Oqaluuserisassani immokkoortoq 37a-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 14. oktober 1997, nal.
15.00
Ataatsimiinnermik
Aqutsisoq: Inatsisartut Siulittaasuat, Anders Andreassen.
Paaviaaraq
Heilmann, Inuussutissarnermut, Aalisarnermut, Piniarnermut Nunalerinermullu
Naalakkersuisoq:
Qujanaq. Naalakkersuisut sinnerlugit
Inatsisartut aalisarneq pillugu inatsisaata allanngortinneqarnissaanik
matumuuna saqqummiutissavara.
Inatsisissatut siunnersuummi taamaallaat
pineqarput, aalisarnermut inatsimmi piniarnermut nakkutilliisut
pisinnaatitaaffiisa aalajangersarneqarnissaat. Eqqaasitsissutigissavara
aningaasartai tassani eqqartorneqanngimmata.
Inatsisissatut siunnersuut piniarneq
aallaaniarnerlu pillugit Inatsisartut inatsisaatut siunnersuummut
attuumassuteqarluinnarpoq, tassanimi piniarnermik nakkutilliisut
pisinnaatitaaffissaat aalajangersarneqarsimassammatattaaq.
Inatsisissatut siunnersuuteqarnermi
siunertarineqarpoq aalisarnermut inatsimmi aalajangersakkat
atuuttitinneqarnerisa piniarnermik nakkutilliisunit nakkutigineqarsinnaanerisa
qulakkeerneqarnissaat. Uani eqqarsaatigineqarnerupput eqalunniarneq
kapisilinniarnerlu.
Naalakkersuisut siunertaraat piniarnermik
nakkutilliisut aallaqqaataanni taamaallaat eqalunniarnermi
kapisilinniarnermillu nakkutilliisinnaanissaat. Naalakkersuisut isumaqarput
piniarnermik nakkutilliisut piniarnermut aallaaniarnermullu tunngasunik
saniatigut pingaartumik eqalunniarnermik nakkutilliisinnaassasut.
Eqalunniarnermi kangerlunni ingerlanneqartarpoq aammalumi kuunni, taakkualu
tasinngortaani aalisartoqartarluni.
Inatsisartut 1996-mi upernaakkut
ataatsimiinneranni aalisarneq pillugu inatsisissatut siunnersuut
suliarineqarmat piniarnermik nakkutilliisut pisinnaatitaaffissaanik
aalajangersakkat ilanngullugit suliarineqarput. Aalajangersakkalli
siunnersuummit peerneqarput, naalagaaffeqatigiinnermi oqartussaasut
tusarniaassut akisimanngimmassuk inatsisissatut siunnersuut manna suliarineqarpoq
Statsministeriap, Inatsiseqarnermut Ministeriaqarfiup kiisalu illersornissamut
Ministereqarfiup tusarniaanermut akissutigisimasaat naapertorlugit.
Naalagaaffeqatigiinnermi oqartussat
tusarniaanermut akissuteqarnerminni toqqaanartumik aalajangersaasoqarnissaa
siunnersuutigaat, taakkulu inatsisissatut siunnersuummi toqqaanartumik
atorneqarput.
Inatsisissatut siunnersuut
akuerineqassappat piniarnermik nakkutilliisut makkuninnga nakkutilliisinnaalissapput:
Siullermik, piniarnermik nakkutilliisut aalisariutinut aalisakkanillu
assartuutinut ikisinnaalissapput, aalisarnermullu atortunik pisanillu
misissuisinnaalerlutik. Aappassaanik, piniarnermik nakkutilliisut inuit
aalisarsinnaanerminnik uppernarsaateqarnersut takujumasinnaalissavaat.
