Oqaluuserisassani immikkoortoq 53 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq arfineq sisamaat, tallimanngorneq oktoberip 26-at
2001, nal. 13:42
Ataatsimiinnermik
aqutsisoq: Lars-Karl
Jensen, Siulittaasoqarfimmi ilaasortaq, Siumut.
Maliinannguaq
Markussen-Mølgaard,
Inuit Ataqatigiit.
Qujanaq. Ukiuni makkunani oqallisigineqartartut annertuut tassaapput meeqqat
atornerlugaasimasut imigassamillu ajornartorsiuteqartut pisariaqartumik
katsorsarneqarnissaat. Taassumap saniatigut eqqaasariaqartut ilagaat
suliffissaaleqisut inuttut unittoorsimasut ingerlariaqqinnissaanik
suliniuteqartoqalernera.
Malunnarsisimasulli annertuut ilagaat maanna imigassamik katsorsaaviit
qaqiffiit ilaatigut imigassamik ajornartorsiuteqanngikkaluartunik
atorneqartalerneri. Tassalu imigassamik ajornartorsiuteqanngikkaluartut aamma
suliffeqareeraluartut amerlaqaat inuttut ineriartornerminni tarnimikkut
nukittorsarneqarnissaminnik pisariaqartitsisut.
Meeraanermi misigisimasat ilungersunarsinnaasut katsorsarneqarsimanngitsut
inuup imigassamut allanullu nuannaarniutinut saannissaanut patsisaasinnaasut
katsorsarneqarnissaannik periarfissiuussinissamik pisariaqartitsisoqarpoq.
Taamaattumik siunnersuutigaara meeraanermi atornerlugaasimasut imigassamillu
ajornartorsiuteqartut periarfissiuunnerisa saniatigut inuttut ineriartornermi
katsorsaanermik periarfissanik pilersitsinissamik misissuisoqarnissaa
siunertaralugu oqallittoqassasoq.
Taamatummi periafissanik ammaassinikkut sinerissami sumiiffiit
assigiinngitsut aaqqissuulluakkamik pisortallu suleqataaffigisaannik
atorluaasinnaalissagaluarmata, tamanut iluaqutaasinnaasumik. Tamannalu
oqallisigisassanngorlugu ingerlateqqippara neriullunga ilassilluarneqassasoq.
Qujanaq.
Lars-Karl
Jensen, Siulittaasoqarfimmi
ilaasortaq, Siumut.
Aap, tassa Peqqinnissamut Avatangiisinullu Naalakkersuisoq
saqqummiisussaagaluarpoq. Kisianni paasivara Naalakkersuisut Siulittaasuata
taanna saqqummiunniaraa.
Jonathan
Motzfeldt, Naalakkersuisut
Siulittaasuat, Siumut.
Inatsisartunut ilaasortap Maliinannguaq Markussen-Mølgaardip,
siunnersuutimigut inuttut ineriartornermi katsorsaasoqartalernissaa
oqaluuserisassanngortippaa.
Meeqqanik kinguaassiuutimikkut atornerlugaasimasunut aammalu inunnut
imigassamik atornerluisunut katsorsaasoqartalernissaa kiisalu
suliffissaaleqisut inuttut ineriartornerminni unittoorsimasut
ingerlariaqqiffigisinnaasaasa suliniuteqarfigineqalernissaa siunnersuutip
qiterivaa.
Naalakkersuisut siunnersuut imatut paasivaat. Inuttut ineriartornermut
atatillugu katsorsaasarneq pilersinneqarusuttoq. Meeqqat kinguaasiiuutitigut
atornerlugaasimasut inuit imigassamik atornerluisut aammalu suliffissaaleqisut
inuttut ineriartornerminni unittoorsimasut inuunerminni inuttut
naleqassutsimik imminnullu tatiginerunissaminnut nukittorsarnissaminnut
ikiorserneqarnissaminnik pisariaqartitsisut tarnikkut inooqataanikkullu
ikorfartorneqarnissaannik aaqqissuussinerit aqqutigalugit.
Aallarniutitut Naalakkersuisut oqaatigissavaat isumaginninnermik
pinaveersaartitsinermik peqqinnerulersitsinissamillu suliassaqarfinni
suliqarfigisat immikkoortortallu akimorlugit pinaveersaatitsineq aamma meeqqat
kinguaasiiuutimikkut atornerlugaasimasunik nuna tamakkerlugu
katsorsaasarnissat ataqatigiissaarneqarnissaat pilersaarusiorneqarnissaallu
sulissutigigaat.
Aammattaaq inuit imigassamik atornerluisut katsorsarneqarnissaanut
periusissat pigineqarput qanigisat qaninnerpaat aallaavigalugit ilaqutariinni
katsorsaasinnaaneq periarfissaalluni. Tamatumuuna inuit atornerluisut
inooqataasullu allat imerunnaarnikkut naleqarnerusumik inuuneqarlernissamut
periarfissaat annerulersikkumallugit.
Inuttut ineriartornermi inuit ataasiakkaat inuunerat peqqissutut
taaneqassappat peqqinneq tamakkiisumik tassaavoq misigissutsikkut timikkullu
peqqinneq. Nerisassanik peqqinnartunik nerisasserinikkuinnaq pinnani, kisianni
aamma timigissarnikkuinnaq peqqissuuniarnikkullu anguneqanngitsoq.
Peqqissuussagaannimi toqqaasoqartariaqarpoq, aalajangiussaqartariaqarluni
iliuuseqartariaqarlunilu tassa namminneq aamma allat peqatigalugit
inoqutigiinni, atuarfimmi, suliffimmi inuiaqatigiinnilu.
Inersimasutut pitsaasumik inuuneqarnissaq meeraanermiit
tunngavilerneqartarmat ilisimavarput. Meeqqat ilikkartariaqarpaat
pisinnaatitaaffeqaramik inuttullu aamma ataqqineqartariaqarlutik. Ulluinnarni
inuuneq allatulluunniit oqaatigalugu inooriaaseq inuit ataasiakkaat
nappaatinut qaninnerusinnaanerannut aalajangiisuuvoq. Ulluinnarnilu inuunikkut
inooriaatsikkullu inuit ataasiakkaat iliuutsimikkut peqqissuuniarsinnaapput.
Piffissamut 1999-iminngaaniit 2003-imut pinaveersaartitsinikkut
peqqinnerunissakkullu suliassaqarfinni meeqqanik isumaginninnerup iluani
imigassallu tungaatigut suliassaqarfiit Naalakkersuinikkut
anguaniagassaqarfittut Naalakkersuisut salliutippaat. Piffissap ingerlanerani
imigassartornermup 25%-imik appartinneqarnissaa meeqqat toqqissisimasumik
eqqissisimanartumillu peroriartorsinnaatitaanissaasa qularnaaneqarnissaat
anguniagaapput. Aammalu inuuniarnermi atugarisat
pitsaanerulersinniarneqarnissaat ingerlatiinnarneqassaaq. Ilaatigut
suliniuteqarnikkut innuttaasullu akornanni isummertarnerup
sunniiniarneqarfiginiarneratigut.
Peqqinnissamut pisortaqarfik Paarisakkoortumik Isumaginninnermut
Suliffeqarnermullu Pisortaqarfik Red Barnetilu nunatsinni meeqqanik
kinguaassiuutitigut atornerluisarneq pillugu novembarimi 1999-imi
ataatsimeersuartitsipput.
Taavalu ataatsimeersuartuniit inassutigineqarput makku. Meeqqat
kinguaassiuutimikkut innarlisaariffigineqarsimanerminni oqaluttuaraangata
aallaavittut upperineqartassasut. Aamma innarlisaarfigineqartup
innarlisaarisullu pisariaqartinneqartutut ikiorneqarnissaat
qularnaarneqartariaqartoq. Aamma kinguaassiuutitigut atornerluisarnerup
pinaveersaartinneqarnissaanut innarlisaarfigineqartut innarlisaarisut
qanigisaalu katsorsarneqarnissaanik sulisusat aningaasallu
pisariaqartinneqartut Namminersornerullutik Oqartussanit aammalu nunamilu
kommunit ataatsimoorlutik pissariarisassagaat.
Kiisalu Inatsisartut Naalakkersuisut kommunalbestyrelsenilu
Naalakkersuinermik suliaqartut ajornartorsiutip ilungersunartuunera
paasisassagaat. Katsorsaanermillu suliaqarnermi pinaveersaartitsinermillu
aningaasaliissutissat pisariqartinneqartut qularnaassaagaat. Naalakkersuisut
isumaqarput katsorsarneqarnissami inunnut imigassamik atornerluisunut
neqeroorutit ilaneqartariaqartut katsorsaaneq nanginnilerlugu.
Nalinginnaasumik inooqataaqqqilernissamut periarfissiinermik
aaqqissuussinikkut. Tamatumuuna nangeratarsinnaaneq pinngitsoortinniarlugu.
Isumaginninnermut suliffeqarnermut ilinniagaqarnermullu tunngatillugu
suliassat ataatsimut aaqqissuussiffigineqarnissaanik immikkoortortat
akimorlugit suleqatigiinnissat aammalu Namminersornerullutik Oqartussat
kommunillu oqartussaasuisa suleeqatigiinnissaat pisariaqartinneqarput.
Uumaatsunik pilianit pingaartumik imigassamik nunatsinni inuit
pinngitsuuisinnaajunnaarsimasut katsorsarneqartarnerisa ingerlanneqartarnissaa
pillugu Naalakkersuinikkut aalajangiiffigisassamik inassuteqaasiornissaq
siunertaralugu suleqatigiissut upernaaq Naalakkersuisut pilersippaat.
Naatsorsuutigineqarpoq suliaq 2001-ip naanerani naamassissasoq. Suliffinni
imigassap ingerlatsivigineqarnissaani inuit sulisussat ilinniartitaanerat
Paarisap aallartissimavaa. Tamatumuuna imigassamik atornerluinerup
paasiaarneqarnissaa imigassarlu pillugu ilisimasat pillugit suliffiit
ilaatilerniarlugit.
Suliffinni imigassap ingerlatsivigineqalerneratigut peqqissuunissaq
suliffimmillu ingerlalluarnissaq periarfissinniarneqarput.
2000-imi ukiakkut Inatsisartut katersuunneranni Inatsisartut oqaluuseraat
kinguaassiuutitigut atornerlugaasut saaffiginnittarfissaannik piaartumik
pilersitsisoqarnissaa. Tamannalu pillugu Inatsisartut aalajangiiffigisassatut
siunnersuut aammalu meeqqat angerlarsimaffiup avataani inissittakkat
eqqarsaatigalugit siunissami meeqqat avammut inissisimaneri angajoqqaavisa
qanoq ilillugit katsorsarneqartarnissaat pillugit apeqquteqaat aallaavigalugu
oqallisissiaq.
Inatsisartut aalajangerput neqeroorutit pioreersut nukittorsarneqarnissaat
sulissutigineqassasoq. Nassuerutigineqarmata katsorsaanissamik nunatsinni
neqeroorutit iluini sulisussarsiornikkut annertuumik ajornartorsiuteqarneq.
Ilaqutariinnik sullissinermi kinguaassiuutitigullu atornerlugaasimasunik
oqaloqatiginnittarnerni kommunini atorfeqartitat ilinniarteqqinneqarnissaanut
aningaasat atugassat Inatsisartut akuersissutigaat.
Ilanngullugu oqaatigineqarsinnaavoq meeqqanut inuusuttunullu ulloq unnuarlu
inissiisarfinni nunami tamarmi atorneqartuni meeqqat inuusuttullu takkununnga
inissinneqartut ataavartumik katsorsarneqartartut.
Suliniutitigut neqeroorutitigullu taakkunuuna peqqissumik
inooriaaseqarnissamik naleqarnerusumillu inuuneqalernissamut inuit
ataasiakkaat namminneq inuunerminnut inuttullu ineriartornerminnut
akisussaaffeqarnerisa nakussassarnissaat Naalakkersuisut sulissutigaat.
Inuniarnermi atugarisat killigalugit inuuvugut. Tassa suliffeqarneq,
aningaasaqarneq, ineqarneq, avatangiisivut qaninnerit, inuiaqatigiit, kulturi
nunarsuarlu.
Taakku inooriaatsitsinnut sunniuteqartarput peqqissumik
inuuneqalerumanitsinnut ajornannginnerulersitsisut. Imaluunniit
ajornannginnerulersitsisut. Puigussanngilarputtaaq peqqissumik
inuuneqarnissarput peqqissutsitsinnut pisussaaffigisatta isumaginissaanut
siunissatta nalilersuiffiginissaanut, toqqarnissaanut,
ineriartortinnissaanullu piginnaassuseqarnissatsinnut aalajangiisuusoq. Tamanna
nammineq akisussaaffigigatsigu.
Meeqqanut
kinguaassiuutimikkut atornerlugaasimasunut inunnik imigassamik atornerluisunut
aamma suliffissaaleqisunut inuttut ineriartornerminni unittoorsimasunut
katsorsaanissamik suliniutit arlalissuit aallartinneqareersimasut
aallaavigalugit Naalakkersuisut isumaqarput pineqartumut suliniutaasut
annertoreeqisut. Kiisalu inuttut ineriartornermut atatillugu katsorsaasarnermi
aaqqissuussisarnerit annertusaqqinneqassanngitsoq.
