Ullut ataatsimiiffiusut arfineq-aappaat, pingasunngorneq oktobarip 3-at 2001,nal. 15.16

Oqaluuserisassani immikkoortoq 74

Meeqqat angajoqqaamik avinnerisa kingorna nikittaattumik tigummineqartarnerannut atasumik aningaasartuutit matussuserneqartarnissaat pillugu apeqquteqaat aallaavigalugu oqallisigisassatut siunnersuut.

(Otto Steenholdt)

(Siullermeernera)

Otto Steenholdt, attaviitsoq:

Inatsisartunut ilaasortanut piaarnerpaamik oqaatigerusutara aajuna una oqallisissanngortitara siunnertitut siullermik saqqummiunneqarsimagaluarmat. Taava soorunami oqaloqatigeereerluta apeqqutitut oqallisineqarnissaa akuersissutigisimavara, kisiannili kukkussutiga aajuna qulequtaa allanngortiterujussuarneqarsimasoq takunngitsoorsimagakku. Uanga qulequtsiussara tassunga malugeqqusara, tassa kingusinaartoq nalunngilara maanilu partiit oqaasissioramik ajoraluartumik taanna qulequtanngortitaq tamarmik aallaavigisimassagaat naatsorsuutigaara. Naalakkersuisut akissuteqarnerminni taanna qulequtaq aallavigisimammassuk.

 

Imatut uanga siunnersuutiga qulequtaqarpoq. Meeqqat angajoqqaamik avinnerisa kingorna nikittaattumik tigummineqartarnerat oqallisigisariaqalerpoq. Tassa, kisianni una allanngortitaq immaappoq, meeqqat angajoqqaatik tamaasa peqatigisinnaatitaavaat, sunaagaluarnersoq taanna, taamaammat angajoqqaat avissimasut eqqartuussiviullu aalajangiineratigut meeqqanik peqateqarsinnaatitaasut illoqarfimmut nunamulluunniit allamut nuussimasut meeqqaminnik peqateqarnissaminni immikkut aningaasartuuteqarnerusartut inuiaqatigiinni tapiiffigisariaqanngillat?

 

Tassa uanga oqaatigisanni tapiinissaq oqaatsimik ataatsimilluunniit eqqaasimanngilara. Taamaattumik taanna atuassavara, imaapporlu: "Ukiuni makkunani angajoqqaat avittarnerat qaqutigoorunnaarpoq. Avinnerup kingorna angajoqqaajusut arlaat ungasissumut nuussinnaasarpoq, avinnermilu advokatitigut aaqqissuunneqartartut ilagaat meeqqap imaluunniit meeqqat angajoqqaamik arlannut pinngitsooratik piffissamik aalajangersimasumi tikeraartinneqartarnissaat. Nunarput isorartoqimmat ilami aamma takornartaajunnaarpoq angajoqqaajusup aappaa Danmarkimut nunanulluunniit allanut avannarlernut nunassittalerluni.

 

Taamaalisoqartillugu meeqqat assartorniarnerat aningaasatigut ilaqartinneqartinneqartariaqalernerisigullu ajornartorsiutinngortarpoq. Pisortat akuliussinnaanerat isumallutigisariaqalersarpoq billitsit eqqarsaatigalugit. Tamatumali saniatigut angajoqqaap aappaa ledsageriusimappat, tassa ilaginnilluni. Tassa angalanermi ilaatinneqarsimappat aningaasaajaatissai eqqarsaatigineqartanngillat.

 

Taamaattumik landstingimi oqallisigeqquavara ajornartorsiutip tamatuma qanoq aapaasumut ajunaarutaajunnaarlugu aaqqinneqarsinnaanera sammillugu. Soorlu aappaasimasoq tassa ledsageritut Danmarkimukaassisariaqarsimappat sulinissaraluamini aningaasanik annaasaqartarpoq. Ullormusiaqartinneqarani Danmarkimi ilaqutaqarnersoq aalajangiisuutinneqarsinnaanngilaq hotel-imi najagaqarluni ledsageriffigisimasani utaqqissanerpaa imaluunniit nunatsinnut uterallarsinnaanerpa, piffissarlu naalerpat aamma kingumut Danmarkiliaqqilluni?

