Oqaluuserisassani immikkoortoq 78-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut 20-at, arfininngorneq 3. november 2001, nal. 16:47
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit.
Ole
Lynge, Inatsisartut
Siulittaasuat, Inuit Ataqatigiit.
Taavalu
tullinnguuppoq Inatsisartuni Naalakkersuisunilu il.il ilaasortat
anigaasarsiaqartitaanerat il.il pillugit Inatsisartut inatsisissaattut
siunnersuut aappassaaniigassaq. Aamma tassunga eqqaasitsissutigissavara
Inatsisartut inatsisit atortinneqarnerannut Ataatsimiititaliaat
isumaliutissiissuteqarmat amerlanerussuteqartumik.
Aappassaaneerneqarnissaanulli qinnutigineqarnsimanngilaq immikkut
oqaaseqarfiginissaat. Apeqqutigissavara allanit oqaaseqarfigineqarniarnersoq.
Lars
Sørensen, Inuit
Ataqatigiit oqaaseqartuat.
Tassa
Inuit Ataqatigiinni isumaqarpugut Inatsisartunut Naalakkersuisunulu sulineq
allatuulli sulinertut tamakkiisumik aallanneqartariaqartoq. Maannangaarli
erseqqissaatigissavarput akissarsiat taama annertutigisumik qaffanneqarnissaat
isumaqatiginnginnatsigu.
Inuit
Ataqatigiinniit siullermeerinninnermi oqaatigaarput qinersiviup
ataasiinnanngortinnerata qinersisartunik sullissinissamut
naleqqussarneqarnissaa pisariaqavissutut isigigipput. Tamatumani qinersisartut
ornillugit tusarniaavigineqarnissai pingaartikkatsigu, taamaattumillu tassuuna
aaqqissuussinissaq iluarisimaarparput.
Ukiuni
kingullerni allaffissornerup annikkillisinneqarnissaa siunertaammat
Inatsisartuni sulinermut atatillugu angalasarnerni Nuummilu
ataatsimiittarnernerni ullormusiat atorunnaarsinneqarnissaat, taakkununngalu
taarsiullugu ataasiinnarmik aaqqissussinissaq Inuit Ataqatigiinniit
isumaqatigaarput, tamaalillunimi allaffissorneq annikillisinneqarsinnaammat.
Siunnersuummissaaq
Inatsisartuni ilaqutariinnut atugassarititaasut pitsanngorsarneqassammata
isumaqatigaarput, Inuit Ataqatigiinnili akuersaarsinnaanngilarput Inatsisartut
akissarsiaasa taamak annertutigisumik qaffanneqarnissaat, tassunga
ilanngullugit ataatsimiititaliani aalajangersimasuni aamma qaffaanissat,
tassami maanna inuiaqatigiinni killiffipput eqqarsaatigalugu aningaasatigut
inissisimanerput qiviassagaanni isumaqarpugut pissusissamisuungitsoq
qaffaanissaq, isumqarpugummi qaffaasoqassappat 1993-imiit akissarsiat
nalinginnaasumik qaffanneqartarneri malinneqartariaqartut, soorlu SIK-p
allallu atorfillit isumaqatigiinniartarnerminni angusaat eqqarsaatialugit.
Maanna
aamma atsaanguaq sorpassuit sipaarniarfigaavut aningaasaliissutissallu
misissoqqissaarlugit ingerlatsiniarluta, taamaattumik Inuit Ataqatigiinniit
tuluanngitsutut isigaarput tamakku qissiminngivillugit taamma annertutigisumik
qaffaaniarneq. Tamannalu aallaavigalugu Inatsisartunut ilaasortaqativut
kaammattorusuppargut silatusaartumik eqqarsaqqeqqulluigt, tamannali
amerlanerussuteqartut aalajangiusimappassuk Inuit Ataqatigiinniit
nalunaarutigissavarput aalajangersimasumik siunertalimmik atugassanik
qaffaatissatut akuersaarsinnaanngisatta iluini aningaasaateqarfiliornissamik
aalajangersimanerput aalajangiussimagatsigu.
Taamatut
oqaaseqarluta Inatsisartut inatsisissaattut siunnersuutip ilaa akuersaarlugu
akissarsianut tunngasut akuersaarnagit oqaatigeqqissavarput.
Per
Berthelsen, attaviitsoq.
