Oqaluuserisassani immikkoortoq 05-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 14. februar 2000 nal. 13.55
Ataatsimiinnermik aqutsisoq: Lars Karl
Jensen, Siumut.
Jonathan Motzfeldt, Siumut, Naalakkersuisut
Siulittaasuat:
Pisortat ingerlatsinerat pillugu paasitinneqarsinnaatitaaneq pillugu
inatsip allanngortinneqarneranik inatsisip Kalaallit Nunaannut
atortuulersinneqarnissaannik peqqussutissatut siunnersuut Inatsisinik
atortitsinermut ministeriaqarfiup Namminersornerullutik Oqartussanut
saqqummiuppaa.
Inatsisip matuma atortuulersinneqarnera nassataqassaaq pisortani sulisut
pillugit paasissutissanik paasitinneqarsinnaatitaanermut pisinnaatitaaffiup
killilersimaneqarnerata aamma naalagaaffeqatigiinnermi oqartussaasut sulianik
Kalaallit Nunaannut tunngassuteqartunik suliaqarnerannut
atuuttussanngorneranik. Pisortat ingerlatsinerat pillugu
paasitinneqarsinnaatitaanermik danskit inatsisaat - inatsisit aallaaviusoq -
Kalaallit Nunaannut atortuulersinneqarpoq kunngip peqqussutaatigut 1. januari
1995-imili.
Inatsisartut inatsisaatigut nr. 1, 31. maj 1999-imeersukkut pisortat
ingerlatsinerat pillugu inatsisip allannguutissaanik Inatsisartut
akuersissuteqarput, tassa sulisorisat pillugit paasissutissat pillugit
paasitinneqarsinnaatitaanerup killilerneqarneranittaaq kinguneqartumik.
Taamaaliornikkut atortuulersitsineq kinguneqassaaq, pisortani sulisut pillugit,
paasissutissat pillugit paasitinneqarsinnaatitaanermut tunngassuteqartut,
assigiimmik pineqartalernerannik, tamatumani apeqqutaanani paasissutissanik
paasiniaajumaneq, naalagaaffimmi imaluunniit Namminersornerulluni Oqartussani
oqartussaasunut qinnutigineqarnersoq. Tamatumanissaaq aamma Kalaallit Nunaanni
kommunit eqqarsaatigineqarput.
Peqqussutissatut siunnersuut manna naalakkersuisut allaffissornikkut
aqutsisoqarfiinut, KANUKOKA-mullu (Kommunit Kattuffiannut)
tusarniaassutigineqarsimavoq, immikkulli matumani oqaaseqaateqarfiginissaanut
pissutissaqarsimanngilaq.
Taamak oqaaseqarluta Naalakkersuisunit Inatsisartut qinnuvigissavagut
akuereqqullugu, Naalakkersuisut Inatsisinik Atortitsinermi Ministeriaqarfik
nalunaarfigissagaat, pisortat ingerlatsinerat pillugu
paasitsinneqarsinaatitaaneq pillugu inatsisip allanngortinneqarnerani Kalaallit
Nunaanni, inatsip Kalaallit Nunaanni atortuulersinneqarnissaanik
peqqussutissatut siunnersuut Namminersornerullutik Oqartussat
kaammattuutigisinnaassagaat.
Ataatsimiinnermik aqutsisoq: Inatsisartut
Siulittaasuat Ole Lynge:
Qujavugut. Partiit oqaaseqartuanut ingerlaqqissaagut. Siulliussooq Lars
Karl Jensen, Siumut.
Lars Karl Jensen, Siumup oqaaseqartua:
Matumani pineqartup, tassalu Namminersornerullutik Oqartussat
pisortallu ingerlatsiviini sulisorineqartut pillugit paasissutissanik
paasitinneqarsinnaaneq pillugu saqqummiunneqartup, saqqummiunneqarnerani
Siumumiit maluginiarparput, Naalakkersuisut allaffissornikkut aqutsisoqarfiat
taamatullu KANUKOKA-p tusarniaaffigineqarneranni immikkut
oqaaseqartoqarnissaanik pissutissaqartoqanngitsoq. Aamma Siumumiit
isumaqarpugut, maanna suliassap piviusunngortinneqarnissaa piffissanngortoq.