 

Periaasiusunnaasut taakku marluk aamma nunatsinni arlaat atorneqarsinnaavoq angallannermili akiusut qiviassagaanni soorlu Qaanaamiit Qaqortumut eqqarsaatigiinnarlugu akisoorujussuanngorsinnaasoq. Angajoqqaajusunut ledsageriusumulluunniit annerusumik eqqarsaatiginagu isumagisanngortiinnarneqarsinnaanngilaq. Uanga isumaqarpunga taamatut eqqartuussivik aqqutigalugu aalajangersakkat, malinneqartussaammatalu aappaasup meeqqaminik imaluunniit meeqqaminnik ingerlatsisariaqarnera aningaasatigut nassatarisartagai aamma inatsisikkut aqqutissiuunneqartariaqalersut. Tamannalu Inatsisartut aalajangiiffigalugu oqallisigisariaqaleraat.

 

Taava uanga nammineq oqallisissiara kingusinnerusukkut oqaaseqarfigiumaarpara.

 

Ole Dorph, Isumaginninnermut Suliffeqarnermullu Naalakkersuisoq, Siumut:

Qujanaq. Massakkut assortuunniarunarpugut qulequtaa pillugu, kisianni taanna assortuussutigissanngikkipput. Inatsisartunut ilaasortat Otto Steenholdt siunnersuuteqarpoq angajoqqaat avissimasut illoqarfimmut nunamulluunniit allamut nuussimasut meeqaaminnik peqateqarnissaminni immikkut aningaasartuuteqarnerusartut inuiaqatigiinni tapiiffigineqartariaqannginnersut inatsisartuni oqaluuserineqassasoq.

 

Siunnersuut Inatsisartut siulittaasoqarfianit apeqquteqaatitut oqallisigisassanngortinneqarpoq.

Inatsisartuni ilaasortap Otto Steenholdtip siunnersuummini tunngavigaa ukiuni makkunani angajoqqaat avittarnerat qaqutigoorunaaqimmat aammalu takornartaajunnaarmat angajoqqaajusup aappaa illoqarfimmut allamut nunanulluunniit avannarlernut nunassittarnerat.

 

Taamaalisoqartillugu meeqqat assartorniarnerat aningaasatigut ilaqartinneqartariaqalissatillugu ajornartorsiutinngortarmat. Inatsisartuni ilaasortap Otto Steenholdtip siunnersuummini aamma tunngavigaa avinnermi eqqartuussivimmi aalajangiisoqarsimatillugu inatsisitigut aaqqissuussisoqartariaqartoq angajoqqaat avittut aningaajaatissaat ilanngullugit.

 

Inatsisartuni ilaasortap Otto Steenholdtip apeqquteqaammini naggataatigu siunnersuutigaa ajornartorsiutip inatsisitigut aqqutissiuunneqarnissaa Inatsisartut aalajangiiffigalugu oqalligisigisariaqaleraat.

 

Naalakkersuisut ilisimatitsissutigissavaat pisortanit ikiorsiisarneq pillugu Inatsisartut peqqussutaat meeqqanik peqateqarnissami aningaasartuutitigut ikiorserneqarnissamut tunngavissaasoq tamatumuunalu peqqussut tunngavigalugu ikiorserneqarnissamut patsisissaatitaasut eqquutsinneqarsimassappata kommuni naliliisussaavoq inuit ikiorserneqarnissamut pisariaqartitsinersut aammalu patsisissaatitaasut eqquutsinneqarsimanersut. Aammalu kommunit tamakkiisumik pisortanit ikiorsiissutinut aningaasartuuteqartartuupput.

