Oqaluuserisassani immikkortoq 4 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq
ataatsimiiffiusoq siulleq, ataasinngorneq 20. januar 2003, nal. 13:37
Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.
Jonathan Motzfeldt, Inatsisartut Siulittaasuat, Siumut.
Taava tulliuppoq Naalakkersuisut Siulittaasussaaannik qinersineq. Maanna ullormut oqaluuserisassani immikkoortoq 4 Naalakkersuisut Siulittaasussannik qinersineq oqaluuserissavarput.
Inatsisartut Suleriaasianni § 5, immikkoortoq 2 naapertorlugu Naalakkersuisut Siulittaasuat Inatsisartut ilaasortaasa akornannit amerlanerussuteqarluarnikkut qinerneqartussaavoq. Maannalu Inatsisartut kaammattorumavakka Naalakkersuisut Siulittaasuattut qinigassanngortitsillutik siunnersuuteqaqqullugit.
Jĝrgen Wĉver-Johansen, Siumup oqaaseqartua.
Qujanaq. Januarip ulluisa 16-anni Siumut Atassullu Naalakkersuisunngortitseqatigiinniarlutik isumaqtigiissuteqarput. Naalakkersuisooqatigiilernermut isumaqatigiissut qulequtaqarpoq Atatigeqatigiinneq, Toqqissisimaneq, Inuiaqatigiit ingerlalluartut. Isumaqatigiissut qulinik imartuunik immikkoortortaqarpoq, anguniakkat piviusunngortinneqarunik inuiaqatigiinnik kalaallinut pingaarutilimmik pitsaasumillu kinguneqartussat.
Isumaqatigiissutigineqarportaaq Naalakkersuisooqatigiit akunnerminni Naalakkersuisoqarfinnut qanoq agguaaqatigiinniarnerat, naluneqanngitsutullu Naalakkersuisut Siulittaasuata Siumumit inuttalerneqarnissaa isumaqatigiissutaavoq Tamanna Siumumi tulluusimaarutigaarput.
Siumumi nalorninngillinnarluta Atassummut isumaqatigiissuteqarnerput naapertorlugu partiitsinni ataatsimoorluinnarluta Naalakkersuisut Siulittaasussaattut Hans Enoksen qinerneqarnissaa inassutigissavarput.
Josef Motzfeldt, Inuit Ataqatigiit oqaaseqartuat.
Inuit Ataqatigiit periarfissaq manna atorlugu naalakkersuinikkut nunatsinni pissutsit atuutsinneqalersutut nalilertariaqakkavut oqaaseqarfigilaassavagut.
Ilisimaneqartutut sapaatit akunneri tallimat matuma siorna Inatsisartunut qinersereernerup kingorna Naalakkersuisut taamanikkut uagut peqataaffigisagut ivertinneqarput. Qineqqusaarnerup nalaani innuttaasunit isummat saqqummiussorneqartut taamanikkut nalilerneqarnerat Naalakkersuisunngor-titseqataanissamut peqataarusunnitsinnut tunngaviulluinnarsimapput.
Ilaatigut:
innuttaasut atukkamikkut naligiinnerusumik atugaqalernissaannik,
inuussutissarsiutitigut ineriartortitsinikkut nunatta aningaasarsiornikkut imminut napatikkiartornissaata isumannaarniarnissaannik,
Namminersorneq pillugu Isumalioqatigiissitap suliaata pilersaarusiukkamik ingerlatseqqinnissaanik,
innuttaasut oqartussaaqataanerisa sutigut tamatigut annertusarneqarnissaanik timitalerneqarnissaanik
kiisalu pisuussutinik atuinermi piujuaannartitsinissaq avatangiisinillu illersuineq tunngavigalugu ingerlatsinissamik qineqqusaarsimanermi pingaartillugit saqqummiussimasagut tunngavigalugit isumaqatigiissutigisinnaanerisa.
Saniatigut soorunami Naalakkersuisunngortitseqatigiumallugit isumaqatiginiakkatta, minnerunngitsumik Siulittaasuata, partiimut kammalaataalluarnerinnaq pingaarnerutillugu paartiimi ilisarnaatigilersimasaanik atorunnaarsitsilluinnarniarluni qineqqusaarnermi ilungersuuteqarnera tusarluarnaqimmat, isumalluarluata isumaqatigiissut atsiorparput.
Tamakku killingisigut inuiaqatigiit ingerlaqqinnissaanni sammivissat pisariaqavissut isumaqatigiissutiginerinut naqitanngorlugit atsioqatigiissutigisatsinnut makku ilanngunneqanngillat:
ilisimatitseqatigiittuarnissaq,
inatsisinik toqqammaveqarluni ingerlatsinissaq,
inuiaqatigiit ingerlanneqaneranni namminerisatsinnik nunami maani sorlaqarluni inuiattut namminiussuseqarnitsinnut takutitsisumik ilusiliinissaq.