Inatsisartunut
Naalakkersuisunullu ammasumik oktoberip 24-anni 2001 allakkakka qulaani
pineqartup siullermeerinnilluni oqallisigineqarnerani nammineq
ataatsimiittarfimmi najuussinnaannginera pillugu allagarissakka
innersuussutigalugit nassuierutigalugulu inuttut kisimiittutut taasinermi
sunniuteqangaarsinnaannginnera matumuuna naatsumik ilungersorlunga
kaammattuutigissavara Inatsisartut siunnersuummik matuminnga tunuartitsissasut
nassuerutigalugu maannangaaq nunatsinni aningaasaqarniarnerput
ingerlatsinermut aningaasartuutitut matumasut ittumik qaffaanissamut
inissaqartititsnngitsoq aammalu nassuerutigalugu siunnersuut imaqarmat
nunatsinni innuttaaqatitta atugaannut sumiginnagaasumik
takutitsissutaasinaasumik soorlu Inatsisartut Nuummut nuukkusuppata
inissaqartinneqarsinnaanerannik siunniussaq eqqarsaatigalugu.
Qinikkatut
ikorfartoqatigiilluta innuttaaqatigut ataqqinninnemik takutitsivigisigit
Inatsisartut Naalakkersuisullu aningaasarsiaannik il.il. qaffaaniarluni
siunnesuummik unitsitsinikkut taamallu sipaarniuteqarnissa salliulluta
takutitsinitsigut taamatullu piffissami aggersumi aningasakilliornikkut
annernartussaqartumi innuttaaqatitsinnut nukissamik piumassutsimillu
takutitsilluarlutalu tunniussilluta. Allatummi iliorneq isumaqarpunga
innuttaaqatitsinnik mittatilliinertut nalilertariaqassasoq.
Taamatut
oqaaseqarlunga matumuuna nalunaarutigissavara Inatsisartuni Naalakkersuisunilu
il.il ilaasortat aningaasarsiaqartitaanerat il.il pillugit Inatsisartut
inatsisissaattut siunnersuutaat akerlilissagakku.
Anthon
Frederiksen, Kattusseqatigiit
oqaaseqartuat.
Inatsisartut
Naalakkersuisullu aningaasarsiaqartitaanerat il.il pillugit Inatsisartut
inatsisissaattut siunnersuutip siullermeerneqarnerani aammalu Inatsisartut
apeqqutit taakkorpiaat pillugit siorna oqallinnitsinni Kattusseqatigiinniit
oqaaseqaatigalugit imaattumik oqaaseqaateqaqqissuugut.
Suliap
siullermeerneqarnerani oqaatigereerparput Inatsisartut
aningaasaqartitaanerannut aammalu angalasarneranut tunngatillugu suliat marluk
immikkoortillugit suliarineqarnissaat Kattusseqatigiinniit
kissaatigisimagaluaripput. Tassami Kattusseqatigiinniit Inatsisartut
Naalakkersuiullu angalarsarnernnut il.il pillugit
malittarisassaqartitaanerannut tunngasut naleqqussarneqarnissaat
Inatsisartunut qinersiviup ataasiinnanngortinneqarneranut malittarisassat
naapertuuttunngortinneqarnissaat pissusissamisoormat pisariaqarlunilu,
kisiannili Inatsisartut Naalakkersuisullu akissarsiaasa ataatsimiititalianilu
illasortat ilaasa ingasattajaarussamik ajunngitsorsiassaqartilernissaaannik
siunnesuutit imaaliallaannarlugit akuersaarsinnaanngilagut.
Siusinnersuukkut
akerliunitsinnut tunngavilersuutigisartakkavut innersuussutigalugit maannakkut
pissutsit piviusut atuuttut innersuussutigeqqilugit imaattumik
ilassuteqaqqinniarpugt.
