Oqaluuserisassani immikkoortoq 11 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Marlunngorneq 15. februar 2000
Ataatsimiinnermik
aqutsisoq:
Inatsisartut Siulittaasuat Ole Lynge.
Otto Steenholdt, Atassut:
Tassa siunnersuuteqarninnut
tunngavigisara, inatsisartunut ilaasortat paasereerpaat.
Ukiuni kingullerni inissianik
ikuallattoqartarnera tusarsaajualersoq, siunissami aamma pisimasut,
tujorminartut taamaattut nalaanneqartarnissaat naatsorsuutigisariaqassaaq,
ullumikkut pissutit ingerlaannassappata.
Taama ikuallattoqareersillugit,
ilaqutariit ikuallattoornermik eqqorneqarsimasut, ajoraluartumik
sillimmasiisimanngitsut amerlavallaartarput, inuiaqatigiillu tungaanniit
qanorluunniit iliorfigineqarnissartik ajoraluartumik kisiat
utaqqiinnalersarlugu.
Landst-ingimut manna
oqallisissiaraara, qanoq ililluta inuit amerlanerusut, najukkatik pillugit
sillimmasiisalernissaat anguniarneqarsinnaanersoq.
Sillimmasiinermi pinngitsooratik
sillimmasersimasassat qimerloortariaqalerput, inuit ajunaarnikkut eqqugaasut,
sillimmasiisimanngitsut amerlavallaartut paasinarsigaluttuinnarmat.
Taamaammat siunnersuutigaara;
kinaluunniit inimut isertertussatut innersuunneqartoq, ikuallattoornissamut
isumannaatsumik sillimmaseereersimatinnani, matuersaammik allaat
tunineqartariaqanngitsoq. Inuit nammineerlutik sillimmasiisariaqarnerannik
isumaginnikkusunngippata, aqqutaasinnaasut allat ujartortariaqaleratsigit.
Taamatut oqaaseqarlunga,
siunnersuut manna langstingimut oqallisigilluaqqussavara, isumaqarama
pinngitsaaliissutaanngitsutut oqaatigineqassasoq, kisianni pisartut ilinniartereermatigut,
allatut ajornartumik annerusumik minnerusumilluunniit, siunissaq
eqqarsaatigalugu iliuuseqartariaqaleratta, ikuallattoqartillugu angajoqqaat
kisimik eqqorneqarneq ajormata, siunissaq meeqqallu aamma tamatumuunakkut
eqqorneqartarmata.
Erseqqissaqqissavara!
Pinngitsaaliissutitut eqqarsaatiginngilara, kisiannili inatsisartut manna
pillugu, isummersornissaat pissangallunga tusarnaassavara.
Ineqarnermut, Attaveqarnermut Pilersuinermullu Nalakkersuisoq:
Namminersornerullutik oqartussat, imaluunniit kommunit inissiaataannut
attartortittakkamut innersuunneqarsinnaassagaanni, pigisat
sillimmasereersimanissaasa piumasaqaatinngortinneqarnissaanik, inatsartunut
ilaasortap Otto Steenholdt-ip siunnersuutaanut, naalakkersuisut paasinnipput.
Pigisanik sillimmasiisarneq inatsisitigut
pisussaaffinngortinneqassappat, tamanna inissianik attartortitsisarneq pillugu,
inatsiartup peqqussutaani, inatsisitigu tunngavissinneqartariaqarpoq.
Attartorneq pillugu peqqussut, atuuttoq massakkut iluarsaateqqinneqarpoq
inatsisartunullu ukiakkut katersuunnermi saqqummiunneqassamaarluni.
Naalakkersuisut neriorsuerusupput, Otto Steenholdt-ip siunnersuutaa,
iluarsaaqqinniarnermi ilanngunneqassasoq. Eqqarsaatigineqarsinnaavoq
attartortitsisartut pisussaaffilerneqassasut, attartortitsisup inissiaataanut
tamanut ataatsimut sillimmasiisalernissaannut, tamatumunnga aningaasartuutit
ineqarnermut akiliutitigut akilersitarlugit.
Assersuutigalugu; ataatsimoorluni sillimmasiineq pigisat 100.000
kr.-inik nalilerlugit tunngaveqartinneqarsinnaavoq, beton-imik illuliami
taamatut sillimmasiineq ullumikkut ukiumut 470,- kr.-nit missaanik akeqarpoq.
Qisumullu illuliami ukiumut 590,- kr.-nit missaanik akeqarluni.
