Oqaluuserisassani immikkoortoq 03 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq 2. marts 2000
13.21
Ataatsimiinnermik
aqutsisoq:
Inatsisartut allaffeqarfiata sinniisussaa siulleq, Finn Karlsen.
Ole Lynge, Inatsisartut Siulittaasuat,
saqqummiussisoq:
Inatsisartut siulittaasoqarfiata
matumuuna inassutigaa Inatsisartut upernaakkut 2000-imi ataatsimiinnissaat
tallimanngornermi 28. april aallartissasoq. Inatsisartut 1999-imi ukiakkut
ataatsimiinnerminni aalajangerput Inatsisartut upernaakkut 2000-imi
ataatsimiinnerat pingasunngornermi 26. april aallartissasoq. Pingasunngornerli
26. april porskip kingornatigut pingasunngornerummat Inatsisartunilu ilaasortat
sinerissameertut Poorskip nalaani angallannikkut pissutsit atungaasut
nassatarisaat ilanngullugit ajornartorsiutiginagit Nuummut tikinnissamut
periarfissaqartariaqarmata. Poorskillu nalaani angalasariaqannginniassammata
siulittaasoqarfik qulaani taaneqartutut inassuteqarpoq.
Johan Lund Olsen, Inuit Ataqatigiit oqaaseqartuat:
Tassa uagut
kissaatigigaluarparput Inatsisartut upernaaq manna 2000-imi tassa aprilimi
ataatsimiinnissaat aallartissasoq Inatsisartut kingullermik ataatsimiimmata
tassa Inatsisartut ukiakkut 1999-imi aalajangiuteriigaat taanna
toqqammavigalugu. Tassalu taamani aalajangerneqarpoq aprilip 26-ani
aallartittussaasugut taamanili aamma naluneqanngereerpoq poorski qaqugu taanna
nalliussineqarumaartussaanersoq.
Taamaammat tamanna
tunngavigalugu ullaaq siulittaasoqarfimmut Inuit Ataqatigiit Inatsisartunut
ilaasortaatitaat inussiarnersumik saaffiginnissuteqarsimavugut tassa taanna
Inatsisartut siusinnerusukkut aalajangiuteriigaat aalajangiusimaneqaqqullugu.
Tassami Inatsisartut taamani suleriaaserisaanni aalajangersorneqarsimasut
malillugit aammalu maannakkut suleriaaseq atuutilereersimasoq tassani aamma
aalajangersakkat malillugit ataatsimiinnermi siulianili aalajangersorneqareertarput
aammalu tullissaa qaqugukkut aallartissanersut. Taamanilu tassa Inatsisartut
aalajangerpaat aprilip 26-ani aallartissasugut.
Tamaammat taanna
aalajangiusimaqquvarput Inuit Ataqatigiinninngaanniit.
Ruth Heilmann, Siumup oqaaseqartua:
Siumup
gruppeaninngaanniit uagut akuersaarparput siulittaasoqarfiup siunnersuutaa
tassa 28. aprili ataatsimiinnissap aallartinnissaa. Aammalu matumani
ataatsimeeqatigiinnerput Siumuminngaanniit qujassutigaarput aamma
upernaarsiorluarnissassinnik kissaappassi.
Daniel Skifte, Atassutip oqaaseqartua:
Atassumminngaanniit
siulittaasoqarfiup inassuteqaataa akuersaarniarparput.
Anthon Frederiksen, Kattusseqatigiit:
Naak
siornali aalajangiunneqareersimagaluartoq aprilip 26-ani ataatsimiinneq
aallartissasoq taamaattoq aamma ilisimavarput tamatuma kingorna Inatsisartut
suleriaasiat allanngortinneqartoq. Aammalu soorunami ilisimaneqareeraluartoq
aprili qaqugu pisussaasoq taamaattoq Inatsisartut siulittaasoqarfiata
inassutigisaa akuersaarparput. Tassalu 28. aprili ataatsimiinneq
aallartissasoq.
