Oqaluuserisassani immikkoortoq 73_1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq arfineq pingajuat, sisamanngorneq
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit.
Ole
Lynge, Inatsisartut
Siulittaasuat, Inuit Ataqatigiit.
Tassannga
siunnersuuteqartoq Maliinannguaq Markussen-Mølgaard saqqummiusseqqussavara.
Maliinannguaq
Markussen-Mølgaard, Inuit Ataqatigiit:
Qujanaq.
Matumuuna Inatsisartuni suleriaatsimi § 32 malillugu aalajangigassanngorlugu
siunnersuutigaara danskit amerikamiullu illersornissaq pillugu 1951-imi
isumaqatigiissutaata allanngortinneqarnissaa pimorullugu sulissutigineqassasoq.
Naak 1990-ikkulli ingerlanerini isumaqatigiissutip allanngortinneqarnissaa
Inatsisartut isumaqatigiillutik nalunaarutigereeraluaraat danskit
tukermersortuarsinnarput.
Erseqqissumik
paasisariaqarparput isumaqatigiissut nunasiaateqarnerup nalaani suliaasimasoq
ullumikkut nunasiaataajunnaarnermi suli atuuttutut taaneqarsinnaanersoq.
Tassami 1953-imi Danmarkimut nunasiaajunnaarluta naligisatut atalerpugut
1979-imilu namminersornerulerluta.
Isumaqatigiissut
27. april 2001 ukiunik 50-inngortorsiorpoq. Piffissanngorporlu nunatsinniit
peqataaffigineqartumik naliliiffigineqartumillu allanngortinnissaa.
USA-p
præsidentertaava upernaaq manna oqarpoq, ABM pillugu isumaqatigiissut
72-imeersoq qanganitserpallaarsimasoq ullutsinnullu naleqqutinnginnami
taarsertariaqartoq. Qanorli isumaqatigiissut 1951-imeersoq
qanganisaagitigissagaluarpaa.
Isummerfigisariaqartoq
alla tassaavoq USA-mut isumaqatigiissuteqassanersugut. Soorlu danskit
taamaaliorsimasut. Imaluunniit allatorluinnaq ilusilimmik illersornissakkut
isumaqatigiissuteqarniassanersugut. Assersuutitut taaneqarsinnaavoq Danmarkip
EF-imut iserneratigut nunarput immikkut pineqarpoq taamatuttaaq
illersornissakkut immikkut isigineqarnissarput periarfissaasariaqarpoq.
Taamaattumik
siunnersuutigaara 1951-imi isumaqatigiissutip allanngortinnissaa sukumiisumik
sulissutigineqassasoq tamatumanilu danskit allatut isummertinniarnissaat
suliassat siullersarissavaat pingaarnerpaartaralugulu. Tassami Amerikamiut
tamatumunnga ammallutik nalunaartareerput. Ukioq 2001-imiippugut nunasiaanerit
qaangiussoreerput, kikkullu tamat oqartussaaqataanerat demokrati
pingaartinneqarluni demokratitut taaneqarsinnaanngilaq nammineq nunatsinni
illersornissakkut oqartussaatinnaveersaarneqarnerput.
Qujanaq.
Jonathan
Motzfeldt, Naalakkersuisut
Siulittaasuat, Siumut.
Inatsisartunut
ilaasortaq Maliinannguaq Markussen-Mølgaard Inatsisartut suleriaasinni ' 32
naapertorlugu aalajangiivigisassatut siunnersuuteqarpoq danskit amerikamiullu
illersornissamik isumaqatigiissutaata 1951-imeersup erseqqissumik
allanngortinneqarnissaanut tunngassuteqartumik.
Ilumoorpoq
isumaqatigiissut taanna ullumikkut ilisimasatsinnit allaaneroqisumik
tunngaveqarluni isumaqatigiissutigineqarsimammat. Nunasiaanerup nalaani
aammalu nunatta Namminersornerulernera sioqqullugu tamanna
isumaqatigiissuteqarfigineqarsimavoq. Taamaammat taassumap
nutartertariaqalernera uangattaaq isumaqataaffigiinnarsinnaavara.
Taamaattumillu 1997-imiit danskit naalakkersuisui uagut Naalakkersuisuni
siunnersuuteqarfigaagut danskit naalakkersuisui uagullu naalakkersuisut
isumaqatigiinnialissasugut USA -mi isumaqatigiissutip nutaamik
isumaqatigiinniutigineqarnissaanik piareersarnissaq pillugu.
Tassa
nunarput isumaqatigiissummut peqataalerniassammat. Danskilli naalakkersuisui
illersornissamut isumaqatigiissuk nutaamik
isumaqatigiinniutigineqartariaqartutut isiginngilaat. Tassagooq nunatta
illersorneqarneranut suli pitsaasumik toqqammavissaqarmat iliuuseqarnissamullu
periarfissaqarluarmat. Danskillu naalakkersuisuisa aamma oqaatigaat
amerikamiut isumaqartut isumaqatigiissut nutaamik isumaqatigiinnniutiginissaa
pisariaqanngitsoq.
Kiisalu
aamma danskit Naalakkersuisui isumaqarput angusasaat nutaamik Naalakkersuisut
isumaqatigiinniarnikkut angorusutaat illersornissamut isumaqatigiissutip
ilassutissaanik isumaqatigiissuteqarnikkut anguneqarsinnaassasut. Soorlu
isumaqatigiissutip avatangiisinut tunngasumik ilassuserneqarneratigut.
Nunatta
EF-imit tassa maanna EU-imit aninermigut immikkut inissisimalerneranut
tunngatillugu oqarsinnaavunga illersornissamut isumaqatigiissut
eqqarsaatigalugu nunarput immikkut inissisimasoq. Tassani illersornissamut
isumaqatigiissut nunatta illersorneqarnissanut isumaqatigiissutaavoq,
kisiannili inatsit tunngaviusoq naapertorlugu kiisalu Namminersornerulerneq
inatsit naapertorlugu danskit naalakkersuisui tassaapput illersornissamut
isumaqatigiissuteqarnissamut pisinnaatitaallutillu nutaamik
isumaqatigiinniarsinnaatitaasut.
Naalakkersuisuni
paasivarput danskit naalakkersuisui suliami matumani isumaat
allanngorsimanngitsoq. Taamaattorli danskit naalakkersuisui uagullu
Naalakkersuisut isumaqatigiippugut illersornissami isumaqatigiissut
isumaqatigiissummut ilassutit atorlugit nutarterneqarnissaa anguniarsarigipput.
Imaluunniit anguniarniassagipput. Taakkulu atorlugit aamma nunarput
isumaqatigiissuteqartunut peqataasussanngorlugu.
Anders
Andreassen, Siumup
oqaaseqartua.
Qujanaq.
Inatsisartuni ilaasortaq Maliinannguaq Markussen-Mølgaard Inatsisartut
suleriaasianni ' 32 naapertorlugu aalajangiivigisassatut siunnersuuteqarpoq
danskit amerikamiullu illersornissamut isumaqatigiissutaata 1951-imeersup
erseqqissumik allanngortinneqarnisaanut tunngassuteqartumik.
Illersornissaq
pillugu isumaqatigiissut 1951-imeersup nutarterneqarnissaa siusinnerusukkulli
Siumumiit piumasaqaatigisareersimavarput.
Siumumiit
maluginiarparput Naalakkersuisut akissutiminni oqaatigigaat danskit
Naalakkersuisui imaluunniit danskit Naalakkersuisuilu isumaqatigiissimallutik
isumaqatigiissutaareersumut ilassutissamik pilersoqarnissaa ullumikkut
pissutsit tunngavigalugit anguniarneqassasoq. Tamannalu aamma Siumumiit
isumaqatigaarput.
Siumumiit
isumaqarpugut isumaqatigiissummut ilassutissami MD -mut tassa siusinnerusukkut
NMD-mut taaneqartartumut tunngasut aamma eqqarsaatigineqartariaqartut. Siumut
isumaqarpoq Thulemi raadarip MD-mut atorneqarsinnaanissaa imaluunniit
atorneqarnissaa taamaallaat akuerineqarsinnaasoq uku tunngavigalugit.
Siullertut aaqqissuussineq sunaluunniit nunanut allanut akeqqersorluni
saassussisinnaanermut atorneqassanngilaq. Upalungaarsimallunili
sillimanissamut taamaallaat atorneqassalluni.
Aappassaatut
aaqqissuussineq sunaluunniit nunarsuatsinni toqqissisimanermik
innarliisuussanngilaq. Tamannalu naalagaaffissuit pissaanillit tassalu USA-p
Ruslandillu Kina paaseqatigalugu qulakkeereersimasariaqarpaat ABM-traktatimik
allanngortitsisumik taartissaanilluunniit isertitsisoqannginnerani.
Taamatut
Siumumiit oqareerluta oqaatigissavarput aamma siunnersuut taamatut
isikkoqartillugu uani oqaluuserisami immikkoortumi aalajangiiffigisassatut
isiginnginnatsigu. Tassami soorlu siunnersuuteqartup aamma nunanut allanut
sillimaniarnissamullu ataatsimiititaliami siulittaasuusup ilisimagaa
naalagaaffeqatigiit Danmark, Kalaallit Nunaat Savalimmiullu tunngaviusumik
inatsisaat naapertorlugit kiisalu aamma Namminersornerulerneq pillugu inatsit
naapertorlugu Danmark tassaammat illersornissamut isumaqateqarnissamut
pisinnaatitaallunilu nutaamik isumaqatigiinniarsinnaatitaasoq.
Taamaammallu
Naalakkersuisut iluarisimaarpagut angusimammassuk
isumaqatigiinniartoqaqqilerpat Danmark nunarpullu qimoqatigeeqqissaarlutik
ingerlassassut. Aammalu Thule-mi radari pillugu isumaqatigiinniartoqalerpat
nerrivimmi issiaqataanissaq, imaluunniit issiaqataanissarput
periarfissaalersoq atorluarneqartariaqartoq.
