Oqaluuserisassani immikkoortoq 14-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Marlunngorneq 15. februar 2000 nal. 15.00
Ataatsimiinnermik aqutsisoq: Ole Lynge,
Inatsisartut Siulittaasuat, Inuit Ataqatigiit.
Mikael Petersen, siunnersuuteqartoq, Siumut:
Aalisariuteeqqanik
Q-23-nik kiisalu Q-30-nik siullernik piginnittut aaqqiivigineqarnissaasa
piviusunngortinneqarnissaanik Inatsisartuni aalajangiisoqarnissaanik
siunnersuuteqarpunga. siunnersuutigalu imaattumik tunngavilersorpara:
1998-imi
ukiakkut Naalakkersuisuusut aaqqiissuteqariaraluarput aalisariuteeqqanik
aalisartut Q-23-nik piginnittut kiisalu aalisartut Q-30-nik siullerpaanik
piginnittut ESU-kkut aningaasalersuinermikkut
aaqqiissuteqafigineqarnissaaniktaamaaliornikkut aalisartut taakku-nanga
angallatinik pineqartunik piginnittut eqqartumik aallaveqartumik
ajornartor-siutigilersimasaasa aaqqiivigineqarnissaat siunertaralugu.
Minnerunngitsumik aalisartut aningaasalersuinerat aningaasaqarniarnerallu
eqqarsaatigalugit.
Taaamnikkut
Aningaasaqarnermut Ataatsimiititaliami ilaasortaasut amerlanerussuteqartut
aaqqiiniarneq tamanna itigartippaat ilaatigut tunngavilersuutigalugu
aalisartunngooq nammineerlutik angallatitik akisussaaffigisariaqarmatigit.
Soorunami aalisartut angallatigilersimasatik namminneq akisussaaffigaat
kisianni angallatit neqeroorutigineqartut ESU-kkoorlugit
pissarsiaritinneqarsimasut kukkuneqarsimappata arlaatigulluunniit
neqeroorutaasut eqquutsinneqarsimanngippata taava aalisartut
aaqqiissuteqarfiginissaat avaqqunneqarsinnaanngilluinnarpoq. Taamaattumik
massakkut inatsisartut aaliangiiffi-gisariaqarpaat taamanikkut
Naalakkersuisuusut aaqqiissutissatut siunnersuutigisimasaata ingerlaannartumik
piviusunngortinneqarnissaa.
Saqqummiussannut
ilanngullugu taanngitsoorusunngilakka ukiuni arlaqartuni aalisariutit taakku
pineqartut misissuiffigineqarnerminni sukkut ajoquteqarnerannut
paasissutissiissutit misissueqqissaarnerit takutisimavaat aalisariutit
pineqartut neqeroorutaasimasut siullermik Q-23-it eqqarsaatigalugit tassa
usitussuseqassasut 2,5 tons-inik kisiannili piviusoq illersorneqarsinnaasoq
usisinnaassuseq tassaasimalluni 1,9 tons-i. Q-23-it angallatit
motorilerneqarsimapput angallatitaminnut tulluutinngitunik
naapertuutinngitsunik taamaattumilli annertuumik motooriiartoqartarsimalluni.
Taakkua ajornartorsiutit marluk aaqqiivigineqassappata ningaasartaatigut
taamanikkut Naalakkersuisut inassutigaat siunnersuutigalugu angallammut
ataatsimut kr. 200.000,00-ni aallaviussasoq tassalu angallatit 23-iummata
Q-23-it katillugu kr. 4,6 mio. -nik naleqartunik aaqqiivigineqassasut. Aamma
periarfissiissutitut ilanngullugu taaneqarpoq angallatinik taakkuninnga
piginnittut angallatit pigisatik tunisinnaagunikkit taava angallammik allamik
taarsiinissaminnut periarfis-sinneqassasut.