Ole Lynge, Inatsisartut Siulittaasuat:
Tassa
ullaap tungaa Inatsisartut siulittaasoqarfiata taanna apeqqut Inuit Ataqatigiit
saaffiginnissutaat oqaluuseraat. Aamma taamatut kissaateqarnermut
tunuliaqutaasoq soorunami paasilluarsinnaavaat. Kisianni allattoqarfitta
angallavissat pissutigalugit amerlanerit kissaatigisimavaat upernaamut
ataatsimiinnissaq 28. april aallartissasoq.
Kisianni
una oqaatigisinnaavara ilanngullugu Inuit Ataqatigiit saaffiginnissuteqarnerat
naapertorlugu piffissap ataatsimiiffissap naanissaa uani piaaraluta
ulluleriinnginnatsigu. Suleriaatsit nutaat naapertorlugit maannamut
misilittakkagut aamma isigimaarlugit upernaamullu oqaluuserisassat
suujumaarneri qimerloorlugit paasinarsippat qanoq annertutiginersut aamma
sapaatip akunneranut ataatsimiittarfissat ilaatigut allannguallassinnaaneri
ammaffigaavut. Taamaalilluta pilersaarutaareersimasunut allanut qalleraattumik
pisoqannginnissaa pinaveersimatinniarlugu. Neriuppugut taanna Inuit Ataqatigiit
naammagisinnaassagaat.
Johan Lund Olsen, Inuit Ataqatigiit oqaaseqartuat:
Tassa
una Inatsisartut siulittaasuata kingullermik tassa oqaatigisaa taanna
iluarisimaarlugu tassa ataatsimiinneq naak 28. april aallartikkaluartoq qaqugu
naammassinissaa taanna uani oqaatigineqanngimmat taanna iluarisimaarnarpoq.
Taamaammat
una 28. april amerlanerussuteqartut maani kissaatiginerummassuk
aallartiffissatut taanna tusaatissatut tigusariaqarparput. Soorunami
uggornalaanngitsuunngilaq tassami ukiaq taanna aalajangiuteriigaq toqqammavigalugu
ukioq manna pisussat assigiinngitsut uagut pilersaarusioreersimagatsigit.
Taamaammallu kipusoortoqannginnissaa tassa eqqarsaatigine-rullugu
aalajangiusimaqqugaluaratsigu aprilip 26-at taava aallarnerfigissagipput.
Kisianni ajunngilaq Inatsisartut Siulittaasuata naggasiinermini oqaatigivaa
tassa qularnanngitsumik periarfissaqartoqarumaartoq pilersaarutigeriikkanut
akornusiinngitsumik ataatsimiinneq aamma ingerlanneqarsinnaassasoq.
Taamaammat
una amerlanerussuteqartunik inassutigineqartoq tusaatissatut taamatut
tiguvarput.
Ole Lynge, Inatsisartut Siulittaasuat:
Tassa
oqaaseqaqqittoqarunngimmat Inatsisartut Siulittaasuattut una ataatsimiinneq
sivikikkaluartoq isumaqarpugut siulittaasoqarfimmi qutsavigisariaqarlusi
suliaatsit nutaat atulertut aallaqqaammut eqarnakujussinnaasaraluartut
naammagittarlusi atorsimagassigit. Pissangavugut aamma suli pissangaqqippugut
soorunami upernaamut ataatsimiinnissamut sammisassat qanoq
anner-tutigiumaarnersut aamma taamatut suleriaatsitta suleqatigiissutigineratigut
soorunami partiit ataasiakkaarlutalu assigiinngittaraluaqaluta kisianni
suleriaatsimut suut toqqammavigissallugit taanna
paaseqatigiissutiginiarsinnaasaratsigu assut qujarusuppunga.
Aamma
kissaappassi Nuup avataani najugaqartut ingerlaqqinnissaanik
apissilluarnissassannik.
