Oqaluuserisassani immikkoortoq 37 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 29. februar 2000 16.11
Ataatsimiinnermik aqutsisoq: Anders Andreassen, Siumut.
Asii Chemnitz Narup, siunnersuuteqartoq, Inuit Ataqatigiit:
Tassa
erseqqissaatigilaassavara siunnersuuteqaratta marluulluta Olga Poulsen, taavalu
uanga. Taava isumaqatigiissimavugut uanga saqqummiutissagiga.
Tassa
Inatsisartuni suleriaaserput § 23 naapertorlugu periarfissaqarpugut
ataatsimiititaliaagallartunik pilersitsinissatsinnut, taavalu uagut
siunnersuutigivarput, meeqqat pillugit ataatsimiititaliaagallartunik
pilersitsissasugut. Taavalu qinigaaffimmi matumani taanna
ataatsimiititaliaagallartussaq suliumaartoq.
Taamatut
siunnersuuteqarpugut makku tunngavigalugit: Meeqqat atugarisaat ukiumi
qaangiuttumi Inatsisartuni aammaarlutik oqallisaasimapput. Oqallinnerit
naqissusertarsimavaat qanoq pisariaqarluinnartigisoq meerartatta ullumikkornit
pitsaanerusumik peroriartornerminni atugassaqartinneqartariaqarnerat. Oqallinnermi
qasseeriarluni erseqqissarneqartarpoq suliniutit meeqqat inuunerannut
peroriartornerannullu attuumassuteqartut suugaluartulluunniit
ataqatigiissaarneqanngippallaarnerat. Inatsisit peqqussutillu
ersersittariaqarpaat Inatsisartut meeqqat soqutigisaannik pimoorussinerat,
taakkunngalu timitaliinissaminnut piumassuseqarnerat.
Misilittakkat
takutippaat, apeqqutini meeqqanut ilaqutariinnullu tunngassuteqartuni
Naalakkersuisoqarfiit arlallit ataatsikkut susussaqarlutik inissisimasartut.
Assersuutigalugu soorlu: Peqqinnissamut Isumaginninnermut, Atuartitaanermut,
Kultureqarnermut, Ineqarnermullu Naalakkersuisoqarfiit.
Taamaammat
meeqqanut inuusuttunut, ilaqutariinnullu politikkut tunaartassaq
tunngaviorpiartoq pilersissagutsigu, taakku eqqumaffigilluartariaqarpagut.
Isumaqarpugut
Inatsisartut immikkut ittumik pisussaaffeqartut politikkimik taaneqartutut
aqqutissiuussinissamut inatsisiliornikkut peqataaffigissallugu. Tamannalu
anguneqarsinnaavoq Inatsisartut meeqqat pillugit ataatsimiititaliaagallartumik
pilersitsineratigut. Neriuutigaarput Inatsisartut siunnersuuterput
ilassilluarumaaraat, meeqqallu pillugit ataatsimiititaliaagallartumik
sulissutigissallugu.
Ole Lynge, Inatsisartut Siulittaasuat, akissuteqartoq:
Inatsisartuni
ilaasortat Asii Chemnitz Narup aamma Olga Poulsen kissaateqarput suleriaatsimi
§ 23, ataatsimiititaliaagallartumik pilersitsinermut tunngasoq malillugu
meeqqat pillugit ataatsimiititaliamik ivertitsisoqarnissaa Inatsisartut
oqaluuserissagaat.
Siunnersuummut
tunuliaqutaavoq meeqqat inuusuttuaqqallu ineriartornerminni atugarisamikkut
pitsaanerusumik atugassaqartinneqarnissaat pillugu oqallinnermi iliuuseqarnerit
pitsaanerusumik ataqatigiissaarneqarnissaanik pisariaqartitsisoqarnera,
meeqqanut ilaqutariinnullu tunngasumik politikkeqarneq oqaluuserineqaleraangat
napparsimaveqarfiup, atuarfiup, kulturip, ineqarnerup isumaginninnerullu
akornanni amerlasuutigut attuumassuteqaqatigiittoqarnera aamma pineqartarmat.
Suleriaatsimi
§ 23 malillugu suliassat aalajangersimasut suliarineqarnissaannut atatillugu
Inatsisartut ataatsimiititaliaagallartunik pilersitsinissaminnik
periarfissaqarput. Ataatsimmiititaliaagallartoq atorunnaartarpoq suliassaq
suliassalluunniit suliarineqaqqullugu suliarineqaqqullugilluunniit
innersuunneqartut suliarineqarnerat naammasigaangat.
Inatsisartut
siulittaasoqarfiata apeqquteqaatip pingaarnerutillugu tikkuaavigissavaa,
tassalu meeqqat inuusuttuaqqallu atugarisaasa annertuumik sammineqarnissaat,
paasilluartorujussuaa, aammalu Siulittaasoqarfilli isumaqarpoq meeqqat pillugit
ataatsimiititaliaagallartumik pilersitsinerup kingunerissagaa,
ataatsimiititaliat suliassaqarfimmik iluanni toqqaannartumik
toqqaannanngitsumilluunniit meeqqanut inuusuttuaqqanullu tunngassumik
suliaqartut akornanni killiliinerit erseqqarluttut qalleraannerillu
pilersinneqarsinnaanerat.
Taamaammat
Siulittaasoqarfiup ataatsimiititaliat taakkua kaammattorumavai suliniutigisatik
ataqatigiissaariffigeqqullugit. Taamaaliornikkut suliassaq pingaartorujussuaq,
tassalu meeqqat inuusuttuaqqallu atugarisaasa pitsaanerulersinniarneqarnissaat
suli annertunerusumik sammineqarsinnaalissammat.
Inatsisartut
siulittaasoqarfiata erseqqissassavaa Inatsisartut, Inatsisartut ukiuat nutaaq
aallartippat atatsimiititaliat ataavartu sinnerinik pilersitsisussaammata,
Inatsisartullu Siulittaasoqarfiata Inatsisartut allattoqarfiat qinnuigimmagu
Inatsisartut ukiuannut 200/2001-imut Inatsisartuni ataatsimiititaliat
katitigaanerisa allannguutissaattut, ataatsimiititaliat amerlassusiisigut
ikilisinneqarnissaat siunertaralugu siunnersuusiussasoq.
Meeqqat
pillugit ataatsimiititaliaagallartumik pilersitsinissamik Inatsisartut
oqallinneranni Inatsisartut ataanni Meeqqat Inuusuttuaqqallu Pillugit
Ataatsimiititaliamik pilersitsisoqarsinnaanissaanik Inatsisartuni partiit
kissaateqarpata, tamanna siuliami taamaattumi soorunami annertuumik
pingaartinneqarumaarpoq.
