Landskarsip 1996-imut naatsorsuutaasa kukkunersiorneqarnerat |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen,
Inatsisartut siulittaasuat.
Kristine Raahauge (S),
Ataatsimiititaliap siulittaasua:
Landskarsip 1996-imut naatsorsuutai
pillugit Kukkunersiuinermut Ataatsimiititaliap isumaliutissiissutaa
saqqummiutissavara.
Kukkunersiuinermut Ataatsimiititaliap
ilaasortaasa, siulittaasup Kristine Raahaugep, Knud Sĝrensenip, Ruth
Heilmannip, Lars Sĝrensenip Finn Karlsenillu Landskarsip 1996-imut naatsorsuutai
kukkunersiuisut kukkunersiuisimanerannut uppernarsaatitallit
oqaaseqaatitallillu misissorpai.
Ataatsimiititaliap aningaasartuutit
isertitallu akuersissuteqarnermut naapertuuttumik atornerqarsimanersut,
akuersissutini siunertarineqartut nammassineqarsimanersut aammalu aningaasanik
ingerlatsineq siunertaqarluartuusimanersoq ilaatigut naliligassarai.
Ataatsimiititaliaq uppernarsaatinik
imaluunniit sulisunik amerlanerusunik pisariaqartitsisumik
kukkunersiuisanngilaq, taamaattorli inassuteqarsinnaallunilu
isornartorsiuisinnaalluni.
Oqaatigineqartut tunngavigalugit
Landskarsip naatsorsuutai Ataatsimiititaliamit oqaaseqarfigilersinnagit,
Landskarsip naatsorsuutaasa naalakkersuinikkut suliarineqartarnerisa,
tulleriiaarneqartarnerisa allanngortinneqarnissaannik pisariaqartitsineq
Ataatsimiititaliap oqaatigerusuppaa.
Landskarsip naatsorsuutai maj-ip
20-ianni 1997-imi Inatsisartut upernaakkut ataatsimiinneranni
saqqummiunneqarput. Naatsorsuutinit, kukkunersiuisunit toqqakkanit
avataaneersunit uparuarneqarsimanngitsunit, takuneqarsinnaavoq
aningaasaliissutit akuersissutigineqartut qanoq atorneqarsimanersut,
ukiumoortumillu naatsorsuutit kukkunersiuisunit qupperneq 413-imiit pissutsit
nalinginnaasut apeqqutillu Pisortaqarfinnut ataasiakkaanut, Inatsisartut
aammalu Naalakkersuisut Allattoqarfiinut tunngasut sukumiisumik
oqaaseqarfigineqarlutik. Upernaakkut Ataatsimiinnermi oqallinnerup
takutippaattaaq immikkuualuttut amerlalluinnartut Landskarsip
naatsorsuutaaniillutillu kukkunersiuisut oqaaseqaataanni ilanngunneqartuniittut
partiinit oqaaseqarfigineqarsimasut.
Pissutsit tamakku Ataatsimiititaliaq
isumaliulersippaat suleriaasissamik siunnerfeqarfiunerusumik
inassuteqartoqarsinnaannginnersoq, tassa Landskarsip naatsorsuutaasa
Inatsisartuni oqaluuserineqannginneranni akuersissutigineqannginnerannilu
Ataatsimiititaliamit suliarineqaqqaartassasut. Taamaaliornikkut Inatsisartut
aalajangernissaminni aamma Kukkunersiuinermut Ataatsimiititaliap
isumaliutissiissutaa aamma tunngavissanut ilanngussinnaavaat aammalu taamaaliornikkut
apeqqutip ataatsip pingaaruteqartortaasigut Inatsisartuni marloriarlugu
oqaluuserineqartarnera pinngitsoortinneqassagaluarpoq. Taamaaliortoqassappat
inatsimmik allanngortitsisoqartariaqanngilaq.
Landskarsip 1997-imut naatsorsuutaasa
saqqummiunneqarnerat (kingusinnerusukkullu) Inatsisartunit
akuersissutigineqarnerat aallarnerfigalugit taama periaaseqarluni
sulilersoqarnissaa Ataatsimiititaliap inassutigaa.
Landskarsip 1996-imut
maatsorsuutaanik misissuinini tunngavigalugu Ataatsimiititaliaq imaattunik
oqaaseteqassaaq:
Nalinginnaasumik oqaatigiumasat:
Inuussutissarsiutinut
Tapersiisarnermut Ataatsimiititaliap taarsigassarsiaritittagaasa erniallit
amerliartuinnartut illuartinneqartarneri kukkunersiuisunit avataaneersunit
Landskarsip naatsorsuusiortarnermini tunngaviinut naapertuutinngitsutut
oqaatigineqarput. Landskarsip 1996-imut naatsorsuutaanik kukkunersiuisunit
avataaneersunit aamma tamanna uparuarneqarpoq.
Ataatsimiititaliaq isumaqarpoq
ajornartorsiutit taaneqartut qaangerniarlugit kingunilimmik
sulisoqartariaqartoq aammalu naalakkersuisut Kukkunersiuinermut
Immikkoortortaqarfiata oqaaseqaatai tusaatissatut tigullugit, taamaattorli
piumasaralugu illuartitsisoqartarnerani tunngavissat suut
malinneqartarnissaannik paatsuugassaanngilluinnartunik pilersitsisoqarnissaa.
Aningaasanik aqutseriaaseq - nalinginnaasumik
qarasaasiatigut nakkutilliineq.
Aningaasanik aqutseriaatsip
ingerlaavartumik nalimmassartuarneqarnissaata pingaaruteqassusia
Ataatsimiititaliap Landskarsip 1996-imut naatsorsuutai pillugit
isumaliutissiissummini uparuarpaa. Ataatsimiititaliap kissaatigisaq taanna,
tassa suliassap taassuma pingaartinneqarnerulernissaata
aalajangiusimaneqarnissaata qularnaarneqarnissaa, naalakkersuisunut ilaasortamut
tamatumunnga akisussaassumut aammaarlugu uteqqissavaa.
Qarasaasiatigut nalinginnasumik
nakkutilliinerit.
Suliassaqarfik taanna pillugu
kukkunersiuisut avataaneersut ima oqaaseqarput: "...qarasaasiatigut
nakkutilliinerit qarasaasianillu atuinermi isumannaallisaanerit suliffeqarfimmi
pissutsit aallaavigalugit suli toqqissisimanarsivinngilaq..."
Ukiunut naatsorsuuteqarfinnut
1994-imut 1995-imullu tunngasunik isumaliutissiissutini Ataatsimiititaliap
isornartorsiutai tunngavigalugit Ataatsimiititaliap aammaarluni
erseqqissaqqissavaa qarasaasiat atorlugit ingerlatsinerit ima
isumannaallisaaffigisariaqartut, uparuaassutit taakkorpiaat
uteqattaartuarnissaat siunissami pisariaarullugu. Ajornartorsiutit
aaqqinniarlugit KANUKOKA-mik suleqatiserinninnissaq pissusissamisoorlunilu
inassutigisariaqarpoq. KANUKOKA-mimi misilittagaqartoqarpoq tamatumani
atorluarsinnaasunik.
Naatsorsuuserinermut ilitsersuutit.
Kukkunersiuisut avataaneersut
oqaaseqaataasigut Ataatsimiititaliap paasivaa naatsorsuuserinermut
ilitsersuusiornerit Pisortaqarfiit ilaasa "paamaaruttorujussuugaat".
