Oqaluuserisassani immikkoortoq 34-3 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut 21-at, ataasinngorneq 5. november 2001, nal. 13:14
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit.
Ole
Lynge, Inatsisartut
Siulittaasuat, Inuit Ataqatigiit.
Aamma
tassani aappassaaneerineqarnerani atatillugu Inatsisartut Attaveqarnermut
Pilersuinermut aamma Ineqarnermut Ataatsimiititaliaat
isumaliutissiissuteqarpoq. Siumup Inuit Ataqatigiillu
isumaqatigiissuteqarlutik inassutigaat taamatut iluseqarluni akuerineqassasoq.
Atassut Kattusseqatigiillu akerliusimallutik.
Taamaattumik
oqaatigissavara amerlanerussuteqartut inissialiornermi tapersiissuteqartarneq,
utoqqatserpunga, nappaasoqarpoq. Jakob Sivertsen, Atassut.
Jakob
Sivertsen, Atassut.
Qujanaq.
Inissialiortarnermi, utoqqatserpunga. Inissialiortarnermi tapissuteqartarneq
pillugu Inatsisartut peqqussutaata allanngortinneqarnissaanik Inatsisartut
peqqussutissaattut siunnersuut maannakkut pingajussaaneerneqartoq, tassaavoq
BSU-mik illoqarfinnut tunngasoq. Taamaattumik taanna kissaatigisimavarput
immikkuullarinnera peqqutigalugu immikkut taasissutigineqarnissaa.
Peqqussutissap siullermeerneqarnerani aappassaaneerneqarneranilu Atassummit
BSU-mit illoqarnermi akilersueriaatsip pingaartumik qaffasippallaamik
ernialersuisarnerit ullutsinnut naleqqussarlugit
iluarsartuussiffigineqarnissaat aaqqiissuteqarfiginiarlugit Partii Atassut
sinnerlugu siunnersuummik upernaaq saqqummiussaqarsimavugut. Ajuusaarnaqaarlu
siunnersuut Naalakkersuisunit qarsupittumik suliarineqarsimaneratigut BSU-mik
illoqartunut amerlanerpaanut ullumikkullu ilungersorlutik akilersuiniartunut
peqqussutip allannguutissaa minnerpaamilluunniit iluaqutigisussaanngimmassuk.
Tassami peqqussummik allannguinerup taamaallaat akilersuilluarsinnaanngitsut,
akilersuilluarsinnaanngitsunut illumut akiligassat sinnerinik
isumakkeerfigineqartarnissaat kingunerisussaammagu. Akiligassanillu
isumakkeerfigineqartut illumut piginnittuujunnaartarnissaannik Naalakkersuisut
Naalakkersuisunit anguniarneqarmat, tamanna inuit piginnittussaanerannik
akuliunnertut Atassummit isumaqarfigalugu akuersaarsinnaannginnatsigu
matumuuna oqaatigissavarput.
Naggataagut
Atassummit erseqqissassavarput BSU-mik illoqartorpassuit atuakkamik
erniaannaannut akilersuiniarnerat qanoq ilungersunartigisoq
eqqarsaatigissagutsigu, tassa takuneqarsinnaavoq ukioq 2002-mut aningaasanut
inatsisissamut 64,4 mio. kr. illumut akiligassaq qaavatigut erniaannarnut
akiligassanngortinneqarsimammata. Atassummit isumaqartuarpugut tamanna
innuttaasut ilaannut, tassa isorliunerusuni najugalinnut pingaartumik
piniarnerinnarmik inuutissarsiuteqartunut ullumikkut akilersinnaajunnaartumik
artukkiineruvallaartoq. Ajoraluartumillu Naalakkersuisunit suli
isiginngitsuusaarneqarnera Atassummiit assut akueriuminaatsipparput.
Atassummit Naalakkersuisut innuttaasut aatsaat nakkaattuuikkaangata
ajornartoriutaannik aaqqiiniartarnerat akuersaaginnaarsinnaajunnaaratsigu
matumuuna oqaatigaarput. Soorlu BSU-mi illoqartut illumut atukkat
erniaqqortunerujussuat pequtaallutik illut qimararpaat. Ajornartorsiut taanna
aatsaat maani oqaluuserineqalinngilaq.
Siornatigut
Siumumiit Atassummiillu Inatsisartuni ilaasortaasarsisuni aaqqiiniarnissaq
oqaluuserineqartarpoq. Ulloq manna tikillugu kinguneqanngitsumik.
