Oqaluuserisassani immokkoortoq 38-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 29. oktober 1997 nal.
18.20
Ataatsimiinnermik aqutsisoq: Finn Karlsen.
Siverth K. Heilmann, Inuussutissarsiornermut, Aalisarnermut,
Piniarnermut Nunalerinermullu Ataatsimiititaliap siulittaasua:
Aalisarnermut, piniarnermut
nunalerinermullu tapersiisarneq pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuutip
aappassaaneerneqarneranut kiisalu ilaasortap siunnersuutaanut immikkooortumi
matumani oqaluuserisassatut innersuussutigineqarsimasumut:
Inatsisartunut ilaasortap Hans Enoksenip
aalisartut raajarniartut aalisagarniartullu angallatiinnut akilersuinerisa
naleqqussarneqarnissaannik siunnersuutaanut Inatsisartut Aalisarnermut,
Piniarnermut Nunalerinermullu Ataatsimiititaliaata isumaliutissiissutaa
Ataatsimiititaliap ilaasortarai
Siverth K. Heilmann (A), siulittaasoq
Lars Karl Jensen (S), Hans Enoksen (S),
Otto Steenholdt (A), Johan Lund Olsen (IA)
Inatsisartut Aalisarnermut, Piniarnermut
Nunalerinermullu Ataatsimiititaliaata aalisarnermut, piniarnermut
nunalerinermullu tapersiisarneq pillugu Inatsisartut peqqussutaata
allanngortinneqarneranik Inatsisartut peqqussutissaattut siunnersuut
taamatullu ilaasortap siunnersuutaa oqaluuserisassanut innersuussutigineqartoq
pingasoriarluni ataatsimiinnermini suliarai.
Ataatsimiititaliap siunnersuut
tamakkiisumik isumaqatigisinnaavaa imatullu oqaaseqaateqassalluni.
Ataatsimut isigalugu ataatsimiititaliaq
isumaqarpoq pingaaruteqartoq pisariaqartinneqartunik aalisariuteqarnissaq
taamaalilluni aalisakkanik suliffissuit annertunerpaamik iluaqutigineqarsinnaaqqullugit.
Tamanna siunnersuutikkut matumuuna siuarsarneqassaaq.
Ataatsimiititaliap kissaatigaa
saattuarniarneq aalisakkanut manna tikillugu iluaqutigineqartunut
ilanngunneqassasoq.
Paaviaaraq Heilmann, Inuussutissarsiornermut, Aalisarnermut,
Piniarnermut Nunalerinermullu Naalakkersuisoq:
Naalakkersuisut sinnerlugit
Naalakkersuisut Aalisarnermut, Piniarnermut Nunalerinermullu tapersiisarnermut
peqqussutip allanngortinneqarnissaannik siunnerssuutaat pillugu Aalisarnermut,
Piniarnermut Nunalerinermullu ataatsimiititaliap isumaliutissiissutaanut
qujaniarpunga.
Taasami ataatsimiititaliap aammattaaq
Inatsisartuni ilaasortap Hans Enoksen-ip siunnersuutaa
oqaluuserineqarsimalluni. Naalakkersuisut peqqussutissamut siunnersuutaata
siullermeerneqarnerani iluarisimaarlugu maluginiarpara, ataatsimut isigalugu
peqqussummi aalajangersakkat Naalakkersuisut allanngortinneqartussatut
siunnersuutigisaat isumaqatigineqartut.
Maannakkut paasisinnaavara Naalakkersuisut
siunnersuutaat taamatuttaaq ataatsimiititaliami tapersersorneqartoq.
Nalunaarutigaara taamaalilluni Naalakkersuisut suliniutigisaat pillugit
naalakkersuinikkut annertuumik isumaqatigiittoqarnera.
