Oqaluuserisassani immikkoortoq 20-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 16. februar
2000 nal. 16.15
Ataatsimiinnermik aqutsisoq: Augusta Salling, siulittaasoqarfimmi
ilaasortaq.
Asii Chemnitz Narup, Inuit Ataqatigiit:
Aqutsisup aamma oqaluuserisassanngortitama qulequtaa
atuarluarpallaaqqimmagu toqqaannartumik tunngavilersuutinnut ingerlaqqissuunga.
Siusinnerusukkut Inatsisartut meeqqanik inuusuttunillu ikiorsiissarneq
pillugu peqqussutaani aalajangersagaqarsimavoq ulloq unnuarlu angerlasimaffinni
pisortanik piginnaatitaaffiliisumik meeqqap angerlartinnissaa pillugu
isumaqataangikkunik tamatuma saqqummiunnissaanik.
Isumaginninnermik Ataatsimiititaliap børnehjemmillu pisortaata akornanni
angerlartitsinissaq pillugu isumaqatigiinngittoqartillugu peqqussutitigut
illersugaasumik pisortaq piginnaatitaaffeqarsimavoq, isumaqatigiinngissut
Isumaginninnermut Pisortaqarfimmut saqqummiutissallugu, taamaaliornermilu
aalajangiinissaq kinguartinneqarallartarsimavoq. Aalajangersagaq taanna
1988-imi atorunnaarsinneqarsimavoq.
Ullutsinni suli ima pisoqarsinnaasarpoq, Isumaginninnermut
Ataatsimiititaliaq meeqqap inuusuttulluunniit børnehjemmimit angerlartinnissaa
aalajangertarlugu piffissami meeqqap ineriartornerata ilorraap tungaanut
ingerlaleruttorfiani aammalu ulloq unnuarlu angerlarsimaffimmiinnerani
iluaqutissartaasa malunniutileruttorfiisa nalaanni, siusippallaamik
angerlartitsinermut oqaatigisariaqartumik.
Angerlartitsinissamik piffissamik naliliinerlunneq ima
kinguneqarsinnaasarpoq allaat oqartariaqarluni meeqqap børnehjemmimiissimarata
iluaqutissartaralui sapangiinnarneqarlutik. Ukioq qaangiuttoq meeqqat
atugarisaanik inatsisitigullu illersugaannerannik oqalliffiuvoq.
Isumaqatigiissutigineqarpoq meeqqat peroriartornerminni ineriartornerminnilu
pitsaanerpaamik atugassaqartittariaqartut, ullumikkoorniillu suli
pitsaanerusunik atugassaqartinneqartariaqartut. Taamatuttaaq
isumaqatigiittoqarpoq meerertavut sutigut tamatigut illersussagigut,
tamaattumik immitsunnut aperisariaqarpugut pissusissamisuunnginnersoq apeqqummi
meeqqamik angerlartitsiniarnermi meeqqallu inuuneranik taama
sunniuteqarfiutigisumi meeraq namminerisaminik
illersuisortaartinneqassannginnersoq, imaluunniit meeqqap inatsisileritua
meeqqap soqutigisaanik pisariaqartitaanillu saqqummiussissussamik
sorsuutiginnittussamillu. Suliassamik tamatuminnga imissalugu
qaninnerpaajullunilu tulluarnerpaajuvoq ulloq unnuarlu paaqinnitarfimmi
pisortaq.
Tamaattumik siunnersuutigaara kingumut aalajangersagaqaqqilissasoq ulloq
unnuarlu angerlasimaffinni pisortanik meeqqat angerlartinneqarnerinut
Socialudvalgit aalajangigaat pillugit maalaaruteqarlutik nangitassanngortitsisinnaanermik
pisinnaatitaaffileeqqittumik.
Siornatigutut maalaaruteqarluni nangitassanngortitsisoqarpat, suliap
unitsinneqarallarneranik tamanna kinguneqartariaqarpoq, taamalu pisoqartillugu meeraq
isumaqatigiinngitsoqarneranut akuliutsinneqartassanngilaq, inersimasullu
assortuunneranni arsatut akoqattaarneqassanani.
Maalaaruteqarluni nangitassanngortitsisinnaaneq
ingerlatseqqinneqartariaqarpoq Isumaginninnermut Maalaaruteqartarfimmut, siornatigutut
Isumaginninnermut Pisortaqarfimmut pinnani, allattoqarfiummammi, taavalu
nangitssanngortitsinissamut taanna tulluarpallaarnani.
Taama oqaaseqarlunga siunnersuut Inatsisartunut
oqaluuserisassanngortippara, neriuutigalugu ilassilluarneqarumaartoq.
Jørgen Wæver Johansen, Isumaginninnermut
Suliffeqarnermullu Naalakkersuisoq:
Inatsisartunut ilaasortaq Asii Chemnitz Narup siunnersuuteqarpoq
Namminersornerullutik Oqartussat meeqqanut inuusuttuaqqanullu ulloq unnuarlu
angerlarsimaffiini pisortat kingumut maalaaruteqarlutik suliamik
nangittassanngortitsisinnaasaleqqissasut meeqqap inuusuttulluunniit
angerlartinneqarnissaa pineqartillugu.
Siunnersuut Inatsisartunut aalajangiiffigisassanngorlugu Inatsisartut
siulittaasoqarfiannit suliassanngortinneqarpoq.
Inatsisartunut ilaasortap Asii Chemnitz Narup-ip siunnersuumminut
tunngavilersuutigaa suli naammattuugassaasartoq isumaginninnermut
ataatsimiititaliap/kommunalbestyrelsip meeqqap inuusuttuaqqalluunniit ulloq
unnuarlu angerlarsimaffimmi inissinneqarsimasup angerlartinneqarnissaanik
aalajangiisarnerat, meeraq ingerlallualeraluartoq aammalu paaqqinniffimmi
pisortaq akerliugaluartoq.
Aalajangersakkat siusinnerusukkut atuuttut naapertorlugit
paaqqinniffinni pisortat Isumaginninnermut Pisortaqarfimmut naammagittaalliuteqarsinnaasimagaluarput,
siunnersuutigineqarporlu naammagittaalliuuteqarnissamut periarfissaq taamaattoq
ikkuteqqinneqassasoq, imaalilluguli naammagittaalliuut Isumaginninnermi
Naammagittaalliuteqartarfimmut ingerlatinneqartussan-ngorlugu Isumaginninnermut
Suliffeqarnermullu Pisortaqarfimmut pinnagu.