Suliat tamakkua kinguarsaqqinneqarnatik naammassineqarnissaat ukiumut
naatsorsuuteqarfiusumut 1995-imut isumaliutissiissummini Ataatsimiititaliap
kissaatigaa.
Ataatsimiititaliap immikkut
maluginiarpaa suliffeqarfinni namminersortitani naatsorsuuserisarnerit pillugit
nalunaarusiaq suli ilusissamisut naammassineqarsimanngitsoq.
Tamanna tunngavigalugu
Ataatsimiititaliap naalakkersuisunut ilaasortamut akisussaasumut pissutsit
taakkununnga tunngasut aaqqinneqarnissaasa pingaaruteqassusiat sakkortuumik erseqqissassavaa.
Ataatsimiititaliaq isumaqarpoq
uparuaassutini inassuteqaatinilu soorunami malinneqartariaqartut aammalu
suliassaqarfinni arlalinni aaqqissuussinerit ilusiliinerillu naalakkersuisunit
pitsanngorsarniarneqartut. Tamakku Ataatsimiititaliamit iluarisimaarneqarput.
Ataatsimiititalialli oqarluaannarluni
ukiut tamaasa isornartorsiutigisartakkaminik pissutsilluunniit
uparuartorneqartut, sulili manna tikillugu iluarsiivigineqanngitsut,
iluarsiissutissaattut inassuteqaateqaatigisartakkaminik ukioq qaangiukkaangat
uteqattaariualernera ingasappallaarsorinarpoq.
Pissutsit taamaannerisa
Ataatsimiititaliaq aalajangertariaqalersippaat suliat Ataatsimiititaliap
isumaliutissiissummini eqqartugaasa ilaannut tunngasunut immikkullu
tikkuarneqartunut, aammalu suliassanut
allanut Ataatsimiititaliap pisariaqartutut isummerfigisaanut - malinnaanissaq
pissutigalugu siunissami qaammatit pingasukkaarlugit nalunaarusiortarnissat
piumasaqaatigineqartalissasut.
Suliassaqarfinnut ataasiakkaanut
oqaatigiumasat.
Aningaasaqarnermut Pisortaqarfik
(ineqarnermut tunngasut)
Illutaarniarnermi
tapiissuteqartarnermut atatillugu A/S INI-p allaffissornikkut ingerlanneqarneranut
kukkunersiuisoqarsinnaaneranullu periarfissatigut ajornartorsiutit suli aaqqinneqarsimanngitsut
Ataatsimiititaliamit ilungersunartorujussuartut isigineqarput. Tamatumanimi
manna ersermat: "...naatsorsuutit allattorsimaffiannut nalunaarsuisarnerni
ajornartorsiutit Landskarsip 1996-imut naatsorsuutaanut annertuumik
sunniuteqarsinnaapput."
Pissutsit tamakku pillugit
nalornissuteqarnini Ataatsimiititaliap siusinnerusukkut oqaatigisa-reeramiuk
naalakkersuisunut ilaasortamut akisussaassumut sakkortuumik inassutigissavaa
pissutsit aaqqinneqarnissaannik qulakkeerisunik sulinermi malittarisassaliortoqassasoq
aammalu kukkunersiuisut avataaneersut uparuaassutigisartagaat taakkuujuartut
siunissami pinngitsoortinneqartalissasut.
Sulisoqarnermut Pisortaqarfik
Qarasaasiatigut nakkutilliinerit
pillugit oqaatigineqartut Ataatsimiititaliap innersuussutigissavai. Tamakku
saniatigut kukkunersiuisut avataaneersut oqaatigisaasigut erserpoq
"...Pisortaqarfiup qarasaasianik atuinerani amigaatitut
siunertaqarluanngitsutullu uparuarneqartut iluarsiissuteqarfigineqarnissaannut
suli suliniuteqartoqalinngitsoq". Pissutsit tamakku "qaammammusiallit
aningaasarsiaannut paasissutissanillu qaammammusianut tunngassuteqartunik qarasaasiatigoortumik
MR-lĝn aqqutigalugu suliat isumannaatsuunissaannut annertuumik sunniuteqartartut"
kukkunersiuisunit uparuarneqarmata, Ataatsimiititaliap naalakkersuisunut
ilaasortaq akisussaasoq tamanna pillugu isornartorsiortariaqalerpaa.
Taamaattumik pissutsit sapinngisamik piaarnerpaamik iluarsisariaqarput,
tamannalu anguniarlugu suliniutit ingerlaannaq aallartinneqarlutik.
Peqqinnissamut, Avatangiisinut
Ilisimatusarnermullu Pisortaqarfik.
1996-imi 600 mio. kr.-it sinnillit
Pisortaqarfimmut akuersissutigineqarput. Naatsorsuuserinerit missingersuutillu
malitsinneqarnissaannut periaatsit naammaginanngilluinnartumik tutsuiginanngitsuuneri
kukkunersiuisut avataaneersut oqaaseqaamminni uparuarpaat.
Matumani Ataatsimiititaliaq
naalakkersuisunut ilaasortamut akisussaasumut kissaatigeqqippaa
aqutseriaatsinik pilersitsinissamut suliniutit aallartinneqartut
ingerlaavartumik malinnaaffigilerniarlugit.
Pisortaqarfiit allat.
Pisortaqarfiit arlalissuit
naatsorsuuserinermut ilitsersuusiorsimannginnerat pillugu Ataatsimiititaliap
oqaaserisai nalinginnaasumik innersuussutigineqarput. Ilitsersuusiornissat suliassani
sallerpaat ilagisariaqarpaat.
Kalaalit Nunaat Radioa.
Kalaallit Nunaata Radioa
ingerlatsinissaminut ukiumoortumik aningaasarpassuarnik tapiiffigineqartarpoq.
1996-imi KNR 5 mio. kr.-inik taarsigassarsisinneqarpoq 1997-imilu 7,3 mio.
kr.-inik immikkut tapiiffigineqarluni. Kukkunersiuisut avataaneersut
naliliinerisigut erserpoq Kalaallit Nunaata Radioata taarsigassarsiaasa 1998-ip
tungaanut taarsersugassaanngitsut Kalaallit Nunaata Radioani aningaasaqarnikkut
killiffik pissutigalugu taarserneqarnissaat ilimananngitsoq.
Ataatsimiititaliap naalakkersuisunut
ilaasortaq akisussaasoq kaammattuuteqarfigissavaa akuersissutit
atorneqarnerannik nakkutilliineq ilaatigut qaammatit pingasukkaarlugit
nalunaaruteqartarnertigut nakussassarneqartariaqartoq. Taamaaliornikkummi
aningaasat akuersissutigineqartut atorneqarnerisa qanittumik
malinnaaffigineqalernissaat qulakkeerneqassagaluarmat.
Ataatsimiititaliap naggataagut
nuannaarutigaa kukkunersiuisut kukkunersiuisimanerminnik uppernarsaaneranni
oqaatigineqarmat Landskarsip naatsorsuutai pissutsinik eqqortunik takutitsisut.
Tamakku saniatigut Pisortaqarfiit aaqqissuussaaneranni pitsanngoriaatit
pitsaanerulersitsiniarlunilu suliniutit Ataatsimiititaliap akuersaarnartippai.
Ataatsimiititaliap oqaatigineqareersutut kissaatigaa Pisortaqarfiit suli
aqutseriaatsinik pisariaqarluinnartunik pilersitsimanngitsut piaartumik
tamakkuninnga aaqqiinniassasut, immaqa Qitiusumik Naatsorsuuserisoqarfik
suleqatigalugu.