Taamatut
Naalakkersuisut tunngaviusumik inatsit Namminersornerulernerlu pillugit
inatsit sipporlugit angusaqarsimammata Siumumiit nersualaartariaqarsoraarput.
Finn
Karlsen, Atassutip
oqaaseqartua.
Inatsisartunut
ilaasortaq Maliinannguaq Markussen Mølgaard siunnersuuteqarpoq
illersornissamut isumaqatigiissutip 1951-imeersoq pimoorullugu
allanngortinneqassasoq. Tamannalu Atassummiit naatsumik imaattumik
oqaaseqarfigissavarput.
Siullermik
nalunngilarput Naalakkersuisugut qaluunaat naalakkersuisuinut piumasaqarlutik
anguniagarigaat illersornissamut tunngatillugu tassa amerikamiunit siunissami
isumaqatigiinniartarnissani nunatta peqataalersinnaanera. Tamanna aamma
Atassummiit isumaqatigalugu matuma siornali oqaatigisartareerparput
pisariaqarluinnartutummi isigaarput, nunatta taamatut pisoqartillugu
nunatsinniit peqataasoqartarnissaa.
Aamma
Naalakkersuisut akissuteqarnerminni erseqqissumik oqaatigaat danskit
naalakkersuisuilu isumaqatigiissimallutik illersornissamut isumaqatigiissut
isumaqatigiissummut ilassutit nutarterneqarnissaa anguniarniassagitsik.
Peqatigitillugu nunatta peqataatitaqarnissaa. Taamatut naatsumik siunnersuut
pillugu oqaaseqarluta Naalakkersuisut akissuteqaataat isumaqatigaarput.
Johan-Lund
Olsen, Inuit
Ataqatigiit oqaaseqartuat.
Qujanaq.
Inatsisartuni ilaasortap Maliinannguaq Markussen-Mølgaardip
aalajangiiffigisassatut siunnersuutigisaa manna Inuit Ataqatigiit
iluarisimaarparput tamakkiisumillu taperserlutigu.
Ilumoorppoq
illersornissaq pillugu 1951-imi danskit amerikarmiullu
isumaqatigiissutigisimasaat qanganitsersimaqimmat nunasiaateqarnerullu nalaani
kingornussiatut maannamut suli inissisimalluni atuutsinneqarmat, naak nunarput
1953-imi kingornalu 1979-imi naalagaaffeqatigiinnerup iluani
Naalakkersuinikkut pissutsit eqqarsaatigalugit allatut aamma
inissisimalereersimagaluartoq.
Taamaattumik
1951-imi isumaqatigiissutaasimasup nunatta oqartussaasuisa peqataaffigisaanik
pimoorullugu isumaqatigiinniutigineqaqqinnissaa Inatsisartuni
aalajangiusimaannarneqassasoq Inuit Ataqatigiit soorlumi siusinnerusukkut
taamaaliortuartareersugut ullumi aamma kaammattuutigeqqissavarput.
Siunersuuteqartoq
isumaqatigilluinnarlugu aamma isumaqarpugut danskit oqartussaasui
killinniartariaqarigut allatut isummertinniaqqullugit taakkumi ulloq manna
tikillugu tukermersortuinnarput isumaqarlutik isumaqatigiissutip nutaamik
isumaqatigiinniutiginissaa pisariaqanngitsoq.
Inuit
Ataqatigiimmi tunngaviusumik isumaqarpugut piumasariuartariaqarippullu
nunarput naalagaaffeqatigiinnerup iluani apeqqutinut nunatsinnut
attuumssuteqartunut nunanut allanut tunngasutigut illersornissamullu
politikkimi tamakkiisumik sunniuteqalersinneqar-
tarialersinneqartariaqartoq,
taamaattumillu aamma nunarput naalagaaffeqatigiinnermi
aaqqissusseqqittoqarneratigut nutaamik aamma inisisimalertariaqartoq.
Nunanut
allanut isumannaallisaanermullu politikkeqarnermi nunatta
sunniuteqarnerunissamik oqartussaanerulernissamillu kissaatigisai
piumasaqaataalu pissusissamisoorluinnarput. Danmarki piumasaqaatitsinnut
paasinninnerusariaqarpoq eqqaamasariaqarpormi nunarsuarmi sumi tamani
naalagaaffiit nunasiaasimasullu akornanni pissutsit
nutarteriffigineqartuarmata aaqqissuussinerillu nutaat aqqusaarneqartarlutillu
nunasiaasimasut sunniuteqarnerulernerannik
oqartussaaqataatinneqarnerulerneranillu maanna kinguneqartarmata aamma nunanut
allanut tunngasuni illersornissamullu politikkeqarnermut tunngasuni.
Tamanna
Danmark-imut tulluutissagaluarpoq nunat tamat akornannimi Danmarki
inuppalaarnermik inuiannillu ikinnerussuteqartunik naqisimanninnerit
malersuiniarnerillu tamaasa nungutitaatinneqarnissaannut atatillugu
nersualaarneqakkajuttarpoq. Qallunaat naalagaaffiatali nunarput sinnerlugu
isumannaallisaanermik illersorneqarnissatsinnullu politikkimik ingerlatsinera
inuiaqatigiinnut kalaallinut nersorneqaatigisinnaasaanik
akuerineqarsinnaanngitsumillu pitsaanngitsumik misillerfigisarsimaqaarput.
Ukiuni
qaangiuttuni Avanersuarmi Pituffimmilu pissutsit pillugit
isertukuluffigineqartarsimanitsigut ilikkalersimavarput illersornissamut
tunngassuteqartut oqaluuserineqaraangata aatsaat akulerutsinneqartarluta suut
tamarmik Danmarkip USA-llu akornanni aalajangerneqareeraangata
ilisimatinneqarnissarpullu danskit amerikarmiullu naalakkersuisuisa
politikkikkut ulorianaateqanngitsutut aatsaat tamanna isigigaangassuk.
Avanersuarmi
ukiut ingerlanerini isertukuluutigineqarlutik pisimasorpassuit
uissuumminartorpassuillu imminik oqaluttuutereerpaatigut taamatut danskit
naalakkersuisuisa inuiaat kalaallit piinnarsinnaanngikkaatigut.
Inuit
Ataqatigiit taamaattumik isumaqarpugut illersornissaq sillimaniarnissarlu
eqqarsaatigalugu aalajangiisarnernini nammineerluta qularnaatsumik
peqataatinneqartuartariaqartugut suut tamarmik Danmarkip USA-llu akornanni
aalajangerneqareeraangata aatsaat pinnginnerini.
Illersornissaq
pillugu 1951-imi isumaqatigiissut qanganitsersimasoq Danmarkip nunattalu
naalagaaffeqatigiinnerannut minnerunngitsumillu avanersuarmiunut
ajornartorsiutinik sorlanitsitsereerpoq. Allanngortinneqartariaqarpoq Inuit
Ataqatigiiniillu naammaginngilarput isumaqatiigiissummut ilassutitut
imaluunniit ilassutit atorlugit nutarterneqaannarnissaa
siunnerfigineqaannassappat.
Danskit
naalakkersuisui tamatumani killinneqarsinnaanngippata taamaattumik aamma
isumaliutissanut ilaatittariaqarparput isumaqatigiissutip nutarterneqarnissaa
anguneqarsinnaaqqullugu nunat tamat eqqartuussiviat Haagimiittoq aqqutigalugu
malersueqqissannginnersugut.
Tamannami
periarfissaq pillugu aviisimi ullormut saqqummersartumik Informationimi
martsip 23-ani ikioq manna Dansk Udenrigspolitisk Institutimeersoq ilisimatooq
ima allappoq. Unalu issualaassavara, "USA-mut isumaqatigiissuteqarnissaq
aaqqiagiinngissutaalissagalaluarpat naggaterpiaatigut danskit sakkortuumik
inissisimassagaluarput nunat tamat eqqartuussiviat Haag-imiittoq
aqqutiginiarneqarsimasuugaluarpat. Periarfissaq 1968-imi aamma
isumaliutigeqqissaarneqarsimasoq." Issuaaneq naavoq.
Tassa
Dansk Udenrigspolitisk Institutimeersup, DUPI-meersup ilisimatuup allaaserisaa
upernaaq manna. 1968-imi taamatut isumaliutersortoqarpoq. Tassanimi
ilisimaneqartutut timmisartorsuaq qaartartunik nakkakaatitsisartoq B-52
qaartartunik brint-italinnik sisamanik usilluni Avanersuarmi nakkaqqammerpoq
aaligooq akerlerluinnaanik danskit naalakkersuisuinit nikerartunik
tuppallersaajuartoqartoq nunatsinnigooq sakkussiarsuarnik atom-italinnik
toqqorsiveqartoqanngitsoq silaannakkullu tamakkuninnga nunarput
qulaavaajuarneqanngitsoq.
Haagimi
eqqartuussiviup aqqutigineqarsinnaanera taamaattumik eqqarsaatigeqqunaqaaq
ukiorpassuimmi isumaqatigiissutip 1951-imeersup
isumaqatigiinniutigineqaqqinnissaanik Inatsisartut puimasaqaateqartarnerput
suli ulloq manna tikillugu angusaqarfiusimanngilaq danskimmi USA-llu
oqartussaasui oqaatigeriikkattut maannamut tukermersortuarput.
Taamatullu
oqaaseqarluta siunnersuuteqartup aalajangiiffigisassatut siunnersuutta Inuit
Ataqatigiit tamakkiisumik tapersersorparput aappassaaneerisoqartinnagulu
kissaatigissallugu siunnersuut Inatsisartut nunanut allanut
sillimaniarnermullu ataatsimiititaliaani
isumaliutissiissusiorfigineqaqqaassasoq.
Mogens
Kleist, Kattusseqatigiit
oqaaseqartuat.
Illersornissaq pillugu 1951-imi danskit amerikarmiullu isumaqatigiissutaata
allanngortinneqarnissaa pillugu aalajangiiffigisassatut siunnersuut
Maliinannguaq Markussen-Mølgaard saqqummiussaanut Kattusseqatigiinniit imatut
oqaaseqaateqassaagut.
