Oqaluuserisassani immikkoortoq 75 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq-aappaat, pingasunngorneq oktobarip 3-at 2001,nal.
16.00
Ataatsimiinnermik
aqutsisoq: Augusta Salling, Siulittaasoqarfimmi sinniisussatut ilaasortaq.
Augusta
Salling:
Oqallisigineqarnani
apeqqut saqqummiunneqassaaq.
Godmand
Rasmussen, apeqquteqaateqartoq
Kalaalit
Nunaanni Inatsisartut suleriaasianni § 36 naapertorlugu matumuuna
Naalakkersuisunut
imaattumik apeqquteqarniarpunga:
Innarluutillit
Kalaallit Nunaannit Danmarkiliartinneqarnissaannut taarsiullugu nunatsinni
innarluutilinnut paaqqinnittarfinni inissinneqarnissamut
neqeroorfigineqarsinnaanerat periarfissinniarlugu Naalakkersuisut sunik
suliniuteqarniarpat.
Naluneqanngitsutuut
upernaaq Inatsisartut ataatsimiinneranni nunatsinnut innarluutillit
angerlarartinneqarnissaannut atatillugu Kangerlussuaq siunnersuutigisimavara.
Tamannali ersarissumik partiinit allanit taperserneqarsimanngilaq. Upernaarli
oqaluttarfiimmiit oqareersimanera malillugu malersoqqinniarlugu oqareerama
maannakkut siunnersuut taanna saqqummiuteqqippara, neriuutigalugu
paasilluarneqarluni ilassilluarneqarumaartoq.
Siunnersuuteqartutuullu
oqaatigereerlara angerlarartitsinissamik misissueqqissaarsimanerup
nassuiaatitaa aammattaaq arlalitsigut isumaqataaffigigakku. Oqaatigeerlarali
nalunaarummi allassimasunik immikkut ersarissaanngikkaluarlunga arlalinnik
issuaasassagama.
Upernaaq
Inatsisartut ataatsimiinneranni oqaatigivara annertuumik innarluutillit
nunarput ungaseqalugu inuusaatsillu allarluinnaat tikillugit paarineqartarmata.
Aammattaarli ilaquttat ungaseqalugit, taamaalilluni ilaquttanik
takunnissinnaaneq killilerujussuuginnarani aammattaaq akisoorujussuusarmat.
Nalunngilarpummi
Kangerlussuaq kikkunnit tamanit angallaffissuummat, taamattaarlu
innarluutillit
ilaqutaasa akulikinnerusumik takunnissinnaanerat ammaaffiussaaq, naak
tamakkiisuunngikkaluartumik.
Kissaatiginngilarali
innarluutillit tamavimmik pineqartumut inissinneqassasut,
pisariaqartitsinerimmi aallaaviusussaammata. Soorlumi nalunaarutip eqikkarnertaani inissaqartitsineq
katsorsarfissaqarnerlu annertuseriarsimasut.
Naluneqanngilarmi
1999-imi Inatsisartut aalajangiummassuk innarluutillit nunatsinnut
angerlarartinneqassasut.
Partiinimmi Naalakkersuisumilu akissuteqaatigineqartumi oqaatigineqartuarpoq
innarluutilinnut sulisussat amigaatigineqartuarnerat, kisiannili
eqqaaneqanngisaannarpoq
takussaasumik sulisussanik ilinniarsimasunik pissarsiorniarnerat.
Sulisussanimmi
pissarsioqqaarani pilersaarusiorneq imminut salloqittarnerusarpoq.
Innarluutilinnimmi
nunatsinnut angerlarartitsinissaq saqqummermat isuma taanna kusanartutuut
maannamut nalilertuaannarsimavara. Oqaaseqartulli innarluutilinnut sulisunut
piareersimanngittuaannarnerarpaat. Tamannalu annertuumik aporfiuppat, taava
maannamut qanoq iliuuseqarata tupinnartuliamik pisoqarnissaa
utaqqiuaannassanerparput. Tassami pisussaaffik kikkunniikkami.
Tassalu uagut Inatsisartut qanoq iliuuseqartussaavugut, tamannalu
paaseqqoqaara.
