Kalaallit Nunaanni Inatsisartut

Oqaluuserisassani immikkoortoq 12-17-2		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Sisamanngorneq 2. marts 2000 nal. 13.10

 

Oqaluuserisassani immikkoortut 12 aamma 17

 

Utoqqaat siusinaarlutillu sulisinnaajunnaarnersiutillit qaammammut pisartagaasa iluarsiivigineqarnissaannik aalajangiiffigisassatut siunnersuut.

(Mads Peter Grønvold)

(Aappassaanneerneqarnera)

aamma

Siusinaartumik tamakkiisumik inuussutissarsiorsinnaajunnaarsimasut utoqqalinersiutillillu saniatigut isertissinnaasaasa akileraaruserneqartussaanngitsut amerlineqarnissaannik aalajangiiffigisassatut siunnersuut.

(Anthon Frederiksen)

(Aappassaanneerneqarnera)

Ataatsimiinnermik aqutsisoq, Ole Lynge, Inatsisartut Siulittaasuat:

Inatsisartut Isumaginninnermut Ataatsimiittaliaata siunnersuutit taakku ataatsimoortillugit 28. februar 2000 isumaliutissiissummi saqqummiussivigai. Isumaliutissiissummi ataatsimiititaliap isumaqatigiittup inassutigaa Inatsisartut Mads Peter Grønvoldip Anthon Frederiksenillu aalaja-giiffigisassatut siunnersuutaannut akerliullutik taasissasut. Oqaaseqarumasoqanngippat ingerlaannarluta taasissaagut.

Anthon Frederiksen, Siunnersuuteqartoq, Kattusseqatigiit:

Siunnersuutigisagut soorunami inunnut pineqartunut ajunngitsumik isumaqarput siunnersuutigigatsigit aammalu ataatsimiititaliamit suliniutigineqartut suliniutigineqartussat ajunngitsumik tiguneqarmata. Siunnersuutigisagut toqqaannartumik itigartinneqaraluartut kisianni suliniutit ajunngitsutut takorlooratsigit allatut ajornaraluartumik illersorlugu assortorlugulu pisinnaannginnatta taaseqataaffigissavarput. Tassa imaappoq siunnersuutigut akerleralugit taasisariaqassaagut assortuinianngikkutta suliniutitsinnik. Ajorinngilarput suliniutit ingerlammata.

Ole Lynge, Inatsisartut Siulittaasuat:

Tassa allanik oqaaseqarumasoqanngilaq. Aamma isumaliutissiissiortut kissaateqarsimanngillat. Taamaattumik siunnersuutigissavara Inatsisartut siunnersuutit taakku marluk ataatsimoortillugit taasissutigissagaat. Taamaaliornissamut akerliulluni oqaaseqartoqarnianngippat taamaaliornissaq akuerineqartutut naatsorsuutigivara.

Mads Peter Grønvoldip Anthon Frederiksenillu aalajangiiffigisassatut siunnersuutaannut isumaqataasut qinnuigissavakka nikueqqullugit. 4.

Kiisalu Mads Peter Grønvoldip Anthon Frederiksenillu aalajangiiffigisassatut siunnersuutaan- nut akerliusut qinnuigissavakka nikueqqullugit. 27.

Aamma Mads Peter Grønvoldip Anthon Frederiksenillu aalajangiiffigisassatut siunnersuutaannut isumaqataanatilluunniit akerliunngitsut qinnuigissavakka nikueqqullugit. 0. Taamaattoqanngilaq.

Oqaluuserisaq naammassivoq.