Kiisalu
Q-30-it siulliit aqqaniliusut tassa type 1-i eqqarsaatigalugu
ajornartorsiutaasut uaniipput, neqeroorutigineqarnerminni usisinnaassuseq 10
tons-i aallaaviusimavoq kisiannili piviusoq illersorneqarsinnaasoq
tassaasimalluni 4,5 tons-iinnaq. Angallatit pineqartut Q-30-it siulliit type
1-it motoorilerneqarsimapput kingoraatigut taamaasillunilu usisinnaassuseq
annikitsuararsuaq pinngorsimalluni taamaattumik siunnersuutigineqartoq unaavoq
angallatit pineqartut taakku aqqanillit iluarsaateqqinneqassasut kr.
245.000,00-nit nalinganut angallat ataaseq aqqanilium-matalu taakkua kr. 2,7
mio.-nik naleqartussaallutik.
Aaqqiissutissatut
uani siunnersuutigineqartoq katillugu kr. 7,3 mio.-nik aningaasartaqassaaq.
Taakkualu erhversstøtte aqqutigalugu ESU aqqutigalugu aaqqiivigineqarnissaa
matumuuna siunnersuutigineqarpoq.
Ilanngullugu
tusaanngitsoorusunngilarattaaq taakkua ajornartorsiutigineqarneri sivisuumik
ingrelammat aammalu aaqqiiviginiarlugit suliniutit sivisuumik misissuinerit
ingerlareerlutik uppernarsaatissallu tamarmik pigineqareerlutik.
1990-ikkut
naajartorneranni inatsisartuni oqallisaasarsimapput inatsisartunilu
aaqqiissutissanik ujartuineq ingerlanneqarsimalluni, taamanikkullu
naalakkersuisuusunut suliakkiissu-taareersimalluni inatsisartunilu taamaattumik
pissutissaqarsorinngilara annertunerusumik paasiniaanermik aallartitsissalluni
aaqqiissutissatulli saqqummiunneqartut aallaavigalugit suliassaq
naammassiniarneqartussatut isigalugu.
Steffen Ulrich-Lynge, Ineqarnermut, Attaveqarnermut Pilersuinermullu
Naalakkersuisoq, Siumut:
Inatsisartuni
ilaasortaq Mikael Petersen angallatinik Q-23-inik aamma Q-30 type 1-inik
piginnittut ataasiakkaat taarsiivigineqarnissamik neqeroorfigineqassasut
tamatuminngalu aningaasaliissutit ESU-mut konto pingaarneq aqqutigalugu
pissarsiarineqassasut siunnersuuteqarpoq.
Piffissami
1992-imiit 1996-imut Amutsiviit angallatit Q-23-it glasfiberiusut 23-it
aasaanerani miluumasunik imarmiunik piniarnermut killilimmillu snellersorluni
qaasusersorlunilu aalisarnermi atugassat sanavaat. Angallatit tamarmik
inuussutissarsiutinut tapersiisarfimmit taarsigassarsinikkut
pisiarineqarsimapput. Angallatit 19-it Uummannap Upernaviullu kommuniini
angerlarsimaffeqarput sinnerilu kommunini allani. Pissustsit piviusut
takutippaat, angallatit usisinnaassutsitut neriorsuutigineqartumit
usisinnaassuseqanngitsut annertuumillu qaleralinniarnermik ingerlatsinnermi
motorii sukkasoorujussuarmik nungullartartut ajornartorsiuutit
aaqqiivigineqarsinnaapput angallatit tallineqarnerisigut motoriinillu sananeqaatimikkut
pisariinnerusumik ikkussivigineqarnermikkut.
Piffissami
1986-imit 1989-imut Amutsiviit angallatit Q-30 type 1-it glasfiberiusut
aqqanillit aalisarnermi tamani atorneqarsinnaasut sanavaat. Angallatit tamarmik
inuussutissarsiutinut tapersiisarfimmit taarsigassarsinikkut
pisiarineqarsimapput. Angallatini pingasut kujataani angerlarsimaffeqarput
sinnerilu avannaani. Angallatit neriorsuutigineqartutut
usisinnaassu-teqanngillat. Ajornartorsiut iluarsiivigineqrasinnaavoq motori
aqorpasinnerusumut inissinneratigut.