Ataatsimiititaliamilu ilaasortaapput:
Kristine Raahauge (S), siulittaasoq; siulittaasup tullia Knud Sĝrensen (A);
Ruth Heilmann (S); Finn Karlsen (A); Lars Sĝrensen (IA).
Daniel Skifte, Aningaasaqarnermut
Ineqarnermullu Naalakkersuisoq:
Upernaaq ataatsimiinnerup nalaani,
apriilimi, landskarsip 1996-imut naatsorsuutai naalakkersuisut sinnerlugit
saqqummiuppakka.
Ingerlatsinermi, sanaartornermi
taarsigassarsititsisanermilu angusat 502 mio. kr.-inik sinneqartoorfiupput
imaluunniit 1996-imut aningaasanut inatsimmi aammalu inassutitut aningaasaliissutinut
inatsisini marlunni naatsorsuutigineqartunit 137 mio. kr.-inik amerlanerusunik.
Naatsorsuutit upernaaq
saqqummiunneqarnerannik kukkunersiuisut avataaneersut kukkunersiuisimanerminnut
uppernarsaataanni naatsorsuutit oqaaseqarfigineqanngillat. Tamanna imatut
paasisariaqarpoq, naatsorsuutinik kukkunernik annertuunik amigaatinilluunniit
siumuisoqarsimanngitsoq. Taamaattumillu naatsorsuutit eqqortumik
takutitsisutut isigisariaqarlutik.
Massakkut kukkunersiuinermut
Ataatsimiititaliaq isumaliutissiissuteqarpoq naatsorsuutinik, taakkununngalu
atatillugit kukkunersiuisut oqaaseqaataannik misissuereerluni tamatumani
pisariaqartitani tunngavigalugit.
Ataatsimiititaliap
isumaliutissiissummini suleriaatsiminik allanngortitsiniarluni, tassa naatsorsuutit
ataatsimiititaliallu isumaliutissiissutaata Inatsisartuni ataatsikkut
suliarineqartarnissaannik, siunnersuuteqarpoq. Tamatumunnga atatillugu
oqaatigissavara Inatsisartut 1994-imi ukiakkut ataatsimiinnerminni
Namminersornerullutik Oqartussat Naatsorsuuseriveqarnerat il.il. pillugit
inatsit akuersissutigimmassuk.
Inatsimmi tamatumani
siunertarineqartut ilagaat, Landskarsip naatsorsuutaasa saqqummiunneqartarnerannut,
suliassat akisussaaffiillu agguataarneqartarnerisa erseqqissisinneqartarnissaat. Tamanna sioqqullugu
ileqquliunneqarsimagaluarpoq Landskarsip naatsorsuutai Kukkunersiuinermut
Ataatsimiititaliamit saqqummiunneqartarlutillu akuersissutigeneqarnissaat
inassutigineqartarluni.
Taamaattumik inatsimmi
paatsuugassaanngitsumik aalajangersarneqarpoq, Landskarsip ukiumut
qaangiuttumut naatsorsuutai Naalakkersuisunit saqqummiunneqartassasut. Tamanna
kingusinnerpaamik ukiaakut
ataatsimiinnermi pisasssaaq. Tamatumunnga peqatigitillugu erseqqissarneqarpoq
Kukkunersiuinermut Ataatsimiititaliap suliassai Inatsisartut Naalakkersuisullu
pillugit inatsisip '-fiisa 17-ianni aalajangersagaasut.
Taakkunuunatigut erserpoq Landskarsip naatsorsuutai kukkunersiuisullu
taakkununnga oqaaseqaataat ukiumut ataasiarluni Ataatsimiititaliamit
misissornewqartassasut aammalu naatsorsuutit tunngavigalugit apeqqutissat
oqaaserineqartussallu Naalakkersuisunut saqqummiunneqartassallutik. Apeqqutit
oqaatigneqartullu Naalakkersuisut akissuteqaataannik ilallugit Inatsisartunut
saqqummiunneqartassapput.
Erseqqissumik oqatigissavara
upernaakkut ataatsimiinnermi saqqummiunneqarnerannut ilaatigut pissutaavoq;
ilassutitut anigaasaliissutinut inatsisiliornermi, aningasanut tunngasunik
isumaliutiginninnermi angusat ilanngunneqarsinnaaniasssammata. Tamatuma saniatigut
naatsorsuutinik saqqummiussinikkut inatsisartuni oqallinneq, kingusinnerusukkut
Kukkunersiuinermut Ataatsimiititaliap sulinerani tunngavissaasinnaasoq,
pilersinneqartarpoq.
Kukkunersiuinermut Ataatsimiititaliap
suleriaatsiminik allanngortitsinissaminut siunnersuutaa akerliffiginngilara.
Isumaqarpunga ataatsimiititaliap suliaminik upernaakkut ataatsimiinnermiit
ingerlatsiumanera aamma isumaliutissiissummini suliaminik ingerlaavaartumik
malersueqqittarniarnera ilorraap tungaanut ingerlanerusut.
Tamatumunnga atatillugu
ataatsimiititaliamut maluginiaqqussavara upernaakkut ukiakkullu
ataatsimiinnerit akornanni, uannik oqaloqatiginnissutissaqaraangata tamanna
aamma siunissami piareersimaffigisassagakku.
Inuussutissarsiutinut
tapersiisarnermut ataatsimiititaliamit taarsigassarsianit illuartitsisarneq
pillugu malittarisassat allanngortinneqarnissaat Kukkunersiuinermut
Ataatsimiititaliap kissaatigineqarpoq. Tamanna tupigusuutigitsiarpara, tassami
landskarsip 1995-imut naatsorsuutaasa suliarineqarnerannik suleriaaseq
atorneqartoq ataatsimiititaliamit naammagisimaarneqarmat. Taamaattorli
ataatsimiititaliap oqaatigisai Naalakkersuisunit tusaatissatut tiguneqarput,
illuartitsisarnernilu tunngaviusut pillugit malittarisassiussallutik.
Ataatsimiititaliap aningaasaqarnermut
akissarsialerinermullu tunngasutigut aaqqissuussinerni suli qarasaasiat
atorlugit nakkutilliinernik isummannaallisaanernillu naammaginartunik
pilersitsisoqarsimannginnera uparuarpaa. Ilisimatitsissutigisinnaavara
kukkunersiuisut avataaneersut oqaaseqaamminni aningaasanut tunngassuteqartuni
immikkut uparuartugaasa ilarpassui pitsanngoriartinneqareersimammata.
Akissarsialerinermi
aaqqissuussinernut Kukkunersiuinermut Ataatsimiititaliap isornartorsiuineranut,
ajuusaarutigalugu oqaatigissavara suliaq siusinnerusukkut
neriorsuutigineqaraluartutut suli naammassineqarsimanngimmat.
Naluneqanngitsutut Sulisoqarnermut Pisortaqarfimmi aqutsisut arlallit
taarserneqarput. Taamaattumik suliaq naammaginartumik
salliutinneqarsimanngilaq. Taamaakkaluartoq aqutsisunit nutaanit suliap
pingaaruteqassusia maluginiarneqarpoq 1998-imilu maajip aallaqqaataata
naalertinnagu naammassineqarnissaa uannut neriorsuutigineqarluni.