Naalakkersuisut sinnerlugit
oqaatigisinnaavara inuussutissarsiutinut tapersiisarnermut maleruagassat
pissutsinut aalisarnermik inuussutissarsiuteqarnitsinni sukkulluunniit
atuuttunut naleqqussarneqartuassamata. Naalakkersuisut pissutsit
allanngoriartornerannut malinnaajuassapput, aalisakkat aalisarneqarsinnaasut allat
iluaqutigineqarsinnaanissaannut periarfissat ilanngullugit.
Ilanngullugu oqaatigisinnaavara
Naalakkersuisut saattuarniarnerup ineriartornera qanimut malittarimmassuk.
Ilaatigut saattuanut piujuartitsinissaq siunertaralugu illersorneqarsinnaasumik
iluaqutigineqarnissaasa qularnaarnissaannut pisariaqartunut
suliniuteqartarnissaq siunertaralugu.
Inatsisartunut ilaasortap Hans Enoksen-ip
siunnersuutaa pillugu nalunngilara inuussutissarsiutinutaamik periarfissatut
pingaarutilittut ineriartortinneqarnissaanut pitsaasunik periarfissinneqassasoq.
Taamaammat ataatsimiititaliami naammagisimaarlugu paasivarput siunnersuutikkut
tassuuna ilaatigut pingaarnerutillugu siunertarineqartoq angallatinik
atornikunik pisaartornissamut periarfissiisoqarnissaa, taamatuttaaq
aalisariutinik nunanit allanit pissarsiarineqartunik, ilaatigut
sattuarniarnermut atugassanik.
Tamatuminnga pissuteqartumik
ataatsimiititaliap Naalakkersuisunut kaammattuutigaa ataatsimut isigalugu
eqqumaffiginiaqqullugu maleruagassatigut tunngavissat pisariaqartinneqartut,
taamatuttaaq tapiissuteqartarnissamut periarfissat, pilersinneqarsimanissaat
tassa aalisakkanik aalisarneqanngitsunik iluaquteqarnissamut periarfissanik
takkuttoqartillugu.
Tamatumunnga ilanngullugu ataatsimiititaliap
oqaatigissavaattaaq saattuarniarneq eqqarsaatigalugu pingaaruteqarmat
piujuartitsinissamik tunngaveqarluni aalisarneq ingerlanneqassammat.
Saattuaqassuseq suli paasineqavissimatinnagu pingaaruteqarpoq
akisussaassusilimmik aalisartoqarnissaa.
Taamatuttaaq ataatsimiititaliami
paasivarput siunnersuut umiatsiaararsortunut pitsaanerusunik
periarfissiisussaasoq. Ataatsimiititaliami akuttunngitsunik
erseqqissartarparput umiatsiaararsorluni aalisarneq inuussutissarsiutaammat
ajornartorsiuteqarfiusoq taamaammallu ataatsimiititaliamit
isumaqatigisinnaavarput ' 8-mi umiatsiaararsortunut qasukkaanerit
atuutilersinneqassammata.
Hans Enoksenip siunnersuutaanut
tunngatillugu ataatsimiititaliamit siunnersuummi anguniagaasut
isumaqatigisinnaavagut. Ataatsimiititaliami isumaqarpugut aalisarnerup
pingaaruteqarluinnarnera eqqarsaatigalugu aalisartut amerlaqisut
aningaasarsiornikkut ajornartorsiuteqartut ikiorsiiviginissaannut
piareersimasoqartariaqartoq. Taamaammat ataatsimiititaliamiit kaammattuutigissavarput
aaqqissuussinermik atuutilersitsisoqarsinnaannginnera eqqarsaatigineqassasoq
taamaalilluni pisarineqartut annertussusiat aallaavigalugu angallammit
ataatsimit pissarsiarineqartunit akilersuisitsisoqartarluni, taamaalilluni
aningaasatigut nammagassat killilerneqarsinnaammata pisarineqartut
annikinnerpaagaangata, annertusineqarsinnaallutillu pisarineqartut
annertunerpaagaangata. Ataatsimiititaliamiit naatsorsuutigaarput apeqqut taanna
tassaasoq Naalakkersuisut Inuussutissarsiutinut Tapersiisarnermut Ataatsimiititaliaq
suleqatigalugu eqqarsaatersuutiminnut ilanngussinnaasaat.