Naalakkersuisut akissuteqarnerminni oqaatigeqqippaat akissaqarnerusut
pilliuteqarnerunissaat. Akissaqarnerpaat imminnut inissaqartinnissaminnut
piumassuseqarnerulernissaat, kiisalu namminerisamik inigisamut
aningaasaliinikkut ileqqaarnerulersitsinissaq Naalakkersuisup pingaartillugu
oqaatigaa. Tamanna soorunami tusarlugu iluartorujussuuvoq.
Naalakkersuisut
ilaqutariit akissarsiakkaanerusut ineqarnerminnut akiliinerusalernissaannik
toqqammavilersuuteqarnerminni ilaqutariit namminerisaminni
illutaarsinnaanerannik piumassuseqarnerulernissaat ineqarnermut akiliummik
qaffaaniarneq peqqutaatippaat.
Eqqaamassavarput
peqqutaatinniagaq oqaannarluni anguneqarsinnaanngimmat, soorlu inuusuttut
arlalippassuit sivisuumik ilinniarnerminni ilaqutaqalereertarput allatullu
ajornartumik ilaquttatik inuussutissaqartinniarlugit aningaaserivinni
atorniartariaqartartut nunatsinni takornartariunnaarpagut. Tamakku
inuuniarnerminni naammassigaangamik ilinniarluarsimanermikkut qaffasissumik
akissaateqartunut ilannguttarput. Qujanartumik nunatsinni tamakkua
amerliartorput, tamannalu Atassummit assut tulluusimaarutigaarput.
Puigorneqartartorli
tassaavoq inuusuttut ilaqutaqalereerlutik ilinniarnerminni naammasigaangamik
akilersugassarpassuaqartarmata soorlu annertuumik akileraartarput
aningaaserivinnut atorniakkaminnut akilioraasarput meeqqerivinni annerpaamik
akiliisarput meeraat meqqat tapisiaqartinneq ajorput ineqarnermut
qaammaqqutinut kiassarnermullu ilaalu ilanngullugit taamannak akiliisarlutik.
Taamaattumik Atassummiik eqqortuusorinngilarput innuttaasut pingaartumik
inuusuttut aatsaat siunissaminnik pilersaarusiorlutik aningaasanillu
katersiniarsaralutik aallarnisaruttulersut ineqarnerminnut akiliutaat
qaffariarlugit illuatungaatigut namminerisaminnik initaarnissaannik
Naalakkersuisunik kaammattorneqarnerat naleqqutinngitsoq.
Atassummik
peqqussutissap kinguartillugu BSU-mik illoqartunut tamanut iluaqutaasumik
aaqqiiniuteqarnissaq Atassummik Naalakkersuisunut
kimigiisiutigisimagaluarparput kinguneqanngitsumilli. Taamaammat
peqqussutissamut siunnersuutip pingajussaaneerneqarnerani akerliulluta
Atassummiik taasissaagut. Qujanaq.
Ole
Lynge, Inatsisartut
Siulittaasuat, Inuit Ataqatigiit.
Qujanaq.
Taava marlussuit oqaaseqarumallutik nalunaarput; siullermik Ineqarnermut
Attaveqarnermut Pilersuinermullu Naalakkersuisoq, Jørgen Wæver Johansen. Tulleriumaarpaa Mogen Kleist, Kattusseqatigiit.
Jørgen
Wæver-Johansen, Ineqarnermut,
Attaveqarnermut Pilersuinermullu Naalakkersuisoq, Siumut.
Siullermik Atassutip oqaaseqartua Jakob Sivertsen naqqilaarusuppara.
Oqarputit Naalakkersuisut qarsupittumik suliaqarsimasut. Naalakkersuit
qarsupittumik suliaqanngisaannarput. Innuttaasunut taamatut tujormisaarineq
pissusissamisuunngilaq. Naalakkersuisoqarpugut kikkuugaluarpataluunniit
ilungersrolutik pitsaasumik suliaqarniarsartunik tamatigorluinnaq.
Isumaqarpunga, aallaavipput qimannaveersaartariaqaripput. Aallaavipput
upernaaq isumaqatigiissutigisarput tassaavoq BSU-mi kapitali 4-mi
illuuteqartut bolisikringi atorunnaarneratigut ajornerusumik
atugaqalinnginnissaat Naalakkersuisut suliarissagaat. Taanna Naalakkersuisut suliarisimavaat. Uani JakobSivertsenip kukkulluni
oqaatigivaa akiligassaminnik isumakkeerfigineqartut illuminnit
piginnittussaajunnaarsinneqassasut.