Inatsisartut peqqussutaanni § 5,
imm. 7-mi aammalu § 21-mi aalajangersagaqarpoq, innarluutilik nunatta
avataani inissiisarfimmi najugaqarpat, innarluutillip kommuniani
isumaginninnermi ataatsimiititaliap minnerpaamik ukiumut ataasiarluni
misissortassavaa nunatsinnut utertinneqarsinnaanissaa periarfissaqarnersoq.
Taamaattumillu aarleqqutigaara kommunimi naliliinermi angerlarartitsinissaq
annertuumik isummerfigineqartalissappat akuersaarnermik nipilimmik, inissat
aporfigineqartalernissaat, naak tunngavik kusanaraluaqisoq.
Nalunaarummi isigiarsuttut allat Danmarkimi najugaqartitaammata, tassami
Inatsisartut inatsisaanni § 44-mi allassimasoqarpoq nunatta avataani
suliarineqarsinnaasut aatsaat ikiorsiisoqarsinnaasoq. Nunatsinni
ikiorsiinissaq ajornarpat, ilami oqaatigineqareerpoq uterartitsinissaq
nalilersortuarneqassasoq. Taamaattumik § 44 eqqarsaatigissagaanni isimikkut
akornutillit sooq taava angerlarartinnissaat ajornassava.
Soorunami inuk kiffaanngissuseqarluni sumi najugaqarnissaa aammattaaq
ataqqivara. 1983-imi annertuumik innarluutillit 150-t missaaniissimapput.
1988-imi 140-t missaat. 1995-imi 130, 2001-imilu qaammatini siullerni
pingasuni 118-iusimallutik. Soorlu una nalunaarut nunatta pineqartut
sumiiffiinik naleqqussaanikkut aggulunneqarnerisigut arlaatigut
periarfissaqareerluta.
Tamakkununngalu naleqqussaanikkut Kangerlussuup siusinnerusukkut
oqaatigeriikkama avaqqunneqarsinnaannginnera ersarissivoq. Aammalu pineqartut
ilaannut naleqqulluinnartuunera. Taamaattumik piumasaraara susassaqartunit
ilanngullugit misissueqqissaartoqarnissaa nalilersueqqittoqarnissaalu.
1999-imi aningaasaqarnermut ataatsimiititaliap oqaatigaa innarluutilinnik
aallarartitsinermi suliffissanik amerlasuunik pilersitsiviussasoq.
Iluatinnaatillit ilaat upernaaq Naalakkersuisut akissuteqaamminni oqaatigaat,
angerlarartitsissagutta illussaqarneq pingaarnerutinneqassasoq. Tamannalu
pilersaarutinut ilannguttariaqalerpoq.
Oqaatigineqartut ilagaat paaqqinniffik Ivaaraq ajornartorsiuteqartoq.
Pissutsillu taamatut isikkoqartillugit qanoq iliuuseqartoqartariaqalerpoq.
Inatsisartut siunniutaat susoqanngippat piviusunngornavianngimmat. Aammalu
misissuinikkut Paamiuni inerniliisoqareerpoq illu pineqartoq
piukkunnanngereersoq. Periarfissat arlaqartut tikkuartorneqarput.
Taakkununngalu
ilaalluni Gertrud Rasks Minde. Tamakku eqqartorneqartut iluatinnartuupput
pimoorullugit misissuiffigilluaqqunartut. Taamaattumik siunnersuutigaara
pineqartut sukumiisumik nalilersorneqarluarlutik oqallisigineqarnissaat.
Sulianimmi kinguarsaajuartuarnermi sumiluunniit iluatsinneq ajormat.
Ole Dorph, Isumaginninnermik Suliffeqarnermullu Naalakkersuisoq, Siumut:
Inatsisartunut ilaasortaq Godmand Rasmussen apeqquteqarpoq innarluutillit
kalaallit Danmarkimukartinneqarnissaannut
taarsiullugu nunatsinni innarluutilinnut paaqqinnittarfinni
inissinneqarnissaannik neqeroorfigineqarsinnaanerat periarfissinniarlugu
Naalakkersuisut sunik suliniuteqalersaarnersut.
Apeqquteqaat Inatsisartut siulittaasoqarfianit akuerineqartumik
oqallisissanngortinneqarpoq.