Peqqussutissatut siunnersuummi
allannguutissanik ataatsimiititaliaq siunnersuuteqanngilaq taamaalillunilu
inassuteqassalluni siunnersuut saqqummiunneqarnermisut iluseqarluni pingajussaanniigassanngortinneqassasoq.
Inuussutissarsiutinut tapersiisarnermut
ataatsimiititaliaq maannangaaq angallataatilinnut ataasiakkaanut
isumaqatigiissuteqartareersoq, anguniarlugu taarsersuilluni akilersuinerit
tunisinermi iluanaarutinut aalisartut sukkulluunniit naammattoortagaannut
naleqqussarnissaat.
Paasisinnaassavara isumaqatigiissutit
tamakku siunertarisaq malillugu ingerlasut aammalu aalisartut tamakkuninnga assut
naammagisimaarinnittut. Pissutsit tamakku ullumikkut naammaginartumik
ingerlareermata Naalakkersuisut isumaqarput tamakkunatigut maleruagassat
assakaatittariaqanngitsut. Kiisalu eqqaasitsissutigissavara 1996-imi ukiakkut
ataatsimiinnitsinni inuussutissarsiutinut tapersiisarnermi aningaasaqarnikkut
pissutsit peqqissaartumik oqaluuserineqarmata, tassani aalajangiunneqarluni
inuussutissarsiutinut tapersiisarfimmit taarsigassarsiat taarsersornerannut
maleruagassat kasukkartinneqarnissaat.
Inatsisartunut inassutigissavara
ataatsimiititaliap isumaliutissiissutaa tusaatissatut tiguneqassasoq, aammalu
ataatsimiititaliamit aalisarnermut, piniarnermut nunalerinermullu
tapersiisarneq Inatsisartut peqqussutaata allanngortinneqarneranik Inatsisartut
peqqussutissaannut Naalakkersuisut siunnersuutaat tapersersorlugu
taasinissamik inassutigineqartoq malinneqassasoq.
Lars Karl Jensen, Siumup oqaaseqartua:
Inuussutissarsiutitigut tapersiisarnermut
peqqussutip allannguutissaanut siullernerinermi oqaaseqaatigut innersuussutigalugit
maannakkut ataatsimiititaliap saqqummiusaanut tapersiilluta Siumumitimatut
oqaaseqassaagut:
Ukiut ingerlaneranni aalisarnerup
ineriartornerani aalisariuteqassutsikkut naleqqusaasarneq aalisartortattinnut
pisussaaffiusarpoq annertooq, maannakkut imartatsinni aalisarnikkut periarfissanut
minnerunngitsumillu nunami suliffissuit suliassaqassutsimut
naapertuttuunngorsaaneranni aalisartut aammarlutik aalisariuteqassutsikkut
naleqqusartussaapput.Siumup pingaartutut oqaatiginikuuvaa angallatinik
atornikunik nunanit allanit pisilluni angallatitaartarneq misilittagaqarfigineqartoq
aammalu eqqinerluttoqartillugu tamanna piginnittumut aammalu inuiaqatigiinnut
aningaasatigut kinguneqarnerluttartoq.
Maannakkulli tamakkua ilinniarfigalugit
tapersiisarnermi peqqussutip allanngortinneratigut aalisarnermut naleqqusarluni
angallatinik taarsersuinissami periarfissap tamatuma atorneqarnissaanik
aqqutissiuussineq aammalu piniartut aalisartullu qinikkatut inuttaasunik
sullisisut umiatsiaaqqanik tapiiffigineqarnissaanut Naalakkersuisunut
aqqutsissiuunneqarnerat Siumup taperserlugu peqqussutip allannguutissaatut
siunnersuutigineqartut akuerseqataaffigai.
