Oqaluuserisassani immikkoortoq 58-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut sisamaat, pingasunngorneq septembarip 26-at 2001, nal. 13:40
Lars Sørensen, Inuit Ataqatigiit:
Tassa Kalaallit Nunaanni Inatsisartut suleriaasiaani § 32 naapertorlugu matumuuna aalajangiiffigisassatut siunnersuutigaara, 2002-mut aningaasanut inatsisissamut siunnersuummut Paamiuni suluusalinnut mittarfiliornissap sanaartornermut missingersuutinut ilanngunneqarnissaa.
Naalakkersuisut 2002-mut aningaasanut inatsisissamut siunnersuutaanni Paamiuni suluusalinnut mittarfiliornissaq pingajussaanik ukiunut marlunnut kinguartinneqarnissaanik siunnersuuteqarput.
Ilisimaneqartutut Paamiut Kommuneanni pingaartumik ukiuni kingullerni marlunni annertuumik inuutissarsiornikkut ineriartortoqarpoq. Tamatumani pingaarnertut aalisarneq eqqarsaatigalugu. Ajuusaarnaraluartumik imaatigut silaannakkullu angallannikkut ullumikkut pissutsit atuuttut akuersaarneqarsinnaanngitsut pissutigalugit pitsaanerusumik ineriartorsinnaaneq annertuumik tamatumani kinguarsarneqarpoq.
Tamanna tunngavigalugu siusinnerusukkut Inatsisartunit aalajangereerneqarnikuusoq, tassalu Paamiuni suluusalinnik mittarfiliornissap 2002-mi sanaartorlugu aallartineqarnissaanut siunnersuuteqarpunga. Sanaartorneq aallartereersoq naammassineqartariaqarmat.
Jørgen Wæver Johansen, Ineqarnermut, Attaveqarnermullu Pilersuinermullu Naalakkersuisoq, Siumut:
Immikkoortoq 58-imut tunngatillugu aamma ilisimatitsissutigissavara kalaallisoortaa agguaanneqareersimasoq kukkuneqarmat, kisianni inimi maani nutaaq agguaanneqarnikuuvoq.
Siunnersuummut tunngatillugu Naalakkersuisut akissuteqaataat imaappoq:
Paamiuni mittarfiup sananeqarnerata kinguartinneqarnissaanut Naalakkersuisut pissutigaat 799 meteriusumik mittarfiliornerup missingersuusiorneqarsimasunit 18,5 millioninik akisunerusussaanera.
Inatsisartut 1999-imi ukiakkut aalajangiinerat naapertorlugu mittarfiit pisariinnerusut sananeqarnissaat ingerlanneqarnissaallu kiisalu timmisartut minnerusut atorlugit timmisartuussisinnaaneq misissorneqalersimapput. Timmisartut minnerusut atorlugit Paamiunut siunissami timmisartuussisarnissaq eqqarsaatigalugu immaqa orniginarnerussaaq mittarfik pisariinnerusoq sananeqassappat.
Suut tamarmik allanngunngippata timmisartut minnerusut timmisartunit annerusunit akulikinnerusumik angalaarsinnaassapput. Sapaatit akunnerannut Paamiuniit ilaasartut agguaqatigiissillugu 16-iusarput tassungartartullu aamma taama amerlassuseqartarlutik. Tassa silaannakkut.
Mittarfiit timmisartunut minnerusunut atugassiat ingerlanneqarnerat mittarfiit timmisartunut annernut atugassiat ingerlanneqarneranniit akikinnerusoq paasinarsippat, taava suut tamarmik allannguuteqanngippata tamanna ilaasartut ataasiakkaat akikinnerusumik ilaasalernerannik kinguneqassaaq.
Suliaq kinguartinneqartussanngorlugu aalajangiisoqarpat soorunami Paamiut sivisunerusumik qulimiguullit atorlugit timmisartuussivigineqassaaq. Taamaammallu Naalakkersuisut 2002-mut Inatsisartut aningaasanut inatsisissaannut siunnersuummut ilannguppaat Grønlandsflyp S61-iutaata sapaatit akunnerannut angalasarnerisa ilaneqarnissaat, taamaalilluni 1. januar 2002 aallarnerfigalugu Paamiut sapaatit akunnerannut marloriarlutik helikopterimik tikinneqartalissallutik.
Ataatsimiinnermi matumani nassuiaat agguaaneqarumaarpoq, tassuunalu angallannikkut attaveqaatinut aningaasaliisoqaqqissappat tamatuma kingunerisassai Inatsisartut nassuiarneqarnissaat siunertarineqarpoq. Nassuiaatikkut tassuuna aamma mittarfiit minnerusut timmisartullu minnerusut atorneqarpata suut periarfissaanersut aammalu suut piumasaaqaataanersut nassuiarneqassapput. Angallannikkut attaveqaatinut aningaasaliinerit nutaat sapinngisamik ataqatigiisssaarneqarnissaat Naalakkersuisut pingaartutut isigaat, taamaammallu aningaasaliinerit ataasiakkaat pipallattumik aalajangiiffigineqannginnissaat pingaartillugu.
Taamaatuminguna Inatsisartunut Ilaasortap Lars Sørensenip siunnersuutaa Naalakkersuisut maannakkorpiaq tapersersorsinnaanngikkaat.
Naalakkersuisut siunnersuutigerusuppaat qinikkat, angalatitseqatigiiffiit allallu nassuiaat tassanilu nalunaarusiat sukumiisumik misissussagaat, tamatumani siunertaralugu kingusinnerusukkut angallannikkut attaveqaasiorneq pillugu siunnersuutinik aalajangersimasunik siunnersuuteqarsinnaanissaq siunertaralugu oqallinnissaq.
Qujanaq.
Lars-Karl Jensen, Siulittaasoqarfimmi ilaasortaq, Siumut:
Taava partiit, Kattusseqatigiit, attaviitsullu oqaaseqartuinut ingerlaqqippugut, siullermik:
Mikael Petersen, Siumup oqaaseqartua:
Qujanaq. Inatsisartuni ilaasortap Lars Sørensenip 2002-mut Inatsisartut
aningaasanut inatsisissamut Paamiuni suluusalinnut mittarfiliassap
ilanngunneqarnissaanut siunnersuutaa Siumumiit paasilluarparput.
Paamiuni suluusalinnut mittarfiliortoqarnissaa nunarput tamakkerlugu
suluusalinnut mittarfiliortitsinermi pilersaarummut ilaareerpoq. Taassumali
sanallugu aallartinnissaani 1999-miit 2002-mut tassa aappagumut
kinguartinneqarluni, nalilersueqqinnissat pisariaqartinneqarmata.
Massakkullu 2002-mut aningaasanut inatsisissatut siunnersuutikkut
Naalakkersuisut siunnersuutigaat Paamiuni mittarfiliassap suli ukiuni
marlunni kinguarteqqinnissaa. Tassa 2004-mi aatsaat sananeqartussanngorlugu
siunnersuutigalugu.
Siumumi isumaqarpugut Paamiuni mittarfiliassatut pilersaarutaasup
piviusunngortinnissaa Inatsisartut aalajangiuttariaqaripput. Paamiunimi
mittarfissaq sanassasoq siusinnerusukkulli aalajangerneqareerpoq. Nunatsinni
timmisartumik angallannikkut ataqatigiissaarluakkamik sineriapput tamakkerlugu
aaqqissuussineq naammassineqarsinnaaqqullugu.
Naluneqanngitsutut Paamiuni mittarfiliassap, imaluunniit Paamiuni
mittarfiliassaq pillugu nalilersueqqissaarnerit ingerlanneqarsimapput.
Paasinarporlu Naalakkersuisut siunnerfigigaat Paamiuni mittarfissap
pilersaarutaasunit pisariinnerusumik naammassiniarnissaa. Tassami massakkumut
sanaartugassamut neqerooruteqartitsinermi neqeroorutaasut akisuallaarsimam-
mata.