Tamakku ilanngutsinnissaat pisariaqartutut isigisimanngilagut pissusissamisoortutut allassimanngikkaluarlutik najoqqutarisariaqakkatut isumaqarfigigatsigik.
Naalakkersuisooqatigiinneq ulluminiinnannguanik ingerlareersoq naalakkersuisooqatigiit susassaqarfigilluinnagaannit arajutsisilluta arlalinnik pisoqarfiuvoq pisortanik arlaqartunik atorfinitsitsisoqarneratigut. Naalakkersuisooqataasut iliuutsinut naalakkersuisooqataasutut iliuutsinut akisussaaqataarusukkatta tamanna erngerlugu Naalakkersuisut Siulittaasoriligaannut naalakkersuisooqatigiinneq sapaatit akunneranik ingerlariiginnartoq iluarsiivigeqqullugu Inuit Ataqatigiit saaffiginnissutigaarput. Tamanna aatsaat sapaatit akunnerisisa pingasut ingerlareerneranni Naalakkersuisut Siulittaasuannit qanoq iliuuseqarfigineqarpoq.
Pisortaagallartunik atorfinitsitsigaluarnerit Inuit Ataqatigiit Naalakkersuisooqataasutut arajutsisillugit taamalu periutsit nalinginnaq atuuttut saneqqullugit iliuuserineqarput. Naak naalakkersuisoqarfinni tamani pisortatut atorfillit Naalakkersuisut tamarmiulluta sulinitta nalilerneqarnerannut attuumassuteqarluinnartut.
Naalakkersuisut Siulittaasuata qanoq iluuseqannginnerata kinguneranik anersaakkut upperisamullu tunngasuni innuttaasut qanimullu Namminersornerullutik Oqartussani sulisorisagut innimiilliorfigineqarlutik tujormisinneqarput. Atorfinitsinneqaraluartut soraarsinneqarnerinnaasigut pisut kanngunartut qaangerneqanngillat, naatsorsuutigisariaqarpoq suliassaq Inatsisartut Ombudsmandiata suliassatut pingaartutut isumagissagaa. Tamannali naammanngimmat Inatsisartut upernaakkut ataatsimiinnissaanni nassuiaassutigineqassaoq Inuit Ataqatigiit sulissutigissavarput.
Naalakkersuisunut Siulittaasuusartut pisarnerattut Naalakkersuisut Siulittaasuat ukiortaami oqalugiaateqarpoq Naalakkersuisooqatigiinnik tunuliaqutaqarani. Taamanikkut illuatungiliuttuusut Atassutikkut, Demokraatit Kattusseqatigiillu tamakkerlutik sulluginnillutik sakkortuumik qisuariaateqarmata tupiginngilagut.
Tamatuma kingorna Christiansborgimi Inatsisartut Folketingillu Siulittaasoqarfiisa aaqqissugaannik naalagaaffigeqatigiinnerup siunissaa pisariaqarmat persuarsiornartumik ulloq naallugu oqallissutaammat mikrofoonit ammasut assiliissutillu ammasut/ingerlasut Naalakkersuisut Siulittaasuannit nunatsinnit oqariartuutigisinnaasimasaraluagut anngunneqanngitsoorput ukiortaamimi oqalugiaatimi ilamernga qupperneq ataatsimut naalisagaq saqqummiutiinnarmagu.
Qaammat ataasiinnaq Naalakkersuisuni Siulittaasorisimagaluarlugu naalakkersuisooqatigiit ilutsinni aaqqiineraluarnerput misilittakkatut innersuussutigalugu Naalakkersuisoqarfinni atorfillit partiiminilu atorfillit immikkoorluinnarnerat paasisinnaanngimmagit naalakkersuinermi suliniarnermi tamanna ilungersunartutut isumaqarfigaarput, periutsillu tamakku qimanngikkunigit naalakkersuisooqateqartutut pissusilersulissasoq ilimananngilaq.
Pisortaanerugallartumik atorfinitsitsigaluarnermini tunngavilersuutigisaa eqqaaginnaraanni isummaminik illersuisinnaasunik atorfinitsitsiumalluni nutaanik Naalakkersuisooqateqalernerinnamigut siunnersorterpassuarnik pisariaqartitsinera kipinavianngitsoq paasinareerpoq.
Inuit Ataqatigiit isumaqarpugut Naalakkersuisooqatigiinnermi isumaqatigiissuteqarsimagaanni Naalakkersuisooqatigiit anguniakkamissut isumaqatigiissutigisaat sulinermi tunngaviusariaqartut, tassaammat partiit arlaqartut Naalakkersuisooqatigiikkumallutik isumaqatigiissuteqartariaqartarnerisa isumarpiaa. Aammami naalakkersuinikkut namminerisanik isumaqaraanni minnerunngitsumik Naalakkersuisut Siulittaasuattut imminut piukkussimagaanni minnerpaammik ilimagisariaqaraluarpoq nammineq isummanik illersuisinnaassuseqarnissaq.