Ataatsimiititaliat
katitigaarnerisa allanngortinnissaat utaqqeqqaanngikkaluarlugu meeqqat pillugit
ataatsimiititaliornissaq Inatsisartuni amerlanerussuteqartut
kissaatigissagaluarpassuk, ataatsimiititaliat allat akornanni killileernerit
erseqqarluttut qalleraannerillu pinaveersimatikkumallugit ataatsimiititaliap
taamaattup oqartussaffigisaasa nassuiarneqarnissaat erseqqinnerusumik
alaatsinaanneqartariaqarpoq, soorlumi tamanna akissuteqaammi matumani aamma
tikkuarneqartoq.
Ruth Heilmann, Siumup oqaaseqartua:
Siulittaasoqarfiup
akissutaa Siumumit tamakkiisumik isumaqatigaarput, tassa siullermik
ataatsimiititaliat ikilisarneqarnissaannut Inatsisartut siunnerfeqarnerannut una
siunnersuut naapertuutinngimmat.
Aappassaannik:
Inatsisartut meeqqat siunnersuisoqatigiivinik, tassa børnerådimik
pilersitsiniarneq 1999-imi Inatsisartut upernaakkut ataatsimiinneranni
taamatullu ukiakkut ataatsimiinnermi nanginneqartumik oqaluuseraat,
Inatsisartullu tamarmik isumaqatigiillutik taamatut pilersitsinissaq
orniginartinngilaat. Inatsisartut kissaatigaat meeqqat inuusuttuaqqallu
suliniaqatigiiffiinik ingerlataqartut ataatsimiititaliallu pioreersut
nukittorsarneqarnerunissaannik suliniuteqarnissaq pimoorunneqarnerussasoq,
tamannalu Naalakkersuisunut innersuussutigineqarpoq.
Aammalu
pingajussaannik: Aningaasat meeqqat siunnersuisoqatigiivinut atugassaagaluit
immikkortitaareersut meeqqat ukiuannik pilersitsinermut atatillugu qanoq
iliuusissanut atugassanngortinneqarnissaat Inatsisartut kissaatigalugu.
Tamannalu
maanna Inatsisartut Aningaasaqarnermut Ataatsimiititaliaanit Inatsisartunut
susassaqartunut qanoq atorneqarnissaat pillugu tusarniaassutigineqarpoq.
Taamaattumik
Siumumiit eqqumiigaarput taamatut siunnersuuteqartoqarnera,
akuersaarumanngilarpullu taamatut siunnersuuteqarneq, kissaatigiinnassallugulu
Naalakkersuisut piumaffigineqassasut Isumaginninnermut Ataatsimiititaliarsuup
meeqqanut inuusuttuaqqanullu kaammattuutigeriigaat eqqumaffiginiarneqarlutillu
naammassiniarlugit suliniutigeqqullugit.
Suliniutit
aamma meeqqanut tunngasut kommunit maanna erseqqissumik suliniutigaat. Taama
suliniarnerit Siumumiit tapersorsoqaavut, isumaqarlutalu qitiusumik
ataatsimiititalialersornerinnakkut meeqqanut suliniarneq
ingerlanneqartariaqanngitsoq.
Taamalu
Siumumiit nalunaarutigissavarput, piareersimajuarluta piumassuseqarluarlutalu
meeqqat inuusuttuaqqallu atugarisaasa pitsanngorsaavigineqartuarnissaannut
aamma ukioq 2000-imi meeqqat ukiuanni nangittumillu 2001-mi meerartatta
inuusuttuarartattalu siunissami siunissaqarluarnissaat pillugit sukumiisumik
sumiluunniit oqalliseqataanissamut iliuuseqarnissamullu.
Taamatut
oqaaseqarluta siunnersuutip itigartinneqarnissaa Siumumiit
taaseqataaffigissavarput.
Jakob Sivertsen, Atassutip oqaaseqartua:
Inatsisartut
suleriaasianni § 23 naapertorlugu qinigaaffimmi matumani atuuttussamik meeqqat
pillugit ataatsimiititaliamik pilersitsigallarnissamik Inatsisartunut
ilaasortat, tassa Asii Chemnitz Narup aammalu Olga Poulsen, siunnersuutaat
apeqquteqaatitut oqallisigineqartussat pillugit Atassumiit imatut
oqaaseqassaagut:
Inatsisartut
siornatigut kommunit iluarsartuussiffigineqarnissaannik kiisalu Inunnik
Isumaginninnermi Iluarsartuusseqqinnissami Ataatsimiititaliarsuarmi
pilersitsisimapput. Aaqqissuussinerit tassa inatsisit peqqussutillu ullutsinnut
naleqqussarneqarnissaat nutarteriffigineqarnissaallu partiit Inatsisartuni
ilaasortaatitaqartut tamarmiullutik iluarsartuusseqqinnissaq
pisariaqartilersimammassuk.
Ataatsimiititaliarsuit
suliarisimasaat, inatsisit peqqussutillu allannguutissaat ukiuni kingullerni
ullorlu manna tikillugu allanngortiterlugit aaqqissuussiffigineqaruttorput,
pingaartumik meeqqanut inuusuttunullu tunngasortai soorunami tamatumani aamma
ilanngullugit.
Aammalu
eqqaamaneqassaaq, meeqqanut inuusuttunullu siunnersuisoqatigeeqalernissaq ukiut
marluk matuma siorna Inatsisartunut saqqummiunneqarsimagaluarmat. Nalilersuilluareernerup
kingorna Inatsisartuni itigartinneqarsimasoq. Taamanikkut itigartitsinermut
peqqutaavoq, ullumikkut meeqqanut inuusuttunullu suliniaqatigiiffiit, soorlu
Sorlak, sinerissami inuusuttut suliniaqatigiiffii peqatigiiffiillu
atorluarneqarnerisigut immikkut siunnersuisoqatigiiffiliunngikkaluarluni
meeqqanik inuusuttunilu sullissineq meeqqat inuusuttullu annertuumik
peqataaffigillualersimasaat, ajunngivissumik ingerlanneqariartortoq
takuneqarsinnaalersimammat.