Ataatsimoorluni sillimmasiineq akikinnerusussaassagunarpoq, attartortup
pigisat annertunerusumik nalilerlugit sillimmasiinissaq kissaatigiguniuk,
taanna nammineq ilassutitut sillimmasiisinnaavoq.
Taamaammat, naalakkersuisut inassutigissavaat, inatsisartunut ilaasortap
Otto Steenholdt-ip siunnersuutaa, inatsisartut oqaaseqaataat ilanngullugit,
inissianik attartortitsisarneq pillugu, inatsisartut peqqussutaata
iluarsaateqqinneqarneranut ilanngunneqassasoq.
Vittus Mikaelsen, Siumup oqaaseqartua:
Qujanaq! Ineqarnermut pigisanik
sillimmasiisinnaanermik piumasaqaateqartoqalernissaanik siunnersuut Siumumiit
tunngaviatigut assigiinngitsutigut taperserparput.
Atituumik aaqqissuussinikkut
atuisartut atituut atuisartut ilusilersorneqarsinnaanerat anguneqarsinnaammat,
Siumumiit iluarisimaarparput Ineqarnermut, Attaveqarnermut Pilersuinermullu
naalakkersuisup ineqarnermut malittarisassat allanngortiterneqarnissaanut
atatillugu misissuerusunnera, aammalu inatsisartut ukiamut
ataatsimiinnissatsinnut saqqummiussaqarnissaa Siumumiit isumaqatigaarput
taperserlugulu.
Naaggataatigut Siumumiit erseqqissassavarput,
sillimmasiisarnerit pigisanik assigiinngitsunillu, tunngaviusumik
tapersersorigut.
Tamanna pisussaaffik tamatta
ilisimavarput, maannalu inatsisartunut ilaasortaq Otto Steenholdt-ip aamma
pisortatigoortumik allaat qanuiliuseqarfigineqaqqummagu
pissusissamisoorsoraarput.
Sillimmasiisarnermi
ukiorpassuarni akilersuisimasut eqqaallugit, taakkununnga ajun-gitsorsiassat
naammaginarnerusumik aaqqiviginissaat Siumumiit misissoqquarput, tassani
puigunngisaannaratsigu nutaaliornermi maannalu sillimmasiinikkut
sukaterinissami ukiorpassuarni akilersuuteqarsimasut
puigorneqannginniassammata.
Soorunami sillimmassiisarneq
ajutoorsinnaanermut tunngavoq, isumatulatumilu pissaasoq, aammali inuk
ajutuunngikkaluarluni ukiorpassuarni akilersuereersoq aamma isumanaallisaanissaq
Siumumiit isumaqatigaarput.
Gudmand Rasmussen, Atassutip oqaaseqartua:
Initaarnermi pigisanik
sillimmaseereersimanissamik, piumasaqaateqartoqarnissaanik aalajangiinissamik
siunnersuummut, inatsisartup Otto Steenholdt-ip, inimut iserternermi
sillimmaseereernissamut atatillugu siunnersuutaanut, Atassummiit imak
oqaaseqaateqassaagut:
Siullermik oqaatigissavarput,
naalakkersuisup akissuteqaataa erseqqarissoq iluarigatsigu. Pineqartoq
nalunngilarput inatsisitigut tunngaveqaraluartoq, taamaattoq attartortunik
tamakkiisumik atorneqartannginnera, erseqqarimmat inuiaqatiginnullu oqariatuut
iluatinnartunik ilaqarmat, kiisalu inatsisartuni oqallisigissallugu
pisariaqartikkatigu, imatut saqummiunniarparput:
Nunatsinnimi inissiani
najukkanilu ikuallattoqarneratigut, pakasarneqartarnerit ajoraluartumik
takornartaanngillat, taamalu pisoqartillugu, eqqorneqartunut
ajornartorsiortitsinermik kinguneqartarluni, soorlu malugalugu 1900-ukkunni
Paamiuni, siornalu Kangerluassuarmilu pisut avaanngunartut assersuutissaapput.
Taamaattumik ineqarnermik
ataatsimiitsitaliami eqqartorneqarnissaa innersuutigalugu Atassummiit
pineqartoq taperserparput.