Taamaattumik Siumumiit isumaqarpugut Paamiuni mittarfiliassaq
pisariinnerusumik akikinnerusumillu suliarineqarluni
naammassiniarneqarsinnaappat taava taamaaliortoqarsinnaasariaqartoq.
2002-imut aningaasanik inatsisissatut Naalakkersuisut siunnersuutaat
sukangareeraluartoq Siumumiit innersuussutigissavarput aningaasanut
inatsisissap aningaasaqarnermut ataatsimiititaliami suliarineqarnerani
sanaartugassanut tulleriiarinermi periarfissarsiuunneqassasoq. Paamiuni
mittarfissap saneqarluni aallartinnissaata siuartinneqarsinnanera
piviusunngortissinnaajumallugu.
Godmand Rasmussen, Atassutip oqaaseqartua:
Inatsisartunut ilaasortaq Lars Sørensen suluusalinnut mittarfissap
sanaartornermi missingersuutinut ilanngunneqarnissaanut siunnersuutaanut
Atassummiit qulaani pineqartumik imaattumik oqaaseqaateqassaagut.
Pineqartumi saqqummiussisoq tupinnanngitsumik missingersuutinut
ilanngussinissamut kissaateqarnera assortoruminaarpoq. Pineqartormi
inatsisartuni siusinnerusukkut akuerisaareernikuummat. Pineqartumullu
Atassutip akuersaaqataareersimanini matorusunngilaa. Ilami
takornartariunnaarparput inatsisartuni akuereriikkat Naalakkersuisunit
allanngortinneqartalerneri.
Taamaaliornikkummi illoqarfimmi pineqartumi, pingaartumik
saqqummiussisimasumut suliassap akuerineqarnerata
tulluusimaarutigineqartarnera ikerinnakkut peerneqaraangat
nuannertanngikkaluaqaaq. Pineqartormi ukiuni arlaqalersuni
eqqartorneqartareersimavoq. Kujataani angallanneq eqqarsaatigissagaanni
mittarfiup atulerneratigut kujammut avannamullu angalanerup
aqqusaartorlualersussaavaa. Pineqartunullu angallanneq eqaannerusumik
ingerlalissalluni.
Qasseeriaqaluta tusartuarparput ilisimaaralugulu Paamiut silaannakkut
tikinneqartarnerat kipiluttunartorujussuusoq. Mittarfiullu atulerneratigut
ilaasunik kiffartuussineq pitsanngoriaateqassaaq. Saqqummiunneqartoq
Atassutip akuerseqataaffigereersimagamiuk piviusunngortinneqarnissaanut
aammattaaq suleqataajumavoq.
Atassummiit oqaaseqarluta saqqummiunneqartoq tunngaviatigut taperserparput.
Johan-Lund Olsen, Inuit Ataqatigiit oqaaseqartuat:
Aap qujanaq. Siunnersuuteqartup oqareerneratut Paamiuni suluusalinnut
mittarfiliornissaq siusinnerusukkut inatsisartuni aalajangerneqareersimavoq.
Aallartinneqareersimavorlumi ilisimaneqartutuummi mittafittaassap tungaanut
maanna aamma aqqusiniortoqalereersimalerpoq.
Siunnersuuteqartup Lars Sørensenip maani kissaatigivaa Inatsisartut
aalajangiussereernerat malillugu Paamiuni mittarfiliornissaq
kinguartinneqaqqigani sanaartortoqaqqinnissaa ingerlatinneqaqqissasoq. Inuit
Ataqatigiit tamanna paasilluarsinnaavarput, ingammik Paamiut kommuniannit
inuutissarsiornikkut ukiuni kingullerni ilorraap tungaanut ineriartortoqarnera
aamma eqqarsaatigigaanni.
Imaatigulli silaannakkullu angalaniarnikkut pissutsit ullumikkutut
ingerlaannassappata aarlequtigineqarsinnaavoq aningaasarsiornikkut pitsaasumik
ineriartortoqalersimanera akimmisaartinneqalissasoq, Inuit Ataqatigiit tamanna
kissaatiginngilarput.
Nunatta siammasissumik ineriartortitsivigineqarnissaa minnerunngitsumilli
inuutissarsiornikkut siuariartorfiusuni unikaallatsitsisoqarsinnaanera
pinaveersimatinniarumallugu inassutigissavarput Inatsisartut siornatigut
aalajangereersimanerat najoqqutaralugu Paamiuni suluusalinnut
mittarfiliornissaq 2002-mi sanaartornermut missingersuutinut
ilanngutitinniarneqassasoq 2002-mullu aningaasanut inatsisissanut
siunnersuutip inatsisartuni suliarineqarnissaanut atatillugu
tulleriissaarinissamik aamma ilaatinneqalissasoq.
Mogens Kleist, Kattusseqatigiit oqaaseqartuat:
Lars Sørensenip aalajangiiffigisassatut siunnersuutaanut
Kattusseqatigiinniit imatut oqaaseqaateqassaagut.
Ukioq kingulleq oqaaseqaatigisimasagut innersuussutigalugit matumuuna
ersarissaqqissavarput nunatta aningaasaqarniarnerata inissisimanera
tunngavigalugit pilersaarusiornerit tulleriiaarinerillu
ingerlanneqartariaqarmata. Ajuusaarnarporlu Inatsisartut ukioq kingulleq
amerlanerussuteqartut aalajangigaat Naalakkersuisuniit unitsinneqarsimammata.
Pilersaarutit piviusuniit aningaasartassai annertunerummata.
Ilanngullugu oqaatigissavarput 1995-imi Inatsisartut aalajangiimmata
mittarfiit arfineq marluk sananeqassasut inuiaqatigiinnut silaannakkut
angallannerup akikinnerulernissaa siunertaralugu. Ullumikkullu malunnarsivoq
pilersaarutit kusanaraluartut akissaajaatit annertuallaartut. Tassa
ingerlatsinermut aningaasartuutit qaffakkiartorsimammata. Billetit aammattaaq
akii qaffassimallutik. Aammattaaq Mittarfeqarfinnut tapiissutaasartut
appartinneri pissutaaqataapput.
Tamatumap takutippaa ersersillugulu pilersaarusiornerlunnerup
piviusorpalaannginnera. Ullumikkut inuiaqatigiinnut annertuumik
aningaasartuutaalersimapput Mittarfiit ingerlanneqarneri.
Naalakkersuisup akissuteqaataa tusaatissatut tigussavarput.
Pissanngatigalugulu siunissami aaqqiinissaq Paamiut mittarfissaat
piviusunngortinneqarsinnaalersoq. Ilanngullugu Naalakkersuisumut
apeqquteqaatigerusupparput Grønlandsflyp timmisartunik taarsersuinissaanut
qanoq annertutigisumik paasissutissiisimanersut. Tassami tusakkavut Grønlandsflymiit
imaammata mittarfiit ilaat tallineqartariaqartut timmisartunik
taarsersuisoqalissappat.
Sukumiisumik naliliinissaq Kattusseqatigiinniit innersuussutigissavarput.
Tassami siunissaq ungasinnerusoq isigalugu inuiaqatigiinnut artukkiinissarput
pakkersimaartinniartariaqaratsigu, aammalu sukumiisumik naliliinissat
pisariaqartillugit.
Ullumikkut nalunngilarput qulimiguullit S61-it ingerlanneqarneri akisoqisut.
Taamaammat paaserusunnarpoq qulimiguulinnik naleqquttunik taarsersuinissamut
pilersaaruteqarnersoq.
Taakuuppummi ullumikkut ukiut tamaasa aningaasaqarnermut
missingersuusiornermut aningaasartuutaasartut annertuut ilaat.
Taamatut naatsumik oqaaseqarluta Naalakkersuisup oqaaseqaataa tusaatissatut tiguarput. Innersuussutigeqqissallugulu ukioq kingulleq maani aalajangersimanerput. Qujanaq.
Otto Steenholdt, attaviitsoq:
Akissuteqaammi titarnertaat aappaanni imaattoq atuarpara. Timmisartut minnerusut atorlugit Paamiuni siunissami timmisartuussisarnissaq eqqarsaatigalugu immaqa orniginarnerussaaq mittarfik pisariinnerusoq sananeqassappat.
