Oqaluuserisassani immokkoortoq 23-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik Aqutsisoq:
Inatsisartut Siulittaasuat, Anders Andreassen.
Anders Andreassen, Inatsisartut
Siulittaasuat:
Ataatsimiinneq ammarpoq. Inatsisartut
ataatsimiinnerup aallartinnginnerani nalunaarutigissavara Inatsisartunut
Ilaasortaq Maliinannguaq M. Mĝlgaard september-ip 29-ani 1997, qinnuteqarsimammat
sinniisussani Amalie Markussen, Inatsisartut ataatsimiinneranni oktober-ip
15-ianiit, tassa ullumimiit naammassinissaata tungaanut peqataaqqullugu
aggersarneqassasasoq. Siulittaasoqarfiup qinnuteqaat akuersissutigaa.
Qinersinerup ( ) pillugu
ataatsimiititaliap Siulittaasoqarfimmut inassutigaa Amalia Markussen
qinigaasinnaassuteqartutut isigineqassasoq. Taamaammat Inatsisartunut
inassutigissavara Maliinannguaq M. Mĝlgaard-ip sinniisussaa Amalia Markussen
ullumimiit katersuunnerup naammassinissaata tungaanut peqataassasoq. Tamanna
pillugu oqaasissaqartoqarnerluni? Naamik. Taava Amalia Markussen
qinnuigissavakkit Inatsisartuni issiavissannut ingeqqullutit, Inatsisartunilu
suliassannut tikilluaqqussavakkit.
Pingasunngornikkut apeqquteqaatit:
Inatsisartunut Ilaasortap Lars Karl
Jensen-ip apeqquteqaatigaa, qalerallit, suluppaakkat aalisakkallu allat
nunanut allanut aalisagartassatut tunineqartartut nunatsinni pisarineqarlutillu
suliarneqartuugunik - qanoq aningaasarsiornikkut sunniuteqarnersut.
Inatsisartunut Ilaasortap Ruth
Heimann-ip siunnersuutigaa angajoqqaat marlulisut sulinngiffeqarnerisa
nalinginnaasuminngarnit sivitsuiffigineqarnissaat.
Inatsisartunut Ilaasortap Peter
Ostermann-ip apeqquteqaatigaa pisortat sanaartortitaat suugaluartulluunniit
sananeranni nakkutigilluarnerunissaat sannarlugaannginnerunissaallu
anguniarlugu Naalakkersuisut qanoq iliuuseqarniarnersut.
Karl Lyberth, Siumut,
Ataatsimiititaliap Siulittaasua:
Nukissamik pilersuineq pillugu
Inatsisartut peqqussutissaattut siunnersuutip aappassaaneerneqarneranut
Inatsisartut Nukissiuuteqarnermut Nalunaarasuartaatitigillu Attaveqarnermut
Ataatsimiititaliaata isumaliutissiissutaa.
Siunnersuutip oqallisigineqarnerani
ataatsimiititaliap ilaasortarai: Siulittaasoq, Karl Lyberth, Siumut. Kristine
Rahauge, sinnerlugu Laannguaq Lynge, Siumut. Finn Karlsen, Atassut. Peter
Ostermann, Atassut. Manasse Berthelsen, Inuit Ataqatigiit.
Inatsisartut
Nukissiuuteqarnermut Nalunaarasuartaatitigullu Attaveqarnermut
Ataatsimiititaliaata oktober-ip qulingani ukioq manna ataatsimiinnermi
Nukissamik pilersuineq pillugu Inatsisartut peqqussutissaattut siunnersuut
oqaluuseraa.
Nukissiuuteqarnerup
malittarisassaqartinneqarnissaanut tunngavissanik pilersitsisoqarnissaata
pisariaqartitsisoqarneranik ataatsimiititaliap Naalakkersuisut isumaqatigai.
Taamaalilluni peqqussutissatut siunnersuutikkut nunatsinni nukissanik
pilersuinermut ataatsimut killissarititassiortoqarniarnera ataatsimiititaliap
isumaqatigaa.
Ataatsimiititaliap
pingaartippaa nukissatigut isumalluutinik atuineq avatangiisit mianeralugit
pissasoq. Taamaammat nukissamik pilersuinerup inuiaqatigiit
aningaasaqarniarnerannut iluaqutaanerpaasup avatangiisitigullu pitsaanerpaap
siuarsarneqarnissaanik, nukissamillu pilersuinermi uuliamik
isumalluuteqarpallaarnerup millisinneqarnissaanik peqqussutip siunertaqarnera
ataatsimmititaliap tapersersorpaa. Ataatsimiititaliap maluginiarpaattaaq
siunnersuutikkut nukissat ataavartut nukissamik pilersuinermut
ilanngunneqarnissaannut naalakkersuinikkut malittarissasiornissamut
periarfissiisoqarnissaanik Naalakkersuisut anguniagaqartut.
Nunatsinni
nukissaqarniarnikkut ingerlatsinermi pingaarnersiuulluni tulleriiaarinermi
erngup nukingata pingaarinneqarluartariaqartoq ataatsimiititaliaq isumaqarpoq.
Ataatsimiititaliap ilisimavaa erngup nukissiorfiusinnaasut pillugit
Naalakkersuisut misissuisitsisut. Tassunga atatillugu ataatsimiititaliap
isumaqatigiissup Naalakkersuisut kaammattorniarpai suliaq tamanna annertuumik
pingaarteqqullugu, nunatsinnilu erngup nukingata atorneqarnissaanik periusissat
siunertaqarluartut ilusilersorneqarneranni suliniutitik ingerlatiinnaqqullugit.
Kiisalu
ataatsimiititaliap isumaqatigiissup Naalakkersuisut kaammattorniarpai
eqqakkanik iku-allaaviit pilersiortorneqarnerat siuarsaqqullugu. Taamaalilluni
eqqakkanik ikuallaaviit kiammik pilersitsisarnerup saniatigut pitsaasunik
arlalinnik, soorlu eqqakkanik uuliakunillu suujunnaarsitsinermik,
nunaminertallu eqqakkanut eqiteriffittut atorneqartussaagaluartut allanut
atorneqarsinnaanngortarnerannik, nassataqartarnerat ataatsimiititaliap
pingaartippaa.
Oqaatigineqareersutut
nukissamik pilersuinerup inuiaqatigiit aningaasaqarniarnerannut iluaqutaanerpaap
avatangiisitigullu pitsaanerpaap siuarsarneqarnissaa, nukissamillu
pilersuinermi uuliamik isumalluuteqarpallaarnerup millisinneqarnissaa
ataatsimiititaliap isumaqatigaa. Tassanilu ataatsimiititaliap Naalakkersuisut
isumaqatigai kiaap sinnerussap atorluarneqarnerpaaffissaata
qularnaarneqarnissaa pingaaruteqartoq. Peqatigisaanillu ullumikkut akiusut
atorneqartillugit siunnersuummi ' 15-ip
atuisunut aningaasatigut kinguneqarsinnaanera ataatsimiititaliap eqqumaffigaa.
Taamaammat ataatsimiititaliap isumaqatigiissup Naalakkersuisut
kaammattorniarpai tamanna eqqarsaatigeqqullugu. Ataatsimut kiassaateqarfinnut
atassusertinnissap atuisunut kajungernartuunissaanik Naalakkersuisut
sulissuteqarnissaat ataatsimiititaliap pingaartippaa. Tamatumani
ataatsimiititaliap isumaqatigiissup Naalakkersuisut kaammattorniarpai minnerunngitsumik
suliffeqarfiit kiammik annertuumik atuisut eqqarsaatigeqqullugit.
Naggasiullugu
ataatsimiititaliap isumaqatigiissup Inatsisartunut inassutigaa siunnersuutip
paragraffiini naqinnerliukkat makku iluarsineqaqqullugit:
' 4, imm. 1-imi
kalaallisuuaani qallunaatuaanilu innersuussineq A' 11
naapertorlugu@
imaalineqassaaq A' 12
naapertorlugu@
Kalaallisuuani
' 34 ' 26-iussaaq.
Taamatut
naqqiutitalerlugu ataatsimiititaliap isumaqatigiissup peqqussutissatut
siunnersuutip Inatsisartuni pingajussaaneerneqarnissaa inassutigaa.
Mikael
Petersen, Isumaginninnermut, Suliffeqarnermut Pisortallu Suliassaqarfiutaannut
Naalakkersuisoq:
Nukissiuuteqarnermut
Nalunaarasuartaatitigullu Attaveqarnermut Ataatsimiititaliap Nukissamik
pilersuineq pillugu Inatsisartut peqqussutissaattut siunnersuummik
peqqissaartumik oqallisiginnissimanera Naalakkersuisut nuannaarutigaat.