Johan Lund Olsen, Inuit Ataqatigiit oqaaseqartuat:
Qujanaq! Inatsisartunut
ilaasortap Otto Steenholdt-ip siunnersuutaanut atatillugu oqaatigerusupparput;
naalakkersuisut ilaatigut, inissianik attartorneq pillugu peqqussutip
nutarterneqarnissaa, suliarineqartussaq iluatsillugu, periarfissanik
assigiinngitsunik tikkuagaqarlutik aaqqissuteqarusussinnaanerat, Inuit Ataqatigiit
aamma isumaqatigimmassuk.
Suliaq taamak siunnerfilik,
taamaammat peqataaffigisinnaavarput, naak tunngaviatigut isumaqaraluarluta,
inissianik attartortut namminneq pigisamik sillimmasersimaneqarnissaannik aamma
akisussaaffeqartariaqaraluartut.
Taamaakkuluartorli, inissianik
attartorneq pillugu peqqussut, matumani sammineqartumi,
aqqutigineqarsinnaasutut tikkuarneqarmat, Inuit Ataqatigiinniit
kissaatigilluinnassavarput, ineqartut peqatigiiffiisa kattuffiat, suliassap
aallartinneraniit peqataatinneqarniaqqullugu.
Ineqartummi inigisaminnut
akisussaaqataatinniarneqarnerat oqaasissaqaqataatinniarnerallu
uummarissarneqartariaqarluinnarsorivarput, suut tamarmik ilaatigut INI A/S-ip
qullersaqarfia aqqutigalugu, qulaaniit maannakkutuut aallartiffeqareertinnagit.
Suliassap matuma
pingaaruteqartup ingerlateqqinneqarnerani, Inuit Ataqatigiit aammattaaq
kissaatigissavarput, inatsisartut ineqarnermut ataatsimiititaliaata,
naalakkersuisunik peqateqarlutik aamma misissulereertariaqaraat,
sillimmasiisarfimmik nunatsinni aallaavilimmik
pilersitsiniartoqarsinnaannginnersoq, ilaatigut taama iliornertigut, aningaasat
nunatsinnit annissorneqaannartartut pakkersimaaneqarsinnaaniassammata.
Taamatullu naatsumik
oqaaseqarallaannarluta, aappassaaneerisoqartinnagu pissu-issamisoorsoraarput,
suliassap inatsisartut ineqarnermut ataatsimiitsitaliaanut aamma
innersuunneqarallassasoq, siuliani taakkarsukkagut
isummersorfigineqarsinnaaqqullugit naalakkersuisumillu
ataatsimeeqateqarsinnaaqqulluta.
Aqutsisoq: ?
Anthon Frederiksen, Kattusseqatigiit oqaaseqartuat:
Inatsisartunut ilaasortap Otto
Steenholdt-ip siunnersuutaa aamma Kattusseqartigiinni eqqartorsimavarput,
siunnersuuteqartup ilaatigut oqallisissiaraa; qanoq ililluta inuit
amerlanerusut najukkatik pillugit sillimmasiisalernissaat
anguniarneqarsinnaanersoq, Kattusseqatigiinni isumaqarpugut, innuttaasunik
paasititsiniaajuarneq periarfissat siullersaannut ilaatinneqartariaqartoq,
aammalu sillimmasiisarneq pillugu, inatsiseqartitsinermut tunngasut,
oqartussaaffiit ilaatigut nalornisoornarsinnaanerat
qulaajaaffigineqaqqaartariaqartoq.
Nalunngilarput
illutaarniarnermut tapersiisarfik aqqutigalugu illutaarsimasut, aammalu
nammineerluni illuliornermi aningaasanik attartortariaqarsimasut
piumaffigineqartartut, pingitsooratik illumut ikuallattoornissamut
sillimmasersimanissamik pisussaaffeqarmata.
Kisiannili pequtinut
tunngatillugu tamanna pinngitsaaliissutaanngitsoq, aamma ilisimavarput ilumut
ikuallattoornissamut sillimmasiunneqartartut, ilaatigut ingasattajaartumik
annertussusilerneqartartut, tassa matumani eqqarsaatigivagut bolig-støtte-mi
illuliaasartut, aallaammi ilaatigut tamakkua ukiumut 5.000,- kr.-nit
pallillugit illumut ikuallattoornissamut akiliuteqartinneqartarlutik.
Taamaattumik
Kattusseqartigiinniit sakkortuumik piumasaqaatiginiarparput, suliap matuma
ingerlateqqinnginnerani ineqartut peqatigiiffii qanimut suleqatigalugit
ingerlanneqartariaqartoq, ineqartut qoqassineqannginnissaat qulakkeerniarlugu.
