasut ataatsimut tamaasa eqqarsaatigalugit ajornartorsiutaannik aaqqiiffiginiartussaavagut, inuit ataasiakkaat pinnagit. Soorlumi nunatta ataatsimut qinersivinngornerata tamanna siunertarigaa. Inatsisartunut ilaasortaasugut tamatta tamanna nalunngilarput, ilisimaaralugulu.

 

Taamaattumik anersaartorlualaariarluta peqqussutissap kingunerisassai ulluinnarni atuisut peqatigalugit misissorlualaariartigit. Taamaaliornitsigut innuttaasut innuttaasunut tamanut iluaqutaanerusussaq naammaginarnerusussarlu anguneqarsinnaasoq Atassummit naatsorsuutigilluinnaratsigu.

 

Taamatut Atassummit oqaseqarluta peqqussutissamut siunnersuutip kinguartinneqarnissaa innersuussutigaarput.

Qujanaq.

 

Mogens Kleist, Kattusseqatigiit.

Uaguttaaq siullermeerinermi oqaaseqaatigisimasagut toqqammavigalugit Kattusseqatigiinniit imatut oqaaseqassaagut. Tassa tungitsinninngaaniit siunnersuut eqqarsaatigilluagaanngitsutut aammalu kommuninut annertuumik eqquinissaat eqqarsaatigalugit taamatut tungitsinngaaniit itigartitsiniarnerput aalajangiusimassavarput.

 

Tassami akunnattumik aamma akissarsiallit annertuumik tassuunallu eqqorneqartussaapput. Aammalu kommuninut kinguneqarnissaa eqqarsaatigalugu tungitsinninngaaniit oqaatigissavarput. Taassumap uumap siunnersuutip massakkut aalajangiiffigisassatut siunnersuutigineqartup aappassaaneerneqarneranut Atassutikkut oqaaseqartuat isumaqatigalugu oqaatigisimasavut toqqammavigalugit uagut aamma siunnersuummut itigartitsiniarluta taaseqataassaagut.

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Qujanaq. Tassa Naalakkersuisut sinnerlugit soorunami siullermeerneqarnera uteqqillugu aallartinneqarnissaa takorluunngilara, kisianni ataqqilluinnarpakka aamma siullermeerinninnermi isummaminnik anitsisinnarlutik taava aalajangiussisimasut. Naak sapinngisarput najoqqutaralugu aamma isumasioqatigiinnitsinni pisinnaasarput tamaat nasssuiaaniarsimagaluarluni.

 

Taamaattumik ikinnerussuteqartut taamatut isummernerat soorunami ataqqivarput. Kisiannili Naalakkersuisut tungaanninngaaniit suli aalajangiusimavarput siunnersuutigineqartoq Inatsisartut upernaaq siunnerfigeqqusaannut naapertuuttumik aaqqiinerusoq.

 

Eqqaamalaartigu suna aallaavigigipput. Upernaaq oqarpugut, boligsikrinngi allanngortileratsigu oqarpugut. Isumannaassavarput ullumikkut boligstøttenik illuni najugaqartut atugaasa ajornerulersinneqannginnissaat. Taanna Naalakkersuisuni suliarisimavarput.

 

Matumani Atassutip oqaaseqartuata Jakob Sivertsenip eqqartugai tassa inuppassuit atorsartinneqartut. Imaluunniit isertitakinnertik tunngavigalugu akilersinnaajunnaaraat. Taakkumiuku eqqarsaatigalugu matumani aaqqiiviginiarneqartut.

Atorsartut akiliisinnaajunaartullu tassaammata isertitakinnerpaat. Taamaattuminguna isertitakinnerpaat qinnuteqarnermikkut naliliiffigineqareerlutik allanik periarfissaqartoqanngippat isumakkeerfigineqarsinnaanerat matumani periafissiissutiginiarneqartoq. Imaappoq atorsarnerpaat taakkua ikiorserniarneqarput, ajornerusunik atugassaqartinnissaat soorunami Naalakkersuisuniit siunnersuutiginngilarput.