Siunnersuutip
1998-ip naalernerani Naalakkersuisut aalajangiinerat assigilluninnarpaa,
aalajangiinerli taanna Aningaasaqarnermut Ataatsimiititaliamit arlaleriarluni
itigartitsis-sutigineqarsimavoq.
Taamaattummik
matumuuna Naalkeersuisut siunnersuutigaat aalajangiiffigisassatut siunnersuutip
Inuussutissarsiuutinut Tapersiisarnermullu Ataatsimiititaliamut
suliassanngor-tinneqarnissaa.
Taavalu
ilassutitut taalaassavara december 1998-imi atortussat saqqummiunneqartut
saniatigut, angallatinut maanna allanngortinneqarsimasunut aamma
allanngortitsinerup qanorpiaq akeqarsimaneranut tunngatillugu
ilisimalersimasanik ataatsimiititaliaq paasissutissanik pissarsissammat.
Vittus Mikaelsen, Siumup oqaaseqartua:
Aalisariuteeqqat Q-30-it kiisalu
Q-23-it tunnagtillugu siumuuminngaanniit ima oqaaseqarniarpugut.
Siunnersuut tamakkiisumik
tunngaviatigut isumaqatigaarput, imaattumillu erseqqissaate-qarniarluta.
Q-23-it kiisalu Q-30-it siulliit
pillugit aalisariutit aalisartunit piginnittunit ajornartorsiutigineqartut
annertuumik ukiuni arlalinni misissuiffigineqareernerisigut. Taamanikkut
Naalakkersuisut aaqqiissutissatut siunnersuutaat 1998-imi ukiakkut
Aningaasaqarnermut Ataatsimiititaliamit akuerineqanngillat.
Ilaatigut
tunngavilersuutigineqartunit taamatut pisoqassappat tamakkiisumik Amutsiviit
tamanna akisussaaffigisariaqaraat. Ilaatigullu ilanngunneqarsimalluni tamanna
ajornartorsiut aalisartut piginnittut namminneerlutiki aaqqiivigisariaqaraat.
Siumumiit oqaatigissavarput
aalisartut angallatit pillugit naammagittaalliuutigisartagaat tamarmik
Amutsivinniit nassuerutigineqareermata, aammalu aaqqiissutissanut Amutsiviit
peqataassallutik nalunaareersimallutik kisiannili aamma paasisimavarput
taamatut aaqqiissutissat aningaasatigut Amutsivinnit periarfissaqartinneqanngitsoq,
taamaattumillu taamatut aaqqiissuteqartoqarnissamut ESU
aqqutigineqartariaqartoq.
Angallatit pineqartut tamarmik
usisinnaassusaannut neqeroorutaasut naapertortuunngillat.
Angallatit pineqartut tamarmik
motorii angallatitaminnut naapertuutinngillat Q-30-llu siuliit 11-it motorii
kukkusumik ikkunneqarsimallutik.
Taamaattumik aalisartut
angallatinik pineqartunik piginnittut aaqqiivigineqarnissaat Siumumiit
inassutigissavarput.
Aalisariutit Q-23-it piginnittut
allanik angallatitaarnissaminnut periarfissinneqassasut imaluunniit piumagunik
angallamminnik talliliisinnaanissaannut allanillu motoorilerlutik. Tassani
pineqarput angallatit 23-it.
Aalisartut Q-30-nik siullernik piginnittut motoorimik nuussinissaminnut
taarsernissaannullu periarfissinneqassasut. Tassani pineqarlutik angallatit
sananeqartut siuliit 11-it.
Manna iluatsillugu Siumumiit Naalakkersuisunut inassutigissavarput
nunatsinni aalisariuteqarnerup imminut akilersinnaanerusunngortinnissaa
aqqutissiuuteqqullugu ullumikkummi angallatit aalisariutitut atorneqartut
amerlavallaartut aalisartunut aningaasatigut artukkiiginnartarmata.