Taamaattoqanngilaq.
Akerlianik isumakkeerfigineqartut, taakkua illuminniiginnassapput. Jakob
Sivertsenip uteqattaarfigivai siullermeerneqarnerani
aappassaaneerneqarneranilu illut 2980-it 64 mio.-inik erniaqarmata. Taanna
tupigusuutissaanngilaq. Jakob Sivertsenip uteqqiaffigai isorliunerusuni
piniartukkormiut taakkua artukkerneqarnissaat. Taakkuuku oqilisarniarlugit
ilaatigut taakkuummata 128.000 ataallugit isertitaqartartut. Taakku
oqilisaaffiginiarlugit isumakkeerfigineqarsinnaanngornissaannut periarfissaq
ammaakkusukkipput Naalakkersuisuniit.
Oqaaseqarnermini piffissap affangajaa atorpaa ininik attartortut oqaluuseralugit. Taakku uani pineqanngillat. Aallartikkavit oqarnittuut uani pineqartut tassaapput BSU kapitali 4 najoqqutaralugu illuutillit attartortuunngitsut. Isumaqarpunga suliassaq itisuumik peqqissaartumillu Inatsisartunit suliarineqarsimasoq. Siullermeerneqarnerani aappassaaneerneqannginnerani ataatsimiititaliami suliarineqarluni, kiisalu aappaaneerlugu oqaluuserineqarnerani massakkullu pingajussaaneerneqarnerani. Taamaattumik kinguartitsinissamut pissutissaqanngilagut. Inatsisartut peqqissaartumik nalilersoreerpaat inassuteqarlutillu. Aamma kinguartitsigutta suna kingunerissavaa?
Kingunissaa tassaavoq BSU-mi
illuutillit kapitali 4 najoqqutaralugu illuuteqartut upernaamut boligsikring-i
pisartagarisinnaajunnaarunikku, taava aatsaat iluamik artukkerneqassapput.
Nassakkut periarfissinneqarput qinnuteqarneq najoqqutaralugu
isumakkeerfigineqarsinnaasunngorlugit. Taannalu Naalakkersuisut orniginarnerutippaat.
Taamaattumik
Naalakkersuisut sinnerlugit inassutigissavara amerlanerussuteqartut
ataatsimiititaliami inassuteqaataat malillugu Inatsisartut taasissasut.
Ole
Lynge, Inatsisartut
Siulittaasuat, Inuit Ataqatigiit.
Qujanaq. Taava Mogens Kleist, Kattusseqatigiit. Tulleriumaarpaa Jakob
Sivertsen.
Mogens
Kleist, Kattusseqatigiit.
Oqaatigissavarput Kattusseqatigiinniit aappassaaneerinninnermi
oqaaseqaatigisimasagut innersuussutigerusukkatsigit, taamatut
pingajussaarinninnermi itigartitsiniaratta.
Tassami BSU aqqutigalugu illuutillit akiitsoqartullu inigisaminnit
anisinneqassappata, taava Komuuninnut artukkiisussaapput. Naalakkersuisoq
massakkut oqarnermi ersarissorujussuarmik oqarpoq isumakkeerfigineqassapput,
kisiannimi taakku isumakkeerfigineqarsinnaanngitsut anisinneqarpata kiap
ajornartorsiutigilissavai" Kommuunit" Aamma piffissami kingullermi Sermitsiami
allassimasut toqqammavigissagussigit atuarsinnaasagut malillugit Inuit
Ataqatigiinnersut ilaata allaaserisimavaa ineqarnermut tassunga
attuumalluinnartut qanoq Kommuuninut kinguneqarsinnaaneri taakkartormagit.
Taamaattumik Naalakkersuisup oqaasii kusanarsinnaapput, kisiannili uagut
tungitsinninngaanniit oqaatigissavarput inuit taakku
isumakkeerfigineqarsinnaanngitsut anisinneqarpata kiap isumagilissavai" INI
A/S-ip" Naa, Kommuunit. Tassa taanna ajornartorsiut. Taamaattumik
allaanngiivippoq INI A/S-iminngaanniit ajornartorsiut, inatsisiliornikkut
ajornartorsiutit ajoqutigisatik Kommuuninut nussuinnassagaat. Taamaattumik
Kattusseqatigiinninngaanniit oqaatigissavarput ersarissumik, taamatut
pingajussaaneerinermi massakkut taasissagatta akerliulluta. Qujanaq.
Ole
Lynge, Inatsisartut
Siulittaasuat, Inuit Ataqatigiit.
