Oqaluuserisassani immikkoortoq 78-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfersaneq arfineq sisamaat, tallimanngorneq oktobarip 26-at 2001, nal. 13:14
Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.
Tassani saqqummiussisussaagama Siulittaasup tullia siulleq Anders Andreassen aqutseqqussavara.
Ole
Lynge, Inatsisartut
Siulittaasuat, Inuit Ataqatigiit.
Inatsisartut
Naalakkersuisunili ilaasortat aningaasarsiaqartitaanerat
soraarnerussutisiaqartitaanerallu pillugit Inatsisartut inatsisissaattut
siunersuut nutaaq ulloq oktoberip 26-ani 2001-mi agguaanneqarpoq
ataatsimiinnermilu matumani naammassillugu suliarineqarnissaa
naatsorsuutigineqarluni.
Siunnersuutip
qanorpiaq imaqarnissaa pillugu Inatsisartut isumaqatigiinnerat tunngavigalugu
siunnersuut Inatsisartut Siulittaasoqarfiannit saqqummiunneqarpoq. Tunngaviit
siunnersuutip imarisaanut tunngavittut aallaavigineqartut ukiakkut
ataatsimiinnermi 2000-imi sukumiisumik oqaluuserineqarput. Kingullermillu
oqaluuserineqarlutik ataatsimiinnermut matumunnga atatillugu. Taamaattumik
siunnersuutip immikkuualuttortai taakkartussanngilakka. Siunnersuummili
immikkoortut pingaarnerit taaginnassallugit.
Qinersisarneq
pillugu inatsisip allanngortinneratigut Kalaallit Nunaat qinersivik
ataasiinnanngormalli aningaasarsiaqartitsinermut inatsisip atuuttup
allangortinneqarnissaa erseqqissumik pisariqartinneqalersimavoq.
Qinikkatut
suliaqarnerup ullutsinnut naleqquttumik aningaasartaqartinneqarnissaa
sivisuumik kissaatigineqartarsimavoq. Tamannalu pissaaq
aningaasarsiaqartitsinermut nutaamik inatsisiliornikkut. Tamatumalu
peqatigisaanik aningaasartuutinut matussutissatut tapit
allanngortinneqassapput. Aammalu soraarnerussutisiaqarnemik
aaqqissussisoqassalluni kiisalu Inatsisartut ilaasortat Nuummi
najugaqalernissaminnut periarfissaat pitsaanerulersinneqassallutik.
Inatsisartut
ataatsimiinnerannut ataatsimiititaliallu sulinerannut atatillugu angalanermi
ullormusianik tunniussisarnermik aaqqissuussineq siusinnerusukkut atuuttoq
aningaasartuutinut matussutissatut tapit allanngortinneqarnerisigut
atorunnaarsinneqassaaq.
Qinikkatut
suliaqarneq suliassat isumagisariaqarnerisigut piffissallu atorneqartup
sivitsoriartuinnarneratigut pisariuleriartuinnarpoq. Sulineq qaammatisiutit
malillugit ukiumut siammariartuinnarpoq ullorlu tamaat suliffittut allatut
nallersuunneqartariaqalerluni. Ineriartorneq taanna aningaasarsiaqartitsineq
pillugu inatsisissatut siunnersuummik nutaamik saqqummiussinikkut
ersersinniarneqarpoq.
Tassani
aningaasaqarnermut ataatsimiititaliami kukkunersiunermullu ataatsimiititaliami
ilaasortat Inatsisartullu Siulittaasoqarfiata immikkut suliaqarnerat
sillimmartaarunneqarsimammat. Siunnersuutittaaq imaraa Inatsisartut
Naalakkersuisunilu Siulittaasut kiisalu Naalakkersuisuni ilaasortat
aningaassarsiaasa soraarnerussutisiaasali iluarsiivigineqartarnissaat.
Aningaasarsiat siunissami iluarsiivigineqartarneranni ASG-mi, tassalu
Akademisk Sammenslutning Grønlandimi ineriartorneq malinneqassaaq.
Taamaalillunilu immikkoortumi tassani ukiut allortarlugit nutaamik
isumaqatigiissuteqartoqarneratigut aningaasarsiat iluarsiivigineqartassallutik.