Taamatut oqaaseqarluta siunnersuutip aappassaaneerneqannginnermini
Aningaasaqarnermut Ataatsimiititaliamut ingerlatinneqarnissaa
inassutigissavarput.
Siverth K. Heilmann, Atassutip oqaaseqartua:
Inatsisartuni
ilaasortap Mikael Petersen-ip angalaltinik Q-23-inik aamma Q-30 type 1-inik
piginnittut ataasiakkaat taarsiivigineqarnissamik neqeroorfigineqarnissamik
siunnersuutaanut Atassummiit amaattumik oqaaseqassaagut.
Aallaqqaammut
Atassummiit oqaatigissavarput soorunami angallat suugaluartorluunniit
pingartumillu inuussutissarsiuutitut sanaaq siunertamisut
sannarliorneqarsimaguni angallammik sanasuusunik piginnittuusumullu
aningaasartuutaanngitsumik piaarnerpaamik aaqqiivigineqartariaqartutut
Atassummit isigigatsigu.
Atassummiit
assut ajuusarnatutut isigaarput angallatinik qulaani taaneqartunik
pissarsisimasut angallatit sannarliugaaneri pissutaaneri pissutaallutik
inuussutissarsiutiminnik ingerlatitsiniarnerminni pitsaanngitsunik
atugassaqartitaasimaneri. Taamaattumik Atassut isumaqarpoq suliaq
Inuussutissarsiuutinut Tapersiisarnermut Ataatsimiititaliamut
ingerlatinneqartinnani taarsiivigitinnissamik angallammik pigisaqartut
Amutsiveqarfimmiit taarsiivigineqartariaqartut. Tamannalu piaarnerpaamik
naammassineqarnissaa Atassummiit kaammattuutigaarput.
Taamatut
naatsumik oqaaseqarluta siunnersuuteqartoq Atassummiit tunngaviatigut
taperserlugu oqaaseqarfigaarput.
Johan Lund Olsen, Inuit Ataqatigiit oqaaseqartuat:
Inatsisartuni
ilaasortap Mikael Petersen-ip aalisariuteeqqat piginnittussaminnut
tunniunneqarnerminni ajoquteqareersut aaqqiivigineqarnissaat pillugu
siunnersuutaa Inuit Ataqatigiit paasilluarsinnaavarput taamaattumillu aamma
siunnersuuteqartoq ilalersussamaareersimavarput. Taamaattumik ajornartorsiutit
saqqummiunneqareersut aalisariuteeqqanik piginnittunngorsimasunut
aallaqqaataanniilli pisortanit annertuumik akisussaaqataaffigineqareermata
taamatullu aalisartut namminneq pisuussutigisimanngimmatigit Naalakkersuisut
isumaqatigalugit aammattaaq uagut Q-23-nik kiisalu Q-30-nik siullernik
piginnittunut naammaginartumik Inuussutissarsiuutinut Tapersiisarnermut
Ataatsimiititaliaq aqqutigalugu Inuit Ataqatigiit aaqqeeqqusissaagut.
Taamatut
naatsumik oqaaseqarallaannarluta Inuit Ataqatigiit naggataatigut
kissatigiinnas-savarput inatsisartut Aalisarnermut, Piniarnermut
Nunalerinermullu Ataatsimiititaliaannut suliap sumut killinnerannut atatillugu
aamma kingusinnerusukkut ilisimatitsissuteqartoqarumaartoq.
Tom Ostermann, Kattusseqatigiit oqaaseqartuat:
Inatsisartuni
ilaasortap Mikael Petersen-ip aalisariuteeqqat Q-23-it kiisalu Q-30-it
aaqqiivigineqarnissaasa piviusunngortinneqarnissaanik aaliangiiffigisassatut
siunnersuutaanut tunngatillugu Kattusseqatigiinniit imatut oqaaseqarniarpugut.