Maluginiarneqassaarli
naalagaaffeqatigiinnermi oqartussat tusarniaassummik akissuteqarnerminni
erseqqissarsimammassuk, nakkutilliineq - piniarnermik nakkutilliisunit
ingerlanneqartussaq - allaffissornikkut misissuinertut nakkutilliinertullu
pissuseqartussaassammat aamma piniarnermik nakkutilliisut imaaliinnarlugu
pissaanermik atuinermik peqqisisinnaanngimmata il.il. Aalisarneq pillugu
Inatsisartut inatsisartut inatsisaata allanngortinneqarnissaannut siunnersuut
aalisarneq pillugu siunnersuisoqatigiinnut, APK-mut - tassa Avataasiuutinik
Piginneqatigiiffiit Kattuffiat kiisalu Royal Greenland A/S-imut
tusarniaassutigineqarsimavoq - pineqartullu
inatsisissatut siunnersuummut oqaaseqaateqarsimanngillat.
KNAPK akissuteqarpoq kattuffimmiit
naatsorsuutigineqartoq, piniarnermik nakkutilliisut pillugit aalajangersakkat
pisinnaatitaaffiilu inatsisit atuuttut tunngavigalugit suliarineqarumaartut.
Tamatuma saniatigut KNAPK allanik oqaaseqaateqanngilaq.
Inatsisissatut siunnersuut manna
Inatsisartunit akuerineqassappat, Naalakkersuisut naalagaaffeqatigiinnermik
oqartussanik oqaloqatigeeqqaareernermikkut piniarnermik nakkutilliisut suliassaat
pillugit nalunaarummik suliaqassapput. Nalunaarummi piniarnermik nakkutilliisut
suliassaat, sulinerminni atugaritisassaat il.il. ilanngunneqassapput.
Taamatut oqaaseqaateqarlunga Naalakkersuisut
sinnerlugit aalisarneq pillugu inatsisip allanngortinneqarnissaanik
siunnersuut Inatsisartunut oqaluuserisassanngortippara, siunnersuutigissallugulu
siunnersuut inatsisartut aalisarnermut, piniarnermut nunalerinermullu
ataatsimiitsitaliaanit Inatsisartunit aappassaaneerlugu oqaluuserinnginnerani
suliarineqassasoq.
Lars Karl Jensen, Siumup oqaaseqartua:
Ukiup ataatsip matuma siornatigut
aalisarneq pillugu Inatsisartut inatsisaata allanngortinneqarnissaa
oqaluuserigatsigu ataatsimiittitaliami Siumumiit suleqataaffigisatsinni
pingaartillugu oqaatsigaarput, piniarnermik nakkutilliisut taamatut
suliaqarnerminni allagartaq uppernarsaasiullugu angallatinut piniarnermut
atorneqartunut ikisinnaasariaqartut, piniartup kinaassutsimut piniarsinnaanermullu
uppernarsaataannik kiisalu piniarnermi atortunik misissuisinnaanissaq
nakkutilliisut suliassaasa ilagimmassuk.
Maannakkut Naalakkersuisut
saqqummiussaatigut inatsisissap allannguutaatigut tamanna
aaqqiiviginiarneqarmat Siumumiit nuannaarutigaarput.
Ministeriaqarfiit pingasuusut
akissuteqaataasigut Siumumiit maluginiarparput, piniarnermik nakkutilliisut
maannakkut allaffissornikkut suleriaasissaat malillugu, piniarnermik
unioqqutitsisoqartillugu pisanik arsaarinninneq akiliisitsinerlu
nakkutilliisut imaaliinnarlugu pisussaaffiginngikkaat suliarisinnaanagulu.
Siumup pingaartippaa piniarnermik
nakkutilliisut suliaasa ilagisariaqaraat inatsisinik maleruagassanillu
atuuttunik susassaqartunut paasititsiniaanissaq, atuisut ilisimasariaqarmassuk
piniarnermik nakkutilliisut suliaat
suunersut aammalu sunik piginnaatitaaffeqarnersut.
