Oqaluuserisassani immikkoortoq 08 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ulloq ataatsimiiffik siulleq, arfininngorneq 14.
december 2002, nal. 11:26
Ataatsimiinnermik aqutsisoq: Jonathan Motzfeldt,
Inatsisartut Siulittaasuat, Siumut.
Jonathan Motzfeldt, ataatsimiinnermi aqutsisoq, Inatsisartut siulittaasuat,
Siumut.
Taavalu maannakkut tikipparput ullormut oqaluuserisassani
immikkoortoq 8, tassa Naalakkersuisut Siulittaasussaannik qinersineq. Kalaallit
Nunaanni Inatsisartunut Siulittaasunngorninni ullormut oqaluuserisassani
immikkoortoq 8; Naalakkersuisut Siulittaasussaanik qinersineq aallarniutigalugu
ullormut oqaluuserisassani maannakkut aqutsineq tamakkiisumik tigugakku
nuannaarutigaara.
Atuuffimmut tassunga ataqqinartumut Inatsisartut
tatigalugu qinermannga siullermik Inatsisartut qutsavigissavakka. Inatsisartut
Naalakkersuisunngulersullu anguniagaqarfiusumik pingaarutilimmillu
sulinissaannut neriuutigininninera naatsorsuutiginninneralu Siulittaasoqarfik
tamarmiusoq sinnerlugu oqaatigiumavara.
Taannalu tikitsinnagu oqaluuserisassaq tulleq aamma
immikkut oqaatigilaarniarpara. Qinigaaninnut tunngatillugu oqaatigilaarusutakka.
Asasakka Inatsisartunut Ilaasortat uannut nuannerluni
ataqqinartinnarpoq taamatut Inatsisartunut Siulittaasumut qinigaanera
tamassinnit. Aamma tamanna killisimaarutigaara.
Aamma oqartoqarneratut
Inatsisartunut tamanut siulittaasuunissara suliarissavara. Aamma uanga
sulisukkalu suliassinni pissanganartumi peqatigalusi pisinnaanerput tamaat
iliorumaarpugut. Ilisimasassanik siunnersuinissamik pisariaqartitassinnik
toqqaagussi ikiueqataassalluta.
Uannut aammalu inuppassuarnut
silarsuarmi demokrati isumaqarpoq oqaloqatigiinneq inuit assigiinngitsunik
isumaqartut akornanni. Taamaalilluni inuiaqatigiit sanarfineqarnerat pitsaasoq
anguneqaqqullugu.
Taamaattumik demokrati aamma
isumaqarpoq politikkikkut angusavut tunngaveqassasut imminnut akunnermiliuttut
aqqutigalugit inuiaqatigiinni politikkikkut ingerlataqartut innuttaasuni
amerlanerussuteqartut ikinnerussuteqartulluunniit suliariniagaat aqqutigalugu.
Allatut oqaatigalugu suleqatigiinnissinnaaneq peqatiginninnissamullu piumassuseqarneq
eqaatsumik pitsaasumillu aqqutaavoq inuppassuarni aamma maani
nuannaarutaasinnaasoq.
Kalaallit Nunaat nunarput
demokratimik inuusoqisumik atugaqarpoq. Ineriartorneqarpoq pissanganartumik
tamatta malinnaaffigisatsinnik. Inatsisartut annertoorujussuarmik
pisussaaffeqarput inuinnaat naalakkersueqataanerat taanna ineriartortoq
tapersussallugu.
Aamma nalunngilara suliassaq taanna
suleqatigiikkutta sapinngikkipput.
Silarsuaq avatitsitsinniittoq allanngoraqaaq.
Europami pisimasut ippassaq aamma malinnaaffigissallugit pinngitsoorata
pisussaaffilertariaqarpugut. Erniinnarluinnaq sunnersinnaavaatigut. Immaqa
ilimagisatsinnit pilertornerusumit.
Nunatsinni inuit qinigaasut
suliassatut pingaarnersaraat inatsisiliorneq namminersornerunerup inatsisaa
inatsisillu tunngaviusut aqqutigalugit, tunngavigalugit ingerlanneqartussaq.