Siunnersuut saqqummiunneqartoq nutaarsiassaanngilaq, tassa 1995-imi
Inatsisartut ukiakkut ataatsimiinneranni Inatsisartunut ilaasortaq, Finn
Karlsen, Atassut, meeqqat inuusuttullu atugarisaat pillugit qulaajaasussamik
ataatsimiititaliornissaq siunnersuutigisimammagu. Taamanikkut siunnersuut
partiinit taperserneqarluni Inunnik Isumaginninnermi Ataatsimiititaliarsuup
suliassaanut ilanngunneqarsimavoq, nalilersugassanngorlugu. Siunnersuut
ataatsimiititaliarsuarmi oqaluuserilluareerlugu ataatsimiititaliornissamut
taarsiullugu Inunnik Isumaginninnermi Qullersaqarfiup ataani meeqqanut
inuusuttunullu tunngasuinnarnik sullissivimmik immikkoortortaqarfeqalernissaq
siunniunneqarsimagaluarpoq, ullumimut kinguneqanngitsumik.
Meeqqat pillugit ataatsimiititaliaagallartussamik pilersitsinissamik
siunnersuut saqqummiunneqartoq, paasilluaraluarlugu Atassummit
akuersaarnartinngilarput, makkuninnga peqquteqarlunga: Ullumikkut Inunnik
Isumaginninnermi Iluarsaaqqinnermi Ataatsimiititaliarsuup suliaat, meeqqanut,
inuusuttunut, utoqqarnut, innorluutilinnut, innarluutilinnut,
suliffissaqartitsiniarnermut allanullu tunngassuteqartut iluarsartuussiffigineqarneranni
qalleraattumik suliaqalernissaq pinaveersaartariaqarmat. Aamma piffissami
aalajangersimasumi ataatsimiititaliornerinnakkut siunnersuummi oqaatigineqartut
tamarmik aaqqinneqarsinnaanngitsut nalunnginnatsigit.
Atassummi ukioq 2000, meeqqat ukiuattut aalajangiunneqarnera assut
pingaartipparput. Aammalu piffinni assigiinngitsuni atorluarneqalereersoq
isumalluarfigigatsigu.Neriuutigaarput nunatsinni meeqqanik inuusuttunillu
atorluarneqarsinnaajumaartoq.
Atassummit erseqqissassavarput, meeqqanut inuusuttunullu
ajornartorsiutaasartut aaqqiiffiginiarneqarnissaat 1995-imi 98-imilu
Inatsisartunut saqqummiuttarsimagatsigit, tassa siullermik Finn Karlsenimit
kiisalu kingullermik Peter Ostermannimit, ullumimut Atassummit
kissaatigisatsituut suli aaqqiiffigineqanngitsunik, naak pitsanngorsaanerit
assigiinngitsut ingerlanneqartarsimagaluartut.
Atassummit oqaatigissavarput, nunatsinni meeqqat inuusuttullu
ajornartorsiutaat annertuujusut nalunnginnatsigit. Eqqaamassavarpulli
meerarpassuaqarmat inuusuttorpassuaqarlunilu pitsaasumik angajoqqaaminnik
perorsarneqarlutik paarilluarneqarlutillu ineriartortinneqartunik. Aamma
angajoqqaat innuttaasunut maligassiuilluartut nersortariaqarpagut,
ajortuinnarmik eqqarsaatiginagit.Ajornartorsiutinik eqqartuigaagatta aamma nunatsinni
ajunngitsorpassuarnik nuannaarutissanillu pilersitsisimasut suleqataasimasullu
ilanngullugit aamma eqqartorneqartariaqarput.
Naggataatigut Atassummit Inatsisartut ukiamut 2000 ataatsimiinnissaannut
meeqqanut inuusuttunullu Namminersornerullutik Oqartussat ataanni
sullissivimmik pilersitsinissaq aalajangiiffigisassanngorlugu
saqqummiunniaratsigu, tamatumani nalunaarutigereerparput. Meeqqat inuusuttullu
ukiuat aallarnerfigalugu ataavartumik sullissinissaq piariaqartikkatigu.
Taamatut siunnersuut aalajangiiffigisassaanngitsoq Atassummit
oqaaseqarfigaarput.
Maliinannguaq Markussen Mølgård, Inuit
Ataqatigiit oqaaseqartuat:
Inatsisartuni ilaasortat, Olga Poulsen aamma Asii Narup, Inuit
Ataqatigiit suleqatigiillutik siunnersuuteqarput, Inatsisartut meeqqat pillugit
ataatsimiititaliaagallartumik ataatsimiititaliussasut. Siunnersuuteqarnerminnut
ilanngullugu siunnersuutigaat, ataatsimiititaliaagallartoq qinigaaffimmi
matumani sulissasoq.
Siunnersuuteqartut isumaqarput meeqqat pillugit ataatsimiititaliornikkut
apeqqutit meeqqanut ilaqutariinnullu tunngassuteqartut inatsisartutigoortumik
sulinermi ataqatigiissaarneqarnissaat angulertorneqarsinnaassasoq.
Oqaluuserisassanngortitsisut isumaqatigaavut oqarmata, apeqqutit meeqqat
ilaqutariillu atugarisaannut sammineqartillugit pissutsit atukkat tamalaat
ataatsikkut nalilersortariaqartarmata, tamakkulu ataqatigiissarnissaat
pisariaqarluinnartoq aamma Inatsisartutigoortumik sulinitsinni.
Ukiuni kingullerni Inatsisartuni sulinerput pitsanngorsarniarlugu
partiit tamatta Kattusseqatigiillu assigiinngitsunik anguniagaqarpugut.
Maannamullu tamakku isumaqatigiilluta angusaqarfiulluartumik
suleqatigiissutigisinnaasimavagut, assersuutigalugu Inatsisartut suleriaasiata
nutaap suliarinerani.
Inatsisartuni sulinerup pitsaassutsimigut qaffassarniarnerani
pingaaruteqarluinnartutut tikkuarneqartartut ilagivaat, peqqissaartumik
piareersarluakkamillu suleriaaseqarnissaq, aammalu paasissutissanik
sukumiisunik toqqammaveqarluni aalajangiisarnissaq.
Inuit Ataqatigiinni isumaqarpugut siunnersuutigineqartoq Inatsisartuni
suleriaatsinik anguniakkatsinnik naapertuuttoq, suliniarnitsinni mannamut
suleqataaffigilluinnarsimavarput Inatsisartut sulinerata nutarternissa
ineriartorteqqittuarnissaalu.
Taamatuttaaq isumaqatigivarput Siulittaasoqarfiup akissuteqaamminut
ilanngullugu oqaatigimmagu Ataatsimiititaliap taamaattup
oqartussaaffigisassaasa erseqqissumik killilersorlugillu nassuiarneqarnissaat
pisariaqassammat.