Naggataagut siunnersuuteqartumut
appeqqutigerusupparput; ineqareersut matuersaateqartinneqareersut, aammalu
qularnanngitsumik ilaat amerlaqisut, pequtiminnik sillimmasiisimanngitsut,
qanoq ilillugit sillimmasiitinneqarnissaat eqqarsaatigisimaneraa? Tassami
siunnersuummi initaartussat kisimik eqqartorneqarmata.
Naggaterpiaatigut
naalakkersuisumut apeqqutiginiarparput; Namminersornerullutik Oqartussat
aammalu kommunit inissiarsuarnik piginnittutut
sillimmasiisussaatitaannginnersut? Tassa tassani illutai eqqarsaatigalugit.
Mannalu iluatsillugu
naalakkersuisumut aamma apeqqutiginiarpara; ukioq Paamiuni inissiarsuit ilaata
ikuallassimaneranut tunngatillugu, naalakkersuisumut allakkatigut
apeqquteqaa-igisimasakka maannamut suli akineqarsimanngitsut, qaqugu
akineqassamaarnersut?
Taamatut oqaaseqarluta, suliap
aalajangiiffigineqannginnerani, inatsisitigut qulaajagassat assigiinngitsut
qulaajarneqarnissaat, aammalu minnerpaamik ineqartut peqatigiiffiisa qanimut
suleqatigineqarnissaat kaammattuutigaarput.
Steffen Ulrich Lynge, Ineqarnermut, Attaveqarnermut
Pilersuinermullu Naalakkersuisoq, Siumut:
Maluginiarpara partiit
Kattusseqatigiillu tamarmik isumaqatigigaat uumap suliap maannakkut peqqussutip
allanngortinnissaanut atatillugu suliamut ilanngunneqarnissaa. Saniatigut
massakkut aappassaanernissaanut atatillugu Inatsisartut Ineqarnermut
Ataatsimiititaliaani suliarineqarnissaa innersuussutigineqartoq paasivara.
Tulleriiaalaarlugit pissagukit
immikkut oqaatigineqarpoq Siumumiit akiliutaasimasut ilaasa kingusinnerusukkut
utertinneqarsinnaanissaanut eqqarsaat, bonusordning, taanna aamma
misissorneqartariaqartoq.
Atassummit
innersuussutigineqarput taakku isumaqataallutillu Inatsisartut Ineqarnermut
Ataatsimiititaliaanut ingerlateqqinneqarnissaa.
Inuit Ataqatigiinniit
taaneqartoq maluginiarpara ineqartut peqatigiiffiisa kattuffiat suleqatigineqassasoq,
una ilumoorami kattuffik taanna pilersinneqarmat qulaaniit pilersinneqarpoq
taamaattumillu sunniutai massakkut oqartariaqarpugut annertunngilaq
taamaattumik qujanartuuvoq una maannakkut ataaninngaanniit, tassa ineqartut
peqatigiit assigiinngitsut suleqatigeqqissaarlugit massakkut
pilersitsiniarnerat aammalu annerusumik sulianiarnerat taanna
maluginiarsimagatsigu. Aammattaaq maluginiarparput Inatsisartut Ineqarnermut
Ataatsimiititaliaa suleqatigeqqissaarlugu immikkut sillimmasiisarfimmik nunatsinni
aallaaveqartumik pilersitsisinnaanissaq misissorneqaqqullugu.
Kattusseqatigiinnut
tunngatillugu oqaatigissavara apeqqutit tulleriiaartut taakku imatut
akisinnaassagakkit siullermik uani maluginiarpara kr. 5000,00-inik
taakkartugarsi immaqa paatsornerusimassasoq, tassa imaakkami illu imaluunniit
inissiaq immikkut taanna sillimmaserneqartarpoq, tassa bygningsforsikring,
taakkulu assigiinngitsunik naleqartarput. Kisiannili uku massakkut
oqaluuserisagut illup iluani tassa pigisat taakkartorneqarput, taakkununngalu
tassani misissukkagut imaapput kr. 100.000,00-inik naleqarpata kr. 500,00
missanik akeqartarpoq sillimmasiineq ukiumut.
Taava toqqaannartumik aamma
aperivutit makku inissiat Namminersornerullutik Oqartussat pigisaat taavalu
aamma kommunit pigisaat sillimmaserneqarsimanersut. Illlutaat inissiartaat
tamarmik sillimmaserneqarnikuupput.
Paamiuni ikuallassimanermut
tunngatillugu apeqqutigisimasat taanna uterfigeqqikkusuppara
misissorluaqqaarlugu uterfigissavakkit.