Naatsorsuuserinermut ilitsersuutit
amigaatigineqarnerat Kukkunersiuinermut Ataatsimiititaliap nalinginnaasumik
isornartorsiorpaa, aamma suliffeqarfinnut namminersortitanut atortussanik
naatsorsuuserinermut nalunaarusiortoqarsimannginnera taakkununnga ilanngullugu.
Ajornartorsiutit tamakku naalakkersuisunit maluginiarneqarput taamaattumillu
pisortaqarfiit ataasiakkaat tamarmik 1997 qaangiutsinnagu ilitsersuusiornissaat
kissaatigineqartutut suliniutigineqalerluni. Suliffeqarfinnut
namminersortitanut atortussanik nalunaarusiassat missingiusiorneqareerput,
massakkullu inatsisinut tunngasortaat Inatsisileriffimmi misissorneqarlutik.
Ineqarnermut atatillugu
Ataatsimiititaliap kaammattuutigaa ineqarnermut tapiissuteqartarnermi
ajornartorsiutitaaqqinneqarsimanngitsut iluarsiivigineqarnissaa
qulakkeerneqarnissaannut atorsinnaasunik suleriaaseqalertoqarnissaa.
Ilimatitstissutigisinnaavara Aningaasaqarnermut pisortaqarfik A/S
Inissiaatileqatigiiffik INI-mut aammalu kukkunersiuisunut avataaneersunut
ingerlaavartumik qanittumillu atassuteqaateqalermat. Tamatumunnga
peqatigitillugu ingerlatseqatigiiffiup 1997-imi upernaakkut ukiumoortumik
ataatsimmeersuaarnerani, ingerlatseqatigiiffiup aningaasanik aqutsinerminik
aaqqissuussinerata allanngortinneqarnissaanut atasumik, 1997 qaangiutsinnagu
iliuusissanut pilersaarusiortoqarnissaa ingerlatseqatigiiffiup siulersuisuinut
naalakkersuisuinit suliassiissutigineqarpoq. Taamaalilluta tamatumuuna
naatsorsuutigaarput 1997 qaangiutsinnagu pitsanngoriaatsit annertuut
illinersiorsinnaalerumaarlugit.
Ataatsimiititaliap inassutigaa
naalakkersuisup akisussaasup KNR-ip aningaasanik akuersissutigineqartunik
atuinera qaammatit pingasukkaarlugit nalunaaruteqartarnertsigut
ingerlaavartumik malersussagaa. Ilisimatitsissutigissavara 1997-imi upernaakkut
KNR-imut aningaasaliissutissanut qinnuteqaammi missingersuutinut ilanngussami
oqaatigineqarmat; KNR-ip naatsorsuutini qaammatit pingasukkaarlugit
Kultureqarnermi, Ilinniartitaanermut Ilageeqarnermulu naalakkersuisoqarfimmut
saqqummiuttassagai. Taamaattumik KNR ukiup affaanut naatsorsuumminik
tunniussaqareerpoq, aammalu massakkut qaammatit tammasa naalakkersuisoqarfimmut
nalunaaruteqartarluni.
Nalinginnaasumik oqaatigiumavara
inassuteqaatit kaammattuutillu allat Kukkunersiuinermut Ataatsimiititaliamit
saqqummiunneqartut naalakkersuisoqarfinnit malinneqarumaarmata.
Naggataagut Kukkunersiuinermut
Ataatsimiititaliaq sulilluarsimanera pillugu qutsavigaara taamaalillungalu
suliassaq Inatsisartunit ilassilluarneqarluni taakkununnga
suliassanngortillugu.
Ruth
Heilmann, Siumup oqaaseqartua:
Landskarsip
1996-imut naatsorsuutai pillugit Kukkunersiuinermut Ataatsimiititaliap isumaliutissiissutaa
aammalu Naalakkersuisut akissutaannut tunngatillugu Siumumit imatut oqaaseqassaagut.
Nuannaarutigalugulu
oqassaagut upernaakkut Naalakkersuisut naatsorsuutinik saqqummiussaqareernerisigut
partiit oqaaseqaateqartarneranni, naatsorsuutinik annertunerpaatigut iluarisimaarinninnermik
nipeqartumik oqariartuuteqartoqarnera Siumumit iluarisimaaratsigu.
Maannakkut
inatsisartut allaanerusumik suleriaaseqalernerat aallaavigalugu,
kukkunersiuinermi ataatsimiititaliap isumaliutissiissutaani maluginiarparput
allaanerulaartumik suleriaaseqalernissamik eqqarsaatersuummik
ataatsimiititaliaq saqqummiussaqartoq.
Tamanna ataatsimiititaliap suleriaasiani ' 6-imi
periarfissaqartitsimmat imatut, siulittaasoq qinnuivigilaassavara ajornanngippat
ataatsimiititaliap suleriaasianik issuaalaarnissamut akuereqqullunga:
Ataatsimiititaliap Namminersornerullutik Oqartussat karseqarnerat
naatsorsuuseriveqarnerallu pillugit malittarisassat atuuttut
naliliiffigisartussaavai aammalu kukkunersiuinermi immikkut periaaseqarluni
naammassinnittoqartarsinnaanera inassutigisarsinnaallugu. Soorluttaaq
Landskarsip naatsorsuusereriaasianut pitsanngoriaatissanik ataatsimiititaliaq
siunnersuuteqarsinnaatitaasoq.
Taamatut
ataatsimiititaliap suleriaasia issuaaffigereerlugu paasilluarsinnaavarput
Naalakkersuisut akissuteqarnerminni erseqqissarmassuk 1994-imi naatsorsuutinik
saqqummeeriaatsip allannguuteqartinnera
inatsisartut akuersaagaat ullumimut atuutsinneqarmat.Tassa upernaakkut
naatsorsuutit saqqummiunneqartassasut kingusinnerpaamillu ukiakkut
akuersissutigineqartassallutik.
Tamanna
suleriaaseq ukiuni arlalinni ingerlanneqartoq ataatsimiititaliap
allannguuteqartinniarpaa.
Siumumit
isumaqarpugut naatsorsuutit upernaakkut Naalakkersuisunut saqqummiunneqarnerat
malitsigalugu, isumaliutissiissutiliortoqartassasoq taamalu ingerlatiinarlugu
upernaakkut aamma naatsorsuutit inatsisartunit akuersissutigineqartassasut.
Taamatut periuseqartoqaleruni isumaqaratta aamma inuiaqatigiinnut
paatsuunganannginnerusumik naatsorsuutinik saqqummiisoqartalissasoq.
Tamannalu
ataatsimiititaliap aamma isumaliutissiissummini eqqaavaa suleriaatsimik allannguinissami
pisariaqassanngitsoq inatsimmik allannguisoqarnissaa. Taammaattumik naalakkersuisup tammatut kukkunersiuinermi
ataatsimiititaliap suleriaaseqalernissaanik aamma akerliunnginnera Siumumit
paasigatsigu isumaqataaffigaarput. Taamalu naalakkersuisup nammineq
ataatsimiititaliamit aggersarneqartarnissaminik ammatitsinerminik
eqqaasitsinera suleriaatsimut iluaqutaassasutut isumaqarfigalutigu.
Kukkunersiuinermi
ataatsimiititaliamit uparuaassutaasut Siumumit tusaatissatut tigussavavut,
aamma siuliani aaqqinneqaqqullugit oqaaseqartareernikuunerput
nangittaqattaaginnarumanagu, malunnarluarmaammi naalakkersuisut
akissuteqarnerminni aaqqiiniarlutik annertuumik tamaviaaruteqarlutik
suliniuteqalereersimasut, tamanna Siumumit iluarisimaarparput taamatullu
aaqqiissuteqavittoqarnissaanut suleqataarusussuseqarnerput oqaatigissallugu.