Matumani ajornartorsiuterpiaasoq Naalakkersuinikkut suleqatigiikkumalluni isumaqatigiissuteqarnermiiginnanngitsoq Atassutip Siumullu Naalakkersuisooqatigiillutik isumaqatigiissutaata, tamakkingajavilluni Inuit Ataqatigiit isumaqatigiissutissatut Siumumup akueritissimasaata allanngortinnagu atorneqaqqiinnarsimaneratigut takuneqarsinnaavoq.
Tamanna naalakkersuinikkut akikilliliineq allaanngilaq niuertarfiit tuniniakkaminnik uninngaannalersunik akikilliliisarnerat.
Qanormi innuttaasut oqartussaaqataanerisa sutigut tamatigut annertusarneqarnissaa timitalerneqarnissaalu anguniassallugit atsiorsinnarluni Naalakkersuisooqatini qoqassillugit sulisorisallu ataqqinassuseqanngitsutut tullaaralugit nikanarsaasoqarsinnaava. Oqaatsit periutsininik nalituunik imaqartut isumaqassutsimikkut matumani kimeerussarneqarput.
Piffissaq kingullermi oqallinnermi Naalakkersuisooqatigisimasatsinnit kalaalinngorsaanermik taasaq annanniutitut annertuumik ukapaatitsiniutigineqarpoq. Inuit Ataqatigiit anguniagarput tassaajuarsinnarpoq aamma inuiaqatigiit kalaalllit anguniagaat tassaajuarsinnarpoq nunat tamalaat inatsisaannik tunngaveqartumik inuiaqatigiit kalaallit inuiattut nammineq nunaminnik pisuussutaannillu pigisaqartutut akuerineqarnissaat. Aamma upperaarput peqatigiinneq ajattuinerunngitsoq kalaallit nunatsinni ilisarnaatitsitut atuutsinneqartariaqartoq.
Inuit Ataqatigiinnut inuiaqatigiit ingerlanneqarneranni sutigut tamatigut namminerisatsinnik ingerlaaseqalernissaq suliassaavoq pingaaruteqarluinnartoq ataqqinassuseqartumik ingerlanneqartariaqartoq. Namminersornerullutik Oqartussani aallartinneqaruni inuiaqatigiinni ingerlatsinermut tamarmut ataatsimoorfigisatsitut siammaakkiartortussaq.
Taamaattumik Naalakkersuisooqatigiinnerup ingerlanerani apeqqutip pingaartup Naalakkersuisuni isumasioqatigiiffiginissaa kattuffiit, suliffeqarfiit misilittagaqareersut aamma sulisut sinniisaat peqatigalugit ingerlanneqassaoq siunnersuutigigaluarparput.
Isumasioqatigiinnermi paasisat toqqammavigalugit Naalakkersuisut pilersaarutaata nalunaarusiatut saqqummiunneqarluni Inatsisartunut saqqummiunneqarnissaa avaqqunneqarsinnaanngilaq, taakkununngami akisussaassuseqarlutik Naalakkersuisut sulisussaapput aningaasartaqassappat Inatsisartut akuersisussaammata aamma.
Suliassaq tamanna pingaaruteqartoq piviusunngortissallugulu pilerinartoq naalakkersuinikkut siunnerfeqanngitsumik utaqqiisaagallartutut pisortanngortitsiinnarluni nalinginnaliorfigisariaqanngilaq. Suliassaq pingaarutilik naalakkersuinikkut toqqammaveqartariaqarpoq innuttaasut peqatigalugit isummersoreernermilu aalajangikkat piviusunngortitsiniarnermi ilinniarsimasortagut ilinniakkatigut inuttullu piginnaasatik naapertorlugit sulisussarsiariniartariaqarput..
Tamakku toqqammavigalugit Naalakkersuisut Siulittaasussaattut siunnersuutigineqartoq akuerinagu Inuit Ataqatigiit taasissaagut.
Jakob Sivertsen, Atassutip oqaaseqartua.
Qujanaq. Inuiaqatigiit naalakkersorneqarnermikkut toqqissillutik naatsorsuutiginnissinnaallutik ingerlaqqinnissaat qulakkeerumallugu Atassummiit sutigut tamatigut suleqataanissarput qularutigineqassanngilaq, aalaakkaasumillu naalakkersuinikkut inuiaqatigiit ingerlanneqarnissaat Siumut peqatigalugu isumaqatigiissuteqarnitsigut qulakkeerniarsimavarput aningaasarsiornikkut, inuussutissarsiornikkut, nunanut allanut attaveqarnikkut, ilinniartaanikkut, minnerunngitsumillu inuiaqatigiit peqqinnissakkut isumagineqarnikkullu sullinneqartuarnissaat isumaqatigiissut aqqutigalugu qulakkeerniarneqarmat. Atassummit misigisimavugut tungavissaqarluartoq inuiaqatigiit inatsisiliornikkut naalakkersorneqarnikkullu isumannaatsumik tunngavissinneqartussanngortut.