Erngup
nukingata nukissiornermi atorneqarnissaanik ataatsimut anguniagaqarneq
Namminersornerullutik Oqartussat aamma Sjĉllandske Kraftvĉrker/Vattenfallip
akornanni isumaqatigiissutikkut nukittorsarneqareerpoq. Erngup
nukissiorfiusinnaasut ilisimaneqartut suliniuteqarfigineqarnissaannut periarfissat
naalakkersuinikkut piviusumik naliliivigineqarnissaannut atugassamik
misissuiffigineqarnissaannik isumaqatigiissut ilaatigut imaqarpoq.
Eqqakkanik
ikuallaaviliornermik suliniutinut ilagitilluinnarlugu pingaarnerusutigut
avatangiisit mianerineqarnissaannut nukittorsaatitut ataatsimiititaliap
kissaatigisai piffissami aggersumi Naalakkersuisut malinniarumaarpaat.
Avatangiisit mianerineqarnissaat eqqumaffigineqarnerulersimavoq, aamma
ikummatissat gassilu uumassusilininnersut pillugit ilisimasat nutaat eqqarsaatigalugit,
assersuutigalugu gassimik uumassusilinneersumik nukissiornermi
nerisassiornermit aalisakkerinermillu eqqakkanik atuinerulerneq
eqqarsaatigalugu.
Periusissatut
pilersaarutit siunertaqarluartut pingaartinneqarluarlutik nukissiuuteqarnikkut
ingerlatsineq pillugu nassuiaammi Naalakkersuisut Inatsisartunut
saqqummiussassaanni ilanngunneqassapput.
Angerlarsimaffinni
inuussutissarsiornermilu aningaasartuutit appartinneqarnissaat Naalakkersuisut
anguniagaraat. Peqatigisaanillu siunissami nukissamik pilersuinerup
annertusarneqarnissaata pilersaarusiorneqarnissaa pingaaruteqarpoq. Taamaammat
atuisut uungaannnaq isigaluni akikinnersiullutik atuinerminnik
allanngueriataarnissaat pinngitsoortariaqarpoq. Pitsaanerpaa-voq atuisut
nukissiortullu akilersinnaanerpaamik atugaqartussanngorlugit nukissamik
pilersuineq aaqqissuunneqarpat. Taamaammat ' 15-imut tunngatillugu Naalakkersuisut ataatsimiititaliaq
isumaqatigilluinnarpaat ullumikkut akiusut taamaaginnartinneqarnissaat
minnerpaamik anguniartariaqarmat, ajornanngippallu akit atuisunut
kajuminnanngitsut appatinneqartariaqartut.
Naalakkersuisut
taama ilassuteqarlutik Nukissamik pilersuineq pillugu Inatsisartut peqqussutissaattut
siunnersuutip Inatsisartuni pingajussaaneerneqarnissaanut
ingerlateqqinneqarnissaanik ataatsimiititaliaq isumaqatigalugu nalunaarutigaat.
Laannguaq
Lynge, Siumut oqaaseqartua:
Siumut
ataatsimiititaliap isumaliuutissiissutaanik ilassuteqaatissat assigiinngitsut
tunngaviatigut isumaqatigilluinnarpaa. Taammattaaq ataatsimiititaliap
Naalakkersuisunut kaammattuutigisaa, tassa nukissiuuteqarnermik
aqqiissutissaqartarnissa atuisunut aningaasatigut annertuumik
kinguneqarsinnaasunik mianersuuteqaqqusinerat, Siumut taperserusuppaa.
Nukissiutitigut
aaqqissuussisarnermi atuisut sapinngisamik atortorissaarutimikkut isumannaatsumik
akiliuteqarnermilu tamatumuuna naapertuuttumik nalilersueqatigisarnissaat
Siumumiit kissaatigaarput.
Taama
naatsumik oqaaseqarlunga, siullermeerinninnermilu oqaaserisagut innersuullugit
peqqussutissap taamak iluseqarluni pingajussaaneerneqarnissaa
inassutigissavarput.
Finn
Karlsen, Atassut-ip oqaaseqartua:
Siullermeerneqarnerani
oqaatsigut uteqqinnagit, ataatsimiititaliap isumaliutissiisutaanut naatsumik
oqaaseqassaagut.
Ataatsimiititaliap
nukissaqarniarnikkut ingerlatsinermi pingaarnersiulluni tulleriaarinermi erngup
nukinga pingaartinneqartariaqartoq oqaatigaa, tamanna Atassut-miit
isumaqatigaarput. Erngup nukinga tunisassiarineqarsinnaanera pingaarnerutillugu
salliutinneqarnissaa pisariaqavissutut isumaqarfigigatsigu.
Kiisalu
ataatsimiititaliap isumaliutissiissummini eqqakkanik ikuallaaviit
pilersertorneqarnissaat siuarsaqqullugu inassasuteqarnera isumaqatigaarput.
Tassami eqqagarpassuit eqqaavinniit maanngaannak teqqartarput, annertuumillu
mingutsitisuullutik. Taamaattumik ikuallaaviit pilersitsiatuarneratuut
maangaannaq mingutsitineq annertuumik unikaallatsinneqassaaq.
Aammattaaq
ataatsimiititaliap oqaatigaa ullumikkut nunatsinni kiaap atorneqarpoq
sinneruttup annertoqisup maangaannartinneqartartup atorluarneqalernerulernissaa
anguniarlugu ullumikkut akinit atorneqartunik unammillersinnaanerusumik
akeqartitsilersinnaaneq Naalakkersuisunit isumaliutigineqartariaqartoq.
Nalunngilarpummi ullumikkut akit atorneqartut nalikinnermit kiassaateqarnermiit
akisunerungaatsiartut, qisut.
Naggataasigut
Atassut-miit eqqaasariaqarparput qanittukkut Sisimiuni nukissiorfiup
ajutoorujussuarneratigut qanoq annertutigisumik illoqarfiup eqqorneqarnera,
eqqarsaatigalugu ukiukkut sumiluunniit taamatut pisoqariataassagaluarpat
Naalakkersuisut sillimanissaq eqqarsaatigilugu qanoq pilersaaruteqarnersut,
tusarusunnarmat. Ilisimasammi tunngavigalugit sinnerissami nukissiorfippaaluit
pisoqalisimaqaat, annerusumillu aningaasat tungaasigut periarfissaqaratit
taarsersuinissaminnut.
Taamatut
oqaaseqarluta ataatsimiititaliap isumaliutissiissutaa tamakkiisumik
isumaqatigaarput.
Manasse Berthelsen,
Inuit Ataqatigiit oqaaseqartuat:
Nukissanik
pilersuineq pillugu peqqussutissatut siunnersuummut Inatsisartut
nukissiuuteqarnermut nalunaarasuartaatitigullu attaveqarnermut
ataatsimiititaliap isumaliussiissutaa imatut Inuit Ataqatigiinniit oqaaseqarfiginiarparput.
Siullermik
ajuusaarutigalugu oqaatigissavarput ataatsimiititaliamiit uani peqqussummi
siunnersuummi attorneqartussat tusarniaaffigineqarsimanngimmata. Inuit
Ataqatigiinniimmi pingaartikkatsigu inatsisiliornermi attorneqartut tusarniaaffigineqartarnissaat.
Ataatsimiititaliamiit
tikkuartorneqartut marlussuit isumaqatigaagut, tassa ukuusut: eqqakkanik
ikuallaavinnik pilersitsinissaq, Naalakkersuisunik siuarsaqqullugu
kaammattuutigineqarmat. Nuup avataani eqqakkanut ikuallaavik siulleq,
Qaqortumik sananeqarluni aallartisarniarneqarlerpoq. Aningaasalersornissaalu
kommuunip affaa, Namminersornerullutillu Oqartussat affaa akilerneqartussaavoq.
Qaqortumi eqqakkanik ikuallaavik 20 mio. kr. pallillugit akeqassangatinneqarpoq,
kommunip 10 mio. kr. piginnginnamigit aningaaserivinnut aatsaat
attartoqqaarluni aningaasalersinnaasimavaa. Taamaammat Inuit
Ataqatigiinninngaanniit Naalakkersuisunut kaammattuutigissavarput kommuninut
suli pilerinarnersinneqartariaqartoq eqqakkanut ikuallaavinnik pilersiortitsinissamut.
Ilaatigut aningaasaleeriaaseq 50/50 nalilersoqqinnerasigut.