 

Aamma siunnersuummi matumani siunissamut sammisortaa tassaavoq siunissami taamatut isertitakitsutut inissikkumaartussat aamma taakkua periarfissikkusuppagut qinnuteqarnissaannut, kisianni qinnuteqaatit isumakkeerfigineqarnissamut tamarmik ataasiaakkaarlutik naliliiffigineqartassapput. Ilumut illoq taanna naleqanngivinnersoq. Ilumut piginnittoq akiliisinnaassuseqanngivinnersoq, il.il.

 

Taamaattumik Naalakkersuisut tungaanninngaaniit isumaqarpugut aallaavissatut tikkuartorneqartut Inatsisartuninngaaniit naammassivagut. Saniatigullu aamma siunissamut taamatut isertitakinnerpaatut atorsarnerpaatut inissittussanut aaqqiineq isumannaarneqarpoq.

 

Soorunami sunaluunniit inatsit killigititalik mamianarsinnaasarpoq killigititaasut qulaatunginnguaniikkaanni. Taanna nalunngilarput inatsisini allani aamma taanna atuuppoq. Taamaattumik taanna oqaaseqatigiit taamaattut atorneqarsimaneri tupaallaatissaanngillat. Aamma killigititaasunik aalajangersaasartut tassaapput Inatsisartut.

 

Taamaattumik killigititaasut ajorineqarpata Inatsisartut aamma periarfissaqarput killigititaasut allanngortinneqarnissaannik oqariartuuteqassallutik, kisianni killigititaasut qummut nikisinneri tamaasa aningaasanik naleqarput. Taannalu eqqaamaannassavarput.

 

Uani Atassutip oqaaseqartuata ilaatigut kinguartinneqarnissaa kingumut siunnersuutigeqqippaa. Kinguartinneqariataassagaluarpat. Taava suna sunniutigissavaa. Taava aallaavittut Inatsisartuninngaaniit oqariartuutigineqartoq tassalu BSU-ni najugaqartut ullumikkut ineqarnermut tapiissutinik pisartagaqartut taakkua majip aallaqqaataaninngaaniit aappaagu tassa atugaat aatsaat iluamik ajornerulersinneqassapput. Taannaana pinngitsoortinniarlugu imatut siunnersuuteqartugut.

Taamaattumik kingumut Naalakkersuisut sinnerlugit qujassuteqarfigerusuppakka amerlanerussuteqartut ataatsimiititaliami taamatut isikkoqarluni pingajussaaneerneqarnissaanut inassuteqartut, kisianni Kattusseqatigiit oqaaseqartuannut oqaatigilaarusuppara isertitakinnerit, isertitakinnerpaat taamattut periarfissinneqarnerat qanoq ililluni kommuninut eqquinerlussagami? Akerlianik kommunini taakkua najugaqartut inuit immaqa kommunininngaaniit isumannaallisaatinik pisartagaqartut ikiliallassapput. Taamaalillunilu kommuninut iluaqutaalluni.

 

Aamma akunnattumik isertitallit ullumikkut ineqarnermut tapiissutinik pisartagaqanngillat BSU-ni illuutillit. Taamaattumik oqartoqarsinnaanngilaq taakkua ajortumik eqqorneqassasut. Isumaqarpunga Inatsisartut suliakkiinerat najoqqutaralugu Naalakkersuisut uani aaqqiiniarnerat ersisaarutigissallugu pissutissaqartoqanngitsoq. Taamaattumik neriuppunga amerlarnerussuteqartut taamatut pingajussaaneerneqarnissaanik aalajangiussisimanertik aamma taasilerutta aalajangiusimassagaat.

 

Ole Lynge, Inatsisartut Siulittaasuat, Inuit Ataqatigiit.

Aap, tassa tullii oqaaseqartinnagit oqaatigilaassavara inip avataaniittut qinnuigissagakkit maannaqqullugit. Taasingajaleratta.

Jakob Sivertsen, Atassut.

Atassummit erseqqissaatigissavarput suleqataarusunngikkaluarutta tamaat naaggaarluinnarsinnaagaluarparput. Misissorluareerlugu ullumikkut pissutsinut aaqqiiniutissaq naleqqutinngimmat, kisianni peqataarusukkatta oqarpugut kinguartinneqarniarli. Ilaatigut peqquteqarpoq upernaaq siunnersuuteqarninnut peqqutigaara BSU-mi atukkat erniaat maannakkut finanslovemut iluatigineqarput 61,4 millionit.