Taamaakkaluartoq
Naalakkersuisut neriuutigaat ullumikkut oqallinneq inuttut ineriartornermut
tunngatillugu, inooqatigiinnermut, pinaveersaartitsinermut aammalu
peqqinnerulernissamut tunngasunik suliap ingerlaqqinnissaanut
isummersuiffiulluarumaartoq.
Lars-Karl
Jensen, Silittaasoqarfimmi
ilaasortaq, Siumut.
Naalakkersuisut
Siulittaasuannut qujavugut. Taava partiit Kattusseqatigiillu oqaaseqartuinut
ingerlaqqikkutta siulliussaaq Anders Andreassen, Siumut.
Anders
Andreassen, Siumup
oqaaseqartua.
Inatsisartunut ilaasortap Maliinannguaq Markussen-Mølgaardip saqqummiussaa atuaraanni malugineq ajornanngilaq ukiuni kingullerni Naalakkersuinikkut apeqqutini pineqartuni iliuussaasimasut Naalakkersuisut saqqummiussaat pisariaqarlutillu erseqqissartariaqartut. Tassami matumani pineqarput Naalakkersuinikkut iliuuserineqarsinnaasunik ujartuineq. Paarisap iliuuserisai. Red Barnetikkut iliuusaat. Kommunalbestyrelseni pisortanilu iliuuserineqartarsimasut. Meeqqat atornerlugaasut pillugit annertupput tapersersorneqarlutillu. Tamannalu Siumumiit pingaartipparput tapersersorlugulu.
Minnerunngitsumik innersuussutiginiarparput tassa Siumumiit isumarput naapertorlugu Paarisap ataatsimeersuartsinerani inassutigineqartut Naalakkersuisut Siulittaasuat erseqqissaatigisai matumani suliniarnermi tunngavissaqqissutut Siumumiit isigisavut. Tamatumani taakkartorneqartut erseqqissumik siunnerfeqarput Namminersornerusut kommunillu suliniarnissaminni suliniarnerminnilua aallaavissamittut isumaqatigiissutigisinnaasaat.
Tamakkua taagorneqareersut soorunami inunnik atortariaqakkanik aningaasanillu pissarsiarisariaqartunik imaqarput. Taamaattut soorunami pissarsiarineqarsinnaapput ikiuutaasinnaallutillu. Kisianni Naalakkersuisut Siulittaasuata Naalakkersuisut sinnerlugit akissutaani pisariaqarluinnartoq avaqqunneqarsinnanngitsorlu tikinneqartoq Siumumiit isumaqatigisarput tassa uagut nammineq peqqissumik inuuneqarnissatsinnik siumut tikkuussisoq. Angajoqqaanut perorsaasutut akisussaasunut, atuarfinnut, peqatigiiffinnu, ilaalu ilanngullugit piffissaajuarpoq Naalakkersuinermik suliaqartuni erseqqissaatigissallugu manna matumani suliniarnerit amerlanersaat kingunissalimmik sulinerummata.
Akisussaassuseq angajoqaaniit peernagu sakkortusarluguli suliniarneq ingerlanneqarpat. Tassani suliniarneq annertusartariaqarpoq Naalakkersuinermi suliniarnerit tassaasariaqarput suliami suliani makkunani ilassutitut ikiuutaasussat.
Oqallinneq matumani inimi pisoq kingunissalimmik pissappat inip avataanut innersuuttariaqarpoq. Innuttaasut akornanni aamma pisariaqarpoq. Aammalu tamatumani iliuuseriniakkat sammissassat sammissallugit patsisissaqarnerusoq Siumumiit isumaqarpugut. Siumumiit qularutiginngilarput angajoqqaat, atuarfiit aammalumi allaat ilagiit kalaallit suleqatigiinnermikkut ajornartorsiutit matumani pineqartut qaangerniassallugit nukissaqarfigiinnarnagit aamma aqqutissarsiorsinnaagaat.
Kinguaassiuutitigut atornerluinerit imigassartorpallaarnerit ikiaroornartunillu atugaqarnerit inuiaqatigiit aamma uatsitut ittut aqqutigisarsimavaat. Oqartoqassanngilaq aammalu taamaaliorniartoqanngilaq Naalakkersuinikkut kisiat aaqqiiniarnerit aqqutissatuaasut taamaanngilarmi. Immikkulli inuttut namminneq imminnut sullinniarnerminni aamma kattuffii matumani salliutillugit Sorlak allallu pinaveersaartitsinermi peqatigiiffiusut aqqutissiuussisuullutik iliuuseqartarnissaannut aamma periarfissiiniarnerit suliniarnermi matumatut ittuni puigorneqannginnissaat Siumumiit eqqaamaqqussavarput.
Naggataatigut oqaatigissavarput meeqqat inuusuttullu atornerlugaasimasut pitsaanerusumik sullinneqarnissaat siunertaralugu ukioq kingulleq Inatsisartuniit 9 million kr-nit immikkoortinneqarput. Nutaamik meeqqanut angerlarsimaffimmik nakkutilliiviutigaluni katsorsaavimmik pilersitsinissamut.
Taakkua saniatigut
aningaasanik immikkoortitsisoqarput kommunini sullissisut
pikkorissartineqarnissaat siunertaralugu. Tamannalut
Siumumiit nuannaarutigaarput. Taamak naatsumik oqaaseqarluta saqqummiussaq
manna Siumumiit oqaaseqarfigaarput.
Godmand
Rasmussen, Atassutip
oqaaseqartua.
Nunanitsinni inuttut ineriartornermi katsorsaasinnaasunik pilersitsinissaq
pillugu apeqqut aallaavigalugu oqallisigisassa Inatsisartunut ilaasortap
Maliinannguaq Markussen-Mølgaard,
oqallisissiaat
Atassummiit imatut oqaaseqarfigissavarput.
Oqaluuserisassanngortinneqarto
inimi maani arlaleriaqaluni oqallissutaasarsimavoq. Ilaatigut misigissutsinik annertuunik ilaqartarsimalluni. Imigassamik
ajornartorsiutilinnik katsorsaaneq qujanartumik annertuumik qaqiffiit
aqqutigalugit iluaqutaalersimavoq ilorraallu tungaanit saariarnertuut
aallariartitsisimaneri tamatsinnut qujanartuullutik.
Inuiaqatigiinnili ajornerpaamik eqquisartut ilaginngitsuunngilaat
meerannguanik atornerluisarnerit qujanartumik piffiit ilaanni tamakku pillugit
suliniutit pitsaasunik kingunillit tusartualersimavagut. Soorlumi
naluneqanngilaq Aasiaat kommuniat kinguneqarluartumik atornerlugaasimasunut
suliniuteqartuarnermigut pitsaasumik takkorliisaqartareersoq. Nunatsinnimi
taamaattut amerlarnerusariaqaraluarput.
Soorunalimi nunatsinni piffinni assigiinngitsuni aammattaaq
pinaveersaartitsinermik suliniuteqatoqartoq nalunngilarput. Taamatullu
suliniuteqarneq nutaanngitsuunngilaq ineriartortinneqarporli.
Tamaaqqunaqaarlumi.
Siunnersuuteqartup qaqiffiit imigassaannarmik ajornartorsiuteqanngitsunut
atugaanerat taakkartorpai. Soorlu suliffeqareeraluarlutik aammalu tarnimikkut
nukittosarfittuut atuisut taasimallugit. Tamannalumi ilumoorpoq. Atassummiit
ataqqisarivagut inuit pisortanit ikiorneqanngikkaluarlutik
ajornartorsiutiminnik paasinnillutik ilorraap tungaanut saattartut.
Taamaattullu amerlanerusariaqaraluarput.
Pitsaasuusinnaanngilarmi nammineq inuttut aaqqissinnasat sutigut tamatigut
pisortanut ikiorneqarnissamut kaamiinnartassagutsigit. Naak
nalunngikkaluarlutigit nammineq immitsinnut piumaffiginitsitigut
ajornartorsiupput aaqqiivigisinnaagaluarlutigu.
Siunnersuuteqartup oqariartuutaani Atassummiit maqaasivarput ikiaroornartoq.
Kiisalu naamaarniartarnerup nunatsinni meeqqanik inuusuttunillu
ajornartorsiutaanerujussua. Ilami allaat toqumik kinguneqartalersoq.
Ajornartorsiullu taanna nunatsinni toqqissisimanermik pilersitsinngilaq.
Akiorniarneqarnissaalu inuiaqatigiit tamatta ikiorfiiffiginngikkutsigu
inuusuttortatta meerartattalu siunissaat Atassutip aarlerinartutut isigaa.
Ilami immaqa allaat inuusaatsimut ilaaginnalersutut isigilersimallutigu.
Tamannali kukkunerussaaq annertooq kukkunerussanngilarmi ajornartorsiut taanna
nunarput tamaat isigalugu annertuutut oqaatigigutsigu.
Ilimagaaralumi inimi maani oqallisigissallugu pingaaruteqassasoq naak
immaqat tamatta takunikuunagulu ooqattaarsimanngikkaluaripput.
Oqattaarsimanagulu takusimanngikkaluarutsiguluunniit
miserratigineqarsinnaanngilaq nunatsinni ajornartorsiutaasoq. Immaqalu
inuusuttortatsinnit allaat piumassuseerutsitsinermik kinguneqartitsisarluni.
Soorlumi aviisitigut tusagassiuutitigullu tamanna arlaleriaqaluta tusarlugulu
atuartareeripput.
Soorlumi siunnersuuteqartup paatsuugassaanngitsumik oqaaseq atoraa inuttut
ineriartornermi tarnimikkut nukittorsarneqarnissartik pisariaqartissaqigaat.
Taamaattumik pisariqarluinnarpoq inuit taamaattunik atuisut
qaammarsaalluarnikkut ikiorneqartuinnarnissaat.
Soorlu Sisimiuni tallimanngormat oktoberip 12-ani kingullermik atuartut
atuarfinni marlunneersut atuartullu annerit akerliussutsimik
takutitsinermikkut takutikkaat ikiaroornartumik atuinerup kiisalu
naamaarniartarnerup imigassamillu atuinerup qanoq meeqqanut
inuusuttunngulersunullu toqqissisimannginnerup pilersitaa
paatsuugassaanngitsumik ersersinneeqarmat.
Tassuunakkummi meeqqat inuusuttullu siunissaminnut
toqqaserluuteqalersimanerat ersarippoq. Ullunimi makkunani nunatta
namminersuilivinnissaata oqallisaaruttulernerata nalaaniippugut.
Ikiaroornartorli naamaarniartarnerlu taamatut atugaaginnassappata meerartatta
inuusuttortattali ernumallutik takutittaligaat kimilluunniit paatsuugassaanani
assiliaq ersertalerpoq.
Qanorlu iliuuseqarnissamik aaqqeeriartussallu tassarpiaapput uagut inimi
maani inatsisiliortut. Meerartattami inuusuttortattalu pitsaanerusumik
siunissaqarnissaat pimoorutiivillugu inimi maani eqqartortuartarparput.
Oqarsinnaanngilagummi uagut nammineq ooqattaarnagulu atugarinnginnatsigu
ajornartorsiut akuliuffigisariaqanngikkipput. Tassami taamatut eqqarsassagutta
annertuumik kukkussuteqassaagut.
Atassummiit siuliini oqaatigaarput illoqarfinni nunaqarfinnilu
pinaveersaartitsitsinermik suliaqartoqarnera tamatsinnut kissaatiginarpoq
ilorraap tungaanut saatinneqarnissaa. Taamaattumik siunnersuuteqartup
periarfissanik ammaassinissamik oqariartuuteqarnera Atassummiit
ilassilluarparput. Susassaqartunillu iternga tikillugu
oqallisigineqarnissaanut Atassut suleqataajumavoq.
Qujanaq.
Asii
Chemnitz Narup, Inuit
Ataqatigiit oqaaseqartuat.
Inatsisartunut ilaasortap Maliinannguaq Markussen-Mølgaard, Inuit
Ataqatigiinneersup siunnersuutigaa nunanitsinni inuttut ineriartornermi
katsorsaasinnaasunik pilersitsinissaq. Oqaluuserisassanngortitsinermini
ilanngullugu oqaatigaa nunatsinni ikiorserneqarnissami pisariaqartitsisut
tassaaginnanngitsut imigassamik ajornartorsiuteqartut.
Kinguaassiuutitigulluunniit atornerlugaasimasut.
Meeraanermili misigisimasat allat ilungersunartut aamma eqqorneqartut
ikiorserneqarnissamik katsorsarneqarnissamilluunniit
pisariaqartitsilersitsinermik kinguneqartarmat. Siunnersuutigaalu taakku
inuttut ineriartornermi katsorsarneqarnissamik periarfissaannik
pilersitsinissamik misissuisoqarnissaa oqallisigineqassasoq.
Maliinannguaq Markussen Mølgaard oqaluuserisassanngortitaa
pingaaruteqarluinnartutut Inuit Ataqatigiinni isumaqarfigaarput.
Isumaqatigivarpullu inuttut ajornartorsiutit allat imigassartorpallaanermit
kinguaassiuutitigulluunniit atornerlugaasimanermit aallaaveqanngitsut
eqqartornissaannut iliuuseqarfiginissaannullu piffissanngornerarmagut.