Inatsisittaaq
nutaap imaraa Inatsisartut Naalakkersuisunilu ilaasortat
soraarnerussutisiassatigut atugarisaasa nutarterneqarnissaat pillugu
aalajangersagaq. Maannamiit aningaasarsiat tunniunneqartartut 15%-at
soraarnerussutisiaqarnermut aaqqissuussinermut namminersortumut PSA
soraarnermut akiliutigineqartalissaaq. Taamaalillutik soraarnerussutisianut
akiliutit pisussaaffioratarsinnaasutut naatsorsuiffigineqanngitsutut
siusinnerusukkut landskarsimit akilerneqartartussaasimasut matuma kingorna
aningaasanut inatsimmi ilanngunneqartalernermikkut
saqqumisunngortinneqassapput.
Aammattaaq
Inatsisartunut ilaasortat akileraarutaasussaanngitsumik aningaasartuutinut
matussutissatut tapisiaat iluarsiivigineqassapput. Soorluttaaq Kalaallit
Nunaanni paasisassarsiorluni angalanermi aningaasartuutit
matussusiivigineqarsinnaanerat killiussanik aalajangersaavigineqartut.
Nuummi
ataatsimiititaliat ataatsimiittarnerisa Naalakkersuisoqarfinnilu
ataasiakkaanik suleqatigiinnerup annertunerujartuinnarnerisa kingunerigajupaat
Inatsisartut ilaasortat aamma Inatsisartut ataatsimiinnerisa avataasigut
Nuummiittariaqartarnerat Inatsisartut ilaasortat inoqutitik ilagalugit Nuummi
aalajangersimasumik najugaqarnissamik kissaateqartut maleruagassat atuuttut
naapertorlugit maanna atugassinneqarsinnaalissapput.
Inatsisartunut
ilaasortanut Nuup avataani najugaqaannarnissamik kissaateqartunut aapparisap
qitornarisallu Inatsisartut ataatsimiinnerannut ingiaqataanerannut
aningaasartuutit matussusiivigineqartarnissaannut periarfissat
pitsaanerulersinneqassapput. Aningaasarsiaqartitsinermik inatsit nutaaq
akuersissutigineqassappat 2002-mi aningaasanut inatsimmi Inatsisartut 7
million 71.132 kr-ninik Naalakkersuisullu 1 million 434.588 kr-ninik
aningaasartuuteqarnerunermik kinguneqassaaq. Inatsisip novemberip
aallaqqaataanik 2001-miilli atortuulersinneqarneratigut ukiup matumap
sinneranut naapertuuttumik annertussusilimmik ilassutitut
aningaasaliissuteqartoqarnissaa naatsorsuutigineqartariaqalissaaq.
Aningaasarsiaqartitsinermut
inatsit nutaaq tassungalu nassuiaatit ilanngunneqartut innersuussutigalugit
siunnersuut Inatsisartunut oqaluuserisassanngortinneqarpoq.
Anders
Andreassen, ataatsimiinnermik
aqutsisoq, Inatsisartut Siulittaasuata Tullia, Siumut:
Aap,
qujanaq. Maannalu partiit, Kattusseqatigiit attaviitsullu oqaaseqartussaat
oqaaseqassapput.
Lars-Karl
Jensen, Siumup
oqaaseqartua.
Inatsisartut
Naalakkersuisunilu ilaasortat aningaasarsiaqartitaanerat
soraarnerussutisiaqartitaanerallu pillugu siunnersuutip
siullermeerneqarneqarnera Siumumiit imatut oqaaseqarfigissavarput.
Aningaasarsianut tunngasut siorna ukiakkut 2000-imi ataatsimiinnermi
siullermeerutaasumik saqqummiunneqarmata Siumumiit pingaartillugu
oqaatigaarput Inatsisartut suliariaasiannut naapertuuttumik aallaaveqarluni
taakkua nalilersorneqarnissaat pingaartillutigu, kisianni ilisimaneqartutut
aningaasarsiaqarnermut tunngasuni suliaq nukippassuit atorlugit ingerlareersoq
suliap nutaamik nalilersornissaa kissaatigineqartoq pissutiginerullugu
taamanikkut suliaq unittoornikuuvoq. Siumumiilli tamanna uniffiginagu suliap
nangeqqillugu ingerlanera aamma annertuumik suleqataaffigaarput sulinitsinnilu
Inatsisartut Naalakkersuisullu ullumikkut sulinerat aallaavigalugu
nalilersuiffigalutigu.
Siumumiit
siusinnerusukkut suliamut tunngasunik oqaaseqaatigisartakkagut
innersuussutigalugit suliassami uani paaseqqussavarput namminissarsiorluni
akissaasersuineq siunertarinnginnatsigu. Siunertarigatsiguli Inatsisartut
Naalakkersuisunullu ilaasortat minnerunngitsumillu siunissami
ilaasortaasarlertussat suliassaannut nammagassaannullu naapertuuttunik
akissaasersorneqarnissaat. Taamaattumik suliassap inimi maani naammassillugu
suliarineqarnissaa Siumumiit alajangiusimavarput.
