Oqaluuserisassani immikkoortoq 05-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 28. februar 2000 nal. 14.15
Ataatsimiinnermik aqutsisoq: Inatsisartut
Siulittaasuat Ole Lynge.
Jonathan Motzfeldt, Naalakkersuisut Siulittaasuat:
Aappassaaneerinninnermi matumani oqaatigissavara Naalakkersuisut
iluaralugu paasivarput taama isikkoqarluni aappassaaneerneqarnissaa
Inatsisartut isumaqatigiillutik ilaleraat, uagullu Naalakkersuisut Inatsisinik
atortitsinermut Ministeriaqarfik ilisimatissimavarput Namminer-sornerullutik
Oqartussat kaammattuutigisinnaagaat inatsit Kalaallit Nunaannut
atuuttussan-ngortinneqassasoq.
Naggasiullugulu periarfissaq manna atorlugu Naalakkersuisunit
erseqqissarusupparput namminersornerulerattali Namminersornerullutik Oqartussat
oqartussaaffiini paasissutissanik kikkulluunniit paasiniaasinnaatitaanerat
pillugu Namminersornerullutik Oqartussat malittarisassiorsinnaatitaasimammata.
Taamaalilluni pisortat ingerlatsinerat pillugu
paasitinneqarsinnaatitaaneq pillugu Inatsisartut inatsisaat
Namminersornerullutik Oqartussat ingerlatsinerannut tamarmut atuuttoq
1995-imilu januaarip aallaqqaataani atuutilersoq Inatsisartunit
akuersissutigineqarpoq. Paasitinneqarsinnaatitaaneq pillugu danskit inatsisaat
1995-imi januaarip aallaqqaataaniit Kalaallit Nunaannut atuutilersoq,
taamaallaat naalagaaffiup oqartussaasuinut atuuppoq, suliassani nunatsinnut
attuumassuteqartuni.
Nunatsinni Danmarkimilu pisortat ingerlatsinerannik kikkulluunniit
paasiniaasinnaatitaanerat pillugu inatsisit allanngortinneqarnerat kingulleq
pisortani atorfeqartut pillugit paasissutissat paasiniarneqarsinnaanerinut
tunngasuuvoq. Apeqqut tamanna 1998-imi aatsaat naalakkersuinikkut
sammineqalerpoq, tamatumalu kingunerisaanik inatsimmik allannguinikkut
pisortani sulisut pillugit paasissutissat paasiniarneqarsinnaanerat
killilerneqarpoq.
Aalajangiivigisassatut siunnersuut manna allanngortitsinermik
kingullermik aallaaveqarpoq inatsisillu naalagaaffimmi oqartussaasut
nunatsinnut tunngasunik suliaqartillutik tunngavigisagaasa ullutsinnut
naleqqussarneqarnerannik qularnaaraluni.
Ole Lynge, Inatsisartut Siulittaasuat:
Tassa taamaalillugu taasissutigissavarput immikkoortoq 5.
Pisortat ingerlatsinerat pillugu paasitinneqarsinnaatitaaneq pillugu inatsisissap
atortussan-ngortinneqarnissaanik Namminersornerullutik Oqartussat
oqaaseqaataannut isumaqataasut qinnuigissavakka nikueqqullugit.
26-it. Najuuttut tamarmik.
Tassa akerliusoqaranilu taasinngitsoortoqanngilaq.
Oqaluuserisaq naammassivoq.