Minnerunngitsumik ilanngullugu ukiuni
makkunani piniagassat tungaasigut pisarineqartussanik annertussusiliinermi
nunani allani suleqatitta ilisimasaqarfigissagaat, taamatut nakkutilliisoqarneq ersiutaammat uagut nammineq nunatsinni
piniakkanik pinngortitamillu atuisuunitsinni immitsinnut nakkutiginerput suli
annertusaripput.
Taamaattumik Siumup tungaanniit piumasarissavarput,
inatsisip maleruagassaanik suliaqarnermi ersarissumik paatsuugassaanngitsumillu
ilanngunneqassasoq, piniarnermik unioqqutitsisoqartillugu tamanna akiliisitsinermik aammalu
piniarsinnaanermut allagartanik annaasaqarnermik kinguneqartussamik
maleruagassaqartinneqartoq.
Tamatuma kingunerissammagu piniarfiit
piniagassallu innimigisariallit unioqqutitsiffiginerisa annikinnerpaaffissaat.
Tamakkua tunngavigalugit Siumup
Naalakkersuisunut piumasarissavaa piniarnermik nakkutilliisoqarnerup nunamut
tamarmut atuuttussanngorlugu annertusarneqarnissaa sulissutigineqassasoq.
Kisiannili eqqaamaneqassasoq piniarnermik nakkutilliisut suliffigisassaat
kommunit ilaqarmata isorartuunik killeqarfeqartunik, aammalu nunatta suani inissisimaneq
najoqqutaralugu assigiinngitsunik suliassaqarfiusussanik.
Siumup angorsusuppaa Namminersornerullutik
Oqartussat akiligaannik piniarnermut nakkutilliisunik kommunini
atorfinittitsisoqarnissaa siulianili oqaatsigisakka tunngavigalugit Siumup pingaartippaa
ilissimaneqassasoq kommunit piniarnermik nakkutilliisunik pisariaqartitsinerat
tamakkerlugu Namminersornerullutik Oqartussat kisimiillutik
akissaqartinngikkaat. Tassami piniarnermik nakkutilliisut Inatsisartut
inatsisiliaat kisiisa suliarissanngilaat aammattaarlu kommunit namminneq
maleruagassaliaat nakkutigineqartussaapput. Tamannalu tunngavigalugu Siumup
piumasarissavaa piniarnermik nakkutilliisunik atorfinittitsinissaq aammalu
atorfeqartunik amerlassusiliinissaq sioqqullugu kommunit paaseqatigalugit
tamanna Naalakkersuisunit ingerlanneqassasoq.
Siumumiit taamatut oqaaseqarluta,
Inatsisartut aalisarneq pillugu inatsisaata nr. 18-ip 31. oktober 1996-mi
atuutilersup allannguutissai ' 27-mi imm. 3, 4, 5-ilu taamatullu ' 28-mi imm. 2-mi pineqartut, inatsimmi nutaamik
ilanngunneqarnissaat Siumumiit akuerseqataaffigaarput.
Aappassaaneerlugulu
oqaluuserineqannginnerani aalisarnermut, piniarnermut nunalerinermullu
ataatsimiittitaliami suliarineqarnissaa inassutigalugu.
Siverth K. Heilmann, Atassutip oqaaseqartua:
Qujanaq. Inatsisartut aalisarneq pillugu
inatsisissaata allanngortinneqarneranik siunnersuummut imaattumik Atassummit naatsumik
oqaaseqassaagut.
Atassummiit pingaartilluinnarparput
aalisarnermik inuussutissarsiuteqarnerup nutaangorsagaannissaanut
pissutsinullu naleqqussaaffigineqartuarnissaanut pitsaanerpaamik
periarfissaqartitsiuarnissaq, taamaalilluni pisuussutitta
nungusaataanngitsumik atorluarneqarnissaa anguneqassammat. Atassummiit
iluarisimaarparput aalisarneq pillugu inatsit tamakkiisumik aaqqinniarneqarmat
aammalu inatsisinik atortitsinermut ministeriaqarfimmiit, illersornissamut
ministeriaqarfimmiit kiisalu statsministeriaqarfimmit tusarniaaneqareersoq
akissutigineqartut piniarnermik nakkutilliisut piginnaatitaaffiisa naleqqussarneqarneri
Atassummiit naamagisimaaratsigit.