Siumumit arlaleriarluta oqaatigisarparput
pisuussutit uumassusillit nungukkiartuutaanngitsumik atorneqarnissaat
pingaartillutigu, maannakkut assagiarsunnik aalisarnerup tunisassiornerullu
ingerlannerani peqassutsimik misissuineq kigaappallartutut Siumumit
isumaqarfigaarput tamannalu aalisariutit suliffissuillu ingerlatitaanerannut
sunniuteqarnerlunnissaa pinngitsoortinniarneqassappat tamatuma
eqqumaffigineqarnissaa Naalakkersuisunut inassutigalutigu.
Angallatit pitsanngorsarnissaannut
tapersiisarnermi peqqussutip qasukkarneratigut taarsersuilluni
akilersueriaatsimi periusiulersoq, tassalu tunisat %-imik aalajangersimasunik
illikartitsilluni taarsigassaarsianut akiliuteqartarneq, kiisalu
akiitsoqalersimasut akiligassaannik oqilisaassinermik periarfissaqalernikuuneq
- Siumumit pitsaasutut taajumavarput nuannaarutigaarpullu tamakkua allanguuteqartinnagit
atuutsiinnarnissaat Naalakkersuisut aalajngiussimammassuk.
Periarfissarlu manna iluatsillugu ukiup
siuliani eqqartornikuusavut angallatit Q-23-t aammalu Q28-t sananeqaatimikkut
imarsiutikkuminaatsuunerannik pissuteqarnerarlugit piginnittuniit
naammagittaalliuutigineqartut, misissuiffigineqarnissaannik Naalakkersuisumit
neriorsuutaanikuusut sumut killinnersut Siumumiit paaserusupparput.
Inatsisartunut ilaasortap Hans Enoksen-ip
siunersuutaanut ataatsimiititaliap kaammattuuta tassungalu oqilisaassisoqarsinnaaneranik
Naalakkersuisup akissuteqaataa naammagisimaaratsigu innersuussutigineqartut
Siumumiit taperserlugit periarfissap tamatuma aalisartunit atorluarneqarnissaat
inassutigissallutigu.
Naggataatigut, angallatinik akilersuinermi
aammalu tapersiisarnermut akiligassanik oqilisaassisoqartarnera Siumumiit
ilisimaarigaluarlugu Naalakkersuisunut ilisimaqquarput, suli innuttaaqateqaratta,
kilisaatinik ingerlatsinikkut akiliisinnaajunnaarnerup nassatarisaanik,
inuuniarnikku annertuumik akiligassatigut nammakkersorneqartunik,
periarfissarlu manna iluatsillugu Siumup Naalakkersuisunut inassutigissavaa,
akiliisinnaajunnaarnermi akiligassanik tamakkiisumik isumakkeerinnittarneq
qallunaat naalagaaffianni atorneqartoq, naalagaaffeqatigiinnerup iluani, Kalaallit-Nunatsinnut
atortissallugu, periarfissaqarnersoq misissoqqullugu.
Siumumiit taamatut oqaaseqarluta
inuussutissarsiutinut tapiisarnermi peqqussutip allangortinneqarnissaannik
Naalakkersuisut siunnersuutaat akuerseqataaffigaarput, taamatullu isikkoqarluni
pingajussaaneerneqarnissaa inassutigalugu.
Otto Steenholdt, Atassutip oqaaseqartua:
Inatsisartut aalisarnermut, piniarnermut nunalerinermullu ataatsimiititaliaata isumaliutissiissutaa atuareerlugu, Naalakkersuisullu akissutaa aamma atuareerlugu, Atassummiit paasigatsigu isumaqatigineqaqisoq, taamaattumik Atassummiit annerusumik oqaaseqarata siunnersuut ilalersorlugu maanngaanniit nalunaarutigaarput.