 

Eqqartuussiviup aalajangigaanik meeqqanik peqateqarnissamut peqqussut malillugu angajoqqaanut tamanut kommunit ikiorsiisarnissaminnut pisussaaffilissagaanni tamanna kommunit namineerlutik aqutsisussaatitaanerannik unioqqutitsinerussaaq. Naalakkersuisut ilisimatitsissutigissavaat ajornartorsiut taanna pillugu Danmarkimi aalajangersagaqarmat.

 

Otto Steenholdtilli nalunngeriigaatut nunarput nunanit allanit allaanerussuteqarpoq tamaattumillu eqqarsaatigeqqissaartariaqarpoq ajornartorsiummut allamut aalajangersagaqartariaqarnersugut. Danmarkimi aningaasartuutinut taaneqartunut ikiorserneqarnissamut patsisissaatitaasunut ilaavoq nalinginnaasumik aningaasartuutit aningaasarsianut aningaasartuutinit nalinginnaasunit nalinginnaasumit annertunerussanngitsut.

 

Taamaattumillu aatsaat immikkut illuinnartoqartillugu angajoqaat arlaat naalagaaffeqatigiinnerup iluani nunanilluunniit allanut najugaqartillugu meeqqanik peqateqarnissamut tapiisoqarsinnaasartoq.

 

Tassunga inatsisiliornissamik siunnersuuteqassagaanni aningaasatigut sunniutaasussat misissorneqartussaapput. Aammalu taamaattoqassappat nunatta karsia imaluunniit kommunit aningaasartuutigissaneraat isummerfigineqartariaqarluni.

 

Naligiissitsinissaq eqqarsaatigalugu inatsisit angajoqqaanut eqqartuussivimmi aalajangiiffigineqarsimappat taamaallaat tunngasuusaassanngilaq, kisiannili aamma angajoqaanut nammineerlutik peqateqartarnissaminnik isumaqatigiissimasunut tunngasussaassalluni.

 

Otto Steenholdtip siunnersuutaa malillugu angalanermi aningaasartuutaannaanngitsut kisiannili aningaasanit annaasat, ullormusiat, najugaqarnermilu aningaasatigut aningaasartuutit immaqa pisortanit akilerneqartariaqalissapput.

 

Naalakkersuisut isumaqarput meeqqanik peqateqarnissamut atatillugu aningaasartuutit akilerneqartarnissaannik inatsisiliuussisoqassappat tamanna aningaasatigut annertoorujussuarmik kinguneqartussaasoq. Meeqqanik peqateqartarnissaq pisussaaffiunngimmat taamaallaalli pisinnaatitaaffiummat. Imaattariaqarpoq kommunit ullumikkut naliliisinnaasaat inuk ikiorserneqarnissamut pisariaqartitsinersoq.

 

Naalakkersuisulli aamma erseqqissaatigissavaat angajoqqaat avinnerminnut atatillugu sunniutaasussat tamaasa eqqarsaatigisussaammatigit aammalu rigsombude politiinit tamatuminnga ilitsersorneqarlutik. Pisortat aningaasartuutit ilaannaanilluunniit akiliisarnissamik akuersissappata tamanna angajoqqaat aamma akisussaaffianik arsaarinninnerusussaavoq.

 

Taammaattumik inatsisartunut ilaasortap Otto Steenholdtip siunnersuutaata saqqummiunneqarnissaa Naalakkersuisunit inassutigineqanngilaq. Naalakkersuisut taamatut oqaaseqarlutik apeqquteqaat inatsisartunut suliassanngortippaat.

