Ullut ataatsimiiffiusut 22-at, pingasunngorneq 7. november 2001, nal. 15:36

Oqaluuserisassami immikkoortoq 62

Piffissami 1. augustimiit 31. december 2001 tikillugu tunisinermi puisip amianut tapiissutip 380,00 kr.-iusup aalajangiussimaannarnissaa pillugu aalajangiiffigisassatut siunnersuut. Aappassaaniigassaq.

(Jakob Siverthsen)

(Aappassaaneernera)

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

Siullermeerneqarnerani Naalakkersuisut akissuteqanerminni itigartitseqqusinerat amerlanerussuteqartut isumaqatigaat. Tassalu Siumut, Inuit Ataqatigiit, Otto Steenholdillu.

Taamaattumik apeqqutigissavara kikkut siunnersuummut isumaqataappat?

Uatsi, utoqqatserpunga, siunnersuuteqartoq oqaaseqarniarpoq.

 

Jakob Sivertsen, Atassut.

Qujanaq. Tassa isumaqarpunga erseqqissaassallunga siunnersuutip tunngavianut. Tassa una siunnersuut tunngaveqarpoq siornaak novemberip 11-ani 2000-imi nalunaaqutaq qulinut Aningaasanut Inatsisissap pingajussaaneerneqarneranut ilanngullugu aamma nikuvilluta puisip amii akiisa appartinneqassappata 380,00 kr.-imut appartinneqarsinnaanerannik tamatta nikuvilluta akuersisimanerput.

Siunnersuutip siullermeerneqarnerani Naalakkersuisut siunnersuummut akissuteqarnerminni, siunnersuutip aningaasanut tunngasortai tamakkiisumik misissorsimanngilaa. Soorlu puisip amiinut 35 mio.kr.-init ukioq manna tapiissutigineqarsimasup ukiup naanissaanut sipporneqassamaarnersut tamarmik atorneqareersimanersut imaluunniit immikkut tapiissuteqarnissamik pisariaqassanersoq Inatsisartunut isummerfigisassatut Naalakkersuisut saqqummiutinngilaat, tamanna assut ajuusaarnarpoq.

Tassa siornaak oqareernittuut 11. november nal. 10.00 imatut Naalakkersuisumut apeqquteqarsimavunga, issuarusupparalu:

"Tassa aningaasanut 2001-imut Inatsisissap siullermeerneqarnerani puisit amiinut tapiissutinut tunngasunik, tassa 1999-imiit 2001-imut 9,4 mio.kr.-inik tapiutit ikilisinneqarnissaannut tunngasumik paaserusutaqarama. Nalunngilarput ukiuni kingullerni puisit nunatsinni pisarineqartartut amerliartorput, tamanna assut piniartoqarfimmiuni qujanarpoq aningaasarsiornerat assut annertuumik ikorfartorneqarsimammat. Kisianni tassa 2001-imut Aningaasanut Inatsisissaq misissoraanni tunisassioriaaseq allanngortinniarneqarpoq ullumimut erseqqisumik suli uagutsinnut nassuiaatigineqanngitsumik. Ilaatigut ullumikkut puisit amiisa nr. 1-inik taaneqartartut 500 kr.-it sinnilaarlugit avalliunerusuni akilerneqartartut 380,00 kr.-inut appartinniarneqarput, immikkut Aningaasanut Inatsisissap nassuiaataa eqqarsaatigalugu. Taamaattumik annertuuliuutiginagu uteruma pinngitsoorani aperineqartartussaagama puisit amiinut tunisassiorneq akitigut qanoq-una 2001-imi allanngortinniarneqartoq, taamaattumik piffissaq kingullerpaaq atorlugu paaserusuppara ullumikkut amminik tunisaqarnermi tapiissutit, tapeeriaaseq qanoq ilillugu Naalakkersuisut 2001-imi ingerlanniarpaat?" Issuaaneq naavoq.

Taavalu Naalakkersuisup akissuteqaataa naggasiullugu issuassavara:

"Aap, siullermik Jakob Sivertsenip apeqqutaanut tunngatillugu, tassa puisit amiisa akikilliniagaanerat pillugu taanna ilumoortortaqarpoq. Tassa nalunngisagut malillugit 1999-imi 44 mio.kr. qulaallugit tapiissutit akilerneqarput, ukioq mannalu siumut naatsorsuutiniippoq 37.400 t.kr.-it aamma atussagigut. Maannakkut Naalakkersuisunit eqqartorneqarnissaa qanittunnguuvoq, tamanna qanoq ilillugu qularnaarneqarsinnaanerata ilimanarseqqinnera iliorfigineqassanersoq. Ukioq manna uani Aningaasanut Inatsisissami aappaagumut allassimavoq 35 mio.kr.-init tassa appassasut, taakku tapiissutit Naalakkersuisuni tamaviaarullugu piniartoqarfiit tassa piniartuviit sapinngisamik eqqornagit akinik aaqqiinissaq sapinngisatsinnik anguniarparput, tamannalu neriuppunga angusinnaassallutigu. Immaqa aatsaat imak pitsaatigisumik immaqa 35 mio.kr. angunngikkaluarlugit aammalu piniartut akinik appaaffiginngikkaluarlugit immaqa allaat taanna angusinnaassallugit, taanna misissuilluarnitta paasinarsisikkumaarpaa".

Tassa Naalakkersuisup akissuteqaataa atuarpara. Issuaaneq naavoq. Tassa siornaak 11. november nal. 10.00 apeqqutigisama akissutaa taamaattumik paaserusunnarpoq Naalakkersuisup taanna qanoq akissaneraa. Qujanaq.

 

Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.

Naatsuarannguamik. Uani oqaluuserisassap tulliani aamma Godmand Rasmussenip siunnersuutaani tunngavilersuutit ersareqqissaartut oqaatigineqartut innersuussutigissavakka, taavalu naatsorsuutigilluinnarlugu akit pitsaanerusut KNAPK peqatigalugu aaqqissuunneqassasut. Isumaqatigiinniarnerit massakkut piareersarlugit aallartisarneqalereerput allaffeqarfimmi, naatsorsuutigaarput piniartunut aki pitsaanerusoq angusinnaassagipput, taanna siunnerfigineqarmat aamma Inatsisartuni. Qujanaq.

 

Finn Karlsen, Siulittaasoqarfimmi ilaasortaq, Atassut.

Tassalu allamik oqaaseqarniartoqanngilaq.

Oqaatigissavara siullermik utoqqatsissutigalugulu taasititsissalunga atuaraluarakku kukkusimasoq, allassimalluni kukkusimalluni - aatsaat iluarsivoq.

Tassa maannakkut taasissutigissavarput taanna Jakob Sivertsenip siunnersuutigisimasaa, piffissami 1. augustimiit 31. december 2001 tikillugu tunisinermi puisip amianut tapiissutip 380,00 kr.-iusup aalajangiussimaannarnissaa pillugu aalajangiiffigisassatut siunnersuut.

Siullermeerneqarnerani Naalakkersuisut akissuteqarnermini itigartitsinera amerlanerussuteqartut isumaqatigaat, Siumut, Inuit Ataqatigiit, Otto Steenholdtillu. Taamaattumik apeqqutigissavara kikkut itigartitseqqusinermut isumaqataanersut nikueqqullugit.

 

19-it.