Apeqqutit tassaniittut suliassallu
ilaannikkut imaannaanngitsorsuusarput, kisianni suliarineqarsinnaapput tassani
suleqatigiikkutta aammalu akunnermiliuttunik nassaarniartarutta. Tassalu inimi
maani aammalu gangini torsuusani allanilu suliassarput
suleqatigiilluarnissassinnik neriuppunga aamma tamanna qularinngilara.
Qujanarsuaq.
Taava maannakkut tassa ingerlaqqippugut.
Naalakkersuit Siulittaasussaanik qinersineq oqaluuserissavarput.
Immikkoortoq inatsisartuni
suleriaatsimi § 5 naapertorlugu Naalakkersuit Siulittaasuat Inatsisartut
ilaasortaasa akornannit amerlanerussuteqarluarnikkut qinerneqartussaavoq.
Maannalu Inatsisartut
kaammattorumavakka Naalakkersuit Siulittaasuattut qinigassanngortitsitsillutik
siunnersuuteqaqqullugit. Inatsisartunut ilaasortaq Jørgen Wæver- Johansen,
Siumut.
Jørgen Wæver-Johansen, Siumup oqaaseqartua.
Qujanaq. Naluneqanngitsutut Inatsisartuni
qinersinerup takutippaa partii Siumut nunami maani partiit annersarigaat.
Akisussaaffik innuttaasut
aalajangiinerminni partiitsinnut tunniussaat ataqqillugu tunngavigalugulu
Siumut Naalakkersuisunngortitsiniarnermi isumaqatigiinniarnermik aqutsisuuvoq.
Isumaqatigiinniarnerit inerneraat partiit marluk Siumut aamma Inuit Ataqatigiit
isumaqatigiissuteqarmata Naalakkersuisunngortitseqatigiinnissaminnik.
Partiit suleqatigeeqqilersut
isumaqatigiissuteqarnerminni ilanngullugu isumaqatigiissutigaat Naalakkersuit
Siulittaasuatut inissisimaneq Siumup tigummissagaa.
Taamaammat pissusissaa eqqorlugu partiitsinni qinigaanerpaaq partiitta
siulittaasua Hans Enoksen, Siumup Inatsisartuni gruppea isumaqatigeeqqissaartoq
sinnerlugu matumuuna Naalakkersuisut Siulittaasussaattut qinerneqarnissaa
innersuussutigissavara. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqarumavoq hr. Aqqaluk Lynge, Inuit
Ataqatigiit.
Aqqaluk Lynge, Inuit Ataqatigiit oqaaseqartuat.
Qujanaq, siullittaasunngortorlu
pilluarit, qujanarlu oqaatsinnut. Tamatta tusarnaarluarpugut, neriussuugullu
aamma oqaatsit piviusunngortinniarumaarigut imaasa ilai.
Inuit Ataqatigiit ukioq manna qinersereernerup kingornatigut
pissutsit misissorluarsimavaat, Inuit Ataqatigiillu aamma ammasumik partiit
akornanni assigiinngitsut suleqatigiissinnaanerat aamma misissorluarsimallugu.
Tamatta soorunalimi qinersinermik kissaateqarpugut
qineqqusaarnermilu. Qinersereernermili qinersisartut aalajangigaat ataqqillugit
aamma suliniarsimavugut. Ileqqormi pitsaasoq tassaavoq nunatsinni demokrati
toqqammavigalugu ingerlatsinitsinni atortagarput tassavoq partii nunatsinni
qinerneqarnerpaaq taanna isumaqatigiinniarnerni aquttuussasoq.
Tamannalu aallaavigalugu Inuit Ataqatigiit decemberip
sisamaani isumaqatigiinniarnerit aallartikkamigit Siumup oqaloqatiginerani
decemberip arfineq-pingajuani isumaqatigiissuteqarsimavoq politikikkut
suliniutissanik immikkoortunik 26-nik. Taakkua kingusinnerusukkut
tikikkumaaratsigit oqaatiginiaannarpara politikkikkut tunngavissat ukiuni
aggersuni sisamani inooqataaffigisinnaasavut taakkua ujartorsimavagut.
