Ullut ataatsimiiffiusut 22-at, pingasunngorneq 7. november 2001, nal. 16:19

Oqaluuserisassani immikkoortoq 61

Inatsisartut Ombudsmandiata ukiumoortumik 2000-imut nalunaarutaa.

(Siulittaasoqarfik)

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

   

Finn Karlsen, Siulittaasoqarfimmi ilaasortaq, Atassut.

Taavalu maannakkut immikkortoq 61, Inatsisartut Ombudsmandiata ukiumoortumik 2000-imut nalunaarutaa tikipparput, tassani Inatsisartut Siulittaasuat oqaaseqassaaq, Ole Lynge.

 

 

 

Ole Lynge, Inatsisartut Siulittassuat:

Tassa Inatsisartut ombudsmandiata ukiumoortumik 2000-imut nalunaarutaa. Inatsisartut inatsisit atortinneqarneranut ataatsimiitsitaliaata isumaliutissiissummik saqqummiussaqarfigisimavaa, aamma tassuunalu ataatsimiitsitaliap inassutigaa ombudsmandip nalunaarutaa Inatsisartut tusaatissatut tigussagaat.

Periarfissaq iluatsillugu Inatsisartut sinnerlugit ombudsmandi, imaluunniit ombudskvinde, qutsavigaara ukiumi qaangiuttumi annertuumik suliaqarsimammat. Allaffissornikkut suliaqartut inatsit killissarititaasa iluani, aamma ingerlatsinermut maleruagassatut allataanngikkaluartut malillugit sulinersut Inatsisartut inatsisiliornermik suliaqarfittut ombudsmandimut nakkutigisassanngortissimavaat. Taamalilluni ombudsmandi Naalakkersuisunik inatsisinillu atortitsisunik nakkutilliinernut Inatsisartut atorpaat, taanna aamma nunatsinni inuttat inatsisitigut illersugaanerannik qulakkeerinnitsitsisussaavoq. Taamatut atuunneq, ombudsmandip sulineranik ataqqinninnissamik innimiginninnissamillu kinguneqartussaavoq. Ombudsmandi toqqagaaffimminni isumagissassanik aallussinerminut tunngatillugu nalunaaruteqarnera qujassutigeqqippara.

Tassalu ataatsiimiitsitaliap inatsisartut inatsisit atortinneqarnerannut ataatsimiitsitaliaata inassuteqarneranut kaammattuutigissallugu nalunaarut tusagassatut tiguneqaannassasoq.

 

Godman Jensen, Atassut.

Inatsisartut ombudsmandiata ukioq 2000-imut nalunaarutaa pillugu Atassummiit peqqissaartumik misissorparput takusinnaallugulu suliaq peqqissaartumik pitsaasumillu suliaasoq ineriartortinneqarsimallunilu saqqummiunneqarnissamisut isikkoqalernissaa siunertarineqarsimalluni.

Nalunaarusiaq misissoraanni takuneqarsinnaavoq ukioq 2000 nunatsinni, aammattaaq annertuumik pisoqartarsimasoq, immaqa ilaatigut taamaattussaannartut isumaqarfigisinnaasaralutsinnik. Nalunaarutilli ujarliuutitai misissoraanni takuneqarsinnaavoq Namminersornerullutik oqartussat suliffiutaat aallarnerfigalugit nunatsinni pisortaqarfiit, kommunit, namminersortut, aalisartut, piniartut ilami akisussaaffeqarfiit tamarmik Inatsisartut ombudsmandiata 2000-imut nalunaarusiaani ersersinniarneqarsimasut. Nalunaarusiap oqaaseqarfiginiarneranut ussernartorsiunarsinnaavoq annertuumik tigulaariffigalugu oqaaseqarfiginiarneqarsinnaaner, kisiannili Atassummiit isumaqarpugut tamanna pingaarnerunngitsoq, pingaarnerusorli tassaasoq nalunaarutip suliarilluaaganera.

Tassami assigiitsunik suliaqarnermi aammalu politikkikkut sulinermi, sukkulluunniit paasissutissanik atorfissaqartitanik aallerfigineqarsinnaasutut isigigatsigu, ilanngullugu Atassummiit malugaarput Inatsisartut inatsisit atortinneqarneranut ataatsimiitsitaliaata nalunaarusiaq pitsaasutut nalilerlugu inassutigimmagu. Inatsisartunik akuersissutigineqassasoq, tapersersorneqassasoq. Atassummiit taamatut oqaaseqarluta ombudsmandip 2000-imut nalunaarutaa suliarilluagaasoq qujassutigaarput, Atassumiillu Inatsisartut ombudsmandiata suliaa pitsaasoq pillugu qutsavigaarput, tassa taamatullu suliatut pitsaasutut nalilerlugu tusaatissatut tiguarput.

 

Anthon Frederiksen, Kattusseqatigiit.

Inatsisartut ombudsmandiata nalunaarutaa Kattusseqatigiinniit pisarnertut soqutigalugu misissorsimavarput, imaattumillu naatsumik oqaaseqarfigissallugu.

Inatsisartut ombudsmandiata nalunaarutaani ilaatigut Naalakkersuisunut saaffiginnissutaasarsimasut aammalu ajoraluartumik ilaatigut akilertorneqarneq ajortut pillugit Kattusseqatigiinniit kaammattuutigerusupparput Inatsisartut ombudsmandiata nalakkersuisunut saaffiginnissutigisartagai sapinngisamik pilertortumik akissuteqarfigineqartarnissaat isumageqqullugu. Ataatsimillu assersuuteqalaarniarpugut, tassa pisortanit pensionit pillugit Inatsisartut peqqussutaata normu 10-p, 30. oktober 1998-imeersup ikaarsaarnermi aalajangersakkamik amigaateqarnera ombudsmandip ujartuiffigisimavaa, ilaatigut imaattumik allagaqarluni, isuaaffigilaassavaralu taanna "Inassuteqaateqaqqaarsimavunga Naalakkersuisut inatsimmik nutarterinermikkut aalajangersakkanik taamaattunik ilanngussaqarnissaa isumaliutersuutigissagaat, ikiup nalunaarusiorfiusup naanerani Naalakkersuisunik akissummik tigusaqarsimanngilanga". Tassa taamaattut arlalinnik takussutissaqarput ombudsmandip sulinerani ilaatigut pilertortuunngitsumik Naalakkersuisuninngaaniik ombudsmandip suliaanut qisuariartannginnerit.

Aamma nalunaarummi maluginiarparput ilaatigut pisortat ingerlatsinerat pillugu inatsisip Kalaallit nunatsinnut atortunnggortinneranit soorunami tupinnaggitsumik suliassat sunnerneqarsimasut, kisianni taamaakkaluartoq tassa taamatut naatsumik oqaaseqarluta ombudsmandip nalunaarutaa akuersaarlugu tusaatissatut tiguarput.

 

Paninnguaq Olsen, Inuit Ataqatigiit.