Oqaluuserisassani immikkortoq 5 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ulloq
ataatsimiiffik siulleq, ataasinngorneq 20. januar 2003, nal. 13:58
Ataatsimiinnermik aqutsisoq: Jonathan Motzfeldt, Inatsisartut Siulittaasuat, Siumut.
Hans Enoksen, Naalakkersuisut Siulittaasuat, Siumut.
Siullermik Naalakkersuisut atorunnaartut qutsaviginiarpakka piffissami sivikitsumi inuiaqatigiit ingerlatsitaaneranni suleqataaneranni, naak ilaatigut suleqatigiinneq pitsaanngitsutut oqariartuutigineqaraluartoq, uanga taamatut misigisimannginnama, Naalakkersuisunilu tunuartut qutsaviginiarpakka sulinertik ingerlalluarsimammassuk.
Aallaqqaasiullugu Naalakkersuisut Siulittaasuattut qinigaanera qujassutigaara. Naalakkersuisunik pilersitsinissaq pillugu Siumut Inuit Ataqatigiillu naalakkersuisooqatigiinnissamik isumaqatigiissutaat 14. januar 2003 atorunnaarsinneqarpoq.
Ulloq taanna Inatsisartut Siulittaasuat qinnuigaara Naalakkersuisunik nutaanik qinersinissaq siunertaralugu Inatsisartunik immikkut ittumik ataatsimiigiaqquseqqullugu.
Tamatuma kingorna Naalakkersuisunik nutaanik pilersitsinissaq pillugu suleqatigiinnissamik isumaqatigiissuteqarnissaq siunertaralugu Siumup Atassummik isumaqatiginninniarpoq, tamatumanilu Naalakkersuisunik nutaanik pilersitsinissaq isumaqatigiissutigineqarpoq.
Inatsisartut Naalakkersuisullu pillugu Inatsisartut inatsisaanni § 3, imm. 4 malillugu Naalakkersuisunut ilaasortassat ataatsimoortumik taasinikkut qinerneqartarput.
Matumuuna inuit arfinillit uku Naalakkersuisunut ilaasortassatut qinigaanissaat inassutigaara:
Aningaasarsiornermut Naalakkersuisoqarfimmut Augusta Salling inassutigaara, tassunga ilaapput misingersuutit, kukkunersiuineq naatsorsuutillu, akileraarutit akitsuutillu, isumaqatigiinniartarnerit assigisaallu.
Inuussutissarsiornermut Naalakkersuisoqarfimmut Finn Karlsen inassutigaara. Tassunga ilaapput inuussutissarsionermi pissutsit, suliffissuaqarneq, nersutit nappaataanut inuussutissanullu tunngasut, niuerneq pilersuinerlu, nukissiuteqarneq innaallagissamillu pilersuineq, aatsitassat ikummatissallu, sermeq imerlu, suliffeqarneq takornariaqarnerlu.
Aalisarnermut, Piniarnermut Nunalerinermullu Naalakkersuisoqarfimmut Simon Olsen Inassutigaara. Tassunga ilaapput pisuussutit uummassusillit, aalisarneq, piniarneq nunalerinerlu.
Attaveqaqatigiinnermut, Avatangiisinut Ineqarnermullu Naalakkersuisoqarfimmut Mikael Petersen inassutigaara. Tassunga ilaapput angallannermi pissutsit, mittarfeqarneq, nalunaarasuartaateqarneq, ineqarnermut tunngasut, sanaartugassat, misissueqqaarnerit, Asiaq kiisalu avatangiisit pinngortitamillu illersuineq.
Ilinniartitaanermut Naalakkersuisoqarfimmut Arqalo Abelsen inassutigaara, Tassunga ilaapput meeqqat atuarfiat, inuussutissarsiutinut ingerlaqqiffiusumillu ilinniartitaanerit, ulluunerani paaqqinnittarfinnut tunngasut, ilisimatusarneq, Naatsorsueqqissaartarfik, Paasissutissiisarnermut Teknologi, sunngiffimmi sammisassaqartitsineq, timersorneq, kulturimut tunngasut, oqaatsinut politiki, hĝjskolit kiisalu ilageeqarneq.
Ilaqutariinnut Peqqinnisamullu Naalakkersuisoqarfimmut Ruth Heilmann inassutigaara. Tassunga ilaapput isumaginninnermut tunngasut, peqqinnissaqarfik pinaveersaartitsinerlu.
Taamatut oqaaseqarlunga Augusta Salling, Finn Karlsen, Simon Olsen, Mikael Petersen, Arqalo Abelsen aamma Ruth Heilmann Naalakkersuisunut ilaasortassatut inassutigaakka. Qujanaq.
Jonathan Motzfeldt, Inatsisartut Siulittaasuat, Siumut.
Naalakkersuisut Siulittaasortaavata taama oqaaseqareerneratigut ilisimatitsissutigissavara Inatsisartunut ilaasortat pingasut Naalakkersuisunut ilaasortatut qinigaassagunik, taamatut atuunnerminni sulinngiffeqarnissaannut qinnuteqaataannik Siulittaasoqarfik tigusaqarmat. Pineqartut tassaallutik Ruth Heilmann, Simon Olsen aamma Mikael Petersen. Tunngavissatut taaneqartut tunngavissaatillugit sulinngiffeqarnissamik qinnuteqaatit siumoortumik Siulittaasoqarfimmi akuersissutigineqarput, tassalu tamatuma kingorna ilaasortassatut siunnersuutigineqartut Inatsisartunit ataatsimut taasissutigineqareerpata aamma tamanna isummerfigineqarumaarpoq.
Naalakkersuisut Siulittaasuata Naalakkersuisussatut siunnersuutigisaannut isumaqataallutik taaseqataaniartut qinnuigissavakka nikueqqqullugit.
17-it isumaqataapput.
Tamatumunnga akerliullutik taasiniartut qinnuigissavakka nikueqqullugit.
Soqanngilaq.
Taavalu tamatumunnga taaseqataanngitsut qinnuigissavakka nikueqqullugit.
14-it.
Taava maannakkut ataatsimiinneq minutini 15-ini unikkallassaagut, ilaatigut issiaviit maani aaqqissuunneqassammata, inissaannut iluamik iliorarlugit, taavalu minutsit 15-it qaangiuppata ataatsimiinneq nangeqqissavarput.
Maanna ataatsimiinneq unikkallarpoq.