Kiisalu aamma qinersisartut oqariartuutaat
qinersinermikkut aamma taakkua qanoq ittuunersut aamma
misissorluarsimallutigit.
Taamaattumik Inuit Ataqatigiinnut qularutiginngilarput
decemberip arfineq pingajuanni Siumup Inuit Ataqatigiillu
atsioqatigiinnerisigut toqqammavissaq nutaaq taanna siunissami suleriarnissamut
pitsaasuusoq tamannalu aallaavigalugu aamma inuttalersuinerit aamma
oqaloqatigiissutigineqarsimapput.
Aammalu eqqortuusoraarput qinersisartut aamma
tusarnaarluarnerasigut taasinerallu ataqqillugu nunatsinni partiit marluk
taamatut suleqatigiinnerannut taava partiip annerpaap siulittaasua
Naalakkersuisut Siulittaasussaattut qinigassanngortinneqartoq aamma uagut
taanna taaseqataaffigissavarput.
Naatsorsuutigalugu suleqatigiinneq ataavartoq ukiuni
aggertuni sisamani ingerlasinnaajumaartoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat,
Siumut.
Qujanaq. Allanik
siunnersuuteqartoqanngilaq. Aamma allanik oqaaseqarumasoqanngilaq.
Utoqqatserpunga Anthon Frederiksen, Kattusseqatigiit.
Anthon Frederiksen, Kattuseqatigiit.
Kattusseqatigiinni pingaartitatta ataqqisattalu
ilagilluinnarpaat qinersisartut aalajangertarnerat. Aammalu qinersinermi
matumani takutinneqarpoq uppernarsineqarluni Siumut partiini annersaasoq.
Aammalu tamanna soorunami Kattusseqatigiinniit ataqqivarput tassa qinersisartut
aalajangernerat. Aamma tassani takutinneqarpoq Siumumi qinigaanerpaaq tassalu
Hans Enokseni inassutiginiarneqartoq.
Taamaammat inuit
tamat oqartussaaqataanerat ataqqillugu aammalu qinersisartunik ataqqinnillunga
uanga taamatut inassuteqarniarneq akuersaaqataaffigissavara. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Tassa allanik oqaaseqartoqarumanngilaq. Taavalu
maannakkut taasisissutigissavarput Siumumit Inuit Ataqatigiinnit aammalu
Kattusseqatigiinnit siunnersuutigineqarpoq Inatsisartunut Ilaasortaq Hans
Enoksen Naalakkersuisut Siulittaasuattut qinigaassasoq. Tamatumunnnga
isumaqataasut qinnuigissavakka nikueqqullugit.
19.
Qujanaq.
Tamatumunnga akerliusut qinnuigissavakka nikueqqullugit.
Soqanngilaq.
Isumaqataanatilluunniit akerliunngitsut qinnuigissavakka
nikueqqullugit.
11.
Taamaalilluni Inatsisartuni ilaasortaq Hans Enoksen
Naalakkersuisut Siulittaasussaattut, qinerneqarpoq, pilluarit.
Ingerlaqqissaagut; maannakkut Naalakkersuisut
Siulittaasuat qinnuigissavara, Naalakkersuisunut ilaasortassanik
qinersinissamut inassuteqaatini saqqummiuteqqullugu.
Suleriaatsimi § 5, imm. 3, naapertorlugu Naalakkersuisut
Siulittaasuata inassuteqaatai ataatsimoortillugit taasissutigineqassapput.
Naalakkersuisut Siulittaasuat takassa. Pilluarit.
Hans Enoksen, Naalakkersuisut Siulittaasuat, Siumut.
Qujanaq. Aallaqqaasiullugu Inatsisartut
Siulittaasortaavat Jonathan Motzfeldt, pilluangaarit, tamakkiisumik
tapersersorneqarlutit Inatsisartuni suleriarnissannut periarfissinneqaravit.
Tassuuna takutippat inuiaqatigiinni ataqqineqarlutit
inissisimasutit aammalu annertuumik tapersersorteqartutit. Taannalu uanga
partiimi Siumumi siulittaasutut tuppalliutigalugulu qujassutigaara.