Inatsisartut
Siulittaasoqarfiata maannakkut nutaamik saqqummiussai ukiaq manna Inatsisartut
nalilersuiffigalugit oqallisigisatsinnut naapertuulluinnarmata ersarimmatalu
immikkuualuttunut sammisunik annertunerusunik oqaaseqarfiginagit Siumumiit
oqaatigiinnassavarput siunnersuutigineqartut tamaasa ataatsimut isigalugit
taamatut iluseqartillugit akuersaarniaratsigit.
Siumumiit
taamak naatsumik oqaaseqarluta inatsisissatut siunnersuutip
aappassaaneerneqannginnerani inatsisit atortinneqarnerannut
ataatsimiititaliami nalilersuiffigineqarnissaat inassutigaarput.
Finn
Karlsen, Atassutip
oqaaseqartua.
Inatsisartut
Naalakkersuisut ilaallu ilanngullugit ilaasortat aningaasarsiaqartitaanerat
aammalu angalasinnaatitaanerat pillugit iluarsiivigineqarnissaat inatsimmi
pineqarput. Atassummi inatsisissatut siunnersuut gruppemi annertuumik
sukumiisumillu oqaluuserereerlugu inatsisissatut siunnersuut
allannguuteqartinnagu akuersissutiginiarlugu isumaqatigiissutigineqarpoq.
Tamatumunnga tunngatillugu siullermik oqaatigissavarput siorna ukiakkut
Inatsisartut ataatsimiinnitsinni oqaluuserisassatta, immikkoortoq 30-p,
maangaannaq taamatut nanginneraa.
Taamaattumik
taamanikkut oqaaserisagut uteqqinngikkaluarlugit innersuussutigissavagut.
Inatsisissap suliarineqarnerani aallaqqaammut matoqqasumik Inatsisartut
marlussoriarlugu sammineqartarpoq. Tamatumanilu amerlanerussuteqarluartut
kissaatigisaat tunngavigalugu Inatsisartut Siulittaasoqarfiat taamatut
isikkulimmik saqqummiussaqarnissaminik suliassinneqarnini tunngavigalugu
saqqummiivoq.
Matoqqasumik
suliarineqartariaqarneranut tunngaviuvoq suulluunniit inatsisissatut
siunersuutigineqartut tamatigut aallaqqaammut matoqqasuni
suliarineqaqqaartarput, tamatumanilu periuseq maani aamma atorneqarpoq.
Nunatsinni qinikkatut akisussaaffik annerpaaq Inatsisartut akisussaaffigaat.
Aammalu maannakkut suliakkersorneqarnerat malunnarluartumik
annertusiartuinnartoq eqqarsaatigalugit akissaatitigut
naleqqussaavigineqarnissaat pisariaqalersimavoq.
Taamaattumik
Inatsisartut Naalakkersuisullu akissarsiaqartitaanerat oqareernitsituut
nalimmassaavigineqarnissaat pisariaqalersimavoq. Tamatumunnga ilanngullugu
Inatsisartut ilaasortat sinerissamut angalasinnaanerat pitsaanerusumik
periarfissinneqarpoq. Maannamummi inatsit atuuttoq tunngavigalugu qinigaaffiup
ataatsip iluani angalasinnaanermik ataasiinnarmik periarfissaqartitaapput.
Inatsillu akuerineqarpat angalasinnaatitaanerit ukiumut ataasiartumik
periafissaqartitaalissapput.
Akileraarutitaqanngitsumik
ajunngitsorsiassaqartitaaneq annertusineqassasoq siunnersuutigineqarpoq.
Akerlianilli tamatumunnga tunngatillugu maluginiarneqartariaqarpoq angalanermi
ullormusiaqartitaanerit atorunnaarsinneqassammata.
Oqareernitsituut
oqaatigeqqissavarput ukiakkut 2000-mi ataatsimiinnermi tamatumunngarpiaq
tunngasumik oqaasereriikkagut innersuussutigissagatsigit. Taamatut naatsumik
oqaaseqarluta inatsisissatut siunnersuut akuersaarlugu oqaaseqarfigaarput.
Lars
Sørensen, Inuit
Ataqatigiit oqaaseqartuat.