Takuinnarlugu imaappoq, aasiit mittarfeeraq sananeqassaaq. Oqartariaqarsimassagaluarpoq pisariinnerusoq tallisariaqartorlu, immaqa akisunersuanngorluni, taanna sananeqassasoq. Oqaaserisakka aatsaannguaq immikkoortumi kingullermut assingulluinnarput, aalajangiusimajuarpara taamaattuararsuarmik saneq unitseqqullugu. Allaallu oqartariaqaraluarlunga paasilluarlugu Sørensenip saqqummiussaa akuerineqareersimasoq, kisianni kinguartiallanneqarnera Paamiormiut imatut atussagaluaraat, qaa ajunngilaq kinguartinniarsiuk, kisianni takisuumik DASH 8-ip atorsinnaasaanik sanaffigitigut. Tassa taanna uanga assut inassutigissagaluarpara kinguartitsineq taamaattumut atoqqullugu Paamiormiut piumasarissagaat. Tassa Inatsisartut ammaallutik oqallinneranut timmisartunut mittarfiit pillugit oqaatsikka eqqaamaneqannguatsiarput, nangeqattaartuarakkimmi. Paasinarsereerpoq assortorneqarsinnaanngitsumillu aamma avataaniit oqaatigineqareerpoq, nunatsinni naatsunik mittarfiliortiterneq kukkusuusoq ingerlateqqittariaqanngitsorlu.
Neriulluinnarpunga Inatsisartut siumut isigalutik timmisartunut mittarfiit pimoorussamik nalilersussagaat. Sanaartorneq kukkusumik aallaavilik unitsinneqartariaqarluinnarpoq. Kukkusumik aallaavilimmik sanaartornerup kingunerisa ilaat qassissaaniilernerlunga taarusuppara tassa Qaanaap tamanna taanna takutereermagu. Taavunga timmisartuussineq ingerlanneqassasoq oqaatigineqarpoq. Timmisartuutileqatigiillu ajunaarutaanngitsumik timmisartuussisarnissaat nunatsinni akileraartartut qaffassaatigilissavaat.
Qaanaaginnarmut timmisartuussineq kisimi tapiiffigineqarnavianngilaq. Kukkusumik aallaveqarlutik sanaat tamarluinnarmik maannangaaq tapiiffigineqarnissamik pisariqartitsilereerput.
Attaveqarnermut Naalakkersuisup siunnersuuteqartumut akissutaa naammaginanngilluinnarpoq. Naalakkersuisut suli avaaratik mittarfiit naatsuaqqat siunissami atugassatut siunniuppaat, timmisartuarannguanillu ilaasut angallanneqartarnissaat siunniullugu. Isumaqarluinnarpunga taamatut siunnissaqarneq timmisartut atorlugit ilaasunik aamma siunissaq eqqarsaatigalugu angallassineq ajornartorsiutinik qaangiissutaasinnaanngitsoq.
Uanga siunissaq ungasinnerusoq eqqarsaatigalugu takorluugara allanngortikkusunngisaralu unaavoq: Timmisartoq ilaasartaat mittarfinnik takisuunik atuisoq kujataaniit ilami allaat tunumiit ilaasunik assartugassanillu useqarluni aallartassasoq sinerissamilu mittarfiit allat aqqusaartorlugit allaat Thule tikittassasoq.
Timmisartut taamaattut silap qanoq inneranut imannarsuaq naalagarsiortitaanngillat. Ingerlanneqarnerallu ukuninnga mikisuaqqanit allaat oqartariaqarunarpugut akikinnerusutuut takorloortariaqarluni.
Mittarfiit atorluakkat tallisarneqarnissaat siullerpaanngorlugu inissinneqarniarli sanaassallu akissaqartinneqarpata, soorlu Paamiuni tamatigut minnerpaamik DASH 8-mik taaneqartartut timmisartut miffigisinnaasaat maannakkuminngaaniit kisimi sananeqartalerniarlik. Siunnersuut Naalakkersuisunit akuersaarneqanngitsoq ima imaqartariaqaraluarpoq kukkusumik aallavilimmik timmisartunut mittafigut sananeqarsimasut unitsippagut aaqqissuussinissarlu tassa tallissaanissaq maannangaaq siunniullugu.
Jørgen Wæver-Johansen, Ineqarnermut Angallannermut Pilersuinermullu Naalakkersuisoq, Siumut:
Qujanaq. Neriuppunga Naalakkersuisuniit paatsoornerata. Paamiuni mittarfiliorsinnaaneq mittarfiliornissarlu isumaqatigaarput, kisianni aningaasaqarnermut inatsisit suliarinerani qilattagarsuup taassuma ataqatigiissinniarnerani sanaartugassallu tamarmik ataqatigiissinniarnerini taamatut inissipparput ilaatigut suliariumannittussarsiuussinermi neqeroorut akikinnerpaaq taamatut naleqarmat.
Ataaseq qularutigineqasinnaanngilaq, sumiluunniit timmisartoqarfimmik mittafimmilluunniit sanagaanni taava innuttaasut ataasiakkaat piumasaqaatigisinnaasariaqaraat tassaavoq pitsaasumik kiffartuunneqarsinnaaneq akulikitsunik tikinneqartarsinnaaneq aammalu akikinnerpaamik sapinngisaq naapertorlugu angalasinnaaneq.
Taannalu siunertarineqassappat taava Naalakkersuisuniit isumarput naapertorlugu mittafissaq pisariinnerusoq aallavigineqarsinnasariqarpoq aamma aningaasartuutitassai eqqarsaatigalugit. Oqaatigineqartut tamaasa tusaalluarpagut paasinarsereerpoq partiit amerlanerusut kissaatigigaat aningaasaqarnermut inatsisissatut siunnersuutip suliarineqarneranut atatillugu Paamiuni mittarfiliornissap aallartinneqarnissaanut kingumut ilanngutiteqqinneqarnissaa aningaasaqarnermut inatsimmi 2002-moortumi.
Taamaattumik tassani Inatsisartut assortuutinngillat. Aningaasaqarnermullu ataatsimiititaliaq qinnuigineqarpoq tamanna pingaarnersiuinermini aamma periarfissarsioqqullugu. Uanga taamatut suliakkerneqarnerinut atatillugu annerusumik oqaasissaqanngilanga neriuppunga periarfissamik nassaarumaartut. Kisianni inussiarnersumik kaammattorusuppakka aningaasaqarnermut ataatsimiititaliami sanaartornerup aallartisarneqarnissaanut atatillugu aningaasartuutaanerusussat taakkua sukkut sipaarutiginissaat aamma ilanngullugit isummerfiginiaqqullugit.
Sipaartoqassanngippammi taava pinngitsoorata sanaartugassanit aningaasat immikkoortinneqarsimasut amerlinissaat isumagisariaqaratsigu. Qujanaq.
Lars Sørensen, Inuit Ataqatigiit:
Siunnersuuteqartutuut nuannaarutigivara partiinit tamanit Siumukkunninngaaniit, Atassutikkunninngaaniit aammalu Inuit Ataqatigiinninngaanniit Paamiuni mittarfiliornissamut tunngatillugu aappagumut ingerlateqqinnissaanut suleqataanissamik siunnerfeqarnissamik aalajangersaammata. Taamannalu aamma Naalakkersuisut pinngitsoornatik suleqataaffigisariaqaraat uanga isumaqarpunga.
Siullermik tunngavilersuutaasarsimasut ukiut ingerlanerini inatsisartuni annertoorujussuarmik oqallisigineqartarnikuupput, aammalu S-61-t atorunnaarsikkiartorneqarnissaanut tunngatillugu siunnerfilimmik isumaqarpunga Paamiuni mittarfik siullerpaat akornaniissimasariaqaraluartoq. Tassami Nuumminngaaniit Narsarsuullu qiterpiarpiaaniippoq. Paamiut 400 kilometerinik ungasissuseqarpoq.
