Oqaluuserisassani immikkoortoq 70-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq arfineq-aappaat, pingasunngorneq oktoberip 24-at
2001, nal. 13:12
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit.
Ole
Lynge, Inatsisartut
Siulittaasuat, Inuit Ataqatigiit.
Suleriaatsimi
§ 15 naapertorlugu siunnersuutip aappassaaneerneqarnissaa Aningaasaqarnermut
Ataatsimiititaliap siunnersuummik suliarinnereernissaata tungaanut
unitsikkallarneqassasoq siunnersuutigineqarpoq. Siunnersuutigineqassaaq
aappassaaneerinissaq ulloq 3. novemberimut aningaasanut inatsisissatut
siunnersuutip aappassaaneerneqarnissaanut atasumik kinguartinneqassasoq.
Tamatumunnga akerliusoqarnerluni?
Otto Steenholdt, attaviitsoq.
Tassaana ippigisaqarluinnarama oqaaseqarusuttunga. Tassa tupigilluinnarpara Inatsisartunut ilaasortat partiiminnit toqqagaallutik ataatsimiititalianut ilaasortanngortinneqartut nunatta aningaasatigut qanoq ingerlaneranik ingerlasariaqarneranilluunniit soorlu soqutigisaqanngisuusii uparuartariaqarlugit misigisimagama.
Pissutsit ataqatigiillutik ingerlassappata nunatta aningaasatigut ingerlanera pisariaqartumik aamma ataatsimiititaliani ilaasortanit sakkortuumik qiviallattaasariaqarpoq. Pisiniarfimmi pilerigisarpassuaqartarpugut aningaasatigullu amikkittooraangatta allatut ajornartumik pilerisagut pinngikkallartarlugit.
Oqaatsikka makkua aallarnerpakka tupigilluinnarnerarlugu ataatsimiititaliami ilaasortat nunatta aningaasatigut qanoq ingerlaneranik soqutiginninnginnerarlugit. Taamak oqarnera ataatsimiititaliami ilaasortaasunut ajuallannassagaluarpoq. Taamali oqarpunga Inatsisartuni ilaasortaasugut tamatta aningaasatigut ingerlaaserput qanoq ittuusoq ilisimalersimagatsigu.
Partiit tamarmik aningaasat pillugit ataatsimiitialiami ilaasortaatitaqarput. Naatsorsuutigaaralu taakkua parteeqatitik aningaasaqarnitsigut pissutsit piviusut ilisimatittarsimassagaat. Oqaluttuunneqartarsimanngikkaannili allatut ajornaqaaq siunnersuutit aningaasassaqartinneqanngikkaluit nunarput aningaasaatilissuartut takorloorlugu ataatsimiititaliami anngaajuaannartariaqartarsimallutik.
Isumaqarpunga, ataatsimiititaliat suulluunniit aningaasaqarneq pillugu ataatsimiitaliamit ataatsimeeqateqarnerusariaqartut. Taakkua oqaluttuussinnaasarmassuk qanoq pissasoq. Ataatsimiititaliani suniluunniit ilaasortat partiiminnit akuerseqqullugit inanneqarsimasut aamma partiiminnit tassanngarpiaq kiisalu partiiminnit aningaasaqarnermut ataatsimiitialiami ilaasortaminnit oqqersuummik ataatsimiititaliami ilaasotaqatiminnut nassataqartussaapput. Siunnersuut akueriniagartik qanoq aningaasalersorneqassanersoq imaluunniit sukkut sipaaruteqarnikkut tamanna siunnersuut aningaasalersorneqarluni akuersaarneqarsinnaasanersoq.
Naalakkersuisut ilumoornerassavakka tassa manna pillugu misissuasoqalereerpoq taannarpiaq pillugu misissuisullu oqaaseqaatissaat utaqqisariaqarnerarmassuk. Paatsiveqanngitsumik ingerlasoqassanngilaq, imaluunniit ingerlaaseqassangilagut. Misissuisussanik pilersitseriarluta misissuisitattalu misissukkaminnik suli inerniliinngitsut suliaat qarsutiinnarlugit aalajangertassagutta tutsuiginanngilluinnartumik assoroorutaasinnaasumillu ingerlaaseqalernermik ernumanartumillu uanga nammineq isumaga naapertorlugu taajumavara.
Tassa ataatsimiititaliap siunnersuutaa aningaasaqarniarnitta qanoq inneranik ilisimasaqarpianngitsoq taamak oqarpunga taanna akerlilerlugu taasissaanga.
Lise Skifte Lennert, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq, Siumut.