Ilisimaneqartutut
Inuit Ataqatigiit 1994-imi ukiakkut siunnersuuteqarpugut Inatsisartuni
suleriaaserput tunngaviatigut allanngortiterneqartariaqartoq. Taamanikkut
siunnersuuterput akissarsianut tunngassuteqanngilaq. Taamani
siunnersuuteqarnitsinnut aallaaviuvoq isumaqaratta Inatsisartut suli
annertunerusumik sunniuteqarlutillu oqartussaassuseqarnerulertariaqartut.
Ulluinnarnilu Naalakkersuinikkut suliaasunut annertunerusumik
malinnaatinneqartariaqartut.
Taamaattumik
taamanili ilaatigut siunnersuutitsinnut qitiutillugu ilaatipparput
Inatsisartut namminerisaminnik ataatsimiititaliaat eqqarsaatigalugit
kiffartuussiveqalerlutik allattoqarfeqalissasut. Taamaaliornitsigut
Naalakkersuisut Inatsisartullu suliassavippiaat avissaartinneqarsinnaammata.
Qujanartumik Inatsisartut partiinit tamanik Kattusseqatigiinniillu
ilalerneqartumik Inatsisartut suliariaasiata nutarterneqarnissaanut
kommissionip isumaliutissiissutaatigut ukiukkut 1996-imi ataatsimiinnermi
allanngortitsisoqarnissaanut tunngaviliisoqarpoq. Tamatuma kingunerisaanik
Inatsisartuni suleriaasissatut aalajangersagaq decemberip aallaqqaataani 1999
aallarnerfigalugu atortuulersinneqarpoq. Inatsisartut suliariaasiat maanna
atuuttoq ilaatigut Inatsisartut annertunerusumik pisussaaffiliivoq.
Naalakkersuisut
ulluinarni ingerlatsinerat nakkutigineqarnerulersinnaalersillugu
ataatsimiititaliat nukittorsarneqarmata. Minnerunngitsumillu aamma
ataatsimiititaliat Inatsisartut katersuunnerisa avataasigut nammineerlutik
suliassaminnik suliaqarsinnaalermata. Apeqqutinullu ataatsimiititalianut
attuumassuteqartunut suugaluartunulluunniit qaqilerisinnaallutillu
malersuisinnaanngorsimammata.
Inatsisartut
tassaalersimapput Naalakkersuisut tunuliaqutaralugit sulisitsisut.
Taamaattumik Inatsisartut ukioq naavillugu katersuussinnaannginnerat
patsisigalugu Inatsisartut ataatsimiititaliaat aamma tassaalersimapput
Naalakkersuisoqarfinnut ataasiakkaanut nakkutiginnittussat. Inatsisartut
akuersissutigereersimasaannut piviusunngortitsiniarnermi. Periuseq taanna
demokrati toqqammavigalugu nunani allani pissusissamisoortut isigineqartoq
aamma nunatsinnut eqqunneqarpoq. Nunarput ataatsimut Inatsisartut
qinersivinngortinneqarmat.
Inatsisartut
suleriaasiannik allanngortitsinerup kingunerisaanik maanna misilittakkat
takutippaat Inatsisartut ilaasortaanerup saniatigut allamik suliffeqarnissaq
ajornarsiartuinnartoq. Taamatut Inatsisartut sulinerata ineriartornera Inuit
Ataqatigiit iluarisimaarparput. Tunngaviusumik isumaqaratta Inatsisartut
ilaasortaaneq tassaasariaqartoq atorfittut allatut tamakkiisumik
aallunneqartoq.
Nunatsinni
kinaluunniit 18-inik ukioqalersimasoq Inatsisartut qinigassanngortissinnaavoq
soorunami aamma qinigaasinnaalluni. Tamanna
qinersisartut aalajangertarpaat. Ullumikkut Inatsisartut ilaasortaq ukiumut
235.000-it ataatilaarlugit akissarsiaqarpoq. Taassumap saniatigut
allaffissornermut telefonimut allanullu atugassanut
akileraaruteqaataasussaanngitsunik ukiumut 50.000-tit ataatilaarlugit
atorneqartussanik aamma pissarsiaqartinneqartarpoq. Taassumap saniatigut
Inatsisartut ilaasortat avataaneersut Inatsisartut ataatsimiinnerisa nalaani
ataatsimiititaliallu angalanerisa nalaanni allatuulli
ullormusiaqartinneqartarput.