Aalajangiiffigisassatut siunnersuut qangarsuarli eqqartorneqartoq
nalunngilarput. Tassami isumaqatigiissutip nunasiaateqarnerup nalaanili
sananeqarsimammat. Taamaattumik siunnersuuteqartoq paasisinnaavarput nutaamik,
naliliinissamut nutaamik allamik taarserlugu allanngortinneqarsinnaanissaanut
ujartuilluta inatsisitigut periarfissavut suunersut
ujartortariaqaratsigit.Taamaattorli nalunngilarput grundlovi malillugu uagut
kalaallit annertunerusumik oqartussaaffeqanngilagut nunatsinni
radareqarfeqarnerit eqqarsaatigalugit.
Tamatta nalunngilarput isumaqatigiissut nutaanngeqisoq. Aammalu ukioq
kingulleq april-imi Washington-imiikkatta Colarado Springsimilu ersarissumik
Amerikamiut oqaatigisimammassuk isumaqatigiissut nutaanngilisimaqisoq ammalu
ersarissumik oqatigaat amerikamiut nammineq ammallutik isumaqatigiissummut
nutarterisinnaanissamut tunngatillugu.
Taamaattorli qallunaat naaggaartuarsimapput isumaqatigiissutip
nutarterneqarnissaanut. Qallunaat oqaatigisarpaat isumaqatigiissutip
aaqqiivigineqarniarpat imaluunniit nutarterneqarniarpat taamaallaat
isumaqatigiissutip ilassutissatut aaqqiivigineqarsinnaanissaa taakkartorlugu.
Oqartariaqarpugummi qalunaat nunaata nunarput atorluaqaa. Minnerunngitsumik
NATO-p iluani qaffasissumik inissisimavoq Pituffik Amerikamit
radareqarfeqarneranik kinguneranik. Taamaattumik Kattusseqatigiinniit
paasisinnaakutsoorparput qallunaat amerikamiullu isumaqatigiissutertik
allanngortikkusunngimmassuk. Qallunaat amerika-miunut isumaqatigiissutertik
allanngortikkusunngimmassuk.
Taamatut isumaqatigiissut allanngortinneqassappat qallunaat NATO-mi
inissisimanerat annikillisorujussuussaaq. Naalakkersuisut Siulittaasuata
akissuteqaateqarnermini oqaatigisai tassalu isumaqatigiissutip ilassutissatut
aaqqiivigalugu aaqqinneqarsinnaanissaa periarfissatuartut oqaatigimmagu.
Taaamaattoq Kattusseqatigiinniit siunnersuuteqartoq
isumaqatigilluinnarparput taamatut ujartuimmat. Inatsisartutigoorlugumi
periarfissarisinnaasagut sukumiisut ujartortariaqartutut tungitsinniit
oqaatigerusukkatsigit.
Taamatut naatsumik oqaaseqarluta siunnersuuteqartumut tapersiinerput oqaatigissavarput. Qujanaq.
Otto Steenholdt, attaviitsoq.
Siunnersuut ukiut ingerlaneranni nipittuutivillugu Inatsisartuni oqallisigineqartarpoq. Naalakkersuisut Siulittaasui nikittartut pimoorusserpaluttumik nipeqarlutik Danmarkimi naalakkersuisunut oqaloqatiginnittarput pisarnerlu malillugu Inatsisartunut nassuiaateqartarlutik. Inatsisartut ataatsimiititaliarlu nunanut allanut illersornissamullu sammisaqartoq isumaqatigiilluinnarlutik Naalakkersuisunut inassuteqartarput Danmarkimi Naalakkersuisut oqaloqatigeqqullugit.
Naalakkersuisut Siulittaasuat ilaanneeriarluni sukariivilluni Inatsisartut peqqussutaannik illersuilluni oqaaseqarniarpaluttarpoq kinguneqartanngitsumilli. Isumaqarpunga ullumikkut siunnersuutaagaluartup akineqarneratigut soorunalumi aamma uagut 1997-imi angussuaasaarnerigaluarnerput ersarissumik paatsuugassaanngilluinnartumillu qallunaat naalakkersuisuinit uatsinnut ataataanerpaatuut aalajangersimalluinnartumik imatut oqaaseqarfigineqartut. "Nipangerlusi pissaasi ilissi tamatumunnga oqaasissaqanngilasi."
Saqqummiussisoq Maliinannguaq Markussen-Mølgaard, nunanut allanut sillimaniarnissamullu Siulittaasuusoq saqqummiussamini ersarissumik oqarpoq, issuarpara: "Taamaattumik siunnersuutigaara 1951-imi isumaqatigiissutip allanngortinnissaa sukumiisumik sulissutigineqassasoq. Tamatumanilu daskit allatut isummertinniarnissaat suliassat siullersarissavaat pingaarnerpaartaralugulu. Tassami Amerikamiut tamatumunnga ammallutik nalunaartareerput."
Ataatsimiititaliami pingaaruteqaqisumi Siulittaasoq taamak ersaritsigisumik Amerikamiut qanoq oqarsimaneri pillugit oqarpoq. Naalakkersuisullu Siulittaasuat aamma Inatsisartut oqariartortorisartagaat akerlerluinnaanik akissumminik oqarpoq. Issuassavara, tassa imatut oqarpoq: "Amerikamiunngooq isumaqartut isumaqatigiissutip nutaamik isummerfiginissaa pisariaqanngitsoq."
Siulittaasut marluk susussamik utaqqiffigisamik uatsinnut assigiinngitsunik oqariartuuteqarput. Tamannalu Inatsisartut naammagisinnaanngilluinnarparput. Arlaat eqqunngitsumik qularnanngilaq nalunaaruteqarsimassaaq. Qallunaat naalakkersuisuisa akissuteqaammi oqartinneqarnerat sakkortoqaaq.
Illersorneqarnissamunngooq isumaqatigiissut nutaamik isumaqatiginninniutigineqartussatut isiginngilaat. Isumaqatigiissutaasimasorooq avatangiisinut tunngasunik ilassusiinnarli. Uanga ukiorpassuarni nunatta inatsisartoqarnerani pingaartitsiuarlunga ilaasortaasimasunga imaasiallaannaq nipangersitaajumanngilanga. Pingaartumik eqqaamagakku isumaqatigiissutip 1951-imeersup allanngortinneqarnissaa Naalakkersuisunut, Naalakkersuisunit Inatsisartunillu isumaqatigiilluinnartunit aalajangiiffigineqarsimammat.
Imaasiallaannaq nipangersitaassanngilagut. Taamaattumik siunnersuutigissavara oqallinneq manna kipitinneqassasoq. Inatsisartullu imaattumik aalajangiussaqassasut, atuarpara, kisiaani Siulittaasumut tunniutilaartariaqarpara: "Kalaallit Nunaanni Inatsisartut sisamanngornermi oktoberip 25-ani 2001 attatsimiittut siusinnerusukkut alajangiussartik, tassa illersornissaq pillugu 1951-imi danskit amerika-miullu isumaqatigiissutaat allanngortinneqassasoq aalajangiussimavaat. Illersornissarlu pillugu nutaamik isumaqatigiissusiornermi kalaallit politikkeriisa peqataatinneqarnissaat taamatuttaaq aalajangiusimallugu. Tamatuma kingorna Inatsisartut ullormut oqaluuserisassap tullianut ingerlaqqissapput."
Lars-Karl Jensen, ataatsimiinnermik aqutsisoq, Siulittaasoqarfimmi ilaasortaq, Siumut.
Ataatsimiinnermik aqutsisutut siunnersuutigissavara Siulittaasoqarfik naapilaartariaqartoq una suleriaatsimi '-imik innersuussuteqarani taamatut nipilimmik ilaasortaq siunnersuuteqartoq saneqqutiinnarneqarsinnaanngimmat.
Taava minutit 15-it
unilaarnissaput siunnersuutigissavara akerlerineqanngippat. Akerlerineqanngilaq.
Minutit 15-it unilaassaagut. Ataatsimiinneq unikkallarpoq.
Lars-Karl
Jensen, Siulittaasoqarfimmi
ilaasortaq, Siumut.
Ataatsimiinneq
nangeqqippoq. Tassa unillatsiarnerput sioqqullugu Inatsisartuni ilaasortaq
Otto Steenholdt siunnersuuteqarpoq Inatsisartut oqaluuserisassat tullianut
ingerlaqqissasut. Siunnersuummut tunngavilersuutigisaa Inatsisartut
siusinnerusukkut aalajangiiffigisimasaat tassaasoq Inatsisartut
illersornerissamik isumaqatigiissut 1951-imeersoq allanngortinneqarnissaannik
aalajangersimaneq. Otto Steenholdtip siunnersuutaa malinneqassappat tamanna
isumaqarpoq oqaluuserineqartoq immikkortoq 73 atorunnaassasoq tassalu
Inatsisartuni suleriaaserput malillugu ' 50 innersuussutigalugu.
Taamaattumik
apeqqutigissavara siunnesuummut tassalu Otto Steenholdtip siunnesuutigisaanut
tamatuma kingorna Inatsisartut ullormut oqaluuserissaasa tullianut
ingerlaqqissasut tassungalu isumaqataasut nikueqqussavakka.
1.
Taava
apeqqutigissavara tassunga isumaqataanngitsut nikueqqullugit.
29.
Taava
apeqqutigissavara taaseqataanngitsoqarnersoq?
Naamik.
Taamaalilluta
killiffigisarput malillugu tulliulutik oqaaseqartussat allassimaneri
tulleriinneri najoqqutaralugit siulliussaaq Maliinannguaq Markussen-Mølgaard,
tassalu siunnersuuteqartoq.
Maliinannguaq
Markussen-Mølgaard, Inuit Ataqatigiit.