Qaqortormi
illoqarfik angisuujuvoq, ilungersorlunilu aningaasaleeqataanissamut
naammassinnissinnaasimalluni. Kommunillu mikinerit eqqarsaatigissagaanni
aningaasaleranut kommuuninut attukkissaannginnerusoq
isummerfigineqartariaqarpoq, soorlu Namminersornerullutik Oqartussat 80 %-imik
kommunillu 20 %-imik aningaasalersorneri.
Ataatsimiititaliap
kukkussutaata aappaat Inuit Ataqatigiinniit aammattaaq isumaqatigaarput.
Inissiat allalluunniit pinngitsaalisaallutik kiassaatinut ataatsimoorussanik
ikkutsinneqarnermimmi akit unammillersinnaasut atuutsinneqartariaqartut.
Ilumoorsinnaanngilarmi nammineq kiassaateqarnermiit pingasoriaammik allaat
akisunerussasoq ataatsimoorussamut kiassaammut attavilertinnerminngaannit.
Naalakkersuisulli
akissummi manngersimaanera Inuit Ataqatiginninngaaniit paasiuminaatsipparput,
innaalagissiorfiimmi innaallagissamik pilersitsiniarnerminni kiaq
pilersinneqartartoq, igiinnarneqartarmat, akisuallaarneralu pissutaalluni,
atorumaneqarneq ajorluni.
Inuit
Ataqatiginninngaaniit siullermik saqqummiinitsinni nukimmik pilersitsinermik
uulia atorneqartoq, KNI Pilersuisumiit tuniniarneqartartoq, nukissiorfinnut
akigititaasoq maannakkut uparuaqqittariaqarparput. Tamakkiisumimmi
akeqartitsinerup kinguneraa nukissiorfiup inuttaasunik sullissiniarluni
atugarisai maannakkut ilungersunartutut oqaatigineqarsinnaammata.
Eqqaaginnarsinnaavarpullu nukissiorfiit aserfallatsiiniarlutit ukiumut 140 mio.
kr. atorfissaqartikkaluarpaat, aningaasanullu inatsimmi taamaallaat 40 mio.
kr. immikkoortinneqarnilkuullutik.
Ataatsimiititaliaq
Naalakkersuisunut paasiniaasimavoq ilumut nukissiorfiit isumaqatigiiniartarsinnaanersut
uuliamut aki apparsarniarlugu. Naalakkersuisullu akissummi ullumi tigusatsinni
Naalakkersuisoq oqarpoq nukissiorfiit isumaqatigiinniartitaanngitsut. Tamanna
Naalakkersuisut aalajangersortarmmassuk. KNI Pilersuisuminngaanniit
toqqaannartumik nukissiorfiit pisisanngitsut uulianilli niueqquteqartartut
aqqutigeqqaarlugit pisisartut oqaatigaa. Inuit Ataqatigiinni paasiniaanitsinni
paasisimavarput uuliamik tuniniaasartut ullumikkut isumaqatigiissutigineqarsimasut
KNI Pilersuisumiit akikinninngorlugu pisisinnaanngorlugit. Illuatungaatigullu ' 6-imi
peqqussumik siunnersuummi allassimavoq Naalakkersuisut nukissiorfinnut
suliffeqarfinnullu nukissamik pilersuisunut allanut niuernermi atugassasarisat
tunngavigalugit ikummatissanik imerpalasunik gassinillu ikuallajasunik il.il.
pilersuilluni tamanut sullissinissamik pisussaaffiliisinnaapput.
Inuit
Ataqatigiinniit nukissiorfinnut uuliamut pilersuineq assut
nalilersugassaqqissutut sukumiisumillu misissugassaqqissutut isigaarput. Qanoq
uuliamik pilersuineq aqqissuussaanersoq paasiniarlugu. Taamaattumik Naalakkersuisoq
Inuit Ataqatiginninngaanniit kaammattussavarput nukissiorfiup uulianut
pisinermini allatulli niuernermi pissutsit nalinginnaasut atuutsilernissaat
suliniutigeqqussavarput.
Inuit
Ataqatigiinniit pingaartipparput imermik pilersuineq aamma isumannaatsumik
ingerlanneqarnissaa piorsaaffigineqarnissaalu. Neriuutigaarpullu
naalakkersuineq aamma imermik pilersuineq pillugu iliuuseqarummartoq, soorlu
nalunaarusiornikkut.
Peqqussutissatut
siunnersuut annertooq peqqissaartumik Inuit Ataqatigiinniit sulirineqarnissaa
pingaartikkatsigu, siunnersuutigissavarput nukissiornermi atorturissaarutigullu
attaveqarnermut ataatsimiititaliami suliareqqinneqarnissaa,
pingajussaaniinnginneqannginnermini.
Bjarne
Kreutzmann, Akullit Partiiat:
Nukissamik
pilersuineq pillugu Inatsisartut peqqussutaanni siunnersuummut tunngatillugu
oqaatigeqqilaassavara tassa isumaqarlunga susassaqarfimmut tassunga
Naalakkersuisoqarfik ineriartornermit siulliulaarluni ingerlatsisoq. Tamanna
oqaasinnaatsinnut naapertuulluinnarpoq, tassa oqartaratta ineriartornermik
siulliulaartuartariaqartugut.
Taamak
oqaaseqarlunga siullermiinermi oqaatsikka allat innersuullugit
inassutigissavara, siunnersuut taanna taamatut isikkoqarluni pingajussaanik
oqaluuserisassanngortinneqassasoq.
Anthon
Frederiksen, Katusseqatigiit:
Peqqussutissatut
siunnersuutip siullermeerneqarnerani Katusseqatigiinniit oqaatsikka innersuusutigalugit,
Inatsisartut nukissiuteqarnermut nalunaarasuartaatitigullu attaveqarnermut
ataatsimiititaliaata isumaliussiissutaa soqutigalugu misissorsimavara.
Nuannaarutigaaralu
nukissiuuteqarnermut oqarasuartaatitigullu attaveqarnermut ataatsimiititaliap
Naalakkersuisunut kaammattuutigimmagu eqqakkanik ikuallaavinnik
pilersitsiortornermi iluarsaasoqarnissaa. Tassami akuersaaruminaappoq
Inatsisartuni aalajangiiffigineqareersut aningaasatigullu
isumannaareerneqareersut sanaartugassanut tunngasut kinguaattoorutigineqartarnerat.
Assersuutigalugu
Qaqortumi eqqakkanut ikuallaaffissap sanaartugassatai ukiumik ataatsimik
kinguaattoorutingineqartut nalunaarutigineqarpoq. Taamatuinnaq
ingerlasoqassappat, pilersaarutit piviusunngortinniakkallu naatsorsuutigisamik
piviusunngortinneqarsinnaassaanngillat. Arlaatigummi ajortoqarsimassaaq.
Piffissanngorsimannginnerlunilu Naalakkersuisut sulisutit
malinnaaffiginerulerlugit ingerlanissaat? Imaluunniit sulisut ajorsimaqinerpat?
Pikkorinnerusunillu taarsertariaqalersimannginnerpat? Tassami ukiut
tamarluinnaasa sanaartugassanut tunngasut kinguaattoortuarput.
Pissutsit taamatut sutigut tamatigut
kinguarsaataapput. Taamaammallu Naalakkersuisut annerusumik
piumaffigineqartariaqarput, pissutsit taamaattut piaartumik
iluarsiniaqqullugit.
Isornartorsiorniaannarlunga taamatut
oqanngilanga, kisianni ilungersorluni naalakkersuinikkut anguniakkat
allaffissornikkut allatigulluunniit kinguarsarneqartarnerat
piffissaliunneqarsimasullu iluanni naammassineqarsinnaasannginnerat
akuersaaginnarneqartuaannarsinnaanngilaq.
Erngup nukinga atorlugu
nukissiuuteqarlersinnaanissamik misissuinerit 1970-ikkunnilu aallartipput,
taamanikkut ilaatigut Ilulissat avannaani Paakitsup eqqaani misissuinerit
annikigisassaanngitsut ingerlanneqarput. Paasisakkalu naapertorlugit Paakitsup
qinnguani sermip silataani qullortupiluunersuaq nukissiornermut atorluarneqarnissaasoq
paasineqarsimavoq. Aammalumi ilisimaneqarpoq sinerissami sumiiffinni allani
erngup nukinga atorlugu nukissiortoqarsinnaasoq. Taamaattumik aappaatigut
paasiuminaappoq ataatsimiititaliap isumaliutissiissummini oqaatigimmagu
ataatsimiititaliap ilisimagaa Naalakkersuisut nukissiofiusinnaasut pillugit
misissuititsisut.