Inatsisartut Siulittaasoqarfianni ilaasortanngortut
pilluaritsi. Neriuutigaara sulineq pitsaasumik Naalakkersuisut Inatsisartullu
akornanni ingerlanneqarumaartoq, uangalu Naalakkersuisut Siulittaasuattut
ikkunneqarninni piumassuseqarpunga qanittumik ataqqeqatigiissumik pitsaasumillu
suleqatiginninnissamut.
Aamma ilisimalluarpara Jonathan Motzfeldt annertuumik
piumassuseqartoq suleqatiginninnissaminut.
Qujavungalu maani aamma uanga taaneqarlunga
toqqarneqarama. Kingusinnerusukkut Naalakkersuisunngortussat ikkunneqareerpata
oqaaseqalaarumaarpunga.
Jonathan Motzfeldt qujanaq qinigaaninnut. Takusinnaavat
annertuumik tapersersorteqarlutit aammalu illersorteqarlutit
suleriaqqinnissamut annertuumik nukissannik tunineqarputit. Taannalu aamma uanga
nuannaarutigalugulu ataqqivara. Pilluakutsoorit.
Aallaqqaasiullugu Naalakkersuisut Siulittaasuattut
qinigaanera qujassutigaara. Inatsisartut Naalakkersuisullu pillugit
Inatsisartut inatsisaanni § 3, imm. 4, malillugu Naalakkersuisunut
ilaasortassat ataatsimoorluni taasinikkut qinigaasussaapput. Matumuuna inuit
arfinillit uku Naalakkersuisunut ilaasortassatut qinigaanissaat inassutigaara:
Aningaasarsiornermut Nunanullu Allanut Tunngasunut
Naalakeersuisoqarfimmut Josef Motzfeldt inassutigaara.
Tassunga ilaapput missingersuutit, kukkunersiuineq
naatsorsuutillu; akileraarutit akitsuutillu; isumaqatigiinniartarnerit
assigisaallu; nunanut allanut tunngasunut pissutsit, kiisalu
ingerlatseqatigiiffinnut Namminersornerullutik Oqartussani pigineqartunut
attaveqartarneq.
Inuussutissarsiornermut
Naalakkersuisoqarfimmut Mikael Petersen inassutigaara.
Tassunga ilaapput inuussutissarsiornermi pissutsit;
suliffissuaqarneq, nersutit nappaataanut inuussutissalerinermullu tunngasut;
niuerneq pilersuinerlu; nukissiuuteqarneq innaallagissamillu pilersuineq;
aatsitassat ikummatissallu; sermeq imerlu; suliffeqarneq takornariaqarnerlu.
Aalisarnermut, Piniarnermut Nunalerinermullu
Naalakkersuisoqarfimmut Simon Olsen inassutigaara.
Tassunga ilaapput pisuussutit uumassusillit; aalisarneq,
piniarneq nunalernerlu.
Attaveqaqatigiinnermut, Avatangiisinut Ineqarnermullu
Naalakkersuisoqarfimmut Johan Lund- Olsen inassutigaara.
Tassunga ilaapput angallannermi
pissutsit; mittarfeqarneq; nalunaarasuartaatitigut attaveqaqatigiinneq;
ineqarnermut tunngasut; sanaartugassat; misissueqqaarnerit; Asiaq kiisalu
avatangiisit, pinngortitamillu illersuineq.
Ilinniartitaanermut
Naalakkersuisoqarfimmut Ruth Heilmann inassutigaara.
Tassunga ilaapput meeqqat
atuarfiat, inuussutissarsiutinut ingerlaqqiffiusumillu ilinniartitaanerit;
ulluunerani paaqqinnittarfinnut tunngasut; ilisimatusarneq;
naatsorsueqqissaartarfik; paasissutissiisarnermut teknologi; timersorneq;
kulturikkut pissutsit; oqaatsinut tunngasunut politiki; højskolet kiisalu
ilageeqarneq.