Inatsisartut ilaasortat ullumikkut akissarsiaat atorfinnut allanut
sanilliunneqassappata oqartariaqarpugut Namminersornerullutik Oqartussani
kommuninilu immikkoortortaqarfiini pisortat akissarsiaanut
sanilliunneqarsinnaasut. Taamaattut akissarsiatigut sanilliussinerup apeqqutit
arlallit pilersippai. Inatsisartut ilaasortat ullumikkut akissarsiaat
akisussaaffimmut sanilliullugit qaffasippallaarpat?
Naagga taamatut oqartoqasinnaanngilaq. Oqareernittut Inatsisartut
suliariaasiata allanngortinnerata kingunerisaani Inatsisartut
Naalakkersuisunilu ilaasortat aningaasarsiaqartitaanerat pillugu Inatsisartut
inatsisissaattut siunnersuut atorfilinnik inuttalimmik suleqatigiissitamit
suliarineqarpoq. Taakku siunnersuutaat kingumut manna Inatsisartut
Siulittaasoqarfianiit Inatsisartut aalajangiiffigisassanngorlugu
saqqummiunneqarpoq.
Inuit Ataqatigiit isumaqarpugut Inatsisartut Siulittaasoqarfiata siunnersuut
aningaasarsiaqartitsinermut inatsimmut maanna atuuttumut naleqqiullugu
allannguutinik taamak malunnaateqartigisunik allannguiniarnerat
isumatusaarnerunngitsoq.
Ulluni makkunani inuiaqatigiit aningaasaqarnerat ataatsimut isigissagaanni
aammalu Inatsisartut aningaasanut inatsisissaata suliarineqarneranut
atatillugu sinerissap qanittuani aalisarnikkut ajornartorsiutit Royal
Greenland aamma Nuka A/S ajornartorsiutit ilinniagaqartut atugaannut
sipaarutissat innuttaasullu ataatsimut isigalugit suli maannakkornit
aningaasatigut sipaarnikkut piumasaqarnerit eqqarsaatigalugit Inuit
Ataqatigiit siunnersuut tamakkiisumik akuersaarsinnaanatigu oqaatigissavarput.
Inuit Ataqatigiit aamma oqaatigissavarput inatsisissatut siunnersuut
ataatsimut isigalugu akissarsiatigut qaffaassutissat taakkununnga tunngasut
siunnersuutit eqqaassanngikkaanni arlalitsigut iluarisimaaratsigu.
Pingaartumik inatsisissatut siunnersuut allaffissornikkut
pisariillisaaniarnermik annertuumik siunnerfeqarmat.
Taamatuttaaq nunarput Inatsisartut ataatsimut qinersivinngornerata
kingunerisaanik ilaasortat qinersisartunik isumasiuvillutik aamma
paasisassarsiorlutik angalasinnaanermikkut kingumut periarfissinneqassammata.
Ilanngullugu iluarisimaarlugu oqaatigissavarput Inatsisartut ilaasortat
meeqqiortut mikinerusunillu meerallit kiisami pitsaanerusunik
atugassaqartitaalernissaat aamma Inatsissatut siunnersuummi ilaatinneqarmata.
Tamanna ilaatigut naligiissitaanermut ataatsimiititaliap qangali
kissaatigisaanut tusaaniarnertut nalilerparput.
Akissarsiat annertunerusumik piumasaqaatitaqanngitsumik taamak
annertutigisumik qaffanniarneqarnissaanut akuersaannginnerput Inuit
Ataqatigiit erseqqissumik oqaatigereeratsigu Inatsisartut inatsiseqarnermut
ataatsimiititaliaanut suliap Inatsisartut aappassaaneerlugu
suliarineqannginnerani kaammattuutigissavarput akissarsiat pillugit nutaamik
nalilersueqqullugit. Allannguutissatullu siunnersuutit tamanit
isumaqatigiissutigineqarsinnaasut isumaliutissiissut aqqutigalugu
saqqummiussaqaqqullugit.
Inuit Ataqatigiit aamma siunnersuutigaarput Inatsisartut ilaasortat ukiumut
akissarsiaat tunngaviusut 1993-imiilli qaffaanneqanngimmata kattuffiit
assigiinngitsut angusimasaat tunngavigalugit qaffanneqarnissaat aamma
siunnerfigeqqullugu.
Illuatungaatigut allaffissornikkut pisariillisaaneq siunertaralugu
Inatsisartut ilaasortat aningaasarsiamik saniatigut 96.000 kr-nik Nuummi
najugaqartunut ilaasortanullu allanut ukiumut 126.000 kr-nit
aningaartuutissanut matussutissanik tapisiaqartitaalernissaat
peqataaffigisinnaavarput. Taakkulu tassaapput ullormusiaqartitsinermut
taartaasussat.