1970-ikkunnili misissuineq
aallartipput, ullumikkullu 1997-imiippugut. Qanoq sivisutigisumik
misissuisoqassagami? Arlaatigut ajortoqarsimassaaq taamak sivisutigisumik
misissuisoqassappat. Tassami misissuineq aamma nappaatinut
ilanngutiinnarneqarsinnaanngilaq. Misissuinnaranimi
iliuuseqartoqartariaqarpoq, misissuinerimmi aamma akikitsiunnaasanngillat.
Ataatsimiititaliamut
kaammattuutigissavara avannaani qaleraleqarfinni aalisakkat uuliaanik
nukissiornerup iluaquserneqarsinnaanerata ingerlanera - qanoq ingerlanersoq
paasiniaqqullugu. Tassa aalisakkat uuliaannik ikummateqarneq ilaatigut
Ilulissat fabrikkiani atorneqalereerpoq. Taamaattumik soqutiginarpoq taamatut atuineq
maannamut qanoq misilittagaqarfiunersoq paasissallugu. Tassami aalisakkat
quperlukorpassiu, pingaartumik aasakkut sinerissami annertuumik
mingutitsisartut ilaatigut taamatut atorluarneqarsinnaanerisigut avatangiitsit
aamma taamaalilluni illersorneqassammata.
Taamatut oqaaseqarlunga
ataatsimiititaliap isumaliutissiissutaa Naalakkersuisullu saqqummiussaat
akuersaarlugit peqqussutissap pingajussaanerneqanissaa
akuerseqataaffigissavara.
Mikael Petersen, Isumaginninnermut,
Suliffeqarnermut Pisortallu Suliassaqarfiutaannut Naalakkersuisoq:
Siullermik nuannaarutigaara
ataatsimiititaliap aammalu partiit katusseqatigiillu peqqusussut siunnersuut
taamatut isikkoqartillugu pingajussaaneerneqarnissaminut ingerlaqqinnissaa
inassutigimmassuk.
Maluginiarpara allannguutissanut
ataatsimilluunniit saqqummertoqanngitsoq, uani aappassaarininnermi,
taamaattumik peqqussutissatut innersuutigineqartoq taamatut isikkoqarluni
pingajussaanerneqarnissaminut ingerlaqqinnissaa aamma
inassutigeqqiinnassallugu.
Kisiannili pingitsoorumanngilanga
peqqusutissatut siunnersuutigineqartup avataatigut oqaatigineqartut
oqaaseqarfigilaassallugit.
Siullermik Atassut-ip oqaaseqartuata
taakku oqaatsit atugai, tassa Sisimiuni ajunaarnerserneq tunngatillugu
paaserusunneqartut assigiinngitsut. Tassunga tunngatillugu oqaatigissavara
siullermeerinninnermi aamma taanna ilanngullugu sammisimagatsigu, aamma tassa
erseqqissaateqareersimagama, kingusinnerusukkut Inatsisartunut nassuiaammik
ingerlasitsiumaarlunga, Sisimiuni ajunaarnersuaq pillugu erseqqarinnerusumik
paasissutissat tamakkiiffigineqarleriarpata. Aamma tassunga ilanngullugu
oqaatigilaaginnassavara nammineerlunga uanga Sisimiunut angalasussaagama,
november-ip pingajuani, pissutsit taakani tikillugit nammineerlunga aamma
isinnik takullugit pisussaasut akisussaasullu aamma oqaloqatigalugit aammalu
kommunalbestyrelsi ataatsimeeqatigisussaagakku. Taanna ilanngullugu
oqaatigaara, taamaalilluni Sisimiuni pisimasoq ersarinnerusumik, immaqalu
paasiuminarnerusumik nassuiaassutigineqarsinnaassammat.
Kisianni ukiukkut taamatut
pisoqarsinnaanera pillugu, Atassut-ip oqaaseqartuata apeqqutigisaanut
tunngatillugu, neriuutigilluinnarpara nassuiaammut taamanikkut
saqqummiunneqarummaartussamut tamanut una akissuteqarfisinnaajumaarlugu.
Massakkut uani nikuiinnarlunga
akissuteqarfigisinnaanngilara, ukiukkut ajunaarnersuarmik pisoqassagaluarpat
illoqarfiit arlaanni, taava qanoq kinguneqarsinnaassanersoq. Kisianni
neriuppunga tamakkiinerusumik akissuteqaatissaq piareerniariarpat tamanna
ilanngullugu ersarissumik akissuteqarfigisinnaajumaarlugu.
Inuit Ataqatigiit oqaaseqartuata
oqaatigisai arlalissuit oqaaseqarfigisinnaagaluarpakka, kisianni
pingaarnersiorlugit oqaaseqarfigilaaginnassavakka. Siullermik Inuit Ataqatigiit
oqaaseqartuata oqaatigisaa Naalakkersuisup akit pillugit
aaqqissuusseqqinnissamut nangaassuteqarnera paasiuminaatsillu. Sooruna taanna
taamaanngitsoq akissuteqaatitsinni ersarippoq, akigititat pillugit
aaqqissuusseqqinnissamut qanoq Naalakkersuisut piumassuseqartigisut. Aamma
eqqaassissutigilaarlara una peqqussutissaq tassaammat aamma akigititatigut
eqaatsumik aaqqisuisarsinnaanissat anguniarlugit, taanna massakkut
piviusunngortinneqarlerpoq. Tassa akigisatigut aaqqissuusisinnaanernut
Naalakkersuisut piginnaatitaaffii eqqarturujussuusimapput, taamaattumillu una
peqqussutissaq saqqummiunneqartoq eqaannerusumik aaqqiissuussisinnaanerit
akigititatigullu anguniarneqarmata. Erseqqissalaaginnassavara
assersuutigineqartut aamma ilaatigut partiiniit allaninngaanniit eqqaaneqartut,
soorlu qitiusumik kiassarnermi kiassaateqarfinninngaanniit atuinermut
akigitinneqartut ilaatigut equngassuteqartut. Tamanna ilisimavarput
Naalakkersuisuni, taamaattumillu aamma tulluunnerusumik atuisunullu
naapertuulluarnerusumik aaqqissuussisoqarnissaa siunertat ilagissavaat.
Uuliamut tunngatillugu
nukissiuuteqarfiit aammalu nukissiorfiit KNI-mi uuliamik pisiortortuupput,
taanna Inuit Ataqatigiit namminerpiaq aamma oqaluttuaraa akissuteqaatiga
aallaavigalugu. Taamaattumik akigitinneqartut tassani pillugit nukissiorfiit
toqqaannartumik akuliussinnaanngillat. Kisianni innersuussutigineqartoq
aammalu inassutigineqartoq Inuit Ataqatigiinninngaanniit nukissiorfiit immaqa
akikinnerusumik uuliamik pisiorsinnaappat, periarfissaasinnaasumik
misissueqqusilluni. Soorunami tamanna ilanngullugu misissorneqarsinnaavoq.
Kiisalu Katusseqatigiinniit sulisunut
tunngatillugu, tassani pineqannguatsiarput ikuallaasarfinni tunngatillugu
sulineq. Erseqqissaatigilaaginnassavara taanna nukissiorfiit pisussaaffiata
avataaniimmat, aammalu ikuallaasarfinnik pilersitsiotorneq taanna
immikkorluinnaq ittuummat, kommuunit Namminersorullutik Oqartussat akornanni
ingerlanneqarmat. Aammalu kommuunit taakkununnga ingerlatsisussaammat,
nukissiorfiit tassani ingerlatsinermi pisussaanngimmata. Soorunami siunissami
ilusilersuinerit takutikkumaarpaat nukissanik kiammik ikuallaasarfiit
pilersuisinnaanerata, aamma kissaatigineqartup taassumata qanoq
aqqutissiunneqarsinnaanera. Taanna pingaarturujussuuvoq.
Ikuallaasarfissuit angisuut kiammik
pilersuisinnaanerat aamma aqqutissiuttariaqarpoq, tassani- lu sooruna
nukissiorfiit peqataanissaat avaqqunneqarsinnaanngilaq.
Marianne Jensen, Peqqinnissamut
Avatangiisinut Ilisimatusarnermullu Naalakkersuisoq:
Uanga ilassuteqalaarusuppunga
Naalakkersuisup akissuteqarneranut, tassa uni eqqakkanik ikuallaavinnik
tunngassuteqartut aamma tikillatsiarneqarmata taakkua erseqqississaavigilaarusuppakka,
ilumoormat nukissiuteqarnermut naalakkersuisoq taakkuninnga sanaartorneq isumaginninnerlu
avatangiisunut naalakkersuisoqarfimmi akisussaaffigineqarmat.