Johan Lund Olsen, Inuit Ataqatigiit oqaaseqartuat:
Inuit Ataqatigiit siunnersuutip matuma siullermeerneqarnerani oqaaserisimasavut ataatsimiititaliap isumaliutississusiorneratigut iluarusuutigisatsinnik aqqutissiunneqareersimammata, minnerunngitsumillu Naalakkersuisup akissuteqaammini aamma taakku tapersersornartuutillugit maluginiarlugillu, aatsaaginnaq aamma oqaaseqarfigereermagit, matumani aappassaarinitsinni annertunerusumik oqaaseqarnata nalunaarutigiinnassavara, taasinissami akuerseqataaniaratta.
Bjarne Kreutzmann, Akulliit Partiiat:
Isumaliutissiissummi aammalu maani
oqallisaasup tigoqqinnerani annerusumik assortuussutissaasumik
takussutissaqannginnatta, suliarinerani siullermeernermi oqaatigut
innersuussutigalugit taamatut isikkoqarluni ingerlaqqinnissaa
innersuussutigaarput.
Anthon Frederiksen, Kattusseqatigiit:
Peqqussutip allanngortinneqarnissaanut
siunnersuutip siullermeerneqarnerani Kattusseqatigiinniit oqaaseqaatikka
innersuussutigalugit, aappassaarinninnermi aalisarnermut, piniarnermut
nunalerinermullu ataatsimiititaliap isumaliutissiissutaa, Naalakkersuisullu
akissuteqaataa imatut oqaaseqarfigissavakka.
Nunatta imartaani saattuarniarneq
nutaajuvoq taamaattumik sinerissami qanittumi aaqqissuussivigineqarnissaa
piorsaavigineqarnissaalu pisariaqarpoq. Soorunami pisarineqarsinnaasut annertussusaat
tunaartaralugu. Kisianni ullumikkut sinerissami qanittumi saattuarnermut
tunitsiveqarniarneq piffiit ilaanni annertuumik ajornartorsiutaavoq.
Nioqqutissiorfiusinnaasullu annikippallaarnerat aamma piffiit ilaanni
tunitsiviusinnaasut akuttuallaarnerat ilaatigut pissutaalluni.
Taamaattumik inassutigisariaqarpoq
ajortorsiutit iluarsiivigineqarnissaat suliniutigeqqullugu. Tassami aalisartut
arlaqartut saattuarniarnissaminnut piareersimagaluartut aallartissinnaagaluartullu
ilaatigut tunitsivissaqannginneq pissutigalugu uninngaannarput. Taamaattumik
isumaqarpunga tamanna ajornartorsiut Royal Greenland A/S susassaqartullu
peqatigalugit oqallisigineqartariaqartoq, piaartumillu
aaqqiivigineqartariaqartoq.
Inatsisartuni ilaasortap Hans Enoksen-ip
siunnersuutaanut Naalakkersuisup akissuteqaataa isumaqatigaara. Kisiannili
periarfissaareersup annerusumik atortinneqarsinnaanera Naalakkersuisunut
kaammattuutigissallugu, tassani periarfissap atorluarneqarsinnaanerata
paasisitsiniutigineqarnissaa sulissutigineqartariaqaraluarmat.
Paaviaaraq Heilmann, Aalisarnermut, Piniarnermut
Nunalerinermullu Naalakkersuisoq:
Siullermik partiinut tamanut
Kattusseqatigiinnullu qujassuteqassaanga taama annertugisumik allannguutissatut
siunnersuutinut isumaqataammata.
Taamaattoq Siumup oqaaseqartuanut imatut
akissuteqassaanga:
Siullermik saattussanik sinerissatsinni
peqassutsimik misissuinerit kigaappallaamik ingerlanerat pillugu uparuaaneq,
tusaatissatut tigussavara, aammalu AMIS-imut apuutissallugu. Tassalu
pilersaarutit eqqortumik, imaluunniit sapinngisamik eqqortinniarlugit, aamma
siunissami ingerlasoqarnissaa kissaatigissallutigu.