Daniel Skifte, Atassutip Siulittaasua:
Ataatsimiinnerup
ukioq manna naanerani Atassumminngaanniit pissusissamisoortutut isigaar- put
partiit Kattusseqatigiillu qutsavigissallugit. Uagut isumaqarpugut ataatsimiinneq
aamma uagutsinnut angusaqarfiulluarsimasoq taamaattumillu taanna
qujassutiginiarlugu. Naggataatigut pingaartumik Inatsisartut allaffeqarfiani
sulisut nutserisut kiisalu allaffissuarmi sulisut allat soorunalumi aamma
sineriassuarmi eqiasuillutik politikkikkut susoqarnersumik tusaarnartuar-tartut
soorlu radiukkut taakkua aamma qutsavigissavagut.
Naggaterpiarpiaatigut
siulittaasoqarfiup soorunami eqqarsaatersiissutigissavaa upernaaru
ataatsimiinnissatsinni siusinnerusukkut pisartoq uagut tungitsinninngaanniit
pisartoq tassaasimammat taasisoqassatillugu taasissutissat allaganngorlugit
agguaatereertarneri. Taamaalilluni paatsuugasumik paasisitsiniaasarnerit
taasisoqartarnerillu immaqa ilaatigut kukkusut pinngit-soorniassagatsigit.
Taanna assut Atassumminngaanniit nalileqqitassatut oqariartuutigaarput
eqqarsaatigilaaqqullugu siulittaasoqarfimmi tulliani ataatsimiinnissatsinnut.
Jonathan Motzfeldt, Naalakkersuisut Siulittaasuat:
Naalakkersuisuninngaanniit
aamma uagut qutsatiginiarparput maani ataatsimiinnermi Inatsisartut uagutsinnut
isummersuutigisimasaat aamma suliassiissutigisimasaat
pinngitsoorneqarsinnaan-ngilaq Naalakkersuisuulluni Inatsisartut qanoq
oqariartuuteqarnerat najoqqutaralugu suliassat ingerlateqqinnissaat. Tamannalu
aamma pissusissamisoorpoq. Aamma uani ataatsimiinnermi tamanna pisimavoq.
Oqariartuutit Inatsisartuninngaanniit arlalissuit tusarsimavagut.
Soorunami
ataaseq maluginianngitsuunngilarput suleriaaserput nutaaq atorneqalersoq. Aamma
kinguneqarmat uagutsinnillu malunnarluni Naalakkersuisuni inatsisiliassatut
suliassat amerlanerusut sammisinnaasimagaluarigut aamma piffissami angeqisumi
apeqqutit allat aalajangiiffiunngikkaluartut suleriaatsitsinni
periarfissinneqartut tikissimagatsigit suliarissallugit. Piffissamillu aamma angisuumik
atugaqarfigisimavarput.
Kisianni
aamma ajunngilaq. Periusissat nutaat aallartittut tamarmik ilusissaat qanoq
ittuunersut sungiunniagassaapput aammalu Inatsisartuni tamanna
pinngitsoorneqarsinnaanngilaq. Taamaattumik neriuppunga suleriaatsit maannakkut
atorneqalersut ima aamma ingerlanneqarumaartut Inatsisartut siulittaasoqarfiata
oqaluuserisassanik inissitserinermini inatsisissat apeqquteqaatit
aalajangiiffissat allakkatigut akisassat allallu aamma udvalgimi suut suliassat
maannamut suli erseqqinnerusumik inissinnissaanut suleqataassalluni. Aammalu
uagut tungitsinninngaanniit Naalakkersuisuni nuannaarutigaarput Inatsisartut
Siulittaasuat siulittaasoqarfillu qanittumik suleqatigalugu suliassat
maaniittut naammassiniarsimagatsigit. Tamanna atorfilittatsinnut aamma
malugusuutigineqarmat aamma qujassut taanna taammalillugu apuutissavara.