Ilaqutariinnermut Peqqissutsimullu
Naalakkersuisoqarfimmut Asii Chemnitz Narup inassutigaara.
Tassunga ilaapput isumaginninnermut tunngasut,
peqqinnissaqarfik pinaveersaartitsinerlu.
Taamatut oqaaseqarlunga Josef Motzfeldt, Mikael
Petersen, Simon Olsen, Johan Lund-Olsen, Ruth Heilmann aamma Asii Chemnitz
Narup Naalakkersuisunut ilaasortanngortussatut inassutigaakka. Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Naalakkersuisut Siulittaasuat qutsavigaarput. Taavalu
oqaaseqartoqarumanngippat siunnersuutigineqartut Naalakkersuisut Siulittaasuata
- utoqqatserpunga, taava Inatsisartuni ilaasortaq Anthon Frederiksen, Kattusseqatigiit,
oqaaseqassaaq.
Anthon Frederiksen, Kattusseqatigiit.
Qujanaq. Kattusseqatgiinniit oqartariaqarpunga
nuannaarutigalugu kiisami qinersisartut qinigaannik
Naalakkersuisoqartussanngoratta. Nnaluneqanngitsutut Kattusseqatigiinni maani oqaluttarfimmi
ilaalerattali ataasianngeqaluta piumasaqaatigisarsimavarput inuit qinigaannik
Naalakkersuisoqarnissaq. Tamannalu pisussanngormat qinersisartut aamma
piumasaqaatigisartagaat tusaaniarneqalermata oqartariaqarpunga assut tamanna
nuannaarutigalugu, aammalu Naalakkersuisussanik pilersitsiniarnermi
isumaqatiginninniarnerit soorunami Kattusseqatigiinniit malinnaaffigisimavagut.
Nuannaarutiginngitsoornagulu oqaatigissavara Naalakkersuisooqatigiiniarlutik
isumaqatigiinniartut ilaatigut Kattusseqatigiinni aamma qineqqusaarnitsinni
anguniakkatta arlallit ilaat, tassalu ilaatigut allaffissornikkut
akikillisaanissaq ingerlatsinermi aningaasartuutikillisaanissaq qeqqaniit
aqutsinerup annikillisikkiartorneqarnissaa, aalisarnerup
siuarsaaffigineqarnissaa aammalu nunaqarfiit siuarsarneqarnissaat ilanngullugu
Naalakkersuisooqatigiittussanit sulissutiginiarneqarmat.
Taamaammat tamakkua taakkuinnaalluunniit eqqaallugit
oqartariaqarpunga, Kattusseqatigiinniit aamma qinersisartut
amerlanerussuteqartut aalajangigaat ataqqillugu Naalakkersuisussatut
siunnersuutigineqartut inassutigineqartullu taaseqataaffigissagakkit. Qujanaq.
Jonathan Motzfeldt, ataatsimiinnermik aqutsisoq, Inatsisartut Siulittaasuat,
Siumut.
Anthon Frederiksenimut qujavugut.
Allanik oqaasissaqartoqarumanngimmat, taava maannakkut taasissaagut,
Naalakkersuisut Siulittaasuata Hans Enoksenip Naalakkersuisussamisut
siunnersuutai aatsaannguaq taagorneqartut aammalu taasissutigineqarnissaanut
maannakkut piareertut taakkununnga isumaqataasut qinnuigissavakka
nikueqqullugit.
19.
Tamatumunnga akerliusut qinnuigissavakka nikueqqullugit.
Akerliusoqanngilaq.
Taaseqataanngitsut qinnuigissavakka nikueqqullugit.
12.
Qujavugut.
Maannakkut minutit qulit unikkallassaagut. Tassa
allakkiamik tigusaqarpugut immikkoortoq 10-mut tunngatillugu suliassat
ingerlanissaanut ingerlaqqitsinnata naammassisariaqartumik. Taannalu aamma
misissulaassavarput akuersissutigalugu. Tassa allakkiaq sulinngiffeqarnissamik
qinnuteqaatinut tunngasoq. Taamaattumik ataatsimiinneq minutsinik qulinik
unikkallarpoq.