Taamaattumik naalagaafeqatigiinnerup iluani assigiimmik suleriaaseqarnissaq
aallaavigalugu Kalaallit Nunaanni Kunngip Peqqussutaatigut, januarip
aallaqqaataani 1995-imi atulersukkut matumuuna atortussanngortinneqarnissa
akornutissaqanngitsoq Siumumiit maluginiarparput.
Maannakkut Inatsisartuni suleriaatsip allannguutaanut atatillugu suliap
ingerlatinneqarnissaanut tunngatillugu Siumumiit Inatsisartunut
Naalakkersuisunullu inassutigissavarput, suliassaq taamatut isikkoqartillugu
inatsisinik atortitsinermut ministeriaqarfik nalunaarfigineqassasoq, pisortat ingerlatsinerat
pillugu paasitinneqarsinnaaneq pillugu inatsisip allanngortinneqarnissaata
Kalaallit Nunaannut atuutilersinneqarnissaa akuersissutigineqassasoq.
Otto Steenholdt, Atassut-ip oqaaseqartua:
Naalakkersuisut Inatsisartut
saamangaarlutik qinnuvigaat peqqussutissatut siunnersuut manna akuereqqullugu,
tassa sulisorineqartut pillugit paasissutissanik paasitinneqarsinnaaneq.
Peqqussutissatut siunnersuut oqaaseqarsinaatitaasunut
paasiniaassutigineqarsimavoq. Saqqummiussamilu oqaatigineqarpoq paasiniaaffigineqartut
akornutissaasumik nassaarsimanngitsut. Atassummiit Namminersornerullutik
Oqartussat oqaaseqaataat akuersaarparput, qallunaat inatsisaat, inatsit alla
aallaaviusoq 1995-imi atortuulersinneqareersimasoq kiisalu Inatsisartut
Inatsisaatigut nr. siullikkut majip 31-anni 1999-meersukkut Inatsisartut
akuersissuteqarsimanerat aallaavigalugit.
Atassutip aamma pingaartippaa
allannguutissap kingunerissammagu pisortani sulisut, paasissutissat pillugit
paasitinneqarsinnaatitaanermut tunngassuteqartut, assigiimmik
pineqarsinnaalissammata, apeqqutaatinnagu pisariaqartunik paasiniaaneq
Naalagaammik, Namminersornerullutilluunniit Oqartussat saaffigineqassanersut.
Soorlu aallaqqaataani oqareersugut
Atassutip saqqummiussaq
isumaqatigaa.
Olga Poulsen, Inuit Ataqatigiit oqaaseqartuat:
Upernaakkut 1999-imi
Inatsisartut ataatsimiinnerminni pisortat ingerlatsinerat pillugu,
paasitinneqarsinnaatitaaneq pillugu Inatsisartut Inatsisaata allannguutaa,
tassalu sulisorineqartut pillugit paasissutissanik paasitinneqarsinnaaneq
pillugu siunnersuut akuersissutigigaat.
Maanna qallunaat nunaanni
Inatsisinik Atortitsinermut Ministereqarfik siunnersuusiorpoq, pisortat
ingerlatsinerat pillugu paasitinneqarsinnaatitaaneq kunngip peqqussutaatigut
allannguutissamik. Siunnersuutip siunertarivaa pisortat ingerlatsinerat pillugu
paasitinneqarsinnaanerup Namminersornerullutik Oqartussani aammalu
naalagaafimmi assigiimmik atuutinneqarnissaa.
Inuit Ataqatigiinniit
oqaatigissavarput, tamanna pissusissamisoortutut isigigatsigu taamaattumillu
Naalakkersuisut missigiussatut saqqummiussaat akuersaaratsigit.
