Ullut ataatsimiiffiusut 22-at, pingasunngorneq 7. november 2001, 15:37

Oqaluuserisassami immikkoortoq 67

Piniarnerinnarmik inuussutissarsiutilinnut iluaqutaasussamik tunisinermi puisit amiinut tapiissutinut allannguisoqarnissaa pillugu aalajangiiffigisassatut siunnersuut.

(Godmand Rasmussen)

(Aappassaaneernera)

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

Taanna ataatsimiititaliami suliarineqarsimavoq. Taanna pinngikkallarnerani siunnersuuteqartoq oqaaseqarumavoq.

 

 

 

Godmand Rasmussen, Atassut.

Ataatsiititaliap suliarisimasaa una tassa tusaatissatut tigorusuppara. Aamma nuannaarutigivara qanilliallattoqarsimammat, naak piumasaqaatit ukua tamakkinngikkaluartut. Tassa Uummannaminngaanniit Nanortalik tikillugu taanna peerneqarpoq, kisianni isorliunerusuni Ammassalik, Illoqqortuut, Upernavillu Qaanaarlu tassani atuutinneqaannassalluni saniatigut piniartartunut tapeq. Taamaattumik iluatsillugu apeqqutigerusuppara Uumamnnaminngaanniit Nanortalik tikillugu saniatigut piniartartut/pinialuttartut amermik tunisisinnaajunnaarnerat qanoq aningaasatigut sunniuteqarsinnaanera kingusinnerusukkut akineqarnissara, massakkorpiaanngitsoq kissaatiginartissagaluarpara, imaannaagunanngimmat misissuinissamut tassunga aamma tunngasortaa.

Tassami taamaattoqassappat piniarnerinnarmik inuutissarsiuteqartunut akip qaffariaateqarsinnaanera naatsorsuutigikannersinnaagakku, kisianni tassa qujavunga annertunerusumik oqaaseqarnianngilanga uani qanilleriaapput ersarimmat. Qujanaq.

 

 

 

Finn Karlsen, Siulittaasoqarfimmi ilaasortaq, Atassut.

Allanik oqaaseqarniartoqanngilaq. Taamaammat massakkut taasinissaq. Tassa Aalisarnermut, Nunalerinermut, Piniarnermullu Ataatsimiititaliami eqqartorneqarsimavoq. Ataatsimiititaliallu inassutigaa puisit amiinik tapiissut, inuussutissarsiutigalugu piniartut taamaallaat atuuttunngorlugu allanngortinnissaanik Inatsisartut aalajangiivigisassaattut siunnersuut, allannguutissatut siunnersuummik saqqummiunneqartumik ilallugu akuersissutigineqassasoq.''

Tassangalu isumaqataasut qinnuvigissavakka nikueqqullugit.