Aammalu Inatsisartut taamani aalajangernerminni arfineq marlunnik mittarfiliorniarnermut tunngatillugu siunnerfiginikuuvaat sinersorluni nunatsinni silaannakkut angallanneq angallanneqartariaqarmat.
Aamma aningaasarlersorneqarnissaanut tunngatillugu uanga isumaqarpunga ajornartorsiutaanavianngitsoq. Massakkummi sanaartorneq illoqarfinni ataasiakkaani ima annertutigivoq allaat kvadratmeterimut 24.000-it angullugit akeqalersimammata. Tamakkua Naalakkersuisuni inatsisartunilu nutaamik nalilersorneqartariaqarput. Taavalu aamma siunissami akikinnerusumik nunap ingerlanneqarnissaanut aqqutissaasinnaasunut tamakkua atorneqartariaqarput.
Uagut arajutsisimanngilarput ukiorparujussuarni aammalu inatsisartuni arajutsisimaneqanngilaq ukiorparujussuarni angallannikkut pissutsit ajorpallaarneri pissutigalugit assigiinngitsutigut inerisaanitsinnut tamanna killilersorneqarmat.
Assersuutitut kingullermik taaneqarsinnaavoq aalisarneq massakkut ingerlallualeruttortoq taqqavani ilaatigut atortussanik piniartarnermut assigiinngitsutigut ajornartorsiuteqartarput. Aalisartut nalinginaanngillat qaammat ataaseq marlullu utaqqisinneqartarnerat. Taannalu ilaatigut aalisartunut millioninik allaat taqqava naleqalernikuuvoq.
Nunatta aningaasaqarnera soorunami appariartortutut oqaatigineqarpoq, kisiannili nutaami aningaasarsiorfinni ineriartornissamut aqqutissanik pitsaasunik Inatsisartut Naalakkersuisullu aamma aqqutissiueqataasariaqarput.
Uanga tupigusuutiginngilara maannakkumut Paamiuninngaaniit Pamiunullu 16-iinnarnik ilaasoqartarmat. Tassami qanoq ilillutik sapaatip akunneranut ataasiaannarluta silaannakkut helekopterimik tikinneqartarluta amerlanerusunik ilaasoqarsinnaava? Taannalu helekopteri Paamiut Kangilinnguullu marluutaralugu.
Taamaattumik tamakkua tunngavilersuutigineqarsinnaangillat. Assigiinngitsutigut aaqqissuiniarnerit aasaanerani imaatigut silaannakkullu ajutoornernik ilaatigut oqaatigineqarsinnaasut tassaapput isikkamik arsaannerit, inuusuttuaqqani utoqqasaanilu. Paamiut ingerlanneqarsinnaasimanngillat angallannikkut pissutsit ajorpallaarneri pissutigalugit.
Kulturikkut aaqqissuussinerit
uagut qulaatiinnarluta ingerlanneqartarput. Uagut peqataarusuppugut nunatta ineriartorneranut. Uagut nammineerluta
takusareeratsigu aamma assigiinngitsutigut annertunerusumik
tapersersorneqanngikkarluarluta ineriartortitsisinnaanissamut.
DASH
8-nik Otto Steenholdtip oqaluttaqattaarnera, aammalu ingerlaannaq mittarfinnik
talliliisinnaanermut tunngatillugu oqaatigiinnartariaqarpoq uagut
paasitinneqarnerput najoqqutaralugu DASH 8-t assigiinngitsut tallimaapput.
Taamaakkami aamma pisariaqanngilaq massakkut mittarfiit atuutereersut
talliseqqinneqarnissaanut.
Naggaterpiaatigut
oqaannassuunga ungaqqutaarneqartarnerput unitsinneqartariaqarpoq.
Mogens Kleist, Kattusseqatigiit oqaaseqartuat:
Assut tupigusuppunga Naalakkersuisoq saqqummiinermini oqaaseqarmat sapaatip
akunneranut marloriarluni taamatut timmisartuussisalertoqassasoq Paamiunut.
Nalunagulu 16-iinnaat illuatungaanut illuatungaanullu ilaasinnaasut,
agguaqatigiissillugu. Taava inuiaqatigiinnut akisoorujussuussaq sapaatip
akunneranut marloriarluni taamatut timmisartoqartalerniarpat. Taava
ilaasut qassiussappat. Suli aningaasartuutivut annertunerulissapput. S61-it
taamak akisoreertigisut assut paaserusunnarpoq, Naalakkersuisuninngaanniit
taamatut Grønlandsfly-mi siulersuisuni siulittaasoqartitsillutik, qanoq
pilersaaruteqarnersut helekopterinut naleqqussakkanik.
Svaldbardimiikkatta
aasap ingerlaneran helekopterit S66-ininngaanniilluunniit mikinerugaluarlutik
ilaasoqarsinnaasut amerlasuunik, aammalu annaasiniarneqarsinnasut atorpaat.
Aammalu Otto Steenholdtip oqaaseqarneranut mittarfiit assigiinngitsut
tallisarneqarnissaat DASH 8-tat taakkartorneqarput assigiinngitsut.
Kulusummiit Islandiliarama ilaaffigaara Islandimiut timmisartuat
Fokkerflymit taaneqartoq, 50-inik ilaasoqarsinnaavoq. Mittarfinnut
tallisaarinissamut pisariaqanngitsoq Kulusummut, aammalu Kulusummiit ullut
tamaasa arlaleriarluni tikittartut.
Inuiaqatigiit
akissaqanngilagut mittafiit tamaasa massakkut naammasigatsigit aamma
timmisartunik
annertunerusunik peqalernissatsinnut pissarsiniassalluta. Naamik
eqqarsarluartariaqarpugut siunissaq ungasinnerusoq eqqarsaatigalugu.
Taamaattumik tupigusuallannarpoq taamatut Naalakkersuisup oqarnera - taava
ajunngilaq sapaatip akunneranut marloriarluta timmisartuussisalissaagut
16-niinnarnik ilaasoqartarsinnaanera eqqarsaatigigutsigu suli akisunerulissaaq
taanna angallassineqa.
Nalunngilarpummi
ullumikkut angallannermi imminut akilersinnaasut aqqutit ukutuaapput,
Kangerlussuaq/Nuuk - Kangerlussuaq/Ilulissat. Taamaattumik mittarfiit aammalu
timmisartut, timmisartunut tunngasut siunissami aalajangiiffiginiarutsigit
eqqarsarluaqqaarluta aalajangiisariaqarpugut. Qingarput uunga qanimut
isigiinnarnagu ungasinnerusoq isigalugu, DASH 7-it taamani atorneqalermata,
taavalu 1995-imi sananeqarunnaarmata, mittarfiliorneq aallartippoq DASH 7-it
atorneqartut. Tassa
pilersaarusiornerlunnerit kinguneri.
Islandimiut taakkua timmisartui ilaaffigisimasakka 50-inik
ilaaffigineqarsinnaasut sooq atorneqarsinnaanngillat mittarfiit
tallilertariaqanngillat. Taamaattumik eqqarsarluaqqaartariaqarpugut
taassumap tungaatigut ungasinnerusoq isigalugu.
Aamma mittarfiit ataasiakkaat ullumikkut inissisimanerisa
ajornartorsiortittarpaatigut assorujussuaq. Assersuutigalugu Sisimiut,
Aasiaat illoqarfiillu allat, immaqa taakkuunerupput Sisimiut Aasiaat
annertunerpaamik mittarfinnut tunngatillugu ajornartorsiorfiusut.
Lars Sørenseni paasisinnaakutsoorpara, mittarfiliornissat
aalajangiiffigineqarmata mittarfiit arfineq marluk sananeqassapput. Taamaattoq
kinguartinneqaqattaarpoq. Taamaakkaluartoq maannakkuminngaaniit aamma
naliliiffigisariaqarparput. Mittarfiit arfineq pingajussaat immaqa
pitsaaneraaq Qaanaaq ilanngutissagutsigu qanoq inuiaqatigiinnut akeqassanersoq.
Qujanaq.