2002-mut
aningaasanut inatsisissatut siunnersuummi nunatta ukiuni tulliuttuni
aningaasaqarniarnerata ilungersunarnera pillugu Aningaasaqarnermut
Ataatsimiititaliap isumaliutissiissutaani ersarissumik allaaserineqartut
innersuussutigissavavut ilaatigut oqaaseqaatit imaattut, taakkualu
issuassavakka: Isertitat qaffakkiartorunnaanerat allaallumi
appariartulersinnaanerat ernumartoqarpoq, tassa Landskarsi tassani pineqarpoq,
aningaasatigut siuariartorfiup nalaani ingerlatsinermut aningaasartuutit
qaffanneqartarnissaat Naalakkersuisut arlaleriaqalutik
mianersoqqussutigisarsimavaat. Tassa aningaasarsiornerup illuatungaanut
saannerani ingerlatsinermut aningaasartuutit appartinniarnissaat
ajornakusoortarmat taama isummeruusetqarneq Aningaasaqarnermut
Ataatsimiititaliami isumaqatigineqarpoq aammattaaq aningaasaqarnerup
illuatungaani saakkiartulerneranut ersiutit siulliit takoreerpavut,
taamaattumillu Landskarsip isertitaasa piffissami aggesumi qaffannginnissaat
naatsorsuutigisariaqarlutigu.
Imatullu
isumaliutissiissummi nangipput: "Taamaattumik Landskarsip
ingerlatsinermut aningaasartuutaasa qaffariaateqarteqqineqarnissaat
Aningaasaqarnermut Ataatsimiititaliap mianersoqqussutigaa", issuaaneq
naavoq.
Inatsisartuni
ilaasortat Nuummi najugaqariinngitsut Nuummut nuussinnaanerannut
perairfissinneqarnissaat aningaasartuutikillisaanermut ilaasinnaagaluartoq
saqqummiussami ilaatigut takuneqarsinnaavoq, kisiannili taamaakkaluratoq
Kattusseqatigiinniit taamatut aaqqiiniarneq eqqarsarnartoqartipparput
nalunnginnatsigu aamma Nuummi inissaaleqisut taama amerlatigisut
saneqqutiinnarlugit Inatsisartuni ilaasortat initaartinneqartalissappata
pissusissamisuungitsoq.
Taakkua
saniatigut inuiaqatigiinni ajornartorsiutitta ilai isiginngitsuusaarlugit
uatsinnut aamma salliutilluta uatsinnut ajungitsorsiassinneqarnissarput
pssutsinut piviusunut naapertuutinngilluinnarpoq, tassami tamatta
nalunngilluinnarparput soorlu aamma Aningaasaqarnermut Ataatsimiititaliap
mianersoqqusinera oqaatigineqareersoq meerartatta ilaasa ajornartorsiuteqartut
ikiorneqarnissaannut naammattumik aningaasassaqartinneqanngitsut,
meeqqerivinnik amigaateqarnerput, meeqqat atuarfiisa iluarsaanneqarnissaannut
naammattumik aningaasassaqartinneqannginneq, illinniartunut
atugassarititaasunik ajornerulersitsiniarnerit akuersaarneqarsinnaanngitsut
allarpassuillu maanngaanniit taagortareersiamsagut innersuussutigeqqillugit
minnerunngitsumillu aamma inuttaasut Inatsisartut Naalakkersuisullu
akissarsiaasa qaffanneqarnissaannut akerliullutik atsiornerpassuarnik
katersillutik qisuariaateqarsimanerat
isiginngitsuusaaginnarneqarsinnaanngitsoq
tusaanngitsuusaarneqarsinnanngitsorlu inersuussutigalugit siunnersuut
tamakkiisumik akuersaarnianngilarput, tassa oqareernitsituut angalasarnermut
tunngasut ajorinngikkaluarlugit kisianni aningaasarsiat qaffanneqarnissaannut
tunngasut akuerseqataaffiginianngilagut.
Godmand
Rasmussen, Atassut.
Uanga oqaluttarfimmut qaqerusunngivissimangaluarpunga, kisianni tassa
oktoberip 24-ani tusagassiuutinut alagarineqartoq tassalu Per
Berthelseniminngaannit uanga tunginninngaanniit suli maannamut Inatsisartut
ataqqinassuasianik annertuumik nikassaanertut nalilersimagakku, taamaattumik
pisariaqartissimavata naak allakkamini oqaatigisimagaluaraa taassumap
aappassaaneerneqarnerani maaniittussannginni. Qujanaqaarlu aamma maniimmat.