Kattusseqatigiinniit
suliap matuma qaqileqqinneqarnera pissusissamisoortutut isigaarput pissutsimmi
piviusut imaapput aalisariuteeqqat Q-nik taaguutillit sananeqarnermikkut
assigiinngitsunik ajoquteqartuarnerat tusarsaajuarpoq. Angallataatilinnullu
inuttanullu tamanna annertuumik aningaasatigut eqquisarpoq. Soorlu
tusagassiuutitigut ilanngutassiakkut ersertoq aalisariuteeqqat Q-21-nik
taaguutillit sannartorneqartut nunatsinnut naleqqussakkatut taaneqartartut
sananeqarnermikkut kiisalu motoreqarnermikut tulluarsimanngillat tamatumalu
kingunerinik angallataatillit kingunerlutsitsisarnerat pisortanit
qassupiinnarpallaamik pisarsimanera ippigaarput. Tamannalu
aaqqiiffigineqarnissaa aqqutissiunneqartariaqartut isigalutigu.
Maannalu
Amutsiveqarfiit namminersortunit tiguarniarneqalernerisa nalaaani angallataatit
Q-nik taaguutillit sananeqarnermikkut kiisalu morimikkut ajoquteqartuarsimasut
nalunaarsorne-qarnissaat inassutigerusupparput. Taamaalilluta aalisartortatta
illersorneqarnissaat qulakkeerniarlugu.
Kialluunniimmi
pisiniap pisiaq sunaluunniit nutaatut pisiariguniuk naatsorsuutigisarpaa
pisiani akornuteqanngitsoq. Tamanna aammattaaq aalisariuteeqqanut Q-nut
taaguutilinnut atuuttariaqarpoq.
Qulaani
pineqartunut uiggiullugu Naalakkersuisunut apeqqutiginiarparput Qeqertarsuup
tunuani kiisalu Uummannap Kommuniani ESU aqqutigalugu angallatitaarniarneq
1998-imi mattunneqarsimanera qaqugu aaqqiiviginiarneqarnersoq.
Taamatut
oqaaseqarluta siunnersuutip imarisaasa tamakkiisumik isumaqatiginera
nalunaarutigaarput, aammalu Inuussutissarsiuutinut Tapersiisarnermut
Ataatsimiititaliamut aappassaannerneqannginnermini sukumiisumik
oqaluuserineqarnissaa inassutigalugu.
Steffen Ulrich-Lynge, Ineqarnermut, Attaveqarnermut Pilersuinermullu Naalakkersuisoq,
Siumut:
Maluginiarpara
Partiit tamarmik Kattusseqatigiillu pineqartut iluarsiivigineqarnissaat
akuerigaat. Tassungalu atatillugu taarsiivigineqarnissaat akueralugu.
Assigiinngitsutigut isumaqartoqarpoq sumut ingerlaqqinnissaa, tassani isumaqarpunga
Ataatsimiititaliap susassaqartut arlaannut aallartiteriarlugu soorunami
Ataatsimiititaliamut aningaasaqarnermut tunngasunik suliaqartartumut
piumaarmat, taanna tassaniitiinnarallarpara.
Saniatigut
Atassutip saqqummiussaanut oqarusuppunga tassani taakkartorneqarmat Amutsiviit
massakkut sinneruttut akiliisariaqartut imaluunniit taakku
taarsiisussaasariaqartut kisiannili taamaattoqarsinnaangilaq, tassami
Amutsiviit allanngortiterinermut atatillugu aningaasanik arlaatigut
peqanngillat 7 mio. sinnerlugit aningaasaateqanngillat tamakkununnga
atorsinnaasaminnik.
Mikael Petersen, Siumut:
Soorunami
siunnersuuteqartutut nuannaarutigaara partiit tamarmik siunnersuummik
tapersersuimmata aammalu aalisartut Q-23-inik aammalu Q-30-inik siullernik type
1-inik piginnittut aaqqiivigineqarnissaat taarsiivigineqarnissaallu
siunertaralugit aaqqissuussinissaq tamakkiisumik taamaalilluni
taperserneqarmat.