Johan Lund-Olsen, Inuit Ataqatigiit oqaaseqartuat:
Aap qujanaq. Soorunami Inuit Ataqatigiinninngaaniit uagut
nuannaarutigeqaarput partiit annerit maani Inatsisartuniittut tassa partiit
pingasut taamak isumaqatigiitsigimmata uanit, tassa Siumut, Inuit Ataqatigiit
Atassutillu tamarmik kissaatigivaat Paamiunut suluusalinnut mittarfiliornissaq
pilersaarutit pilersaarutaareersut malillugit ingerlanniarneqassasut. Taava
tassa tullinnguuttoq unaavinnarpoq aningaasanut inatsisissaq ukiaq manna
taanna suliarisassarput eqqarsaatigalugu isumaqatigiinniarnerit taakkua
ingerlanneqartussaassammata.
Tassani soorunami misissorneqarumaarpoq sumi sipaarniarnissaq taanna
qinerneqassappat sumik sipaarniartoqassanersoq, kisianni aamma periarfissat
allat ilagisinnaavaat inuiaqatigiinni aamma isertitsisoqarsinnaanissaa
landskarsimut. Taanna aamma isumaliutersuutinut ilaasinnaasariaqarpoq
akitsuusersuisoqarsinnaavoq allatigulluunniit landskarsi amikkisaartoq aamma
ikiorserneqarsinnaavoq, kisianni tassa taakkua isumaqatigiinniarnerit
tullinnguuttut tassa aningaasanut inatsisissap suliarineqarneranut atatillugu
eqqartorneqarumaarput.
Kisianniuna aamma una oqaaseqarfiginngitsoorusunngikkiga, attaviitsup Otto
Steenholdtip tassa arlaleriaqaluni oqaatigisaqattaarpaa, uteqattaartuarpaa
Qaanaamut, Qaanaami mittarfiliorsimaneq kukkunerujorujussuusoq. Tassa
apeqquterujussuaq. Kukkunerua imaluunniit kukkunerunngila? Uanga
isumaqarluinnaqqissaarpunga, kukkunerunngilluinnaqqissaartoq
eqqarsaatigigaanni periarfissarpassuarnik massakkut nutaanik taanna
ammaassimmat. Avanersuarmiut maannakkut inuiaat kalaallit sinneri
toqqaannarnerusumik attaveqaqatigilersinnaalerpaat. Amerikamiut
apereqqaarnagit.
Amerikamiut massakkut mittarfittaarnissaata tungaanut Pituffimmiittut
taakkua akuersiteqqaartinnagit Qaanaaliarsinnaanngilagut. Imaluunniit
Qaanaamiit sineriatsinnut angalasinnaasoqarsimanngilaq.
Periarfissarpassuarnik nutaanik ammaassivoq, inuussutissarsiuteqarnikkut
aammalu takornariaqarnikkut assigiinngitsutigullu.
Taassumap saniatigut aamma isumaqarpunga Otto Steenholdtip eqqaamasariaqaraa
ukiuni kingullerni oqallisaaqisoq sulilu aamma erseqqissumik
aalajangersarneqanngitsoq, kisianni aamma uagut maani inatsisartuni
aalajangeeqataaffigisassarput danskit Naalakkersuisuisa neriorsoreerpaatigut
tassani aamma aalajangeeqataasinnaassagut tassa Amerikamiut pilersaarutaat
tassa NMD-p tassa Pituffimmi radareqarfiup nutarterneqarnissaanut suliaq.
Taannaannaq eqqqarsaatigalugu imaaratarsinnaavoq NMD piviusunngortinneqarpat
taava Pituffimmi isumannaallisaanikkut aaqqissuussinerit taakkua
annertoorujussuarmik sukatiteriffigineqartussaassammata.
Tassa imaappoq taamatut pisoqarpat Pituffik sakkutuujunngitsunik
aqqusaarneqarsinnaajunnaavissaaq. Taamaalippallu soorunami Avanersuarmiut
imaluunniit allat uagut taavunnarusukkaluartugut mattunneqassaagut.
Taannaannaq eqqarsaatigigaanni kukkunerunngilluinnarpoq maanakkut Qaanaami
mittarfittaartoqarmat.
Taava aamma isumaqarpunga eqqarsaatigisassatsinnut ilaatittariaqaripput
danskit naalakkersuisui aamma tapiissuteqarput mittarfiup sananeqarneranut
tassa aningaasartuutigineqartut affai akilerpaat, kisiannili naatsorsuinerit
tassa, billetit akilersorneqarnerannut naatsorsuinerit tassa aallaavigivaat
120 millionit. Naalagaaffiup affaa akilerpaa, uagut affaa akilerparput.
Naatsorsuinerit 60 millionit aallaavigalugit ingerlanneqartuugaluarpata
soorunami billetinut aningaasartuutigineqartussat Avanersuarmiunut
uagutsinnullu Avanersualiarusuttunut imaluunniit Qaanaaliarusuttunut taava
appasinnerungaassaaq. Taamaattumik tamakkua aamma eqqarsaatigilaartariaqarput,
kisianni ataatsimut isigalugu kukkunerunngilluinnarpoq Qaanaami maannakkut
mittarfittaartoqarnera. Taanna isumaqarpunga aamma Otto Steen-holdtip
eqqaamaniartariaqaraa.
Mikael Petersen, Siumup oqaaseqartua:
Tassa qularutissaanngilluinnarpoq partiit oqaaseqartui aallaavigalugit
soorlu Inuit Ataqatigiit oqaaseqartuata erseqqissaraa partiit anginerit
isumaqatigiilluinnarlutik piumasaraat Paamiuni mittarfissap sananeqarluni
aallartinnissaa. Siunnersuuteqartup aalajangiiffissatut siunnersuuteqartup
siunnersuutaa naapertorlugu.
Taamaattumik innersuussutigineqartoq aningaasaqarnermut ataatsimiititaliami
aningaasanut inatsisissaq suliarineqarnerani misissueqqissaarnissat
nalilersueqqissaarnissat tassani ingerlanneqarnissaat imaannaasussaassanngilaq. Taanna naatsorsuutigissavarput tamatta. Aamma qularutissaanngilluinnarpoq
angallannikkut pissutsit arlaatigut aningaasarlersueriaatsit eqqarsaatigalugit
tamarmik qulaajaaffigineqaqqaartariaqassapput. Piffissarujussuaq tassunga
atorneqartussaassaaq, aningaasatigut aaqqiiniarsarineq anguniarlugu.
Naalakkersuisuni
ilaasortaq ilumoorpoq tassami avaqqunneqarsinnaanavinngilaq arlaa tungaatigut
sipaarutissanik nasaarniarnissarput. Aamma sanaartugassap qanoq ittuunissaanik
nalilersueqqissaarnissaq avaqqunneqarsinnaasanngilaq. Tassami
pilersaarutaareersut taamatut akeqarsimappat akikinnerusumik
sananeqarsinnaappat aamma tamanna nalilersugassaassaaq, kisianni tassa
siunnersuutigineqartutut amerlanerussuteqangaartut Inatsisartut
siunnerfigivaat Paamiuni mittarfiliassaq sananeqarluni
aallartinneqartariaqartoq aappaaguminngaaniit.
Attaviitsup
Otto Steenholdtip oqaaserisaanut tunngatillugu mittarfiit atuuttut
taliineqaqqaartariaqartut allanik sanaartorneq pitinnagu isumaqarpunga
tulluutinngilluinnartoq tassami 1990-ikkulli aallartisimalaarneranni
Inatsisartut siunnerfiat angallannikkut, timmisartumik angallannikkut
ataqatigiissaarinissaq, mittarfiliortiternissaq taanna suli ingerlanneqarpoq
suli naammassineqanngilaq. Aamma tassunga ilaapput mittarfiit mikinerit.
Ujaraaqqanik qallikkat sanaatorsinnaaneri illoqarfinni allani
mittarfeqanngitsuni.
Tassami
S61-imik timmisartuussinerit helekopterimik timmisartuussinerit
qimakkiartuaarnissaat taanna siunertaammat, ingerlatsineq akisuallaaqimmat.