Nalunanngilaq
qarasaasiatigut atortorissaaruteqarfimmut pulariarnitsinni suliffeqarfittut
allatulli ajornartooruteqarfiusut aqqusaaqaartussaagivut, Siumumiilli
qularutiginngilarput Kanukoka peqatigalugu Telemillu suleqateqarluarnikkut,
ataqatigiissaartumik eqaatsumik periutsimik ataatsimoortumik
ingerlataqalernikkut aatsaat ilorraap tungaanut pitsaasumik angusaqarfiusumik
tamaginni kinguneqaataajumaartoq aamma naatsorsuuserinikkut, taamalu naatsorsuutit
pitsaasuunissaannik kissaateqartarnivut taamaalilluni
angusaqarfiullualissallutik.
Taamatut
piumasaqarneq atortorissaarutitigut aningaasatigullu annertuumik
piumasaqarfiuinnarani aamma sulisorisat pikkorissuseqaluarnissaannik
sakkortuumik piumasaqaatitaqarpoq. Taamaattumik sulisunik
aaqqissuussilluarnikkut pikkorissartitsisarnerit Siumumit tapersersorluinnarpavut,
kaammattuutigissallugillu ingerlanneqartuarnissaannik.
Naatsorsuutit
uterfigeqqillugit 502 mio. kr.-nik sinneqartoorfiusut pitsaasumik Siumumit
nalilerumavavut, soorlu upernaaq manna iluarisimaarinninnerput aamma
oqaatigeriigarput uteqqinngikkaluarlugu Naalakkersuisut akissuteqaataat
ersarissut qujassutigissavavut.
Siumup
pingaartuutittuassavaa Naatsorsuutit pitsaanerpaamik suliarineqartarnissaat
aamma aningaasaliissutit malillugit ingerlatsinissaannik
eqqaasinneqartuaannarnissaat, tassami tamatta pingaarteqaarput inuiaqatigiit
aningaasaataannik aqutsinerup pitsaanerpaamik ingerlanneqarnissaa.
Siumumiillu
nuannaarutigiuaannarparput nalunnginatsigu taamatut naalakkersuisut naatsorsuutinut
pimoorutamik malittarinninniartuusut sakkortuumik sukumiisumillu
ingerlatsiniarlutik tamaviaaruteqartut, tamanna nalunagu inatsisartuni
ilaasortaalluni inuiaqatigiillu sinnerlugit akisussaaqataasuulluni
toqqissisimanartuuvoq.
Naatsorsuutit
pisarnermissut suliarilluagaapput aammalu ataatsimiititaliamit uparuaassutaasut
Siumumit isumaqataaffigisavut naalakkersuisunit aaqqinniarlugit akissumminni
nassuiaatigineqartut Siumumit naammagisimaarinninnerput oqaatigeriarlugu,
suleqataasimasut tamaasa ataatsimiititaliaq naatsorsuuserinermilu suliaqartut
minnerunngitsumillu naalakkersuisut sulilluarsimanerannik
qujassuteqarfiginiarpavut. Suliaq imaannaanngimmat suliarisarsi taamaammat
Siumumit tamassi suleqatisilu suleqqilluarnissassinnik kissaatingaapassi.
Taamatut
oqarluta Siumumit naatsorsuutinik akuerseqataanerput nalunaarutigeqqipparput.
Knud Sĝrensen, Atassutip
oqaaseqartua:
Atassut-mit kukkunersiuisut
isumaliutissiissutaat naatsumik oqaaseqarfigissavarput, tassami
malugilluarparput takusinnaallutigulu peqqissaarluni suliaasoq.
Atassut-mit ataatsimiititaliap
periaatsiminik naleqqussaalluni allanngortitsinissaminik pilersaarnera
ataatsimut isigalugu tulluartutut isigaarput, allanngortitsinissarlu
isumaqataafigaarput.
Atassut-mit immikkut pisarialittut
oqaaeqarfigerusutarput tassaavoq: Qarasaasiatigut naliginnaasumik
nakkutilliinermut tunngatillugu 1994-95-imilu ajornartorsiutinik
aaqqeqqusilluni ataatsimiititaliap noqqaaneri suli naammassineqarsimanngitsut.
Taamaattoqaanarsinnaanngilaq!
Atassut-mit piumasarineqartutut
pissutsit KANUKOKA suleqatigalugu piaarnerpaamik iluarsineqarnissaat
piumasaraarput. Tassunga ilanngullugu nunatsinni pisortaqarfiit suliffiutaanni
tamani qarasaasiaqarnermut atortorissaarutinik assigiiaarnerusunik
atortoqalernissaq oqaloqatigiinnikkut piaartumik ilusilertariaqalerpoq.
Atassut-mit aappaattut
tikkuassavarput ataatsimiititaliap naatsorsuutinut ilitsersuutinut Pisortaqarfiit
ilaasa Apaamaarussinersuat@ pillugu aammaartumik uparuaanera. Tamanna piaartumik
paamaarussisut iluarsisariaqarpaat.
Atassut-mit ataatsimiititaliap
naalakkersuisoqarfinnut ataasiakkaanut tunngatillugu uparuaatai tamaasa
pissusissamisoortutut isigalugit Aaaqqeeqqusissutit@ naammassineqarnissaat piumasaraarput.
Atassut-mit upernaaq Landskarsip
naatsorsuutai inatsisartunut saqqummiunneqarmata akuersissutigaagut, aammalumi
partiit allat taamaaliorput. Naatsorsuutit ukiut arlallit matuma siornatigut saqqummiunneqaraangata
oqallittarnerujussuit nungupput. Tamatuma kinguneraa naatsorsuutinut
kukkunersiuisut isumaliutissiissutigisartagaat sallaalliartorlutillu
pitsanngoriartuinnarmata.
Atassut-mit tamanna
pitsaalluinnartutut isigaarput, tamanilu sulianik pitsaasumik ingerlatsinertut
isigaarput. Oqaatigissavarpulli aaqqeqquneqartut aaqqinneqartariaqarput.
Taama oqaaseqaateqarluta Landskarsip
1996-mut naatsorsuutai pillugit Kukkunersiuisut isumaliutissiissutaat
tusaatissatut tiguarput.
Manasse Berthelsen, InuitAtaqatigiit
oqaaseqartuat:
Landskarsip 1996-imut naatsorsuutai
502 mio. kr.sinneqartoorutitallit upernaaq Inatsisatut tamarmiulluta
akuersissutigaagut, ilaatigut kukkunersiuisut avataaneersut uparuaanertaqanngitsumik
uppernarsereermagit.
1996-imi annertuunik
sinneqartoornermut pissutaapput,Tele Greenland A/S-ip aammalu KNI Pisiffik
A/S-ip 1996-imi Landskarsimut akiitsuminut immikkut katillugit 329 mio.
kr.-inik akiliuteqarsimammata.
Taamatuttaaq sinneqartoorujussuarnermut
peqqutaavoq sanaartornermut 1996-imi atunngitsuukkat, kinguaattoorutaasut
katillugit 92 mio. kr.-usimammata, taakkulu ukioq manna aningaasanut ilassut
siulleq aqqutigalugu aningaasartuutaareeerput.