Q-23-t eqqarsaatigalugit aammalu Siumup
oqaaseqartua oqaraluarpoq Q-28-t, isumaqarpunga Q-30-t eqqarsaatigigai.
Q-23-nut tunngatillugu oqaatigisinnaavara, maannakkut Q23-ni ajornartorsiutaasut
Amutsiviit peqatigalugit ajornartorsiutitai allanngortiterlugit
pitsaaliorniarsarineqarmata. Maannakkullu angallat taamatut misilinneqarluni.
Taanna iluatsippat sinnerinut ajoqutaasut iluarsaassinissaq periarfissaqassaaq.
Q-30-nullu tunngatillugu ilumoorpoq aamma
ajornartorsiutitaqarsimavoq pingaartumik angallatit siulliit sananeqartut
eqqarsaatigalugit. Tassani aamma oqaatigissavara maannakkumut arlaqareermata
taakkunani angallatini teknikkikkut ajornartorsiutaasut pitsaaliorniarlugit
angallatit arlallit iluarsaassiffigineqarsimammata, aammalu massakkut suli
angallatit ilai iluarsaavigineqarlutik. Taamaattumik ajornartorsiutitaat
iluarsaannerat ingerlavoq.
Aamma Siumup oqaaseqartuata oqaaseqarnermini
naggataatungaani taavaa, akiitsullit, tassa avataasiutinik kilisaateqarsimasut,
kisiannili ingerlanerliorneq pissutigalugu aamma akiitsunissimasut, taakku
qanoq iliorfigineqarnissaannut misissuisoqarnissaanik kissaateqarneq. Taanna
kissaat akueralugu misissuiffiginissaa qanoq iliortoqarsinnaanersoq
alakkarterneqassaaq. Kisianni imaanngitsoq neriorsuisunga iluarsineqassasut,
kisianni qanoq ililluni aaqqissuussisoqassanersoq, imaluunniit
ikiorneqarsinnaanersut misissuiffiginissaat neriorsuutigissavara.
Kattusseqatigiit oqaatigaat
saattuarniarnermi tunitsiviit ikippallaartut aammalu siammasippallaartut.
Tassunga tunngatillugu oqaatigissavara maannamut tunitsiviit tamakkiisumik
atorneqanngimmata, aammalu pingaartumik Nuummiittoq eqqarsaatigalugu
atorneqanngivissorluni, Sisimiuniittoq atorluarnerpaagunarpoq
tunitsiviulluarnerpaallunilu.
Kisianni aamma suli tamakkiisumik taanna
tunitsiviunngilaq. Aasianniittoq tunitsiviuvoq kisianni Sisimiunitut
tunitsivigineqarneratut annertutiginngitsumik.
Aalisariatsi una suli nutaajuvoq, aalisartullu sungiussiartornerat
aammalu atortuminnik aammalu saattussanik aalisarnerminni pitsaanerpaanik
tunisassaminnik immikkoortitsisarsinnaanerat, uumatillugillu pitsaannginnerusut
imaanut nakkarteqqinneqartarsimaneri eqqarsaatigalugit misilittakkat
pitsanngoriartorput.
Taamaammat angallatit tunitsiviillu
atorluariartornerat suli ingerlavoq pitsanngoriartorlunilu.
Oqaatigiinnarusupparalu aallaqqaataaniilli suna tamarmi aaqqereerluni aalisariaaseq
nutaaq atulernavianngimmat, taamaanngisaannarsimavoq aamma siusinnerusukkut.
Aallaqqaataani ajornartorsiuteqassaaq taakkualu piffisap ingerlanerani
aalisartut, tunitsiviit aammalu angallatitaarniarnermi atukkiisartut
suleqatigillutik ingerlaavartumik iluarsiartortarpaat, aamma iluarsiartorput.