Naalakkersuisooqatigiinnissami isumaqatigiissutitsinni pingaarnertut qulequtaraagut Tatigeqatigiinneq, toqqissisimaneq inuiaqatigiillu ingerlalluartut, isumaqatigiissutillu imarisamigut inuiaqatigiinni innuttaasut tamaasa ajunngitsussap tungaanut kalluartussaagai Atassummit qularutiginngilarput, taamaammallu periarfissagut tamaasa atorlugit isumaqatigiissutip timitalerneqarnissaa sulissutigissagipput aamma qularutigineqassanngilaq.
Atassummit Inatsisartuni suleqataanitsinni suliassanik ilungersunartunik inuiaqatigiinnullu sunniuteqartaqisunik suliaqartarneq misilittagaqarfigaarput. Taamatuttaaq partiinik allanik suleqateqarluta naalakkersuisooqatigiinnermik misilittagaqareerluta. Ullumikkullu Inatsisartut immikkut ittumik ataatsimiinneranni Atassut Siumullu peqatigiilluni tatigeqatigiillunilu angusaqarsinnaaneq upperalugu, tunaartaralugulu Naalakkersuisooqatigiinnissamik isumaqatigiissinnaasimanerput Atassummi gruppi sinnerlugu, minnerunngitsumillu sineriassuatsinni immikkoortortaqarfigut, qinersisigullu sinnerlugit inuiaqatigiinnut nalornisigeqqunngilarput naalakkersuisooqatigiinnissamik isumaqatigiissut tunngavigalugu Inatsisartuni sulissagatta.
Taamatut Atassummit oqaaseqarluta Naalakkersuisut Siulittaasussaatut Hans Enoksen siunnersuutigineqartoq taaseqataaffigissavarput. Qujanaq.
Per Berthelsen, Demokraatit oqaaseqartuat.
Qujanaq. Sapaatit akunnerini kingullerni tallimani arfinilinni nunatta peqqusiileqinaqisumik ingerlanneqarnera isiginnaareerlugu aammalu ulluni qulini kingullerni sutigut tamatigut malugalugulu misillerfigereerlugu nunatsinni partiitoqqat qanoq tutsuiginanngitsigisumik suleriaaseqartut qanorlu tatiginanngitsigisumik pissusilersortuusut qassiiliutiginagu Demokratit tungaaninngaanniit taaginnassavarput, uagut tungitsinninngaannit upperiuarsinnaratsigu nunatsinni politikikkut ingerlatsinermi naalakkersuinermilu tunngavissatuaasoq tassa, atituumik tunngaveqartumik naalakkersuisooqatigiiliorneq, pimoorussilluni, piviusorsiorluni naligiinnermillu aallaaveqarluni pilersitaasumik.
Taamaattumik oqarluartaaqaluni saniatigullu pissutsinik allarluinnarnik takutitsiuarluni ingerlanermi annertunerusumik peqataanata Demokratininngaanniit nalunaarutigiinnassavarput Naalakkersuisut Siulittaasussaanik qinersinermut atatillugu taaseqataassannginnata.
Anthon Frederiksen, Kattusseqatigiit oqaaseqartuat.
Naluneqanngitsutut Inatsisartunut qinersereernerup kingorna decemberip 14-iat 2002-mi Naalakkersuisussanik pilersitsineqalermat taaseqataasimavunga akuerseqataallunga aamma taamanikkut nassuiarpara suna pissutigalugu taamaaliorlunga, kisianni maannakkut Naalakkersuisunngortitseqqinnissami assut eqqarsarnartoqartippara ilumut akuerseqataallunga taaseqataassanerlunga.
Siusinnerusukkulli oqaatsit tusartuartakkagut aamma massakkut anniseqqinneqarput, tatigeqatigiinneq, toqqissisimaneq, inuiaqatigiillu ingerlalluarnissaat. Tamakkua upperalugit decembarip 14-iani akuersaarlunga taaseqataasimavunga, kisianni decemberip 14-ianinngaanniit ullut imanna ikitsigisut qaangiummata aamma nutaanik Naalakkersuisortaaqqinnialerpugut. Taamaattumik oqarfigissavassi uanga upperinngilluinnarpakka oqaatigineqartut, tatigeqatigiinneq, toqqissisimaneq inuiaqatigiillu ingerlalluartut pilersinneqarnissaat neriorsuutigeqqinneqarmat.