Inuit Ataqatigiit
ilungersornartorujussuartut isigaarput A/S INI-p allaffissornikkut
ingerlatsinera uppernassusia kukkunersiuinermut ataatsimiititaliap kingumut
apeqquserlugu sakkortuumik isornartorsioqqimmagu, allaallu A/S INI-p
aningaasatigut ingerlatsinerliornerata Landskarsip 1996-imut naatsorsuutaanut
annertuumik sunniuteqarsinnaasutut oqaatigalugu. Pissutsit taamaattut Inuit
Ataqatigiit akuersaarsinnaanngilaat, Landskarsimmi naatsorsuutai Inatsisartunut
saqqummiunneqartariaqarput kukkuneqanngitsut apeqqusertariaqanngitsullu,
tamanna Naalakkersuisut pisussaaffigaat.
Taamaattumik Inuit Ataqatigiit
pissusissamisoortutut isigaarput kukkunersiuinermut ataatsimiititaliap
inassuteqaataasa, tassalu Landskarsip naatsorsuutaasa Inatsisartuni
akuersissutigineqannginnerini ataatsimiititaliamit suliarineqaqqaarneqartassasut.
Taamaalilluni aamma siunissami naatsorsuutit kukkuneqanngitsut
apeqquserneqanngitsut, minnerunngitsumillu kukkunersiuisut avataaneersut
naatsorsuutit saqqummiunneqannginneranni aaqqeqqullugit uparuagaat, ilumut
pisortaqarfiit naammassisimaneraat ataavarnerusumik ataatsimiititaliap
nakkutigisariaqaleraa Inuit Ataqatigiinni isumaqarfigaarput.
Inatsisartut kukkunersiuinermut
ataatsimiititaliata ukiuni arlaqalersuni anngaasanik aqutsinikkut
ajornartorsiutit tikkuartortuagai uteqattaartuartut, Naalakkersuisunit
taakkununnga akisussaasunit ukiut tamaasa Inatsisartunit aaqqeqqaarnissaanik
asuli neriorsuisarnerat, taamaalilluni unittariaqartoq Inuit Ataqatigiit
isumaqarpugut.
Inuit Ataqatigiit inatsisartut
kukkunersiuinermut ataatsimiititalianut kaammattuutigissavarput;
Namminersornerullutik Oqartussat ingerlataani tamani kalerreqqaarnatik
ingerlaavartumik aningaasanik aqutsinikkut kukkunersiuisaqqullugit.
Ilisimaneqartutuummi ingerlatsinikkut Inatsisartunit Naalakkersuisullu
avissaartinneqarput. Inatsisartullu ulluinnarni pisussaapput ilumut
aningaasanut ingerlatsinikkut aamma ataatsimiititaliartik aqqutigalugu
nakkutilliissallutik.
Pisortaqarfiit ataasiakkaarlugit
oqaaseqarfiginagit, kingumut Inuit Ataqatigiit eqqaasissutigissavarput
naatsorsuuserisarnerit pillugit malittarisassat pisortaqarfinni tamani
malinneqartarnissaat, taamatuttaaq qarasaasiat atorlugit aningaasaqarnikkut
ingerlatsinermi ingerlaavartumik isumannaallisaanissaqqulakkeerneqartariaqarpoq.
Naggataatigut Kukkunersiuinermut
Ataatsimiititaliap aammalumi kukkunersiuisut avataanersut siusinnerusukkut
uparuartarsimasaat naatsorsuutigalugu Naalakkersuisut naammassiniassagaat,
minnerunngitsumillu KNR-imi pisimasut tamatta ilisimalersimagigut
uteqqinneqannginnissaat naatsorsuutigalugu INUIT ATAQATIGIIT kukkunersiuinermut
Ataatsimiititaliap 1996-imut Landskarsip naatsorsuutai pillugit isumaliutissiissutaa
akueraarput.
Bjarne
Kreutzmann, Akulliit Partiiat:
Landkarsip
1996-imut naatsorsuutai pillugit Kukkunersiuinermut Ataatsimiititaliap
isumaliutissiissutaa AP-anni soqutigalugu misissuataarsimavara.
Paasivara,
naatsorsuutit upernaaq saqqummiunneqarneranni kukkunersiuisut avataaneersut
kukkunesiuisimanerminnut uppernarsaataanni naatsorsuutit oqaaseqarfigineqaesimanngitsut.
Tassalu
tamanna isumaqassaaq, naatsorsuutini kukkunernik annertuuunik
amigaatinilluunniit nassaartoqarsimanngotsoq, taamaattumillu naatsorsuutit
eqqortumik takussutissatut naatsorsorneqartut.
Malugaara
siunnersuutigineqartoq ataatsimiititaliap periaasia allanngortinneqassasoq,
tassa naatsorsuutit aamma ataatsimiititaliap isumaliutissiissutaa Inatsisartuni
ataatsikkut suliarineqartartussanngorlugit. AP isumaqarpoq tamanna
isumassarsiaasoq ajunngitsoq, tassa landskarsip naatsorsuutaasa
saqqummiunneqarnerannut atatillugu suliassat akisussaaffiillu agguataarneqartarnerat
ersarississammat.
Pineqartut
allat tusaatissatut tiguakka, taamaalillungalu Landskarsip 1996-imut
naatsorsuutai pillugit Kukkunersiuinermut Ataatsimiititaliap
isumaliutissiissutaa akuersissutigalugu.
Anthon Frederiksen, Kattusseqatigiit:
Inatsisartut upernaaq ataatsimiinitsinni Landskassip naatsorsuutai
siullermeerlugit saqqummiunneqarmata Kattuseqatigiinniit oqaaseqaatikka
innersuussutigalugit Kukkunersiuinermut Ataatsimiititaliap uparuartugai
inassuteqaataalu tamakkiisumik taperserpakka. Tassami akuersaarneqartuaannarsinnaanngilaq
ukiut tamaasa Kukkunersiuinermut Ataatsimiititaliap kaammaatuutai
inassuteqaataalu naammassineqarnatik uteqattaartuarneqartassappata.
Oqartariaqarpugut Landkasse nunatta tamarmi uummataatulli pingaaruteqartigaaq
taamaattumik pissutissaqarluarpoq aningaasatigut ingerlatsinermi
sanngeequtaasinnaasut tamarmik iluarsilluinnarsimaneqarnissaat,
minnerunngitsumik naatsorsuuserisarnermut nakkutillinermullu tunngasutigut.
Toqqissisimananngilaq tusarlugu kukkunersiuisut avataaneersut pisortaqarfiit
ilaat allaffissornikkut ingerlatsinerat pillugu naatsorsuutit
allattorsimaffiannut nalunaarsuisarnermi ajornartorsiutit ilaatigut Landskassip
naatsorsuutaanut annertuumik sunniuteqarsinnaanerat uparuarneqarsimammat
aammalu naatsorsuuserinerit missingersuutillu malitsinneqarnissaannut
periaatsit tutsuiginanngitsuuneri.
Kukkunersiuinermut Ataatsimiititaliap uparuartuutai inassuteqaataalu
tamakkiisumik taamatut oqaaseqarlunga taperserpakka, Naalakkersuisunullu
ilungersortumik kaammattuutigissallugu pissutsit akueriuminaatsut piaartumik
naammassineqarnissaat sulissutigeqqullugu.