Soorlu oqartunga inuussutissarsiutinut tapersiisarnermut maleruagassat
pissutsinut aalisarnermut inuussutissarsiuteqarnitsinni sukkulluunniit atuuttut
naleqqussarneqartuartussaasut. Taanna aamma taamatut ippoq aamma
saattuarniarneq eqqarsaatigalugu.
Taamaalillunga naggataatigut
oqaatigiinnassavara Naalakkersuisut allannguutissatut siunnersuutaanut partiit
tamaasa aamma Kattusseqatigiit qutsavigissagakkit taama annertutigisumik
tapersuimmata.
Lars Karl Jensen, Siumup oqaaseqartua:
Siullermik qujavunga Paaviaaqqamut
tungaattoorsimagakkit Q-28-mik allassimagakku kisianni Q-30-upput.
Taakkua angallatit piginnittuminnit
imarsiutikkuminaatsuunerarlugit naammagittaalliuutigineqarnerat aallaavigalugu
siunnersuuteqarnikuuvunga, misissuineqarnissaanik kissaateqarlunga. Aammalu
neriorsuutigineqartut malillugit oqaatigineqarnikuuvoq taakkua
misissorneqartussaasut. Kisiannili maannakkumut paasisakka najoqqutaralugit
Amutsiviit sanaarigamikkik imminnut illersorlutik oqaatigaat, ajoquteqanngitsut
taamaatumillu aamma iluarsineqarniarunik ESU-minngaaniit atorluni
iluarsaanneqarsinnaasut. Taakkua kingunerluutigisaat maannakkut qularutissaanngitsumik
inuttaasa naammagittaalliortarnerisigut paasiniaasarnerisigullu paasineqarput.
Imaappoq akissaajaatigisaqattaarpaat.
Taamaattumillu uagutsinnut soqutiginassaaq paasissallugu sannamikkunukua
ajoquteqartut? Ajoquteqarpatalu piginnittoq pisuusimanavianngilaq tassani.
Umiatsialiortoq pisuusimassaaq. Annilaangagaara taamatut ESU-mit atorniaqattaaraluarunik
erniinnannguaq imminnut akilersuinermi artukkissasut,
angallataaruttariaqassallutik.
Ukununnga saattussat
mianersorfigisariaqarnerannut oqarninni aallaavigisannik ilanngussilaassaanga.
Maannakkut ineriartortitsinermi aalisarnermi suliffissuarnilu
ineriartortitsineq nalunngiluarput tamatta pitsaasumik ingerlasoq aammalu
aalisartortatsinnut sulisartunullu qujanartorujussuusoq. Kisianni piffiit
aalajangersimasuinnaat aalisarfigineqarpallaalernermikkut saattuaqassusiat
allanngoriartorpoq. Nalunngilara pilersaarusiortoqartoq avataasiornermik
ingerlatsilerniartoqartoq, kisianni aamma piffiit ataasiinnaviit
aalisarfigineqarpallaarlutik angallatit mikisut ukiukkut avalallutik
aalisarsinnaannginnerat uani eqqarsaatigisariaqarpoq. Minnerunngitsumillu aamma
illoqarfiit allat saattussanik peqarfioreersut ilsimasavut aamma
aallunniarneqarnissaat tullinnguuttussaassaaq, nunguutisaqattaarluta
ingerlassanngikkutta.
Ukua akiitsullit taasakka qallunaat
naalagaaffeqatiginerata iluani akiitsuminnik oqilisaaffigineqarsinnaanersut,
tassa gĉldsanering-imik taallugu, akiitsuerutiivillugit, nunatsinniitillutik
periarfissaqanngitsut nalunngilakka. Aatsaat Danmark-imut nuukkunik,
qallunaanullu innuttaalerlutik, tassannga sullinneqarsinnaapput. Aammalu
akiligassarpassualik inuk Danmark-imut nuunnissaminut akissaqarnavianngilaq.