Ilumut taamatut oqaluttuarluta neriorsueqattaarluta oqaatsillu piviusunngortissinnaannagit, taava upperineqarnissarput sumiissava.
Killeqartarpoq suna tamarmi.
Taamaattumik oqaatigerusuppara uanga maannakkut Naalakkersuisooqatigiinniarnermi pilersitsiniarnermi aamma taaseqataaniannginnama, pinnguartoqanngilaq aamma nalunngilara manna ataatsimiittarfik pingaaruteqaqisoq inuiaqatigiit ingerlanissaanni asuleernata ingerlanissatsinni toqqammavissiisussaq aammalu oqaatsinik eqqortitsinissaq innuttaasut toqqissisimasumik ingerlaqqinnissaat tassuuna anguneqartussaagaluarmat, tassami Naalakkersuisooqatigiinnerup atorunnaarsinneqarnissaanik nalunaartoqarmat oqaatigineqarpoq suliassat arlallit inuiaqatigiinnut pingaaruteqaqisut ajoraluartumik ilaalluunniit suli aallartinneqarsimanngitsut, uninngasut, massa inuiaqatigiinni inuutissarsiornermut pingaaruteqaqisunik ilaatigut ingerlatsisut annertuumik pisariaqartitsigaluartut.
Taamaattoq piffissaq annertooq ilaatigut maannamut atulussinnarneqartoq qiviaraanni, oqartariaqarpunga ilumut oqaatsit uteqattaarneqartut tatiginassuseq, toqqissisimaneq, taakku sumiippat, taakkua timitalerniartariaqarpasi, kisianni oqassuunga maannakkut uanga Naalakkersuisunngortitsinermi taaseqataasannginnama.
Jonathan Motzfeldt, Inatsisartut Siulittaasuat, Siumut.
Maannamut oqaaserineqartuni tassa siunnersuutaavoq kisimi Inatsisartuni ilaasortaq Hans Enoksen aamma maannakkumut oqaaseqarnissamut periarfissaqarputit.
Hans Enoksen, Naalakkersuisut Siulittaasuat, Siumut.
Qujanaq. Siullermik nuannaarutigaara innersuussutigineqarama taasisoqanngikkaluartoq, suli massakkut aamma uku oqaatsit aninneqartut oqaaseqarfigilaarusuppakka.
Tassa allatulli Inatsisartuni ilaasortatut uattut aamma pisinnaatitaaffeqarpusi tamassi, uanga naligalusi ilissitulli aamma pisinnaatitaaffeqarlunga qineqqusaarsimavunga innuttaasullu taasinerat tunngavigalugu maanga aamma inimut apuussinnaanngorsimallunga.
Pisinnaatitaaffik tamassi ilissi aamma taanna atorparsi.
Nikassaalluni oqalunneq aatsaat tusartuugaanni ajussagaluarpoq aammalu iluareqqusaarani sulineq. 1995-imili Inatsisartunut ilaasortanngorama ilissitulli pisinnaatitaaffeqarlunga maani sulineq aallartissimavara, qinersisartut tatiginninnerat annertusiartorsimavoq, neriuppungalu aamma pakatsisippallaarnagit sulinera ingerlassinnaassallugu.
Nikassarneqarnera taqissutiginianngilluaasappara, nikassarneqartarnikka ima sakkortutigipput allaat uanga misigisimalerlunga massakkut taamaaliorneqartarnikka tamaasa nukimmik pissarsiffigisalersimallugit. Taamaammat nikassaarusuttut allallu ingerlaannarsinnaapput, qasutinnavianngilaannga, akerlianik nukittoraluttuinnarlunga misigisimavunga.
Josef Motzfeldtitullu uanga pisinnaatitaaffeqarlunga maaniippunga, Josef Motzfeldt aamma Naalakkersuisuni Siulittaasunngorniarsinnaavoq aamma uanga killiligassarinngilara, kisiannili uani qaammammi pisumi kingullermi malunnarluinnarpoq pissaaneqarumassuseq aallaavigalugu partiit kattussuuteriaraluartut, kisianni pissaaneqarumanerinnaq piinnarlugu qujanartumik aamma inoqarpoq tunuartitsisinnaasunik - taakku ataqqivakka, aammalu ataqqiuassallugit, naak neriorsuutigineqartut namminerminnut pitsaasutut nalilersorneqarsinnaagaluartut.
Aamma ataasialinngilanga ataasiinnarmik oqaaseqarnera pillugu nikassarneqartarlunga maani oqaatiginngiluatsiaannarneqarpoq, kisianni taannartaa uniffiginianngilluinnaqqissaarpara.