Daniel Skifte, Aningaasaqarnermut
Ineqarnermullu Naalakkersuisoq, Atassut:
Partiit oqaaseqartuinut tamanut qujavunga. Ataatsimut oqaatigissagukku
inernivia uaniittoq erseqqippoq, Partiit tamarmik oqariartuuteqarput
iluarsisassanik kisiannili, aammalu Ataatsi-miititaliap inassuteqaatai
kaammattuutaalu ilaatigut uanga akissuteqarnikkut oqaaseqarfigineqartut ,
taakkua taperserlugit. Kisiannili imannak itigartsitsissummik nipeqanngillat
kisianni tassa nipi ataasiuvoq taamatut saqqummiunneqarnerat taperserpaat
,aammalu allatut oqaatigalugu naatsorsuutit taamatut upernaaq
saqqummiunneqartut taamatut isikkoqarlutik akuerineqarnerat erserpoq.
Oqaatsit, partiit oqaaseqaataat ataasiakkaarlutik oqaaseqarfigissagukkit
Siumup Kukkunersiuinermut Ataatsimiititaliap inassuteqaatai isumaqatigai aammalu
maluguniarpara Siumut oqaaseqartoq annertuumik pitsanngoriartoqarsimasoq,
tamannalu soorumani nuannaarutissaavoq. Aamma oqaatigissavara Siumup
oqaatigimmagu assigiinngitsut malitassat Naalakkersuisoqarfinni
assigiingitsuneertuttaaq eqqaasitissutigineqartutariaqartut, soorlu
Kukkunersiuinermut Ataatsimiititaliap ujartugai eqqaasitsissutaalu. Aap,
taamaappoq taamaaliortariaqarpugut, taama eqqaasitsineq ajunngilaq,
taamaaliorniarsarivugut. Kisianni tassa
eqqaasinneqarneq soorlu Kukkunersiuinermik Ataatsimiititaliamit aamma
eqqaasinneqartuartugut. Taakkua ajunngilluinnartutut pitaasutullu
nalilerpakka. Qujassutigaara Naalakkersuisut sulilluarsimanerannik Siumup
oqaasia.
Atassummut tunngatillugu oqaatigissavara aamma soorunami qujaniarnermik
oqaaseqarfigissagakku. Oqariartuutaat ataatsimut marluk taarusutakka taakkua
ingerlateqqissavagut tusaatissatullu tigujumallugit. Tassaasut ilaatigut
qarasaasiaqarnermut tunngasut, qangali aaqqillaquneqartut
taamaaginnartoqarsinnaannginneranik oqarnerit , taakkua pimoorillugit
tusaatissatut tigusariaqassavagut. Aamma taamaappoq pisortaqarfiit
assigiinnitsut ilaasa .............rujussuat Atassummin-ngaaniit
oqariartuutigineqarmat taanna aamma qanoq iliuuseqarfiginiaqqissavarput,
soorlulimi oqaaseqarninni assersuutigalugu eqqartornerqartut ilaat INI
oqaaseqarfigigakku taamatut akissuteqartunga. Aamma soorunami maannamut
ingerlatsinerup pitanngoriarsimaneranik nersornissataanut Atassutip
qujassuteqarpugut Naalakkersuisunit.
Inuit Ataqatigiit oqaaseqaataat imatut oqaaseqarfigissavara. Aamma
qujavugut IA-p oqaaseqaataanut uparuartuussineranullu, taakkua tusaatissatut
tigussavagut qanoq iliuuseqarfiginiarlugillu. Soorlu assersuutigalugu A/S
Inissiaatileqatigiiffik pillugu oqaasii malugaara ilungersornartorujussuartut
aammalu naammassisariaqartutut IA-p isumaqarfigigai. Aap, soorlu oqareernittuut
naatsorsuutigivipparput taanna ajornartorsiut Naalakkersuisuni
ataasianngivillugu sammisaratsigu, taanna ukioq manna naatinnagu
isumannaarsimassasoq.
Allaqattaarnerit ataatsimeeqattaarnerillu qaamatini qaangiuttuni pisimapput
sulilu qaamatini aggersuni pisassaallutik. Aamma pisussaaffipput
Naalakkersuisuni qimarratigissanngilarput , tassa naatsorsuutit
kukkuneqanngitsumik saqqummiunnissaat. IA-p oqaaseqarnermini nipi atugaa imatut
isumaqalersitseqinammat naatsorsuutit kukkuneqartut saqqummiussimagivut,
tassami kissaatigineqarmat naatsorsuuti kukkuneqanngitsut, naatsorsuutit
upernaaq saqqummiunneqartut kukkuneqanngillat, taakkulu uppernarsarneqarput avataaninngaaniit
Namminersornerusunut atassuteqanngitsumik kukkunersiuisut nalunaarusiormata
allatulli, taamaattumik naatsorsuutit taakkua saqqummiunneqartut
kukkuneqanngillat.
Taamatut oqariarlunga, neriuppunga imatut paasineqassanngitsoq IA
kukkusumik oqartikkiga, tassaanna taamatut nipeqarsinnaammata taanna
erseqqissariga. Oqariartuutaasa ilaat aamma IA-p naggataaq
oqaaseqarfigilaassavara, tassaasoq Kukkunersiuinermik Ataatsimiititaliaq
kalerreeqqaarani ingerlaavartumik aningaasanik aqutsinikkut akuliuttarnissaa,
taanna maannakkorpiaq erseqqeqqissaartumik akisinnaanngilara inatsisinik
aporfissaqassappat taavaa taanna misissussaaq . Isumaqarpunga taanna
nalilersoqqissaartariaqartoq. Ullumikkut una atuuttuuvoq aammalu
atorneqarsinnaalluni, Kukkunersiuinermut Ataatsimiititaliap avataaninngaaniik
kukkunersiuisut peqqusinnaavai kalerreeqqaarasi taamaalioriartortarniaritsi.
Taanna siunertaappat oqaatigissavara taamaaliortarput. Avataaninngaaniit
kukkunersiuisartut ekstern regnskab revisionregnskabe-mik ingerlatsisut
taakkua, taakkua kaleqqeeqqaangiivillutik takkuttarput soqarnersorlu
misissuataarlugu.
Tassa taakku aamma suliassarigamikku taanna, inatsisit malillugit, taakkulu
ima ilinniarsimassallutik Statsautoriseret revisor-iussallutik, naalagaafiup
akuerisaanik kukkunersiuisinnaanermut ingerlatsisinnaassuseqassallutik. Taakku
taamaaliorput. Taassuma saniatigut soorunami aamma Namminersornerullutik
iluminni kukkunersiuisoqarput, kisianni aqqutissaq taanna imaattorpaat,
atugassat ilagaat aamma taamaaliortoqartarpoq.
Taavalu aamma soorunami Akulliit Partiiat Kattusseqatigiillu
aaqqeeqqusiniutinillu assigiin-ngitsunik kaammattuuteqarnerat
Naalakkersuisuniit oqareernittuut ammaffigalugulu naammasseqqusat
maanngaaneersut naammassiniassavagut.
Nuannaarutigaara naggataagut oqaatigissagakku maannamut naatsorsuutit
saqqummiunneqartarnerat periaaseq una atorneqartoq akerlerineqanngitsoq
paasigakku. Ajornanngippat piaarnerpaamik Inatsisartut Nunatta Kasse-ata
naatsorsuutai tassunga tunngasut paasissutissat piaarnerpaamik pisariaqarpaat,
ukiakkut ataatsimiinnermut utaqqinagit, tunngavii anginerpaartaasa ilagaat
Inatsisartut paasitiaarneqarnissaat, qanoq-una ukiup qaangiuttup ingerlanerani
naatsorsuuteqartugut, aappassaanik aningaasanut inatsisissat ilassutissaata
suliarinerani aamma qanoq ukioq qaangiuttoq aningaasatigut ingerlanerput,
tassunga attuumassuteqartarmat, ilisimareerlugu pitsaasarmat. Taamatut
naatsumik oqaaseqarfigaakka.