Tassa soorlu naluneqanngitsoq,
Naalakkersuisut aammalumi Inatsisartunit tamanik taperserneqarluni,
eqqagassanik ikuallaaveqarnissamik suliniuteqarneq aallarnisarneqarpoq aammalu
nunatsinni piorserneqarnissaa tamatuma siunnerfigineqarluni Naalakkersuisunit
aammalu Inatsisartunit. Taamalillunilu tassa ukioq manna Qaqortumi sanaartorneq
siulleq aallartissinnaanngorpoq. Tassunga tunngatillugu oqaatigissavara ilaatigut
Katusseqatiginninngaanniit uparuarneqarmat ninguaattoortumik taassuma
aallartinneqarnera aammalu tassani ilaatigut sulisut, tassa taamaattumik
suliarinnissimasut pisortaqarfimmi isorineqarlutit ninguaattoortoqarneranut.
Erseqqissaatigissavara suliaq taanna nunatsinni siullerpaalluni pisortat
Namminersornerullutik Oqartussat aamma peqataaffigisaannik siullerpaalluni
suliaq taanna massakkut aallartinneqartussanngormat. Tamaattumillu
assigiinngitsut paasiniarluagassat siullermeerluni suliarinninnissamut
paasiniarniatariaqarsimmapput, piffissaq sivisunerusoq naatsorsuutigisamiit
atorlugu.
Tassani ilaatigut eqqarsaatigaakka
sanaartugassap inissiffissaa, kommunalbestyrelsep innuttaasullu akornanni oqaloqatigiinnissutigineqarsimavoq
sivisungaartumik, aammalu suliaq pitsaasumik naammassineqarnissaanut
angissusissaanut allatigullu, pissusiviusunut naleqquttumik sananissaq taanna
aamma naleqqussaasoqartariaqarsimavoq Qaqortumut illoqarfimmut naleqqulluartumik
suliaq taanna ingerlanneqarniassammat, kiisalu aamma kommunalbestyrelse qanimut
suleqatigalugu oqaloqatigisaqattaarlugulu suliaq ingerlanneqarsimavoq, allaallu
innuttaasunit ataatsimiisitsinerit aamma ingerlanneqartarsimapput, aamma
pisortaqarfinninngaanniit peqataaffigineqartumit.
Tamakkua tamarmik aammalu
minnerunngitsumik ilanngullugu aningaasatigut aveqatigiittumik akiliinissaq,
aningaasalersuinissaq aamma tamanna isumaqatigiinniutigineqarsimavoq KANUKOKA
peqatigalugu aammalu illoqarfik kommuuni Qaqortoq peqatigalugu.
Tamakkua tamarmik kingunerisaanik
sanaartorneq ukiup aallaqqaataata tungaanit aallartinnani massakkut aatsaat
aallartissinnaalersimavoq, kisianni Naalakkersuisuninngaaniit pingaartinnerpaatissimavarput
suliaq sukumiisumik paaseqatigiittumillu kommunalbestyrelse-li Namminersornerullutik
Oqartussallu innuttaasullu nukissiorfiillu aamma tassani suleqatigineqarput,
kiisalu aamma KANUKOKA. Paaseqatigiittumik isumaqatigiittumillu tamatuma
sukumiisumik pitsaasumik ingerlanneqarnissaa pingaarnerpaatissimavarput,
taamaalilluni aporfiusinnaasut qulaajarluarlugit aammalu malussarfigisat
assigiinngitsut aallarnisaaniarnermi, taakkua ilinniarfigalugit aamma
siunissami piorsaaqqinnissaq ingerlanneqarniassammat.
Tassuunakkut sulisut pitsaasumik
sulisimapput, uanga isumaga naapertorlugu, aammalu kommuuni kiisalu aamma
nukissiorfiit allallu suleqatissat peqatigalugit tassani suleqatigiilluarnikkut
suliaq massakkut aallartissinnaanngorsimavoq. Isumaqarpunga tassuunakkut sulisut
avoqqaarissallugit pissutissaqanngitsoq.
Soorlu oqareersunga
aningaasalersuinermut agguaasseqatigiinnissamut Naalakkersuisut KANUKOKA-mi
aamma isumaqatigiinniuteqarsimapput, tamannalu aningaasaqarniarnermut
naalakkersuisoqarfimmiit ingerlatinneqarsimavoq, aningaanut tunngasortaa.
Kisianni aamma soorlu Inuit Ataqatiginninngaanniit apeqqusinerneqarpoq 50/50
-imik aningaasalersuiriaaseq taanna tulluarnerpaajunersoq. Soorlu oqareersunga
isumaqatigiinniarnermi tassuunakkut allamik ingerlapput, taamaattumik
uanngaaniit neriorsuisinnaanngilanga, kisianni isumaqarpunga apeqqutit tamakkua
sammineqartassappata, ataatsimiititaliami suliaq una ingerlatinneqaqqissappat,
ilaatigut aamma apeqqutit makkua ataatsimiititaliamut tikeqqinneqarsinnaapput
isummerfigineqarlutillu, tassanilu Inatsisartut qanoq aamma isumaqarnersut
ersersinneqarsinnaalluni. Tassami pisariaqarluinnarpoq taamatut ikuallaavinnik
piorsaaqqinnissami periarfissat aporfiusinnaasullu nalilersuartassallugit,
tassani tamatta soqutigigatsigu Namminersornerullutik Oqartussat kommuunillu
soqutigimmassuk sapinngisamik piorsaaneq ingerlalluassasoq.
Erseqqissaatigissavaralu
naggataatigut ikuallaavimmik Qaqortumi pilersitsiniarnermi aamma
siunertaalluaqqissaarmat kiaap sinneruttup kiassarnermut illunut atorneqarnissaa,
taannanilu aamma eqqaaneqarnikuuvoq massakkut ilaatigut aamma nukissiorfik
tassani suleqatigalugu, minnerunngitsumillu kommuuni.
Karl Lyberth, Siumut,
Ataatsimiititaliami Siulittaasoq:
Naalakkersuisunut Ilaasortaq Mikael
Petersen ilumoorpoq unga inatsisissamut ataatsimiititaliaq allannguutissanik
siunnersuuteqanngilaq, aamma saqqummiussaqanngilaq.
Kisiannili ataatsimiititaliami
maluginiarsimavarput, imaluunniit pingaartillugu oqaatigisarput unaavoq
nukissiuutit assigiinngitsut taakkartortuartillugit, soorlu erngup nukinga,
seqinngup anorillu nukingat, tamakku taakkartortuartillugit, ataatsimiititaliap
pingaartippaa erngup nukingata siunnertaqarnerusumik taassuma
pilersaarusiornissaa Naalakkersuisunut taanna pingaartilluinnassagaa. Periarfissat
allat taakkartorneqartut soorunami isumaqatigaagut aamma iluatinnartorujussuupput.
Kisianni erngup nukinganik taassuma annerusumik erseqqinnerusumillu
pilersaarusiorfiginissaa taanna assorujussuaq kissaatiginarpoq, nalunngilarput
pilersaaruteqartut aammalu isumaqatigiissuteqarsimasut Vattenfallip allanullu
isumaqatigiissuteqartoq nalunngilagut.
Aamma ataatsimiititaliap
pingaartilluinnagaata ilagivaat, pingaartumik avatangiisit eqqarsaatigalugit
aammalu illoqarfiit eqqakkanik ajornartorsiulersimasut, taalluaannarlugit
eqqaavissuarnik ajornartorsiuteqarlersimasut, tamakkua pingaartumik
eqqarsaatigalugit, eqqakkanut ikuallaavinnik pilersiunissaq taanna ukiuni
aggersuni piffissap sivisoorsuunngitsup iluani, kissaatiginarpoq assut tamakkua
illoqarfinni assigiinngitsuni, pingaartumik eqqaavissuarnik
ajornartorsiuteqalersimasuni piaartumik tamakkua pilersitsiortornissaat
ataatsimiititaliap assurujussuaq pingaarutigaa.
' 15-ini taakkartorparput ataatsimiititaliami, tassani
maluginiarsimagatsigu illut imaluunniit inissiat, kollegialluunniit namminneq
kiassaateqarfeqartut aamma pinngitsaalineqarlutik fjernvarme-mut
ikkunneqarsinnaanerat ' 15 pineqartutut paasigatsigu,
ataatsimiititaliap paatsoorsimagutsigu tamanna utoqqatsissutigissavarput,
kisianni taamatut paasigatsigu Naalakkersuisunut kajumissaatigivarput
taamakkua taamatut namminneq kiassaateqarfillik arlaatigut fjernvarme-mut
ikkunneqassagaluarpata aaqqiivigineqarnissaat eqqarsaatigikkullugu.