Atassummiit siorna suliap matuma
pineqartup oqaaseqarfiginerani oqaaserisagut innersuussutigalugit
Naalakkersuisut sinnerlugit Inuussutissarsiornermut, Aalisarnermut,
Piniarnermut Nunalerinermullu Naalakkersuisup aalisarneq pillugu Inatsisartut
inatsisaanni nr. 8, 31. oktober 1996-meersup inatsisissamut allannguutip
ilassutitaqartullu saqqummiunneqartut tamakkiisumik Atassummiit
isumaqataaffigaavut.
Taamatut naatsumik oqaaseqarluta inatsisissatut
siunnersuut aappassaaneerlugu oqaluuserineqannginnerani aalisarnermut,
piniarnermut nunalerinermullu ataatsimiittitaliami oqaluuserineqarnissaa
Atassummiit akuersaarparput.
Johan Lund Olsen, Inuit Ataqatigiit oqaaseqartuat:
Qujanaq, uangattaaq aamma oqaasissakka
naatsunnguussapput.
Oqaluuserisatsinni matumani pineqarpoq
aalisarnermut inatsimmik piniarnermik nakkutilliisut pisinnaatitaaffiisa aamma
immikkut aalangersaavigineqarnissaat.
Inuit Ataqatigiit tamatumani isumaqataavugut
aatsaaginnarlu immikkoortoq 37-mi tamakkiinerusumik nakkutilliisoqartitsinemut
tunngatillugu oqaasereriikkavut innersuussutigiinnassavagut.
Taamatullu oqaaseqarluta aammalu
naatsorsuutigalugu danskit naalagaaffiannut nunatsinnut tapiissutaasartut
pillugit isumaqatigiinniutigineqarnissaanut tunngatillugu immikkoortoq 37-mi
Naalakkersuisutsinnut noqqaassuteqareersimanerput maluginiarneqassasoq, suliap
aalisarnermut, piniarnermut nunalerinermullu ataatsimiittitaliamut
ingerlateqqinneqarallarnissaa aamma akuersaassavarput.
Bjarne Kreutzmann, Akulliit Partiiat:
Piniarnermik nakkutilliisut pillugit
apeqqut ukiuni arlaqaqisuni eqqaaneqartarsimavoq. Piniarnermik nakkutilliisut
pisinnaatitaaffii ukiut amerlaqisut ingerlaneranni eqqartorneqarsimapput, tassa
nakkutilliineq misissuisuunerlu allaffissornerup tungaanaatsigut
ingerlanneqarsimammat. Pissutigalugu
naalagaaffeqatigiinnermi oqartussaasut politiit pisinnaatitaaffii
imaaliinnarlugit tunniukkumasimanngimmatigit.
Akulliit Partiiata inatsisissamut
siunnersuut tapersersorpaa, taamaalilluni Naalakkersuisut danskit
naalagaaffianni oqartussaasut oqaloqatigereerlugit piniarnermik nakkutilliisut
pillugit nalunaarusiorsinnaaniassammata, ukua qulakkeerneqarnissaat
anguniarlugu: Tassa siullermik aalisarnermut inatsisip iluani aalajangersakkat
nakkutigineqarnerat piniarnermik nakkutilliisunit isumagineqarsinnaaleqqullugu.
Aappassaanillu piniarnermik nakkutilliisut aallaqqaammut taamaallaat
eqalunniarnermik kapisilinniarnermillu nakkutilliisuutinneqaqqullugit.
Taama naatsumik oqaaseqarlunga
inassutigissavara siunnersuut inatsisartuni aappassaaneerneqannginnermini
ataatsimiittitaliamut suliassanngortinneqassasoq.
