Kalaallit Nunaanni Inatsisartut

Oqaluuserisassani immikkortoq 6		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ulloq ataatsimiiffik siulleq, ataasinngorneq 20. januar 2003, nal. 14:47

 

 

Oqaluuserisassani immikkortoq 6

 

 

Inatsisartut Siulittaasussaannik qinersineq.

(Inatsisartuni sivisunerpaamik ilaasortaasimasunit angajulleq)

 

 

Ataatsimiinnermik aqutsisoq: Jonathan Motzfeldt, Inatsisartuni sivisunerpaamik ilaasortaasimasunit angajulleq, Siumut.

 

 

Jonathan Motzfeldt, Inatsisartuni sivisunerpaamik ilaasortaasimasunit angajulleq, Siumut.

Ataatsimiinneq aallarteqqippoq. Oqaatigeqareersutut Naalakkersuisuni ilaasortanngortut pingasut sulinngiffeqarnissaminnik qinnuteqarput akuerineqarlutillu. Siumumiit taakku sinniisussaannik aggersaasoqarpoq taamaattumillu maannga tikilluaqqujumavakka tassa Per Rosing-Petersen, Ole Thorleifsen aamma Kalistat Lund. Taakkua Qinigaasinnaanerup Misilinneqarnissaanut Ataatsimiititaliap sinniisussat pineqartut pillugit qinigaasinnaassuseqarnerat misilippaa akueralugu aammalu taamatut pisimavoq Naalakkersuisussat aamma inisitsiternissaat sioqqullugu ilaatigut Aqqaluk Abelsenimut tunngasunik, aamma taakkua akuerineqarsimallutik.

 

Naalakkersuisuusimasut atuukkunnaanernerisigut Naalakkersuisussanik nutaanik qinersinerup kingorna Inatsisartut Naalakkersuisut Pillugit Inatsimmi § 7 naapertorlugu Inatsisartut nutaamik maanna inissitsitissapput, taamaalillunilu Inatsisartut Siulittaasoqarfia tunuarpoq, Inatsisartunilu Siulittaasussamik, taamatullu Siulittaasup tullissaanik sisamanik qinerseqqissalluta.

 

Taamaattumik uanga unillatsiareernerup kingorna maani Inatsisartuni sivisunerpaamik ilaasortaasimanera najoqqutaralugu ataatsimiinnermik aqutsissaanga.

 

Taava qinnuigissavakka taakku Per Rosing-Petersen, Ole Thorleifsen aamma Kalistat Lund issiavissaminnut inginnissaat maannakkut pissasoq, tamanna akerlerineqarpa?

 

Naamik.

 

Takassa, tikilluaritsi.

 

Inatsisartut Suleriaasianni § 3 naapertorlugu Inatsisartut ilaasortami akornanni Inatsisartut Siulittaasussaanik Siulittaasullu tulliinik sisamanik inisitserluni ataatsimiinnermi qinersissapput. Oqaluuserisassami immikkoortut arfernanni Inatsisartut Siulittaasussaanik qinersinissamut killippugut, taamaammat Inatsisartut Siulittaasuattut atorfimmut qinigassanngortitsisoqarnissaa qinnutigissavara.

 

Jørgen Wæver-Johansen, Siumup oqaaseqartua.

Qujanaq. Decemberimi qinersinerup kingorna Inatsisartut Siulittaasussaannik qinersinitsinni tamavitta Jonathan Motzfeldt katersuuffigalugu Inatsisartut Siulittaasussaattut qinerparput. Maannakkut Naalakkersuisut allanngoraluartut Siumumiit isumaqartuarsinnarpugut akunnitsinni Inatsisartut Siulittaasussaattut Jonathan Motzfeldt piukkunnarnerpaasoq.

 

Taamaammat partiitsinni atatsimoorluinnarluta Inatsisartut Siulittaasussaattut Jonathan Motzfeldt qinerneqarnissaa inassutigeqqissavarput. Qujanaq.

 

Jakob Sivertsen, Atassutip oqaaseqartua.

Eqqaamaneqassaaq decemberip 14-ani Inatsisartut Siulittaasussaannik qinersineqarmat Atassummiit Inatsisartut gruppianni tamakkiisumik Jonathan Motzfeldt qinersimagatsigu, taamaattumik taanna qinersisimanerput nangillugu maannakkuk aamma suleqtigiinneq eqqarsaatigalugu Jonathan Motzfeldt toqqarneqarnissaanut Atassummiit qinerseqataassagata amatumuuna oqaatigaarput. Qujanaq.

 

Aqqaluk Lynge, Inuit Ataqatigiit oqaaseqartuat.

Inuit Ataqatigiit decemberip 14-ani Inatsisartut Siulittaasuannik qinersilernermi erseqqissaatigisimavarput Inatsisartut Siulittaasuata nakkutigisassai immikkut ittut makku:

   Siulittaasoq tassaasariaqarpoq Inatsisartut tamarmiusut siulittaasuat aamma

   Inatsisartut Siulittaasuata partiit naligiimmik suleqatigisinnaasariaqarai taamaattumillu poilitikkut inissisimaffiit ataatsimiititaliani pingaaruteqartuni ilaasortaaffiginaversaassagai.

