Ullut ataatsimiiffiusut 21-at, ataasinngorneq 5. november 2001, nal. 13:06

Oqaluuserisassani immikkoortoq 48

Nappaateqarlutik katsorsartikkiartortartut qaniginerpaasaasa akiliunneqartalernissaannik periarfissarsiuussinissaq pillugu aalajangiiffigisassatut siunnersuut.

(Lars-Karl Jensen)

(Aappassaaneernera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

 

Ole Lynge, Inatsisartut Siulittaasuat, Inuit Ataqatigiit.

Tassani siullermeerneqarnerani immikkut Peqqinnissamut Avatangiisinullu Ataatsimiititaliaq isumaqatigiilluni isumaliuutissiissuteqarpoq, kisianni taanna pitinnagu siunnersuuteqartoq, Lars-Karl Jensen, oqaaseqarumavoq. Takanna.

   

Lars-Karl Jensen, Siumut.

Qujanaq.Tassa nappaateqarlutik katsorsartikkiartortartut qaniginerpaasaasa akiliunneqartalernissaannik periarfissiuussinissaq pillugu aalajangiiffigisassatut siunnersuutima aappassaaneerneqarnerani oqaaseqalaarniarpunga.

 

Oqaluuserisassanngortitara siullermeerneqarmalli Naalakkersuisut inassutigaat siunnersuut itigartinneqassasoq. Tamanna aamma malinneqarpoq Inatsartuni gruppe-t siullermeerneqarnermi oqaaseqaataasigut. Tamanna uanga ajuusaarnartippara. Aamma takuneqarsinnaavoq Peqqinnissamut Ataatsimiititaliap isumaliutissiissummini itigartitsinerup attatiinnarneqarnissaa inassutigisaa, kisianni nunannaarutigaara Peqqinnissamut Ataatsimiititaliap oqaluuserisassatut saqqummiussama ajornartorsiutaata qiterisaanik paasinnilluni suleqatigiisitat susassaqartut aqqutigalugit periarfissannik ujartuisoqarnissaa Naalakkersuisunut kaammattuutigimmagu.

Neriuppunga, suleqatigiisitap ilanngullugu misissussagaa sivisunerusumik nappaateqartut Danmarkimi katsorsarneqartussat ilaqutaasa angalanermut akiliunneqarsinnaanerat kisiat periarfissarsiunnagu aamma ilaqutaasut Danmarkimiinneranni inunnik isumaginninnikkut sullinneqarnermut assersuutigalugu Københavnimiittussaasimappata, tassani Kommuunianni najugaqarallarnissamut isumaginninnikkullu tunngasutigut isumagineqartalernissaat anguniarneqartalissasoq. Tamanna ilanngullugu periarfissarsiuteqqunassaqaaq ataatsimiititaliamut.

Tamannami siunnersuutinni Naalakkersuisut Qallunaat Oqartussaasuinit paaseqatigiinniutigisassatut taagakku taamani aallaavimma qiterimmagu imaanngitsoq Nunatsinnut aningaasaliissutaasartut qaffanneqarnissaannik Naalakkersuisut noqqaaqqugikka.

 

Naggataatigut ilanngullugu oqaatiginngitsoorusunngilara qanittukkut aatsaat uagut paasisatsinnik kalaaleqatigut nappaateqarlutik sivisuumik Danmarkimiittut Kalaallit Illuini najugaqartut ammasunik Peqqinnissamut Naalakkersuisumut, Kommuneqarfiillu Kattuffiannut februarimi ukioq ullulerneqartumi allakkani taakkunani nappaateqartut sullinneqarnerani nanertuutaasartut inuttaasa namminneq ersarissorujussuarmik oqariartuutigisaat qanoq iliuuseqarfiginissaannik ujartuinerummat, neriuppunga Peqqinnissamik Naalakkersuisumit piaartumik taakku allakkat qanoq iliuuseqarfigineqarsimassasut.

 

Taamatut oqaaseqarlunga siunnersuutiga itigartinneqaraluarluni suliareqqinnissaanut aqqutissiuunneqarmat qujassutigaara.

 

Ole Lynge, Inatsisartut Siulittaasuat, Inuit Ataqatigiit.

Qujanaq. Tassa taamaalilluta taasinialissaagut, tassalu Inatsisartut Peqqinnissamut Avatangiisinullu Ataatsimiititaliaata isumaqatigiilluni siunnersuutip taamatut iluseqarluni itigartissutigineqarnissaa inassutigaa. Tamatumunnga isumaqataasut qinnuigissavakka nikueqqullugit.

 

26-t.