Inatsisartunut ilaasortap Asii Chemnitz Narupip siunnersuummini
ilannguppaa paaqqinniffimmi pisortap meeqqap "inatsisilerituuatut"
toqqarneqartarnissaa pissusissamisuussasoq, tassa meeqqat soqutigisaanik
pisariaqartitaanillu isumaginnittussatut.
Meeqqanik inuusuttunillu ikiorsiisarneq pillugu Inatsisartut
peqqussutaat atuuttoq januarip aallaqqaataani 1993 atuutilerpoq. Tamatumalu
peqatigisaanik Inatsisartut peqqussutaat nr. 12, 1. november 1982-imeersoq,
meeqqanik inuusuttunillu ikiorsiisarneq pillugu peqqussutikkut nr. 4, 28. april
1988-imeersukkut allanngortinneqartoq, atorunnaarsinneqarpoq. Inatsisartut
peqqussutaata 1982-imeersup atuutilersinneqarnera ilutigalugu meeqqanik
inuusuttunillu isumaginninneq pillugu landsrådit ileqqoreqqussaat 19. februar
1975-imeersoq, kingusinnerusukkut allan-nguutitaqartoq, aamma atorunnaarpoq.
Landsrådit ileqqoreqqusaani atorunnaartumi angerlartitsinermut
atatillugu naammagittaalliornissamut aalajangersakkanik peqaraluarpoq.
Tamannalu immaqa puigorneqarluni ilanngunneqarsimanngilaq Inatsisartut
peqqussutaat 1982-imeersoq suliarineqarmat.
Naammagittaalliornissamut periarfissaq Inatsisartut peqqussutaannut
1988-imeersumut ilan-nguteqqinneqarpoq, § 20 imm. 3-imilu ima allassimasoqarpoq:
Issuarpara "Meeqqat inuusuttullu Kalaallit Nunaanni ulloq unnuarlu
paaqqinniffinni inissinneqarsimasut angerlartinneqarnissaannik
aalajangiinnginnermi paaqqinniffik oqaaseqartinneqaqqaassaaq. Isumaginninnermi
ataatsimiititap paaqqinniuffiullu akornanni angerlartitsinissaq pillugu
isumaqatigiinngittoqartillugu suliassaq Isumaginninnermi Pisortaqarfimmut
aalajangiiffigisassanngorlugu saqqummiunneqassaaq. Taamatut saqqummiussineq
suliassap unitsinneqarallarneranik kinguneqassaaq." Issuaaneq naavoq.
Peqqussutip 1988-imeersup saqqummiussissutitaani, peqqussummullu
nassuiaatini erserpoq naammagittaalliornissamut periarfissap
ilannguteqqinneqartariaqarnera ulloq unnuarlu angerlarsimaffimmi katsorsaanerup
ingerlareersup piffissami meeqqamut inuusuttumullu naleqqutin-ngitsumi
unitsinneqartariaqannginneranik pissuteqartoq, " kiisalu aamma
"Siunertaq pingaarneq tassaavoq katsorsaaneq ingerlanneqalereersimasoq
piffissami meeqqamut inuusuttuaqqamulluunniit naleqqutinngitsumik
unitsinneqannginnissaa. Taamaammat siunnersuutigineqarpoq Isumaginninnermut
Pisortaqarfimmut naammagittaalliuteqarnermi suliarineqaleraluartut
unitsinneqarnerannik kinguneqartassasoq." Issuaaneq naavoq.
Naammagittaalliornissamut periarfissaq peerneqaqqippoq peqqussutip
atuuttup 1. januar 1993 atuutilersinneratigut. Peqqussummut nassuiaammi
allassimavoq angerlartitsinermut atatillugu Isumaginninnermut Pisortaqarfimmut
naammagittaalliuteqarsinnaaneq pillugu aalajangersagaq peerneqarsimasoq,
issuarpara "isumaginninnermut ataatsimiititaliap meeqqanut
inuusuttuaqqanullu pisussaaffiisa illuartitsinerattut aalajangersagaq
pissuseqarmat." Issuaaneq naavoq.
Pisarsimasut misissuataaraanni takuneqarsinnaavoq ukiut ingerlaneranni
Inatsisartut assigiin-ngitsunik isumaqartarsimasut suut naammagittaalliutigineqarsinnaassanersut
suullu taama pineqartassannginnersut. Taamaammat naammagittaalliuteqarnissamut
periarfissanik siunnersuut nutaaq isumaliorluarnermik ilaqartariaqarpoq.
Meeqqap/inuusuttuaqqap ulloq unnuarlu paaqqinniffimmiittussanngorlugu inissinneqarnera
ikiorsiiniutaavoq isumaginninnermut ataatsimiititaliat/kommunalbestyrelsit
aalajangertagaat. Aammattaarlu isumaginninnermut
ataatsimiititaliat/kommunalbestyrelsit tassaapput meeqqap imaluunniit
inuusuttuaqqap angerlartinneqarnissaanik aalajangiisartut. Taamaattumik
isumaginninnermut ataatsimiititaliat/kommunalbestyrelsit aalajangiinerminni
pitsaanerpaanik tunngaveqarnissaat qularnaassallugu aamma pingaaruteqarpoq.
Ajoraluartumik isumaginninnermut ataatsimiititaliat/kommunalbestyrelsit
meeraq/inuusuttuaq-qap angerlartinneqarnissaanik aalajangertarnerat
naammattuugassaasarpoq naak ulloq unnuarlu paaqqinniffimmi pisortaasoq
isumaqaraluartoq meeraq angerlartinneqarnissaminut suli piariin-ngitsoq. Qanoq
akulikitsigisumik taama pisoqartarnersoq misissorneqarsimanngilaq,
misissorneqarsimanngilarlu sooq taama aalajangiisoqartarnersoq naak
paaqqinniffiup pisortaa allatut isummeraluartoq.
Taamaattorli meeraq/inuusuttuaraq pillugu aalajangiinerit sapinngisamik
pitsaanerpaamik tunngavissaqarluni pisarnissaat isumagininnermut
ataatsimiititaliat/kommunalbestyrelsit aallaavigisariaqarpaat.
Angerlartitsinissamik aalajangertoqannginnerani isumaginninnermut
ataatsimiititaliat / kommunalbestyrelsit pitsaasunik
tunngavissaqartussanngorlugit aalajangersagaliortoqarnissaa
eqqarsaatigineqarsinnaavoq, soorlu meeqqap angerlarsimaffia qanoq
iliuuseqarfigalugu iliuusissanillu pilersaarutit sukumiisut suliaralugit.