Qujanaq. Immikkoortoq 70-ip, tassalu konto 45.10-p Kalaallit Nunaanni ilageeqarnermut tunngasup qaffanneqarnissaa pillugu aalajangiiffigisassatut siunnersuut taamatut Siulittaasoqarfiup siunnersuutigimmagu ataatsimiititaliami suliareqqitassanngorlugu innersuutiginissaa taanna Naalakkersuisut sinnerlugit akuersaarpara.
Qujanaq.
Ole Lynge, Inatsisartut Siulittaasuat, Inuit Ataqatigiit.
Qujanaq. Tassa kisianni una Otto Steenholdtip oqaaseqarnera najoqqutaralugu paasinngilara akerlerinerit novemberip pingajuani aappassaaneerneqarnissaa.
Otto Steenholdt, attaviitsoq.
Tassa taanna suliarisimavara ullaaq manna oqaluuserisassatut nassuiaat tusanngikkallarakku. Taamaattumik ajoriffissaqartissanngilara masssakkut imatut aaqqinnagu kisianni suliassanngorteqqinneqarnera isorinngilara.
Per
Rosing-Petersen, Siumut.
Tassa
uanga konto pingaarnermi 45.10-mi qaffaanissamut siunnersuutiga
kultureqarnermut ilinniartitaanermullu ataatsimiititaliap isumaliutissiissutaa
toqqammavigalugu tassalu amerlanerussuteqarluartut akuerisassatut
innersuussimagaluaraat aamma una aningaasanut tunngassuteqarmat taannartaa
paasilluarsinnaavara, kisianni eqqumiigilaarluguuna Otto Steenholdti
oqarluartaarpallaaqimmat aatsaannguaq eqqaalluinnaaqqinnaarlugu avinnikunik
angalasinnaasunik tamakkuninnga qinnuteqariarluni nammineq
tunngavilersimannginnera eqqarsarnartoqartilaarlugu eqqaaginnariga. Tassami
una atuarluarsimaguniut aamma siunnersuutiga sumik aallerfissamik
siunertaqarluni imaqarmat.
Otto Steenholdt, attaviitsoq.
Oqaaseqartup kingulliup utertilaarpaatigut siunnersuutigisimasaralu eqqaallugu. Uanga ataatsimiititaliamut nassiussassaqanngilanga oqariartortitassannik. Aamma tamatumunnga periarfissinneqanngisaannarpunga. Uani eqqaasitsissutigiinnarpara partiit tamarmik aningaasat pillugit ataatsimiititaliami ilaasortaatitaqarmata. Uanilu pineqartoq aamma inuttaqartippaat. Taavalu nammineq partiiminni oqallisigisussaassavaat una siunnersuut qanoq pissavarput? Aningaasaqarnermut ataatsimiitialiamut ilaasortaasup ilani oqaluussinnaasariaqarai oqaatigaara. "Ukorsiiaa imaappugut."
Taamaattumik taamatut paasiniarneqartarsimanngikkunik taava ataatsimiitialiami ilaasortat tusagaqarsimanngikkunik aningaasaqarnitta qanoq issusianik soorunami ornigutissapput ila qularnanngitsumik aamma Naalakkersuinermi illuatungiliuttunut kiiuminassaqaaq Naalakkersuisut ikinneruteqattaarlugit aningaasatigut ajortoortikkaluttuinnassagaanni. Tassa aqqutigineqartarput aamma tamakkua.
Taamaattuminguna taamatut oqaaseqatunga. Paaseqatigiissumik partiinit pingaartumik oqaloqatigiittarnissaq qularnanngilluinnartumik aningaasaqarniarnermut iluaqutaasinnaasumik nassataqarsinnaagaluarmat. Una siunnersuutigisimasara uanga nammineerlunga ataatsimiititaliami illersorluarsinnaavara oqaluullugillu kisianni tamatumunnga piffissaqartinneqanngilanga.
Ole
Lynge, Inatsisartut
Siulittaasuat, Inuit Ataqatigiit.
Aap,
tassa taamaalilluni tassunga oqaaseqarumasut killeqarput. Paasivaralu
Inatsisartut tamarmik siulittaasoqarfiup inassutaatut una §15 naapertorlugu
siunnersuut aappassaaneerneqarnissaa aningaasaqarnermut ataatsimiitialiap
siunnersuummik suliarinnereersimanissaata tungaanut oqaluuserisaq
unitsikkallarneqassasoq.
Tamatumunnga
akerliusoqanngilaq. Tassalu siunnersuutigineqartutut aappassaaneerinerup
nanginneqarnissaa novemberip pingajuani aningaasanut inatsisissatut
siunnersuutip aappassaaneerneqarnissaanut atasumik kinguartinneqarpoq.