Inuiaqatigiit kalaallit aaqqissugaanermikkut annertuumik sukkasuumillu
allanngoriartorsimapput. Naalakkersuinikkut aningaasarsiornikkut
tunisassiornikkut, ilinniartitaanikkut, inooqatigiissutsikku,
inooriaatsikkullu. Ilisimavarpullu qallunaat nunaanni pissutsit
isiginiartupulussuullugillu issuarlugit ineriartortitsisoqarsimasoq. Nunattalu
inuiisa oqartussaaqataatinneqarnerat ukiorpassuarni annikittuararsuusimasoq.
Ineriartornermi killiffik arlalitsigut ajoriinnagassaanngikkaluartoq
miserratigisariaqanngilaq inuiattut pilliuteqarsimaqigatta. Assersuutigalugu
nammiuniussutsikkut, inuttut nammineq naleqartutut misigisimanitsigut
inuiaassutsikkullu. Aallaat oqartariaqalersimalluta ineriartornerup Kalaallit
Nunaata tarninga sanngiillisissimagaa.
Tamannalu ullutsinni assigiinngitsunik ersiuteqarpoq.
Nassuerutigisariaqarpormi nunatsinni inuuneq inunnut amerlasuunut sakkortuunik
nalaatsiffiusarmat. Toqutsinerit, imminortarnerit, nakuusernerit,
imerpallaarnerit, sumiginnagaanerillu ilaqutariinni amerlasuuni
misillerfigineqartarput. Taamatuttaaq persuttaanerit, nappaatit, ajoqusernerit,
ajunaarnerillu naapitassaajuarlutik.
Amerlasoorsuunnginnattalu taamatut pisoqartillugu nunaqqatigiit
tamarmiusugut eqqorneqartutut ittarpugut. Inuiaqatigiit tamarmiusut qamuuna
ikilerneqaatigisarpagut inuiaqatigiittullu nukillaarsaatigisarlutigit.
Pissutsit atukkat tamakku toqqarlugit qiviarlugit inuiaqatigiit nappaataattut
allaat nalitariaqalersorinarput.
Nassuerutiginngikkutsigit katsorsagaaneq Maliinannguaq Markussen-Mølgaardip
ujartugaa aallartissinnaanngilarput. Ilisimaneqarpoq nukippassuit artorsaatini
tupannartumi alianartumilu qilersorsimasutut ittartut.
Nukiit ulluinnarni inuunermut inuiaqatigiinnilu piorsaaqataanermut
atorfissaqarluraluartut nalaatat sakkortuut atukkallut oqimaatsut inuit ilaasa
inuunermut inuuniarnermullu piginnaanikillinerannik inoqatigiminnut
attaveqarniarnermikkut ajornartorsiulersarneranik kilerliortunngortarnerannik
allammi inuuneqarusussuseerussinaanerannik kinguneqartarpoq.
Nunatta imminut napatittup pilersikkiartuaarnerani nukiit
maangaannartinneqartarnerat Inuit Ataqatigiinni akuersaaginnarusunngilarput.
Tamakku tamaasa eqqarsaatigalugit Maliinannguaq isumaqatiginaqaaq oqarmat
inuttut ineriartortuarsinnaanissaq qulakkeerniartariaqartoq.
Isumaqatigivarpullu oqarmat pisariaqartitsinerup qanoq annertutiginera
misissortariaqartoq.
Ullutsinni paasineqartut ilagaat artorsaateqarfimmi
ilungersunartorsiorfimmilu nipangiussiinnartarneq peqqinnanngitsuusoq.
Oqaloqatigiissutiginissaallu kissaatigineqaleraluttuinnarluni. Inuunermilu
alloriaqqinnissamut aqqutissanik ujartuineq qujanartumik
takussaaleraluttuinnarlunilu tusarsaaleraluttuinnarpoq. Kissaatigisanut
naapertuuttumik periarfissiinerit ukiuni makkunani
piorsaavigineqartupilussuusut oqaatigisariaqarpoq. Tamannalu nunnaarutissaavoq.
Ilisimaneqarpoq kommunit arlallit innuttaasunut inuttut atukkamikkut
oqimaatsorsiortunut inuttullu ineriartornerminni unittoorsimasunut
neqerooruteqarnissartik pingaartillugu ineriartortitsisut. Assersuutigalugu
taasinnaavagut Aasiaat Qaqortullu kommuunnii. Taakkunani isumaginnittoqarfiit
aningaasatigut ikiuineq piinnarnagu aammali ilaqutariittut inooqatigiinnikkut
allatigullu pissutsit pillugit ikiuinermik aallutaqartuupput.
Taamatuttaaq assersuutigineqarsinnaavoq Sisimiuni innuttaasut illuanni
suliniutit ukiorpaalunngulersuni piorsarneqarsimasut. Misilittakkat tamakku
tulluusimaarutissaapput. Nalilersorluartariaqarlutillu. Pisinnaasatta
piumassuseqartoqartillugu qanoq nikananngitsiginerannik aamma
uppernarsaataapput.
Suliffeqarfinni assigiinngitsuni atorfeqartut sulisutut suliassavimminnut
pikkorissarnerminnut ilanngullugu inuttut ineriartoqqinnissaq pillugu
pikkorissartinneqarnissartik kissaatigisarpaat.
Tamannalu qujanartumik suliffeqarfinni amerliartortuni akuerineqartarpoq.
Taamaalillunilu neqeroorutigineqartarluni kursusi inuttut ineriartornermik
qulequtalik. Sulliviit siuarsimalluartutut oqaatigineqarsinnaasut
sulisoqarnermut politikkerisaminnut ilaatittarpaat sulisorisami sulisutut
inuttullu ineriartornissaani periarfissiinissamik pingaartitsineq.
Misilittakkat allat takutippaat ilinniartoqarfinni ilinniartut
ilinniartuunermi nalaani suliffigilerumaakkaminnut piukkunnarsaannaratik aamma
inuttut ineriartortupilussuusartut. Ilinniarfeqarfiit ilaat ilinniartut
inuttut ineriartornissaat immikkut eqqumaffigiitigalugu ingerlatsisartut
ilisimaneqarpoq. Eqqarsaatigineqarsinnaavoq ilinniarnerit assigiinngitsut
siunertaannut ilaatinneqassanersoq ilinniartut inuttut ineriartornissaat
ilinniarnerup nalaani aamma aallunneqartalissasoq.
Suliffissaaleqisut suliffissarsiuussisarfinni sullinneqarnerat siunissami
qanittumik nutarterneqartussaavoq tassunga peqatigitillugu
pissusissamisuussaaq suliffissaaleqisut pikkorissarnerminni inuttut
ineriartorneq ilanngullugu sammisassappassuk. Inuttut ineriartorneq
qulequtarineqartillugu periarfissiisoqartarpoq peqataasut imminnut
qiviarnissaannut pikkoriffiit sanngiiffiillu oqimaaqatigiissillugit
nalilersornissaannut. Taamaaliornermilu inuunerup pitsaassusiata sukkut
qaffassarneqarsinnaanera tappiffigineqarnerulertarpoq.
Aperisoqarsinnaavoq inuttut ineriartorneq suna pillugu taamak
pingaartineqartigissava? Misittakkat aamma nunatsinni uppernarsivaat inuit
minnerunngitsumik ataatsimoorlutik peqatigiillutillu misigisaminnik
eqqarsaatersuutiminnik qisuariartarnerminnillu aaqqissuussamik ammasumik
eqqartuileraangamik nukissanik nutaanik pilersitsisinnaanngortartut. Inuunerup
atugassarititaannik akuersaanerulertartut inoqatigiminnillu
paasinninnerulertarlutik ataqqinninnerulertartut imminnullu
tatiginerulernermik inerititaqartartut.
Sulisut nuannaarnerulerlutik tatigeqatigiinnerullutillu suliassaminnik
naammassinnissinnaanngortartut inuuneq naleqarnerusoq aamma suliffinni
tunngavissinneqarsinnaanngortartoq. Inuiaat kalaallit namminiileriartortut
imminnullu napatikkiartuaarnissamik aqqutissiuussileruttortut
toqqammaveqaannassanngillat inunnik timikkut nukittuunik.
Toqqammaveqartarriaqarputtaaq inunnik tarnikkut sanngisuunik imminnullu
tatigalutillu ataqqisunik. Peqatigiinnikkullu ajornartorsiutinik
qaangeerusussuseqartunik.
Aqqutit suulluunniit tamatumunnga ineriartortitsinermi ikorfartueqataasut
iluatigisariaqarpagut. Taamaattumik inuunerup tamarmi ilinniarfiunera
anersaaralugu ilaqutariinni atuarfinni ilinniarfinni suliffeqarfinni
inuiaqatigiinnilu Inuit Ataqatigiinnit pingaartittariaqartutut
isumaqarfigaarput.
Inuiaqatigiit nalilerneqaatigisarpaat sanngiinnerusortaminnut
utoqqartaminnut innorluutilittaminnut meerartaminnullu qanoq
isumalluilluartiginertik isumaginnilluartiginertillu. Inuit Ataqatigiinni
isumaqarpugut inuiaqatigiit tunngaviusumik inunnik isiginneriaasertik
ilanngullugu nalilerneqaatigisariaqaraat.
Inuit Ataqatigiit pingaartipparput inuk tamaat ataatsimut isigalugu
ingerlatitsisoqarnissaa. Imatut paasillugu inuup pisariaqartitai timikkut
misigissutsikkut anersaakkut inooqatigiissutsikkullu pissutsinut
tunngasuummata tamarmik pingaartuteqarput oqimaaqatigiissumillu
naammassiniarneqassallutik. Taamaammat qallikkut atukkat kisiisa
pingaartillugit ineriartortitsisoqarsinnaanngilaq. Taamammat Inuit Ataqatigiit
tungaaninngaaniit Maliinannguaq Markussen-Mølgaardip
oqaluuserisassanngortitaa ilassilluarparput qujanarporlu apeqqut
misissuiffigeqqullugu siunnersuuteqarmat.
Inuit Ataqatigiinniit saqqummiussinitsigut siunnersuuteqartup inuttut
ineriartornermi katsorsaasinnaasunik pilersitsisoqarsinnaaneranut
pisariaqartitsinermut taakkartugai paasilluarpagut ilalersorlugillu.
Taamaattumik susassaqartunut paasiniaanikkut pisariaqartitsinerup
nalilersorluarnera aallaavigalugu timitaliinissap qanoq ittuunissaa
aningaasatigullu qanoq kinguneqarsinnaaneri pillugit Naalakkersuisut
suliniuteqarnisaat kaammattuutigissavarput.
Tamatumalu kingorna ullumi oqaluuserisaq aalajangiiffigisassatut
siunnersuutitut ilusilerlugu uterfigineqarnissaa pisariaqassalluni.
Loritha
Henriksen, Kattusseqatigiit
oqaaseqartuat.
Inatsisartunut ilaasortaq Maliinannguaq Markussen-Mølgaardip oqallisissiaa
Kattusseqatigiinniit imatut oqaaseqarfigissavarput. Oqallisissiaq annertooq
soqutinartorlu annertuumik inuiaqatigiinnut ineriartortunut
atorfissaqartineqartoq oqallisissiatut saqqummiunneqarpoq. Ullumikkullu
annertuumik ajornartorsiutaasoq tamatta nalunngisarput.
Ajornartorsiut ersarippoq minnnerunngitsumik meeqqat ilaannut aammalu
inuusuttuaqqanut inersimalersimasunullu. Angerlarsimaffiit ilaanni
atugarititaasartut atugaritinneqartartullu eqqarsaatigalugit. Taamatummi
eqqugaasimasut atugaritaasimasullu siunissami pitssaanerusumik
ineriartortinneqassappata siuinissamilu imminnut tatiginissaat anguneqassappat
pinngitsoorneqarsinnaanngilaq oqallisissiatut ittumik pilersitsinissaq
piaartumik angusassat pingaarnersat ilagisariaqaraat.
Taamaammat Kattusseqatigiinniit oqaatigissavarput pineqatut pitsaanerpaamik
patajaatsumillu aqqutissiuunneqarnissaat pitssaasumillu
periafissinneqarnissaat anguneqassappat sanioqqunneqarsinnanngitsoq
oqallisissiatut ittumik pilersitsinissaq piffissami qaninnermi tamannalumi
pisariaqarluinnarpoq.
Pisariqartinneqartoq aamma ullumikkut takussutissaqareerpoq meeqqat
inuusuttullu angerlarsimaffiup avatanut inissinneqartartut utaqqisullu
annertussusaat qiviaraanni. Taamaattumik aamma aperersusunnarpoq taakkua
saniatigut katsorsarneqarnissamik pisariaqartitsigaluartut
periarfissaqanngitsullu ullumikkullu inooqataasut qanormita suli amerlatigaat.
Saaffissaqarnatik periarfissaqarnatillu siunnersorneqarnissamik,
ikiorserneqarnissamillu pisariaqartitsigaluartut.
