Ullut ataatsimiiffiusut 22-at, pingasunngorneq 7. november 2001, nal. 15:16

Oqaluuserisassami immikkoortoq 49

Qatserisartunut aningaasaliissutaasartut nalimmassarlugit aaqqiissuteqarnissaq pillugu aalajangiiffigisassatut siunnersuut.

(Lars-Karl Jensen)

(Aappassaaneernera)

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

Taanna pitinnagu siunnersuuteqarsimasoq oqaaseqarumavoq Lars-Karl Jensen.

   

Lars-Karl Jensen, Siumut.

Inatsisit Atortinneqarneranut Ataatsimiititaliap isumaliutissiissutaa paasilluarpara, tassani naliliimmat qatserisartunut aningaasaliissutaasartut maannakkut atuuttinneqarnerat kommuninik iluarsaaqqinnissarsuarmut ataatsimiititaliap unnersuussutaa malillugu ingerlanneqartoq, periuserlu allanngortinneqassappat iliuuseqartussaq tassaassasoq KANUKOKA.

Inatsisartuni suliarisartakkagut kingumut qiviaraanni, kommunini iluarsaaqqinnissarsuarmut ataatsimiititaliap 1994-imi unnersuussutaa malillugu qatserisartoqarneq, annaassiniartarnerlu pillugit suleqatigiissitaliamik pilersitsisoqarnikuuvoq.

1996-imi suleqatigiissitap saqqummiussai arlalippassuarnik soqutiginartunillu imaqarput, ilaatigut oqaatigineqarluni suleqatigiissitat pingaartikkaat nunatsinni inuttussuseq, angallannikkullu pissutsit il.il. eqqarsaatiginagit illersorneqarsinnaasumik illoqarfinni qatserisartoqarsinnaallunilu annaassiniartoqarsinnaasariaqartoq.

Suleqatigiissitap suliaq inernilerlugu taamanikkut oqaaseqaataani takuneqarsinnaavoq ilaatigut tikkuarneqartoq qatserisartoqarneq eqqarsaatigalugu pingaartumik inatsisit, ilinniartitaanerullu pitsaassusii ullutsinnut naleqqutinngitsut kiisalu nakkutilliineq siunnersuinerlu naammaginaratik. Kiisalu nalunaarsuiami tikkuartorneqarput aningaasaqarneq, tassani qatserisartoqarnermut tapiissutit tunngavigisaat naleqquttutut nalilerneqarlutik oqaatigineqarluni illoqarfiit aninginerusut sisamat agguaqatigiissitsineq qaangerujussuarlugu atugarissaarnerusut, inuttussutsimullu naleqqiullugu aningaasartuutikinnerusut.

Paarlattuinilli inuttussuseq aallaavigalugu tapiissutit illoqarfinni inukinnerusuni, illoqarfinnilu nunaqarfippassualinni naleqqukkunnaarsimasut. Isumaqarpunga, tamakkua naammassineqarsimanersut Inatsisartut soqutigisariaqaraat.

Inuttussuserlu aallaavigalugu aningaasaliisarnerup allannguutissaanik siunnersuuteqarninni qatserisartoqarfinni annaassiniartarnermullu atortut illersorneqarsinnaasumik pitsaassuseqalernissaat siunertarisara maannakkut itigartitaavoq, kisiannili kusanartumik naaperiarneqarmat tamanna tusaatissatut tigullugu itigartinneqartumut taaseqataassaannga.

Kiisalu qatserisartut suliffimmut atatillugu upalungaarsimanermut biileqartitaanerisa akileraaruserneqartarnerat Naalakkersuisut akissuteqaatiminni neriorsuutigimmassuk misissorneqassasoq, tamannalu 2002 aallartinnerani ilisimatitsissutaajumaartoq tamanna qilanaaralugu utaqqissavara.

Naggataatigut neriuppunga suliassaq manna Kanukokap Naalakkersuisunut isumaqatigiinniutigileruniuk 1996-imi qatserisartoqarneq, annaassiniartarnerlu pillugu nalunaarusiaq misissorluarumaaraa.Qujanaq.

 

Josef Motzfeldt, Aningaasaqarnermut Naalakkersuisoq, Inuit Ataqatigiit.

Soorunami Naalakkersuisuninngaanniit Inatsiseqarnermut Ataatsimiititaliap inassuteqaataa tapersersorparput. Uanili siunnersuuteqartup kingullertut taasaa aamma inimi maani periarfissaqarniariaraangat qaqinneqartartoq, tassalu suliffimmi atatillugu biilit privatimik nammineq inuttut atorsimagaanni, taava taanna akileraarutaasarpoq ukiumut qanoq annertutiginersoq kommunit ataasiakkaat akileraartarnermut aalajangiisartuisa taanna isumagisassarivaat.

Uanili Naalakkersuisuninngaanniit suliaq taanna soqutigineqarmat aamma ilumut siunertarisatsinniit allaanerusumik sunniuteqarsimassappat, tamanna pillugu 1999-imi ukiakkut Inatsisartut katersuunneranni taamanikkut Inatsisartut aalajangerput akeqanngitsumik biileqartitaanermut akileraaruteqartitsisarneq allanngortinneqarluni qaffaavigineqassasoq, ukiut marluk matuma siornatigut.

Tassunga atatillugu nammineq akiliuteqarani biileqartitaanermut akileraarusiisarnerup naammassineqarnerani paasisat pillugit Akileraartarnermut Akitsuusiisarnermullu Ataatsimiititaliami Naalakkersuisunut ilisimatitsissuteqarumaartut Naalakkersuisut taamanikkut neriorsuutigaat. Tamanna piumaarpoq ukiumut siullermut akileraarusiinermut naammagittaalliuuteqarnissamullu piffissarititaq qaangiutereerpat, tamannalu tassa pissooq 2002-ip aallartinnerani taanna ilisimatitsissutigiinnarpara.

 

Finn Karlsen, Siulittaasoqarfimmi ilaasortaq, Atassut.

Tassalu allanik oqaaseqarniartoqanngilaq. Taamaattumik maannakkut taasissaagut.

Tassa siunnersuut Inatsiseqarnermi Ataatsimiititaliaminngaanniit isumaqatigiissumit itigartinneqarnissaa siunnersuutigineqarpoq.

Taamaammat Inatsisartut qinnuvigissavakka Ataatsimiititaliap itigartitseqqusineranut isumaqataasut nikueqqullugit.