Taamaattumik oqaatigineqartut ilaat timmisartut allat atorneqarsinnaaneri
ilanngullugit soorunami nalilersuutigineqartariaqarput. Naak angallannikkut
annertuumik oqallittussaagaluarluta tamaani. Maannangaaq tamakku
taakkartorneqareertariaqarput. Timmisartut qanoq-ittunuku atorniarigut,
ingerlatsinikkut naapertuuttut nunatsinnut?
Tassami
mittarfeqarfiit tamarsuisa tallilerniarutsigit allaat Jumpo Jetersuit
missinnaatillugit 350-inik ilaasoqarsinnaasut. Tamakkua
eqqarsarluarnerunavianngillat. Soorunami illoqarfiit anginerit
pisariaqartitsipput mittarfimmik tallilernissaannut, soorlu Nuuk,
Qeqeretarsuup Tunua immaqalu aamma. Aamma kujataani peqareerpugut Narsarsuaq,
Kangerlussuaq aamma pigereerparput. Tamakku nalilersugassaapput, kisianni
tamavimmik assersuutigalugu Kunuunnguaq Grønlandsflyp timmisartua 180-inik
ilaasoqarsinnaasoq taamaattut sumut sumi tamani isumaqarpunga
pisariaqanngitsoq missinnaassallutik.
Ilaasussanut
naapertuuttumik timmisartunut aaqqissuussisoqartariaqarpoq imminut
akilersinnaassappat.
Aamma akulikinnerusumik timmiksartuussisarnerit soorunami imminut
akilersinnaasut
aallaavigalugu akulikinnerusumik tikinneqartarnissaa siunertaralugu.
Erseqqissaatigiinnassavara
Siumuminngaaniit peqataassagatta suleqataaniarsaralutalu ilungersorluta
Paamiuni mittarfissap piviusunngortinneqarnissaa siunertaralugu.
Lars-Karl
Jensen, Siulittaasoqarfimmi ilaasortaq, Siumut:
Oqaaseqartussaq
tulleq tikitsinnagu uani partiit oqaaseqartuininngaaniit
oqariartuutigineqartoq
malillugu Lars Sørensenip siunnersuutaa Aningaasaqarnermut
Ataatsimiititaliamut ingerlannissaa kissaatigineqarpoq, aammalu
pissusissamisuussaaq Attaveqarnermut Pilersuinermullu Ataatsimiititaliaq
aamma tassani tusarniaavissanut peqataatissallugu, taamaalilluni suliassap
peqqissaartumik ingerlanneqarnisaa pineqarniassammat.
Taava
oqaaseqartussamut tullermut ingerlaqqippugut.
Otto Steenholdt, attaviitsoq:
Inatsisartut oqarfigissavakka Qaanaami pissutsit uterfigeqqissannginnakkit, kisianni assuarilluinnarakku piniartut inuutissarsiutaat qiviassagutsigu ilaquttaminut tikeraassaguni Kangerlussuarmut piinnarluni allaat imannarujussuaq akissaajareertussaasoq nalunnginnatsigu, ingerlaqqittussaallunilu uteqqittussaallunilu. Piniartup inuutissarsiorneranut tulluanngilluaasartoq taamatut inerlugu tunniussaq, kukkunerunngilluinnartumik I nuit Ataqatigiit taagussappagu tupigissavara.
Akikilliliinissaq pereerparput.
Kikkut akilissavaat? Tassa inuiaqatigiinni akileraartartut taamak
eqqarsaatigisariaqartarpagut allatut ajornartumik. Kukkunivut taakkununnga
akilersortikkunnaarniartigit. Tassa
uanga piumasara. Kukkunerunngilluinnartumik Johan Lund-Olsen, kukkussut
unaaginnarpoq aki, piniartutut inuutissarsiortut akiolersinnaanngisaat. Taakku
taakkarsorlugit sanaaq kukkuneruvoq, tassa kukkuneq taamak erseqqitsigaaq.
Timmisartoqarnermi
angallalluartut Danmarkimi killissimanerat internetikkut allaat
takuneqarsinnaasoq
aamma Inatsisartut takusimasariaqaraluarpaat. Uparuartuisut nunatsinni
timmisartornerup
qanoq aaqqinneqarnera uparuartorneqarpoq. Taakkuuku uanga aallaavigisarikka
aamma isumaqanngilanga timmisartupiluunerujussuit allaat Paamiukkunnut
merarnissaat. Uanga oqaatiginngilara taanna, isianni kukkunerit,
sipaarnerinukua ilaannikkut akitsorsaataasartut. Kialuunniit
pujortuleerartaarniartup aamma naluneq ajorpaa sipaarniarsimaguni maskiinalu
iluanngitsoq pissarsiaralugu nalunngereertarpaa siunissaq ungasinnerusoq
eqqarsaatigalugu mianersortariaqartarmat.
Mikael Petersenip tallisaanissat ajorai. "Tamarsuisagooq
tallisarniarutsigit." Taamatut oqan-ngilluaasarpunga aallaat ammaanermi
oqarlunga ataaserluunniit aallartinniartigu aallaqqaasiullugu tassunga
iluatsigullara Aasiaat takusinnavassi tassani sananeqarnera Aasiaat
mittarfiata akikinnerpaajusoq. Aammalu taamanikkut saaffiginnikkaluartut sananera
iluatsillugu takisuumik sanajumagaluartut itigartinneqarnerat.
Taakkuukua isigiumallugit oqartunga, ajornaqaaq
timmisartoqalersimagaluarpugummi aamma Mikael Petersenip taasaani timmisartoq
Kunuunnguaq Kalaallit Nunaata sineriaanut missinnaanngilaq. Tamakkuukua
aqqutissiuukkusukkaluarikka, mikisuararsuarnik sanaartorneq unitsikkallarlugu
anginerusunut soorlu Kunuunnguatut ittunut mittarfiusinnaasut minnerpaamik
marluk kitaani sanasariaqaleraluarigut mikisuararsuit taakku piunnaarlugit.
Naatsuararsuit utoqqatserpunga.
Godmand Rasmussen, Atassutip oqaaseqartua:
Uanga takisuuliornianngilanga, kisianni una
oqaaseqarfiginngitsoornianngilara Kattusseqatiginninngaaniit aatsaannguaq
oqaatigineqartoq. Tassa sapaatip akunneranut ataasiaannarluni, sapaatip
akunneranut inissaasut 16-it Paamiunut aammalu illuatungaanut ingerlaartarnera
uparuarpaa. Inuit Ataqatigiit oqaaseqartuanit aatsaannguaq
erseqqilluinnartumik taanna isumaqarpunga qaqinngitsiartutit oqaatigineqartoq.
Sunaluunniit aqqut qulaarneqaraangat aammattaaq angallanneq
atuutsinneqarnerulersarpoq. Kialuunniit uani takusinnaavaa ajornartorsiut
taamannak angitigitillugu angallanneq sukkanerulersinnaanngilaq ilaasut
eqqarsaatigissagaanni.
Qangaanerusoq Aasiammiut Ilulissanulluunniit takunnissimasut
ikitsuararsuupput angallanneqa ajormat. Aamma killormut. Massakkununa ullut
nutaat nalaaniittugut. 1995-imi taanna aalajangiunneqareersimavoq. Ullumi
piffissaasoq siulitta aalajangiussimasaat mittarfinnik sanaartornissaq
nangaassutigissavarput? Nangaassutissaqanngilagut.
Takusinnaareerparput uagut aamma Narsarsuarmut ingerlasartugut, qanoq
ilaatigut Narsarsuaq pujortillugu periarfissaarulluta utillaraangatta tiimit
arlallit timmereerluta, aamma qasunartarpoq. Immaqalu Paamiuni
sanaartornermi pilersitsisoqarpat ajornartorsiut taanna
qaangiallanneqarsinnaavoq.