Anthon Frederiksen, Kattusseqatigiit oqaaseqartuat:
Pisortat ingerlatsinerat pillugu
paasitinneqarsinnaatitaaneq pillugu inatsisip allanngortinneqarneranik inatsisip
Kalaallit Nunatsinnut kunngip peqqussutaatigut atortuulersinneqarnissaanut
tunngatillugu, Namminersornerullutik Oqartussat oqaaseqaatissaannut
Kattusseqatigiinniit Naalakkersuisut, Namminersornerullutik Oqartussat
sinnerlugit inatsisinik atortitsinermut ministereqarfimmut matumani
saqqummiunneqartutut peqqussutissatut siunnersuutip, taamatut isikkoqarluni
nalunaarutigineqarnissaanut akuersinerput nalunaarutigaarput.
Taamatulli oqareerluta suliat
assigiinngitsut suliarineqartarnerat pillugu, minnerunngitsumillu siunissami
suliassat pisariillisarneqarnissaat eqqarsaatigalugu apeqqutigissavarput,
suliaq manna 1994-mili pisortat ingerlatsinerat pillugu
paasitinneqarsinnaatitaaneq pillugu danskit inatsisaat januarip aallaqqaataani
1995-mi kunngip peqqussutaatigut atortuulersinneqarnissaa pillugu
oqallisigineqarmat, ilanngullugu
suliarineqareersimasinnaasimanngikkaluarnersoq, taamaaliornikkut suliat
assigiit uteqattaartumik marloriaqattaarlugillu suliarineqartarnerat
pinngitsoorneqarsinnaasimagaluarmat. Nalunngilarput Kalaallit Nunatsinni
politeqarneq, eqqartuussiveqarneq, killeqarfimmik nakkutilliineq,
rigsombudsmandeqarfillu suli Namminersornerullutik Oqartussanit tamakkiisumik
oqartussaaffigineqalinngitsut. Taamaakkaluartoq Nunatsinni innuttaasut sapinngisamik
aamma inatsiseqarnerup tungaatigut assigiimmik atugassaqartinneqarnissaat
anguniarlugu, suliap aallaqqaataaniilli tamakku tamaasa ataatsikkut
naafferanngitsumillu suliarineqarsinnaasimanngikkaluarsimannginnersut,
taamaalilluta manna iluatsillugu apeqquteqaatigaarput, siunissami suliat
taamatut ittut pisariillisarneqarsinnaanerat aamma ilanngullugu
eqqarsaatigalugit.
Taamatut oqaaseqarluta
oqaaseqaatissatut siunersuut akuersaarparput.
Ataatsimiinnermik
aqutsisoq:
Inatsisartut Siulittaasuat Ole Lynge:
Tassa partiit kattusseqatigiillu
oqaaseqartui pereerpagut, kisianni oqaaseqaatinut akissuteqarumavoq
Naalakkersuisut Siulittaasuat, takanna.
Jonathan Motzfeldt, Naalakkersuisut Siulitaasuat:
Partiit qutsavigaakka aamma
Kattusseqatigiit taamatut tapersiinerat pillugu, tamarmik assigiimmik
persuarsiornanngitsumik nuannersumik ilassimmassuk qujassutigaara.
Taavalu 1995-imi januarip
aallaqqaataani atulersimasinnaagaluarnersoq oqaatigineqarmat
Kattusseqatigiinninngaanniit, ilumoorpoq taamatut naammassineqarsimasinnaanera
apeqqutigineqarsinnaavoq, kisianni pisariaqarsimavoq Inatsimmi taamak ittuni,
aamma uani pineqartumi folketingip bemyndigelseslove-mik, tassa Inatsiartunut
pisinnaatitsummik tunniussaqarnissaa aamma tunulequtaanissaa taamaattut
ilanngullugit aamma misissortariaqartarsimammata. Tamakkua ilanngullugit
misissorneqarsimapput. Aammalu Naalagaaffimmik tigummineqartut
eqqarsaatigalugit, maannakkut ilaatigut eqqartuussiveqarneq aammalu
politeqarneq tamatumani eqqarsaatigineqarpata, uani suliassat pisortat
ingerlatsinerat pillugu paasitinneqarsinnaatitaaneq pillugu
allanngortinneqarneratigut, tassani Hjemmestyremi imaluunniit Naalagaaffimmi
sulisut tamarmik assigiimmik tassuunakkut pineqalernissaanik tusagassiinissaq
(paasitittinissap) tungaatigut assigiimmik periarfissinneqartussaapput.
