Ullut ataatsimiiffiusut arfersaneq arfineq-aappaat, pingasunngorneq oktoberip 24-at 2001, nal. 14:35

Oqaluuserisassani immikkoortoq 47

Sanaartornermut maleruagassat 1982-imeersut allanngortinneqarnissaat pillugit aalajangiiffigisassatut siunnersuut.

(Mogens Kleist)

(Aappassaaneernera)

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

 

Ole Lynge, Inatsisartut Siulittaasuat, Inuit Ataqatigiit.

Taassuma aappaassaaneerneqarnissaanut Inatsisartut Attaveqarnermi Pilersuinermullu aamma Ineqarnermut Ataatsimiititaliaat isumaliuutississuteqarpoq. Isumaqatigiillunilu inassutigalugu siunnersuut itigartinneqassasoq. Qinnuteqartoqarsimanngilaq immikkut, kisianni Mogens, siunnersuuteqartoq Mogens Kleist oqaaseqarumavoq.

 

Mogens Kleist, Kattusseqatigiit:

Qujanaq. Taanna siunnersuutigisimasara tunngaveqarpoq ukiorpassuarni taamatut sanaartornemi maleruagassat aaqqinneqarsimanngimmata, kingullermik 1987-imi, taavalu Danmark-imi aamma 1995-imi aaqqiivigineqarsimallutik aammalu ukioq manna nutaamik Danmark-imi aaqqiiviginiarneqarlutik.

 

Taamatut siunnersuuteqarninni Naalakkersuisut akissuteqaataat tusaatissatut tigorusuppara aammalu neriuutigalugu Ineqarnermut Attaveqarnermut Ataatsimiititaliaq suliamut tunngatillugiu aamma qanimut malinnaatinneqassasoq, tassami tassani sanaartornermut maleruagassani annertoorujussuit tassani allanngortinneqarsinnaammata aamma tassani aningaasarparujussuarnik sipaarniuteqarsinnaaneq taassuma siunnersuutigisama kingunerisinnaasai takusinnaagakkit. Taamaattumik neriuutigaara taamatut Ineqarnermut Ataatsimiititaliaq aamma qanimut malinnaatineqarumaartut Naalakkersuisuninngaanniit.

Qujanaq.

 

Ole Lynge, Inatsisartut Siulittaasuat, Inuit Ataqatigiit.

Qujanaq. Taavalu Ineqarnermut Pilersuinermut Attaveqarnermullu Naalakkersuisoq.

 

Jørgen Wæver-Johansen, Ineqarnermut Pilersuinermut Attaveqarnermullu Naalakkersuisoq, Siumut.

Siunnersuuteqartut oqaatigisaanut qujarusuppunga ilumoormat suliassaq aallartinneqareernikuuvoq naatsorsuutigineqarlunilu ukioq naannginnerani naammassillunilu tusarniaassutigineqarnissaa aallartinneqarumartoq. Tusarniaanerlu aprilip tungaanut ingerlanneqassasoq, taavalu atuutilersinneqarnissaa juunip aallaqqaataani siunnerfigineqartoq.

 

Tassa taakkua aallaavigalugit siunnersuutigineqartoq, tassalu suliassap aatsaat aallartinneqarnissaa itigartinneqarnissaanik Inatsisartut isumaqatigiillutik inassuteqarnerat taanna Naalakkersuisuniit akuersaarparput.

 

Aamma Mogens Kleistimut innersuukkusuppara ulloq taanna Inatsisartut oqallinnerat imartuunik assigiinngitsunillu oqariartuuteqartoqarpoq ilaatigut siunnersuuteqartup aatsaannguaq oqaatigisai iaamma ilanngullugit.

Qujanaq.

 

Ole Lynge, Inatsisartut Siulittaasuat, Inuit Ataqatigiit.

Qujanaq. Tassa allamik oqaaseqarniartoqanngilaq. Taamaalilluni sanaartornermut maleruagassat 1982-imeersut allanngortinneqarnissaat pillugu aalajangiiffigisassatut siunnersuut taasissutigissavarput. Tassa oqareernittut ataatsimiititaliap isumaqatigiittup suliaq aallartinneqareermat aalajangiiffigisassatut siunnersuut itigartissutigineqarnissaa inassutigaa. Tamatumunnga isumaqataasut qinnuigissavakka nikueqqullugit.

 

21.

 

Akerliusut qinnuigissavakka nikueqqullugit.

 

Akerliusoqanngilaq.

 

Taaseqataanngitsut qinnuigissavakka nikueqqullugit.

 

3.