Kalaallit Nunaanni Inatsisartut

Oqaluuserisassani immikkortoq 2		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ulloq ataatsimiiffik siulleq, ataasinngorneq 20. januar 2003, nal. 13:02

 

 

Oqaluuserisassani immikkortoq 2

 

 

Ullormut oqaluuserissanut nassuiaat.

(Inatsisartut Siulittaasoqarfiat)

 

 

Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.

 

 

Jonathan Motzfeldt, Inatsisartut Siulittaasuat, Siumut.

Naalakkersuisunik nutaanik qinersinissaq siunertaralugu Naalakkersuisut Siulittaasuata qinnuiginninnera naaperstorlugu Inatsisartut immikkut ittumik ataatsiminiinnissaanni oqaatigineqareersutut aggersaasoqarpoq. Tamanna Inatsisartut Suleriaasianni § 37, immikkoortut 3 aammalu Inatsisartut Naalakkersuisullu pillugit Inatsisartut inatsisaanni § 9, immikkoortoq 2 naapertorlugu pivoq.

 

Inatsisartut Suleriaasianni § 37, immikkoortoq 3 naapertorlugu Inatsisartut immikkut ittumik ataatsimiinneranni suliassat ataatsimiigiaqqusinissamut tunngaviusut taamaallaat Inatsisartunit suliarineqartarput, taamaattumillu ullormut oqaluuserisassat aqqaneq-marlunnik immikkoortortaqar­nerat immaqa tupigusuutigineqarsinnaavoq, tamannali Naalakkersuisunik nutaanik qinersinerup nassatarisaattut isigineqartariaqarpoq.

 

Inatsisartut Naalakkersuisullu pillugit Inatsisartut inatsisaanni § 5, immikkoortoq 2-mi oqaaseqatigiit kingulliit naapertorlugit Naalakkersuisuusut atuukkunnaarsinneqarpata inatsimmi tassani § 3 naapertorlugu Naalakkersuisussanik nutaanik qinersisoqassaaq, tamannalu malillugu Naalakkersui­sut Siulittaasussaat siulliullugu qinerneqassaaq tamatumalu kingorna taanna Naalakkersuisunut ilaasortassat sinneri ataatsimoortillugit qinerneqarnissaat pillugu Inatsiartunut inassuteqassaaq.

 

Periuseq nassuiaatigineqartoq naapertorlugu Naalakkersuisut nutaat qinerneqareerpata Inatsisartut Naalakkersuisullu pillugit Inatsisartut inatsissaanni § 7 naapertorlugu Inatsisartut nutaanik inissitsi­tissapput. Tamatuma kingunerisaanik Inatsisartut Siulittaasussaannik Siulittaasullu tullisaanik qinersisoqassaaq, soorluttaaq Inatsisartuni ataatsimiititaliani tamani ilaasortassanik nutaanik qinersisoqassasoq.

 

Ullormi ataatsimiiffiusumi immikkoortut 3-miit 5-imut oqaluuserineqarnerannut oqaaseqarnissa­mut piffissaliussat uku atuunnissaat Siulittaasoqarfimmiit siunnersuutigineqarpoq: Siullermeernermi partiit oqaaseqartui minutini 15-ini, aappassaaneernermi minuttit tallimat. Ilaasortat siullermeerner­mi minuttit tallimat, aappassaaneernerni aamma minuttit tallimat, tamannalu Inatsisartunut oqaase­qarfigeqqussavara.

 

Jørgen Wæver-Johansen, Siumup oqaaseqartua.

Qujanaq. Naalakkersuisunik nutaanik qinersinissaq siunertaralugu maani katersuussimanitsinni Siumumiit Inatsisartut Siulittaasoqarfianut qujassuteqarusuppugut, suliap piaartumik aaqqiivigine­qarnissaa siunnerfigalugu maannakkut katersorsimammatigut.

 

Ullormut oqaluuserisassat saqqummiunneqartut isumaqatigigatsigit annerusumik oqaaseqarfigis­sanngilagut erseqqissaannassalluguli katersuunneq manna Inatsisartut immikkut ittumik aalajangiif­figineqartussat pillugit ataatsimiinnerimmassut, taamaammat immikkoortunut oqaaseqarfiusussanut oqaaseqarnissamut piffissaliussatut siunnersuutigineqartut Siumumiit ataqqillugit akuersaaratigit.

 

Taamatut oqaaseqarluta ullormut oqaluuserisassanut nassuiaat akuersaarlugu tusaatissatut Siumu­miit tiguarput.

 

Aqqaluk Lynge, Inuit Ataqatigiit oqaaseqartuat.

Qujanaq. Inuit Ataqatigiit ullormut oqaluuserisassanut Siulittaasup nassuiaataanut annertunerusu­mik oqaasissaqanngilagut, tassalu oqaaseriumasagut kingusinnerusukkut annikkumaaratsigit, taamaatumik oqaluuserisassanut nassuiaat tamaat akueraarput.

 

Jakob Sivertsen, Atassutip oqaaseqartua.

Inatsisartut Siulittaasuata ullormut oqaluuserisassatut nassuiaat saqqummiussaa Atassumiit annertu­nerusumik oqaaseqarfiginagu taamatut isikkoqarluni akuersissutigineqarnissaa tusaatissatut tiguar­put. Qujanaq.

 

Per Berthelsen, Demokraatit oqaaseqartuat.

Qujanaq. Aamma Demokraatit tungaaninngaanniit annertunerusumik takisuuliorata nalunaarutigissa­varput Inatsisartuni Siulittaasup tikilluaqqusinera nuannaarutigalugu tigugatsigu, aammalu oqaatigi­neqartut ullormut oqaluuserisassanut atatillugu tusaatissatut tigugatsigit.

 

Anthon Frederiksen, Kattusseqatigiit oqaaseqartuat.

Ullormut oqaluuserisassanut nassuiaat immikkut oqaaseqarfiginagu nalunaarutigiinnassaavara Kattusseqatigiinniit naatsorsuutigisimanngilluinnaraluaratsigu ullumikkut januarip 20-ani Inatsisar­tut immikkut ittumik ataatsimiissasut, taamaattumik Naalakkersuisunngorumaartussanut kaammat­tuutigiinnassavara sapinngisamik suleqatigiinneq pitsaasoq aammalu neriorsuutigineqartut  suleqati­giilluarnissamik attanneqassasut, tassami qaammatit tamaasa Inatsisartut immikkut ittumik ataatsi­miigiaqquneqartalissappata akissaqartinnginnatsigu inuiaqatigiinni. Qujanaq.

 

Jonathan Motzfeldt, Inatsisartut Siulittaasuat, Siumut.

Taamaalilluni ullormut oqaluuserisassat taakku malillugit atatsimiinnissaq maannamiit ingerlassaaq. Taava oqaluuserisassat immikkortut pingajuannut maannakkut ingerlassaagut tassalu Naalakkersui­sut atuukkunaarsinneqarnerat Naalakkersuisut Siulittaasuannit.