Siullermik oqaatigeqqaarusuppara sumiluunniit takornartaanngilaq
ikinnerussuteqartarneq aamma amerlanerussuteqartarneq. Qanorluunniit
manngertitaartigingaluaraangatta amerlanerussuteqartut oqaasii aamma soorunami
aalajangiineri ataqqilertarapavut. Taamaattumik aamma uani massakkut
oqaaseqaammi nutaami mitallernertut naliliinera Inatsisartuninngaanniit
assorujussuaq uanga tunginninngaanniit nuanniigivara.
Inuiaqatigut sullikkusuunngilagut mittatiginiarlugit taanna peertariaqarpoq
oqaaseq, sakkortuallaarujussuarpoq Inatsisartut ataatsimut tamaasa
isigissagaanni. Taamaattumik una Siulittaasup akuersiinnaappanga 26.
september, tassa immikkoortoq 30-mut tunngatillugu oqaaserineqartut
naatsukullannguit issualaarusukaluarpakka. Aallartippoq, tassa Per Berthelseni
imatut oqaaseqarpoq taamani:
Maluginianngitsoorsinnaanngilara uani oqallisigineqartumut atatillugu
akerliusoq ersarilluinnartumik oqaluttoq tassaammat marlunnik suliffeqartoq.
Taamaalilluni allanut piffissaq tamaat inuiaqatigiinni sullissiniartunut
sanilliullugu immaqa marloriaatinik aningaasarsiaqartuusoq. Nangippoq: Ilami
qanoq nuannertigigaluarpa nalunagu ikinnerussuteqassalluni qanorluunniit
uparuaatigigaluaraanni akeqannguassanngitsoq.
Taavalu issuaaneq nangeqqilaassavara, "kisiannili siunissaq aamma
eqqarsaatigalugu nalilersuineq kusanartoq saqqummiunneqartutuut uanga
isumaqarfigivara, ingerlaqqipporlu, utoqqatserpunga Otto Steenholdtip atia
taalaassagakku tassani, kisianni pinngitsoornanga issuaaninni aamma
taasariaqarpara, tassalu Per Berthelsenip oqalunnera suli ingerlavoq: Otto
Steenholdtip oqaatigisaa nuannarilluinnarpara, akerliuneq
akeqannguassanngitsoq aallaavigalugu pissusilersoriarluni una inatsisissaq
allannguutaallu akueriqassappat taava 1. januar 2001-minngaanniit akissaraiat
qaffannerat tigugunikku qanoq isikkoqarnissaat taassumap takunissaa
terlinganeerlugu soqutiginartikkaluarpara".
Issuaaneq ingerlaqqippoq: "Taanna isumaqarpunga unneqqarissumik
ilioruussasoq ataqqineqarsinnaasoq uangami uneqqarissuuneq pingaartippara.
Oqaluttuatoqqanilu aamma puigunningisaannarlugu oqaluttuaq Navaranaamut
tunngassuteqartoq, Navaranaaq imminut aavoq unneqqarissumik
pissusilersunnginnami, naak nalunngikkaluarlugu pissutsit piviusut qanoq
ittuusut taamaattorli ajuusaaraluarluni kamassaraluarluni imminut aavoq.
Taamaattumik massakkut uani nuannarivara Navaranamik taagukkani massakkut
aamma Navaranaaqasiummagu, tassami taamanikkut sakkortutigisumik oqaatsit
atorsimammagit. Taamaattumik uani pingitsoorusunngilanga avataaniittunut aamma
taakku allakkat nuanniitsut tusagassiuutinut nassiunneqartut pillugit
pinngitsoorusussimanngilanga uani qanorluunniit kinguneqassagaluarpat
isummakka aniserusullugit.
Taammaattumik uanga oqartariaqarpunga amerlanerussuteqatut isumaat uanga
ataqqilluinnartuugakku aamma partiima iluani, tassani akuerseqataallunga
taaseqataassaanga.
Otto Steenholdt, attaviitsoq.
Ataatsimiititaliami ikinnerussuteqartut oqaaseqaataat marloqiusaatikkakku apeqqutigissvara taanna marlunngorlugu avinneqarsinnaanersoq. Tassa siullermik ikinnerussuteqartut piumasaraat aningaasanik qaffaasoqassanngitsoq aammalu tassunga uiggiullugu ataatsimiititaliani taaneqartuni aningaasarsiaat aamma tunniunneqassanngitsut. Taakku ataatsimooriarmata uanga taanna kingulleq kingullermik oqaaseqarnini siunenrsuutigisimagakku aningaasanik tukkorpallaarnerarluta, tassa Inatsisaartut Siulittaasuata tulliisalu kiisalu Aningaasaqarnermut Ataatsimiititaliami aamma Kukkunersiuinermi Ataatsimiititaliami ilaasortat immikkut aningaasarsianik tunineqartarnerat uanga isoralugu ikinnerussuteqartut aamma tassani isumaqatigisimammannga, taamaattumik taanna immikkoortillugu taasissutigisinnaaneripput apeqqutigerusukkaluarpara. Taakkua ataatsimuussappata taava uanga uannut assortulissagama.