Taamaattumik pisariaqartutut isigaarput aamma qulakkiissallugu siunissami
suliniutit ilaannut ilanngunneqartariaqartoq tassa inuttut ineriartornermi
katsorsaaviusinnaasumik pilersitsinissaq. Tamattami ilisimaaraarput
ajoraluartumik angerlarsimaffiit ilaanni tamatigut imigassaq aammalu
nuannaarniutit aallaavigalugit meeqqanut inuusuttuaqqanullu atornerluinerit
tujormisitsinerit aammalu misigititsinerlunnerit pisarmata. Meeqqamut
ineriartortumut inuunerup sinneranut sunniuteqartussat, suliarineqanngippatalu
amerlarnertigut qaangiinnarneqarneq ajortunut. Aallaallumi ilaqutaqalernikkut
nangeqqiinnarneqartarlutik.
Naak nalunngikkaluarlugu ullumikkut isumaginninnermi
ataatsimitsimiititaliamiit aamma annertuumik meeqqat inuusuttuaqqallu qanorlu
atasumik atugarititaasut annertuumik patajaatsumik suliarineqaraluartoq
taamaattoq oqaatigerusuppara pingaaruteqarluinnarmat katsorsaaviit
amerlanerusut atorfissaqartinneqarmata.
Naak annertuunik aningaasanik naleqassagaluartut taamaattoq kissaatiginaqaaq
katsorsaanermut aningaasaliissutit annertuumik ullut makku
pisariaqartinneqarmata, pisariaqartinneqartuarlutillu. Siunissami
inuiaqatigiit pitsaasumik ineriartornerminni aallaaveqassappata.
Kinguartiterinerimmi annertuumik inuiaqatigiinnut minnerunngitsumik
ilaqutariinnut aammalumi nunatta karsianut suli annerusumik
akisunerulernissaat pinaveersimatinneqassappat pinngitsoorneqarsinnaanngilaq
sinerissami amerlanerusunik katsorsaavinnik pilersitsinissaq.
Soorunami suliniutit allat annertuut misissuinerillu aallartereersut
Naalakkersuisup akissuteqaammini ataqqivakka isumalluarfigalugillu. Kisianni
pissutsit piviusut annertuumik iluaqutaasussat eqqarsaatigalugit
suliniutissatut pingaartutut anguniagassatullu
pinngitsoorneqarsinnaanngitsutut isigaara. Inuttut ineriartornermik
katsorsaavissamik aamma pilersitsinissaq.
Tassanimi ilaqutariit ajornartorsiutaat minnerunngitsumillu
ilaqutaqalersimanermi perorsaanermilu ilisimasariaqartut pingaarutillit
tassuuna annertuumik qaammarsaavigineqarsinnaasut iluaqutaasumillu
sunniuteqartussat sunniuteqalertussallu qularinnginnakkit.
Erseqqissarusupparali suliat misissuinerillu ullumikkut ingerlasut annertuumik
isumalluarfigigakkit suleqataaffiginissaalu qilanaaralugit.
Taamaattorli kissaatiginaqaaq siunnersuutigineqartutuut anguniagassaq
pisariqarluinnartoq tassalu misigisat tujorminartut ilungersunartullu
meeraanermit inuusuttuaraanermillu aqqusaarsimasat qaangerneqarnissaat
eqqarsaatigalugit pisariaqartoq katorsaaviliornissamik. Periarfissiineq
pingaarluinnartuummat minnerunngitsumillu taamatut atugaqarsimasut
ilaqutaqalernissaat aammalu ilaqutaqalereersimasut meeqqat siunissaat
pitsaasumik perornissaat eqqarsaatigalugu.
Aammalumi nalunnginnakku imigassamik katsorsaavik Qaqiffik ilaatigut
imigassamik ajornartorsiuteqanngikkaluartunik annertuunik atorneqartoq.
Annertunerusumik suli atorneqarsinnaagaluartoq ullumikkutut
periarfissaqartitsinngitsumik. Misilittakkammi takutereerpaat meeraanermi
inuttullu ineriartornermi nuanniitsut atugarliuutillu inuunermi
aqqusaarsimasat qaqugumulluunniit katanneqarneq ajortut nalunngilagut.
Pingaartumik inuttut suliarineqanngikkunik nangeqqinneqaannartartunik
amerlanerigut.
Taamaattumik inuttut ineriartornermi inuusuttunngulernermilu immaqalu
ilaqutaqalereernermi atugarisimasat aqqusaarsimasallu aallaavigalugit
katsorsarneqarnissaq pisariaqarluinnartutut assortorneqarsinnaanngitsutullu
isigaarput. Taamaatit Kattusseqatigiinniit oqaaseqarluta oqallisissiaq
susassaqartunut nalileqqinneqarnissaa inassutigissavarput.
Maliinannguaq
Markussen-Mølgaard, Inuit Ataqatigiit.
Qujanaq
Nuannaarutigaara partiit Kattusseqatigiillu siunnersuutiga taama
annertutigisumik, aammalu ersarissumik oqariartorfigimmassuk.Uanilu partiit
ataasiakkaat oqaaseqarfigissagukkit siullermik Siumumut oqaatigissavara Uani
maluginiarakku oqallinneq manna Siumut tungaaninnngaanniit inimi maani pisoq
kingunissalimmi pissappat, taava ini avataani innersuutariaqartoq. Aammalu
inuttaasut akornanni pisariaqarpoq, tamatumani iliuuseriniakkat sammissallugit
patsisissaqarnerunerarlugu.
Aap, tamaattoqarsinnaavoq aamma soorunami inuiaqatigiit akornanni
oqallinnissaq pisariaqartoq, aamma inuttut inissisimaneq aallaavigalugu,kisiat
uani aammalu tassani tunngatillugu. Atassumminngaanniit oqaatigineqartut
iserfigissagukkit, ilaatigut Atassutip naggasiinermini ilassilluarlugu
oqaaseqarnera qujassutigissavara.
Uanili ajuusaarutigivara, ilaatigut siunnersuutiga immaqa
paatsuuallaneqarsimasinnaammat. Tassami ilaatigut Naalakkersuisut
akissuteqarnerminni annertuumik massakkut suliaasimasut sammimmagit. Soorunami
aamma ajunngilaq imigassamik ajornartorsiuteqartut katsorsaaveqarnerat,
aammalu meeraanermi atornerlunneqarsimasut katsorsartinneqartalernerat. Taanna
qujanaqaaq ingerlammat, aamma pisariaqavissorpoq. Kisiat uani uanga sammisakka
tassaarpiaapput taakkuunngitsut, tassa imaappoq: Inuttut ineriartornermi,
meeraanermi immaqa imigassamik ajornartorsiuteqarfiunngikkaluartumi, aammalu
atornerlunneqanngikkaluarlutik, kisianni allamik ilungersunartunik
aqqusaagaqarsimasut inuppassuupput, aammalu inersimasunngorlutik immaqa
ingerlariaqqinnissaminut oqimaaloqutitut tarnimikku nassatariumaakkaminnik .Tassa
taakkorpiaat uani apeqqummi pivakka.
Taamaattumik piffissanngorsorisimavara, aamma oqaloqateqartarnikkut
saaffigisaqartarnikkullu maalunnarsisimammat. Oqareernittuut aamma
iseqqissumik Kattusseqatiit oqaaseqartuata oqarneratuut Qaqiffiit allaat
imigassamik ajornartorsiutilinnut naatsorsuussaagaluartut tamakkununnga
massakkut atortalersimaneri. Soorunalimi qujanaqaaq, kisianni
pisariaqartitsineq tassaniimmat, atsaat taakkua allaat atorneqalersimapput.
Tamaattumik oqallinnissami siunertarivippara uagut taanna pisariaqartitsineq
isiginngittuusaaginnassagipput.
Imaluunniit ingerlariaqqissagutta qanorpiaq ilusilimmik
ingerlariaqqisanersugut.
Tassanilu soorunami inuit ataasiakkaat maannakkutuut Kisimiinngilatikkut
allallu suliniuteqartut taakku innersuunneqarsinnaagaluarput, kisianni
isumaqarluinnaqqissaarpunga ilaatigut ajornartorsiutit ima
annertutigisinnaasartut, immaqa ilinniarsimasumik imaluunniit taamatut
katsorsaanissamik piginnaanngorsakkamik paaqqutarineqarnissaq, imaluunniit
aallunneqarnissaq pisariaqarvissortarluni.
Tamaattumik ilumoorluinnarpoq uani, aamma Inuit Ataqatigiit oqaaseqartuata
oqaaseqarnermini oqaatigimmagu ersarissumik, ilaatigut ullumikkut inuiaat
nukittuut pilersissagutsigit, aammalu ajornartorsiut nalaattaraluarneqartut
qaangerniarneri qaangerluarniassagutsigit. Taava pisariaqarluinnarpoq
inuiaqatigiit nukittuut pilersissagutsigit, taakkua aamma ajornartorsiutit
qaqilerlugit katsorsarnissaat.
Ilaatigut immaqa meeraanermi persuttaasarnerit, immaqaluunniit nappaammik
nappaatit pissutaallutik ajornartorsiorsimanerit, ajoqusersimanerit,
ajunaartoqarsimanera imaluunniit nuutsitaasimanermi misigisapiluit
assigiingitsorpassuusinnaapput. Immaqaluunniit inuusuttun-ngornermi
aqqusaarsimasat artornarsinnaasut inuunerup sinnerani kalikalaartuakkat inuit
imernissaanik qanillilernerulissitsisarpoq.
Massakkut periarfissaqartitsivugut, atsaat inuit nakkarluinnaraangata
imigassamut. Periarfissaqartitsivugut atornerlugaasimappata, kisiat taakku
sioqqullugit qanoq iliuuseqaraluarutta suli inuiaqatigiinnut
akikinnerulissagaluarpoq. Inuit imilinnginnerani patsisaasinnaasoq qamani
tarnimikkut pigisaat katsorsarsinnaasuugaluarutsigit siornarlugit, taava
tamaalilluta isumaqarpunga inuiaqatigiit nukittuut pilersissinnaagaluarigut.
Isumaqatigilluinnarpara aamma nuannaarutigivara Kattusseqatigiinniit Loretha
Hendriksenip tamakkiisumik tapersiinera, aammalu allaat katsorsaavinnik
pilersitsinissaq eqqartorlugu. Imak siunnersuuteqarninni
takorluunngikkaluarpara katsorsaaverpassuarnik pilersitsinissaq. Nalunaqaaq
imaassinnaavoq pisariaqartitsineq taama annertutigisoq, kisianni
periarfissanik ammaasinissaq.Iimmaqa paasineqarpat pisariaqartitsineq qanoq
annertutigisoq ,Inunnik Isumaginnittoqarfiit sinerissami
paasiniaaffigineqarsinnaapput, inunnit toqqaannartumik taakku
sammisaqartarmata aamma ajornartorsiutilinnik oqaloqateqartarlutik.
Pisariaqartitsineq qanoq annertutigisoq aallaavigalugu Namminersornerullutik
Oqartussat immaqa kommunillu suleqatigiillutik taamatut katsorsaasinnaasunik
angalaartunik pilersitsinikkut, imaluunniit allatigut aaqqissuusinikkut
iliuuseqartoqarsinnaavoq.Taamaalilluni inuit sumiikkaluartut, imaanngitsoq
massakkut tarnit pissusaannik ilisimasallit annertuumik amigaatigivagut.
Taakkulu soorunami piumanarnerugaluaqaat katsorsaasussatut, kisianni
ukiorpaalussuit aatsaat qaangiuppata immaqa nunarput tamakkerlugu taamatut
ilinniarsimasunik peqalersussaagatta. Inuttut ineriartormi tunngatillugu
katsorsaasinnaasunik arlaatigut immaqa ataatsimut pikkorissaasarnikkut
tamakkua sinerissami inissinneqarsinnaagaluarput. Tamaaliluni sumiiffinni
ajornartorsiutit ikinnerulerlutillu aamma inuit piumassuseqarluartut
kinaluunniit inuk artorsaateqanngittoq sulerusussuseqarnerusarpoq.
Nalunngilarput tamatta, aammalu nukittunerusarluni ingerlariaqqinnissaminut
sunik artorsaatinik naammattuuigaangami.
Tamaattumik nuannaarutigissavara, aamma piffissaq kingulleq
oqallisigineqarmat taanna
tusagassiutitigut aammalu tapersiisut tassunga tunngasumik allaqarmata.
Tassa nuannaarutigivara qujassutigivara ataasiakkaat oqaaseqarnerinut aammalu
uani Siumut oqaaseqartuanut soorlu pinaveersaartitsinermi peqatigiiffiusut
eqqartorneqarmata.
Aap, tamakku aamma soorlu Sorlak-kut suliniarneri taakku qujanaqaat,
kisianni aamma taakkorpiaat neriuppunga paasineqarsimassasut taakkua
pinnginnakkit, kisiat inuit ataasiakkaat katsorsarneqarnissaminnut
pisariaqartitsisut tassani siunnersuumi pineqarmata. Neriuppunga uku aamma
aallaavigalugit tigussaasumik aaliangiiffissatut siunnersuuteqarnissamik
periarfissaqalerumaartugut, aamma soorlu taamatut Inuit Ataqatigiit
oqaaseqartua ersarissumik aammalu kusanartumik paasinartumik oqaaseqarmat
nuannaarutigalugu isumaqatigilluinnarpara,
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Maliinannguaq Markussen-Mølgaradimut qujanaq.
Taavalu tullinnguuppoq Peqqinnissamut avatangiisinullu Naalakkersuisoq
Alfred Jakobsen.