Anthon Frederiksen, Kattusseqatigiit:
Siuliani oqaluuserisatta immikkoortup
37-ip oqaluuserineqarnerani Kattusseqatigiinniit oqaaseqaatikka
innersuussutigalugit inatsisip matuma allanngortinneqarneratigut, aalisarnermik
piniarnermillu nakkutilliisut sulinerminnut atatillugu
pisinnaatitaaffeqalernissaat tamakkiisumik tapersersorpara.
Kisiannili paasinarpoq pisinnaatitaaffiit
tunniunneqartut annikitsuinnaasut, tassami naalakkersuisup saqqummiussinermini
oqaatigisaasa ilai imaattut issuaaffigilaassavakka: ANakkutilliineq piniarnermik nakkutilliisunit
ingerlanneqartussaq allaffissornikkut misissuinertut nakkutilliinnertullu
pissuseqartussaammat aammalu piniarnermik nakkutilliisut imaaliallaannarlugu
pissaanermik atuinermikkut peqqussisinnaanngimmata il.il.@
Taakkua assut eqqarsarnartoqartippakka,
tassami ilaatigut oqaatigineqarmat nakkutilliineq allaffissornikkut
misissuinertut pissuseqartumik ingerlanneqartussaasoq, taamaattumik inatsisissatut
siunnersuummi piniarnermik nakkutilliisut pisinnaatitaaffigiligassaasa
erseqqinnerusunik inatsisartunut nassuiaassutigineqarnissaat suliap
aappassaaniinnginnerani Kattusseqatigiinniit piumasarissuara.
Tassami inatsisissatut siunnersuut
naapertorlugu piniarnermik nakkutilliisut angallatinut ikisinnaatitaassapput,
tassungalu atatillugu pisarineqarsimasunik atortunillu misissuisinnaatitaassallutik.
Kisianni apeqqutigisariaqarpoq suut-uku angallatit taamatut
misissuiffigineqarsinnaassasut? Angallatit tamarmiussappat? Imaluunniit
angallatit nalunaarutigineqarsimasut kisimiik?
Imaluunniit angallatit aalisarnermik piniarnermillu inatsisinik
peqqussutinik nalunaarutinilluunniit unioqqutitsisimasutut pasineqartut
kisimik?
Aamma oqaatigineqanngilaq piniarnermik
nakkutilliisut angallatinik ingerlaartunik unittitsisinnaatitaanersut
imaluunniit qanoq? Tassami pisinnaatitaaffiit allaffissornikkut misissuinertut
pissuseqartussaappata - angallatinik ingerlaartunik piniarnermik nakkutilliisut
unittitsisinnaanerat qularnartoqassammat.
Taamaattumik inuit pisinnaatitaaffii aamma
eqqarsaatigalugit aalisarnermik piniarnermillu nakkutilliisut inatsisikkut
ersarinnerusumik nalunaarsorneqarnissaat pisariaqarpoq. Naammanngilarmi
nakkutilliisut politiillu pisinnaatitaaffii eqqartuussiviit akuersiseqqaarnagit
ingerlanneqarsinnaasut '-kkut ingerlatiinnassallugit.
Tassani misissuineq assigiinngitsorpassuarnik
paasineqarsinnaavoq - pisanik atortunillu misissuineq, eqqartuussisarnerni
inatsisit kap. 5 '' 10, 11, 12 naapertorlugit
ingerlanneqarsinnaassanerluni? Uanga ilimaginngilara taamaattoqarnissaa,
misissuinerimmi taamaattut annertuumik piumasaqaatitaqartarmata.
Tassami Naalakkersuisut
maleruagassaliornissaat naammanngilaq.
Taamaattumik Kattusseqatigiinniit
Naalakkersuisunut kaammattuutigissavara aalisarnermik piniarnermillu
nakkutilliisut pisinnaatitaaffiinut atatillugu, nunatsinni eqqartuussisarnermik
inatsisip allanngortinneqarnissaa Folketing-imut saaffiginnissutigeqqullugu.