Siunnersuuteqarninnut
patsisaanerpaasoq nalunngilara isumaqatiginninniarnerit ingerlanneqarsimasut
aamma tamatuminnga ilisimatinneqarnikuuvugut, kisianni tassa
naammagisimanngilara tapiliussatut isumaqatigiissuteqaannarnissaq matumani
apeqqummi, isumaqarluinnarama ukioq manna ukiunik 50-inngortorsiornera
tassumap isumaqatigiissutip qanganitsersimaqaisup naqissuserlugu
piumasaqaatigisariaqaripput aamma siusinnerusukkut piumasaqaaatigeriigarput
Inatsisartuni taassumap isumaqatigiissutip uagutsinnit
akuersaanerqarsimanngisaannartup nunasiaanerup nalaani suliaasimasup aammalu
uatsinnit oqartussaatitsinngitsup allanngortinenqarnissaa.
Taamaattumik
uani partiit oqaaseqartuinut tunngatillugu oqaatigissavara ingammik Siumut
aammalu Atassut, Atassutip tungaaninngaanniit oqaatigineqartoq una
isumaqatigiissuut maannakkut angusarineqarsimasup naammagiinnartutut illugit,
tapiliussatut isumaqatigiissuteqarsimaneq taanna isumaqatigimmassut aammalu
paaserusullugu isumaat allanngorsimanersoq siunissami isumaqatigiissutip
allanngortinenqarnissaanut oqariartuutigisartakkatik allangortissimaneraat,
tassami tapiliussatut isumaqatigiissutip tassani naammagisimaarlugit
oqaatigimmatsigit.
Una
Naalakkersuisut Siulitaasuatta akissuteqarnermini oqaatigisaa. Erseqqissumik
oqaatigavaa isumaqatigiissutip allanngortinnissaanut tunngasumik
pisortatigoortumik aammalu paasinartumik akissuteqarnemini oqaatigivaa danskit
naalakkersuisuisa aamma oqaatigaat amerikkarmiut isumaqartut isumaqatigiissut
nutaamik isumaqatigiinniutiginissaa pisariaqanngitsoq. Tassani
maluginiartaraiqarpoq danskit naalakkersuisuisa tamanna oqaatigisimagaat,
kisianni uanga siunnersuuteqarninni oqaatigivara amerikkamiut ammallutik
uagutsinnut oqartarsimasut, tassanilu eqqaamalluinnassavarput siorna
Pentagonimi ataatsimiinnitsinni partiinit aamma tamanit peqataaffigineqartumit,
taanna saqqummiukkatsigu nunatsinninnngaanniit allaat
tusarsimanngisaannarsimallugu taammatut kissaateqartugut oqaatigineqarmat
qullersaqarfimmiit. Aammalu eqqaamneqassaaq siorna augustimi USA-mi
viceudenrigsministeri maaniikkami erseqqilluinnartumik aamma tassani oqarmat
ataatsimiititaliamut aammalu nuna tamakkerlugu TV-kkut apersorneqarluni
oqarpoq, apeqqut taanna qaqinneqassappat apeqqutaasut tassaasut kisimik
kalaallit qallunaallu isumaqatigiillutik saaffiginnissuteqarsinnaanissaat.
Tassa taakku aallaavigerpiarlugit taamatut siunnersuuteqarninni oqaaseqarpunga,
kisianni aamma maluginiartuarsimavarput ataatsimiititaliami aamma
siullermeersumik Nunanut allanu Sillimaniarnermullu Ataatsimiititaliami
Qallunaat Nunaanni ataatsimeeqateqarnitsinni 1999-imi Udenrigspolitsik
Udvalgimut saqqummiukkatsigu taakku oqaatigimmassuk amerikamiut taanna
kissaatiginngikkaat. Taammaattumik oqaatsit taakku marluk assigiinngitsut
sorleq ilumoornersoq soorunami paasisariaqarparput.
Oqaaseqartunut
allanut oqaatigissavar Kattusseqatigiit tapersiinerannut qujagama, aammalu
attaviitsup tapersiineranut qujallunga siunnersuutinnut.
Ilaatigut
taamatut tukimmersimaarneq nunanut allanut tunngasutigut kalaallit
ataatsimoorlutik EU-mut naaggaarnikkuupput anerusunnikuupput, aamma taanna
Qallunaat Nunaanninngaanniit ataqqineqarluni piviusunngortinneqarnikuuvoq
allaat uagut nammineq isumaqatiginninniartalersimalluta.
Uanilu
apeqqummi aamma kalaallit tamarmik kissaatigivat taanna isumaqatigiissut
nunatsinnut attuumassuteqarluinnarmat allanngortinneqartariaqartoq. Soormi
aamma taamatut EF-imi periuseq malillugu taanna ammaffigineqarnianngittsoq
qallunaat tungaanninngaanniit.
Inuit
Ataqatigiit oqaaseqartuannut tapersiinerannut qujavunga allaallu ilaatigut
oqaatigineqarmat taamannak ukiuni arlalissuanngortuni kissaatigisarput
tusarneqanngiinnassappat eqqartuussivik Haagimiittoq inuit
pisinnaattitaaffiinut attuumassuteqartoq, taanna taasariaqassallugu.
Ajoraluarpoq kisianni tassa inuiattut pisinnaatitaaffigut nunatsinni pisut
oqartussaaqataafigerusukkatsigit tusaaneqarusunngikkutta allatut
ajornarsinnaavoq, kisianni soorunalimi Inatsisartut taanna
isummerfigisussaavaat. Aammalu neriuutigeqaara isumalioqqilluta una
oqaluuserineqartoq ataatsimiititaliami Nunanut allanut Sillimaniarnermullu
Ataatsimiititaliami ingerlatissagipput, taavalu aamma
isumaliutissiissuteqarluta aappassaaneernissaanut. Qujanaq.
Jonathan
Motzfeldt, Naalakkersuisut
Siulittaasuat, Siumut.
Saqqummiussamut
akissutigisannut isumaqarpunga amerlanerusut paasinnillutik aamma
naalakkersuinikkut killiffigisarput paasigaat. Naalakkersuisuni
aalajangiusimavarput 1951-iminngaanniit isumaqatigiissutit
nutarterneqarnissaanik oqariartuut. Taanna aalajangiusismavarput danskillu
isumaqatigiissutigisinnaanngilarput kisianni maannakkut. Taanna
oqaatigissavarput erseqqissumik.
Assortuuttoqanngilaq
tassani, Inatsisartut aalaajangereernikkuupput tassani aamma
utqattaartuarsinnaavarput, kisianni nalunngereerparput taanna
ingerlariaqqiffissatsinnik akornusiisoq.
Taamaattumik
Siumup Atassutillu oqaaserisamikkut naalkkersuisunut tapersiinerat erseqqissoq
aammalu Siumup oqaaseqartuini ilumoorpoq maannakkut killiffigisaq
qiviassagaanni tamakkua tunngaatigut oqaloqatigiinnermi nerrivimmi
issiaqataasinnaanissatsinnik angusaqarnerput angusaqaataavoq annertoorujussuaq,
aammalu danskinit akuersaarneqarnerat taanna nuannersuuvoq maannakkut
tassuunakkut qimoqatigiilluta ingerlariaqqissinnaagatta.
Taamaattumik
ajuusaarutigalugu oqaatigissavara aamma Inuit Ataqatigiit oqaluttuata Johan
Lund-Olsenip isumaqarpunga, uanga eqqarsaruni uanga qitigiaqatigissallunga
illoqarfimmut Danmarki silarsuarmiut eqqartuussiviannut tunniunniarnissaa
aqqutigalugu, taava kukkulluni qitigiarsimassaaq. Taama inussiarnersumik
oqarpunga. takorlooruminnaatsippara eqqartuussivik aqqutigalugu maannakkut
aamma apeqqut taanna aaqqinnialissagutsigu aamma tulluartuutinngilara,
aqqutissaasorinngilara, soorunami atorneqarsinnaavoq kisianni aqqutissatut
atussallugu pissusissamisoorsorinngilara.
Akerlianik
isumaqarpunga inussiarnersumik Naalakkersuisut oqaatigisagarput taanna,
nalunngilarput traktateqassasoq/isumaqatigiissuteqassaoq Amerikap, Danmarkip
Kalaallit Nunaatalu akornanni. Pinngitsoorani taamatut ittumik
isumaqatigiissuteqartoqartussaavoq. Taanna 1951-imi pisimavoq taamaattumik
Maliinannguaq aamma oqarmat ilumoorluinnarpoq amerikamiut oqarunik 1992-imi
ABM pisoqaavallaalersoq sooq uagut oqarnerput taava upperissanngilaat oqarutta
aamma uagut pisoqaavallaartutut isigaarput.
Isumaqarpunga,
amerikamiut qiteqatigiluassagaanni taava qaaqqusariaqartut qiteqatigiumallugit
kisiannili aamma tassani oqarfigalugit, ajunngilaq maaniinniaritsi
nalunngilarput maaniinnissarsi pisariaqartikkissi inuit 200-300 millouunit
innuttasi illersorniarlugit aamma soqutigisaqarassi, kisianni
isumaqatigiissuteqartariaqarpugut ullutsinnut naleqquttumik. Taanna
isumaqarpunga aalajangiusimanera amerikaminullu inussiarnesumik oqarneq okay,
tamaaniinniaritsi kisianni tamaaniinnersi pillugu maannakkut ukiut
allanngorsimapput, silarsuaq allanngorsimanngilaq ajortua taamattuarpoq,
kisianni ineriartornermut oqartussaaneq allanngorsimavoq
oqaloqatigiissutiginiartigu.
Taanna
isumaqarpunga aamma inuiaqatitta ikittut allat takutereersimagaat
taamaaliortoqarsinnaasoq. Islandi qiviarutsigu illutungitsinni, islandimiu
amerikamiut inooqatigaat sakkutooqarfiat aammalu namminneq aamma
sullivimmittut atorlugu aammalu namminneq ulluinnarni naalagaaffittut
sakkutooqanngitsutut ilillutik uagutsutit, kisianni isumannaallisarnerminni
aamma atorlugu suleqatigiiffigalugu.