Qularutiginngilluinnarpara
aalisartut ataasiakkaat aliasariutinnguanik taakkuninnga piginnittut ullumikkut
nalunnginnakku arlalissuit allaat aalisariutitik aningaasaqarniarnermikkut
nanertuutigilersimagaat, matumani pinngitsooratik
periarfissinneqarsinneqartussanngormata aningaasarsiornernikkut
aningaasaqanikkullu siumut aallariarnissaminnut. Tamanna qujassutiginngitsuunngilara
taamaattumillu Naalakkersuisut qutsavigissavakka taamatut aaqqiinissamik
paasinnillutik tapersiimmata.
Maluginiarpara
siunnersuutip aappassaaneerneqannginnermini Aningaasaqarnermut
Ataatsimiititaliamut ingerlateqqeqquneqartoq tamanna neriuppunga tassani
pitsaasumik suliarineqarumaartoq.
Simon Olsen, Aalisarnermut, Piniarnermut Inuussutissarsiornermullu
Naalakkersuisoq, Siumut:
Qeqertarsuup
tunuani Uummannallu tungaani angallatinik unitsitsigallarsimaneq pillugu.
Tassa
angallatit qanoq ittuusariaqarnerannik misissuisimavugut ukiullu qaangiuttup
naalluinnalernerani aamma Amutsiviit pingaartumik maani Qaqortumi, Islandimi,
Savalimmiuni, Norgemi Danmarkimilu assigiinngitsut ataatsimeeqatigisimavagut
taamaasilluta angallatit pitsaanerusut aammalu aalisarnermut pingaartumik
qaleralinniarnermut naleqqunnerusunik nassaarsiorluta taanna ingerlasoq
naammassingajalluinnalerpoq, kisianni oqarsinnaanngilanga qaqugorpiaq taanna
ammaassinissaq pissanersoq ilaatigut angallatit eqqartorneqartut aatsaannguaq Q-23-ikkut
mikinerillu aalisariutissatut ungasilialaarsinnaasutut
ajornakusoortorujussuarmik inissisimapput. Taamaammallu allatut ajornartumik
miserratigineqassanngilaq umiarsuit atorfissaqartinneqartarmata,
umiatsiaaqqallu ammaannartut amerlavallaartut maannakkumut
pigineqalersimammata. Ullumikkut allatut ajornartumik angallatit avammut
niuernernitsinnut ima sukangatigilersimapput allaat 30 fodsiminngaanniit qummut
tunisassiassanik aalisassagunik uffarfeqarlutik allaat
ingerlasussanngortitaalermata tamannalu EU-p ataani ullumikkut
atuutilereersimavoq. Taamaammat uagut maani kinguaattoorumanata aammalu
taamungaannaq iliorumanata Naalakkersuisut misissuilluta ingerlatsivugut
taannalu neriuppunga piaakannersumik inaarneqassasoq.
Siverth K. Heilmann, Atassutip oqaaseqartua:
Soorunami
siunnersuuteqartumut oqaatigereerparput tunngaviatigut taperserlugu aamma uuma
oqaaseqaasiap allannnerani ullap tungaani kingusissukkut suliarigakku
nassuerutigissavara ippassaq napparsimanera pissutigalugu misissuilluarnanga
tuaviinnaq allassimagakku. Kisianni una pingaarnerpaavoq oqariartuutigisarput
soorunami angallat sunaluunniit sannarliugaq sananeqarfigisamininngaanniit
aamma taamanikkullu naammassineqarsimasariaqaraluarpoq taanna
oqaatiginiarsaraara. Ajuusaarutigaara erseqqarluttumik uani oqaaseqaasiornera
taanartaa minilaarsimagakku. Kisianni siunnersuuteqartup ujartuinera
piaartumillu aaqqiissuteqarto-qarnissaa Atassummiit tapersingaarparput.
Oqaluuserisaq
naammassivoq.