 

Augusta Salling, Siulittaasoqarfimmi sinniisussatut ilaasortaq, Atassut:

Isumaginninnermut Naalakkersuisoq Ole Dorph qujaffigaarput. Taavalu massakkut partiit, Kattusseqatigiit aammalu attaviitsut oqaaseqartuinut ingerlaqqissaagut. Siulliullunilu oqaaseqasssaaq Ruth Heilmann Siumut. Taava oqaaseqanngitsialaarnerani eqqaalaarusuppara qulequtsiunneqartoq naatsorsuutiginnginnakku assortuussutigissagipput, tamatta akuersaareernikuugatsigit, oqaluuserisassat qulequtaat tamatta akuersaarnikuuvarput aamma siunnersuuteqartup aamma nammineerluni akuerseqataaffiginikuuaa.

 

Ruth Heilmann, Siumup oqaaseqartua:

Tassa Inatsisartuni ilaasortaq Otto Steenholdt siunnersuuteqarpoq angajoqqaat avissimasut illoqarfimmut nunamulluunniit allamut nuussimasut meeqqaminnik peqateqarnissaminni immikkut aningaasartuuteqarnerusartut inuiaqatigiinnit tapiiffigineqarsinnaanerat oqallisissiaralugu.

 

Siumumiit aappariit avereernermi kingorna aapparisap illoqarfimmut nunamulluunniit allamut nuunnerata kingorna meeqqat ilaginissaannut aningaasatigut aporfiusinnaasut paasilluarsinnaagaluarlugit Siumumiit erseqqissaatigissavarput pisortanit ikiorsiiffigitinnissamut periarfissaqareermat. Soorlu tamanna Naalakkersuisumit aamma akissutigineqartumi erseqqissaatigineqartoq. Tamannalu Siumumiit taperserparput.

 

Godmand Rasmussen, Atassutip oqaaseqartua:

Inatsisartuni ilaasortaq Otto Steenholdtip meeqqat angajoqqaamik avinnerisa kingorna nikittaattumik tigummineqartarneranut atasumik aningaasartuutit matussuserneqartarnissaanut apeqquteqaataa imatut Atassummiit oqaaseqarfigissavarput.

 

Siunnersuuteqartup oqaaseq atugaa ugguuna ilumoornerassavarput ukiuni makkunani avittarnerit qaqutigoorunnaarmata, aappariit avittarnerat qaqutigoorunnaarmat. Oqaaseq taanna assortoruminaappoq. Oqaatigineqartutuulli avittunngooq aappaa ungasissumut nuussinnaasarpoq. Tassungalu tunngatillugu Atassummiit isumaqarpugut qimatsisup qimataasulluunniit sumut qanorlu ungasitsigisumut nuussinnaanerat inuit namminneq pisinnaatitaaffigigaat. Pisortanit akuliuffigissallugu mianerisariaqartoq.

 

Inuit pisortat ikiorsiisarnerat avaqqullugu imminnut qanoq inuuneqarnissaminnik aaqqissuussisimasut Atassummiit isumaqarfigigatsigit pisortanit akuliuffigineqartariaqanngitsut. Inuit nammineersinnaanerat ataqqisariaqarmat. Avinnerit Inatsisartut sulinerisa ataani suliassaapput inimi maaniunngitsoq.

Eqqartuussiviulli aalajangiineri inatsisinik tunngaveqartut atuuttarlutik allat politikkerit akuliuffissarinngisaat. Soorlu inunnik pisariaqavissunik avinnini peqqutigalugu ikiortariaqalertariaqartoqartillugu kommunip isumaginninnermut ataatsimiititaliaata tamanna peqqissaartumik naliliiffigisariaqarpaa. Ikiorsiinissaq peqqussutit malillugit pisussaaffigigamiuk.

 

Atassummiit taamak oqaaseqarluta siunnersuut tapersinngilarput.

 

Maliinannguaq Markussen-Mølgaard, Inuit Ataqatigiit oqaaseqartuat:

Qujanaq. Ajoraluartumik ullumikkut aappariit katissimagunik katissimanngikkunilluunniit meerallit avittarnerat ukiut arlallit matuma siornagumut naleqqiullugit takussaanerulersimapput.