Aatsaammi tassuunaarlugu nakkutilliisut pisinnaatitaaffii annerusumik
anguneqarsinnaassammata.
Aammalu Kattusseqatigiinniit
piumasarissuara nakkutilliisut inatsisip matuma allanngortinneratigut
pisinnaatitaaffigiligassaat qanoq annertutigissanersut ersarinnerusumik, suliap
aappassaaneerneqannginnerani nassuiaateqarfigeqqullugit.
Naggataatigullu inassutigissavara ' 27, imm. 3-mi aammalu ' 28 imm. 2-mi oqaaseqatigiit imaattut: APiniarnermik nakkutilliisut@ imatut allanngortinneqassasut: APiniarnermik aalisarnermillu nakkutilliisut@-nut. Tassami '
28, imm. 2 naapertorlugu taamaallaat politiit aalisarnermillu nakkutilliisut,
tassalu fiskeriinspektioni kisimik pineqarmata.
Taamatut oqaaseqarlunga siunnersuutip
aappassaaneerneqannginnermini inatsiseqarnermut ataatsimiittitaliami
suliarineqarnissaa inassutigaara.
Paaviaariaq Heilmann, Siumut:
Paasisinnaasakka malillugit partiit
tamarmik Kattusseqatigiit kisimik pinnatik tamakkiisumik
siunnersuutigineqartoq Naalakkersuisuniit tassalu piniarnermut nakkutilliisut
piginnaatitaaffianut tunngasut Aalisarnermi inatsimmi allannguutissanut
siunnersuut taperseraat paasivara.
Aammalu Siumup oqaaseqartuanut oqaatigissallugu,
nalunaarusiornermi oqaatigineqartut aallaavigalugit nalunaarutip
ilusilersorneqarnissaa soorunami suliarineqarumaarmat, tassani soorunami aamma
atuupput partiit allat oqaatigisaat.
Soorunami aamma kommunit paaseqatigalugit
aaqqissuussineq ingerlasussaavoq, tassami suliaqarfigisassaat kommunini
ataasiakkaani immikkoortitaarlutik suliffeqartussaapput, taamaattumik
pinngitsoorneqarsinnaanngilaq kommunit paaseqatigalugit suleqatigalugillu aamma
suliap ingerlanneqarnissaa.
Aamma nuannaarutigalugu paasivara
saqqummiunneqartoq Atassumminngaanniit tamakkiisumik isumaqatigineqarmat,
taamatullu aamma Inuit Ataqatigiinniit isumaqatigineqarluni, ataatsimiisitaliamilu
aamma nalilersorneqassasoq inassutigineqarluni.
Aningaasalersorneqarnissaanut tunngasut,
taakku piffissaq alla eqqartorumaarpagut, tassa inatsisip eqqartornerani
innersuussutigissavara tassani suliarineqassasut aningaasanut tunngasortai,
uani piginnaatitaaffiit eqqartussavagut. Akulliit partiiata aamma paasivara taamatut
saqqummiussaq isumaqatigigaa.
Kattusseqatigiit aallaqqaammut oqarput
tamakkiisumik tapersersorlugu piginnaatitaaffiit taakkua tunniunniarneqartut.
Kisiannilu assigiinngitsutigut apersuusersuilluni ilaatigut aperaluni unitsitsisinnaanersut
ingerlaartumik. Tassa unitsitsiniarsinnaapput uani inatsimmi siunnersuummi
taamatut siunertaavoq, kisianni unitsinniarneqartoq aamma periarfissaqarpoq
soorunami ingerlaannarnissaminut, kisianni uninngasunik misissuinissaat
periarfissaqarpoq, taakkartukkat inatsisit saqqummiunneqartut iluanni.