Aamma ataatsimiititaliaminngaanniit
nuannaarutigivarput Naalakkersuisut periarfissattut ilaattut taammassuk akit
aappartinneqarnissaat taanna aamma siunissami periarfissatut taaneqarmat
ataatsimiititaliaminngaanniit assorujussuaq nuannaarutigivarput.
Naggataatigut Inuit Ataqatigiit
saqqummiussaat ataatsimiititaliap paasiniaaffissaraluaminut
paasiniaasimanngitsoq, utoqqatserpunga paasinnginnakku suna pineqarnersoq,
aammami allaqqanngimmat kikkut pineqarnersut, tassani paasiniaaffissaagaluit.
Isumaqarpunga kisianni ataatsimiititaliami paasiniaaffissat assigiinngitsut
pimoorullugit paasiniaaffigisimagigut, aamma una inatsisissaq pingaartuummat,
ataatsimiititaliallu peqqissaarullugu suliarisimagaat.
Anthon Frederiksen, Katusseqatigiit:
Qujavunga akissuteqaatigineqartunut. Kisiannili
maqaasisara aajuna avataangiisit illersorneqarnissaat aammalu
nungutsaaliorneqarnissaat pingaartinneqarluni oqaatigineqartuarpoq. Siullermeerinninnermi
oqaaseqaatinni ilanngullugu kommuunit qaleraleqaffinni, qalerallit perlukuinnik
mingutsittineq ilisimalluinnarparput uagut qaleraleqarfinniittugut ukiuni
kingullerni aasat tarmaluinnaasa qalerallit usoqaqeramik perlukui qanoq
atsigisumik kujannguutsititsartut. Imarujussuaq allaat mingutsillugu pisarmat.
Maannakkullu qujanartumik taakkua
ilaatigut Ilulissat fabrikkiani ilaatigut ilaannakuugaluartumik
atorluarneqartut qujanarpoq, taamaattumik taanna kissatigisimagaluarpara
taassuma annerusumik immaqa paasiniaaffigineqarluni qanoq
atorluarneqartigilernera, aammalu siunissami qanoq atorluarneqarlertinnaanera
akissuteqarfigineqassasoq. Kisianni tassa tamaattoqanngilaq,
neriuutigiinnassavaralu tamanna aamma arajutsineqarani ingerlateqqinneqassasoq.
Pingaartumik Uummannaq Upernavillu eqqarsaatigalugit, qularnanngimmat siunissami
taamatut mingutsisineq eqqavissuarnut eqqaanerinnaanngimmat, aammali imaanut
mingutsisineq aamma tassani isiginiartariaqarmat.
Qaqortumut tunngatillugu ukioq
ataaseq maannakkut qaangiuppoq, siorna 1996-imi aningaasanut inatsisissaq
1997-imut suliarigatsigu akuersissutigigatsigu ukioq ataaseq qaangiuppoq,
taamanikkulu oqartoqarpoq Qaqortoq piareersimavoq aammalu aningaasatigut
piareersimavoq eqqaavittaarnissamut. Kisianni tassa ullumikkut utoqqatsissutit
arlaqartut maani oqaatigineqarput. Isumaqarpunga imaaliaannarlugu
utoqqatsisutit taakku tiguneqarsinnaanngitsut 1996 ukiakkut oqaaserineqartut
qiviassagaanni.
Nalunngilarput Inatsisartut
landskarsillu peqataaffigisaannik siullerpaamik eqqakkanik ikuallaafissamik
sanasoqartoq aammalu nalunngilarput Nuup Kommunia taamatut
sanatitsireersimasoq. Taamaattumik nunatsinni misilittagaareersut aamma
atorluarneqarneruusuuppata, assersuutigalugu immaqa Nuup Kommunia
misilittagaqareersoq assigiinngitsutigut taamanikkulli iluaqutiginiarneqarsimagaluarpat,
misilittakkat tassani qanoq ittuunersut, taava kinguaattorneq taamak
angitigisoq immaqa pisimassanngikkaluarpoq. Ukiormi ataaseq naallugu
innuttaasunut paasiniaasoqarsinnaanngilaq ikuallaaviup sumiinnissaa
allatigullu sanaartornermut tunngasunik - ukioq ataaseq atorneqarsinnaanngilaq.
Immaqa qaammatit marluk-pingasut naammapput tamakku misissorneqarnissaannut.
Ajornartorsiutit amerlanerpaat
tassani tassaasarput immaqa allaffeqarfinni suliassat uninngatinneqaleraangata
aamma matumani paamaarnermik pissuteqartumik kinguaattornerit amerlaqaat
takusartakkagut. Sanaartorneq qiviaannarsinnaavarput - sanaartornermut
tunngatillugu aningaassalissutigineqartartut landskarsimiit ukiut tamaasa -
tamarluinnaqqinnaasa kinguaattorutigineqartarput. Taamaattumik taamaattut kinguaattornerit
siunissami qularnanngilaq tamatta Inatsisartuni pinngitsoorniarlugit
sulerusuppugut aammalu kinguaattornerit illersorneqarsinnaaneri isumaqarpunga
illersorfissaqanngitsut. Qaangerniartariaqarpagut taamatut kinguaattortarnerit.
Manasse Berthelsen, Inuit Ataqatigiit
oqaaseqartuat:
Siullermik ataatsimiititaliap
siulittaasua oqaaseqarfigilaassavara. Oqarmat suunukua tusarniaaffiginiarigut.
Uani peqqussummi siunnersuummi attorneqartut ikinngeqaat, siullermik
annerpaamik nukissiorfinnut tunngavoq, kisiannili aamma kiassaateqarniarnermut
tunngasut, soorlu INI A/S-i annertoorujussuarmik nammineq kiassaateqartitsivoq,
taakkualu aamma una peqqussut aqqutigalugu
aalajangersaaffineqartartussaallutit, ilaatigut pinngitsaalisaallutit,
qallunaatut taalluaannarlugu, fjernvarme-mik ikkutsinneqartussaapput.
Massakkullu akit najoqqutaralugit
qanormita fjernvarme-mut ikkutsinneqassagaluaruni qanormita atuisartunut
kinguneqassava? Ineqarnermut akiliutinut qanoq kinguneqassava? Allaat pingasoriaammik
annermik kiassarnermut akiliisalissagunik. KNI illoqarpoq aamma
mikisunngitsunik nammineq ilaatigut kiassakkaminik, assersuutigiinnarlugu Royal
Arctic Line aamma illorujussuarnik peqarpoq, aamma nammineq kiassakkaminik.
Pinngitsaalisaallutik fjernvarme ikkutissagaluarunik pingasoriaammillu
akiliisalerunik, qanormita taassuma oqaasissaqarfigissavaa?
Taavalu aamma ataatsimiititaliap
siulittaasua apererusuppara nukissiutinik pilersuinermi atugarisat
pitsaanerpaanissaat soqutiginnginneraa? Tassami uuliamik akigitinneqartut
massakkut imatut nassataraat, akikillisaannginnerata nassataraa nukissiorfiit
aammalumi kiassarnermut allanut atorneqartut, soorlu INI A/S- kunni allanilu
akit taamatut itsitaanerat akisoorujussuuvoq, nukissiorfinnut INI A/S- imut
KNI-mut, ingammik ilaqutariinnut aammalu illoqarfinni mikinerni
ineriartortitsinermi atugassarititaasut eqqorneqarput.
Ataatsimiititaliap soqutigiguniuk
pitsaanerpaamik sullissisoqassasoq, taava soorunami ujartortariaqarpaa
atugassarititaasut pitsaanerpaanersaat nukissanut pilersuinermi. Ilagiinnerpaat
uuliamik akeqartitsinneq uagutsitulli akiliisarluta, 40 mio. liiteri sinnerlugu
pisisarput, uagutsitulli suli akiliisarluni. Aamma una Inuit
Ataqatigiinninngaaniit uuliamik akeqartitsinerup, imaluunniit aaqqissuussinerup
nalilersoqqinneqarnissaanut tunngatillugu oqaatigineqarpoq uuliamik
nioqquteqartartut aatsaat aqqusaaqqarlugit ingerlanneqartarmat. Ilaatigut 18
ĝre ilanngullugu, angullugu liiterimut kiffartuussinermut 1 kr. 98 ĝre qaavanut
ilineqartartoq. Taava inuiaqatigiinninngaanniit aperisariaqarpoq suunaana
akornutigigaa? Nukissiorfiup toqqaannartumik KNI Pilersuisuminngaanniit
pisisinnaannginnerami? Taanna aamma akikillisaataasinnaagaluarpoq.