Aamma
maannakkut kalaaleqativut qallunaalllu Thulimi aamma suliffeqarput amerlaqisut,
kisianni aamma amerikamiunut paasitissavarput paasitinniarlugulu aamma
maannakkut iluaqutaanngilaq sakkutooqarfissi tappavaniitillugu aamma
inuiaqatigiit kalaallit aningaasanik pilliuteqartittuassagussigit. Soorlu
maannakkut mittarfiliortariaqarpugut soorunami aamma nuannaarluta akilerparput,
kisianni aamma ilarujussua allatut ajornatumik sakkutooqarfiup tassani
inissisimanera pillugu aamma amerikamiut tassani pisooqataapput ilaatigut.
Tamakkunatigut naaperiarnissat uagutsinnut toqqaannarnerusumik amerikamiut
periarfissineqarpata oqaloqatigissalluta, tamakkuupput uagut
aallarteriarfigalugit oqaloqatigiissutissagut.
Danskit
ikinngutitta paasissavaat ima isumaqannginnatta uagut amerikamiut
anisinniarigut, kisianni amerikamiut inooqatiginiarpavut uagut piumasavut
najoqqutaralugit. Taanna danskinut paaseqqunarpoq, aamma danskit aallartitaat
maaniipput ilaatigut. Ajoraluaqaaq, ilumoorpoq Udenrigsministeri maani
najuutinngimmat, kisianni taanna naalakkersuisuni killiffigisarput aammalu
maannakkut kingumut ullumikkut oqallinnermi paasisarput, taama uanga paasivara
aammalu amerlanreusut taama isumaqartut paasillugu. Amerikamiut maaniipput
nalunngilarput aamma tamaaniinnissartik isumaqatigiissummik tunngaveqartippaat,
kisianni isumaqatigiissut nutartissappat danskit ikinngutitta paasisasnngilaat
amerikamit anisinniarigut imaluunniit amerikamiut anisinniarlugit
siunenrfeqartugut. Inooqatigissavagut inooqatiginissaanut pisariaqartitagut
suusut uagut ukiut 2000-inngorneranni aamma Kalaallit Nunaata aningaasaqarnera,
imminut ataqatigiiaarnera allallu tamaasa ilanngullugit: Thulemi suli
najugaqarput inuit ima amerlatigisut tamakku tamarmik nutaamik
nalilertariaqarput. Taannaavoq Naalakkersuisut killiffiigsaat. Tassa
taakkuupput oqaatigerusutakka.
Amerikamiunik
qiteqateqarnissarput taanna paatsoorneqaqqunagu oqaatigissavara kusanartumik
tunngaveqartumillu oqaloqatigiinnermik qallunaat qimoqatigissagutsigit taakkua
aatsaannguaq taasakka aqqutaasinnasut Naalakkersuisuninngaannnit
isumaqargigaavut.
Mogens
Kleist, Kattusseqatigiit
oqaaseqartuat.
Aallaqqaammut oqaatigissavara uagut tungitsinninngaanniit siunnersuuteqartoq
taperseratsigu inatsisitigut periarfissarisinnaasagut suunersut
ujartorusukkatsigit.
Maliinannguaq Markussen-Mølgaard ilumoorpoq uikoq kingulleq aprilimi
Amerikamiikkatta amerikarmiut ersarissorujussuarmik uagutsinnut oqarput,
isumaqatigiissut taanna nutaanngippallaaqaaq ammavugut taassumap
isumaqatigiissutip nutarterneqarsinnaanissaanut. Kisianni
illuatungaaninngaanniit qanoq pisoqarpa? Qallunaaninnganniit oqartoqarpoq
naamik. Taamaattumik Naalakkersuisut Siulittaasuata oqaaseqarneranut
nerrivimmeeqatigiissinnaanerput taanna isumaqarpunga aamma
qaqinniartariaqaripput. Sooq amerikamiut, qallunaat kalaallillu
nerrivimmeeqatigiissinnaanngilat. Uanga paasisinnaakutsoorpara sooq qallunaat
naalagaaffiat taama tunuarsimaartiginersoq. NATO-mi ilaasortaanini
toqqammavigalugu Pituffik aqqutigalugu annertoorujussuarmik
NATO-mioqartussaaffeqarmat. Uagut taamatut isumaqatigiissummik
allanngortitsiniarutta qallunaat naalagaaffiata pinngitsoorani
annilaangassutigissavaa pissaaneqarnini NATO-p iluani annaassussaassallugu.
Oqarsinnaavugut ukiut 50-it qaangiuttut matuma siorna Inughuit
Dundasiminngaanniit taamatut qimagutsinneqarmata, suli suliaq maannakkumut
ingerlavoq. Aamma Naalakkersuisut Siulittaasuata oqaatigisartagai suliaq
taanna qaqittarparput qaqittarparput, kisianni maannakkut Inatsisartuni
sukumiisumik aalajangiiffigisassatut siunnersuutigineqartoq taanna maannakkut
isumaqatigiissutiginiartariaqassavarput qallunaat piumanngikkaluarpataluunniit
oqartariaqarpugut amerikamiut, qallunaat kalaallillu ataatsimut taamatut
oqaloqatigiissinnaanerat ujartortariaqarparput isumaqatigiissinnaanerallu.
Taamaattumik Pituffimmut tunngatillugu qanoq atorluaasinnaanerput taanna
immaqa kingusinnerusukkut eqqartorsinnaassavarput, kisianni inatsisitigut
periarfissaqarsimassappat taassumap isumaqatigiissut allanngortissavarput
imaluunniit taakku ilassutitut isumaqatigiissuteqassaasut, suna
assigiinngissutigivaa, taanna aamma qulaajartariaqarparput.
Ajornanngippat taassuma isumaqatigiissutip ilassutigut isumaqatigiissummik aaqqivigineqarsinnaanissaa, taanna soorunami pitsaanerpaaq atorluarsinnaasarput ujartariqarparput. Taamaattumik uagut tungitsinninngaanniit Naalakkersuisut Siulittaasuata oqaasii tussaatissatut oqaasii tigussavagut, aammalu siunnersuuteqartoq tungitsinninnaanniit taperserusupparput taamatut oqaaseqarneranut. Qujanaq.
Otto Steenholdt, attaviitsoq.
Alla eqqaanngilara Seriusimi qimusseqatigiit ilisarnaataat, kisimiippunga kisianni nukittuvunga, utoqqatserpunga.
Tupigilluinnarpara aatsaanguaq taasisitsineq taamatut inerneqarmat, kisianni peqqissimissutiginngeqaara, misigisimavunga kiserluinnarma maani isumaqatigiissupput ilumoorullugu ataatsimoortorsuulluta kisima illersulersimallugu.
Siunnersuuteqartup siunnersuutaa erseqqareruttormat, allanngortinniartigut. Tamassi eqqaasavarsi isumaqatigeereernikuuvugut, massakkut tigoqqikkutsigu aalajangiusimaneralu oqaatigalugu ersarissumik oqassagaluarpugut, isummagut allanngortinngilagut, taanna 1951-ernissaq allangoqullugu piumasarput aalajangiusimavarput, kisianni tassa ullumikkut taasinerup avammut nittagaa aajuna ima paasisarialik, 1951-imi isumaqatigiissut, illersornissamut isumaqatigiissut, Kalaallit Nunaanni Inatsisartut Naalakkersuisullu ima amerlanerussuteqartigisut allanngortinnissaa pisariaqartinngilaat.
Assorsuaq
annernarpoq taanna.
Oqaatigeqqinneq
ajornaqaaq, oqallittarnerujussuagut isumaqatigiilluta avammut nittartarnigut
ullumikkut taamannak erseqqaritsigisumik akerlilerneqarmata. Isumaqarpunga
tassa taama oqartariaqarlunga, isumaqatigiissut atortuassaaq,
oqaqqikkaluaruttalu aanna tusagassarput, 25. oktober 2001-imi taasivusi
ersarissoq aalajangiusimanerissi aperineqarlusi, kisianni oqarpusi
aalajangiusimanngilarput. Soorlu oqartariaqartugut ila
aalajangiusimanngisatsinnik oqaluttuarsimalluta,
angalaarujussuaqattaarsimalluta, sunaaffa immaqa ullumikkut oqassalluta, naami
taamaangikkaluaruni soqutaangilaq.
Aap,
Naalakkersuisut Siulittaasuata Inatsisartut aalajangereersimanerat eqqaavaa,
soormi aamma aalajangersimanerit erseqqissaqqillugit ullumikkut
akuerineqartuuguni erseqqarinnerissagaluarpoq ilumoorluta
aalajangiussimagipput. Inuit Ataqatigiinnut ajunngisaarut sunaagaluarnersoq
taakkartugaa maani uterfigissanngilara, aamma qitinnermilluunniit oqalunneq
maani angerlarsimaffeqanngilaq, maani oqallisigisarput nunatta inuisalu
Naalakkersuisuisa inatsisiliortuisalu piumasaat qatangiinnartinneqarpoq.
Islandi
taamannak mittarfimmik iluaquteqarnera uagut iluaqutiginngilarput.
Oqaaseqarninni erseqqissarpara allaallunniit siunissami immaqa qulaavaanissaa
amerikarmiut uatsinnut piumasarissanngikkaat. Tamakkua suli aaqqinneqanngillat,
uagut iluaqutiginngeqaarput, allaat soorlu oqareersunga, takornarissanut
Avanersuarmiunut iluaqutissaagaluaq akornuersorneqarpoq.
Thulimi
sulisut maani pineqanngillat, illersornissamununa isumaqatigiissut
1951-ernisaq oqallisigigipput, aamma uanga qutsappakka taavaniittut
suliffeqarsinnaammata, aamma taamaattuassaaq amerikarmiut taavaniitsilluit,
piumasarisariaqarparpullu taassuma 1951-iminngaanniit piumasaqaataasup
imaluunniit isumaqatigiissutaasup allanngorneqarneratigut allaat kalaallit
suli amerlanerusut taavani sulisorinissaat piumasarissagipput, soorlu
Naalakkersuisut Siulittaasuata oqarfigigaatigut, Islandimi qanoq
iluaqutigineqartigisoq. Minnerpaamik taakkutullu iluaqutigisariaqarparput
mittarfik taavaniittoq.