Maliinannguaq Markussen
Mølgaard, Inuit
Ataqatigiit:
Sillimmasiisarnermut tunngasoq
isumaqarpunga soqutiginarluinnaqqissaartoq.
Ukiorpassuarni sillimmasiisarneq
nunatsinni ingerlanneqarpoq aammalu illoqartut kommunit sillimmasiisarput
aammalu ilaatigut suliffeqarfiit immikkut sillimmateqartarput angallatit. Unalu
nalunngisarput tassaavoq sillimmasiisarfiit angerlarsimaffii tassaapput nunatta
avataaniittut. Taamaattumik iluatinnaateqartoq uani siunnersuummi ilagivaa
sillimmasiisarnerup nunatsinni angerlarsimaffeqartup tunngavilerneqarnissaa
Inuit Ataqatigiinninngaanniit pingaarluinnartutut isigaarput. Tassami
siunissami aningaasarpassuit nunatsinni aniaannartut killilersimaarniarutsigit
aamma tamakku ataatsimoorussamik isigisumik ingerlanniarta-riaqalerpagut.
Maani sinerissami angalaarluni
ilaatigut qinersisartunik ataatsimiisitsilluni makkua soorlu nammineerluni
illuliaasartulluunniit kisiisa eqqarsaatigiinarlugit apeqqutigineqartartoq
unaavoq ilaatigut unaavoq ukiorpassuarni akilersuigaluarlutik namminneq
aningaasarpassuillu atorsimallugit sooq illumi iluarsaannissaannik imaluunniit
arlaannik ajutoorsimagunik qinnuteqarunik ikiorneqarsinnaaneq ajornertik
aammalu tamakku aningaasarpassuit aniaannartut ilaatigut
taakkartorneqartarlutik.
Soorunami apeqqutaavoq
tamatumani sillimmasiinermi taarsiissutissaq qanoq najoqqutassai
isikkoqarnersut, taakkuinnaalluunniit eqqarsaatigalugit siunissami una
soqutiginarluinnartuuvoq ilumut ukiorpassuarni akilersuereersimalluni - immaqa
ukiut aalajangersimasut akilersuiereersimalluni susoqarsimanngippat taakkulu
sillimmasiinermi aningaasat atorsimanngippata aamma
ajunngittorsiassaqalaarnissaq aamma inummut soqutiginarnerussooq
sillimmasiinissami taamaaliortoqartarpat.
Tassa oqareernittuut makkua
sillimmasiisarnermut tunngasut aningaasarpassuarnik nunatta avataani
qaloorfigineqarput. Aningaasarpassuit nunatsinniit aniapput taamaattumik
maannamut taamatut sillimmasiisarnerup matuma eqqartornerani ataatsimoorussamik
isiginninnissaq siunissami nunatsinni aningaasat kaaviiaarnissaannik
annertuumik suliniutigalugulu isigisariaqaleripput.
Anthon Frederiksen, Kattusseqatigiit:
Illup nammineerluni
sillimmaserneqartarneranut tunngatillugu paatsuunngilluinnarpara kr. 5000,00
missaani oqaatigisara - tassa illu nammineerluni sillimmasernera tassani
boligstøtte-mi illuutigineqartut soorunami angissusaa tassani
naatsorsuutigineqartarpoq. Aammalu pigisat inuup nammineq pigisai
sillimmaserneqartarneri immikkoorput.
Uani
mianersoqqussutigiinnarusuppara suliap ingerlaqqinnerani ineqartut
ingasattajaartumik akilioraatinneqannginnissaat massakkut taamaareermat. Tassa
pinngitsooratik boligstøtte-mik illuuteqartut sillimmasersinnaatitaanerat
immaqa ingasattajaarluni oqaatigissagaanni sillimmasiisarfiup atornerluppaa,
allaat ingasattumik akiliioraatillugit nammineerlutik illuliorsimasut
sillimmatinik akiliioraasittarai taanna amma siusinnerusukkut maani inimi
qaqereernikuuara.
Uannut assersuutigissaguma
nammineerlunga illuliorsimavunga namminerlu illup taassuma
sillimmaserneqarnissaa sillimmasiisarfik oqaloqatigalugu sillimmasertissimavara.