Oqaatigereerpara ilissitulli pisinnaatitaffeqarlunga qineqqusaarsimavunga aammalu maannga inissinnissara politikimi sulinikkut tunuliaqutalik angusimallugu. Neriuppunga aamma ilissi taanna arlaani inissaq angusinnaassagissi, kisianni pingaarnerpaajuvoq iluareqqusaarani ilumoortumilli uummateqarluni innuttaasunut oqariartortaraanni aatsaat inissaq manna anguneqarsinnaasoq.
Oqaaqqissaarnianngilassi, kisianni pissutsit piviusut taamaapput, akisussaassuseqartumik innuttaasunik nikassaanasi suleqataaniaritsi, taamaaliornitsigut inuiaqatigiinni pissutsit ilorraap tungaanut aatsaat sangutissinnaavagut.
Ataasiakkaaginnarluta pissaaneqarumassuseq sumilu inissikkumaneq aallaavigiinnarlugit inuiaqativut pilliutigisaqattaarsinnaanngilavut.
Uanilu qaammammi kingullermi taamatut pisoqarpoq, uangalu akisussaassuseqartumik sapinngisamik inuiaqatigiinnut akikinnerpaamik, naak uannut periarfissaagaluartoq qinersisitsisinnaaneq, kisiani innuttaasut taamatut sallunaveeqqutigalugit atornerluisoqarsinnaanngilaq.
Taamatut nikassaasoqaraluartoq uannut apeqqutaanngilaq, pingaarnerpaavoq suleqatigiissinnaanerput, aammalu nikaginnillutik oqaluttunut oqaatigissavara taakkununnga suleqataanissara tunuartinnaviannginnakku, akerlianik peqataarusukkama inuiaqatigiit sullinneqarnissaannut. Qujanaq.
Josef Motzfeldt, Inuit Ataqatigiit oqaaseqartuat.
Nikassaanermik oqalunnermik aallaaveqarluni Naalakkersuisut Siulittaasussaatut qinigassannortinneqartoq oqaatsimini pingaarnerutimmagu nikassarneqartutut misiginini, taanna soorunami uagut akisussaaffiginngilarput.
Nikassaanermik nipilimmik Inuit Ataqatigiit oqalunngilagut.
Akisussaaffimmik inuk akisussaatinneqartoq inuttarsiuinata matumani akisussaaffeqarneq ingerlatsinermi qitiusariaqartoq, tunngaviusariaqartoq eqqartorparput.
Inuit ataasiakkaat nikanartutut eqqartunngilagut. Ajuusaarutigaarput akerlianik sulisorpassuit maani, innuttaasut, ilagiit kalaallit nikassarneqartutut misigisimallutik pinnguarineqarmata Naalakkersuisut Siulittaasorisimasaata qanoq iliuuseqarfiginngisaannik.
Suleqataarusuppugut aamma nikassaanianngilagut, ataasinnaarmik arlalinnilluunniit oqaaseqarneq Inuit Ataqatigiinni pingaarnerunngilaq, inuttut piginnaasaqarneq, inatsisinik malinnikkumaneq, suleqatinik ataqqinninneq, sulisunik mianerinninneq, taakkuupput Inuit Ataqatigiit pingaartitaat aammalu inuit tamatta maani nunaqartugut naligiilluta ikkuffissanut atorfinnut sunulluunniit piukkannassuserput najoqqutaralugu ikkussisarnissaq uagutsinnut qitiuvoq.
Ilumullimi pissaaneqarumassuseq kisiat angujumallugu Inuit Ataqatigiit saaffigineqarnertik malillugu Demokraatinik, Atassutikkunnit Kattuseqatigiinnillu oqaloqateqarnerput ingerlateqqissimagaluarpassuk tunngaviusumik naalakkersuinikkut isummatik pilliutigalugit, taamaaliorsimasinnaaneq tassa aatsaat pissaaneqarnerinnavik angujummallugu suliniarneq.
Inuit Ataqatigiit oqaaseqareernitsitut periutsit malillugit tamanut ammasuunngitsumik Naalakkersuisooqaterput Siulitaasuatigut aaqqiissuteqaqqullugu sapaatip akunnera ullorlu ataaseq qaangiutiinnartoq saaffigigaluarparput, nikassaanermik taaneqarsinnaanngilaq, ataqqinassusilimmik suleqatigiinnissamik toqqammaveqarusunnermik ujartuineruvoq, tassa kisimi.
Per Berthelsen, Demokraatit oqaaseqartuat.
Demokraatit tungaaninngaanniit nalunaarutigissavara Demokraatit tungaaninngaanniit sumilluunniit nikassaanermik nipilimmik oqaluttoqanngimmat, aamma inuit ataasiakkaarlugit uani pineqanngillat. Demokraatit nalunaarutigiinnarpaat neqeroorutigiuarlugulumi taanna atituumik tunngaveqartumik suleqatigiilluni naalakkersuisooqatigiliortoqarnissaa inuiaqatigiit toqqissimatinnissaat angujumallugu.