 

Inatsisartuni ilaasortap Otto Steenholdtip siunnersuutigaa avinnerup kinguneranik eqqartuussivikkut meeqqanik peqateqarsinnaanermik aalajangiisoqarsimatillugu angalanissamut aningaasartuutit pisortanit akilerneqartalernissaat. Inuit Ataqatigiinniit meeqqat soorunami angajoqqaanit tamarmiusunit sapinngisamik najorneqartarnissaat avinnerullu kinguneranik angajoqqaaminnut attaveqartuarnissaat pingaarutilittut isigaarput.

 

Siunnersuuteqartutulli iliussagutta inuiaqatigiinni aningaasarpassuit atortariaqalissavagut. Aviisimasut meerartaasalu angalanissaat siunertaralugu. Inuit Ataqatigiinniit maluginiarparput maanna pisortanit ikiorsiisarneq pillugu peqqussut aqqutigalugu meeqqamik peqateqarnissamik ikiorserneqarnissamut patsisaatitaasut malillugit ikiorserneqarsinnaaneq periarfissaasoq. Tamannalu kommunit namminneq nalilertaraat.

 

Ullutsinni aningaasat atorfissaqarteqaagut soorlu innarluutillit atugaasa pitsanngorsarnissaannut. Imaluunniit meeqqat toqqisisimallutik paaqqutarineqarnissaannut paaqqinnittarfinnut allarpassuarnullu. Tamakku pillugit Inuit Ataqatigiinniit Otto Steenholdtip siunnersuutaanut atatillugu Naalakkersuisut akissutaat tapersersorparput siunnersuuteqartorlu isumaqatiginagu.

 

Anthon Frederiksen, Kattusseqatigiit oqaaseqartuat:

Qujanaq. Meeqqat angajoqqaaminnit, angajoqqaamik avinnerisa kingorna nikittaattumik tigummineqartarnerannut atasumik aningaasartuutit matussuserneqartarnissaat pillugu apeqquteqaat aallaavigalugu inatsisartuni ilaasortap Otto Steenholdtip siunnersuutaa Kattusseqatigiinniit imaattumik naatsumik oqaaseqaateqarfigissavarput.

 

Naalakkersuisut akissuteqaamminni ilaatigut oqaatigaat eqqartuussiviup aalajangigaanik meeqqanik peqateqartarnissamut peqqussut malillugu angajoqqaanut tamanut kommunit ikiorsiisarnissaannik pisussaaffiliissagaanni tamanna kommunit nammineerlutik aqutsisussaatitaanerannut unioqqutitsinerussasoq.

 

Naalakkersuisut akissuteqaamminni aamma oqaatigaat Danmarkimi ajornartorsiutit taakku pillugit aalajangersagaqartoqartoq. Taamaammallu eqqarsaatigeqqissaartariaqartoq nunatsinni immikkut aalajangersagaqartoqartariaqarnersoq.

 

Tamatumunnga tunngatillugu Naalakkersuisut akissuteqaamminni nunatta nunanit allanit allaanerussuteqarnera aamma eqqaavaat. Taamaammallu suliassami saqqummiunneqartut aammalu siunnersuuteqartup siunnersuutaa kiisalu Naalakkersuisut akissuteqaataat paasereerlugit

 

Kattusseqatigiinniit isumaqarpugut inatsisiliornissamik siunnersuuteqartoqannginnerani misissugassat assigiinngitsut misissorneqaqqaartariaqartut. Tassami Kattusseqatigiinniit Naalakkersuisut akissuteqaataat isumaqatigaarput, tassani oqaatigineqarmat ilaatigut angajoqqaat avinnerminnut atatillugu sunniutaasussat tamaasa eqqarsaatigisussaammatigit, minnerunngitsumik meeqqanut atugassarititaasut aamma eqqarsaatigalugit. Tassami angajoqqaat taamatut pisoqartillugu akissussaanerpaajusarmata.