Alfred
Jakobsen, Peqqinnissamut
Avatangiisinullu Naalakkersuisoq, Inuit Ataqatigiit.
Quajanaq
Naalakkersuisut sinnerlugu siunnersuuteqartoq aammalu siunnersuutaa pillugu
oqaaseqartut qutsavigerusuppakka.Siullermik.tassa Naalakkersuisunik
pingaaruteqarluinnartutut isigaarput peqqissumik inuuneqartuarnissarput.
Tamaaliornitigummi inuiaqatigiittut nukittuneruluta nunarput
namminiileriartortoq aamma peqataaffigisinnaassagatsigu.
Oqaaseqartut oqariartuutaat imartoqisut aammalu sukumeeqisut annerusumik
immikkoortitaarlugit oqaaseqarfigeqqinngikkaluarlugit, oqaatigerusuppara
Naalakkersuisuni suliniutigut suli pitsaanerulersinniarlugit, aamma suli
erserissaneralugit suliniaqqinnissatsinnut maani oqaaseqartut ilaatigut
oqariartuuteqarmata. Tamannalu qutsavigaarput.
Assortorneqarsinnaanngilaq nunatta ukiuni kingullerni, assersuutigalugu
100-ni ineriartupiloorsimanera. Immaqa allaat inuiaat allat ukiut 100-kkaat
arlallit aqqusaaqqaarlugit uatsituulli siuarsimatigilersimagaluartut.
Tamaattumik inuiaqatigiinni tamatta immitsinnut pisariaqartippugut, immaqalu
aatsaat taamak ukiuni makkunani immitsinnut pisariaqartilernikuuvugut.
Aammattaq inuuiaqatigiinni peqatigiiffippassuarni allatigullu
suliniuteqartuartut nuannaarutigeqaarput, aammalu qujamasuutigeqaarput
taamatut inuiaqatigiit akornanni suliniartuarnerani. Susassaqatigiinnitsigummi
immitsinnut nukittunerulersinnaajuarpugut tassalu Naalakkersuisuni
paasinninnerput tunngavigalu apeqquteqaat tunngavigalugu imaluunniit
apeqquteqaat aallaavigalugu oqallinnissami siunnersuut manna taamatut
maannamut oqallisigineqarmat, aamma oqallinnerup takutikkaa ilumut
misissuinissaq pisariaqartinneqartoq.
Misissuinissallu tamatuma qanoq iluseqartumik qaqugukkullu pissanersoq suli
erseqqinnerusumik paaserusunnarpoq. Naggataatigut pinaveersaartitsinermi
suliallit aamma allatigut inuluugisarpassuagut sinerissamiittut
qularnanngitsumik oqallinnermi manna soqutigalugu malinnaaffigaat,
utaqqimaarlugulu suut oqariartuutigineqassanersut.
Tassa siulittaasoqarfiup siunnersuut manna taamatut Peqqinnissamut
Avatangiisinullu Naalakkersuisoqarfimmut akisussanngortillugu
ingerlateqqissimavara. Imaanngikkaluarpoq Naalakkersuisunit paatsuuineq
tunngavigalugu taamatut akineqarnissaat, tassani inissinneqarsimasoq. Kisianni
soorunalimi aamma siunnersuutigisap qiterisaa imatut paasivarput tassaasoq
-oqallinneq manna tunngavigalugu.Ttaava misissuinissamit
pisariaqartitsisoqarnersoq taanna maani oqallinnerup takutissagaa.
Aamma isumaqarpunga, tamanna maannakkut uppernarsineqartoq. Tassalu
oqallinnerup aammalu oqaaseqartut isummersornerit tunngavigalugu
pinaveersaartitsineq tungaatigut allatigullu peqqissumik inuuneqarnissamik
tunngassuteqartut oqaaseqartut annertuumik oqaaseqarfigigaat.
Aamma tamatta nalunngilarput inuiaqatigiinni inuttut ajornartorsiutit
assigiinngitsut piujuartut. Taakkua sumi tamani ilisimatusarfigineqartuarlutik
ullumikkut sammineqartuarmata. Peqqinnissaqarfimmi sulisorpassuit tarnikkut
nakorsat allallu, Peqqinnissaqarfimmi inulerisut inunnik isumaginnittutut
ilinniarsimasut allatigullu inulersut meeqqerivinni ilaallu ilanngullugit.
Ilisimatusarsimasut inuttut ajornatorsiutit pillugit qanoq
katsorsarneqarsinnaaneranit tunngasumik assigiinngitsorpassuartigut ullumikkut
ilisimatusarnerit ingerlattuarpaat.
Tamakkununatigullu aamma inuiaqatigiittut uagut paasinninnerput
paasinnissinnaassuserpullu annertusartuarnissaa aamma pisariaqarpoq.
Ilinniartitaanerup maanna nunatsinni atuuttut inuleriffiusuni
ilinniartitaanerit imarisaatigut allatigullu qanoq
pitsanngoqqissinnaavagut.Tamakkuupput inuiaqatigiinni ineriartornitsinni aamma
saneqqussinnaanngisagut atugariaqagarpullu suli aamma
pitsanngorsatariaqakkagut.
Tassa taamatut oqaaseqarlunga, siunnersuuteqartoq qutsavigaara. Taamatut
oqallissaarummik siunnersuuteqarmat aammalu siunnersuummut akissuteqartut
sukumiisumik anertuumillu taamatut isummersornerat Naalakkersuisut sinnerlugit
qujassutigaara.
Ole
Lynge, Inatsisartut
Siulittaasuat, Inuit Ataqatigiit.
Aap,
Peqqinnissamut Avatangiisinullu Naalakkersuisumut qujanaq, taava
tullinnguuppoq Kultureqarnermut Ilinniartitaanermut Ilisimatusarnermut
Ilagiiqarnermullu Naalakkersuisoq Lise Skifte Lennert.
Lise
Skifte Lennert, Kultureqarnermut
Ilinniartitaanermut Ilisimatusarnermut Ilageeqarnermullu Naalakkersuisoq,
Siumut.
Qujanaq
Partiit
oqaaseqartuisa arlallit perorsaanermut kiisalu aamma ilinniartitaanermut
atuartitaanermullu tunngasunik qaqitsimmata isumaqarpunga pissusissamisoortoq
taakkua oqaaseqarfigilaassallugit, kisianni taanna pitinnagu
siunnersuuteqartumut Maliinannguaq Markussen- Mølgaardimut taamatut una
oqallisissatut qaqimmagu soorunami uanga inulerisut pisortaqarfiit aamma
ilagimmannga, taanna nuannaarutigivara, kiisalu neriuutigalugu taamatut
pisortaqarfiit pingasuulluta inulerisut suleqatigiinnitsinni aamma taanna
piffissami qaninnermi qaqissinnaajumaarlugu. Taavalu qanoq ililluta
ingerlariaqqinnissarput tamaalilluta isumaqatiginniutigisinnaajumaarlugu.
Aamma taamatut paasivara Alfred Jakobseni akissuteqarnermini soorlu aqqutissaq
taanna atorsinnaagipput atutsiaraa.
Taava
Siumut oqaaseqartuanut Anders Andreassenimut taamatut saqqummiummagu Siumumii
isumaqatigalugu. Uagut nammineq peqqissumik inuuneqarnissatsinnik Siumut
tikkuussiniarnera. Aammalu una pingaartumik angajoqqaanut perorsaasutut
akisussaasuseq erseqqissaavigalugu. Isumaqarpunga taanna taamatut
erseqqissumik Siumuminngaanniit nalunaarutigineqarmat taperserlugu. Aammalu
siunnersuuteqartumut taamatut erseqqissaateqarnerat kusagivara aammalu
tigulluarlugu. Suliniuteqarnissatsinniliu aamma eqqaamasassatut ilanngullugu.
Kiisalu
aamma Inuit Ataqatigiit oqaaseqartuannut Asii Chemnitz-Narupi erseqqissumik
ujartugaqarmat eqqarsaatigeqqullugu ilinniarnerit assigiinngitsut siunertaanut
ilaatinneqarsinnaassannginnersoq ,taamatut ilinniartut inuttut
ineriartornissaat ilinniarnerup nalaani aamma aallunneqarsinnaanissaa aamma
taanna tigulluarusuppara. Nalunnginnakku aamma ilinniagaqarfiit- ingammik
inuleriffiusut iluini suliniutigineqareersoq aammalu
piviusunngortinneqareersut.
Taakkua
ingerlatat tassa aamma inerititaat tassami pitsaanerusinnaagaluartut,
kisiannili nalunnginnakku aamma ineriartortitsisoqartoq.
Silarsuarmioqatigiinnerput aamma eqqarsaatigalugu soorunalimi aamma nunatta
iluani pisutsit eqqarsaatigalugit ajunngivissunik ineriartortitaqartoqartoq.
Kiisalu
aamma oqaatigisinnaagakku una massakkut meeqqat atuarfianni peqqussutissamik
suliniuteqanitsinni maani inimi siullermeeriikkatsinnik upernaamullu
nangitassatsinnik, taassuma iluani kapitali aappaani, sisamaanilu immikkut
taanna inuttut ineriartortitsinissaq sammisassat annertuut tallimaasut
ilagimmassuk, taamaammallu tassa tassani peqqussutissami eqqarsaatigineqarpoq
annertoorujussuarmik meeqqat atuarfiata ineriartortinnissaata iluani
sammisassat annertuut tallimat ilagigaat atualernerminngaanniik atuarnerup
naammassinissaata tungaanut. Taamaalilluta tassa suleqataavugut inuttut
ineriartortitsinissap iluani meeqqat mikineraninngaanniik ilinniartissallugit
paasitinniassallugillu aamma, taassuma iluani ineriartornissaq qanoq
pingaaruteqartartigisoq.
Kiisalu
aamma naggasiullugu eqqaarusuppara soorunami aamma Højskoletsinni taasuma
iluani qinigassatut aammalu sunngiffimmi atuartitsinerup iluani
neqeroorutaareersut aamma inuit kikkulluunniit taakkua
periarfissaqarfigimmatigit atussallugit, toqqaaffigissallugillu.
Qujanaq.
Anthon
Frederiksen, ataatsimiinnermik
aqutsisoq, Siulittaasoqarfimmi ilaasortaq, Kattusseqatigiit.
Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisumut
qujavugut.
Tullinnguuttoq aappassaaniileravit - 10 minutter.
Asii
Chemnitz-Narup, Inuit
Ataqatigiit.
Siumup
oqaaseqartua Anders Andreassen saqqummiussaanut oqaaseqalaarusullunga maannga
qaqeqqippunga aamma oqaaseqarfigineqartut allat oqaaseqarfigilaarusullugit.
Tassa maluginiartarparput Inuit Ataqatigiinninngaanniit assigiinngitsutigut
inuttut ajornartorsiut, ilaqutariittullu ajornartorsiutit eqqartorneqaraangata
taava pingaartittartorujussuuarsi Siumut tungaaninngaanniit erseqqissassallugu
akisussaaffik angajoqqaaniimmat. Taanna aamma tamanna pillugu
assortorneqanngisaannarpusi.
Soorunami
taamaammanuna una qulequtaq pingaaruteqartorujussuusoq imatut paasillugu,
uagut akisussaaffiiarnianngilluinnarpagut angajoqqaat, kisiannili isumaqaratta
nassuerutigisariaqartoq angajoqqaarpassuaqarmat aamma killiffeqartartut
pitsaasumik angajoqqaajunissaminut nukissaaruttarlutik.
Aamma
imaaginnanngitsoq imigassamik ajornartorsiuteqartut akornanni, kisianni aamma
uagut nammineq angajoqqaajulluta perorsaanitsinni akimmiffeqartarpugut
aporfeqartarpugut. Ilaatigut taakku aporfiit uagut nammineq inuunerisatsinni
aqqusaarsimanitsinni sorlaqartarput.
Taamaattumik
atorfissaqartinneqartarpoq tamakkua akimmiffiit sorlai sumiinnersut
ujartussallugit, tamannalu pisinnaavoq allanik oqaloqateqarnikkut
angajoqqaanik allanik aamma oqaloqateqarnikkut. Taamaattumik angajoqqaat
pitsaasumik, angajoqqaat akisussaaffimminnik naammassinnissinnaassappata taava
pisariaqartarpoq aamma assigiinngitsutigut ikorfartuutaasinnaasunik
neqerooruteqarnissaq. Taamaattumik aamma taannaluunniit eqqarsaatigalugu
Malinnannguaq Markussen-Mølgaardip oqaluuserisassanngortitaa
pingaaruteqartorujussuuvoq.
Aamma
soqutiginarpoq siunissamut takorluukkat Naalakkersuisut saqqummiussaat siorna
qimerlooqqissallugu, tassani immikkut naggataatungaani angajoqqaat
akisussaaffianni tunngasumik allaaserisaqarput Naalakkersuisut aamma
naqissuseqqillugu angajoqqaat akisussaaffeqarmata annertuumik. Aap
taamaalluinnarpoq aamma tassani Naalakkersuisut oqallisissiaani ilaqutariinni
tunngassuteqartut, ilaqutariillu akisussaaffiat immikkut allaaserineqarmat
soqutiginarpoq, taamaattumik ilumut taanna anguniarlugu siunnerfeqarsimappata
Naalakkersuisut, taava Malinnannguaq Markussen-Mølgaardip
oqaluuserisassanngortitaa aamma qimerlooqqittariaqarpoq. Tassani
iluatinnaqimmat sakkussaammat aamma ilaqutariinni angajoqqaanillu
ikorfartuinermut.