Aammattaaq tikkuarneqartariaqarpoq nunap immikkoortuini allaffiit
nakkutilliisutut pisussaaffeqarnermikkut meeqqap /inuusuttuaqqap
siusippallaammik angerlartinneqannginnissaa isumaginiarsinnaammassuk.
Isumaginninnermut ataatsimiititaliat / kommunalbestyrelsit
aalajangiinerminni tunngavissaasa pitsanngorsarnissaat Naalakkersuisunit
pingaartutut isigineqarpoq taamaalilluni meeqqat/inuu-suttuaqqat ataasiakkaat
pillugit aalajangiinermini meeqqamut pitsaanerpaasussaq taakku
aallaavigisarniassammassuk. Isumaginninnermut ataatsimiititaliat
piginnaassusiisa apeqquserneqarnissaat naleqqutinngilaq, aamma meeqqap qaqugukkut
sumut inissinneqarnissaa pillugu aalajangiiniarnermi paaqqinniffimmi pisortap
isumaginninnermut ataatsimiititalianit piginnaaneqarnerusutut isigineqarnissaa
naleqqutinngilaq. Akerlianilli isumaginninnermut ataatsimiititaliat /
kommunalbestyrelsit aalajangiiniarnerini tunngavigisaannut paaqqinniffiup
pisortaata isumaata ilan-ngunneqartarnissaa pingaaruteqarpoq.
Inatsisartunut ilaasortap Asii Chemnitz Narupip siunnersuutaanut
attuumassuteqartoq alla tassaavoq isumaginninnermut ataatsimiititaliat/kommunalbestyrelsit
akuersisimatinnagit meeraq/inuusuttuaraq ulloq unnuarlu paaqqinniffimmut
inissinneqarpat kommunit aningaasaataat kommunimi oqartussaasuunngitsunit
atugassanngortinneqartarnerat.
Ullumikkut kommunit meeqqanik inuusuttuaqqanillu ulloq unnuarlu paaqqinniffinnut
tamakkiisumik aningaasalersuisuupput, ullumikkullu aningaasanut inatsimmi
tunngavissaqartoqanngilaq ulloq unnuarlu paaqqinniffimmut inissiinermi
aningaasartuutit akilerneqarnissaannut.
Inatsisartunut ilaasortaq Asii Chemnitz Narup naammagittaalliornissamut
periarfissiisoqaqqullugu siunnersuummini tunngavilersuutigai meeqqat atugaat
pillugit oqallinneq, meeqqat inatsisitigut illersorsugaanerat kiisalu
peroriartornerminni inerikkiartornerminnilu atugaasa pitsan-ngorsarneqarnissaat
kiisalu illersorneqarnissaat.
Meeqqat peroriartornerminni inerikkiartornerminnilu atugassaasa
pitsanngorsarneqarnissaat illersorneqarnissaallu pillugu naalakkersuisut
siunnersuuteqartumut isumaqataapput. Aammattaaq isumaginninnermut
ataatsimiititaliat/kommunalbestyrelsit paaqqinniffiullu pisortaa
isumaqatigiinngikkaangata naammagittaalliornissamut periarfissat
pilersinneqarnissaanni siunertarineqartut ajunngitsut aamma naalakkersuisut
isumaqatigaat.
Siunnersuutigineqartutut naammagittaalliornissamut periarfissat ikkuteqqinneqarnissaannik
pipallattumik aalajangiinissamut taarsiullugu siunnersuummut pissutaasut
nalilersoqqissaarneqarnissaat siunnersuutigineqassaaq. Aamma
siunnersuutigineqassaaq isumaginninnermut
ataatsimiititaliat/kommunalbestyrelsit aalajangernerminni ullumikkornit
pitsaanerujussuarnik tunngavissiorneqarnissaat oqallisigineqassasoq
taamaaliornikkut meeqqap paaqqinnittarfimmiinnermini iluaqutissarsinissaa
qularnaarneqarpat kiisalu meeqqap atugaasa allat naammaginartumik
aaqqinneqarpata aatsaat meeraq imaluunniit inuusuttuaraq
angerlartinneqarsinnaasunngorlugu.
Naggataatigullu malugeqquneqassaaq meeqqanut inuusuttunullu
tunngasutigut iluarsaaqqinneq ingerlanneqangajalermat, tassani assersuutigalugu
meeqqanik inuusuttuaqqanillu ikiorsiisarneq pillugu Inatsisartut peqqussutaat,
kiisalu nalunaarutit peqqussummik tunngaveqartut annertuumik
iluarsartuuteqqinneqarnissaat naatsorsuutigineqarpoq. Isumaliutersuutit
taaneqareersut sulinermut tassunga ilaasariaqarput.
Hans Enoksen, Siumup oqaasertua:
Inatsisartunut ilaasortaq Asii
Chemnitz Narup Inuit Ataqatigiit siunnersuuteqarpoq Namminersornerullutik
Oqartussat ingerlataanni meeqqat inuusuttullu ulloq unnuarlu angerlarsimaffiini
najugaqartut angerlartinneqarnissat pillugit angerlarsimaffinni pisortaasut
naammagittaalliorfigisinnaasaannik pilersitsinissamik siunnersuuteqarluni,
taannalu imaak Siumuminngaanniit oqaaseqarfigissavarput:
Siumumi pingaartilluinnarparput
meeqqat inuusuttullu isumannaatsumik atugaqarlutik ineriartornissaat
peroriartornissaallu, tassami akuersaarneqarsinnaanngilaq meeqqat inuusuttullu
ilaatigut illersorneqarsinnaanngitsumik atugassaqartitaallutik
peroriartornerminni atugaqartinneqartassappata, tamatta anguniartariaqarparput
meeqqat inuusuttullu sapinngisamik pitsaasumik atugaqarnissaat qulakkiissallugu.
Meeqqat inuusuttullu
angerlarsimaffinni ilaatigut toqqissisimananngitsumik inuulersimasut
pitsaanerpaamik atugaqarnissaat qulakkeerniarlugu qularinngilara piffinni
inunnik isuma-ginninnermi ataatsimiititaliat, kommunalbestyrelsillu inunnut
pineqartunut pitsaanerpaamik atugassaqartitsiniarlutik iliuuseqartarsimassasut,
kisiannili taamatut aaqqissuteqarniartarnerit inuiaqatigiinnut aningaasatigut
nukitsigullu akisussaqaat tamakkulu pinngitsoorniarnissaat
suleqatigiilluarnikkut aaqqinniartariaqarput.