Per
Berthelsen, attaviitsoq.
Qujanaq.
Nalunngingaarakku siorna oqaatiginearsimasut uanga tunginninngaanniit Siumut
sinnerlugu oqaatigisaasut aallaavigalugit akerartorneqassallunga
eqqarsarsimagaluarpunga qaqillunga akiortorniarnagit una qineqqusaarutitut
atussanngimmat, kisianni Godmand Rasmmussen, Atassumminngaanniit oqaaseqartoq,
neriuppunga tusaagaa, oqarfigiinnassavara Godmand Rasmussen illit
ilisarisimavakkit oqaatsinik sakkortunerpaanik atuisartutut, taamaattumik
tupaallaatiginerpaasara uaniippoq uanga erseqqissuliorlunga oqartarnera
nersoqqaariarlugu maanna sakkortuallaartutut uparuartoraku. Taanna
mamiagisinnaavara, tassaniimmammi marloqiusaaneq.
Siorna
pisoq ullumikkullu pisut assigiinngilluinnartuupput. Siorna oqaaseqartitaagama
uummamminngaanniit illersorpara patsisigalugu tamatuma nalaani nunatsinni
aningaasaqarluarnertut oqalulluni saqqummiussineq aallaaviummat,
taamaattumillu sutigulluunniit allanit pisariaqartitsisunit aallerani una
aaqqinneqarsinnaasoq saqqummunneqarmat upperalugu oqaaseqartuuvunga.
unneqqarissumik oqaaseqarpunga aamma oqaatigisimasakka issuarakkit
nuannaarutigaara sumilluunniimmi taakku isertuunneqassanngillat,
qujanartumillumi aamma Inatsisartuni ataatsimiikkaangatta suut tamarmik
immiunneqartarput aammalu allaganngortinneqarlutik, oqaatigisagummi oqartumut
pituttuisuusariaqarput, kisiannili uani tunuliaqutaa ersarissumik taassavara
siorna ilisimasimgaluarukku aappassaanneerinnillunni aningaasanut
inatisisissap oqallisigineqarmat taama annertutigisumik maaniinnarsuaq pisunik
tigooqqaaneq taamma annertutigisoq pissasoq taava aamma
naaggaangaareersimassagaluarama.
Tunngaviusut
assigiinngilluinnarput aamma isumaqarpunga hr. Godmand Rasmussen illit
qaqugukkulluunniit uanga unneqqarissusera apeqqusissanngikit, tamanna nammineq
inuiaqatigiinnut uanga nammassavara, inuiaqatigiinnut nalilesortissavara illit
sumilluunniit tamanna suaarutigissanngilat. Imminut illersorniaruit imminut
illersorniarit allat isummernerat aamma ataqqillugu, tunngaviimmi uani
eqqartukkavut siorna ukioq mannalu assigiinngilluinnartuummata.
Uanga
uparuartugara uaniippoq inuiaqatigiit kaasarfiannit aallaerniarlni oqallineq
matoqqasumik aallartineqarmat tamannalu akueriumasimanngilluinnarpara,
taamaattumillu aamma oqallinnermi anillunga oqaatigalugulu peqataaffigiumanagu.
Aamma eqqaasitsissutigissavara uanga nammineerlunga siullerpaallunga ukua
pillugit oqallinneq oqallisaajunnaartillugu gruppeqarallarama unitsikkakku
oqarlunga kingorna taanna peqataaffigeqqissanagu uanga.
Unneqqarissusera
illit apeqqusissanngilat. Illersorniaruit imminut immunut illersorniarit allat
neqitarinagit.
Anders
Andreassen, ataatsimiinnermik
aqutsisoq, Inatsisartut Siulittaasuata Tullia, Siumut.