 

Inuit Ataqatigiit piumasaqaatini taakku attattuaannarpai isumaqarpugullu Inatsisartut ataqqinartut manna tikillugu Siulittaasuata qinersereernup kingorna tamakku toqqaanitsinni toqqammavigisimasagut suusupagisimagai, tassami partiini sinnerlugu Inatsisartut Ataatsimiititaliaanni pingaaruteqarnerpaani aammalu politikkikkut aporaaffioqisuni inissisimalersimammat.

 

Tamakku allanngortikkumasimanngimmagit Inatsisartuni Siulittaasussatut qinigassanngortittoq Inuit Ataqatigiit taaseqataaffiginianngilaat.

 

Per Berthelsen, Demokraatit oqaaseqartuat.

Qujanaq. Inatsisartuni Siulittaasussamik qinersinissamut atatillugu hr. Jonathan Motzfeldtip piukkunneqarluni saqqummiunneqarnera Demokraatit tungaaninngaanniit ilalerluinnarparput, uagullu uani saqqummiunneqartumut Inuit Atatigiinninngaanniit atatillugu taassavarput uagut piginnaaneqarneq kajummissuserlu sumilluunniit aporfissikkumannginnatsigu, taamaattumik hr. Jonathan Motzfeldtip Inatsisartuni Siulittaassuujutigaluni ataatsimiititaliat partiimininngaanniit piukkunneqarfigisani kajumeralugit suliaminullu aporfiusinnaasutut isumaqarifinngikkunigit ilaasortaasinnaanera uagut tungitsinniinngaanniit aporfissikkumanngilarput.

 

 

Anthon Frederiksen, Kattusseqartigiit oqaaseqartuat.

Decemberip 14-iani Inatsisartut siulittaasussarsiorneqarmata uanga aamma Jonathan Motzfeldtip siulittaasunngortinneqarnissaa akuersaaqataaffigisimavara. Maannamut piffissaq sivikikkaluartoq annersumik siulittaasuuffiup taassumap ingerlanneqarnerani misilittagaqarfiginngilara, taanna nassuerutigisariaqarpara, aammalu neriuppunga partii apeqqutaatinnagu Inatsisartut sapinngisamik tamaasa aammalu ikinnerussuteqarneq aamma isigalugu siulittaasup sullilluarumaarai soorlumi aamma decemberip 14-ani taamatut neriorsuuteqartoq.

 

Taamaammat taanna tatigalugu oqassaanga siulittaasussatut inassutigineqarnera akuersaarlugu taaseqataaffigissagakku. Qularutiginngilara Siumup ilaasortaasa akornani tamanik allamik piukkunnartoqanngitsoq tassunga issiavimmut, soorlu Siumup oqaluttuata oqaatigereeraa. Taamaattumik allamik taamma piukkunnartigisumik Siumut iluani peqanngilaq allamik qinigassaqarani, taanna aamma qinissavara. Qujanaq.

 

Jonathan Motzfeldt, Inatsisartuni sivisunerpaamik ilaasortaasimasunit angajulleq, Siumut.

Allanik oqaaseqarumasoqanngilaq. Ataasiinnaq siunnersuutigineqarpoq, tassalu Jonathan Motzfeldt Inatsisartut Siulittaasussaannut partiinit amerlanerusunit Kattusseqatigiinniillu. Tamatumunnga isumaqataasut qinnuigissavakka nikueqqullugit.

 

23-t isumaqataapput.

 

Tamatumunnga akerliusut qinnuigissavakka nikueqqullugit.

 

Akerliusoqanngilaq.

 

Taava taaseqataajumanngitsut qinnuigissvakka nikueqqullugit.

 

8-t

 

Taava ingerlaqqitsinnata qujassutigaara taamatut Inatsisartut Siulittaasuattut amerlanerussuteqarluartunit qinerneqarama, aamma oqaatigissavara oqareersimanittut Inatsisartunut tamanut assigiilluinnartumik siulittaasutut isersimanera ingerlateqqinniaringa, aammalu ataatsimiisitaliani marlunni ilaasortatut partiininngaanniit qinnuigineqarnikka naapertorlugu, tassa Nunanut Allanut Tunngasutigut paasisimasaqarnikka aatsitassarsiornikkut ukiorpassuarni tassani suliaqarsimanikka tunngavigalugit ataatsimiisitaliami ilaasortaanissara Inatsisartunut Siulittaasutut sulininnut akornutissatut isumaqarfigisimannginnakku, tamannalu aamma Qinigaasinnaanerup Misilinneqarnissaanut Ataatsimiititaliap tassa qinigaasimanermut naliliisarfimmut aamma kalerriussimaginga ilisimatitsissutigalugu.

 

Qujavunga taamatut tatigineqarninnut.

 

Taava ingerlaqqissaagut.