 

Taavalu BSU-mi illoqartut pillaammik pillaqqillugit qaavatigut 3 millioninik ilagaangami Naalakkersuisut oqaatigisaattut pissakinnerit akilersueqataapput landskarsimut katillugit 64,4 millionit.

Taamaattumik eqqortumik oqarpugut upernaaq ernianut akilersuineq naleqqusarneqartariaqarpoq. Taannaana ujartoripput Atassummit pissakinnerpaat taamak annertutigisumik nammakkersorneqarsinnaanngimmata.

 

Aamma kinguartitsiniarnitsinnut peqqutigaarput BSU-mi illoqartut akilersuilluarsinnaanngitsut isumakkeerfigeriarlugit soorunami avalliunerusuni inissat ajornaqimmata neqeroorfigineqaqqissapputl ini ukiorpassuarni akilersorsimasartik atorsinnaagaat inuunermik sinnerani akilersorlugu. Tamakku qulaarlugit misissoqqissaarneqarsimanngillat.

 

Taamaattuminguna oqartugut atuisut peqatigalugit naammaginarnerusumik aaqqiiniarta. Taamaakkutta aamma neqeroorutigaarput ineqarnermut tunngasut uagut nalunngeqigatsigit aamma peqataassaagut utoqqatserpunga peqataassaagut. Oqareernittut kinguartinneqarnissaa kissaatigaarput, naak tunuartinneqarnissaa kissaatiginerugaluarlugu, kisianni peqataarusukkatta ajornartorsiut imaannaanngimmat.

 

Aamma ajornartorsiut oqaatigisarput taakkua 61,4 millionit ernianut akiliutigineqartartut aaqqinneqartinnagit isumakkeerfiginninneq qanorluunnii annertutigigaluarpat aamma aaqqiissutaanavianngilaq BSU-mi illoqartunut.

Qujanaq.

 

Ole Lynge, Inatsisartut Siulittaasuat, Inuit Ataqatigiit.

Una eqqaasissutigilaarlara suleriaatsigut malillugit aappassaaneerinermi siullermeerinertut oqalussinnaatitaaffiit atorneqarsinnaagaluartut kisiaani ileqquuvoq aappassaaneerinermi naatsumik oqallinneq aallaqqaataaneeqqiqqunagu. Naatsumik saqqummiussaqartaqqullusi.

 

Otto Steenholdt, attaviitsoq.

Oqaatigissavara ullumikkut 34,2 aamma 26,2 assut uanga assigiipajutsikkakkit. Kinguartitsinissamik oqariartuutillit. Atassutip oqaluttuata oqaasii tusarnaarlugit nutaajunngillat eqqortuullutillu assersuusiornikkut taammagit illoqarfinni anginerusuni inuit aningaasaateqarluartut illuliortinneqarniarsarimmata imannaannaq tapiiffigineqarlutik. Eqqortuuvoq taanna.

Taavalu aamma nalunngilarput maani illoqarfinni anginerusuni inissaaleqineq ima ilungersunartigisoq nassaarsiortariaqarluni. Taakkulu nassaat ilagisimavaat oqarlutik aningaasaateqarluartut illuliortinniartigut taakkua ikiortariaqarpallaannginnerussapput pisortaninngaaniit. Tassa taanna uanga iluarisimaagara, kisiannili aamma uparuarneqarmat ilumoornerarlugu.

 

Taamaaliortariaqarpoq illoqarfinni ilungersunaannartumik inissaaleqineq nassaarsiorluni aaqqiiviginiarneqartariaqarmat. Taavali una oqaatigisarput massakkut oqallisigisarput tassa taanna aamma uanga eqqarsaatigisarakku boligstøttemik illuutillit aningaasakitsunut atorsartitsinerat ippassaaniinnguaq aamma puisit amii eqqartoratsigit ersarilluinnartumik oqaatigineqarpoq qanoq nakkariarneq annertutigisoq.