Inatsisartunut ilaasortap Godmand Rasmussenip apeqquteqaammini upernaakkut
2001-imi Kangerlussuarmi innarluutilinnut paaqqinnittarfiliortoqarnissaanik
aalajangiiffigisassatut siunnersuuteqarsimanini ilaatigut innersuussutigaa,
ilaatigullu annertuumik innarluutillit angerlarartinneqarnissaannut
periarfissanik misissuisimanermik nassuiaat 2001-imi junip aallartinnerani
Inatsisartunut agguaanneqarsimasoq innersuussutigalugu. Inatsisartunut
ilaasortap
Godmand Rasmussenip apeqquteqaammini naggataatigut siunnersuutigaa
peqatigiiffiit
pioreersut paaqqinniffinnit pioreersut atorluarneqarnerunissaannik aammalu
nutaanik paaqqinniffiliornissanik periarfissat
misissuiffigilluarneqarnerunissaat. Tamatumuunalu kingorna
oqallisigineqarnissaat.
Innarluutillit nunatsinniittut atugarisaasa pitsanngorsaavigineqarnissaannik
apeqqut Naalakkersuisut suliniutigiuarpaat, ilanngullugu sapinngisamik
Danmarkimut nuussiunnaarnissaq.
Paaqqinnittarfiit piorsarneqarnissaannik pilersaarutit nassuiaammi suliami
taaneqartumi takuneqarsinnaapput. Nassuiaat ilaasortanit ataasiakkaanit
pineqarsimanngikkuni Isumaginninnermut suliffeqarfimmullu Pisortaqarfimmut
saaffiginninnikkut pineqarsinnaavoq.
Aamma oqaatigineqarsinnaavoq upernaaq manna Godmand Rasmussenip
siunnersuutaata oqallisigineqarnerani siunnersuutigineqarmat Kangerlussuaq
aasaanerani innarluutilinnut ilaqutaasunullu qasuersaartarfittut
atorneqarsinnaasoq. Ukiup ilaannaa atorneqartussaagaluarpalluunniit
pisariaqarpoq naammaginartunik sulisoqarnissaq, aammalu sinaakkutissat allat
pioreernissaat pisariaqartussaasoq. Taamaattumik qularnaarneqassaaq
peqqinnissaqarnikkut tamakkiisumik atugassaqartitsinissaq, aammalu
peqqinnissaqarfimmi sulisoqarnissaq, kiisalu ilaqutariinnut sulisunullu
inissaqartitsisoqarnissaa. Naammassineqaqqaartariaqartutut taakkartorneqartut
taakku qularnaarniarlugit aningaasaliisoqaqqaartariaqarapoq, suliassat
annertunerulissammata Naalakkersuisoqarfimmit sinaakkusiussat iluanni
matussutissaqartinneqanngitsut.
Piffissami qanittumi Kangerlussuaq Sisimiut kommunianni
nunaqarfinngortussaammat Naalakkersuisut isumaqarput
paaqqinnittarfiliortoqarnissamik imaluunniit qasuersaarfiliortoqarnissamik
pilersaarusiortoqassappat, tamanna kommunimut
oqaloqatiginnissutigineqartariaqartoq.
Godmand Rasmussenip apeqquteqaammini eqqaavaa ilinniarsimasunik
sulisussaaleqineq nutaamik paaqqinniffiliortoqannginneranut
patsisissaatinneqartoq, apeqqutigalugulu tupinnartuliamik pisoqarnissaa
utaqqiuassaneripput imaluunniit Inatsisartut tassunga iliuuseqarniarnersut.
Soorunami iliuuseqartoqartariaqarpoq, iliuuseqartoqanngippaammi
allanngortoqarnavianngilaq.
Naalakkersuisullu aamma suliniuteqareerput. Upernaaq manna Inatsisartut
ataatsimiinneranni aalajangiisimaneq tunngavigalugu isumaginninnerup iluani
sulisut atugarisaat pillugit misissuineq aallartinneqareerpoq.
Suleqatigiissitamik pilersitsisoqarpoq sulisartut peqatigiiffiiniik sulinermi
illuatungeriinnik inuttaqartinneqartumik, ilanngullugulu KANUKOKA.