Taamatut oqaaseqarluta Inuit Ataqatigiinniit kaammattuutigaarput ilaasortat
aningaasarsiaqartitaanerat pillugu Inatsisartut inatsisissaattut siunersuut
aappassaaneerlugu suliarineqannginnerani Inatsisartut Inatsiseqarnermut
ataatsimiititaliaani suliarisanngortinneqaqqissasoq.
Anthon
Frederiksen, Kattusseqatigiit
oqaaseqartuat.
Inatsisartut Naalakkersuisunullu ilaasortat aningaasarsiaqartitaanerat
ilaallu ilanngullugit pillugit Inatsisartut inatsisissaattut siunersuummu
Kattusseqatigiinniit imaattumik oqaaseqaateqassuugut. Siullermik
Kattusseqatigiinniit oqaatigeqqissavarput suliat marluusut tassalu
Inatsisartut angalasarnerannut tunngasut aamma Inatsisartut Naalakkersuisullu
aningaasarsiaqartitaanerannut tunngasut immikkoortillugit
oqallisigineqarnissaat Kattusseqatigiinniit kissaatigisimagaluaratsigu.
Makkua pissutigalugit siullertut. Naluneqanngitsutut nunarput Inatsisartunut
qinersivinngornikuuvoq ataaseq. Taamaattumillu Inatsisartut angalasarnerannut
tunngasut malittarisassat pinngitsooratik allanngortittariaqalernikuullutik.
Aappaattut Inatsisartut Naalakkersuisullu aningaasarsiaqartitaanerat
Inatsisartut Naalakkersuisullu angalasarnerannut kaputartuullugit
oqaluuserineqartariaqanngikkaluarmata.
Kattusseqatigiinniit oqaatigissavarput Kattusseqatigiinni Inatsisartut
Naalakkersuisullu angalasarnerannut tunngasut iluarsiissutissat tunngaviatigut
isumaqatigigatsigit. Tassa Inatsisartunut qinersisarnermi inatsisip
nutarterneqarnerata kingunerisaanik Inatsisartunut Naalakkersuisunullu
angalasarnernut tunngasut pinngitsooratik nutarterneqartariaqarmata.
Taamattuminguna Kattusseqatigiinniit ataatsimiititaliami
piumasarisarsimagaluaripput oqaluuserisat taakku marluk immikkootut imminnut
kaputartuunnagit oqaluuserineqarnissaat.
Taamaattut siunnersuutip affa oqaaseqarfigereerlugu Inatsisartut
Naalakkersuisullu aningaasarsiaqarnerannut tunngasortaa Kattusseqatigiinniit
aamma imaattumik oqaaseqarfigissavarput.
Siullermik Kattusseqatigiinniit nassuerutigalugu oqaatigissavarput
Inatsisartut Naalakkersuisullu akissarsiaqartitaanerannut tunngasut pillugit
Kattusseqatigiinniit isumaqatigiinginnatta. Naak oqaluuserineqartoq pillugu
siorna oqallinnermi tamatta isumaqatigiilluta Inatsisartut Naalakkersuisullu
akissarsiaasa qaffanneqarnissaat akerlerisimagaluarlutigu.
Ilanngullugu oqaatigissavarput Kattusseqatigiinni ilaasortat pingasut
Inatsisartut Naalakkersuisullu aningaasarsiaasa qaffanneqarnissaat
tunngaviatigut isumaqatigimmassuk. Ingerlaannarlu aamma
oqaatigeqqittariaqarparput ilaasortat taakkua pingasut aningaasarsiat
iluarsineqarnissaannut isumaqaagaluarlutik qaffaatissatut
siunnersuutigineqartut ilaatigut ingasattajaartumik
annertussusilerneqarsimaneri tassa taamarsuaq qaffaaniarneq
pissusissamisoortutut isiginngimmassuk. Taamaammallu qaffaatissat ataatsimut
katillugit 9 millionit tungaanut annertussuseqartut akuersaarsinnaanagit.
Minnerunngitsumi nunatsinni aningaasat pisariaqarnerusunut
atorfissaqatinneqarnerat aamma eqqarsaatigalugu. Tassani
akuersaarneqarsinnaanngilaq Naalakkersuisunut ilaasortat aammalu
Inatsisartunut ilaasortat 100.000 kr-niniit 300.000 kr-nit tungaanut
akissarsiaasa qaffanneqarnissaat.