Inuit Ataqatigiinni isumaqarpugut Ataatsimiititaliaagallartussap
suliassai aalajangersornissaanut aallaavigineqassasut Inatsisartut
Ataatsimiititaliaasa ataavartut suliassai. Naluneqanngitsutut Inatsisartut
Ataatsimiititaliaat ataavartut marloqiusanik pisussaaffeqarput, siullermik
Naalakkersuisut sulinerat nakkutigissallugit aappassaanillu Ataatsimiititaliap
susassaqarfiinik pissutsinnik ineriartornermilu malinnaasussaasallutik.
Taamaammaat siunnersuuteqartut oqallisigereerlugit Inuit Ataqatigiinniit
siunnersuutigissavarput Meeqqat pillugit Ataatsimiititaliaagallartup
pisussaaffigisai makkuussassut:
Nunat tamalaat kattuffissuata FN-ip
meeqqat pisinnaatitaaffii pillugit aalajangersagai tamatuminnga
naliliisarnermut toqqammaviussapput.
Ataatsimiititaliaagallartut
malinnaanermigut ilisimalikkami paasisanilu Ataatsimiititanut ataavartunut susassaqartunut
ingerlateqqittassavai.
Inuit Ataqatigiinni
isumaqarluinnarpugut meqqaat inuusuttullu pillugit
Ataatsimiititaliaagallartumik pilersitsinikkut Inatsisartuni ataatsimut
tamakkiisumik isiginnittumik toqqammaveqarluta sulinissarput qulakkeerneqarsinnaasoq,
pissutsillu meeqqanut inuusuttuaqqanullu atugassarititaasut
aaqqissuulluaakkamik pitsanngorsaavigineqarsinnaasut, soorlu isumaginninnikkut,
peqqissutsikkut, kulturikkut, ilinniartaanikkut, inissaqanikkut il.il.
Meeqqat pillugit Ataatsimiititaliaagallartussap
inissisimaffissaa naatsumik oqaatigalugu tassaasaaq meeqqanik inuusuttunillu
sullissinermi Inatsisartut Ataatsimiititaliaannut ataavartunut
naalakkersuinikkut ikorfartuisussatut inissisimasussaq.
Ataatsimiititaliaagallartoq
katiterneqassaaq Inatsisartut Ataatsimiititaliaata ataavartut
katitigaasarnerattut, ataatsimiitassaaq ukiumut arfinileriarluni arfineq
pingasoriarluniluunniit ataatsimiitassaaq.
Ataatsimiititaliaagallartoq
allatseqassaaq, Ataatsimiititaliaagallartup sullitassai saaffigisassai
pingaarnerit tassaapput inatsisiliortut, taamaattoq aamma allaffissornikkut
suliaqarlutik aalajangiisartut, meeqqanik sullissisut, angajoqqaat, meeqqat
inuusuttuaqqallu.
Taamatut oqaaseqarluta siunnersuut
tamakkiisumik tapersersorlugu nalunaarutigivarput. Qujanaq.
Loritha
Hendriksen, Kattusseqatigiit oqaaseqartuat:
Inatsisartunut ilaasortap Asii
Chemnitz Narup-ip aammalu Olga Poulsen-ip oqallisissiatut saqqummiussaanut
Kattusseqatigiinniit imatut oqaaseqqarfigissavarput:
Ersarissumik oqaatigeqqikkusupparput
ullumikkut Meeqqat Ukiuannut atatillugu suliniutit ersarissut
anguniarneqartullu meeqqat atugaannut aallaavillit aallarnisaleruttorneqarmata
iluarisimaaratsigu.
Taamaattumik isumaqarpugut suliap
aallartereersut suliniutaalereersullu aalajangiusimasariaqatut, suliammi
siunertamik assigiimmik aallaaveqartut qalleraatiternissaat sulianut
ingerlareersunut kinguarsaataaginnarsinnaammata.
Taamatut oqarnerput ima
paasiqqunngilarput meeqqat atugarisaannut aaqqissuussinissanut
suleqataarusunngitsugut, naagga, meeqqat ullutsinni pitsaanerpaamik
sullinneqarnissaat pingaaruteqarput, meerartagummi siunissaralugit
oqartarpugut. Taamaattumik meeqqat namminneq suleqataalernerat
iluarisimaarparput, namminneq suleqataanermikkut angusassat pitsaasut
angusarmatigit. Nalunngilarpummi aasamut junimi meeqqat pillugit Sisimiuni
ataatsimeersuartoqassasoq, meeqqat ullumikkut atugarisaat pillugit
oqallinnermik aallaavilimmik.
Kattusseqatigiinniit isumaqarpugut
ukiunut tulliuttunut anigaasat immikkoorteriikkat meeqqat atugarisaasa
pitsanngorsaavigineqarnissaannut atugassaasut, soorlu Paarisami
pinaveersaartitsinermi suliniutinut atatillugu paasisitsiniaanerit annertuut
piviusumik aallaavillit kissaatigereernikuuvagut. Aammattaaq kommunit ilaat
namminneq meeqqanut siunnersortinik aallartitsereersimasut ullumikkut
suliamminnik ingerlatsilluartut nalunngilagut, taakkuttaaq pissutsinik
piviusunik aallaaveqarlutik suliniuteqartut aamma nalunnginnatsigit. Meeqqammi
nammineerlutik suleqataagaanngamik peqqissaarlutik kukkunaveersaarlutillu
sulerusuttarmata.
Taamaattumik tamakku qanoq
kinguneqarnissaat takoriarlugit soorunami nalilersueqqinnissaq
naatsorsuutigaarput, tassanilu pissutsit piviusut aallaaviginissaat, suullu
pisariaqavissut siunissami suliniutigineqarnissaat naalilerneqarnissaallu
naatsorsuutigilluinnarparput.
Taamatut oqaaseqarluta oqallisissiaq
una qinigaaffiup matuma atuuttussamik meeqqat pillugit Ataatsimiititaliamik
pilersitsinissamik apequteqaat oqallinneq Kattusseqatigiinniit
utaqqimaarallarusupparput, suliniutit qanoq kinguneqarnissaat
takoqqaarusukkatsigit.
Taamaattumik siulittaasoqarfiup
akissuteqaataa paasilluarlugu tamakkiisumik taperserparput.
Asii Chemnitz
Narup, Inuit Ataqatigiit:
Tamatigut
pissanganngitsoortanngilagut oqaluuserisassanngortitsigaanngata, soorunami
aamma takorloorniarsarisarparput kikkummi taava isumaqatigissavaat, kikkummi
taava akerlilersussavaat.