 

Taakku eqqarsaatigissagaanni aamma illuminnut akissaqassusiat taamatorluinnaq ippoq, taamatut isikkoqarluni. Uanga qujagisarpakka isummaminni aalajangiussisartut, kisianni aalajangiussineq tassaassaaq nammineq eqqorsorisaq iluamik allamik nassuiaateqarnikkut allanngortinneqanngippat. Taamaattariaqarporlu.

 

Taava isumakkeerfigineqarsinnaaneq uanga aamma uparuareersimavara. Sianiittuunngitsugununa inuit. Pingaartumik aalajangiussami saqqummiussami siunnersuummi imatut isumaqatigineqarsinnaasumik tusaraanni akiliinaveersaakannilaartuuguit pissutissanik arlalissuarnik nassaalaarsinnaasuuguit akiligassatit akilersorpianngikkaluarukkit soqutaanngilaq. Naggataatigut uaneereermat isumakeerfigineqarumaarputit.

 

Sianiittuunngilagut pingaartumik akileraarutinut makkununngalu akitsuutinut misissoraangatsigit qanoq iliortoqarsinnaanersoq. Tassa taanna uanga uparuareersimagakku maani itinerusumik oqaatigissanngilara, kisiannili tassa ikinnerussuteqartut uani aamma 34.2 26.2-milu uanga isumaqatigalugit taasinissara maanngaaniit nalunaarutigereerpara.

 

Mogens Kleist, Kattusseqatigiit.

Kinguaattooqqasut nunatsinni BSU aqqutigalugu taamatut akilersuiniartut ikittuunngillat. Taamatut kommuninut ajornartorsiummik annertuumik tunniussisinnaanatik eqqarsaatigalugu. Inuit taakkua isumakkeerifigneqarsinnaasut soorunami illup nalinga toqqammavigalugu taakkua isumakkeerfigineqarsinnaanissartik qinnuteqaatigisinnaavaat, kisianni taakkua inuit isumakkeerfigineqarsinnaanngitsut anisitaappata kiap ajornartorsiut tigussavaa? Kommunip ersarsissumik taanna ajornartorsiut tigusussaavaa.

 

A/S Inissiaatileqatigiiffik INI-minngaanniit maannakkut taakkua oqaatigineqartut toqqammavigalugit A/S Inissiaatileqatigiiffik INI-p pisussaaffiginngitsutut massakkut oqaatigisarpaa anisitaasimasut, nammineq pisussaaffiginagit kommunip isumagissavai, socialip isumagissavai. Taamaattuminguna oqartugut kommuninut kingunerisassai taakku eqqarsaatigalugit uagut tungitsinninngaaniit iluamik eqqarsaatigilluagaasimanngitsutut taakkartorusukkatsigu.

 

Naaggaartortut naaggaartorniarlik, uku ajornartorsiutillit inuit taamatut aniatinneqalerpata eqqarsaatigilaarumaarpasi oqaatigisimasagut.

Qujanaq.

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Qujanaq. Siullermik Atassutip oqaaseqartuanut Jakob Sivertsenimut erniat katillugit 61 millionit saniatigut isertinneqartartut aammalu akiligassanik kinguaattoorsimanermit aamma erniat soorunami atoqqinnermi aamma erniaqartarmat 3,4 millionit isertinneqartartut eqqarsaatigalugit oqaatigiinnarusuppara uanga tupinnartuliatut isiginngilara illut 2.980-sit erniatigut 60 millionit missaanni isertitsissutaassapput.

 

Aamma eqqaamalaartigu akiligassaminnik akiliinnginnerminni BSU-mi najugaqartut kikkuugaluarpataluunniit qanorluunniit akissarsiaqaraluarunik tamarmik assigiimmik 30%-imik tapiiffigineqartarput. Taanna akiitsut %-tilersorneqarnerannut naatsorsuutigigutsigu taava procentii akilertagaat taanna ilanngaatigigaanni 4,9%-iuvoq. Illumut piginnittutut 4,9%-imik erniaqarneq annertoorsuartut oqaatigineqarsinnaanngilaq. Saniatigut erniat taakkua akiitsullu taakkua nammineq immersugassaq selvangivelse ukiumoortumik immersoraangatsigu erniatigut akilersorneqarsimasut ilanngatigisinnaavagut.