Ilumoorputit
anisitsinianngilagut, naamerluinnaq, anisitsinianngilagut, kisianni
isumaqatigiissuteqarusuppugut kalaallit aamma namminneq ilaallutik
akuerisimasaanik, akuerisimatinnagu massakkumut utertuassavarput, soorlu aamma
siunnersuuteqartup oqaatigigaa, uagut nunasiaagallarattali isumaqatigiissut
nunatsinni namminersornerulersimasumut tulluussorinngilarput, nammineq
ilaajumavugut ilusilerusullugu, siunissami anisitsiniaannata
suleqatigiillutali, suleqatigiinnissarpput qanoq isikkoqassanersoq
aalajangerusullugu.
Uteqqillara
isumaqatigiissununa ajorisarput, qabgali aalajagiusimasarput
aaqqissuunneqaqqullugu maani oqalisigigipput, tassalu taasissutigalugu.
Kattusseqatigiinnit
manna tikillugu oqaluttut tupigaakka siunnersuuteqartoq isumaqatigisimallugu.
Sukkut?
Aatsaaqqissaaq
taasipput tamaavimmik akerleralugu, oqaqqitariaqanngilasi isumaqatigisimallugu
siunnersuuteqartoq, tamassi akerlilerparsi, qujavungali kisianni
siunnersuuteqartup paasisinnaasimammagu illersorneqarluni, kisiannili
taasigassi qanoq-ippisi?
Tamarmik
ersersippaat siunnersuuteqartoq naaggaarpaat.
Tassa
taasineq ima ittoq, 1951-imi pissutsit, Kalaallit Nunaanni Naalakkersuisut
Inatsisartullu pisariaqarsorinngilaat allanngortinneqassasoq, taava
Inatsisartut taamaasillutik siornagut isumaqatigiissutsik
isumaqatigiilluinnarlutik isumaqaitgiissutsik allanngortitsineqassasoq
ullumikkut oqaatigaat sussa allanngortinnagu.
Pakatsissutigaara,
kisianni amerlanerussuteqartut isummernerat eqqumiikkalaartoq, tassa
amerlanerussuteqarnikkut taanna aalajangigaavoq, kisianni uanga isumaga
allanngortinngilara, 1951-ernissaq allanngortinneqartariaqarpoq, uagut
pissanngikkutta immaqa kingulissatta taanna aaqqikkumaarpaat.
Ole
Lynge, Inatsisartut
Siulittaasuat, Inuit Ataqatigiit.
Taava
tullinnguuppoq Johan Lund-Olsen, Inuit Ataqatigiit, aappassaa, tulleriumaarpaa
Daniel Skifte.
Una
oqaatigilaarlara aatsaannguaq taasineq taamatut saqqummiunnqartoq paragra 50
toqqammavigineqarmat akuerineqarsimappat kingunerisussaammagu oqaluuserisaq
atorunnaasasoq, taanna erseqqissaatigiinnarpara.
Johan
Lund-Olsen, Inuit
Aqatigiit oqaaseqartuat.
Qujanaq,
tassaana aamma uangattaaq siullermik Otto Steenholdt kiisalu aamma
Naalakkersuisut Siulittaasuat aamma oqaaseqarfigilaarniarlugu maangartunga.
Otto
Steenholdtip taamatut paasinninnera paatsuineruvoq, tassami Inatsisartut
suleriaasiat najoqqutaralugu maani sulisugut aalajagiiffigisassatut
siunnersuutit, tassa beslutningsforslag, tassa aalajangiiffigisassatut
siunnersuutit tamatigut marloriarneqartussaapput, tamatigut
marloriarneqartussaapput, ullumikkut siullermeerneqarpoq, taavalu
kingusinnerusukkut aappassaaneertussaasavarput una Inatsisartunut ilaasortap
Maliinannguaq Markussen- Mølgaardip aalajangiiffigisassatut siunnersuutigisaa
illit taasissutigisitavit siunertaqartumik aamma imaqartoq.
Taamaammat
taanna taasissutigeqqittussaassavarput aappassaaneerinninnermi,
taamanikkornissaanut qularnanngilluinnarpoq Inuit Ataqatigiit
nikueqatigiumaarmatsit, Inuit Ataqatigiimmi uagut erseqqissumik
oqaatigivarput, uani siullermeerinninnermi Inatsisartut siusinnerusukkut
taanna aalajangiutereersimasarput taanna tunuliaqusersoripput,
qimannianngikkipput, naammaginnatsigu oqaatigivarput erseqqissumik,
issuaqqilaasavara imaluunniit issualaasavara oqaaseqarpugut imatut, tassa
qupperneq 2-mi: "Allanngortinneqartariaqarpoq, Inuit Ataqatigiinniillu
naammaginngilarput isumaqatigiissummut ilassutit atorlugit
nutarterneqaannarnissaa siunnerfigineqaannassappat".
Tassa
taanna erseqqissorujussuuvoq. Tassa siullermeerinninnermi taamatut
oqaaseqarpugut taannalu aappassaanerinninnissatta tungaanut isuma tassa
ingerlatseqqinniartussaavarput, kisianniuna tassa neriukkaluaratta,
taamaammanuna aamma siullermeerneqarnerani imaakkajummat suliat
ingerlaqqittarlutik ataatsimiititaliamut, taava tasa taanna naatsorsuutigalugu
saqqummiinerput imatut naggaserparput aamma suliaq aappassaanerisoqartinnagu
Nunanut Allanut Sillimaniarnermullu Ataatsimiititaliamut
ingerlateqqinneqassasoq, tassani apeqqutit assigiinngitsut oqallinnerup
ingerlanerani saqqummiussorneqarsimasut aamma sammineqarniassamata aammalu
ataatsimiititaliaq taanna pineqartoq erseqqissumik Inatsisartunut
isumaliutissiissuteqarluni aamma inassuteqarsinnaaniassammat.
Kisianni
tassa paasivarput amerlanerussuteqartut ataatsimiititaliamut una
ingerlatseqqikkusunngilaat, kisianni uteqqissavar Inatsisartut
suleriaasitsinni tassa imaappoq, taanna qanorluunniit
allanngortinniarneqaraluarpat allanngortinneqarsinnaangilaq,
aalajangiiffigisassatut siunnersuutit marloriarneqartuaannartussaapput,
qanorluunniit piumanngitsigisoqaraluarpaalluunniit.
Taamaammat
aappassaaneerinermi taaseqqittussavugut, taanna eqqaamaneqartariaqarpoq.
Aamma
una oqaatiginngitsoorusunngilakka ilassutitut isumaqatigiissuutit, tassa tillægsaftaler,
tassa apeqqutinut aalajangersimasunuinnaq tunngagajuttarput, tassa 1951-imi
isumaqatigiissut assigiinngorparparujussuarnik imaqartitserpoq, kisianni
navianartua aajuna, Inatsisartut amerlanerussuteqartut, tassami
amerlanerussuteqartut massakkut qimannialerunarpaat Inatsisartut
siusinnerusukkut aalajangiutereersimasaat, tassa taanna uggornartua, taava
qimanniagarsi aajuna naviarnartualu, ilassutit isumaqatigiissutit
aqqutigilerutsigit, taava apeqqutit ataasiakkaaginnaat aalajangersimasuinnaat
kisimik sammisinnaangussavagut, isumaqatigiinniutigalugillu, soorlu
avatangiisinut tunngasoq, tassa taannaannavik, taava kisimi
isumaqatigiinniutigineqassaaq, allat oqartussaaqataanissatsinnut
tunngasuuteqartut, isumasiorneqartarnissatsinnut tunngassuteqartut
piumasaqaatigisagut qangalili, taakkua qatangiinnassapput, taanna
eqqarsaatigilaarniarsiuk.
Daniel
Skifte, Ataasut.
Qujanaq,
siullermik oqaaseqartut oqaaseqarfiitinnagit pisussaasorinngikkaluarlunga
pisussaassunngortippuinga imminut, tassami taanna oqaluuserineqartoq Siumup
Inuit Ataqatigiillu naalakkersuinikkut isumaqatigiissutaanni qupperneq 1-imi
immikkoortut aappaani aammalu qupperneq 5-imi immikkoortut tallimaani tassunga
tunngassuteqartumik oqaaseqartoqarpoq, taamaattumik uani
pikkorinnequsaassanngilanga taakkununnga taasannut, taamaattumik tupigaara
politikikkut anguniarneqartoq, siunnerfik nalunngisarpullu tunngavigalugu
Naalakkersuisut maannakkut ingerlatseriigaat naalakkersuisooqatigiit ilaannit
qaffatsinneqarmat.
Taamaattumik
taakkua tunngavigalugit suliassat ingerlareersoq aammalu
naalakkersuisooqatigiinnerup iluani atsioqataaffioreersoq maannakkut
oqallisigigatsigu paasiuminaatikuluppara.
Aamma
tassunga tunngalluinnaqqissaarpoq allaat naalakkersuisooqatigiinniit
naviasaarutigineqarmat Haagimi eqqartuussissusilersuussisoqarsinnaasoq, taanna
tupaatigaara, kisiannili tuppallilerpunga Naalakkersuisut Siulittaasuata
oqaaseq atugaa qiteqatikkuminaatsumik taallugu, taanna imatut paasigakku
taamaaliornianngilagut, naalagaaffeqatigiit iluminni eqqartuussissusilernissaa
Atassutip akuerinngisaannassavaa, naalagaaffeqatigiiuvugut, aaqqitassat
oqaloqatigiilluni ingerlanneqartariaqarput, kisianni naalagaaffiugutta, taanna
piginnaassuserput akisussaaffigalugu, taava periaaseq allamiissaaq.