Aningaasarsiaqarfiusunimi allani taamak ingasattajaartigisumik
qaffaasoqarneq ajorpoq. Soorunami Kattusseqatigiinni isummanik ilaatigut
allanngortitsineq ajuusaarnartutut oqaatigisinnaavarput, kisianni tamanna
pillugu Kattusseqatigiit sinnerlugit oqaatigissavara ilaasortat isummaminnik
allanngortitsisinnaasut soorunami namminneq nalunngissusertik
kiffaanngissuseqarnertillu tunngavigalugu aalajangiisinnaanertik namminneq
akisussaaffigalugulu kiffaanngissuseqarfigimmassuk.
Taamatut oqareerlunga oqaatigissavara Kattusseqatigiit tunngaviusumik
politikkiannut ilaammat Kattusseqatigiinni qinikkat uagutsinnut sutigut
tamatigut salliutinnginnissarput aalajangiusimagatsigu. Nalunnginnatsigu
inuiaqatigiinni iluarsisariaqartut aaqqittariaqartullu pisariaqartinneqartut
salliutillugit siulliutillugillu iluarsineqartariaqarmata.
Taamaammat Kattusseqatigiit sinnerlugit Inatsisartut Naalakkersuisullu
akissarsiaasa qaffanneqarnissaannik siunnersuut pissusissamisoortutut
isiginngilara. Soorlu aamma siorna oqallinnermi tamanna tamakkiisumik
akerlilersorsimagipput. Pissutsit tunngaviusut tunngavigalugit.
Minnerunngitsumik Kalaallit Nunatta ukiuni tulliuttuni aningaasatigut
isertittagaasa ikiliartornissaat ilimasaarutigineqartoq aamma eqqarsaatigalugu.
Aningaasarsianullu qaffaaniarnermut tunngatillugu aamma oqaatigissavarput
ilinnigaqartut siunissami isumalluutitta ajunngitsorsiassatuannguisa ilaasa
piiarniarneqarnerat akuersaarsinnaanngilluinnaratsigu.
Tamakkua piiaaffiginagit qaffaatissatut siunnersuutit ilaannik
aaqqiivigineqarnissaat kaammattuutigerusupparput. Aammalu Kattusseqatigiinniit
allat ataasiaakkaat eqqartortariikkagut oqaatigeqqinngikkaluarlugit
eqqaasitsissutigeqqissavarput inuiaqatigiinni ajornartorsiuterpassuatta
iluarsineqarnissaat salliutineqartariaqarmata.
Taamatut oqaaseqarluta assorsuaq uggoraarput Inatsisartut Naalakkersuisullu
angalasarneri pillugit malittarisassat aammalu Inatsisartut Naalakkersuisullu
aningaasarsiaqartitaanerannut tunngasut immikkoortillugit suliarineqanngimmata.
Tassami angalasarnermut tunngasut oqareernitsituut nunatsinni qinersivilli
ataasiinnanngortinneqarmat iluarsineqartussaagaluarmata.
Taamaammat Kattusseqatigiinniit Inatsisartut inatsisissaattut siunersuutip
avillugu taasissutigineqarnissaa siunnersuutigaarput. Suliallu
aappaassaaneerneqannginnerani ataatsimiititaliami suliareqqinneqarnissaa
inassutigalugu.
Anders
Andreassen, ataatsimiinnermik
aqutsisoq, Inatsisartut Siulittaasuata Tullia, Siumut.
Aap, qujanaq oqaaserineqartunut kingullernut erseqqissaatigilaassavara
siullermeerneqarnerani taasissutigineqarneq ajormata suliat.
Aappassaaneerneqarneranili aatsaat taasissutigineqartarlutik.
Otto Steenholdt, attaviitsoq.
Suliassap matuma nuanneequtigaa aalajangiisussat tassaammata uagut. Tassa nuanneequtaa. Nuannerluinnassagaluarpoq uagut uniinnarluta allat avatitsinniittut aalajangertuuppassuk. Taavalu aamma taamatut uagut soorunami pisussaavugut aaqqittariaqartunut aaqqiissalluta. Taamaattumik uparuarneqaatigigajupparput avatitsinniit oqarmata imminnut isumagipput allallu iluamik isumaginagit.
Aamma taamaappoq pisaqarsimalluni agguaqatigiikkaannii agguartoq tamatigut isiginiarneqartarpoq imminut anginerusumik tuninersoq.