Taava
Siumuminngaannit aamma oqaatigineqarpoq Ilagiit kalaallit annertuumik
suleqataareersut inuiaqatigiinni ajornartorsiutit assigiinngitsut
qaangerniarneranni - aap, taamaappoq. Soqutiginartorujussuuvoq
oqaluuserissallugu ilagiinnut naatsorsuutigisinnaasagut suuppat.
Nalunngilarput
massakkut annertuumik suleqataagaluarlutik, toqqaannartumik aperigaangatsigit
ilagiinni sulisuususi qanoq annertutigisumik suli nukissaqarpisi
suleqataanissamut, inooqatigiinnikkut pissutsit ajornartorsiutillu
eqqarsaatigalugit. Taava oqartarput, tassunga killeqarput tunniussinnaasagut
annerunngillat. Imaappoq, nalunaajaanermut - sapaammi naalagiartitsinermut,
ilagiinnilu toqqaannartumik suliassanut nukiit aamma annertoorujussuit
atorneqartarput.
Taamaattumik
nunarsuarmioqatigut qiviassugitsigit taava palasit allallu ilagiinni sulisut,
inuiaqatigiit akornanni sulisorujorujussuupput. Aamma soqutiginassagaluarpoq
siunissaq ungasinnerusoq eqqarsaatigalugu nunatsinni ilagiinni sulisut,
allatut sulilersinnaasuugaluaraanni, taava taamaalilluni nukiit suli
amerlanerusut inuttut ajornatorsiutini qaangiiniarnissamut
isumalluutigilersinnaagaluaratsigit.
Peqqinnissamut
Naalakkersuisoq Maliinannguaq Markussen-Mølgaardip oqariartuutaa
paasilluarsimammagu ilumut qujanaqaaq, immaqa naatsuararsuarmik eqikkarlugu
oqaatigissagutsigu Maliinannguaq Markussen-Mølgaardip siunertarivaa una,
tarneq peqqissoq timimi peqqissumi, taavalu inuttut ineriartorneq tassani
aamma sakkussaavoq pitsaasoq.
Paasisorivara
aamma Naalakkersuisut pisariaqartitsinerup qanoq annertutigineranik
misissuititsiumallutik, tamanna qujanaqaaq. Tassanngaanniit
ingerlariaqqilerutta aamma pisariaqassooq oqallisigissallugu periuseq,
suleriaaseq, kalaallit nunatsinni tulluartoq qanoq ittoq
ineriartortissinnaavarput.
Ilisimaneqarpoq
aamma Canadakunni Alaskakunnilu kalaaleqatigut tasamaniittut aamma
toqqaannarnerusumik sorlaqarfimminninngaanniit periutsinik
ineriartortitsillutik imminnut ikiortartut. Taamaattumik uagut qallunaat
nunaannut, nunanut avannarlernut qiviaqqajaanerput taanna unikaallatseriarlugu
kimmut qiviarluta suleqatissarsiornissarput aamma piffissanngorpoq. Kulturit
kingornussarsiagut tammaqqajaasutut ittartut aamma taakkua toqqammavigalugit
ineriartortitsinissaq pingaaruteqarsorivarput.
Taava
naggasiutigalugu Atassutikkormiunut oqaatigilaarusuppara Malinnannguaq
Markussen-Mølgaardip oqaatigivaa ilumut Qaqiffimmut aamma Qaqiffikkoorlugu
katsorsartittoqartartoq, naak imigassamik ajornartorsiuteqanngikkaluarlutik.
Allamik periarfissaqanngikkaanni. Aap, taanna ajunngilaq, kisianni
pingaaruteqarpoq aamma ajornartorsiutit assigiinngitsut tassung
ajornartorsiummut tulluaqqissaartumik naapertuuttumillu ikiorsiissutinik
ineriartortitsinissaq.
Taamaattumik
Malinnannguaq Markussen-Mølgarrdip eqqartugai aamma
pingaaruteqartorujussuupput immikkut neqerooruteqarfigissallugit.
Maliinannguup oqarneratuut taakkua siusissukkut neqerooruteqarfigigaanni
taanna atorluarneqarusussappallu, taanna immini ungasinnerusoq isigalugu
pinaveersaartitsinerummat.
Taamaattumik
suliniutit tamakkua iluatinnaqaat. Qaqiffiit eqqartortillugit iluatsillugu
apeqqutigerusuppara Naalakkersuisunut 1999-imili Aningaasanut Inatsisissamut
siunnersuutip eqqartornerani Inuit Ataqatigiinninngaanniit oqaatigisimagatsigu
piffissanngorsoralugu Danmarkimut suleqateqarneq kipitinnissaanut. Massakkut
nunatsinni katsorsaasut, katsorsaasutut ilinniarsimasut amerlaqimmata,
Frederiksberg Centerimi suleqateqarneq 2001-ip naajartornerani aamma
taamatinneqarsinnaasoq eqqaamallugu piumasaqarnikuugatta, suliap taassuma
sumummita killippa? Sumut killinneranik iluatsillugu apeqqutigilaassavarput.
Godmand
Rasmussen, Atassut.
Uanga
naatsukullannguamik tassa oqaatigeriissavara uanga doktorinngorniutinik
oqaaseqartartuunnginnama, takisuuliortartuunngilanga manna
doktorinngorniorfiunngimmat, naatsukkullassuarnik oqaaseqassuunga.
Siullermik
nuannaarutigivara saqqummiussisup Atassumminngaanniit oqaaseqaaterput
ilassilluarmagu, kisianni siullermik oqaatiginiarpara Kultureqarnermut
Naalakkersuisoq, naak tassunga attuumassuteqartumik
apeqquteqartoqanngikkaluarluni, partiinut allanut oqaaseqarnermini Atassutip
oqaaseqaataanulluunniit taasaqanngimmat. Allaanngivippoq uagut
oqariartuutiginiartakkavut tusaaniarneqartanngitsut imaluunniit
qarsupiinnarneqartarsimanerpat. Uani erseqqissumik taavara 12. oktober
ajornartorsiutit imak atsigilersimammat Sisimiuni atuartut, atuarfinni
anginerni marlunni akerliussutsimik takutitsillutik naamaarniartarneq,
ikiaroornartoq, imigassarlu pillugit akerliulluni takutitsisimanerat.
Naatsorsuutigigaluarparput periarfissaq manna iluatsillugu aamma taanna
oqaaseqarfigilaarsinnaassagaluaraat partiit allat ilassilerakkit.
Maliinannguaq
Markussen-Mølgaardi oqaaseqarmat uani kingullermi oqaluttarfimmiinermini
assut nuannarivara oqaaseq atormagu, Naalakkersuisunngooq akissutaat soorlu
uagut immaqa atuarsimapajaanngitsungajattut nipilerlugu, imaluunniit killormut
saatingajalluinnarlugu oqaaseqarmat oqarfigissavara, uanga ileqqorinngilara
oqaaseqartussaatillunga Naalakkersuisut akissutaat utaqqeqqaartarlugit. Uanga
inuttut aamma partiima oqariartuutaa aserorusunneq ajorpara. Ileqqorinngilara
Naalakkersuisut akissutaanik utaqqeqqaartarneq, taamatut iliuuseqassaguma
uanga nammineq misigissutikkut aninniakkakka ajutoortinneqassapput. Tassa
taanna eqqaasissutigilaaginnarniarpara.
Qaqiffik
1995-imi ammarmalli,1995-iminngaannit 1999-imut nalunaarut naapertorlugu inuit
240-t kattorsartissimapput. Taakkunanngalu 36-t ajoraluartumik
qaqisinngitsoorsimalluti.
Taamaattumik
assortuutigissagunanngilarput taamatut katsorsaariaatsimut tunngatillugu
nunatsinni siammasinnerusumik soorlu aamma oqartutit tamavissuarmik taamatut
pilersinneqarsinnaanerat orniginanngilaq, kisianni ilumoorpoq tassuuna
isumaqatigilluinnaqqissaarpakkit kommunit ilaanni aamma akuersaanngitsunik
ajoraluartumik kommuneqartarpoq Qaqiffiliarniartunik, inunnik
ajornartorsiuteqartunik. Taannalu isumaqarpunga aaqqinniassallugu siunissami
pitsaasuusoq, kisianni ilumoortoq uani aamma aatsaannguaq oqaatigineqarpoq
soorlu Asii Chemnintz-Narupip oqaaseqarnermini issuarpaa, oqaatsit tarneq
peqqissoq timimi.
Ilumooqqissaarpoq
taanna ajornanngippat inuiaqatigiit ilutsinni tamani atugaasariaqaraluarpoq,
kisianni ilumoortumik oqassaanga, oqallisissiamut attuumassuteqarluinnartoq
ikiaroornartoq tassani tikippara.
Inuiaqatigiinni
massakkut inuusuttunilu, meeqqanilu ilami allaat inersimasuni
annertoorujorujussuarmik atugaasoq tusaamavarput. Taamaattumik maani
itisilerniarneqanngippat itinerusumilluunniit oqallisaarusunngippat
neriorsuutigissavara uanga upernaamut taanna Inatsisartunut
saqqummiutissallugu. Tamaavitta ullumikkut uagut toqqorluta inuulerpugut,
immaqa inuit ilaannut soqutaarpianngikkaluartoq. Ikiaroornartup atugaanera
nunatsinni avaqqunneqarsinnaanani massakkut aarlerinartumik
ingerlatsilaalernikuuvugut. Taannalu qinikkani uagut sakkortuumik qanoq
iliuuseqarfiginngikkutsigu siunissami soorlu oqariartuutinni oqarpunga,
aarlerinartumut tassali pulasussaavugut, soorlu inuusuttut Sisimiuni
ippassaani atuartorpassuit akerliussutsimik takutitsinerminni ersersikkaat
siunissaminnut ersilerput.
Taamannaannaq
inuusoqassappat nunattalu namminersuleriartornera massakkut oqallisaasoq,
taava qaratsat qassit aserorsimassappat, ukiut qulit qaangiuppata? Tamanna
pakkersimaartariaqarparput.
Soorunami
uagut atornikuunnginnatsigu naluarput, takusimanagulu maani inimi
isersimasugut, kisianni taamaattoqarsinnaanngilaq ajornartorsiut taamak
angitigereersoq uagut aamma peqataaffigisariaqarparput maanimi
inatsiliortuugatta, kisianni saqqummiussisup uani oqaluuserisassanngortitaa
taanna tunngavimmigut assorujussuaq kusanarpoq aamma tassani
isumaqatigiilluinnaqqissaarpugut partiini tamani oqaaseqartuni.
Uanga
Siumut oqaaseqartua oqaaseqarfigerusunngilara, Kattusseqatigiillu nammineq
taakkua oqaaseqaqqissappata oqaaseqarfigiumaarmassuk.
Taamaattumik
uani siunnersuuteqartup siunnersuutigisaa isumaqarpunga arlalinnik
ajornartorsiutilinnik, soorlu imigassaannakkuunngitsoq soorluli oqaaseq aamma
kattoqittoortinneqaqattaartoq ikiaroornartoq, tassunga aamma
attuumasorujorujussuuvoq saqqummiussamut. Tamakku inuiaqatigiinni
ajornartorsiutigut tattoqisitsinngilluinnarluta anittarniartigit avammullu
siaruarterlugit aqqutaasinnaasunik ujaaseqatigiinngikkutta, inuiaqatigiinni
annaassiniarnerput killilerujussuusussaavoq.
Ole
Dorph, Isumaginninnermut
Suliffeqarnermullu Naalakkersuisoq, Siumut.
Naalakkersuisut
uunga oqallinnermut oqariartuutaat Peqqinnissamut Naalakkersuisuminngaanniit
anninneqareeraluartoq, kisianni aamma isumaginninneq maani oqallinnermi aamma
tikinneqarmat aammalu uanga inulerisunut ilaagama taamaattumik oqallinnermullu
malinnaallunga, annikitsunnguamik oqaaseqalaassaanga.
Tassa
siullermik nuannerpoq oqallinnerup matumap ingerlanneqarnera, ingerlaneralu.
Maliinannguup apeqqut soqutiginartoq tamatsinnut saqqummiuppaa, aamma imartooq
aammalu partiit oqaaseqartui tamarmik aammalu Kattusseqatigiit oqariartuutaat
annertupput, aamma taamatullu imartugipput.
Tassa
uani oqallinnermi malunnarpoq ajornartorsiut imaannaanngitsoq eqqartoripput,
ajornartorsiullu una imaaginnanngilaq maannakkut ingerlanitsinni tassa inuit
oqartarnitsitut suliffeqanngitsut allallu ajornartorsiuteqartut ulluinnarni
ajornartorsiutaat. Ajornartorsiutit massakkut pineqartoq aamma inunnik
atugarissaartunik ajornartorsiutaavoq, taamaattumillu sumi inissisimaneq
aallaaviginagu taanna ajornartorsiut massakkut oqallisigineqartoq atuuttoq
oqaatigineqarsinnaavoq.