Ukiut makku ilaatigut
ileqqussaannartut isigineqarleriartorpoq ajornartorsiutit aaqqinniarnerini
pisortat tamatigut isumaginnittussatut inissinneqartarnerat, akisussaaffik annerpaaq
anga-joqqaat pisussaaffiat ilaatigut sumiginnarneqarpallaartutut
isigisariaqalerpoq, tassami ilaatigut angajoqqaat meeqqanik arsaarneqartut
immaqa periarfissinngivillugit aaqqiisoqartarpoq, taakkulu tamarmik
sakkortuumik tarnimikkut eqqorneqartarput ilaatigut qangeruminaatsumik tassami
asanninneq taarserneqarsinnaanngilaq pitsaasumik atugaqalernikkut, taamaammat
ataatsimut aaqqiiniarneq pitsaasoq anguneqassappat angajoqqaat pisortallu
ataatsimoorluinnarlutik aaqqiiniartarnissaat siullerpaamik aallaavigineqartassasoq
Siumumiit inassutigaarput.
Aamma oqaatigissavarput
assortoruminaammat immaqa ilaatigut siusippallaartumik anger-larsimaffik suli
piariinngitsoq angerlartitsisoqartarluni, taamatut aaqqiiniartarnerni aamma
ilaatigut "aningaasat naalagarineqartartut qularnanngilaq", tassami
ulloq unnuarlu angerlarsimaffinni ineqartitsisarneq imaak akisutigaaq ilaatigut
kommuunip aningaasaqarniarnerinut annertuumik sunniuteqartarluni, tamakkulu
pinngitsoorniarlugit akit atortinneqartartut aamma ilanngullugit
nalilersorneqarnissaat Siumumiit kissaatigaarput.
Ulloq unnuarlu
angerlarsimaffinni pisortaasut naammagittaalliorfigisinnaasaannik
pilersitsisoqarnissaanik siunnersuuteqartup tunngavilersuuteqarnera
tunngaviatigut Siumumiit isumaqatigaarput, aammalu pingaartutut isigalugu
meeqqat inuusuttunillu ikiorsiisarnermi iluarsaaqqinnissamut ilanngullugu
nalilersorluarneqassappat, tassami iluarsaaqqinnissami peqqussutit
nalunaarutillu misissorluarneqartussaapput Siumumiillu inassutigaarput
siunnersuut taakkununnga tapiliullugu nalilersorluarneqassasoq, tassungalu
ilanngullugu kommuunit aningaasatigut nammaqataanerat
nalilersorneqartariaqarpoq, peqqussutit, nalunaarutit, inatsisillu
sunniuteqarluartumik tamanut atuutsinneqarnissaat qularnaartariaqarmat.
Jakob Sivertsen, Atassutip oqaaseqartua:
Namminersornerullutik Oqartussat
meeqqanut inuussuttuaqqanullu ulloq unnuarlu angerlarsimaffinni pisortat
kingumut maalaaruteqarlutik suliamik nangitassanngortitseqqissinnaanissaannik
Asii Chemnitz Narup saqqummiussaa Atassummiit imatut oqaaseqarfiginiarparput.
Paaqqinniffinni ulluinnarni
meeqqanik paaqqutarinillutik malinnaaffiginnittut meeqqanik inuusuttuaqqanillu
qanimut ulluinnarni malinnaasut, tassa sullissisuusut pissutsinillu
ilisimaarinnittut meeqqat inuusuttuaqqallu angerlartinneqartarnissaannik
aalajangiinngikkallarnermi isumaqatigineqartarnissaat aAtassut-mui assut
pingaartipparput.
Atassut-mit erseqqissassavarput
meeqqat inuusuttuaqqallu ulloq unnuarlu
paaqqinniffimmiittussanngortinneqartarnerat angerlarsimaffimmi ilaagitigut
paarinerlunneqartarnermik tunngaveqartarmat, tamannalu Nunatsinni
ajuusaarnartumik atugaasorujussuanngorsimavoq kommunenut aningaasarpassuarnik
naleqartartoq.
Taamaattumik meeqqanik
inuusuttuaqqanillu ulloq unnuarlu angerlarsimafinnut inissiisarnerit
nalilersortuartarnissaat pilersaarusiorluartarnissaallu pingaartorujussuuvoq.
Aamma eqqaamassavarput meeqqat
inuusuttuaqallu ulloq unnuarlu paaqqinniffimmiittussan-ngorlugit
inissinneqartarnerat isumannaallisaatitut ikiorsiiniutaammat ullumikkut
pinngitsoorneqarsinnaajunnaarsimasoq.
Tamaammat Atassut-miit meeqqat
inuusuttuaqqallu ulloq unnuarlu angerlarsimaffinni inissinneqarsimasut
aqqutissat eqqortut meeqqat inuusuttuaqqallu angerlartinneqartarnissaannik
isumannaarisut aqqutigalugit ingerlanneqartarnissaat assut pingaartipparput.
Taamatut oqaaseqarluta
siunnersuut naalakkersuisumit sukumiisumik akineqarnera qujarup-parput kiisalu
peqqussutit iluarsartuuteqqinnissaannut siunnersuutip
nalilersoqqinneqarnissaanik nalakkersuisut akissuteqaataat aamma
isumaqataaffigaarput suleqataaffigissallugulu
Lars Sørensen, Inuit Ataqatigiit oqaaseqartuat:
Inatsisartunut ilaasortaq Asii
Chemnitz Narup siunnersuuteqarpoq Namminersornerullutik Oqartussat meeqqanut
inuusuttuaqqanullu ulloq unnuarlu angerlarsimaffiini pisortaasunut kingumut
maalaaruteqarlutik suliamik nangitassanngortitsisinnaasaleqqissasut meeqqap
inuusuttulluunniit angerlartinneqarnissaa pineqartillugu.
Inuit Ataqatigiit siullermik
oqaatigerussupparput nuannaarutigigatisugu maluginiarlugulu, Nunatsinni
kommuunit amerliortuinnartut ukiuni kingullerni meeqqat inuusuttuaqqalu
atugarisaat pitsanngortinniarlugit kommunalbestyrelsitik aqqutigalugit
siunissami anguniagassanik aalajangersaaneq ingerlatilersimammassuk, tamanna
suliniutaavoq kusanartoq kommuuninit tamanit peqataaffigineqartariaqartoq.
Ukioq 2000 tassaavoq meeqqat ukiuat taamaattumik ukiut tusindellit nutaat
aallartittut atortariaqarpagut meeqqat illersorneqarnissaannut
pisinnaatittaaffiinullu ersarissaanissatsinnut.