Taamaattumik inatsisissaq
ataatsimut uanga isigalugu oqaatigisariaqarpara aaqqittariaqartunik
aaqqiiniarnerususoq. Tassa Inatsisartunut ilaasortat aningaasarsiaat
tamatumani pineruvakka. Aaqqiissussatut
tassatuaapput Inatsisartut namminneq. Allaat uanga ilimaginerusimagaluarpara
Inatsisartunulluunniit aalajangertinnagu Siulittaasoqarfiup nammineerluni
taanna aaqqinniarsimasinnaagaluaraa.
Taanna
oqinnerusimassagaluarpoq immaqa. Ilaasortalli akissarsiamik saniatigut
ataatsimiititaliani siulittaasuuneq imaluunniit Siulittaasoqarfimmik
Siulittaasumut tulliuneq Siulittaasoqarfimmiinnerluunniit akissarsiaqaataaneri
isornartoqartippakka.
Assuariniarneqartarpunga
folketingemi pissutsit eqqartuleraangakkit. Taamaattoq aamma ullumi
oqaatigissavara Danmark-i uatsinnut naleqqiullugu
aningaasarissaarnerugaluaqaluni qinikkanut qullernut tassa folketing-imi
ilaasortanut uatsitulli aningaasanik tukkortiginngimmat.
Folketingep
Siulittaasua akissarsiaqarpoq tullii tamarmik akissarsiaqartinneqanngillat.
Taamaallaat inissaqartinneqaannarlutik. Tassa Københavnimi. Immikkut
pineqartutuaq tassa statsrevisioninik taaneqartartut. Finansudvalgilluunniit
Siulittaasuat Folketingimi ilaasortaanermi saniatigut
akissarsiaqartinneqanngilaq.
Uagut
maani Finansudvalgimiittuutitavut tamarmik ukiumut 60.000-inik
akissarsitinneqartarput. Landskarsip kukkunersiuisuiniittut tamarmik
siulittaasullu tullii tamarmik 36.000 kr-nik akissarsitinneqartarput.
Siunnersuut
tamaat ataatsimut isigalugu aaqqiinertut isigalugu siunnersuutigissavara
oqallisigineqaqqullugu ataatsimiititaliami tassa ' 1 immikkootoq 3 uanga
siunnersuutigigiga taanna peerneqaqqullugu. Taanna ataatsimiititaliap
oqallisigissagaa kissaatigaara.
Ole
Lynge, Inatsisartut
Siulittaasuat,Inuit Ataqatigiit.
Siunnersuummut
tunngaviutinneqartut Inatsisartut suliarineqarneranni saqqummersut
tunngavigalugit siunnersuutip saqqummiunneqarnerani Siulittaasoqarfik
Inatsisartut sinnerlugit Inatsisartullu soqutigisaat aallaavigalugit
iliuuseqarpoq.
Tunngaviutinneqartut
maannakkut Inatsisip oqaasertaatut erseqqissunngorlugit suliarineqarsimalerput.
Aalajangersakkallu ataasiakkaat pillugit sukumiisumik nassuiaatit
suliarineqarsimallutik. Oqaatigissavara siulittaasoqarfiup kissaatiginngimmagu
siunnersuutip Naalakkersuinikkut isiginnilluni oqaluuserineqarnerani
peqataanissani. Tamanna partiit qinigaaqatigiillu oqaaseqartartuinit aammalu
ilaasortanit ataasiakkaanit isumagineqartussatut isigineqarpoq. Oqallinnermi
matumani apeqqutigineqartut oqaaseqarfiginninnerillu siunnersuutip ulloq
novemberip pingajuani aappassaaneerneqannginnerani ataatsimiititaliamit
suliarineqarnissaa inassutigissavarput.
Aamma
qujassutigaara taamatut naatsumik partiit Kattusseqatigiit attaviitsullu
oqaaseqaatai inassutigeqqissallugu ataatsimiititaliami susassaqartumi
misissoqqinneqassasut.
Anders
Andreassen, Inatsisartut
Siulittaasuata Tullia, Siumut.
Qujanaq
tassa taamaalilluni oqaluuserisassaq immikkootoq 78, tassalu Inatsisartut
Naalakkersuisunilu ilaalu ilanngullugit ilaasortat aningaasarsiaqartitaanerat
ilaalu ilanngullugit pillugit Inatsisartut inatsisissaattut siunersuut
naammassigallarpoq aappassaaneerneqartinnanilu inatsiseqarnermut
ataatsimiititaliamut ingerlaqqaarallassaaq. Tamatumalu kingorna
aappassaaneerneqarumaarluni.