Annertorujussuarmik
oqallisigisimavarput Inuit Ataqatigiinni, aamma Olga Poulsen-lu
ilaasortaanngoratta killiffigisimavarsi Inatsisartuni sulinissinni
nutarterillusi aamma suleriaasersi taamani nutarterlugu aallartereersimavusi,
taamaattumik pissanganartissimavarput qanutut allatigut aamma suli
eqaannerusumik suleriaaseqartoqarsinnaavami taava.
Una Ataatsimiititaliaagallartussamik
siunnersuuterput Inatsisartut uagutsinnut sammivoq, aamma Inuit Ataqatigiit
oqaaseqartuata erseqqissaqqippa Inatsisartutigoortumik
pilersinneqaqqugaluaripput taanna Ataatsimiititaliaagallartussaq.
Maannamut upppernarserrerparput
meeqqat, inuusuttut ilaqutariit atugarisaat oqallisigileraanngatsigit, taava
tassani eqqartortariaqartarpagut ineqarnermut pissutsit, aningaasaqarniarnikkut
ilaqutariit inissisimaffiat, peqqussutsikkut pissutsit atugaat,
kultureqarnermut atuartitaanermut, isumaginninnikkut il.il.
Taakkuli suliassat
Ataatsimiititalianut susassaqartunut assigiinngitsunut agguataarneqartarput,
soorunami Ataatsimiititaliat susassaqarfii naapertorlugit, taamaalilluni
tamakkiisumik maani Inatsisartuni sullissinissaq ilaqutariit meerartallit
pitsaanerusumik atugaqalernissaanik siunnerfeqarluni sulinissaq sapanginnertut
isikkoqartarami. Taamaattumik siunnersuutigisimagaluarparput kateriffiusussamik
Ataatsimiititaliaagallartumik pilersitsinissaq.
Takorloorsimanngilarput soorunami Ataatsimiititaliat
ataavartut suliaannik arsaassallugit, taakkua suliakkerneqareerput aamma
erseqqipput suna suliassarineraat.
Aamma isumaqanngilagut,
Siulittaasoqarfimminngaanniit akissummi oqaatigineqarmat massakkut ukiap
tungaanut Siulittaasoqarfik sulisoq Ataatsimiititaliat ataavartut
ikilisinniarlugit katiterniarlugit, aap, taanna isumaqataaffigivarput aamma
Inuit Ataqatigiinninngaanniit suleqataaffigiumallugu oqaatigereernikuuvarput
aamma uunga assortuutinngilaq uagut siunnernersuuterput, katiterisoqassagaluarpalluunniit
Ataatsimiititalianik atavartunik, taava Ataatsimiititaliaagallartunik
pilersitsisoqarsinnaavoq sulianut pingaaruteqartunut isumaqarfigisatsinnut
Inatsisartuni.
Aamma Siulittaasoqarfimminngaanniit
kaammattorneqarpugut Ataatsimiititaliani assigiinngitsuni suliniutigut
ataqatigiissaaqqullugit, aap, misilittagaqarfigereerparput, siorna upernaakkut
meeqqat pillugit siunnersuisoqatigiiliortoqarnissaa Naalakkersuisut
siunnersuutaat oqallisigigatsigu Isumaginninnermut Ataatsimiititamut, Peqqinnissamut
Ataatsimiititamut, Atuartitaanermut Ataatsimiititamut suliassaq taanna
nassiunneqarpoq, tassanilu suliarineqarlutik, aamma Ataatsimiititat taakkua
pingasut suliatik pillugit ataqatigiissaarinermik siunertaqarlutik
ataatsimeeqqatigiitarsimapput siulittaasui. Taanna suleriaaseq ajunngilaq,
kisianni isumaqarsimavugut suli eqqaallisarneqarsinnaasoq
Inatsisartutigoortumik sulinerput aamma ataavarnerusumik suli pitsaanerusumik
toqqammavilersorluta tunngavilersorlutalu suleriaqqinnissarput takorloorsimavarput,
kisianni tassa ajunngilaq isummat tusaavagut, taamaattoq
oqaasiqarfigilaarusuppakka oqaaseqartut ilaat.
Siumuminngaanniit oqaatigineqarpoq,
akuersaarumanngilaat Siumuminngaanniit taamatut siunnersuuteqarneq.
Kiffaanngissuseqarpugut Inatsisartuni ilaasortat tamatta suulluunniit
siunnersuutigisinnaallugit taavalu Siulittaasoqarfimmut ingerlattarpagut,
tassanilu nalilersorneqartarlutik. Taamaattumi kiffaanngissuseqarnerput taanna
uagut pingaartipparput aamma Siulittaasoqarfimmi soorunami nalilersorneqartassapput,
isumaqanngilagut ilaasortat Inatsisartunut ilaasortat allat
akuersaarsinnaanerat taanna apeqqutaassasoq.
Takorloorsimagaluarparput
Siulittaasoqarfiup akissutaa atuaratsigu soorunami isumaqataagatta taassumap
Ataatsimiititaliaagallartussap suliassai killilersoqqissaarneqartussaassammata
erseqqissarlugit, taava takorloorsimagaluarparput immaqa ilaasortat allat taava
eqqarsaqatigalutaluunniit suut imassarisinnaaneraat
siunnersuuteqarfigissaneraat, kisianni tassa taamatut suliariartoqarsimanngilaq.
Taava erseqqisarusuppra aamma
Atassumminngaanniit assersuutigineqarmat Meeqqat pillugit
Siunnersuisoqatigiinnik pilersitsinissamik itigartitsisimanerput. Taanna
allarluinnaqqeqqissaajuvoq, suliassaa erseqqissaavigineqarsimapput
siunnersuummi, taavalu inissineqartussatut takorloorneqarsimalluni
Naalakkersuisunut sulittaasup allaffeqarfiata ataani. Uagut pivarput
Inatsisartutigoortumik Ataatsimiitiatliaq, taamaattumik suliat taakkua
assigiinngilluinnaqqissaarmata assersuunneqarsinnaanngillat.
Aamma Atassumminngaanniit
oqaatigineqarpoq siunnersuut ataatsimilluunniit nutaarsiassartaqanngitsoq.
Nutaarsiassartaqarnera taanna immini naluara qanoq pingaaruteqartiginersoq,
aamma malunnartarpoq nutaarsiassaangikkaluit qaqinneqartuartarput,
angusaqarusulluta suligaangatta uteriisertariaqartarpugut taavalu pissutsit
aamma ineriartornerit tunngavigalugit uterfigeqqittariaqartarlutik.
Nutaarsiassartaqanngikkaluarpalluunniit qaqikkusussimavarput.