Ataatsimiinnermik
aqutsisoq:
Inatsisartut Siulittaasuat Ole Lynge:
Otto Steenholdt naatsunnguamik
oqaaseqalaarumavoq.
Otto Steenholdt, Atassut-ip oqaaseqartua:
Utoqqatserpunga
kingusinaalaarama oqaloqateqalaarnera pissutigalugu.
Kattusseqatigiit
oqaaseqaataannut tupaallaassutigigiga, Kalaallisuaani oqarmat
Rigsombudsmandeqarfik, Namminersornerullutik Oqartussanit tamakkiisumik
oqartussaaffigineqalinngitsoq suli, aamma ilaqarput politeqarnikkut
ilanngullugit. Isumaqarluinnarpunga ullumikkut Namminersornerulluni Oqartussat
pissusia atuutsillugu taakkua tiguneqarsinnaanngitsut. Aamma Naalagaaffik
aallartitaqartuartussaavoq immikkoortumik Rigsombudsmandimik taassumalu
oqartussaafigineqalernissaa ilimananngilluinnarpoq.
Tassa Namminersornerullutik
Oqartussaninngaanniit.
Anthon Frederiksen, Kattusseqatigiit oqaaseqartuat:
Aap, oqaaseqartumut kingullermut
paatsuungalersitsiniassanngilatit Otto, nalunngilluinnarparput taakkua
Naalagaaffiup ataaniittut suli, uaniukua Naalagaaffiup ataani atorfillit
pineqartut, inatsisip Nunatsinnut atortussanngortinneqarneranut tunngasut
eqqartorneqartut. Taamatut apeqquteqarnitsinnut pissutigaarput, Inatsi nr. 572
Danmarkimi atuuttoq taamanikkut 1994-mi suliarineqarmat, tassani immikkoortuani
3-mi danskit naalagaaffiata iluani kommuneni naalagaaffiullu ataani atorfillit
ilanngutereerneqarsimammata, kisianni massakkut aammalu taamanikkut Kalaallit
Nunatsinni pissutsit suli taamaakkallartillugit danskit naalagaaffiata ataani
aqutsineq, aammalu Namminersornerullutik Oqartussat ataani aqutsineq
immikkoormata marluullutik, taakkua immikkoortillugit suliarineqarsimasut.
Taamatut apeqquteqarnitsinni
pissutaavoq, danskit inatsisaat nr. 572, taanna Nunatsinni
atortussaalersinneqarnissaa kunngip peqqussutaatigut akuersissutigineqarmat,
tassanilu allaqqareerput kommunit, naalagaaffiullu atorfilittai, tassa
allaassutaa tassaniippoq. Nunatsinni marluugamik immikkoortinneqarsimallutillu.
Otto Steenholdt, Atassut-ip oqaaseqartua:
Naatoralaannguamik erseqqissaqqiinnassavara
soorlu Rigsombudsmandeqarneq oqareersunga soorlu, ullumikkut
Namminersornerulluni Oqartussaanerup ingerlanera najoqqutaralugu taanna
Namminersornerullutik Oqartussani tamakkiisumik
oqartussaaffigineqalersinnaanngilaq.
Ataatsimiinnermik
aqutsisoq:
Inatsisartut Siulittaasuat Ole Lynge:
Tassa immikkoortoq 5, Pisortat
ingerlatsinerat pillugu paasitinneqarsinnaatitaaneq pillugu inatsip
allanngortinneqarnerani inatsisip Kalaallit Nunaanni
atortuulersinneqarnissaanut siunnersuummut oqaaseqaat, siullermeernera
naammassivoq. Suleriaatsit nutaat naapertorlugu aappassaaneerneqassalluni
kingusinnerusukkut, kisianni maluginiarpara aappassaaneerneqarnissaanut
partiit, kattusseqatigiillu kissaatiginngikkaat ataatsimiittitaliamut,
Inatsiseqarnermi Inatsisartut, Inatsineqarmi ataatsimiititaliaanut
suliassanngortinneqarnissaa pisariaqartinngikkaat, tamanna ilumoorpaa? Aap,
taamaalillunilu taanna naammassivoq.
Oqaluuserisaq naammassivoq.