Demokraatini upperiuarparput,aamma upperiumajuarumavarput taanna, atituumik tunngaveqartumik ingerlassoqarpat taava tiggusimalertarneq pinngitsoortikkuminarnerussasoq aammalu tunniutiinnarluni imminut manngertitaarluni pilertarnerit unitsinneqarsinnaasut. Sumilluunniit Demokraatit kajumigisarinngilaat pissaaneqqusaannermi peqataanissaq, nalunngilarpummi pilliutissat tassatuaasut qinersisartut nunatsinni innuttaasut.
Taamaattumik uagut tungitsinninngaanniit inuttarsiuinngilluinnarluta pissutsilli pivisusut aallaavigalugit isummiussagut nalunaarutigivagut, kisianni pissutsit maani aqqusaarsimasagut Demokraatillu tungaannut tatiginanngilluinnartumik suleriaaseqarluni nuliarsartaqattaarnersuit, taakkua aamma nukillaarutiginagit suli assapput isaapparput, inuiaqatigiit toqqissimanarnerusumik tunngaveqartumik sullissinnaanissaat ammaasseqataaffigiumallugu. Tungaanut oqaannassaagut: Pissutsit maanna atukkavut aallaavigalugit isumaqarpugut eqqaamasassani pingaanerpaat ilagileraat maanna sapaatit akunnerini tallimani-arfinillini pisuni kingullerni, tassalu Naalakkersuini Siulittaasup Hans Enoksenip oqarnera: Qanortoq Guutip nunarput sernigalugulu paariliuk. Taama oqarneq aatsaat taamak pisariaqartigilerpoq.
Toqqissisimannginneq, eqqissiviilliorneq pissaaneqarneqqussaarnersuarlu takussaalingaarmata, tamannalu uagut peqataaffigissanngilarput. Nuanniitsumik misigisaqartinneqarpugut, kisianni ammajuassaagut atituumik tunngaveqartumik suleqatigiinnissamik ammaassiniarnermi aammalu Naalakkersuisut Siulittaasuat imminut aallaavigiuarluni oqalummat taaginnassavarput sumiippa isumaqataassutsimik nalunaaruteqarnerit atituumik tunngaveqartumik suleqatigiinnissamik ammaasseqataajumallutit? Uani marluinnaat suleqatigiissilluginaasiit ammaasivutit, taamaattumik oqarluartaarutit assigiinngitsut uani Demokraatininngaanniit soorunami tutsuiginartutut tigujuminaapput oqaatigineqartut pissutisillu piviusut assigiinngittuarmata.
Jonathan Motzfeldt, Inatsisartut Siulittaasuat, Siumut.
Tullilluni oqaaseqassaaq Anthon Frederiksen, Kattusseqatigiit. Oqaatigissavara Inatsisartut Siulittaasussaannik qinersiniarpugut, ataasiinnarlu manna tikillugu siunnersuutaavoq.
Anthon Frederiksen, Kattuseqatigiit.
Uanga tassa oqaaseqaqqissamaanngikkaluarama, kisianni Naalakkersuisut Siulittaasorigallagaata oqaasiinut aamma oqaaseqalaarniarpunga, isumaqarama nikassaaneq oqaaseq taanna tulluanngitsoq naalakkersuinermik ingerlatsinermi atussallugu. Tassami kikkulluunniit illuatungiliuttut isumaqataanatik naalakkersuinermi qanoq oqaasii naqqiutilluunniit allat nikassaanertut tamaasa nalilersortassagaanni isumaqarpunga pissusissamisuunngitsoq. Naalakkersuinermi ingerlatsineq aamma soorunami isumaqatigiiffiuinnartutut ingerlaneq ajortoq tamatta nalunngilluinnarparput, taamaammat pisut assigiinngitsut tunngavigalugit illuatungiliuttutut oqaaserisartakkavut tamarmik nikassaanertut nalilersorneqartalissappata pissusissamisuussanngilaq.
Isumaqarpunga, Naalakkeruisut Siulittaasoringallangaata oqaaseq nikassaaneq utertittariaqaraa. Pissusissamisuunngilarmi politikkereqatit nikassaasutut nalilissallugit. Nammineerlutit illit oqareerputit kikkut politikerit tamarmik pisussaaffigigaat pisinnaatitaaffigigaallu qanoq oqalussinnaanertik aalajangissallugu. Aammami tamanna inatsisini tunngaviusuneereerpoq, tassa qanoq oqariartorsinnaaneq tamatta pisinnaatitaaffigaarput.