Soorunami suut tamarmik
Ataatsimiititaliornikkut Inatsisartutigoortumik aaqqineqarnavianngillat,
uagununa maani sulinerput suli pitsaanerusumik tunngaveqarluni,
aalajangersaanerit patajaanerusut ujartorlugit taamatut
siunnersuuteqarsimasugut. Qujanaq.
Anders
Andreassen, Inatsisartut Siulittaasoqarfiat:
Oqaaserpassuit atunngikkaluarluit
erseqqissatigissavara oqallisigisarput aalajangiivigineqarsinnaanngimmat
maani,tassa suleriaaserput nutaaq malillugu § 35 malillugu. Aammalu
maluginiarpara amerlanerussuteqarluartut maannakkut ilalernartinngikkaat
taanna, kisiannili mattuneqan-ngitsoq, aamma taamatut paasillugu.
Olga Poulsen, Inuit
Ataqatigiit:
Siullermik siunnersuuteqaqatiga Asii
Chemnitz Narup qamannga uummammik pisumik qutsavigissavara,
uummateqarfigingaarlugu uani taamatut suna tunngavigalugu
siunnersuuteqarsimanermut taamatut saqqummiussinera.
Ajuusaarnarpoq, uanga
ajuusaarnartuutippara siunnersuut taamatut itigartinneqarmat, pissutigalugu
soorlu partiit oqariartortui tamarmik annertoorujussuarmik
oqariartuuteqarnerminni oqaatigivaat suliassat taamannak taamannak taamannak suliassat
meeqqanut inuusuttuaqqanullu tunngassuteqartut ukiuni ukiuni taamannak
taamannak suliarineqarlutik imaluunniit suliassanngorlutik
aallartinneqarsimasut, ilaat 1995-iminngaanniit il.il.
Sooruna ullumikkut uagut
Inatsisartuni ukioq kingulleq ilaasortanngoratta qineqqusaarattalu
pingaartissimavarput aamma meeqqat inuusuttuaqqallu sullinneqarnissaat,
pissutigalugu erseqqarissunik suliniutinik takujuinnermik,
takujuippallaaqigatta, takusaqartarpugut soorunami kisianni
takujuippallaaqaagut. Taanna siunertaralugu pitsaasutut isigigaluarparput
taanna Atatsimiititaliaagallartoq aaqqissuussamik immaqa soorlu meeqqanut
tungasunik suliat sumut killinneranut il.il. malinnaasinnaasoq.
Uani Ataatsimiititaliat
ikilisarneqarnissaanut tunngatillugu Siumukkut oqariartuutaanut aallaqqaataasoq
taanna assorujorujussuaq uanga akerlilerusuppara imatut, tassami soorunami
pilersaarutigineqartoq Siulittaasoqarfimminngaanniit Ataatsimiititaliat
ikilineqarnissaat taanna pissusissamisut aamma Asiip oqaatigereerpaa, kisianni uagut
Inuit Ataqatigiinninngaanniit akuersaarsinnaanngilarput meeqqanut
tunngasuteqartuni suliaqarniarnermi arlaatigut Ataatsimiititaliami taanna
ikilisaaffigineqarnissaanik eqqorneqassasoq. Pissusissamisoorsorinngilarput,
tassami tamatta meeqqanut tunngassuteqartuni suliarluta annertoorujussuarmik
kingullermik aamma ataatsimiikkatta oqaluttarfimminngaanniit oqaaseqareeratta.
Anders
Andreassen, Inatsisartut siulittaasoqarfiani ilasortaq:
Erseqqissaqqissavara naattsunnguamik
aalajangiisussaannginnatta massakkut maani taamaattumik oqaaserpassuit
anikkaluarutsigit aamma aalajangiinermik kinguneqarnaivianngilaq, taamaammat
tulliuttut qinnigissavakka naatsumik erseqqissumillu, uani pineqarmat
Ataatsimiititaliaagallartumik pilersitsinissaq, allat eqqartorneqanngillat,
taamaatumillu tassunga tunngasumik tulliuttut oqaaseqartussaat
kissaatigissvara. Maanakkullu akissuteqaqqaarallassaaq Inatsisartut
siulittaasuat Ole Lynge.
Ole Lynge, Inatsisartut
Siulittaasuat:
Siulittaasoqarfiup akissuteqaataani
maluginiaqqussavara siullermik, siunnersuuteqartut toqqaannartumik
itigartinneqarnissaat akuerineqarnissaalluunniit taasimannginnatsigu.
Inatsisartut suliariaasianni periarfissaqarpoq Ataatsimiititaliaagallartumik
pilersitsinissaq, aamma soorunami ukiup nutaap ataatsimiiffiusup
aallartinnerani aamma periarfissat aapparaa aalaakkaassumik, tassa qinersivik
tamakkerlugu atasartumik Ataatsimiitaliamik pilersitsisinnaaneq. Immaqa taakkua
erseqqinngippallaamik nassuiaateqarfigisimanerpagut, kisianni tassa paasinarpoq
aamma siunnersuuteqartut aatsaannguaq itisileruteqarnerminni sunarpiaq
aallavigerpiarneraat erseqqinnerusumik saqqummiunneqartoq.
Oqareernittut Siulittaasoqarfiup
uani periarfissikkumasimavai partiit Kattusseqatigiillu qilersorsimanngitsumik
qanoq iliuuseqarsinnaanermut meqqat inuusuttullu
Ataatsimiititaliaqarsinnaanermut tunngasunik, Ataatsimiititaliaagallartumik
imaluunniit aalaakkasumik Ataatsimiititamik pilersitsinissamik
kaammattuuteqarumaarnersut.
Ilumoorpoq aqutsisup oqarneratut una
aalajangiiffiusussaanngilaq, kisianni Siulittaasoqarfiupsooruna
suleqqinnissamini oqimaalutaanissamini ilanngutinngitsoortussaanngilai
ullumikkut Ataatsimiititaliat 20-t sinneqartut maani pingaarteqisagut taakkua
qanorpiaq tulleriinnilersuinermi suliassaqarlutillu pisussaaffeqarnissaat
eqqartussallugu.
Aamma nuannaarutigaara una ilaatigut
Inuit Ataqatigiit oqaaseqatuanit itisilerneqarmat sunarpiaq taamatut
Ataatsimiititaliaagallartumik pilersitsinissami suliassaq qanoq
imaqarsinnaaneranik. Tamakku soorunami isummat saqqummersut aamma
Siulittaasoqarfiup suleqqinnissaminut oqimaalutaanermini oqareernittut
toqqammavissarsiorfigisassaasa ilagaat.