Taamaattumik Inuit Ataqatigiit
pissusissamisoortutut isigaarput meeqqat angerlarsimaffiup avataanut
inissinneqarsimasut illersorniarlugit, angerlartitsiniarnermi ulloq unnuarlu
angerlarsimaffimmi pisortaasut, kommuunillu Isumaginninnermut
Ataatsimiititaliaat isumaqatigiissinaan-ngitsillugit maalaartarfimmik
pilersitsisoqarnissaanut
Isumaginninermut
Iluarsaaqqinnermut Ataatsimiititaliarsuarmi suleqataanitsinni ajornartorsiut
taannarpiaq arlalitsigut saqqumiunneqartarpoq, pingaartumik kommuunit
ataasiakkat aningaasatigut ajornartorsiorfiusuniit inissinneqartartut
eqqarsaatigalugit, meeqqap katsorsarneqarnissaa pinnagu kisiannili kommuunit
aningaasaqassuia pinerullugu, angerlartitsisoqartarsimammat.
Taamaalilluni tassanngaanaq
angerlartitsinerup kingunerisarpaa meeqqap inissikkallarneqarsimasup ilorraap
tungaanut ingerlaleraluarneranik annaasaqarnermik, amerlasuutigut taamatut
pipallunnerup, tassa angerlartitsigasuarnerup kingunerisarpaa katsorsaanerup
aallaqqaataaninngaanniit suliaralugu aallarteqqittarneranik. Sipaarniaannarluni
eqqarsartumut tamanna annernarninngorluni tuttarluni tamatta nalunngilarput.
Inuit Ataqatigiinniit
nuannaarutigaarput siunnersuummut Naalakkersuisut isumaqataammata,
naammagittaalliornissamut periarfissat ikkuteqqinnissaannut, Inuit Ataqatigiit
aamma Naalakkersuisut isumaqatigaagut suliassaq manna pipallattumik
suliarineqassanngitsoq.
Naggataatigut Inuit
Ataqatigiinnit Naalakkersuisunut kaammatuutigissavarput meeqqat
inuusuttuaqqallu atugarisaat pillugit suliniutit Isumaginninnermut
Iluarsaaqqinnermut Ataatsimiititaliarsuup isumaliutissiisutaatigut 1997-imi
akuerineqarsimasut meeqqat ukiuat 2000 naatinnagu piviusunngortitsiniarnissaq
siunertaralugu Inatsisartut Isumaginninnermut Ataatsimiititaliaat peqatigalugu
suliuniuteqqaqqullugit.
Anthon Frederiksen, Kattusseqatigiit oqaaseqartuat:
Siullermik allaffeqarfimmi
ajornartorsiutit pissutaallutik, tassa ullaap tungaani nutserinermut tunngasut
pissutaallutik oqaaseqaatissaq nutserlugu suli naammassineqanngimmat
agguaanneqanngikkallarpoq, kisianni piareeriarpat agguaatissavaat.
Meeqqanut inuusuttuaqqanullu
ulloq unnuarlu angerlarsimaffinni meeqqat inuusuttuaqqallu angerlarsimaffinni
pineqartuniit angerlartinneqarnissaat pineqartillugu, angerlarsimaffinni
pisortat suliamik nangitassanngortitsisinnaaleqqissinnaanerannik Inatsisartunut
ilaasortap Asii Chemnitz Narup-ip siunnersuutaa Kattuseqatigiinniit imaattumik
oqaaseqarfigissavarput:
Siullermik oqaatigissavarput
Inatsisartunut ilaasortap Asii Chemnitz Narup-ip siunnersuutaa paasilluarlugu
tunngaviatigut tapersorsornartikkatsigu, minnerunngitsumik meeqqanut
inuusuttuaqqanullu ulloq unnuarlu angerlarsimaffinni pisortat meeqqat
inuusuttuaqqallu pineqartut pillugit angerlarsimaffiviinut
angerlartinneqarnissaat pineqartillugu pisortaasut nalileeqqataasinnaanerat meeqqap
inuusuttuaqqalluunniit aamma timikkut anersaakkullu isumannaatsumik
ingerlariaqqinnissaanut pingaaruteqartutut Kattusseqatigiinniit isigigatsigu.
Meeqqanik inuusuttunillu
ikiorsiissarneq pillugu peqqussuterpaalussuit ilaatigut atorunnaarsinneqarsimasut
aammalu ukiut ingerlaneranni allanngortitserneqartarsimasut pillugit
Naalakkersuisup akissuteqarnermini eqqartorpai. Aamma oqaatigineqarpoq
Landsrådit ileqqoreqqusaani atorunnaartumik angerlatitsinermut atatillugu
naamaagittaalliortarnermut aalajangersakkanik peqaraluarsimasoq, kisiannili
1982-imi Inatsisartut peqqussutaat suliarineqarmat aalajangersakkat pineqartut
immaqa ilannguneqarnissaat puigorneqarsimasut. Ila meeqqat inuusuttuaqqallu
pillugit sulineq taama ingerlanneqassappat pakatsinarluni kiinaannguusaarnassaqaaq.
Inunnik Isumaginninnermut
Ataatsimiititaliarsuup Inatsisartunut qinersiviup siuliani atuuttumut
suliaminik saqqummiinermini ilaatigut meeqqat inuusuttullu ajornatorsiutinik
eqqugaasut sammisassaqartinniarlugit siunertaqarluartumillu suliniutit
aqqutigalugit imminnut ikiorsinnaasunngortinniarlugit ikiorneqartarnerat
politikkikkut anguniagassanut ilanngunneqarpoq, aamma meeqqat angajoqqaavisalu
akornanni ajornartorsiutaalersartut aaqqinniarlugit sapinngisaq tamaat atorlugu
peqaatitsinissaq aqqutigalugi, inuillu nammineersinnaassuseqarnerat
angusinnaaqqullugu.
Meeqqat inuusuttullu
paaqqinniffinnut inissineqarsimasut ulluinnarni ingerlatat aqqutigalugit
suleqatigiinnermik akisussaaffeqarnermillu ilinniartinneqassapput, ilaqutariit
imminnut pilersorsinnaanngippata, imaluunnit meeqqat isumassorneqarnerat
perorsarneqarnerallu angajoqqaat naammassisinnaanngippassuk inuiaqatigiit
uummarissumik akuelerutsinneqassasut ilaatigut ilanngullugit eqqartorneqarlutik
oqaatigineqarput, tassa Ataatsimiititaliarsuup sulineranut atatillugu.