Maannakkut
inissisimanerput tunngavigalugu politikikkut spillerreglit, tassalu
nalinginnaasumik malitassat atorlugit ingerlasariaqarpugut, taamaattumik
neriuutigaara suliassaq ingerlareersoq Naalakkersuisullu maannakkut suliaat
ingerlalluassasoq, aammami taanna tunaartaralugu politikikkut
anguniaqarnissaminnik tassunga tunngasumik oqaaseqareerata.
Taava
naggataatigut aamma taangitsoorumanngilara Johan Lund-Olsenip ilaatigut
oqaaseqarmat Inatsisartut aalajangeriigaat maannakkut tunukkipput, naaggaa,
Inatsisartunuku aalajangeriigaat Naalakkersuisooqatigiinnerullu siunnerfia
maannakkut ingerlanneqartoq, taamaattumik persuarsiutissaangilaq. Uanga
upperaara Naalakkersuisut suliassaq suliarigaat aammalu tusartinneqartarnerput
tunngavigalugu ingerlanneqartoq, angusaq qanoq ikkumaarnersoq inaavippat
paasiumaarparput. Qujanaq.
Mikael
Petersen, Siumut.
Tassa pisariaqarsoraara aamma Siumup naalakkersuinikkut oqaaseqartartuatut
erseqqissaateqalaasallunga, oqaaseqartut kingulliit Johan Lund-Olsenikkut
aallaavigalugit.
Tassa siullermik Johan Lund-Olsenip, Inuiat Ataqatigiit oqaaseqartuata
oqaatigaa, una aalajangiiffigisassatut siunnersuut itigartinneqarpat tassa
suna tamarmik unissaaq. Qallunaa amerikarmiullu 1951-imi illersornissaq
pillugu isumaqatigiissutaanut suliami.
Ila tupinnaq taamatut oqartoqarsinnaammat. Erseqissaatigilaarlara
1980-ikkullu aallartinneranni taamanikkulli Naalakkersuisuusut aamma
taamanikkut Inatsisartuusut taanna 1951-imi isumaqatigiissutip nutarternissaa
nunatsinninngaanniit danskit naalakkersuisuinut saqqummiuttualerpaat, tassa
1980-ikkut aallartinneraniilli Namminersornerulernitta kinguninnguaniit.
Suliaq taanna ingerlavoq, 1990-ikkut ingerlanerani misissueqqissarnerit
assigiinngitsut pereermata aamma taamanikkut Naalakkersuisuusut aamma
qallunaat naalakkersuisuinut saqqummiuppaat,. Inatsisartut maani
oqallittarnigut aallaavigalugit.
Tunngavilersuutit atorneqartut imaannaanngitsorpassuit pigereerpagut,
tassalu aajuna tamatta aporfigiuagarput, Naalakkersuisuutitatta aææanngulaartartut
aammalu Inatsisartut allanngulaartartut aperfigiuagaat ulloq manna tikillugu
qallunaat naalakkersuisui tassani manngertitaartuarmata, tassa taanna
aporfipput.
Tamakku nalunngilagut Inatsisartut tamatta, taamaattumik
assigiinngitsorpaasuarnik oqisunik tunngavilersuuteqarluni
oqallinniarsarisarnerit tassunga tunngatillugu isumaqarpunga
nukillaarsaataaginnartartut.
Tunngavilersuutit assigiinngitsut piffissat ukiut 20-t takku ingerlaneranni
80-iminngaannit massakkumut tunngavilersuutitut atorneqartartut
itisigaluttuinnarput, aamma massakkut nalunngilarput Namminersorneq pillugu
Isumasioqatigiissitarsuup tassunga tunngatillugu suliat annertuut
ingerlakkaat.
Tassa imaappoq uanga inuiaqatigiit kalaallit Inatsisartut Naalakkersuisullu
isumaqatigiissutip 1951-iminngaaneersup nutarterusunnera
aalajangiusimajuarparput. Aamma taanna ullumi nassuiaat nunanut allanut
tunngatillugu nassuiaat oqallisigineqarmat aamma uppernarsarneqarpoq.
Naalakkersuisullu uani akissuteqaataanni paasinngitsuusaarneqarsinnaanngilaq
qallunaat naalakkersuisuisa nunatta Naalakkersuisuisa killiffigisaat tassaasoq
tassa pissutsit aallaavigalugit ilassuteqartitsinikkut aaqqiigallarnissaq.
Tamatta nalunngilarput isumaqatigiissutip taassumap nutarternissaa
anguniartuarlugu ukiorpassuarni perersoq. Aamma ingerlaqqissaaq
Tamatuma angunissaa tikillugu Siumumi oqaatigereerparput sulinerput
ingerlattuassavarput tamatuma piviusunngortinnissaa tikitserlugu. Taamak
oqarpugut siorna ukiakkut oqallinnitsinni.
Aamma massakkut nassuiaat nunanut allanut tunngatillugu
sillimaniarnissamullu tunngatillugu oqallinnermi erseqqisaatigaarput atagu
tunngavilersuutigut suli pitsaanerulersinniarlugit periarfissinneqarpugut. MD
pillugu nunarsuarmioqatigiit oqallipput nunarput akuuvinnarani
atorneqartussanut tassunga pilersaarut, taanna pilersaarut piviusunngussappat
akuuvoq. Tamakku pillugit oqaloqatigiinnermi aallartitsoqarpat Amerika-miut
tungaaniit taava aamma piumasaraarput taava aatsaat 1951-imi isumaqatigiissut
nutarteqqaarlugu tamanna angusinnaavarput. Angusinnaavarsi uagut
tungitsinninngaanniit.
Tassa tunngavilersuutissat piffissap ingerlarnerani amerliartuinnarput.
Nakussakkaluttuinnarput qularutiginngilarpullu Siumup tungaaniit
tunngavilersuutit ima annertutigilerumaartut qallunaat naalakkersuisui
naaggaarsinnaajunnaarlutik. Taamaattumik Siumuminngaaniit massakkut
tulluarinngilarput uani 1953-imi isumaqatigiissut, tassa 1953-i sioqqullugu
nunasiaataanerup nalaani isumaqatigiissut pilersimasoq, taannaannaq
tunngavilersuutigalugu Inatsisartut aalajangiisinneqassappata imaalinnarlugit.
Nalunngereerlugu tamatta isumaqataasugut taassumap isumaqatigiissutip
allanngortinnissaani.
Isumaqarpugut, tunngavilersuutit annertusiartornerat ilutigalugu aammalu
tunngavilersuutit imaannaanngitsut atorlugit Inatsisartut taanna pillugu
itinerujussuarmik kimeqarnerujussuarmik atorsinnaanerujussuarmik
aalajangiisinneqarsinnaasut.
Aammalu tamakku anguniarlugit tamatta suleqataavugut Siumumiikkutta, Inuit
Ataqatigiiugutta, Atassutaagutta, Kattusseqatigiiugutta
attaviitsuuguttaluunniit. Ata tamanna utaqqilaarallartigu takkutissooq
piffissaq taamatut tamakkiisumik isummernissatsinnut. Isumaqatigiissutip
taassumap nutarternissaanut ajorsarsinnaajunnaarluta.
Taamaattumik massakkut erseqqissaatigeeqqiinnassavara partiimi
oqaaseqartorput Siumup isumai tunngaviginagit oqaaseqareermat
ataatsimiititaliami tamanna oqallisigineqalerpat tunngavilersuutaasut
ilanngullugit nalilersoqqaarlugit tamanna Inatsisartunut
ataatsimiititaliaminngaaniit saqqummiunneqarnissaa peqataaffigissagatsigu.
Jonathan
Motzfeldt, Naalakkersuisut
Siulittaasuat, Siumut.
Oqallinneq maani uanga nangeqqittussatut takorluunngilara. Aamma
isumaqarpunga pissutissaqanngitsoq maannakkut nangeqqissalluta akissutit
apeqqutissallu tamarmik maani saqqummiunneqareerput. Taamaattumik maani
akisaqattaalluni oqaaserineqartut sumilluunniit uani suliassami
nakussassaataanngillat isumaga najoqqutaralugu.
Inatsisartut oqaatigineqassanngillat pisariaqarsorinngikkipput
isumaqatigiinniaqqinnissat Johan Lund-Olsen-ikkut tassa taamatut maannakkut
oqaluttarfik manna atorpaat. Imaaliinnarluni oqarluni Inatsisartut aammalu
Naalakkersuisut imaluunniit Inatsisartut pisariaqarsorinngikkaat
isumaqatigiinniarnissat. Taamak oqaluttoqanngilaq. Nalunaaquttap akunneri
qassinngulerpat maannakkut oqalulluta isumaqatigiinniarnerit taamak ittut
aalajangiusimagigut.
Pisariaqanngitsumik uteqattaartinneqarnerput maani
ingasappallaarujorujussuaqaaq. Otto Steenholdti aamma nassuiaaniarneri
eqqunngitsut allamut sangutitsiniutit naammalluinnalereerput maani inimi.
Otto Steeholdti uagut siulittaasoralugu Inatsisartut Nunanut Allanut
Sillimaniarnermullu Ataatsimiititaliaanut innersuussutigigatsigu Qaanaap
mittarfissaa ingerlanneqareralu Amerikamiut qallunaallu akilerlugulu
ingerlatissagaat. Suna kinguneraa? Taamani Otto Steenholdti siulittaasuuvoq.
Allarluinnarmik aalajangiisoqarpoq.
Uagut taamanikkut ilaasortaasugut udvalg-imi aalajangikkagut taamani
malinneqanngitsut aamma taamani takuagut, kisianni maannakkut taamatut ittut
uteqattaarlugit maani ingerlanianngilagut siumut isigissagatta. Siumullu aamma
aaqqinniagassagut siunnerfigalugit maannakkut isigaluta. Taamaattumik ukiuni
kingullerni qaangerniarnerani matumap ajornartorsiutaareersimasut killiffia
ullumi Naalakkersuisuni uagut nalunaarutigilluagarput tassa. Amerikamiut
inussiarnersumik akueralugit danskit paaseqatigalugit alloriarnermik
nanisinissaq maannakkut taanna naliliinermi kisiivimmi isumaqarpunga
atorsinnaasutut naliligaasoq.