Aamma
oqallinneq maannakkut maani ingerlanneqartoq soqutiginarpoq, aamma oqallinneq
suli oqaatigineqareertutut annertunerusumik ingerlanneqartariaqarpoq. Aammalu
ukiuni arlaqaqisuni taassumap pinissaa kissaatiginaqaaq.
Oqallissinnarluta
taava iliuuseqassaagut malunnaatilimmik, taanna matumap oqallinnerup
ingerlanerani malunnarpoq kissaatigineqartoq, aamma taamaattoqartariaqarpoq.
Oqallissinnarluta, oqallissinnarluta inerneqanngitsumik oqallinnerput
qatangiinnartissagutsigu taanna pissusissamisuunngilaq.
Aamma
maannakkut oqallinnerup takutippaa nunap iluani, nunatta iluani
ajornartorsiutit annertunerujussuarmik sammisariaqarivut. Nunap iluani -
nunatta ingerlanniarneqarneratigut assigiinngitsutigut ajornartorsiuteqarpugut,
taanna isertuunneqarsinnaanngilaq.
Ineriartorneq
nunatsinni ingerlanneqarsimasoq taanna sukkasimaqaaq, soorlu aamma
oqaaseqartut ilaasa oqaatigigaat uagut ukiut ikittuinnannguit atorsimasagut,
allani nunani ukiut untritillit arlallit atorlugit ingerlannikuuvaat.
Taamaattumik maani ajornartorsiutit atukkavut, tamatta ikioqatigiilluta
sapinngisamik aaqqiiviginiartariaqarpagut. Maannakkut nunarput inissisimanera
nalunngilarput ukiut 22-t missaat namminersornerulerneq ingerlannikuuvarput.
Massakkullu taassumap suli annertusarnissaa oqallisigalugu aallartippugut.
Kissaatigaarput naalagaaffeqatigiinnerup iluani suli annertunerusumik
namminersorneq alloriarfiginiarlutigu.
Tamannalu
iluatsissappat taava tamanna taamaallaat anguneqartariaqanngilaq nunatsinni
inuit atugarissaartut akornanni. Alloriarfik massakkut alloriarfiginiarlugu
oqallisigisarput, alloriarfigissagutsigu taava nunatsinni inooqataasut tamaasa
kalittariaqarpagut. Ataatsimilluunniit minitaqarutta taava annertunerusumik
angusaqarnavianngilagut.
Taamaatumik
makkua oqallinnermi saqqummiunneqartut tamaasa uangattaaq soqutigeqaakka.
Tassa maannakkut inuusuttuniit, meeqqanillu aallarteriarutta oqaatigineqarpoq
meeqqat inuusuttullu ullumikkut ulloq unnuarlu angerlarsimaffiini
inissinneqarsimasut 169-it missaaniittut. Taakkunanngalu meeqqat, inuusuttullu
50-it missaani suli utaqqisuniillutik, kisitsit annertuvoq aamma annertunera
taamaallaat angerlarsimaffinnik sanaartornikkut aaqqinneqarsinnaanngilaq,
tamanna tamatta takusinnavarput.
Arlaatigut
suliniutinik pilersitsisariaqarpugut, sakkussanik pilersitsisariaqarpugut,
katsorsaaneruna suli ajornartorsiut taanna qanoq ilillugu
qaangerniarsariniaripput. Aamma aningaasaannaat aqqutigalugit taanna suliassaq
qaangerneqarsinnaanngilaq. Imaappoq inuit tamatta inuiaqatigiit akornanni
sumiluunniit inissisimasugut akisussaaffeqarpugut, taassumap oqallisigisatta
sapinngisamik ajunngitsumik ingerlanniarneqarnissaa qaangissagutsigu.
Katsorsaaviit
ullumikkut marlussuit pigivagut, maani Nuummi taava aamma Ilulissani. Aamma
qanittukkut pilersinneqarpoq Ittoqqortoormiut eqqaani katsorsaavik, tappavani
ajornartorsiut aamma taassuma oqallisigineqarnera aallaavigalugu
pilersinneqarsimasoq.
Qujanartumik
katsorsaaviit taakku pilersinneqarsimasut imigassamik atornerluinermik
katsorsaanissaq siullermik kisiat aallaavigalugu pilersinneqarsimasut,
massakkut aamma oqaatigineqartutuut ikiaroornartunik ajornartorsiuteqartunut
katsorsaanermik aallartitsisimammata, allaat aamma inuit aningaasanik
pinnguartut Qaqiffigut naak suliassaqaraluaqalutik aamma inuit aningaasanik
pinnguarnermik immaqa "nappaateqalersimasut" aamma tamakkunani
katsorsarneqartalersimapput, taamaattumik pisariaqartitsineq tassuuna
takusinnavarput qanoq annertutigisoq.
Taamaattumik
suliniutip matumap oqallinneq aallaavigalugu aallartinneqarnissaanut uagut
maani Isumaginninnermi Pisortaqarfimminngaanniit tunuarsimaassanngilagut
akisussaaffimmik tiguseqataanissatsinnik. Aammalu Peqqinnissamik Pisortaqarfik,
Kultureqarnermut Pisortaqarfik aammalu Isumaginninnermut Pisortaqarfik
suleqatigiillutik ajornartorsiummik annertuumik maannakkut
aaqqiiniariarsinnaanissamut saariarnissaq oqallisigalugu aallartipparput,
aammalu manna ataatsimiinneq naammasseriarpat, tassa ukiaq manna ataatsimiineq
naammasseriarpat ajornartorsiutit tamakku maannakkut eqqartukkavut qanoq
ililluta suleqatigiilluta ikummarissaqqissinnaanerlutigit
oqaloqatigiissutigalugu aallartittussaavarput.
Taamaatumik
uumap oqallisigineqartup, oqallisigineqartumullu suleqataanissarput
taamaalillugu nalunaarutigissavara, aamma suliassaq annertummat tamatta
sumiluunniit inissisimagaluarutta taamaalilluta akisussaaqataanerput
pinngitsoornanta takutittariaqarparput.
Loritha Henriksen, Kattusseqatigiit.
Soorlu siullermik oqaaseqarninni eqqaagiga una suliassaq, suliassanngortitaasoq uagutsinnut katsorsaanissamik periarfissiinissaq annertoorujorujussuarmik inuiaqatigiinnut eqquisussaq tamatta nalunngilarput. Taamaattumik qujassutigaara uani Naalakkersuisut oqaaseqarmata, suliassaq tamakkiullugu suliarisariaqarnera qanoq pingaaruteqartigisoq, aammalu inuiaqatigiit ataatsimut suleqatigiinngikkutta suliassamut taamak annertutigisumut naammassiinissarput piaartumik angusinnaanngilarput.
Qaqiffiit eqqaaneranut oqaaseqaatinni tunngavigaakka ullumikkut inuppassuaqarmat Qaqiffikkut aatsaat aqqutiginnereernermikkut inuttut atugarliuutitik saqqumertittarmatigit. Ullumikkut inuiaqatigiit tamatta matoqqaqaagut aamma inuiaqatigiittut suli immitsinnut suliarinissarput nanisimanngilarput.
Taamaattumik aatsaat tassuuna Qaqiffikkut inuttut suliarilernermi ilaqutaasut aammalu immaqa qanigisat ajornatorsiutaat saqqummertarpoq. Taamaattumik ajornartorsiummik taassuminnga piaartumik aniguissagutta aammalu meeqqat ajornartorsiutillit kinguaavi pitsaasumik sullinneqassappata, isumaqarpunga tassani pinngitsoorneqarsinnaanngitsoq Qaqiffik aamma allillugu imaluunniit immikkoortortalerlugu, inuiaqatigiinnut taamaattunik suliniutissamik suliaqartariaqartoq.
Nalunngilarput kikkulluunniit imerajuttut imaluunniit ikiaroornartumik ajornartorsiuteqalertut, taakkuusarmata inuunerminni immaqa anigugassarinngisaminnik ikillit, taamaalillutillu allaat nammineq inuunerusutarinngikkaluaminnik aamma inuunissaminnut sangusarlutik. Taamaattumik taakku suleqatigiinnissaat aammalu attuumalluinnarneri tassani oqaatigerusullugu erseqqissarusuppara.
Ajornartorsiutit, tarneq tassani oqaluuserivarput. Inuttut ajornartorsiutigut tarnitsinniimmat tassuunalu aamma tarnerput suliarinngikkutsigu inuttut ajornartorsiutigut qaangersinnaannginnatsigit.
Anders Andreassen, Siumut.
Qujanaq - sivisunavianngilaq.
Neriuppunga, Siumuminngaanniit oqaaserisagut imatut paasineqassanngitsut maani siunnersuuteqartumut, siunnersuutaanut illuatungiliuttutut oqaaserineqartut, kisiannili tassaapput aqqutissat aqqutigineqarsinnaasut ilamininngui.
Ilumoorpoq una ajornartorsiut eqqartorneqartoq annertoorujussuuvoq, taamaattumillu imaaliinnarlugu katsorsaasinnaasumik pilersitsinissaq aamma anguneqarsinnaanngilaq. Taamaalisoqarpat qulaaninngaanniit naalakkiinertut isigisariaqassaaq.
Inuiaqatigiit oqallittariaqarput, angajoqqaat allallu oqallittariaqarput siullermik. Taakkulu aallaavigalugit pilersitsisinnaaneq imaluunniit katsorsaasinnaasunik pilersitsisinnaaneq siunnerfigineqarsinnaavoq, kisiannili pilinnginneranni assigiinngitsorpassuit aqqusaagassat aamma aqqusaaqqaartariaqarput.
Ilaatigut Siumut sinnerlugu oqaaseqarninni oqaatigaara kingunissalimmik oqallinneq pissappat taava inuiaqatigiit akornanni aamma oqallisaaniarli, tassanilu oqallinnermi aamma iliuuserisassat assigiinngitsut pissarsiarineqarsinnaapput.
Naggataatungaatigut aamma oqaatigivara ilaatigut aamma pikkorissaasarnernut, tassa kommunini sullissisut pikkorissarneqartarnerannut aningaasat atorneqartartut. Pikkorissaanerpassuit pisarsimapput, kisianni pikkorissartinneqartartut tamakkua aamma nalunngilagut ilaatigut suliffitsik qimattaraat, taamaalillutillu aamma pikkorissaasarnerit immaqa siunertarisaminnut tamakkiisumik atorneqarneratik allatut ajornartumik qimattariaqartarlutik, kisiannili angajoqqaat taakkua nikinnatik tassaniittuartarput ajornartorsiutillit.
Taamaattumik pikkorissaasarnerit allanngortittariaqarput, isumaqarpunga pikkorissaasarnerit ilaatigut sulisunut pikkorissaasarnerit ilaqartinneqartariaqartut angajoqqaat, taamatut nalaataqarsimasut pikkorissartitaanerannut ilanngullugit, ataatsimoortillugit taamaaligunik aatsaat inatsisinik tamatta ilisimatoorsuunngilagut, aamma angajoqqaat angajoqqaajusugut tamatta inatsisinik taamak annertutigisunik atugaqarniarnitsinni tamaasa ilisimanngilagut. Taamaattumillu pisariaqartitsisinnaasarpugut aamma sulisut kisiisa pikkorissartinnagit aamma angajoqqaat taamatut nalaaqartut pikkorissartitsinermi peqataatissallugit.
Taamaalippat aatsaat oqimaaqatigiissumik pikkorissartitsineqartut sulisut, angajoqqaallu imminnut naleqqunnerusumik ingerlaqqissinnaapput, aamma taamalippat isumaqarpunga ilaatigut allaat immaqa anguneqarsinnaagaluartoq katsorsaasinnaasumik pilersitsinngikkaluarluni, kisianni angajoqqaat paasinninnerulernerasigut pilersitsinissat pinngitsoortinneqarsinnaagaluartut.
Tassa pisariaqarluinnarpoq angajoqqaat peqataatinneqarnissaat, oqaluinnarsinnaanngilagut pikkorissartitsiniarta, kommunini sullissisunut pikkorissartitsiniarta, aap pikkorissartinneqartarput, kisianni sullitassagut taakkua aamma ilisimasassaannik tuninngikkutsigit pikkorissaanerit, qanorluunniit pikkoritsigigaluarutta aamma sunnerniarnissaat ajornakusoortussaassaaq.
Taamaammat ataatsimoortumik angajoqqaat, sulisullu pikkorissartinneqartarnissaat isumaqarpunga avaqqunneqarsinnaajunnaartoq.
Anthon Frederiksen, ataatsimiinnermik aqutsisoq, Siulittaasoqarfimmi ilaasortaq, Kattusseqatigiit.
Anders Andreassenimut qujanaq. Taava tullia pitinnagu eqqaasitsissutigilaassavara Inatsisartuni suleriaaserput malillugu una oqaluuserisaq aalajangiiffigineqartussaanngimmat aammalu partiit, Kattusseqatigiillu oqaluttui tamarmik aappassaaneerput minuttit qulit periarfissaritinneqartut atorlugit.
Alfred Jakobsen, Peqqinnissamut, Avatangiisinullu Naalakkersuisoq, Inuit Ataqatigiit.
Tassa Naalakkersuisut sinnerlugit erseqqissaatigeqqiinnassavara una siunnersuutip taamatut akineqarnissaa, taamatut iluseqartumik ingerlatseqqissimammagu, tassalu Peqqinnissamut Avatangiisinullu Naalakkersuisoqarfimminngaanniit akisassanngortillugu. Tassa Siulittaasoqarfiup taamatut innersuussuteqarnera tunngavigalugu taamatut akissuteqaat Naalakkersuisuninngaannit suliarisimavarput.