 

Taamaattumik tamakkua tamaasa eqqarsaatigalugit isumaqanngilanga illut 2.980-it eqqarsaatigalugit taamatut erniaqartitsineq mamianartutut oqaatigineqarsinnaasoq. Pissakinnerpaat avalliunerusuni najugaqartut taakkua Jakob Sivertsenip eqqartorpai. Taakkumiuku pitsaasumik aaqqissuussiffiginiarlugit uani suliniuteqartugut.

 

Taakkorpiaat aamma Otto Steenholdtip eqqartugai, tassa puisit amiisa akikilliartornerat tunngavigalugu immaqa akiliisinnaassusiat apparsimasoq imaluunniit isertitaasa aamma appariarujussuarneranik nalaataqarsimasut taakkua sooq atorsartittuaannassavagut.

 

Naalakkersuisut siunnersuutaat tassaavoq 128.000-it inorlugu akissarsiaqarsimasut tassa taakkuupput ullumikkut ineqarnermut tapinik pisartagaqartut taakkua isumakkeerfigineqarnissaminnut periarfissinneqartariaqarput, pingaartumik sumiiffinnik najugaqartut allamik periarfissaqanngitsuni.

 

Taava attaviitsumut Otto Steenholdtimut oqaatigilaarusuppara soorunami aaqqissuussinerit aamma ineqarnermut tunngatillugu suulluunniit ineriartortuarlutillu naliliiffigineqartuartariaqarput. Aamma uanga naatsorsuutiginngivippara BSU kapitali 4 eqqarsaatigalugu manna aalajangiineq tassaassasoq BSU kapitali 4 najoqqutaralugu illuliat inaarutaasumik qaqugumut inatsisissaat malittarisassaat.

 

Naamik oqareernittut akissuteqarninni ineqarnermut ataatsimiititaliaq peqatigalugu siunissami Naalakkersuinikkut ingerlatsinitsinni anguniagassavut pillugit ulloqartitsinissarput isumaqatigiissutigaarput, aammalu suut siunnerfigalugit suut nutamik naliliiffigalugit suliarineqarnissaat tassani oqaluuserissallutigit. Taamaattumik aaqqissuussinerit nalilersorneqartuartariaqarput soorunami.

 

Otto Steenholdtip ilanngullugu oqaatigivaa sianiitsuunngilagut. Aamma innuttaasut sianiitsuunngillat. Aamma Naalakkersuisut tamatut naliliipput. Aamma Naalakkersuisut sianiittuunngillat. Taamaattumik Naalakkersuisut siunnersuut manna saqqummiukkamikku ilanngullugu oqaatigivaat siullermik imaanngilaq 128.000-it ataakkaanni ingerlannaq isumakkeerfigineqartoqartassasoq.

 

Naamik taakkua ataasiakkaarlutik naliliiffigineqartassapput ilumut illu taanna suli naleqannginnersoq. Tunineqaruni landskarsimut akiitsut utertinneqarsinnaannginnersut. Imaluunniit taassumap inuup sulisinnaassusia ilumut ima appartigisimanersoq allaat akilersuisinnaajunnaarluni aamma siunissami.

 

Tamakkorpassuupput nalilersugassat. Siullermeerneqarnerani Naalakkersuisuniit oqaatigaarput periarfissatut kingullertut taanna atortarsupparput. Aamma matumani pineqanngillat isumakkeerfigisinnarlugit taava illuininngaaniit anisittassagigut. Naamik isumakkeerfigisassavagut taava avalliunerusuni allanik periarfissaqarfiunngitsuni aammalu sumiiffinni illut taakkua naleqanngiffiini isumakkeerfigineqartut illuminniiginnartassapput.

 

Taamaattumik aaqqisuussineq manna eqqarsaatigilluagaasutut nalilerneqartariaqarpoq.

 

Ole Lynge, Inatsisartut Siulittaasuat, Inuit Ataqatigiit.

Qujanaq. Taava tassa taasinialissaagut. Tassa inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutissaatut siunnersuut aappassaaneerneqarnerani ineqarnermut attaveqarnermullu ataatsimiititaliami amerlanerussuteqartut Siumup, Inuit Ataqatigiillu oqaaseqaataannut isumaqataasut qinnuigissavakka nikueqqullugit.