Aamma eqqartuussiviit akulerussulissagutsigit oqallinnerput allarluinnarmut
sangussaaq angusaqarsinnaanerpullu suli sermersuup qeqqanut iligaanni
pitsaanerussalluni.
Taamaattumik uani Naalakkersuisut iliuuseriniagaannik malitsitaqarniarneq
amerlanerit malinniagaat tatigalugu aamma taanna tutsuigalugu suliassaq
ingerlateqqissavarput. Tassa oqallinnerup killiffia aammalu taanna
tunngavigalugu uanga ingerlaqqinnissarput kissaatigeqaara.
Otto Steenholdt, attaviitsoq.
Naalakkersuisut Siulittaasuat Mikael Petersen ilanngullugu atuarsimanngilarsi una taasissutigalugu! Atuarsimanngilluinnarparsi! Oqarfigisariaqarpassi aajuna taasissupput Kalaallit Nunaanni Inatsisartut sisamanngornermi oktoberip 25-ani 2001 ataatsimiittut siusinnerusukkut aalajangiussartik illersornissaq pillugu 1951-imi qallunaat amerika-miut isumaqatigiissutaat allanngortinneqassasoq aalajangiusimavaat. Illersornissarlu pillugu nutaamik isumaqatigiisusiornermi kalaallit politikkeriisa peqataatinneqarnissaat taamatuttaaq aalajangiusimallugu.
Uanga nutaaliunngilanga. Qangaliuna aalajangiusimasatta imaa. Taamaattumik tassani taasinermi taannarpiaq taasissutigaarsi naaggaarlugulu. Sumulluunniit nuutinniartariaqanngilaq. Inuit Ataqatigiit oqaaseqartuat qutsavigissavara aammalu ataatsimiititaliami, tassa ataatsimiititaliamukartussaannguatsiarmat tassani isummat illersorluartaqqullugit. Aamma Mikael Petersenip taanna atuagara tusarlugulu takusimasariaqarpaa.
Ajornaqaaq pinnguanngilagut,
aamma uagut taamani Thulemi uanga siulittaasuullunga Jonathan Motzfeldt
tusarnaartoqarlugu, allaat Lars-Emil Johansen siulittaasoralugu, ersarissumik
sorsuutigaarput taamanili 1951-ernisaq allanngortinneqassasoq. Ullumikkulli
Jonathan Motzfeldtip massakkut naaggaarpaa anivorlu matu
matorululluguluunniit! Taamatut
sulisoqarneq ajorpoq.
Ole
Lynge, Inatsisartut
Siulittaasuat, Inuit Ataqatigiit.
Qinnutigissavara
toqqartaarinerit pinaveersaaqqullugit.
Maliinannguaq
Markussen-Mølgaard, Inuit Ataqatigiit.
Qujanaq.
Nuannaarutigaara apeqqut manna oqaluuserineqarmat, allaat
sakkortungaatsiartumik. Aamma ajunngilaq, aamma taamaattussaavoq.
Isumaqarluinnarpunga una apeqqut saqqummiukkakku nukillalaarsaataanani
nukittorsaataalluni naqissusiinerussasoq. Taanna siunertaralugu siunnersuut
saqqummiussimavara.
Aamma
sullugineqassappat aap, inuit namminneq tassunga isummersinnaapput, kisianni
isumaqarpunga sullugineqarsinnaanngitsoq suliap suliassaq ilungersorluni
ukiorpassuarni Naalakkersuisut Siulittaasorisartagaanni
saqqummiunneqareersimasoq. Angusaqarfiorpiarnerli ajortoq qaqeqqissallugu
naqissuseqqissallugulu maani Inatsisartuni.
Daniel
Skiftep oqaatigivaa tupigusuutigalugu suliassarooq ingerlareersoq sooq
qaqinneqarsimanersoq. Nassuiareerpara sullugigakku maannamut angusaasimasut
taamaattumillu naqissuseqqinnissaa kissaatigalugu suliniutit
ingerlaqqinnissaat taakku aallaavigalugit.
Taamaattumik
nuannaarutigaara aamma Siumup oqaaseqartuata oqaatigimmagu ataatsimiititamut
ingerlaqqissasoq isumaqatigalugu. Ataatsimiititami
isumaliutissiissuteqarumaarpugut.
Johan
Lund-Olsen, Inuit
Ataqatigiit:
Aap,
qujanaq. Tassaana una Siumup politikkikkut oqaaseqartartuata neqeroorutigisaa
taanna ilassilluarusullugu oqaatigerusukkiga. Tassa ataatsimiititaliamut
maannakkut ingerlateqqissinnaanissaa tassa amerlanerussuteqarfigilerparput.
Tassa Siumut Inuit Ataqatigiillu kissaatigivaat aappassaaneerisoqartinnagu una
suliaq tassa aalalajangiiffigisassatut siunnersuut ataatsimiititaliamut
ingerlateqqinneqarsinnaassasoq.
Taavalu
naggaterpiaatigut una oqaatigilaarlara. Taanna nunat tamat eqqartuussiviat
Haag-imiittoq eqqartorneqarmat tassani erseqqissumik oqaatigivarput
isumaliutissanut ilaatinneqarsinnaanersoq taanna nalilersorneqartariaqarpoq.
Taanna isumaqarpunga imatorsuaq qaqqaqalaarutigissallugu
pissutissaqanngitsugut.
Isumaliutigineqarsinnaavoq annernanngilaq. Aamma silaannarmit tigusaanngilaq. Issuarneqarpoq tutsuiginarluartuminngaanniit oqaatsit taakkua aninneqarsimasut. Tassa Dansk Udenrigspolitisk Institutimi ilisimatuup allaaserisaaninngaanit taakkua issuaanerullutik. Tassa silaannarminngaaniit tigusaanngilluinnarput. Taamaammanuna taanna isumaliutissanut malugalugu isumaliutissanut ilaateqqullugu kaammattuutigiinnariga.
Jonathan Motzfeldt, Naalakkersuisut Siulittaasuat, SIumut.
Otto Steenholdtip pissutsinik sangutitsisaqattaarnera aamma putusaarutigissanngilarput. Nalunngiivippaa 1997-imi taamanikkut uagut naalakkersuinermut uteqqinnitsinni pissutsit Otto Steenholdtimit uparuarneqanngilluinnartut. Danskit 47 millioninit akiligassaat iluarsiniarsimagivut taamaalilluta 6 millioninik akiliisussaanngorlugu iluatsinnaguli ingerlatsinerani akiliisussanngortitaanera.
Tamakkua hr. Otto Steenholdtip ataatsimilluunniit uparuanngilluaasarsimavai. Aamma taamanikkut periarfissaqarsimagaluarpoq uparuaanissaminut, kisianni una oqaatigilaarlara aamma ataaseq mianersuutassaq pinngitsoornata aamma maani alaatsinnaattariaqarparput. Aammalu udvalgip sulinerani taanna qularnanngilaq tikinneqartussaassalluni. Paasilluartariaqarparput aamma Isumannaallissaanermut Ataatsimiisitaliap sulinerata aamma nipangiussassarpassuarnik aamma ilaqarmat tassanilu aamma uagut aamma ilaalluta nipangiussassanik aamma pigisaqarluta inuusugut ataatsimiisitaliami apersorneqassagaluarutta qanoq ililluta aamma tassuunakkut ilisimaneqassaaq aamma nipangiussassanik maani pigisaqarluta issiasut aamma amerlaqigatta.
Taamaattumillu uani nalunaarutissat apeqqutigineqartussat taamaallaat uanga tungaatigut kissaatigissavara soorunami aperineqarsinnaavunga hr. Steenholdtiminngaaniit suminngaaniit taanna pisimaneriga danskit oqarsimammata amerikamiut aamma isumaqartut isumaqatigiinniaqqinnissaq pisariaqanngitsoq. Uppernarsarneqassappat taanna apeqqutigeqqissinnaavarput. Maliinannguup nammineq qanoq akisinnaassanerlugit amerikamiunit suminngaaniit taamak ilisimatinneqarsimanini nammineq nalilissavai tamakkua akissutissaqarfigissanerlugit. Taamaattumik taanna oqaatigiinnarpara aamma maani nipangiusassassanik ilaatigut peqartoqarmat.
Ole
Lynge, Inatsisartut
Siulittaasuat, Inuit Ataqatigiit.
Aap,
suli nappaasaqattaartoqaraluarpoq, kisianni aqutsisutut siunnersuutigissavara
' 49-mi suleriaatsimi naapertorlugu oqaluuserinninneq naammassissagipput.
Aamma oqaatigineqareersutut ataatsimiititaliaq ilumini paasinngisaqarsimaguni
imaluunniit paasiniagassaqaruni ataatsimiinnissamini
periarfissaqarfigiumaarai.
Apeqqutigissavara
' 49 naapertorlugu Inatsisartut oqaluusereqqinnagu maannakkut oqallinneq
tassunga unitsissagaat. Taassumunnga isumaqataasut qinnuigissavakka
nikueqqullugit. Una erseqqissalaassavara ' 49 isumaqanngilaq oqaluuserisaq
peertoq, kisianni pinngitsoorani aappassaaneerneqartussaavoq.
28.
Akerliusut
qinnuigissavakka nikueqqullugit.
1.
Taaseqataanngitsoqarpa?
Soqanngilaq.
Tassa
najuuttut tamarmik. Taamaalilluni immikkoortoq 73-ip siullermeernera
naammassivoq. Aappassaaneerneqarumaarpoq, imaluunniit immikkoortut pingasut suli
amigaatigaagut. Tassa isumaqatigiissutigisarsimagaluarparput arfernup missaani
unittassalluta.