 

Kattusseqatigiinniit naggataatigut oqaatigissavarput pissusissamisoortutut isiginnginnatsigu akissussaaffiit suulluunniit pisortanut inissinniarneqartassappata. Uagulli isumaqarpugut pisortanik isumalluuteqarpallaarnerujussuaq qimakkiartuaarneqartariaqartoq. Taamatut naatsumik oqaaseqarluta Naalakkersuisut akissuteqaataat akuersaarlugu tusaatissatut tiguarput.

 

Otto Steenholdt, attaviitsoq

Partiit Kattusseqatigiillu oqaaseqarneranni qaammaallattumininnguaq ataaseq kisiat takuara, tassalu Kattusseqatigiinniit oqaaseqartup oqaatsit atugai, tassa misissugassat assigiinngitsut misissorneqartariaqartut.

Isumaqarpunga, taanna paasinninnermik aallaaveqartumik oqaatsit aninneqartut. Tassa oqaatigereerpara allaangaatsiartorsuarmik uanga quleqartumik nassiussisimagaluarama. Tassalu aamma kissaatigisimallugu siunnersuutigineqartutut allatulli Inatsisartunit isummersorfigineqarluni oqaaseqarfigineqassasoq.

Taamaattoq apeqquteqaatitut taannalu aallaavigalugu oqallisissanngortinneqarsimavoq, oqaatigereerparalu uanga aamma pisooqataasunga tamatumunnga. Taava oqallisissiamut allannguisoq tassaalluinnarsorigakku uanga qulequtsiussara allanngortinneqarsimammat takisoorsuanngorlugu, inuiaqatigiinnillu tapiissutinik piumasaqartilersimallugu. Tassa uanga nammineq qulequtsiussara tusareerparsi allarluinnaasoq.

Oqallisissialli uuma saqqummiunneqartup aamma qulequtaa assortuussutigeqquneqanngitsorlu aamma ilissi nammineq  atuareersimavarsi, oqaasissiornissinnilu aamma taannarpiaq aallaavigisimallugu.

Qulequttap allanngornerata nassataraa akissuteqaat pisortanit tapiiffigineqarnissamik aallaaveqalermat. Kommunit ikiuussinnaanerat arajutsisimanngilluinnarpara. Eqqartuussutillu naalattariaqarnera aamma qularutiginngilluinnarlugu. Akissuteqaalli tamaat ataatsimut isigalugu ajornartorsiut imaannaanngitsoq Naalakkersuisuniit aamma ilumoorullugu takuneqarsimasoraara. Ajornartorsiut milliartorani alliartorpoq.

 

Oqaaseqartut aamma arlallit oqaatigereermassuk nunatsinni aappariinnermikkut avittartut amerliartormata. Sakkortuumillu eqqorneqartartut tassaalluinnartarlutik, meeraqarsimagunik taakkua meeraat. Maani Inatsisartuni oqarluartaarutigineqarluinnartut ulluni kingullerni eqqaamavarput inuiaqatigiinni meeqqap qitiunissaa. Meeqqap angajoqqaaminik avissimasunik pisariaqartitsisarnera qularutissaanngilluinnarpoq. Tamannalumi eqqartuussiviit amerlaqisutigut qujanartumik aamma tunaartarisarpaat.

 

Akissuteqaammili quppernerit aappaata naggataani oqaatsit isumaqatiginngisakka ukuupput. Issuaavunga: ?Pisortat aningaasartuutit ilaannaannilluunniit akiliisarnissamik akuersippata, tamanna angajoqqaat akisussaaffiannik arsaarinninnerussaaq.? Issuaanera tassunga naavoq.

 

Naalakkersuisut oqallinniarpata tamaanga kipiinnarallarsinnaagaluarpunga.