Inuttut ataasiakkaatut minnerpaamilluunniit aamma uanga tunginninngaanniit saassutarineqanngilatit, taamaattumik Kattusseqatigiit sinnerlugit oqaaserisakka uanga ilinnik minnerpaamilluunniit nikassaanertut tunniunneqanngillat aamma neriuppunga taamatut tigussanngikkitit, kisianniukua politikikkut pisut aammalu pissutsit piviusut soorlu aamma taanna qujanartumik utikulunneqartalersoq nuannersumik, tamakkua tunngavigalugit aallaavigalugillu oqariartuutit saqqummiunneqartut kissaatiginaraluaqimmat taamaattut kukkussutigineqartartut ingerlaannaqqinnginnissaat.
Tassalu uagut illuatungiliuttutut pisussaaffipput atorparput, suut naalakkersuisutigut kukkussutigineqartut sapinngisamik taamaattoqaqqinnginnissaa anguniarlugu aamma pisinnaatitaaffipput atorlugu saqqummiussuinissami. Neriussuunga nikassarneqarnak aammalu qinigaaqataasugut tamatta nikassarneqarata, kisiannili politikimik piviusorsiortumik oqallinneq ingerlatissagipput. Qujanaq.
Hans Enoksen, Siumut, Naalakkersuisut Siulittaasuat.
Qujanaq. Nuannaarutigaara oqaatsitik illuatungaanut saatimmatigit aamma piumassuseqarpunga uanga suleqatiginninnissannut, aammalu Demokraatit oqariartornerat suleqataajumallutik aamma taanna atorluassavarput.
Ilagiinnut tunngatillugu erseqqissaassutigissavara minnerpaamilluunniit Naalakkersuisuni piumasarineqanngilluinnarmat aammalu uanninngaanniit piumasarineqanngilluinnarmat anersaapiluiaasoqassasoq aamma uanga tappikunga pigamali misigisaqanngilluinnaqqissaarama silaannaap ajortoqarneranik. Ilagiit toqqissisimajunnaartinneqarsimassappata inuiaqtikka sinnerlugit utoqqatisssutigaara, neriuppungalu taamatut pisoqaqqissanngitsoq, aamma taamatut pisoqarniarneranik toqqaannartumik ilisimatinneqarsimasuuguma akuersinavianngitsunga, Qanoruumi oqaatigereerpara tusagassiorfiit aqqutigalugit.
Taamatut naatsumik ilagiit toqqissisimajunnaarsimappata utoqqatserpuga inuiaqatikka sinnerlugit, neriuppungalu toqqissillutik upperisarsiornertik aamma ingerlatiinnarumaaraat. Aamma uagut peqataavugut ilagiinnut ilaasortaagatta aamma siunnerfeqanngilagut allaanerusumik upperisaqalernissatsinnut aqqutissiuussinissatsinnut, pingaartumik Naalakkersuisut eqqarsaatigalugit.
Atorfinitsitsigallarsimanermut tunngatillugu uteqqattaarneqartoq - tassa sulisut nassuiaasinneqarput uagullu sulisut nassuiaanerat ataqqivarput. Sulisut tatigaavut eqqortumik oqariartorfigisimassagaatigut, taamaammat eqqunngitsumik maani nassuiaasoqarsimanerarlugu oqariartoqattaarnerit neriuppunga unitsinneqassasut sulisunut tatiginninnerput uagut tamakkiisuuvoq, taanna maanngaanniit oqaatigerusuppara. Qujanaq.
Jonathan Motzfeldt, Inatsisartut Siulittaasuat, Siumut.
Oqallisigisamut tunngatillugu Inuit Ataqatigiit Naalakkersuisuusimasut allakkiaat agguaanneqarsimasut innersuussutigissavara tassani nassuiaatimi aamma maani oqaatigineqartunut paasissutissanut ilaasoq innersuussutigineqarmat.
Maannamut tassa Naalakkersuisut Siulittaasussaanik qinersinissaq tullinnguuppoq, allanik oqaaseqartoqassanngippat, taamaanngilaq.
Inatsisartuni ilaasortap Hans Enoksenip Naalakkersuisut Siulittaasussaatut qinigaanissaanut isumaqataasut qinnuigissavakka nikueqqullugit.
17-it isumaqataapput.
Inatsisartunut ilaasortap Hans Enoksenip Naalakkersuisut Siulittaasuattut qinigaanissaanut akerliusut qinnuigaakka nikueqqullugit:
9-at akerliupput.
Taavalu taaseqataanngitsut qinnuigaakka nikueqqullugit.
5-t taaseqataanngillat.
Taamaalilluni Naalakkersuisut Siulittaasussaanik qinersineq naammassivoq.
Hans Enoksen, pilluarit.
Taava ingerlaqqissaagut, Naalakkersuisuni ilaasortanik qinersineq, tassanilu saqqummiussissaaq Naalakkersuisut Siulittaasuat.