Aqutsisutut
ilungersortumik oqaatigissvara ilaasortanut maani inimi toqqartaarinerit
imminnut akisaqattaannerit pinaveersaarlugit, kisiannili isummefigisasaq
isummerfigeqqullugu, tassalu aamma uani ersarereerpoq Inatsisit
atortineqarnerannut Ataatsimiititaliap siunnersuutai imaluunniit
isummerfigisimasai, amerlanerussuteqartut isumaaat taavalu aamma
ikinnerussuteqartut ersraissumik oqariartuutai taakku isummerfigineqassasut.
Sapinngisamik suliamut tunngasumik oqaaseqartarnissaq kissaatigissavara
maanngaanniit.
Anthon
Frederiksen, Kattusseqatigiit.
Suliap
siullermeerneqarnerani ilisimatitsissutigereerparput ataatsimut
taasissutigineqasanngitsoq tassa angalasarnermut tunngasut pinngitsooratit
aaqqiiffigineqartussaapput Inatsisartunut qinersivup
ataasiinnanngortinneqarnerata kingorna, taanna qinesisartut innuttaasullu
utaqqivaat. Maqaasineqarpoq taannalu uagut taperssersorparput taamaattumik
kissaatigissavara taasissutissat marlunngorlugit avinneqassasut, taamaalilluta
soorlu aamma Ottop Steenholdtip oqaatigisaa paatsunngasoqaqqunagu,
pissutigalugu ilaanut isumaqataavugut kisianni ilaanut isumaqataanngilagut.
Unali
eqqaasitsissutigeqqiinnassavara aatsaaginnaralaaqqinnaannguaq oqallippugut
aningaasartuuti ingerlatsinermut aningaasartuutit qaffanneqarnissaat
sapinngisamik pinngitsoortiarlutigu aammalu taanna akuerisimavarput
siusinnerusukkulli aningaasartuutit ikilisarneqarnissaat.
Maannakkut
una akuersissutigineqassappat aningaasartuutit killormut suli
amerlineqarnissaat akuersissutigissagatsigu eqqaasitsissutigisariaqarpoq
taamaattumik siusinnerusukkut oqaaseqaatigisartakkavut innersuussutigalugit
taanna kissaaterput neriuppunga akuerineqassasoq, tassalu suliassap
marlunngorlugu avillugu taasissutigineqarnissaa.
Godmand
Rasmussen, Atassut.
Takissuliornianngilanga, kisianni uani sakkortuuliortoqalaarmat aamma
sakkortoqataanik akilaarusuppara. Per Berthelseni; ersarissumik oqaluttarnitit
ataqqilluinnarpakka aamma taakku tunuartikkunnanngilakka. Siorna uani
oqaluttarfimmi imaluunniit maani inersuarmi qanoq oqarpit, allamik
suliffissarsiortariaqarpunga Inatsisartut aningaasarsiaat
inuussutigisinnaannginnakkit, taakku eqqaamalluarpakka. Taavalu allaat
suliffiit qimassimanerarpat, aamma uani iserismasut tamarmik tusaavaat,
suliffiit qimassimanerarpat Inatsisartunngooq aningaasarsiaat
qaffanneqartussaammata siumut ilisimatinneqarsimagavit, kisiannili taama
pisoqanngimmat aamma oqarputit, taanna allatut ajornartumik
suliffissarsiortariaqarsimallutik inuussutigisinnananginnakkinngooq.
Uani akerartuinertut taassagukkit assut nuanniigivara, oqarputit taakku
eqqartorneqalerpata akerartorneqrnissat ilimagereersimallugu,
akerartuisarfiunngilaq una oqaluttarfik, aamma akeratuininanngilagut. Aamma
ini najortartuugukku immaqa ataatsimiinnerit malittarilluarlugit
paasissutissat immaqa annertunerusut aamma pissarsiarisarsinnaagaluarpatit.
Ilumoorpoq uanga oqaaseq una naqissuserunngilara isertortukkut suliaq taanna
oqaatigakku. Siulittaasoarfiup taanna akissuteqarfigissavaa, uannit taakkua
paasisimasaqarfigilluarneruaat. Aamma siullermeernerani Atassutip
oqaluaningaanniit erseqqissumik taanna tikinneqarpoq inatsisink
unioqqutitsinerunngitsoq aammalu isertortukkut sulinerunngitsoq.