Akornutaammata nipangillatsiaqqullugit qinnuigissavara aqutsisuusoq. Uanga kommunit aamma pisortanik ilaatigut taasarpakka. Uteqqilaartariaqarpara akornusersuisut pissutigalugit. Tassa imaappoq akissuteqaammi quppernerit aappaata naggataani oqaatsit isumaqatiginngisakka ukuupput. Issuaavunga: ?Pisortat aningaasartuutit ilaannaannilluunniit akiliisarnissamik akuersippata, tamanna angajoqqaat akisussaaffiannik arsaarinninnerussaaq.? Issuaanera tassunga naavoq.

Uanga kommunit aamma pisortanik ilaatigut taasarpakka. Kukkusimanerlunga naluara, tassa pisortanik taasarakkit kommunit aammalu Namminersornerullutik Oqartussat. Akissuteqaammilu erseqqissarneqarpoq siunnersuummi pineqartunut kommuni naliliisinnaasoq angajoqqaat aappaanut ikiorsiinissaminut. Aamma taanna Atassutip oqaaseqartuata erseqqissaavigaa.

Paasinerluisimanerpunga, kommunit taamatut qujanartumik nalileeriarlutik ikiorsiisarnerat aamma angajoqqaat akisussaaffiinik arsaarinninnerusarsimanersoq. Ajornartorsiummut naterititakka uanga marluupput. Siullertut kommunimit naliliisumit ikiorserneqarsinnaan- ngikkaanni namminerlu aningaasaateqanngikkaanni, taava qanoq ililluni naapeqatigiikulanissaq, tassa taanna samkvemsretimik taaneqartartoq, malittarialillu qanoq ililluni eqquutinneqarsinnaava. Angajoqqaajusup aappaata akissaqannginnini pissutigalugu ungasissumut ungasissumilluunniit angalanissani saperpagu. Illuatungerisaaniit meeqqaminik soqutigisaqanngitsutut nalilerneqaqqullugu eqqartuussivimmut saaffiginnissuteqarsinnaavoq. Immaqalu taamaasilluni aamma meeraq aappaasullumi aappaa sakkortuumik eqqorneqartarlutik.

 

Taavalu aappaa una aamma ilanngullara; meeqqap pisariaqartitsinera, qallunaatut "tarv" taanna atortarpaat, pisinnaajunnaartoq imminiiginnarneqassava? Tassa meeqqap pisariaqartitsinera anaanani ataataniluunniit takorusullugu, taanna imminiiginnarneqassava? Tamannalu meeraq qitiutillugu maani nunatsinni inuiaqatigiinnik ingerlatsiumanermut tulluartuua? Akissuteqaatillu aamma naggataa quiagiummerpara ima oqarmat, issuaavunga: ?Taamaattumik Inatsisartunut ilaasortap Otto Steenholdtip siunnersuutaata saqqummiunneqarnissaa Naalakkersuisut inassutigisinnaangilaat?, issuaaneq naavoq.

Naatsorsuutigilluinnarpara maani Inatsisartut taanna naggasiineq maluginiarsimassagaat. Taama oqarneq Inatsisartunut namminerlu oqaloqatigiissutissaminnik aalajangersaasartuusunut akuliuteriaraluarneruvoq Inatsisartunit tamanit assuarineqarluinnartariaqartoq, kisianni malugaara oqaaseqartut taanna malugisimanngikkaat. Uangalu nammineq oqaatigaara Inatsisartunut Naalakkersuisut akuliunniartaqqunagit.

 

Ole Dorph, Isumaginninnermut Suliffeqarnermullu Naalakkersuisoq, Siumut:

Qujanaq. Siullermik siulittaasup oqaatigereerpaa uuma qulequttap qanoq isikkoqarnissaa uagut maani assortuussutigissanngikkipput, tassa tamatta akuersissutigereernikuuarput qulequttap qanoq isikkoqarnissaa. Taamaattumik massakkut siunnersuummut akissuteqaatinnut qisuariaatinut paartiininngaanniit qujassuteqarusuppunga.