Boligstøtte-mut illuutilimmut sanilliulluta sisamariaammik allaat ukiumut
akiliinikinnerusarpugut. Taamaattumik pisortatigoortumik aaqqissuussinerit
taamaattut aamma eqqumaffigine-qarluinnartariaqarput, sillimmasiisarfiit
illuatungaatigut asuli aningaasarsiorfissaat ammaanneqartariaqanngitsut tassani
isumaqarpunga eqqumaffigilluinnartariaqaripput.
Nuannaarutigaara Maliinannguup
oqaatigimmagu sillimmasiisarfinnut akiliutigineqartartut nunatsinniit
annissorneqartartut aamma qangali eqqartortakkagut taakkua aamma
eqqumaffigineqartariaqarput taamaattumik taakkutsitaat eqqarsaatigalugit
pingaaruteqartutut oqaartigaarput pinngitsooratik ineqartut peqatigiiffii
peqataatinneqartariaqartut suliap ingerlaneqarnerani.
Otto Steenholdt, Atassut:
Oqaatsit aninneqartut assorsuaq
qujaruppakka taanna ilassilluaneqarlunilu oqallisigineqarluarmat.
Tassaana Siumup oqaaseqartuata
eqqaatsiagaa nuannarigiga ajunngitsorsiassat naammaginarnerusumik
aaqqiiviginissaat Siumup misissoqqummagu.
Assut pingaaruteqarpoq taanna
sillimmasiisartunut qangisalaanngortut inuit assorujorujussuaq pakatsisarput
inuunertik tamangajaat illumut angallammulluunniit assourance-qarallarmat
taamanikkut massakkut qanoq taasarneraat naluara.
Tamakkua
akilersorujussuariarlugit akiliigaangamik angerlartarput cigaannguarlu ikillugu
nuannaarlutik tassa taanna akileramikku - aammalu eqqartuleraraat tamakkua
aningaasat taama amerlatigisut tassa soorlu nammineq pimittut.
Aamma massakkut taamaattoqarpoq,
akilersuigaluarlutik ilaat saaffiginnittarput illuma iluata
aaqqissuunnissannguanik ikiulaarsinga imannak akileereerpunga, taakkulu
naaggaarneqar-tarlutik. Taamaattoqaraangat sillimmasiinissamut
akilersuisimagaluartut pakatsisitai amerlaqaat oqartartut: "asu
aningaasanik eqqaaginnarniarunnaarpunga akileeqqinnianngilanga" tassa
navianartua.
Taamaattumik
Siumukkunninngaanniit taanna oqaatigineqartoq ajunngitsorsiassat nutaaliornermi
qanoq ililluni taakkununnga akilersuisimasunut aamma utertoqarsinnaanera
akikinnerulersitsisoqarsinnaanera taakkununnga iluaqutaassannguatsiaqaaq
assorujussuaq malersorluarlugu sunniuteqarluartumik inerneqarnissaa
kissaatigisariaqassavarput.
Taavalu Kattusseqatigiit
aperimmannga matuersaateqareersummi. Uani aalajangersagassaq akuersaarneqarluni
piviusunngorpat inunnut ataasiinnarnut atussanngilaq taakkua aamma taamaattunik
peqareersut soorunami ilanngutissapput uannut siunnersuuteqartumut
iluarinassaqaaq aamma taakkua siunissami ikuallattooriataassagunik
annaasaqarpallaaratik pineqartussanngussammata - tassa ilaannaanuussanngilaq.
Oqartoqarpoq
Namminersornerullutik Oqartussat kommunillu iluutitik namminneq
sillimmaserlugit sumilluunniit annilaanngateqarneq ajorput. Inuilliuku
taakkunanut isertunnguit pigisannguatik annaagaangamikkit tassani sakkortuumik
eqqorneqartartut. Siunnersuut ilassilluarneqarmat assorsuaq qujavunga.
Steffen Ulrich Lynge, Ineqarnermut, Attaveqarnermut
Pilersuinermullu Naalakkersuisoq, Siumut:
Paatsooqqunagu Kattusseqatigiinnit saqqummiunneqartoq una soorlumi
qitiusumik arlaatigut ingerlanneqartoq boligstøtte-nik illuuteqartut
eqqarsaatigalugit. Kisianni taamaanngilaq tassa qitiusumik
aalajangerneqartarpoq aamma piumasarineqarpoq tamakku sillimmasiisarnissaat
kisiannili taakku nammineq inuttut suliffeqarfik sorleq qinissanerlugu
aalajangertarpaat tassa akinik unammillerneq tassani pisinnaavoq.
Oqaluuserisaq naammassivoq.