Aamma Atassutip oqaaseqartuata ilaatigut ikiaroornartumik ajornartorsiuteqarneq pillugu oqaaseqarnera taanna annertunerusumik maannakkut oqaaseqarfiginissaa pisariaqartutut isiginngilara, tassami uani siunnersuutip imarisarpiaa taanna pingaarnerutillugu Naalakkersuisuninngaanniit akissuteqaasiorsimagatta, aamma isumaqarpunga maannakkut amerlanerussuteqarluartut siunnersuut taamatut misissuinissamik kinguneqarnissaanik oqariartuuteqartut, taanna aamma paasilluaraat.
Taavalu Inuit Ataqatigiit oqaaseqartuata aamma Asii Chemnitz Narupip toqqartumik uannut apeqqutigivaa Frederiksberg Centerimik suleqateqarnitta qaqugu kipitinnissaa pissanersoq. Taassumunnga tunngatillugu oqaatigissavara tassa, soorlu akissuteqaatitsinni aamma ilaatigut eqqaagipput Naalakkersuisuni suleqatigiissitamik pilersitsisimavugut Katsorsaanermik, katsorsaariaaseq maannakkut Qaqiffimmi atorneqartoq, tassalu Frederiksberg Centeri suleqatigalugu ingerlanneqartoq Minnesotamodelimik taagorneqartoq. Taassumap qanorpiaq sunniuteqarnera, qanorpiaq iluaqutaanera misissorlugu ilaatigut suleqatigiissitami tassani ingerlakkatsigu, taavalu naatsorsuutigaarput novemberip qiteqqunnerani naajartorneraniluunniit suleqatigiissitap innersuussuteqarnissaa taanna piareerumaartoq.
Taamaattumik ilaatigut taanna tunngavigalugu Qaqiffimmik ingerlatsinitta Frederiksberg Centeri suleqatigalugu sivitsorallarnissaa, qanoq sivisutigisumik maannakorpiaq oqaatigisinnaanngilara, kisiannili aamma oqaatigerusullugu Qaqiffimmi taamatut katsorsaariaaseq, tassa imigassaannarmut tunngasuunngimmat.
Minnesotamodeli tassaavoq, aanngajaarnartunik assigiinngitsunik ajornartorsiuteqarneq tunngavigalugu katsorsaataasartoq - tassa ikiaroornartut, naamaarniutit, imigassaq, iisartakkat allatigullu tamakkunuunatigut ajornartorsiuteqartup qanoq katsorsarneqarnissaanik tassani katsorsaasarnerit Qaqiffimmi taamatut iluseqartumik ingerlanneqartarmata.
Tassa Naalakkersuisuni aamma uagut isuamaqarpugut ulloq manna tikillugu Qaqiffiit ingerlanneqarnerannik kinguneqartumik, aammalu Frederiksberg Centerip suleqatigineqarnerata kingunerisaanik immikkut imigassamik ajornartorsiortunut katsorsaasinnaasut, alkologinik taagorneqartut taakkua atorluartariaqaripput siunissami, taavalu apeqqutavoq ilumut qanoq iluseqartumik sunniuteqarnerusumik taakkua immikkut taamatut piginnaaneqalersimasut atorluarnerusinnaavagut, tassa ujartortuartariaqarparput katsorsaariaatsit nunatsinnut naleqqussarluakkat, pisariitsut, sunniuteqarnerusinnaasut taamaaliornitsigut aamma isumaga malillugu aningaasat killeqareeqisut atorsinnaasagut aamma atorluarnerusinnaanerat sunniuteqarnerusumik angulertorsinnaagatsigu.
Aamma isumaqarpunga oqaatigisariaqartoq tassa ilaatigut eqqaareeraluarlugu, kisianni erseqqissaqqittariaqartoq tassa kommunit assigiinngitsut manna tikillugu taamatut inuttut ajornartorsiutit assigiinngitsut atugaasut pillugit, qanoq iliuuseqartarnermikkut katsorsaanikkut allatigullu ikiorsiisarnermikkut ingerlataat qanoq misilittagaqarfigineqarnersut pillugit aamma taakkua isumaqarpunga misissuinisamut ilannguttariaqartut. Aammami oqaaseqartut arlallit ilaatigut taamatut oqariartuuteqarmata.
Isuamaqarpunga, pisariaqartoq suleriaatsit, katsorsaariaatsit il.il. suli ersarinnerusumik tigussaasunngortillugit qanoq ingerlateqqinnissaat inerisaqqinnissaat, siunissaq qaninnerusoq ungasinnerusorlu qiviarlugu taakkua misissuiffigilluartariaqaripput nalilersorluartariaqaripput. Taamaaliornitsigummi aamma immitsinnut pisariaqarteqatigiinnerput pisariaqaqimmammi, tassa taassumap nukittorsaqqinnissaa aamma suleriaatsitigut allatigullu eqaatsumik suleriaatsitigut inerisaaqqinnissarput tunngavissilluarlugu ingerlateqqissinnaassagatsigu.
Anthon Frederiksen, Siulittaasoqarfimmi ilaasortaq, ataatsimiinnermik aqutsisoq Kattusseqatigiit.
Tulliinnguuppoq siunnersuuteqartoq. Pingajussaaniileravit naatsunnguamik.
Maliinannguaq Markussen-Mølgaard, Inuit Ataqatigiit.
Aap, qujaasuteqaannarniatungaana. Siullermik kisianni una Atassutip oqaaseqartuanut Godmann Rasmussenimut oqaatigissavara paatsoornartumik oqaaseqarsimaguma utoqqatsissuunga, ilaatigut Naalakkersuisut akissutaanik oqarninni atuarsimanersutit, imaluunniit atuarsimannginnersutit tassani pinnginnakku, aamma taamatut isumalimmik oqarniannginnama, kisianni Naalakkersuisut akissutaanni ilaatigut annertuumik pineqaramik atornerlugaasimasut eqqartorneqaramik annertuumik, taavalu imigassamik, ikiaroornartumillu ajornartorsiutillit tassani suliniarfigineqarneri annertuumik eqqartorneqarlutik.
Taamaattumik erseqqissaatigiinnarpara una taakkorpiaat uanga pinnginnakkit siunnersuuteqarninni, kisiannili pillugit inuit tamakkuninnga ajornartorsiuteqanngikkaluarlutik allanik ajornartorsiuteqarlutik saaffissaaleqisartut, periarfissiorneqarnissaat. Ilaatigut immaqa massakkut periarfissanut - ajortorsiut aatsaat piuvikkaangat massakkut periarfissanik soorunami aamma ajunngeqisunik periarfissanik ineriartortitsisoqarpoq. Aamma soorlu imminoorniartut saaffiginnittarfissaannik pilersitsisoqarnikuuvoq, kisianni taakku allaat taamannak eqqarsalinnginnermiluunniit katsorsarneqarsimagaanni immaqa imminoornissaq, tamakkuninnga eqqarsarnissarluunniit ingalassimaartinneqarsinnaavoq katsorsarneqarsimagaanni artorsaatinik.
Tassa annertuumik taamaattumik pinaveersaartitsinermi taanna ilaavoq, aammalu isumaqarpunga ajornartorsiutit tamakkua inuup pilluarluni imminullu tatigaluni, iluarisimaarlunilu inuunissaralua ingalassimaartittaraat katsorsarneqarsimanngikkaangami.
Naggasiutigalugu Naalakkersuisunut pingasuusunut uummammik pisumik qujarusuppunga, taamak siunnersuutiga tigulluartigimmassuk aammalu suleriaqqinnissartik neriorsuutigimmassuk.
Qujanaq.
Lise Skifte Lennert, Kultureqarnermut, Ilinniartitaanermut Ilisimatusarnermut Ilageeqarnermullu Naalakkersuisoq, Siumut.
Naatsuarannguamik. Atassutip oqaaseqartuata Godmand Rasmussen uparuarmanga, soorlulusooq akisariaqarsimasaraluannik ularussisimasutut, tassunga imatut oqaaseqalaarusuppunga.
Naamik ularutinngilara, maluginiaqqissaarpara taamatut Sisimiuni tallimanngormat kingullermik pisimasoq, aammalu immikkut titartorlugu Pisortaqarfinnut oqqutassatut allallugu, kisiannili tassa massakkut akissuteqarfiginngilara pissutigalugu, Pisortaqarfinnut uterteriarlugu paasissutissanik pissarseqqaarlunga aatsaat qanoq iliuuseqarsinnaanerput imaluunniit nalunngikkaluarpara, tassa una Sisimiut Kommuniata akisussaaffigivaa atuarfiit taakkua pineqarmata, kisiannili tassunga atatillugu imatut oqarusullunga pinaveersaartitsineq aamma nalunnginnakku Sisimiut Kommuniani ukiorpaalunngortut pimoorussamik ingerlanneqarsimasoq, taamaammat tassa SSPK-mik taallugu ingerlassineq, tassa Atuarfeqarfiup, Politiit kiisalu aamma Pinerlutsaalisitsinerup iluani suleqatigiinneq ingerlanneqarsimasoq uanga nammineerlunga upperivara.
Tassani suliniutigineqartut pitsaaliuinerup iluani aallartinneqarsimasut aammalu ingerlalluarneqarsimasut illoqarfinni nunaqarfinnilu aamma ingerlanneqartut nalunnginnakkit. Tassa aqqutissat tamakku ilagimmatigit ukua ikiaroornartumut, aalakoornartunullu tunngatillugu inuusuttunut, meeqqanullu suliniarnitsinni ujartukkatta, aammalu pilerseriikkatta iluani atorluagassatta ilaat.
Taamaammat tassa taamaalillugu taanna akissuteqarfigerusuppara, ularutinnginnakku.
Loritha Henriksen, Kattusseqatigiit.
Naatsunnguamik, anillartiarninni Asii Chemnitz-Narupimut apeqqutigisara assorujussuaq soqutigalugu iserama apeqqutigisimavara qanoq Peqqinnissamut Naalakkersuisup akissuteqarfigineraa. Taava akissuteqarfigisimasaa paasivara isumaqatigiissuteqaqqittoqassasoq ukioq 2001-imi. Taakkua Danmarkimi ingerlatsisunut, kisiannili Finanslovimi ingerlaannarlugu misissorsimasara takussagukku allassimasoq ersarissumik takusinnaagakku, 2002-mi 1. januarimiit Qaqiffik nunatsinninngaanniit nammineq ingerlanneqalissasoq, tassani apererusuppara suna tunngavigalugu taamatut ingerlatsinissamik aalajangersimanersoq, aammalu misissuisimaneri qanoq naleqarsimanersut.
Isumaqarama aningaasat annertuumik maanngaannit nunatsinniit aallarunneqartartut, uagullu massakkut pikkorissunik peqareernerput takussutissaqareermat aamma suliamut tunniussimasunik aammalu sulerusuttunik. Isumaqarpunga taanna eqqartorneqaqqittariaqartoq.
Godmand
Rasmussen, Atassut.
Ilumut naatsuararsuuvoq. Tassaana nuannaajallutunga. Sisimiormiut assut
qutsappakka, maanngaannit ilumullimi aallaqqaammulli taanna oqaaseq
aninneqarsimagaluarpat pingajussaaneerlunga maannga qaqissanngikkaluarpunga.
Oqaaseqaqqaaramali taanna maqaasisimagakku. Sisimiormiut qutsappakka,
taamatut iliorsimanerat aamma Naalakkersuisuni massakkut aatsaat ujartuinikkut
nassuiarneqarmat, soqutiginngitsuusaanngilaagooq, kigartukutsoorsimavaa
titartorlugu, tassa qujanarpoq taamatut paasinnittoqarsinnaanera. Taava
Sisimiormiut paasiinnassavaat aamma qanoq iliuuseqarsimanersut maanngaanniit
inimik soqutigineqarsimanera. Qujanaq.
Anthon
Frederiksen, ataatsimiinnermik
aqutsisoq, Siulittaasoqarfimmi ilaasortaq, Kattusseqatigiit.
Illillu. Taava Naalakkersuisoq akissuteqalaassaaq naatsunnguamik.
Alfred
Jakobsen, Peqqinnissamut
Avatangiisinullu Naalakkersuisoq Inuit Ataqatigiit.
Tassa una siunnersuut immikkoortoq 53 - taanna pineqarmat, uanilu
ingerlatsisui ataasiakkaat immikkut sammineqanngimmata taamaattumik oqaaseqartut
ilaata toqqaannartumik apeqqutigisaa akisimavara, aammalu isumaqarpunga taanna
pillugu uunga siunnersuummut kaputartuunneqarnissaa pisariaqanngitsoq, kisianni
oqaatigerusussavara taamatut apeqquteqartoqarnera tunngavigalugu aamma immikkut
nassuiaammik suliarinnissinnaanerput taanna piareersimaffigigatsigu.
Anthon
Frederiksen, ataatsimiinnermik
aqutsisoq, Siulittaasoqarfimmi ilaasortaq, Kattusseqatigiit.
Tassalu taamaalilluni immikkoortoq 53 ullumikkut naammassineqarpoq.