Tullinnguuttut oqaaseqartinnagit, eqqaasitsissutigissavara pingajussaaneerinninnerummat taamaallaat naatsukullannik oqaaseqarsinnaagassi. Suli oqaaseqarusullutik nappaasimasut pingasuupput - taasinialissagatta. Tullinnguuppoq Jakob Sivertsen, Atassut, aappassaanik. - naatsukullammik. Tulleriumaarpaa Jørgen Wæver-Johansen.
Jakob Sivertsen, Atassut.
Suleriaaseq naapertorlugu oqalussinnaanerput atorsinnaassavarput 5 minutit, tassani periarfissaqaratta.
Naalakkersuisup tujormisaarisutut oqalunnerarlunga pimmanga, tamanna akuerisinnaanngilara. Neriuppunga, tusarnaartut tamanna namminneq nalilersinnaajumaaraat. Tujormisaarinanga ikiuiniarlunga akissaqanngitsunit illunik qimagaasunit akissaarullutik, taakku sinnerlugit qinikkatut maani saqqummiigama. Aamma ilumuunngilaq anisinneqartarnissaannut oqaatsikka sallunerarlugit oqaravit. Atuassavara illeqqissaaq aajuna saqqummiussat siullermeerneqarnerani imatut oqarputit. Issuassavara. Assersuutigalugu sumiiffinni allamik inissatigut periarfissaqanngitsuni Namminersornerullutik Oqartussat illu tigunissaa aalajangiussinnaavaat. Illulu Namminersornerullutik Oqartussanut inissiaataannut attartortittakkanut ilanngullugu tamanna taarsigassarsisup illumik attartortussanngortillugu. Tassa anisinneqassaaq, taamaattumikm oqarpugut piginnittussaaneq tassani innarlerneqarpoq utertinneqartussaammat Namminersornerullutik Oqartussanit. Taamaattumik sallusutut uanga ilinnut oqarnerit taanna ilinnut uterteqquara.
Aamma ineqarnermut oqalukkata tupigivat aatsaaqqissaaq aajuna qupperneq3 ineqarnermut akiliinerusalernissamut oqaatsitit tunngavigalugit oqaluppugut. Taamaattumik Naalakkersuisutut akissuteqassaguit illit nammineq saqqummiussatit qiviaqqaartariaqarpatit, taakkulu pillugit saqqummiisugut. Qujanaq.
Ole Lynge, Inatsisartut Siulittaasuat, Inuit Ataqatigiit.
Kingullermik erseqqissaatigilaarlara Aqutsisutut, tassa oqalussinnaatitaaffiit soorunami killeqarput. Aamma aappassaanik taamatut oqaaseqarnermi 5 minutsit, annerpaamik, sivisunerpaamik. Imaanngilaq tamaasa atorniarsarissagisi. Naatsukullannguamik. Pingasussaaneerigatta aallaqqaataaniit oqallittoqassanngilaq. Taava Jørgen Wæver-Johansen, Ineqarnermut Attaveqarnermut Pilersuinermullu Naalakkersuisoq. Naatsunnguamik
Oqaaseqartut kingulliit marluk oqarfigilaassavakka naatsunnguamik.
Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.
Qujanaq. Mogens Kleistip nuannaarutigaara paasisimannguatsiarmagu matumani aallaavigineqartut upernaaq, taakkua aaqqiivigineqarmata, kisianni Mogens Kleistip ujartugai allat, tassa isumakkeerfigineqarsinnaanngitsummi? Tassa upernaaq taakkua oqaluuserinngisagut. Tusarnaarluarsimasut tamarmik maluginiarsimassavaat aamma agguaanneqartumi pappilissami takuneqarsinnaavoq, taakkua ullumikkut matumani periarfissinneqanngitsut misissuiffigeqqissaarneqassasut atugarisamikkut qanoq inissisimanerat eqqarsaatigalugu. Tamatumalu kingunerisaanik pisariaqassappat aamma Naalakkersuisut saqqummiussaqarumaartut. Taakkulu innersuukkusuppakka.