Aamma eqqaasitsissutigissavara
Kattusseqatigiinnut una inatsisip allannguutissaannut siunnersuutitaa
Ministeriaqarfinnut pingasunut tusarniaatigineqareersimammat, aammalu taakkua oqaaseqaatigineqartut
aallaavigalugit ilusilersorneqarsimalluni. Tassa Danmarkimi statsministeriami
inatsiseqarnermut ministeriamut aammalu Illersornissamut ministeriaqarfimmut,
taakkununnga pingasunut tusarniaaneq ingerlasimavoq, taakkulu akissuteqarsimanerat
tunngavigalugit ilusilersorneqarsimalluni.
Taaguutaanut tunngasoq aamma
Kattusseqatigiit taasaat, inassutigissavara aamma taassumap
nalilersorneqarnissaa ataatsimiisitaliami ingerlanneqassasoq, tassa
piniarnermut aalisarnermullu nakkutilliisoq tassami kapisilinnik aammalu
eqalunniarnermi tunngasunik aamma misissuisinnaanissaanik periarfissaqartitsimmat
una inatsit.
Anthon Frederiksen, Kattusseqatigiit:
Pingaartumik tusarnaartunut
isumaqalersitsisoqassanngilaq taamatut piniarnermik aallaaniarnermilu
nakkutilliisoqalerniarneq isumaqatiginngikkiga. Taamaanngilaq, kisianni
nammineerluni politiitut sulisimagaanni ukiut 24-t taava inatsisinik
atortitsiniarneq aamma naatsorsuutigineqarsinnaavoq qanoq
ilungersunartartigisoq taamatut suliaqartuulluni.
Unalu siunnersuut qiviaraanni nammineq
atorniassallugu pisinnaatitaaffiit annikitsuaraararsuupput. Taamaattumik
tamakku pillugit assigiinngitsunik saqqummiussininni taagugaqarsimavunga,
neriuppungalu aamma taanna paasineqarsinnaassasoq. Politiitut suliaqarluni
imaluunniit tassunga assingusumik suliaqarluni pisariaqartorujussuuvoq
pingaarlunilu ersarissunik inatsisinik malitsinniagassanik
najoqqutassaqarnissaq.
Taamaattumik tupinnanngitsumik uumap
suliassap aappassaaneerneqarnissaani nakkutilliisussat ersarissumik
malittarisassaqarnissaat aammalu inuiaqatigiit akornanni isornaateqanngitsumik
sulissagunik pisariaqarpoq paatsuugassaanngitsunik innuttaasunut
minnerunngitsumik nakkutilliisunut malittarisassaliornissaq.
Uani soorunami nalunngilarput avataani
sømilet pingasut avataanni nakkutilliineq danskit naalagaaffiata
ingerlatarigaa. Ajunngilaq tassalu aalisarnermik nakkutilliineq.
Matumani kapisilinniarneq aammalu
eqalunniarneq eqqarsaatigineqarput aammalu paragraffit ilaanni
pisinnaatitaaffiit tunniunneqartussat tassa eqqartuussiviit
akuersiseqqaanngikkaluarlugu tunniunneqartussat tunniunneqartussaapput
politiinut aammalu Fiskeriinspektion-imut. Tassa aalisarnermut piniarnermut
nakkutilliisut tassani ilaanngillat. Pisinnaatitaaffeqanngillat.
Taamaallat aalisarnermik imaluunniit
piniarnermik nakkutilliisutut taaneqartut oqarsinnaapput piniarnermut
allagartamik peqarpit? Aamma angallammut ikisinnaapput. Allamik naamik.
Misissuissagaanni angallammi sumilluunniit
pigisamik, eqqartuussisarnermi inatsimmi allaqqavoq, pinngitsuunngivilluni
eqqartuussivik akuersiseqqaartariaqarpoq.
Tamakkua kialluunniit inuit
pisinnaatitaaffiisa ataanni assersuutigeriarutsigu uanga angalaarlunga
unitsinneqaruma piniarnermi nakkutilliisup oqarfigippanga - unigit -
angallatit misissorniarparput, eqqartuussisarnermi inatsisit tunngavigalugit
nakkutilliisoq annerusumik pisinnaatitaaffeqanngilaq.