Suleqatigiissitaq siullermeerluni ataatsimeereersimavoq, naatsorsuutigalugulu
2002-mi junimi misissuineq naammassineqassasoq. Tamatuma kingorna
aalangiiffigineqassaaq sulisussarsiortarneq siuarsarniarlugu
sulisooreersullu sulisoriinnarnissaat anguniarlugu qanoq
iliuuseqartoqassanersoq.
Taamaattumik misissuititsisimanermik aalajangerneq sioqqullugu perorsaasutut
sulisut taarserarpallaarnerat ulloq unnuarlu paaqqinnittarfinnit arlalinnit
nalaanneqartartoq sunik pissuteqarnersoq misissortinniarlugu Naalakkersuisut
suliniuteqalersimammata. Siulittaasup ammaanermini oqalugiaataa pillugu
oqallinnermi eqqaariikkattut misissuinerup eqikkarneqarnerani
takuneqarsinnaavoq perorsaasutut sulisut arlallit suliffimminnit
soraartarnerannut nungullarsimaneq tamatigut nassuiaatigineqartartoq.
Ajornartorsiutit ilaat sulisut amerlineqarnerisigut aammalu atorfinni
nutaani perorsaasutut ilinniarsimasunik naammattunik sulisut amerlinerisigut
qaangerniarneqarsinnaapput.
Oqaatigineqarportaaq akissarsiat appasippallaarnerat perorsaasut
ilinniarsimasut sulerusussusiannut annikilleeqataasartoq. Aammattaaq
amerlasuut isumaqarput paaqqinniffinni init angissusiat pitsaanerusariaqartut.
Tamatumuuna sulisut sulerusussusiat annertusarneqarsinnaammat, aammalu
meeqqat peroriartorneranni pitsaanerusumik atugassaqartinneqalersinnaallutik.
Misissuisimaneq ulluni makkunani inaarutaasumik kukkunersiorneqarpoq.
Kinaassutsillu ersigunnaarsinneqariarpata tamatuma kingorna tamanut
saqqummiunneqassaaq. Naalakkersuisut taamatut oqaaseqarlutik apeqquteqaat
Inatsisartunut suliassanngortippaat.
Augusta Salling, Siulittaasoqarfimmi sinniisussat ilaasortaq, Atassut:
Isumaginninnermut Naalakkersuisumut qujavugut. Erseqqissassavara,
Inatsisartuni suliarineqassanngimmat, apeqqutaavoq. Taamaattumik
apeqquteqartoq piffissamik sivikitsunnguamik tunisinnaavara akissuteqaammut
oqaaseqaqqinnissaanut. Tassa kisianni erseqqissaqqissavara
oqallisigineqassanngilaq una.
Godmand Rasmussen, Atassut:
Siullermik ajuusaarutigissavara akissuteqaammi allakkiaq kukkuneqarsimammat.
Tassami naaneratigut aamma oqaatigineqarmat Naalakkersuisut taamatut
oqaaseqarlutik apeqquteqaat Inatsisartunut suliassanngortippaat.
Siullermik oqaatigissavara Naalakkersuisut akissuteqaataannit
siunnerfigisara qaammaallammat. Siorna saqqummiussininninngaanniit
taamatupajaaq akissutisiakka naammagisimannginnakkit taamani. Killormut
sangutitsinerit arlaqarsimapput, allaat ilaatigut aamma inuttut
nakkartitsiniarnertut taamanikkut nipi kialuunniit tusaanngitsoorsinnaanngisaa
tamani pisimalluni. Tamannarpiaq pissutigalugu neriorsuisimavunga taanna
suliaq massakkut upernaamut ataatsimiinnissamut
ukiamut nangeqqinniarlugu.
Naalakkersuisup akissutaatigut qaamasunik takuvunga arlalinnik. Taannalu
aamma nuannaajallaatigaara. Ilanngullugulu oqaatigaa KANUKOKA-lu
ataatsimiisitaliaq siullermeerluni ataatsimeereersimasoq. Naatsorsuutigalugu
2002-mi junimi misissuineq naammassineqassasoq.
Annertuumik oqaaseqarnanga taanna akissuteqaat nuannaarlunga tiguara.
Neriuppunga siullerminngaanniit taanna qaamanerusoq akissutisiara.
Augusta Salling, Siulittaasoqarfimmi ilaasortaq, Atassut:
Taamaalilluta immikkoortoq 75 naammassivarput.