Taamaattumik isumaqarpunga taanna uani aamma pissutsit allaanerarakkit
taamaanikkut tupigilaarpara. Aamma uanga paasinnittaasera ilaatigut
kingaariartartuummat immaqa, taamanikkummi aamma Aningaasaqarnermut
Ataatsimiititaliami siulittaasuuvut, aningaasarsiat taakku
eqqartorneqaleqqaarmata, soorlu tassani aamma takoreersimasinnaagaluarit
aningaasarsiallu ikinnerarlugit inuussutigisinnannginerarakkit,
siulittaasutullu inissisimareeravit aamma nunnata aningaasaqarniarnera soorlu
arajutsisimassanngikkaluarit. Qujanaq.
Lars
Sørensen, Inuit
Ataqatigiit oqaaseqartuat.
Tassa ilaatigut unneqqarinnissaq aamma annertunersumik piinnarlugu. Tassa
Inuit Ataqatigiinninngaanniit oqaatigereerparput aalajangersimasumik
siunertalinnik atugassanik qaffaassutissat akuersaarsinnaanngisatta iluini
aningaasaateqarfimmik pilersitsiniarluta. Taamaattumik Inuit
Ataqatigiinninngaanniit kaammattuutigissavarput Per Berthelsenip,
Kattusseqatigiillu uagullu taanna aningaasaaateqarfik pilersissagipput.
Taamaalilluta aamma aningaasat uagutsinnut tussanngimmata.
Per
Berthelsen, attaviitsoq.
Siulittaasoqarfiup kissaatigisaa tassalu toqqartaaraluni oqlaunnginnissaq
taanna ataqqerusuppara, taamaattumik uanga annertunerusumik uani
oqaaseqaqqinnianngilanga., ataqqinassuseqartumik pineqartup
ingerlanneqarsinnaanissaa taanna akornusersorusunnginnakku.
Ajuusaarutigaara taamatut toqqartaaraluni uanga siornatigut isummereernera
isertuanagu maanna allatut isummersinnaanera saqqummiukkakku
ataqqiumaneqanngimmat. Uanga ataqqivara ilissi aalajangiussarsi, oqaannarpunga
uanga isumaqataanngilanga patsisit makku makkulu peqqutigalugit. Tupinnaqaaq
uanga allatut aamma uatulliisummertoqarpoq. Inuit Ataqatigiit isummerput
nammineq isumartik malillugu, hr. Anthon Frederiksen isummerpoq nammineq
isummernini malillugu, hr. Per Berthelsen aamma taamaaliorumavoq, kisianni
ataqqivara toqqartaaraluni ingerlannginnissaq taanna kissaatigineqarmat,
ileqqorissaarlungalu taanna malikkusuppara.
Anders
Andreassen, Inatsisartut
Siulittaasuata Tullia, Siumut.
Qujanq. Tassa taamaalilluni allanik oqaluttussaaruppoq taavlu
taasissutigisssarput tassaavoq ataatsimiititaliap isumaliutissiissutaa, tassa
Inatsisit atortinneqarnerannut Ataatsimiititaliap isumaliutissiissutaa,
tassani ikinnerussuteqartut inatsisissatut siunnersuutigineqartoq
itigartinneqarnissaa inassutigaat, taavalu apeqqutigissavara taanna
siulliullugu taasissutigissagatsigu.
Ataatsimiititaliami ikinnerussuteqartunit inassutigineqartut, tassa
inatsisissap itigartinneqarnissaanut kikkut akuerseqataappat?
10.
Qassit akerliuppat?
20.
Taaseqataanngitsut?
Soqanngilaq.
Taavalu amerlanerussuteqartut ataatsimiititaliami inassutigaat inatsisissap
taamatut iluseqarluni, iluserilikkamitut iluseqarluni pingajussaaneernissaminut
ingerlaqqinnissaa inassutigineqassasoq, tassungalu akuersisut nikueqqussavakka.
20.
Akerliusut?
10.
Taaseqataanngitsut?
Soqanngilaq.
Qujanaq. Tassa taamaalilluni suliaq pingajussaaneernissaminut
ingerlaqqissinnaanngorpoq iluserilikkamisut iluseqarluni, taannalu
pingajussaaneerneqassaaq pingasunngorpat sapaatip akunnera tullermi.