Imaammat Danmarkimi tassa danskit
naalaaffiata ataanni inatsisit tunngaviusut Grundlov-imik taaneqartartut
aammalu eqqartuussisarnermi inatsisit nunatsinnut atuuttut tunngavigalugit
kiisalu inuit pisinnaatitaaffiinut tunngasut inatsisit naapertorlugit inuup
kialluunniit qanoq iliuuseqarsinnaanera killilerneqarsinnanngilaq. Demokrati
taagorneqartuarpoq inuit tamarmik kikkut oqartussaaqataaffiat, aamma
oqaluttuarpugut inuit tamat oqartussaaqataanerat ataqqivarput tamatta.
Taamaattumik inatsisikkut imaattukkut
takuneqarsinnaavoq, danskit naalagaaffiata piniarnermik nakkutilliisunik akisussaaffinnik
pisussaaffinnik tunisiumannginnera qanoq annikitsigisoq. Tuniumanngilai
taamaallaat tuniniarpai allaffissornikkut assingusumik pisinnaatitaaffinnik.
Isumaqarpunga kialluunniit takusinnaagaa ersarittoq.
Danskit naalagaaffiat oqarumanngilaq - aap piniarnermut nakkutilliisut
pisinnaatitaaffinnik imanna angitigisunik tuniniartigit pinngitsoornagit
misissuisinnaanngorlugit eqqartuussisarnermik inatsisit tunngavigalugit.
Taamaattoqanngilaq, taamatut tuniniarneqanngillat. Tuniniarneqarput imanna
mikitigisumik pisinnaatitaaffimmik atorsinnaanngingajatttumilli, tassa kisimi.
Paaviaaraq Heilmann, Inuussutissarsiornermut, Aalisarnermut,
Piniarnermut Nunalerinermullu Naalakkersuisoq:
Piginnaatitaaffiisa annikitsuaraaneranik
tunngasunik oqaaseqarnera imatut oqaatigiseqarfigissavara Kattusseqatigiinniit
oqaaseqartoq tassa Anthon Frederiksen.
Soorlu oqaatigigipput siusinnerusukkut
piginnaatitaaffiit annikinnerusimapput suli, maannakkut angusinnaasimasagut
tassa taakkua Naalagaaffimmut oqaloqatiginninnitsinni. Aammalu taakkua
paasisinnaasakka malillugit partiit tamarmik akuersaarpaat.
Aamma aana eqqaasara Kattusseqatigiinnut
uteqqittariaqartoq, tassa nalunaarummi piniarnermi nakkutilliisut suliassaat
sulinerminnilu atugassarititaat il.il. ilanngunneqassapput, nalunaarusiortussaavugut.
Tassanilu aamma soorlu aamma immikoortumi 37-imi oqaatigigipput qallunaat
oqartussaasui peqatigalugit taakkua ilusilersorneqassapput.
Soorlu aamma oqaatigigipput saqqummiinitsinni,
pingaartumik aamma eqqarsaatigalugu immikkoortoq 37-imi piffissap
ingerlanerani aamma nalilersorneqartussaapput, misilittakkallu tunngavigalugit
aamma isumaqatiginniarnerit piffissap ingerlanerini qallunaat oqartussaasuini
pisariaqartarumaassaaq. Soorunami aamma saqqummiininnik siullermik immikkoortoq
37-imi oqaatigigiga 1996-imi ukiakkut saqqummiussatsinni saqqummiussagut
annertunerusumik piginnaatitaaffeqarnissaannik kissaateqarsimagaluartugut,
kisianni angusinnaasagut saqqummiuppagut aamma partiit taakkua ilaleraat
ersarissumik paasivara. Aammalu siunissami suli neriuutigaarput soorunami
piginnaatitaaffiisigut periarfissat pitsanngoriartortinneqarumaatut. Aamma
tamanna qularinngilara.
Oqaluuserisaq naammassivoq.