Aamma taamaappoq, taamatut aamma
paasinarpoq Atassutip oqaaseqartuata annertuumik assigiinngitsut,
pingaartumillu Isumaginninnermi Ataatsimiititaliarsuup inuusuttut meeqqallu
pillugit inassuteqaatigisimasaasa suliat ingerlanneqarneri pillugit
killiffimmik ujartuinera, aammalu siunnersuutaasarsimasunik assigiinngitsunik
piviusunngortinneqarsimanngitsunik ujartuinera.
Aamma taamatorluinnaq Siumup oqaaseqartuata
maannamut taamatut iluseqartillugu eqqumiiginninnera paasivara, tassa Siumup
oqaaseqarnermi ilaatigut eqqumiigimmagu taamatut siunnersuuteqartoqarnera,
kisianni pissusissamisuuginnarunarpoq apeqqusiisoqassappat siunnersuutit
toqqammavilersorneqarneri nangaannartoqartinneqarsimappata, kisianni aamma uani
oqaluttarfimi partiit taamatut isummersornissaannut,
suleqatigiikkaluarunilluunniit, assigiinngitsunik isummersornissaannut
qilersorniarneqanngillat naliliinissaannut.
Ataaserli malugisinnaasara unaavoq
naggataatungaanni partiit Katusseqatigiillu oqaaseqartuisa
kaammattuutigimmassuk ukiamut 2000-mi aammalu 2001-p ingerlanerani pisussat
eqqarsaatigalugit suliassat ingerlanneqarnissaannut tapertaalluarumaarlutik.
Taanna soorunami Siulittaasoqarfimmi aamma tusarlugu nuannerpoq, tassa
oqareernitsitut Siulittaasoqarfimmiit kaammattuutigineqartut aammalu
pilersitsigallarsinnaanermut tunngasunik isumaliutersuutigineqartut
qularinngilluinnarpara uterfigeqqikkumaarigut uani saqqummiussat partiit Kattusseqatigiillu
saqqummiussaat najoqqutaralugit.
Tassa uani
mianersuuttariaqarsorivara aamma saniatigut assigiinngitsut taakkartorneqarmata
inuusuttut suleqatigiiffii, soorunami aamma Isumaginninermut
Ataatsimiititliarsuup suliai taakku inuiaqatigiinnut alimmasissumik
avinngarusimasumik, imaluunniit inuiaqatigiinnut tamarmiunerusumik, utoqqarnut,
meeqqaanut inuinnarnullu tunngasuummata, taakkua ssorunami suliassissutaat
akulerunnaversaarnissaat mianerisariaqassagatsigu. Uani pineqartoq qulequtaa
aallaaviginiarsarissavarput tassalu: Utaqqiisaagallartumik imaluunniit
aalaakkaasumik meeqqat inuusuttuaqqallu pillugit Inatsisartut toqqaannartumik
ataatsimiititaliaqarnissaannik siunnerfik malinneqassanersoq imaluunniit
oqareernitsisut ukiamut ataatsimiinnissami ataatsimiititaliat assigiinngitsut
pisassaqariisa pisussaaffiisalu katitiganerisalu aaqqissuussivigineqareneranut
atatillugu uterfigeqqitassatut.
Jakob Sivertsen, Atassutip
oqaaseqartua:
Siunnersuut paasilluarparput aamma
Atasssummi siunnersuutit takkuttut nalilersortarpavut, soorunami
nalilersorneqartussaammata. Erseqqissassavara immikkut
ataatsimiititaliortoqartarmat aatsaat suliassamik aalajangersimasumik. Uani
meeqqat inuusuttullu pillugit suliassat amerlasoorparujussuupput, taamaattumik
piffissami aalajngersimasumik killiliilluni aaqqiiniarnissaq
ajornakusoortorujussuussaaq uagut nalunngilarput, taamaattumik siunnersuut una
soqutigigatsigu naggataatigut oqaatigaarput ukiamut aalajangiiffigisassamik
saqqummiussaaqrniarluta. Tassa marloriarluta aamma siunnersuuteqarsimavugut,
soorunami tamatigut angusaqartarpugut, nalunngilarput minnerpaannguarluunniit
angugaangatsigu qujasarpugut. Kisianni naammagisimannginnatsigu taava ukiamut
saqqummiussaqassaagut meeqqanut inuusuttunullu immikkut inunnik isumaginninnermi
qullersaqarfiup ataani pilersitsisoqassasoq taannalu allaffik ataavartumik
ingerlanneqassaaq. Tassa aallaassutaa uagut saqqummiussarput aammalu
taamaalilluta siunnersuut uani oqaatigineqartoq taperserlugu ataavartumik
pilersitsinissaq taanna siunnerfigisimagatsigu. Aamma soorunami partii
piinnaavillugu naaggaanngisaannarpugut, taamaattumik nalilersuineq
pingaartipparput. Inatsisartuni sulineq tassaavoq nunarput tamakkerlugu
sullivik, taamaattumik arlaatigut akerliuniaannartutut oqarnissaq taanna
akuerisinnaanngilarput.
Anders
Andreassen, Inatsisartut siulittaasoqarfiani ilaasortaq:
Erseqqissaatigilaarlara
apeqquteqaatit aallaavigalugit oqallinnerit tassaasarmata politikkikkut
"tipisiuineq", maannakkullu partiit oqaaseqartui malillugit paasinarpoq
maannakkuugallartoq taanna siunnersuutigineqartoq ilalernartinneqanngitsoq,
taamaattumik ersarippoq amerlanerussuteqartut qanoq eqqarsaatersuuteqartut.
Ruth Heilmann, Siumup
oqaaseqartua:
Tassa Siumuminngaanniit
erseqqissaatigerusuinnarpara siunnersuut taanna Siumuminngaanniit
ilalernartinneqanngimmat aammalu Siulittaasoqarfiup taamatut akissuteqarnera
isumaqataaffigigatsigu, aamma taanna erseqqissaateqarfigaarput, uanilu
soorunami tamatta partiit aamma Kattusseqatigiit tamatta assigiinmmik qularnanngitsumik
meeqqanut uummateqarput aammalu suliniaqataarusulluta sakkortuumik
sakkortunerpaamillu, taamatut oqaatigineqarsinnaappat.
Taavalu uani naalakkersuisunut
kissaatigisimavarput maannakkut meeqqanut inuusuttuaqqanullu suleqatigiiffiit
aammalu peqatigiiffiit kiisalu kattuffiit taamatut meeqqat inuusuttuaqqallu
atuarisaannut suliniartut tapersersorneqarnissaat ataqatigiissaartumillu
iliuuseqarfigineqarnissaat taanna kaammattuutigeqqipparput Siumuminngaanniit,
taannalu erseqqisaatigerusuppara. Aamma uani siulittaasup oqaatigisaa,
tassagooq Isumaginninnermut Ataatsimiititaliarsuup meeqqanut inuusuttuaqqanullu
kaammattuutigeriigai uani akulerussuunneqartariaqanngimmata.