Naggataatigut
oqaatigissavara maani ataatsimiinnermi inatsisissat alaatsinaanneqartut ilaat
qularnanngilluinnartoq nunatsinni nutaarsiassaqarnermut tunngasut pillugit inatsisiliaasoq.
Maani akuerisat aalajangikkallu soqutiginaateqarnerpaat ilaatut
isigisariaqarmat. Naalakker-suisuninngaanniit
nuannaarutiginngitsuugassaanngilaq Inatsisartut apeqqummi taamaattumi
maannakkut aalajangiimmata nunatsinni oqartussaaffik aamma tassani
tigussallugu. Aammalu nutaarsiassaqarnikkut akisussaaffik taama ittoq maani
nunatsinni oqartussaaffigineqalernera malugisinnaavara maani aalajangiisussanit
merserineqarani suliassatut aamma allatulli tigune-qartoq
akisussaassuseqartumik suliassaq ingerlanneqarumaarluni.
Soorlu
aamma allat Inatsisartut taamatut akisussaaffeqartut aamma suliassanut
taamaattunut tigusisarsimasut Danmarkimi nunani avannarlerni ilami silarsuarmi
allami sumiluunniit. Taamaattumik tupinnartuliaanngilaq Kalaallit Nunaanni aamma
inatsisiliassaq taama ittoq maannakkut uagut nammineq aalajangiiffissatsitut
aamma tigusimagatsigu. Taanna nuannaarutissaavoq demokratimilu
ineriartornitsinni aamma suliassanut nuannersunut suleqatigiiffissanullu
nuannersunut aqqutaassasoq qularutiginngilarput.
Qujanarsuaq
maani ataatsimiinnitsinni aamma pisarnissitut tusarnaartut qujanaq aamma
malinnaalluarsimagassi.
Anthon Frederiksen, Kattusseqatigiit oqaaseqartuat:
Uanga
aamma Kattusseqatigiit sinnerlugit pinngitsoorusunngilanga ilissinnut tamanut
qujassuteqassalluta maani ukiuunerani ataatsimiinnermi suleqataanitsinnut
aammalu minnerunngitsumik maani sulisunut atorfilippassuarnut allakkisartunut
aammalu soorunami sinerissami malin-naallutik naalaartunut. Tulliani
ataatsimiinnissamut piareersimavugut suleqataaqqinnissatsinnut aamma
neriuppugut suliat ajunngitsumik ingerlasut aammalu angusaqarfiusartut
ingerlanneqarluarumaartut maani naak ataatsimiinneq naammassigaluartoq. Tassami
ulluinnarni Naalakkersuisut ingerlatsisussaammata neriuutigaarput aamma
pisarnermisut ingerlakkumaaraat. Naggataatigut utoqqatsissutigissavara
siusinnerusukkut kukkullunga oqaaseqarnera tassalu nalunnginnatsigu aprili
qaqugu pisussaq taanna taamatut oqarniarnanga oqarama massa nalunnginnatsigut
poorski qaqugu pisussaq. Tamassi apissilluarniarisi aammalu
upernaarsiorluarniarisi.
Finn Karlsen, Ataatsimiinnermik aqutsisoq:
Paasivara
allamik oqaaseqartoqarnianngitsoq. Ukununnga oqaaserineqartunut kingullernut
uanga oqaaseqarnanga Inatsisartut Siulittaasuat oqaaseqareermat taamaallaat
immikkoortoq 3-mut tassa ullormut oqaluuserisassatsinnut tunngatillugu
upernaamut ataatsimiinnissap ullulerneqarnissaa aalajangiivigineqarnera tassa
isumaqatigiissutigineqarpoq aprilip 28-ani. Tallimanngornermi ataatsimiinneq
aallartissaaq taamaalilluta ukiuunerani ataatsimiinnerput naammassivarput.
Oqaluuserisaq naammassivoq.