Tassami aamma
eqqaasitsisutigisariaqarpoq meeqqat pillugit inatsisikkut ilaatigut
aalajangersarneqarmat meeqqap angajoqqaavi marluullutik pilersorneqarnissaanut
sutigut tamatigut, aamma timikkut tarnikkullu isumassorneqarnissaanut,
pisussaaffeqartut.
Kattusseqatigiinniit
qularutiginngilarpout angajoqqaarpassuit pisussaaffitik akisussaaffitillu
ilisimagaat, kisianni angajoqqaat amerlavallaarput meeqqaminnik
sumiginnaasartut, taakkulu inuiaqatigiinnut aamma angajoqqaanut meeqqanullu
pineqartunut namminernut annertuumik ajornartorsiutinik pilersitsisarnerat
ersarissumik paasissutissiissutigineqarnissaa pisariqartut isigaarput.
Taamaattumik ajornartorsiutit sapinngisamik minnerpaaffissaaniitinneqarnissaat
anguniarlugu angerlarsimaffinni, aamma pisortaasut akulerusinnaannerat
ilanngullugu sulissutigisariaqartoq Kattusseqatigiinniit isumaqarpugut, aammalu
suliap ingerlanneqarnerani susassaqartut, Kommuneqarfiillu Kattuffiat
suleqatigalugit ajornartorsiutip qaangerneqarnissaat sulissutigineqartariaqartoq
inassutigerusullutigu.
Naggataatigut
eqqaassitsissutigissavarput meeqqat inuusuttuaqqallu ulloq unnuarlu
paaqqinnittarfinni inissiisarnerni agguaqatigiissillugu inissamut ataatsimut
ukiumut 300.000-ingajannik, tamaappaa, naleqarsimammat, tassa 1997-imi
kisitsisit saqqummiunneqartut tunngavigalugit. Aamma isumaqarpugut 18-inik
angullugit ukioqalersimasut angerlarsimaffinilu pineqartuni
najugaqaannarsinnaanngitsut ilanngullugit isumagineqarnissaat
eqqarsaatigeqquarput, tassami aamma taakkua silaannarmut
inissinneqarsinnaanngimmata.
Naggaterpiaatigullu ilanngullugu
eqqaasitsissutigerupparput kommunit ilaanni, soorlu isorliunerusuni aammalu
kommunini aningaasaqarniarnikkut ajornartorsiuteqartuni ajornartorsiutit immikkut
ittumik qanoq iliuuseqarfigineqarsinnaanerat ilanngullugu eqqarsaatigeqqullugu,
tassami inissiisarneq kommuninut aamma aningaasarpassuarnik naleqartarmat.
Taamatut oqaaseqarluta
siunnersuut tamakkiisumik taperserlugu Isumaginninnermut Ataatsimiititaliami
sukumiisumik suliarineqarnissaa inassutigaarput.
Godmand Rasmussen, Atassut:
Uanga
siunnersuuteqartup tunngavilersuutai aamma paasilluarpakka aamma partiip
oqariartuutaat, kisianni naalakkersuisut akissutai arlalitsigut aamma
assorujussuaq isumaqatiginartippakka. Unali eqqaasitsissutiginiarpara ukiarmi
Atassumminngaaniit meeqqat pillugit oqallinnitsinni erseqqilluinnartumik
oqaaseq atorsimavarput, inunnik isumaginninnermi atorfeqartitavut kommuneni
ajorluinnaqqeqqissaartumik inissisimatippavut, tamatta taanna
kommunalbestyrelse-mi ilaasortat miserratiginagu nassuerutigisariaqarparput.
Pissutaasoq aana inunnik isumaginninnermi sullissisut akissarsiaat
samanerujussuarmiipput, aammalu sinneruttutuannguit kommunemi sullissuíssigut
taakkorpiaapput allaffimmiutut atukkavut.
Misilittakavut
pitsaasut uaniipput inunnik isumaguinninnermi sullissisut angerlarsimaffinni
ajornartorsiorfiusunut akulikitsumik ornigutikulaartarnerisigut meeqqat
paaqqinnittarfimmit inissinneqartussaagaluartut arlallit annaattarnikuuavut,
taamaattumik ilungersortumik taanna ukiarmi aamma Isumaginninnermi
naalakkersuisuusimasumut maanngaanniit qinnutigisimavara suliaq taanna
misissorluarneqaqqullugu iluatinnartutut isigigatsigu, taamaattumik
naalakkersuisumut taanna ingerlateqqikkusuppara siunissami
isumaliuutigilluaqqeqqullugu.
Eqqarsarnartoqartitama
ilagaat uani oqareerpunga saqqummiussisup tunngavilersuutai paasivakka,
kisianni sooq kommunet pisussaaffiinik annertuunik tunioraaniarluta
oqaloreerluta sooq taava kommuneni ataatsimiititaliat tassani paaqqinnittarfiit
pisortaat salliutillugit oqartussaassusermik tuniniarsarineqassappat,
taamaattoqarsinnaanngilaq, puigoqarpugut meeqqanik paaqqinnittarfiit ilaat
namminersortunik ingerlapput, uanga paaqqinnittarfiuteqarmat namminersortumik
ingerlatsillunga meeraq suli naammassinngitsoq
anisinniarsarisinnaassannginnerlugu, nalunngikkukku meeqaat tamaasa
sapangikkukkit ingerlassara ajutoortussaasoq. Taamaattoqarpoq namminersortunik
immikkut ingerlatsisoqarpoq soorlu immaqa Gertruds Rask Minde
eqqarsaatigiinnarlugu. Soorunami pisortaninngaanniit
aningaasaliiffiigineqartaraluarpoq kisianni nappatiginiagaq sunaluunniit aamma
sapanginninarneqarneq ajorpoq.
Una
eqqaanngitsoorusunngilara naalakkersuisup uani akissuteqarnermini oqaatigisaa,
angerlartitsinermi imaluunniit kina oqartussaanerpaassua meeqqat inatsilerituua
imaluunniit meeqerivimmi nakkutilliisoq imaluunniit oqartussaasoq. Meeqqat
arsaarniarneqalersillugit imaluunniit arlaanut inissinniarniarlerlugit aqqut
siulliungajuttartoq tassaasarpoq inunnik isumaginninnermi ataatsimiititaliaq.
Taassumarpiaap nalilertarpaa qanoq ingerlasoqarsinnaanera. Uani
oqaaserineqartut ilaatigut oqartoqarpoq meeraq piffissaanngitsukkut
angerlatinneqartartoq taannalu assut inuiaqatigiinnut akitsorsaataalersartoq.