Isumaqarpunga innuttaasut
peqataatillugit annertuumik meeqqat inuusuttuaqqallu atugarisaaannik
pitsanngorsaatissat kaammattuutillu oqallisigineqartut aamma
isumaliutissiissuarmiittut kaammattuutigineqartut tassaassaasut siunissami
anguniagassatut toqqammavissat taakkulu aallaavigalugit suliniarneq
ingerlanneqartariaqarpoq. Isumaginninnermut Ataatsimiititaliaq uanga upperaara
aamma meeqqanut inuusussuaqqanullu politikkeqarluni aamma suliniaqataasusaq.
Aamma upperaara Kultureqarnermut Iliniartitaanermilu aamma meeqqanut
inuusuttuaqqanullu aamma siunnerfeqartumik aamma politkkeqarluni ingerlatsissasoq.
Taamatuttaaq Peqqinnissaqarfimmi aamma ataatsimiititaliami aamma Paarisa
suleqatigalugu annertuumik meeqqat inuusuttullu atuarisaannut tunngatillugu
erseqqarissumik aamma anguniagaqarluni meeqqanut iliuuseqarniartoq
inuusuttuaqqanullu.
Aammalu kommunit nammineerlutik
iliuuseqarnertik annertuumik aallartereerpaat, taamaattumik uani
kissaatigisimanngilarput ataatsimiititaliortoqarnissaaa immikkut suliniarneq
annertooq ingerlatinneqareermat. Tassuunakkut imminut utaqqisaqattaanneq
piinalissaaq ataatsimiititaliaq utaqqillugu allap nutaap ivertitaasup qanoq
iliuuseqarnissaa. Taanna uagut orniginartissimanngilarput. Qujanaq.
Loritha
Henriksen, Kattusseqatigii oqaaseqartuat:
Tassa uangattaaq erseqqisarusuppara
assorujussuaq meeqqat atugaat pingaartikkatsigit, taamaattumik ima
nipilerneqassanngilaq, uagut ataatsimiititaliami imaluunniit partiini
issiasugut taanna siunnersuut minnerpaamilluunniit tapersersorumanngikkipput,
soorlu meeqqat atugarisaanik ikiueqataarusunngitsugut. Taamaanngilluinnarpoq, isumaqarpunga
inunnik isumaginninnerup iluani aammalu peqqinnissaqarfiup iluani
annertoorujussuarmik meeqqat oqallisisigisimagivut aammalu meeqqanut
pitsaasumik atugaqarnissaq annertuumik suliniutigisimagipput. Tusaamavagut
aamma nalunngilluarlugillu "Atuarfitsialak" -mut tunngatillugu
annertoorujussuarmik aamma meeqqat tassani sammineqartussaasut, taamaattumik
isumaqarpunga tamakkua sammineqartut ullutsinni massakkorpiaq pisut
qaleriiaappallaannginnissaat aamma inunnut qasunarsisinnaammata. Suliap sumut killinnera takoqqaarlugu
ataguli ingerlatsigu. Isumaqarpunga tassani akerliuniarnermik
minnerpaamilluunniit imaluunniit isumaqataannginnermik tunngaveqanngitsoq,
kisianni suleqatigiikkaanni nalilersuisinnaagaannilu kingusinnerusukkut aamma
pitsaasumik naliliinissaq kinguneqartarmat.
Anders Andreassen, Siulittaasoqafimmi ilaasortaq:
Tassa
tunngavilersuutit ersarereerput, kisiannili oqaatigeqqissavara
aalajangiisinnaannginerput taanna eqqaasitsissutigalugu. Kingulliulluni
oqaaseqarniarpoq Gomand Rasmussen, Atassut partiit oqaaseqartuisa avataatigut.
Godmand Rasmussen, Atassut:
Uanga naatsuaaraarannguamik. Una
oqallisissiaq paasinarluarpoq kisianni uanga isumaqarpunga killormut saatillugu
oqartariaqarlunga. Meeqqanut suliniutit amerlasoorujussuit nalunngilavut aamma
immineersimaneqanngillat meerartatta pitsaaneursumik
atugaqartinneqarsinnaanerat. Siunnersuuteqartup oqaaseq atugaa
isumaqatigilluinnarpara, meerartatta pitsaanerusumik atugaqarnissaanik
ineriartortitsisinnaaneq. Uanga nammineq isumaga anissagukku isumaqarpunga
meeqqat tassani oqareernittuut suliniarfigineqarnerat annertuvoq,
sulianiarfissagunuku kikkuusut? Angajoqqaat qanorluunniit akissarsiamikkut
appasitsigingaluaraangamik angerlarsimaffinnguami ajunngitsumilluunnit
ineqaraluartut qitornaminnut assanninnermik takutisisinnaasut meeraat
pitsaasumik peroriartortarput. Ullumikut meeqqat sumiginnagarpassuit
illoqarfimmi sumi tamaani nalunngilavut, taava sumiittoruna ajornartorsiut?
Angajoqqaanuna uagut asanninnermik pigisaqanngippallaartugut qitornatsinnut,
tassa taakkorpiaasariaqarput qaammasaaffigisassavut. Angajoqqaat
meeqqiorsinnanngillat perorsarsinnaanngisaminnik imminniiginnakkaminnik. Meeraq
pitsaasumik asaneqartoq pitsaasumik tunngavilimmik peroriartortitaasarmat.
Isumaqarpunga taanna qaammarsaaneq angajoqqaaniittariaqartoq.
Anders Andreassen, Inatsisartut
siulittaasoqarfiani ilaasortaq:
Qujanaq. Oqaatigissavara apeqquteqaat
aallavigalugu oqallinnermi Inatsisartut aalajangiisinnanngimmata, taamaattumik
Inatsisartunut ilaasortat meeqqat pillugit ataatsimiititaliaagallartumik
pilersitsinissamik kissaateqartut siunnersorusuppakka Inatsisartut ukiaru
ataatsimiinnissaannut suliriaaseq naapertorlugu Inatsisartut
ataatsimiititaliaanik allanik pilersitsivigisinnaasaannik meeqqat pillugit
ataatsimiititaliaagallartumik pilersitsisoqarnissaannik
siunnersuuteqaqqullugit. Ajorineqanngilaq, taavalu taamaalilluni tassa
oqallinneq naammassivoq.
Oqaluuserisaq naammassivoq.