 

Siumuminngaanniit maluginiarpara Ruth Heilmannip Naalakkersuisut akissuteqataannut iluarisimaarinnittoq, aammalu pisussaaffik taanna avinniarnermi eqqarsaatigineqartariaqartut ilagilluinnartariaqaraat aamma erseqqissaatiginiarneqartoq.

 

Aamma taamatorpiaq Atassumminngaanniit Godmand Rasmussen oqaaseqarpoq. Ilumoorporlu ukiuni makkunani avittartut aamma averusertartut amerlasoorujussuanngoriartormata.

 

Taamaattumillu aningaasartuutaasinnaasut ilaannikkut aamma annertoorujussuanngorsinnaasarlutik meeraq nunap arlaanut illuartinneqariataartillugu. Taamaattumik Atassummiinngaanniit aamma oqariartuut maluginiarpara ersarissuusoq. Tassa taanna maani Inatsisartuni annertunerusumik eqqartorneqartariaqanngitsoq. Taanna akisussaaffik nalunnginnatsigu sumiittoq, aamma kikkut aningaasatigut akisussaaffimmik tigumiartuunersut.

 

Taavalu Maliinannguaq Markussen Mølgaardip Inuit Ataqatigiinninngaanniit oqaaseqarnermini aamma eqqortumik oqaaseqarpoq, tassa ullumikkut una ikiuisarnermi inatsit aallaavigalugu ilaqutariit saaffiginnittut kikkuugaluarpataluunniit ikiorserneqarnissaminnik qinnuteqarpata, taava inuit ataasiakkaat, ilaqutariit ataasiakkaat aningaasatigut qanoq inissisisimanerat aallaavigalugu kommunininngaanniit ikiorserneqarsinnaanerat, taanna periarfissaasuaannartoq.

Aamma taanna atuuppoq uani apeqqummi. Taamaattumik Inuit Ataqatigiit aamma taamatut oqariartuutaat nalilerpara ersarittuusoq.

 

Aamma taamatorpiaq isikkoqarpoq Kattusseqatigiinniit Anton Frederiksenip saqqummiussaa, tassa oqarami inuiaqatigiinni ajornartorsiutit tamaasa pisortaninngaanniit akuleruffigineqarsinnaanngitsut, aamma pisortaninngaanniit aaqqinniarneqarsinnaanngitsut, sualummik aamma aningaasat tassani eqqarsaatigineqarlutik.

 

Taava siunnersuuteqartup Otto Steenholdtip saqqummiussaani maluginiarpara tassa tassani una taasaa samkvemsreti meeqqamut ilaqarsinnaanissamut tunngassuteqartoq, taanna eqqartuussivikkut aamma aalajangerneqartarmat, taannalu allaanerussuteqartoq, tassa kommunip aalajangersinnaaneranut qanoq ilaqutariinnut aningaasanik tapeeriarsinnaanissamut atatillugu.

 

Taava aamma pisinnaatitaaffiit, taakku  pisussaatitaaffiit taakku  immikkooruteqartorujussuupput. Pisinnaatitaaffiunngilaq, naak meeraq nunap illuatungaaniikkaluarpat pisinnaatitaaffiunngilaq, imaluunniit pisussaatitaaffiunngilaq taamatut oqartariaqarpunga, meeqqap taamatut tikeraartigisinnaanissaa imaluunniit tikeraarnissaa, kisianni pisinnaatitaaffiuinnarpoq tamanit atorneqartariaqanngitsoq, kisianni periarfissaavoq. Taanna avinniarnermi  averuserniarnermiluunniit, avittussat averusertussalluunniit akornanni isumaqatigiissutaasarmat.

 

Taamaattumik oqallinneq una ingerlanneqartoq nalilerniarpara tassa Otto Steenholdtip taanna siunnersuutaa Inatsisartuninngaanniit kissaatigineqanngitsoq ilalerneqassasoq.

 

Taavalu taamannak inerneqarnera oqaatigissavara uanga paasinninnera malillugu taamatut isikkoqarmat. Qujanaq.