Timmisartut mikinerit uani eqqaaneqaqattaalermata assorujussuaq
eqqarsarnarpoq Angallannermut Ataatsimiititaliami inissikkattali
misissuiniarluta Siulittaasoqarfimmut noqqaajuartuarsimavugut timmisartunik
mikisunik ilaasoqartartunik sukkasuunik pilertortumillu ingerlatsinnaasunik
misissuerusulluta. Tassalu ulloq manna tikillugu taanna
piviusunngortinneqarsimanngilaq.
Tamanna uggornarpoq. Immaqalu ullumikkut tallilerinissaq ilaatigut
eqqaaneqanngilluaasartoq
ajornartorsiut qangali qaangereersimassagaluarparput.
Uanga Paamiunut tunngatillugu malugisinnaavara partiit anginerit,
imaluunniit tamarmik assortuussutiginngikkaat taassumap tungaa. Taamaattumik
isumaqarpunga oqallinneq annertusaarnagu tassunga kipitiinnarutsigu
ajunnginnerpaasoq, akerliusoqanngilaq. Misissuisoqarniarpoq. Aasiit
immitsinnut perulluta takisuuliuuttaqattaarniarutta sivisoorujussuarmik-aasiit
taannannguaq oqallisigissavarput.
Lars-Karl Jensen, Siulittaasoqarfimmi ilaasortaq, Siumut:
Kingullermik oqaaseqartumut eqqaasitsissutigissavara, imaluunniit
oqaatigissavara siulittaasoqarfik angallannermut
ataatsimiititaliaaminngaaniit saaffiginnissummik tigusaqarsimalluni
ilisimannittoq, tamanna ajuusaarnartuummat. Taavalu taanna
siulittaasoqarfimminngaaniit misissorumaarparput.
Mogens Kleist, Kattusseqatigiit oqaaseqartuat:
Qujanaq. Uanga akerlerinngilluinnarpara Paamiuni mittarfissap taamatut
tiguneqarnissaanik pilersaarutaasimasut taamatut akuersissutigineqarmalli
tiguneqarnissaa.
Maanga oqaluttarfimmut qaqininnut tunngavigivara sukumiisumik
naliliiffigisariaqarmat aningaasaqarnermullu qanoq inissisimanersoq.
Taamaattumik mittarfiliussagutta qanoq inuiaqatigiinnut annertutigisumik
sunniuteqassava. Imatut issanngimmat mittarfiliuinnaavissaagut
ungasinnerusorlu isigalugu inuiaqaqatigiit artukkertuaannarlugit ukiut tamaasa
millionerpassuit taakkununnga mittarfinnut atortassagivut.
Aalisartup kialluunniit nalunngilaa aalisariummik pisisinnaanani iluamik
atorneqarsinnaan-ngitsumik angigaluaruni kusanaraluaruniluunniit
pisaqarsinnaanngikkuni iluamik.
Johan Lund-Olsenimut oqassaanga, oqarmat Amerikamiut
apereqqaartariaqanngilagut; Qaanaamut timmisartorluta piniarutta angallanermi
ataatsimiititaliaminngaaniit nalunngilluinnarparput Qaanaamut taamatut
angalannermut tunngatillugu timmisartumik ingerlatitsiniarutta Amerikamiut
avaqqussinnaanngilagut, ullumikkut taamatut inissisimavoq.
Aammalu ajuusaarnartuuvoq Angallanermut Ataatsimiititaliaminngaaniit
paasigatsigu Qaanaamiit Qaanaamullu piffissaq aalajangersimasuinnaq
taamaallaat Naalakkersuisut aammalu Grønlandsflyp akornanni
isumaqatigiissutigineqarsimasoq, taamaattumik ukiup sinneranut
ukiortaaminngaanniilluunniit, eqqaamasakka malillugit novembarip
aallaqqaataata tungaanut, isumaqatigiissut taanna atavoq. Tamatumalu kingorna
qanoq pisoqarnissaa aamma nalunarpoq, taamaattumik Qaanaarmiuulluni aamma
illuatungaatigut erloqinassooq nalullugu fartplaneqanngitsorluunniit ukiup
sinneranut.
Taamaattumik ajornartorsiutit assigiinngitsut aamma angallannermut
tunngasunik eqqartuilerutta aamma Naalakkersuisoq soorunami
ataatsimiititaliaminngaaniit attaveqarfigisalerutsigu qaqiortussavagut.
Ataatsimoorluta tamakku ajornartorsiutit aaqqinnianngikkutsigit
aaqqinnavianngilagut. Aamma mittarfiliuinnarsinnaanngilagut ungasinnerusoq
isigalugu imminut akilersinnaanngitsunik.
Lars-Karl Jensen, Siulittaasoqarfimmi ilaasortaq, Siumut:
Aap, uani Paamiut mittarfissaanut tunngasoq oqaluuserivarput. Taavalu aamma
pingajussaaneertussat minutit tallimat oqaaseqarnissaminnut
periarfissarivaat. Tullinnguuppoq Johan Lund-Olsen, taannalu
pingajussaaniissaaq. Taamaalillunilu minutinik tallimanik periarfissaqarpoq.
Johan-Lund Olsen, Inuit Ataqatigiit oqaaseqartuat:
Qujanaq. Tassa takisuuliornianngilanga, kisianni taanna
oqaaseqarfigeqqittariaqarpara, Otto Steenholdtip aamma uteqattaagaa aammalu
Mogens Kleistip aatsaannguaq tikitaa. Soorunami una
isumaqatigiissutigisariaqarparput, mittarfiliortitereerluta una
akuersaarneqarsinnaanngilluinnarpoq, ilaasussanut maannakkut
akigitinneqartut taakkua taamatut qaffasitsiginerat. Taanna
akuersaarneqarsinnaanngilaq.
Soorunami piniartukkormiut aamma akilersinnaasaannik
aaqqissuussiniartariaqarpugut. Tassaniuna kukkusimasugut taamaattumik taanna
soorunami aaqqinniartariaqarparput. Kukkusoqarsimavoq maani, siorna aamma
oqartoqarmat tapiissuteqarneq, tapiissuteqartarneq kanngunartuliorneruvoq.
Kanngunartuliornerunngilaq tapiissuteqarsinnaaneq! Tassaniuna aamma
kukkusoqartoq, aamma isumaqarpunga, taanna oqaatigeqqittariaqarlugu, danskit
naalagaaffiat aamma akileeqataasariaqaraluarpoq billetit taamatut
qaffasippallaarujussuarnerat aammalu akiisata apparsarneqarnissaat
eqqarsaatigalugit.
Tassami Qaanaap mittarfiliorneqarnera eqqarsaatigalugu tassani
aningaasartuutigineqartut affaat danskit naalagaaffiata akilerpai, 120
millionit atorneqarput, kisianni 120 millionit
taakkua aallaavigalugit billetit taamatut naatsorsorneqarsimapput.
Taanna tassa kukkuneq.
Taamaattumik aamma tassani aaqqiiniartoqarsinnaavoq, minnerunngitsumillu
Amerikamiut aamma akileeqataasariaqaraluarput. Tassaniuna tassa aamma
annertuumik kukkusoqartoq, Amerikamiut qanorsuaq massakkut
aalajangersaatippagut, nunatsinni angalasinnaanitsinnut allaat. Avanersuarmiut
aammalu uagut nunatta sinnerani inooqataasugut attaveqaqatigiinnissatsinnut
Amerikamiut akornutigiuartarsimavagut, taamaatumik taakkuukua aamma
aningaasaleeqataasariaqaraluarput.
Tassaana taanna kukkuneq annertooq, aamma aaqqinniagassaq.
Jonathan Motzfeldt, Naalakkersuisut Siulittaasuat, Siumut:
Soorunami misissuiniarnerit Paamiut mittarfissaanut tunngasut
ingerlaqqinnissaat maani tapersorneqartoq tusaatissatut tigusariaqarpoq,
taavalu suliassat tassaniittut naammassiniarlugit.
Aammalu Paamiunut allanullu tunngatillugu aningaasartuutissat maannakkut
tulleriiaarneqarnerini sanaartugassat, iluarsagassat allarpassuillu
eqqarsaatigalugit mittarfiit ilaatigut Paamiuni mittarfissap
kinguartilaarneqarsinnaanera Naalakkersuisunit eqqarsaatigineqarsimavoq.
