Oqaluuserisassani immikkoortoq 51-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut 23-at, tallimanngorneq 9. november 2001, nal. 13:22
Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.
Ole
Lynge, Inatsisartut
Siulittaasuat, Inuit Ataqatigiit.
Tassa
aappassaaneerneqara naammassineqarneralu. Siullermeerneqarnerani Naalakkersuisut
Siulittaasuata akissuteqaammini ilaatigut oqarpoq ukioq 2001-imi
naalagaaffeqatigiinnut ataatsimiinnermi apeqqut tamanna saqqummiussimallugu.
Tamatumalu kinguneraa savalimmiormiut kalaallit danskillu naalagaaffiat
suleqatigiissitanik pilersitsineranik.
Taakkulu
kunngeqarfiup IWC-mut aallartitaasa allatut inissitsiternissaannut isummat
oqallisigissavaat? ilanngullugu arferup neqaannut avammut nioqquteqarsinnaanerat.
Partiinit amerlanerussuteqartut Naalakkersuisut Siulittaasuata akissuteqaataa
isumaqatigaat. Siunnersuuteqartup aamma naaggataarutaasumik oqaaseqarnermini
nalunaarutigaa suleqatigiissitap saqqummiussinissaa utaqqimaasallugu.
Otto Steenholdt, attaviitsoq.
Oqaloqatigiissut taanna ulluni kingullerni assorujussuaq nunatsinni soqutigineqarpoq. Pingaartumik neqinik ilaquttaminnut nasseriaraluartut Danmarkimut akisuupilorujussuanngortarneri pissutigalugit utertiinnartarneri ilanngartuisarnerillu nassiussassaraluannguaminnik taanna aallaavigalugu inassutigissavara Naalakkersuisut Siulittaasuata assut sakkortuumik taanna anguniaqqullugu kalaallit Danmarkimiittut eqqaamaneqassammata aamma kalaallinik pinngortuullutik tamakkuninnga pissaqartinneqartarniissaat anguniarlugu erseqqissarluinnaqqullugu iluanaarniutaanngimmat ilaquttanulli nassiussisinnaaneq ilaanni 5 kiilunnguarluunniit 1000-it sinnerlugit allaat akileeqqaartinnani nassiunneqarsinnaajunnaarmata.
Tamanna assorujussuaq sakkortuumik sulissutigeqquvara. Aammalu qujareerpunga suliumasumik taamatut tusareerama.
Johan Lund-Olsen, Inuit Ataqatigiit.
Qujanaq. Tassa naatsunnguussaaq. Tassa siunnersuuteqartutut uanga iluarisimaarpara una siunnersuut tassa aalajangiiffigisassatut siunnersuutigisara sisamanngorneq 25. oktober maani inimi siullermeerneqarmat taamani Naalakkersuisut siunnersuutigisara aamma assortunngimmassuk kisiannili aamma paasinarmat suliaq tassani pineqartoq aallartisarneqareersimasoq taamaammat oktoberip 25-ani Naalakkersuisuninngaaniit akissuteqaatigineqartoq naamaagisimaaralugu. Pingaartumillu piniartut maani nunatsinni kattuffiat suleqatigiisitani taakkunani marlunni pilersinneqartuni aamma peqataatinneqarnissaat Naalakkersuisut tungaanninngaaniit neriorsuutigineqarmat. Taamaammat aalajangiiffigisassatut siunnersuut uani taasissutigineqalerpat Naalakkersuisut tassani taaseqatigissavakka.
Jonathan Motzfeldt, Naalakkersuisut Siulittaasuat, Siumut.
Ilumoorpoq oqaatigissavara oqaaseqartunut suliassaq taanna ingerlanneqarpoq aammalu neriuppunga ajunngitsumik naammassisaqarfiussasoq. Tassa inuttut piginnaatitaanermut ilaavoq. Nerisassatta killilersugaannginnissaat. Taamaattumillu aamma taamanna tunngavigalugu kalaallit sungiusimasatta aammalu mamarisatta inunnguuseralugillu sungiusimasatta Danmark-imiittunit maqaasineqarnatik pigineqarnissaat anguniarlugu suliassaq taanna naammassisaqarfiginiassavarput.
Ole
Lynge,
Inatsisartut Siulittaasuat, Inuit Ataqatigiit.
Qujanaq.
Suli oqaasissaqartoqarpat suli immaqa pisariaqavinngikkaluarpoq.
Qinnuigissavakka naatsukullammik oqaaseqaqqullugit.
Mogens
Kleist, Kattusseqatigiit.
Siulittaasoq oqarfigissavara pisariaqanngikkaluarmat aappassaaneernermi
oqaaseqarsinnaagatta pisinnaatitaaffiga toqqammavigalugu oqaaseqarniarpunga.
Uunga tunngatillugu tungitsinninngaaniit oqaatigissavarput nuannaarutigigatsigu
Naalakkersuisut massakkut suleqatigiissitamik aallartitsisimmata, kisiannili
ersarissumik oqaatigisariaqarparput EU-p piumasaqaatai sakkortungaarmata
piffissami kingullermi naturinstitut-timi pisortaasoq oqaloqatigisimavara
imaasiinnarlugu taanna ajornartorsiut aaqqinneqarsinnaanngitsoq. Taamaattumik
kommercialimik tassa oqartarput, annertuumik imaattortoqanngippat
aaqqiisoqarsinnaanngitsoq, kisianni neriuutigaarput taassumap ataatsimiititaliap
tamaviaarluni sulineratigut angusaqarluartoqarsinnaasoq.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Una erseqqissalaarlara kingullermut tassa siullermeerinerup kingorna
kissaatigineqarsimanngilaq ataatsimiititaliami suliarineqarnissaa. Taamaattumik
pisariaqartinneqarsimanngilaq oqallisigeqqinneqarnissaa. Taasinialissuugut.
Tassalu aatsaannguaq aallaqqaataani oqaatigeriikkakka najoqqutaralugit partiit
siunnersuuteqartullu tamarmik Naalakkersuisut aalajangiiffigisassatut
siunnersuummut akissuteqaataat tamarmik isumaqatigaat.
Tamatumunnga isumaqataasut qinnuigissavakka nikueqqullugit.
28. Tassa najuuttut tamarmik, taaseqataanngitsoqanngilaq.
Taamaalilluta immikkoortoq 51 naammassivarput.