Jakob Sivertsenimut tunngatillugu oqaatigerusuppara issuakkatit oqaaserinikuuakka. Ilumut, kisianni tassani pineqarnersoq ajuusaarpunga paasisimannginnakku. Tassani pineqartoq tassaavoq, soorlu assersuutigiinnarlugu sumiiffinni aalajangersimasuni isumakkeerfigineqarnissaminnut periarfissaqanngitsut. Assersuutigalugu 128.000-it sinnilaarlugu aningaasarsiaqartut, taakkua neqeroorfigineqassapput artorsaatigigunikku akiliutissartik akilernissaa, taava piginnaatitaaffigimmassuk illu utertissinnaassallugu Namminersornerullutik Oqartussanut allamillu periarfissaqanngimmata, soorlu illit issuaanerit taamatut oqartoq. Taava tassani najugaqartinneqarsinnaapput attartortutut. Attartortullu tamarmik boligsikring-imik pisinnaanngortinneqarnikuupput 180.000 killigalugu meerartaqanngitsuni. Taamaalilluni periarfissinneqarlutik tapiiffigineqarnissaminnut. Taannaana pineqartoq tassani. Neriuppunga taanna Jakob Sivertsenimit paasineqarumaartoq. Qujanaq.
Ole Lynge, Inatsisartut Siulittaasuat, Inuit Ataqatigiit.
Qujanaq. Taava kingulliulluni nappaasimavoq Johan Lund-Olsen, Inuit Ataqatigiit.
Johan Lund-Olsen, Inuit Ataqatigiit.
Unaana qinnutigiinnarniarlugu tassa oqaaseqalaarusuttunga qinnutigerusukkakku Inatsisartuni suleriaaserput malillugu maani pingasussaaneerinninnerit ingerlattassagigut. Tassa Inatsisartut suleriaasianni maannamut atuuttumi aalajangersakkat, tassa kapitali 7-ani tassani erseqqissumik allaqqavoq imaluunniit aalajangersarneqarpoq siullermeerinninnermi aappassaaneerinninnermi pingajussaaneerinninnermilu qanoq pissusilersortoqartassanersoq aammalu oqalussinnaatitaaffiit qanoq innersut.
Tassa pingajussaaneerinninnermi malittarisassat imaapput.Allannguutissami siunnersuuteqartoqarsimanngikkaangat, tassalu taanna maluginiagasaq uani allannguutissamik siunnersuuteqartoqarsimanngilaq Atassutip tungaaninngaanniit. Taamaammat inaarutaasumik oqaluuserinninneq taanna ingerlanneqartussaavoq, taamaallaallu 5 minutit ataasiaannarluni, ataasiaannarluni oqaaseqartoqarsinnaavoq. Tassa partiit Kattusseqatigiillu ataasiaannarlutik oqaaseqarsinnaatitaapput, tassa inaarutaasumik oqallinnerusussaammat allannguutissanimmi siunnersuuteqartoqarnikuunngimmat. Allannguutissanik siunnersuuteqartoqarsimasuuppat, taava oqallinneq taanna ingerlasinnaasimassagaluarpoq marloriarlunilu oqaaseqartoqarsinnaalluni. Tassa taamaammat qinnutigissavara Inatsisartut suleriaasissaat malillugu maani aamma ingerlatsiniassasugut. Taamaaliunngikkuttami maannakkut matuma kingorna ammaassissaagut pingajussaaneerinninnermi aamma oqallisseqattaartasalluta. Oqallinnerit ataatsimiititaliani aamma pereersut, aappassaaneerinninnermi oqallinnerit pereersut, siullermeerinninnermi oqallinnerit pereersut, taamaammat suleriaaserput malillugu maani pingajussaaneerinninnerit aamma ingerlanneqartarumaartut.
Ole
Lynge, Inatsisartut
Siulittaasuat, Inuit Ataqatigiit.
Kingullermik
tassa oqaatigilaaginnassavara tassa ilumoortortaqarpoq taanna
pingajussaaneerinninnermi §33 najoqqutaralugu allannguutissatut
siunnersuuteqartoqarsimappat, taakku siulliullugit taasissutigineqartarmata,
kisianni aamma oqalussinnaatitaaffinni immikkut bilag-itut allassimasut
innersuussutigiinnassavakka.
Taamaalilluta
taasinialissaagut, tassalu inissialiornermut tapersiissuteqartarneq pillugu
Inatsisartut peqqussutaata allanngortinnerannik Inatsisartut peqqussutissaattut
siunnersuutip. Inatsisartut Attaveqarnermik, Pilersuinermut aamma Ineqarnermut
ataatsimiititaliaani amerlanerussuteqartut inassutigat taamatut iluseqarluni
pingajussaaneerneqarnissaminut akuerineqassasoq. Tamatumunnga isumaqataasut
qinnuigissavakka nikueqqullugit.
19.
Akerliusut
qinnuigissavakka nikueqqullugit.
10.
Taamaalilluni immikkoortoq 34 aamma naammassivoq.