Ilaatigut aamma Paamiuni Umiartortut Ilinniarfianni ilinniartut inaat
iluarsaassassaapput, aningaasatigullu pisariaqartitsineq
pisariaqarluinnartunut isumaqarfiginarluni. Allat aamma taagorneqarsinnaapput
tulleriiaarineq aningaasatigut pisinnaasatta iluani killiliffigisimasarput
najoqqutaralu eqqarsaatit taamaapput.
Taamaattumik naliliilluarnissaq Aningaasaqarnermi Ataatsimiititaliami
pisariaqassaaq, suliassallu aamma isumatuumik peqqissaartumillu
tulleriiaaneqartariaqarlutik. Qaanaamut tunngatillugu naggataatigut
oqaatigiinnassavara ilumoorpoq taamanikkut uagut Otto Steenholdti
siulittaasoralugu ataatsimiititaliami nunanut allanut tunngasutigut
isumannaallisaanermillu innersuussutigisimagaluarparput Qaanaami
timmisartoqarfik Amerikamiut danskillu akilissagaat ingerlanneqarneralu
akilerlugu. Taamaalisimanngilaq isumaqatigiinniarnikkut maannakkut inerneraa
Kalaallit Nunaat tamatumani akileeqataammat.
Maanakkullu maani aammalu Danmarkimi oqallisaaqisumik, torrallataanersoq
torrallataannginnersorluunniit, kisianni oqaatigerusuppara
Naalakkersuisuninngaaniit nuannaarutigaarput Qaanaap mittarfeqalernera nunatta
ataqatigiissumik imminnullu taamaalilluni susassaqaqatigiiffimmik
nammaqatigiiffimmik aqquteqarluni naammassisaqarpoq aamma Qaanaaq
toqqaannarlugu orninneqarsinnaasunngorluni.
Suliaq inereerpoq qanorlu ilillugu atussanerlugu
isumaqatigiissutigisariaqarparput. Aamma tapiissutit taakkartorneqartut
tassani avaqqunneqarsinnaagunanngillat. Pinngitsoorani angalaneq aamma
sapinngisamik akilersinnaanngikkaluarpalluunniit inunnut atuisunut
naammaginartumik
aaqqiiviginissaa nunatta aningaasaqassusia najoqqutaralugu
aaqqinniartariaqarparput.
Amerikamiut danskillu naalakkersuisuisa
isumaqatigiissutigisinnaasimanngilaalluunniit Pituffimmi mittarfik
aqqutigalugu ilaasut takornariat allallu ingerlanneqarnerisa
suliarineqarnissaat.
Apeqqutit tamakku maannakkut qaangiunneranni naalagaaffik akiliisimavoq
uagullu akiliisimavugut, ingerlanneqarnissaalu aamma akilissallugu.
Taamaattumik suliassaq tassaniittoq isumaqarpunga uteqattaarutigissallugu
maannakkut pisariaaruttoq tulliulluni tassaasariaqarmat qanoq ililluta uagut
aningaasat atukkatta iluani taamak ittoq atorluassagipput Avanersuarmiunut
nuannaarutaasumik. Aammalu inuussutissarsiorneranut takornarianut allanullu
aamma iluaqutaasumik.
Amerikamiunut danskinullu akileqqusavut suli aamma naammassinngillat.
Angallannerup saniatigut ilisimavarput avatangiisit pillugit, eqqaaveqarnerit
pillugit allallu Amerikamiut danskillu akiligaannik aamma saliinissaq
tappavani noqqaassutigineqartoq imaappoq aningaasartuutit allat aamma
danskinit Amerikamiuinillu akilerneqartussatut naatsorsuutigisavut manna
tikillugu isumaqatigiissutiginiarneqartunut ilaapput.
Taamaattumik suliassat tassaniittut inereersut inertussallu aamma imminnut
ataqatigiinnerat taamaalillugu taasaqarfigaara.
Naimanngitsoq Petersen, Atassut:
Aap, naatsunnguamik Qaanaap mittarfittaarsimanera oqarseqarfiginiarlugu,
assigiinngitsutigut isorineqartarpoq; Danmarkimi aamma Kalaallit Nunaanni
innuttaasut akornanni, aamma paasisinnaavara Inatsisartuni ilaasortaasut
akornanni toqqissisimassutigineqanngitsoq.
Qaanaami mittarfittaarneq siumukarneq siumukarneruvoq. Qaanaami
mittarfittaarnerup ataqatigiinnerulersippaatigut,
atassuteqarnerulersippaatigut kattusimaarnerulersillutalu.
Uagut kalaallit inuiaqatigiit pisussaaqatigiippugut ajornartorsiutit
qaangerniassallugit, angallannikkut inuutissarsiornikkullu ajornartorsiutit
akisussaaqatigiinnikkut ingerlattariaqarpagut. Taamaammat Qaanaami mittarfik
isornartoqanngilaq. Qaanaami mittarfik kukkunerunngilaq, kisiannili akit
qaffasippallaarnerat una ajornartorsiutaavoq. Inuiaqatigiit uagut
susassareqatigiinnerput ingerlaqqissaaq aamma ingerlateqqissavarput.
Jørgen Wæver-Johansen, Ineqarnermut, Angallannermut Pilersuinermullu
Naalakkersuisoq, Siumut:
Allarpassuarnut pulanaveersaassaanga, ataaserli naqqiissutigilaarusuppara;
tassa Fokker 50-it atorneqartannginnerinut kitaanilu mittarfitta
naappallaarneri. Taanna Mogens Kleistimut erseqqissaassutigivara.
Nutaamik angallannikkut aaqqiinissarput tusaasinnaasavut inuiaqatigiillu
akornanni oqallinneq tunngavigalugu, partiillu allat nalunaartuteqartarneri
tunngavigalugit avaqqunneqarsinnaanngilaq. Ippassaq Otto Steenholdtip
angutitut nassuerutigivaa angallannikkut ullumikkut pissutsit killiffiat uagut
maani Inatsisartuni aalajangigarigipput, taamaattumik kukkusoqarsimassappat
uagut kukkoqataasimassaagut. Taamaattumik aamma angallannikkut
aaqqissuussinissatta
nutaamik ilusilersornerani ikioqatigiittariaqarpugut kukkussutaasimasut taakkua
aaqqiivigineqarnissaat siunertaralugut.
Qaanaamut angalaniarnikkut akit qularutissaanngitsumik
aaqqiivigineqartariaqarput, Paamiunilu mittarfiliornissaq sapinngisamik
naammassiniarneqartariaqarpoq, kisianni aamma angallannikkut akit ataatsimut
isigalugit tamarmik naleqarput, aningaasallu atugasavut killeqarput,
taamaattumik neriuppunga inuiaqatigiittut nammaqatigiinneq tunngavigalugu
Inatsisartut ukiaanerani ataatsimiinnitsinni aaqqiissutaasussanik
nassaarumaartugut.
Qaammatit tulliuttut marluk maaniinnissatsinni periarfissaqarluarpugut
Naalakkersuisuniillu tamanna qilanaaraarput, ataatsimiititaliat assigiinngitsut
suliassaqarfitsinnut aattuumassuteqartut suleqatigilluinnarlugit
aaqqiissutaasinnaasunik nassaarniaqatigiinnissatsinnut. Qujanaq.
Lars-Karl Jensen, Siulittaasoqarfimmi ilaasortaq, Siumut:
Taamaalilluni oqaluuserisassaq taanna naammassivoq. Tassalu
Aningaasaqarnermut Ataatsimiititaliamut ingerlateqqinneqassaaq aammalu
Attaveqarnermut Pilersuinermullu Ataatsimiititaliaq peqatigalugu
tusarniaanissat ingerlateqqinnissaat pisariaqarput. Taakku taamatut
ingerlasussanngorlugit innersuussutigineqarnerat ajorineqanngippat taamatut
ingerlanneqarumaarput. Ajorineqarpasinngilaq.