Taanna eqqaamasiarqarpoq. Siumup oqaluttuata oqaaseq atugaa
isumaqatigilluinnarpara una: Arlaannattaluunniit qulakkeertarnerlugu meeraq
angerlatitarput piffissaanngitsukkut ilumut angerlasimanersoq, meeqqap tarnaa
asanninnera angajoqqaaminut qatannguminut kipisanera kia nalilersinnaagamiuk?
Pissuseq
pitsaalluinnartuuvoq inunnik isumaginnittut oqarnittuut amigaataanngippata
paaqqinnittarfimmilu sulineq ataqatigiiissumik oqaloqatigiikulaarnikkut
ingerlanneqartillugu suliaq oqinnerpaaffimminut inissikkiartulertarpoq.
Puigortariaqanngilarput una meeraq pitsaanerpaamik ineriartortissagutsigu
tassarpiaangaluarpoq angerlasimaffik torersoq, pitsaasoq eqqissisimaffiusorlu
meeqqamut ineriartorfigitissallugu minnerpaaffissaanut inissisinnaasuugutsigu
paaqqinnittarfinnut inissiigallarsinnaaneq. Tassa siunissami anguniagassarput
taamaattumik una uteqqerusuppara naalakkersuisumut una ilungersortumik
kissaatiginiarpara: Inunnik isumaginninnermik ilinniarsimasorpassuit nunatsinni
pigivagut kisianniuku suliassaminik sulinngitsut, tassa akissariat taakkua
aallaaviat ajorpallaaqimmat.
Taama
naatsumik oqaaseqarlunga uani uummammiugisakka anisilaarpakka,
takisuuliorusunnginnama titarsingaatsiarnikuungaluarlunga tassunga
killiinnarniarpakka, neriuppnga aamma tusaatissatut tigujumaaritit. Kisianni
ataatsimut eqikkarlugu oqaatigissavara siunnersuuteqartup siunnersuutaa
assorujussuaq tapersernarpoq aamma naalakkersuisut akissutai ukua
torrallataasimasutut nalilerusuppakka. Qujanaq.
Asii Chemnitz Narup, Inuit Ataqatigiit
Erseqqissalaaginnarniarlugu
angajoqqaat akisussaaffiiarniarneqanngimmata matumani minnerpaaminulluunnit
aamma isumaginninnermut ataatsimiititat pisussaaffii
illuartinniarneqanngimmata. Eqqartugarput aporaaffinngortarami meeqqat
angerlartussanngoraangata soqutigisat assigiinngitsut aporaatilertaramik.
Angajoqqaat soqutigisaat, soialudvalge-t soqutigisaat meeqqallu soqutigsaat.
Taava tassani uagutsinnut aperisariaqarpugut meeqqat soqutigisaat kiap
illersorpai? Illersorneqanngillat, taamaattuminguna ulloq unnuarlu angerlasimaffinni
pisortat illersuisussatut inissittariaqartutut isumaqarfigigikka, peqqutigalugu
meeqqamik perorsaaqataasimagamik, meeqqallu pisariaqartitai tassuunakkut
ilisimaarillualertarsimallugu. Aamma oqartariaqarpugut taamaalillutik pisortat
susassaqartutut inissittarmata tassani aalajangiinissami, aalaja-ngiinissami
pingaaruteqarluinnartumi.
Takusinnaanngilaa
suna pillugu isumaginninnermut ataatsititat aalajangiinerat
misilinneqarsinnaassanngillat maalaaruteqartarfimmut, ersinartoqanngilaq
taanna. Isumaqatigivakka oqaaseqartut oqarmata peqqissaartumik suliaq
ingerlattariaqaripput, aap, taamaaliorniarta aamma suliareqqinnerani
soqutiginartorujussuussaaq Landsråd-i taamani aalajangersagai
qimerlooqqilaassallugit peqqutigalugu taamanikkut uagut inatsiliortugit meeqqat
soqutiigsaat salliutilluinnarlugit malittarisassirotarsimapput. Isumaqarpunga
taakkutoqqanik malittarisassatoqqanik aamma qimerluuinikkut
isumassarsitinneqarsinnaasugut 2000.imi uagut inuusugut.
Godmand
Rasmussenip oqaasiinut aamma qujarusuppunga, aap, asanninneq taanna
pingaaruteqartorujussuuvoq, tamatta nalunngilarput, aamma
apeqquserneqarsinnaasorinngilluinnarpara angajoqqaat kikkulluunniit
meeqqaminnut asannissuseqarmata. Taamaakkaluartoq taava angajoqqaatut
piginnaanerit apeqqusertariaqartarput, piginnaanerilu naammanngikkaanngata
taava pisortat akuliuttariaqartarpugut, soorunami suleqatigiilluta,
naluneqanngilaq sullissisorpassuit nangiarisorujussuanngortarpaat
toqqaartaarillutik isertuaatsumik angajoqqaat qanoq pissusilersornermikkut qitornatik
sunniuteqarnerluttumik perorsarsinaagaat, taamaattumik
sapiinnerulertariaqarput, aamma maani inimi ajonarnartorsiutip qanoq
ittuuneranik isertuaatsunik eqqartuinissamut.
Jørgen Wæver Jørgensen, Isumaginninnermut Suliffeqarnermullu Naalakkersuisoq:
Isumaqarpunga
assortuuttariaqanngikkaluartugut, tassa amerlanerussuteqangaangaangaartut,
Siumukkut, Atassutikkut IA-kut aamma Kattusseqatigiit tamarmik isumaqatigiipput
una maalaarsinnaanermut tunngatillugu periarfissat sukumiisumik misissoriarlugit
ikkuteqqinneqartariaqartut, kisianni taakkua kisiisa aallaaviginagit.
Angunianngilarput amerlanerpaarpaartaat naammagittaalliuteqartarnissaat, unaana
isumagisariaqaripput inunnik isumaginninnermut ataatsimiititaliat
kommunabestyrelsillu aalajangiiniarnerminni pitsaanerujussuarmik ullumikkornit
tunngavissaqartarnissaat. Taanna aamma inatsisitigut suliarisinnaavarput,
peqqissaartumik suliarigutsigu.
Taanna
isumaqatigiissutigaarput taamaaliorniarlugu, taava aamma
isumaqatigiissutigaarput allanguinissaq taanna meeqqanik inuusuttuaqqanillu
ikiorsiisarneq Inatsisartut peqqussutaat nutarterneqalerpat suliarissallugu,
tassa isumaqatigiissuterput, isumaqatigiinnginngilagut.