Taavalu aamma ataatsimiititaliap
soqutigisassaataa ilagisinnaalluaraluarpaat siullermi saqqummiinitsinni
oqarpugut suliffissuit nioqqutissiorfissuit, soorlu Royal Greenland-itut ittut
sooq innaallagissamik ajutoornermi sillimmateqannginnersut. Sisimiuni
ajutoornermi takutippaa Royal Greenland suliffissua innaallagissiorfimmi
sillimmateqannginnami sapaatip akunneri arlallit uninngavoq. Sisimiuni
inuiaqatigiinni miliuunerpassuarnik nalilinnik.
Una peqqussut aqqutigalugu aamma
aqqutissiusoqarsinnaavoq. Inuiaqatigiinni pisariaqartinneqarnerpaat suliffeqarfissuit
suliffiillu sillimmasertarnissaannik piumasaqarnissaq taamaalilluni
inuiaqatigiinnut akikinnerpaassalluni.
Otto Steenholdt, Atassut-ip
oqaaseqartua:
Ataatsimiititaliap saqqummiussaa oqallisigineqartillugu
tupigilluinnarpara, pingaartumik IA-mit. Ataatsimiititaliamut ilaasortaqarmata.
Massakkut tusarpara ataatsimiititaliap siulittaasua apersorneqartoq.
Ataatsimiititaliami aperisassaq. Aatsaaqqissaaq aamma naalakkersuisumut
saaffiginnissuteqarpallappoq, apersorlugu ataatsimiititaliap
periafississavarput tamakkununnga Naalakkersuisoq qaaqqullugu apersussallugu.
Aamaakku ataatsimiititaliat soqutigigunigit. Ataatsimiititaliami ilaasortarsi
taanna naveertariaqasimagaluarparsi, ataatsimiititaliap soqutiginninngittutut
saqqummersikkassiuk. Ataatsimiititaliap saqqummiussaa oqallisigigutsigu
partiillu aallartitaata suliassani suliarisimanngippagu, taanna nammineq
saassutarisariaqassaaq. Isumaqatiginngikkaanga aallartitaasimasoq tassunga
ataatsimiititaliaq tusarnaarlugu tupinnaqaaq Naalakkersuisoq
qaaqqunneqarsimanngitsutut ippoq, imaluunniit amerlanerussuteqartut
qaaqqusigaluarmata itigartissimanerpaat? Apeqquterpassuit saqqummeralerput
maani ataatsimiititaliami suliassat. Tusaaqqusaarfiunngilaq. Nammineq
aallartitarsi tamakkuninnga sulisimanngippat, qaaqqullugu oqaafigilaarniarsiuk:
suliani ataatsimiititaliami paarilluarnerukkullugu. Pisariaqarpallu Naalakkersuisoq
qaaqqullugu, apersorlugu, maani oqallisigineqarsinnaagaluarpat, naaggaartorsimappasi.
Daniel Skifte, Aningaasaqarnermut
Ineqarnermullu Naalakkersuisoq:
Erseqqissaateqalaaginnarniarlunga,
maanngarniarpunga. Tassa ilaatigut uuliamik pisiniartarneq Inuit
Ataqatigiinninngaanniit qaffatsinneqarmat, apeqqutillu arlaqartut qaffatsinneqarlutit.
Soorlu assersuutigalugu ' 6 taaneqarpoq, tassa nukissamik
pilersuinermut tunngassuteqartoq, aammalu tassani apeqqummi Naalakkersuisut
apeqqummut pisussaaffiliisinnaasut issiarneqarluni. Taanna ilumoorpoq.
Naalakkersuisut taannarpiaq paragraffi tunngavigalugu Naalakkersuisut
pisussaaffiliisimapput Kalaallit Nunaanni ikummatissamik pisisinnaasoq
pisiniarsinnaasorlu isumaqatigiinniarsinnaasorlu, tassaassoq KNI.
Apeqqut tassunga
tunngassuteqarneranut peqqutaasoq taasariaqanngilakka. Nukissiorfiit kisimik
eqqarsaatigineqanngillat, aamma ulluinnarni ilaqutariippassuit pisiniarfiat KNI
allallu aamma tunngaviusimapput. Taassumalu aamma saniatigut
eqqaamasariaqarparput sineriarsuatsinni uuliaasivippassuit pigineqarput
KNI-mit, taakkulu atorluarneqassappata, ukioq ataasiinnaq
sillimmateqassanngippat, silarsuarmi nikeqartuartumi pissuseqarfiusumi, uuliap
akia akitsorujussuassappat, imaluunniit uuliamik pisinermi dollar-i nalinga,
amerikamiut aningaasaata nalingata, qaffarujussuarnera peqqutaasimassappat, taava
soorunami Kalaallit Nunaata sunniiffigisinnaanngisaata pissutsit tamakku
peqqutigalugit akitsuisoqariataarsinnaammat, taamaattumik KNI
akisussaaffilerneqarsimavoq qularlaallilluni Kalaallit Nunaat uuliamik
pilersorneqassasoq.
Tamakkununnga ilaapput soorlu
nukissiorfiit immikkut pilersuisinnaanerat pinngitsoorniarlugu. Atortussallu
piureersut atorluarniarlugit. Taamanikkut, eqqaamanerluinngikkuku 1993-imili
KNI pisinnaatitaaffilerneqarsimammat taamaaliussasoq.
Ikuallaasarfinnut tunngasunik aamma
oqaaseqartariaqarpunga. Tassani ilaatigut Anthon Frederiksen-ip oqaaseqarpoq,
ilaatigullu immaqa qassiiliutitsinermik kinguneqartumik, kinguaattortarnerit
eqqartorlugit. Immaqalugooq ilaatigut Nuup Kommunia tusarniarneqalaarsimasariaqartoq.
Erseqqissorujussuarmik oqaatigissavara Nuup Kommuniata ikuallaasarfiliuneq
nammineq kisimiilluni 100 % -imik akilersimavaa. Ikuallaasarfiliuneq
tassaammat kommuunit ataasiakkaat namminneq akisussaaffigisaat.
Kisianni Siumukkut Atassutikkullu
Naalakkersuisooqatigileramik oqarput, mingutsisinaveersaarneq siunnerfigalugu,
aamma qeqqani Namminersornerusut soqutigisariaqaraat ikuallaasarfiliornissaq.
Taamaattumik Nuup Kommunia assersuutigissallugu kukkuvuvut. Qaqortoq
siulliuluni tapiiffigineqarpoq, isumaqatigiinniarnerit aqqutissat aqqutigalugit
50 % -i tamanut illuartinneqarpoq. 50/50- siummat taassavara maannakkut
ajornartorsiut aallaanngillaq tassa Namminersornerullutik Oqartussat
Naalakkersuisut kisimik pisuusutigigaat. Inuit marluk akileeqataapput,
kommuunit aammalu Namminersornerullutik Oqartussat.
Taassuma saniatigut pissutsit
assigiinngitsut utoqqatsisutissiuunnagit oqaatigissavara qujanartumik
ullumikkut Naalakkersuisut iliuusiat aamma kommuniit taperpaat,
soqutiginninnerneq una aamma Inatsisartut peqataarusuttut taassumap
siunnerfiupput, ajunngitsumik inernissaanut.
Taassuma aamma saniatigut
taasariaqarpoq aamma illoqarfinnuinnaq tunnganngilaq, pilersaarusiunneqarpoq
aamma nunaqarfiit aamma taamatut ikuallaaserfeeqqanik pilersorneqassasut,
aammalu taanna apeqqut taaginnarpara erseqqissaatitullusooq.
Tamatut oqariarlunga, naggataatigut
oqaatigilaassavara tupiginngitsuunnginnakku Inuit Ataqatigiit oqaluttuata
kingulliup oqaasii arlaqartut apeqqutillu arlaqartut qularpatitsisut,
naggataatigulli soorluli Inuit Ataqatigiit oqaluttua aallaqqaataani oqartoq,
siunnersuut tapersersorpaat, kisiannili apeqquteerarpassuit qularpasissumik
kinguneqartut qaffatseriarlugit, soorlu tassa nutaamik iliortoqarpat
ajunngitsumik siunertaqartumik, soorlu qularsaarisoqarsaannartoq, aa taanna
ajortorujussuuvoq, suli anginerusumik, suli anginerusumik.