Kristine Raahauge, Siumut:
Kukkunersiuinermik Ataatsimiititaliap isumaliutissiissutaa paartiinit
tamanit soqutigineqarluni oqaaseqarfigineqarnera nuannaarutigaarput, aammalu
suleriaaserisimasatta aaqqissuuniarneranut siunnersuutitta
allanngortinneqarnissaa, tassami allanngortissinnaagaluarparput imanna apereqqaarnata,
kisiannili pingaartissimavarput suleqatitta tamarmik isumaqataallutik
oqaaseqarnissaat.
Suleriaasitsinnullu aamma atatillugu Ataatsimiititaliami eqqartuinitsinni
Inuit Ataqatigiit eqqaasaat kukkunersiuisut kalerreeqqaarnatik ingerlatsivinnut,
tassa Namminersornerullutik Oqartussat ingerlataanut, takkuttarnissaat , aamma
taanna eqqartorsinavarput, tassa suliniarnitta pitsaanerusumik ingerlanissaa
ukioq manna annertuumik eqqartorsimavarput.
Taavalu Naalakkersuisup oqaaseqaateqarneranut, oqaaseqaataanut qujavugut
aammalu paasinarpoq partiinit paasilluarneqartoq akissuteqaatit, kisiannili
una paatsuunganarsinnaammanuna ersarissalaarniariga, tassa
inuussutissarsiutinut tapiisarnernut tunngatillugu Naalakkersuisup
oqaaseqaataanut, ukua illuartitsisarnermut tunngavoq. Tassani uparuaasut tassa
nalunngilarput siorna aamma siornaa 95-mi naatsorsuutini saqqummiinnermi
uparuaassutaasoq. Tassanili annertunerusumik uparuanngilarput, taamanikkut
Naalakkersuisup akissuteqaataa assortuussutaanngimmat, kisiannili soorunami
kukkunersiuisuugatta taamatut nangeqattaartumik ajornartorsiutit
kukkunersiuisut avataaneersut tikkuartorpassuk aamma aaqqiissutissanik
ujartuisariaqaratta.
Tassani oqaaseqarpugut ajornartorsiutit taaneqartut qaangerniarlugit
kingunilimmik sulisoqartariaqartoq, oqanngilagut inatsimmik imaluunniit
malittarisassanik allanngortitsisoqartariaqartoq uanili ersarisaannarparput
ajornartorsiutit ukiut arlariingormagit tikkuartorneqarluni kingunilimmik
aaqqinniarlugu sulisoqartariaqarnera.
Marianne Jensen, Peqqinnissamut,
Avatangiisinut Ilisimatusarnermullu Naalakkersuisoq, Siumut:
Partiit Kattusseqatigiillu oqaaseqartuinut qassiiliutaanngikkaluartoq
taamaattoq suliami uani Peqqinnissaqarfik taaneqartunut ilaakkajuttarmat
kukkunersiuisut aammalu Inatsisartut Kukkunersiuinermi Ataatsimiititaliaata
uanga naalakkersuisoqarfinni oqaaseqaatai oqaaseqarfigitsiarusuppakka.
Maluginiarpara oqaaseqaatini Peqqinnissaqarfimmi sulisut, tassani
eqqarsaatigalugit napparsimaveqarfinni ataasiakkaani aammalu qitiusumi
ingerlatsivimmi, tassani sulisut annikippallaammik ammalu
qangasinisarpalaarpallaartumik atortutigut periarfissaqartitaanerat
ajornartorsiutinut qitiulluinnartutut tikkuarneqarmat. Tamanna
ilumoorluinnartutut oqaatigisariaqarpara, tassami suli maannamut pissutsit
imaapput inaarutaasumik bogfĝr-igassat napparsimaveqarfinni ataasiakkaaniit aamma
avinngarusimasuninngaaniit Nuummut pisortaqarfimmut nassiussuuneqartariaqartarput,
tassanilu bogfĝr-erneqarlutik.
Taamatut suleriaaseqarneq naammattumik aningaasanik atuinermut ataavartumik
malinnaasinnaanermut tutsuiginaranilu annertuumik marloqiusamik
ingerlatsinermik kinguneqartarpoq, aamma soorlu taamatut oqaasertani
oqaatigineqartoq. Pisortaqarfik nammineq iliuuseqarfigisinnaasamigut
assigiinngitsutigut ajornartorsiutit sapinngisamik iluarsiiviginiarlugit
iliuuseqartarpoq, ilaatigut suliffeqarfinnut tamanut Peqqinnissaqarfiup
Ilisimatusarnermullu Pisortaqarfiup akisussaafigisaanut naatsorsuuserinermut
iltsersuutinik suliaqartoqareersimalerpoq. Kisianni taamaakkaluartoq pissutsit
malunnaatilimmik aatsaat iluarsiivigineqarsinnaapput aqutsinermut
atortorissaarisaarutitigut aaqqiisoqarpat. Tamannalumi aamma ujartorneqarpoq.
Tamannalumi aamma qarasaasianik tassuunalu atortussanik naleqquttunik
pilersuisoqarnikkut anguneqarsinnaavoq. Eqqaamanerlunngikkuma tamaana 5mill. Kr.-nit
missaani nalilimmik atortulersuinikkut naammassineqarsinnaasoq
oqaatigineqartarpoq. Aningaasalli ukiumut 3 mill.-nit sinnilaarlugit
atortulersuinissamut tamakkununnga atugassaagaluit aamma Peqqinnissaqarfimmiit
qitiusumik EDB-leriffimmut nuunneqarnukuupput, qilanaarnaqaarlu aningaasat
taakku ilai Peqqinnissaqarfimmut aqutsinermut iluaqutaasumik
atorneqarumaarnissai. Soorlumi oqaatigineqareersoq Peqqinnissaqarfimmut
aningaasat ukiumut 600 mill.-nit sinnerlugit aqunneqarput aammalu tassani
eqqarsaatigalugu sulisut qanoq nikerartigisut tamatsinnut pingaariteqarluinnarpoq
aningaasat taama amerlatigisut aqunneqarnerannut pitsaasumik tutsuiginartumillu
periarfissaqarnissaq. Atortulunnerup kinguneri inuiaqatigiinnut
toqqissisimanganngillat akisusinnaallutillu aammalu sulisorpassuarnut
pisariaqanngitsumik suliakkersuutaallutik. Taamaattumik Ataatsimiititaliap
eqqortumik uparuaanera inassuteqaataalu qujassutigaakka aammalu uanga suliap
ungerlanera malinnaaffigiumaarpara aamma taanna kissaatigineqarmat aammalu
sunniuteqarfiginiassallugu sapinngisannik piaarnerpaamik
inassuteqaatigineqartut naammassineqarsinnaannissaat.
Anders Andreassen, Inatsisartut
Siulittasuat:
Taamaalilluni
ullumikkut oqaluuserisassaq imm. 54 tassa Landskasse-p naatsorsuutaasa kukkunersiorneqarnissaanut
Ataatsimiititaliap isumaliutissiissutaa akuerineqarpoq.
Oqaluuserisaq
naammassivoq.