2002-mut aningaasanut inatsisissamut siunnersuummut Paamiunut suluusalinnut mittarfiliornissap sanaartornermut missingersuutinut ilanngunneqarnissaa pillugu aalajangiiffigisassatut siunnersuut.

(Lars Sørensen)

(Aappassaaneernera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

Ole Lynge, Inatsisartut Siulittaasuat, Inuit Ataqatigiit.

Siunnersuutip siullermeerneqarnerani Paamiuni mittarfiup pilersinneqarnissaa Inatsisartunit amerlanerussuteqartunit isumaqatigineqarpoq.

 

Attaveqarnermut, Pilersuinermut Ineqarnermullu Ataatsimiititaliap Paamiuni mittarfiliornissap kinguartinneqarnissaanik Naalakkersuisut siunnersuuteqarnerannut tunuliaqutaasoq nalorninartoqartikkini oqaatigisimavaa. Aningaasaqarnermut ataatsimiititaliap inassueqaatigaa siunnersuut itigartinneqassasoq. Siullermeerninermi mittarfimmik amerlanerussuteqartut kissaateqarnerannik paasisaq malinniarlugu Naalakkersuisut iliuuseqarlutik aallartissimanngillat.

 

Tamanna tunngavigalugu siunnersuutigineqassaaq siunnersuut suleriaatsimi §15-imut naapertuuttumik aningaasaqarnermut ataatsimiititaliamit nutaamik suliassanngortinneqassasoq. Aningaasaqarnermut ataatsimiititaliap nutaamik suliarinninneranut atatillugu naatsorsuutigineqarpoq Naalakkersuisut aalajangersimasumik iliuuseqassasut.

 

Immikkoortoq 58-ip aappassaaneerneqarnissaa aningaasanut inatsisissatut siunnersuutip aappassaaneerneqarnissaanut atasumik ulloq 3. novemberimut kinguartinneqassasoq siunnersuutigineqarpoq matumuuna. Tamatumunnga oqaaseqarniartoqarnerluni? Taamaappasinngilaq. Aap, Mikael Petersen, Siumut, Aningaasaqarmut Ataatsimiitialiap siulittaasuatut.

Mikael Petersen, Siumut.

Isumaqarpunga, pissusissamisuussasoq aningaasaqarnermut ataatsimiitialiap imaluunniit aningaasaqarnermut ataatsimiitialiaq sinnerlugu annikitsunnguamik nassuiaateqalaassallunga tassunga tunngasumik erseqqissaataannaanerusunik.

 

Tassa siullermik erseqqissaatigissavara suliassaq manna pissusissamisoortumik Inatsisartunit aningaasaqarnermut ataatsimiitialiamut ingerlatinneqarpoq, siunnersuut siullermeerneqarmat. Tamatumalu kingunerisaanik soorunami pissusissamisoortumik aningaasaqarnermut ataatsimiitialiap suliassaq taanna suliaraa. Tamanillu takuneqarsinnaasutut aningaasaqarnermut ataatsimiitialiap tamarmiusup isumaqatigiissup innersuussutigaa Inatsisartunut siunnersuut itigartitsissutigineqassasoq.

 

Aningaasaqarnermut ataatsimiitialiaq taamatut inassuteqarnerminut tunngavigisaa ersarippoq aamma isumaliutissiissummi soorlu takuneqarsinnaasoq. Tassa siunnersuuteqartup nammineerluni siunnersuutimi qanoq aningaasalersornissaa pillugu ilanngussaqanngilaq. Tassa allannguutissamik aningaasalersuinissamik tunngasumik ilanngussaqanngilaq. Taassumalu saniatigut aamma Naalakkersuisut tamatuma kingorna allannguutissamik aningaasaqarnermut ataatsimiitialiamut ingerlatitsisimanatik.

 

Soorlu tamanna aamma takuneqarsinnaasoq Naalakkersuisut akissuteqaataanni. Taakku tunngavigalugit aningaasaqarnermut ataatsimiitialiaq nammineerluni aningaasalersuinissamut innersuussissappat Inatsisartunut tamanna aningaasaqarnermut ataatsimiitialiap inatsisinik tunngaviusunik malitassaanik unioqqutitsinerussaaq. Tassa budgetlovi malillugu, aningaasatigut pilersaarusiortarnermi inatsit malillugu.

 

Taamaattumik erseqqissaatigiinnassavarput aningaasaqarnermut ataatsimiitialiamiit taamatut Paamiuni mittarfiliornissamut aningaasaliissutissat siuartinneqassappata 2002-mut soorlu aamma Inatsisartut amerlanerungaartut tamanna kissaatiginikuugaat taava Naalakkersuisut soorunami pisussaammata allannguutissamik tamatumunnga siunnersuuteqassallutik imaanngitsoq aningaasaqarnermut ataatsimiitialiaq.

Soorumi allannguutissamik siunnersuummik aningaasaqarnermut ataatsimiitialiaq tigusaqarsimannginnami taamaattumik tamatuma siunnersuutip itigartitsissutigineqarnissaa aningaasaqarnermut ataatsimiitialiap innersuussutigaa.

 

Taassumap saniatigut aamma isumaliutissiissutitsinni naggataatungaani erseqqissaatigineqarpoq tamanna soorlulusooq erseqqissarneqartoq tassa aningaasaqarnermut ataatsimiitaliaata taamatut inassuteqarnerata, itigartitsinissaminut inassuteqarnerata mattutinngikkaa Naalakkersuisut allannguutissamik siunnersuuteqarsinnaanerat. Tamatumunnga ilanngullugit sipaarutissat suminngaaniit tiguneqassanersut. Imaluunniit aningaasatigut isertitassat amerlanerusut aqqutigalugit aningaasalersuinissaq aqqutissiuunneqarsinnaanersoq.

 

Taakku erseqqissaatigilaarlugit taamaalillunga aningaasaqarnermut ataatsimiitialiap isumaliutissiissutaa agguaaneqareersimasoq tamanut nassuiaateqarfigilaarpara.

 

Jørgen-Wæver Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Naak uani saqqummiussisup kingulliup oqallinneq aallartereeraluaraa taamaattoq uanga Naalakkersuisut sinnerlugit oqaatigerusuppara Naalakkersuisut sinnerlugit ajoriffissaqartinnginnatsigu immikkoortoq 58-i aningaasaqarnermut inatsisip aappassaaneerluni oqaluuserineqarneranut atatillugu oqaluuserineqarpat.

 

Taamaattumik Naalakkersuisut akissuteqaataat agguaanneqareernikuummat taanna innersuussutigissavara. Oqaatigiinnassalugulu uagut ajoriffissaqartinngilarput Siulittaasoqarfiup siunnersuutaa malinneqarluni punkt 58-sip finanslovip aappassaaneerneqarnissaanut atatillugu suliarineqarmat.

 

Ole Lynge, Inatsisartut Siulittaasuat, Inuit Ataqatigiit.