Taamatut isumaqarneq uannut inuttut
tupaallannalaanngitsuunngilaq, isumaqarpungami oqartariaqarlunga
Naalakkersuisut piareersimapput uuliamut akeq, uuliamut pilersuineq,
imaluunniit ikuallaasarfiliornermut tunngasunik qaaqquneqarunik partiinit
imaluunniit katusseqatigiinnit aggissallutik nassuiaajartorlutik. Tamanna
ammavoq, maanngaanniit erseqqissaatigeqqittariaqarpoq.
Karl Lyberth, Ataatsimiititaliap
siulittaasua:
Aap, ataatsimiititaliap
siulittaasuattut ajuusaarutigissavara apeqquteerappassuit Inuit Ataqatigiinninngaaniit
saqqummiunneqartut taakkua imatut paasineqarsinnaammat soorlu
ataatsimiititaliap tamakkua apeqqutit oqaluuserisimanngikkaat. Taamaannginnami,
apeqqutit tamakkua saqqummiunneqartut ataatsimiititaliami
oqaluuserineqareerput. Aamma isumaqarpunga naammaginartumik ajunngitsumillu
tamakkua akineqareersut.
Isumaliuutissiisutitsinni aamma takuneqarsinnaavoq
allaqqavoq ataatsimiititaliap isumaqatigiissup tamarmik aamma Inuit
Ataqatigiit sinnerlugit ilaasortat peqatigisaanik. Taamatut isumaliutissiissut
saqqummiunneqarnissaa aamma akuerineqarnikuuvoq. Apeqqutit soorlu inuit
ataasiakkaat qanoq pineqassappat pingitsaalineqassagunik. Inatsimmi
siunnersuummi allaqqavoq inuit ataasiakkaat, illut ataasiakkaat pineqanngitsut,
taakkua nammineq kiassaatillit kissarsuutilluli, taakkua
kissarsuuteqaannassappat, tamakkua pineqanngillat. Ataatsimiititaliami
ataatsimiititineq tamakkua aamma paasissutissatut saqqummiunneqareerput, aamma
atuarneqarsinnaapput.
Aamma nukissiorfiit uuliamik
pisisarnerat, akilisarnerat aamma ataatsimiititaliami samminikuuvoq. Aamma
ataatsimiititaliap isumaqatigiissut imatut nalilerpaa ataatsimiititaliaq
nukissiorfiit sinnerlugit uuliat akii isumaqatigiinninniarnissamik
pisussaanngitsoq. Apeqquserneqarpoq Inuit Ataqatigiinniit ataatsimiititaliap
pitsaanerpaamik sullissinissani soqutiginnginneraa? Soorunami kikkulluunniit
ataatsimiititaliat pitsaanerpaamik sullissinissartik soqutigivaat. Aamma uumap
ataatsimiititaliap soorunami pitsaanerpaamik sullissinissani soqutigivaa.
Otto Steenholdt
ilumoorneqartariaqarpara tupinnarsinnaavoq taamatut Inuit Ataqatigiit saqqummiimmata.
Aammami oqaatigilluaannarlugu massakkut saqqummiisoq aamma isumaliuutissiissut
saqqummiukkakku oqarpunga Inuit Ataqatigiit sinnerlugu kina ilaasortaanersoq.
Tassa Manasse Berthelsen ilaasortaavoq. Taamaattumik eqqumiippoq una oqaluttarfik
atorlugu apeqqutit pineqareersut ataatsimiititaliamilu pimoorullugit
oqallisigineqareersut manna oqaluttarfik atorlugu taamatut
saqqummiunneqarpata. Immaqa pitsaanerussagaluarpoq Inuit Ataqatigiinniit
sinnerlugu ilaasortaq isumaqataasimanngikkuni, taava ikinnerussuteqarluni
isumaliussiissuteqarsimassagaluarpoq.
Kisianni unani paasissalugu unaavoq
ataatsimiititaliaq sinnerlugu siulittaasutut ataatsimiititaliaq tamarmiulluni
isumaliutissiissut saqqummiuppara.
Josef Motzfeldt, Inuit Ataqatigiit
oqaaseqartuat:
Inatsisartuni innuttaasut sinnerlugit
pisussaaffigaarput akikillisaanissat torersumik ingerlanneqarnissaat,
aqqutissat suut tamaasa atorlugit, innuttaasut sinnerlugit anguniagassaraarput,
inuuniarnermi aningaasartuutit annikillisarnissaat.
Siornatigut KNI uuliamik
pilersuisussatut kisermaassisuunera ajortuliatut imaannaanngitsutut KNI-mut
saassussissutigineqartarpoq. Ullumikkut nukissiorfinnut 40 mio. liiteri ukiumut
pisisartumut niuernikkut ingerlatsineq ajoqqutaralugu nalinnginnaasumik niuernermik
ingerlatsinermik atorneqartartoq Inuit Ataqatigiinniit ujartuinnarparput.
Kisianni taanna ajornasaarunneqarpoq,
paasisinnaanngisatsinnit sooq? Aamma aserfallatsaaliinermi pisussaaffiit
nukissiorfiit eqqarsaatigiinnarlugit aserfallatsaaliinermi pisussaaffiit imaannaanngitsuummata.
KNI uuliaarniarnera kisiat annaanniarneqassanersoq imaluunniit nukissiorfiit
pisussaaffiisa, pisussaaffimminnik sapinngitsamik pitsaanerpaamik
naammasinissaa, tassani naalakkersuinikkut pingaanerviusariaqarpoq.
Nalunngilarput KNI
aktieselskab-iuvoq, kisianni nukissiorfiit aktieselskab-iunningillat, tassami
akuerineqarsimappat, taanna aaqqiiniutinut aqqinninniarneqartunut
ilaasariaqarpoq.
Ataatsimiititaliani sulinerni
ilisimasassanik Inatsisartut sinnerlugit maani inimi oqallinnerup tamani
sangoqattataannginnissaa siunnerfigalugu ataatsimiititalianut suliat angisuut,
qulaajaanerat angisuut, sukumiisut Inuit Ataqatigiit atorluarniartuarpagut,
aamma taamaaliortuassaagut. Piffissaaleqineq aqaguagu naammassisariaqarmat,
tamakku patsisiluillugit ataatsimiititat sulineri pipalluttumik
ingerlanneqartarnerat ileqqupalaajuvoq. Tamatumani massakkut oqallinneq
Inatsisartut ataatsimiinnerat qiteqquteriilaaginnartoq, kinguartitsinerit qanoq
angitigusut pilereerpat?
Naalakkersuisut angalasarput,
tamannalu ilaatigut patsisiliullugu oqaluuserisassat kinguartillutit
aallartinneqarput, taamaattumik angumeriniagassat piffissaliunneqartut
ilaatigut angumereqqaniaannaavillugit naammasiniartarneq taanna
ileqqupalaajusoq, isumaqarniaraluarpugut siorna suleriaatsisinut
nutarterinitsugut qaangerneqassasoq, kisianni piumassuseq tamatigut aaqqisuussinernut
siunnerfinnut naleqquttanngimmata ajuusaarnarpoq.
Ataatsimiititani sulinermi soorunami
ikinnerussuteqarluni oqaaseqaateqarnissaq taanna aqqutaasinnaavoq, kisianni
pisariaqanngitsumik isumaqatigiinnginnertut annertuutut isigineqarsinnaanngikkaangat,
tamanna uagut atornaveersaartarparput, sapinngisamik Inatsisartut
isumaqatigiittumik inuiaqatigiinnut pingaarutilinnut isummertarnissapput
pingaartikkatsigu.
Kisianni amerlanerussuteqarnerinnaq
sakkuliullugu anori qatsortinneqarsinnaanngilaq. Ilaannikkut
amerlanerussuteqarnerinnaq tamaallaat tunngaviliullugu Naalakkersuisut oqartarput
tamakkua uagut susassarinngilagut, misissortariaqanngilagut. Inatsisartut
taamatut sulisussaanngillat.
Anders Andreassen, Inatsisartut
Siulittaasuat:
Peqqussutissamut siunnersuut
aappassaanerneqarnermi isikkoqarluni pingajussaanerneqarnissaanut qassit
akuersiumanersut. Taakku nikueqqussavakka.
27.
Qassit akerliuppat.
Akerliusoqanngilaq.
Qassit taaseqataanngillat.
Taaseqataanngitsoqanngilaq.
Tamaalilluta oqaluuserisasaq
immikkoortut 23 aappassanerneqarnera naammassivoq. Pingajussaanillu ingerlaqqissalluni.
Oqaluuserisaq naammassivoq.