Oqaaseqartut
kingulliit allamut saattaqattaaleraluarput aamma oqaatigisaat soqutiginaateqartorujussuupput,
kisianni siunnersuummut uunga tunngatillugu Inatsisartut tamatta tamakkiisumik
isumaqatigiippugut, suliassaq ingerlateqqinneqassaaq, maalaarsinnaaneq
ajoqutaanngimmat ikkunneqaqqissaaq, kisianni aamma kommunalbestyrelsit angerlartitsinissamik
aalajangiinerminni inunnik isumaginninnermi ataatsimiititaliaat
pitsaanerujussuarmik tunngaveqartariaqarput aalajangiigaangamik, taavalu
allanngotikkumaarparput peqqussut ikiorsiissarnermut tunngasoq taanna
allanngortinneqalerpat.
Naggataatigut
oqaatigilaarusuppara Antuup ilaatigut uani Naalakkersuisut akissuteqaataani
oqaatigineqarsimasut 1982-imi pisimasut eqqarsaatigalugit maalaarutigimmagu,
oqaatigimmagu meeqqat inuusuttullu pillugit suliniarneq taamatut
ingerlanneqarpat tupinnassaqisoq. Isumaqarpunga ukiut 18-it matuma siorna
arlaata puiorsimasaa kukkukkussutigisimasaaluunniit maani
piffissaajaatigissanngikkipput, eqqartorniartigu siunissami qanoq
pitsaanerpaamik meerartagut inuusuttuarartagullu sullissinnaanerlugit.
Jonathan Motzfeldt, Naalakkersuisut siulittaasuat:
Isumaginninnermut
Naalakkersuisup oqaaserisaanut ilassutigilaaginnarniarpakka aamma
nuannaarutigigakku inunnik isumaginninnermi suliaqartut meeqqanillu
pineqartunik aamma isumagisaqartut suliniarnerat aamma nersunartorujussuummata,
ullutsinnut Kalaallit Nunaanni pissutsit ataatsimut qiviassagaanni, suliat
nuanninngitsut suliarisaraat amerlaqisut, angajoqqaat qitornaminnik
paarsisussaagaluit paarsinngitsut suliassaat isumagisarimmatigit,
taamaalillutillu aamma pisortatigoortumik suliassanut
akulerunneqartarlutik.Tassani sulisut qutsivigisariaqarput
nersortariaqarlutillu, aamma isumaqarpunga naalakkersuisuninngaanniit
tatiginninnerput oqaatigisariaqartoq inunnik isumaginninnermik kommunimi
suliaqartuni, suliat peqqissaartumik suliarineqartutut isumaqarfigigigut,
taakkua inuit ilisarisimaneruaat uagutsinninngaanniit, pineqartut naapitatik
piffinni assigiinngitsuni ilisarisimaneruaat, siunnersuissallutik,
ikiuissallutik akisussaaffimmik tigummisaqarput, taannalu aamma suliniarnerat
naalakkersuisuninngaanniit tatigaarput aammalu taanna toqqammaviginiarlugu.
Naamattariaqaraluarpoq
taakkua suliaasa naliliinnerat atussallugu qaqugu meeqqat tungaatigut
iliuusissat sumut killissaqarneri. Taamaattumik immikkut qanoq saaffigisassanik
arlalippassuarnik eqqarsarnata taakkua sulinerisa patajaallisarnissaat,
tatiginassusaalu aamma qularnartunngortinnginnissaat isumagisariaqarparput,
aamma politikkimi oqalunnitsinni ilaannikkut oqartoortaratta, Gertrud Raskimut
tunngatillugu nammineq privatimik ingerlanneqartut pillugit oqaatigilaarlara,
angerlarsimaffik taanna maannakkut Sisimiuniittoq aallartikkamili
Qeqertarsuatsiaani, kingornatigut Alluitsumi meeqqanik iliarsunnik
isumaginniffiusimasoq suliaqarpoq oqaluttuarisaanitsinni suliamik aamma nuannersorujussuarmik,
meeqqanik iliarsunnik allamik saaffissaqanngitsunik suliaqarfiusimavoq,
maannamullu aamma nammineq malittarisassaqarluni meeqqanik aamma
angerlasimaffittut atorneqarnera qujamasuutissatut isigisariaqarpoq, aammalu
tassani sulisut siulersuisullu aamma sulinerat kissaalluartariaqartutut
isumaqarfigaara, tassani aamma suliaq ittoq inuiaqatigiit maannakkut
ajornartorsiutaasa iluini pinngitsoorneqarsinnaanngilaq.
Anthon Frederiksen, Kattusseqatigiit oqaaseqartuat:
Neriuppunga
oqallinnermi matumani ajornartorsiutit aallaaviat puigornagu aamma suliap
ingerlatseqqinnissaani eqqaammalluarneqassasoq, tassalu ajornartorsiutinut
sunut tamanut amerlanerparparpaatigut aallaaviusartoq, pingaartumik meeqqat
paarineqarnerannut isumagineqarnerannullu akornutaalluartunut ilaasoq, tassa
imigassamik atuinerlunnerput, tassa taanna nassuerutigisariaqagarput
imigassanik atuinerlunnitsigut meeqqat ilaanni ullaasaannaq politiinik
orninneqartariaqartartut qanoq amerlatigigaluarsimanerpat ukiut ingerlanerini.
Nallinnartaqaat tamaattut takullugit.
Neriuppunga
taanna aamma eqqarsaatissanut ilanngullugu puigornagu nalilersuinermi
eqqarsaatigilluarneqassasoq.
Augusta Salling, Siulittaasoqarfik:
Tassalu siunnersuutip qiterpiaa
isumaqatigiilluarfiuvoq, taamaalillunilu uummap oqallisigineqarnera
tamaalilluni naammassissaaq, kisiannili kissaatigineqarpoq amerlasuunit
arlaqartunit, aappassaaneerneqannginnerani Isumaginninnermut
Ataatsimiititaliamut ingerlateqqaarneqassasoq. Taamaalillunilu tassa
oqaluuserisassaq taanna naammassivoq.
Taava ataasinngorpat 21. februar
oqaluuserisassat ima immikkoortortaqartut oqaluuserineqassapput, tassa
immikkortoq 18, 32, 35, 40-lu, tassalu taamaasilluni ullumi februarip 16-ani
Inatsisartut ataatsimiinerat naammassivoq.
Oqaluuserisaq naammassivoq.