Taamaattumik uani qanoq iliuuseqarfigineqarsinnaanerat eqqumaffigineqassappat
Naalakkersuisuninngaanniit qujariiginnassaanga.
Anthon Frederiksen, Kattusseqatigiit:
Nalunngilara saatuarniarneq nutaajusoq
aammalu tunitsiviit sinerissamiittut taakkuusut pingasut. Kisianni
saqqummiussininni tunitsivissaaqinermik oqalunninnut tungatillugu
erseqqissaatigerusuppara, taamatut aalisartut arlallit
tunitsivissaqannginnermik pissuteqarnerat tassaammat aalisarfinninngaanniit
tunitsivigineqartut massakkut ungasissorujussuummata.
Assersuutigisinnaavara 1980-ikkut
qiteqqunneranni Uummannami qaleralinniarneq aallartisarneqaruttulermat,
taamanikkut tunitsiveqartitsisoqartarpoq umiarsuarnik, assut aalisartunit
iluarineqartumik. Immaqaana saattuarnermi aallartisarnermi taamatut
umiarsuarnik tunitsiveqartitsineq, iluaqutaalluartumik atorneqarsinnaasuuppat
eqqarsaatinut ilanngunneqartariaqaraluartoq.
Tassami aalisartuulluni
ilungersunarunaqimmat saattussat sumiittut nalunngikkaluarlugit, kisiannili
tunitsiviit ungasippallaarnerat aalisarfinnut annertuumik aporfiusarmat.
Periarfissat umiarsuarmik tunitsiveqarsinnanermut tunngasut
misissorneqarsinnaanerat isumaqarpunga iluatinnaateqartoq, pingaartumik
taamatut saattuarniarnerup aallartisarneqarnerani. Tassami soorlu aamma Lars
Karl-ip oqaatigigaa, piffiit ataasiakkaat annertuumik sammineqarneri aamma
ulorianartorsiortitsinermut ilaasinnaammata. Taamaattumik sapinngisamik
siammasissumik sinerissamik saattuarniarneq ingerlanneqartuuppat aammalu
puttasumik tunitsiveqartitsineq ilaatigut atorlugu qularutiginngilara, taassuma
iluatsittumik ingerlanneqarsinnaanera.
Tassannga erseqqissaateqarniaannarlunga
maanga qaqeqqilaarpunga.
Bjarne Kreutzmann, Akulliit Partiiat:
Oqaasissakka saattuanut tunngassuteqarput,
taakkua aamma sammineqarmata. Tassa oqaluttup kingulliup oqaasiinut
assingulluinnarput.
Aalisanermut piniarnermullu
ataatsimiititaliap isumaliutissiisutaanut tunngatillugu oqallinnitsinni
saattuat tikinneqarmata, taamanikkulli tassa upernaaq ataatsimiinnitsinni,
tikkuarsimavara saattussat piumasaqaateqarfigineqarnerat nutaatut tunisassatut
pissutigalugu, taava puttasunik, taamani oqarpunga nikittartunik, tuniniaaveqarnissaq
pisariaqartinneqarsorinaraluartoq.
Taasuma kingornatigut kisianni annerusumik
tusarfiginikkuunngivinnguatsiarakku paaserusunnassaaq
Naalakkersuisuninngaanniit qanoq isumaqarfigineqarnersoq. Saattussanik
tuniniaaviit nikittartut, tassami piumasarineqarmat saattussat suli uumasut
tunineqassasut. Taamaattumik tuniniaaviit ungasissut atorsinnaagunanngillat
annerusumik.
Paaviaaraq Heilmann, Aalisarnermut, Piniarnermut
Nunalerinermullu Naalakkersuisoq:
Naatsunnguamik akisinnaavakka
apeqqutigineqartut oqaaseqaatigineqartullu.
Siullermik Siumup oqaaseqartuata Lars Karl
Jensen-ip oqaatigisaanut tunngatillugu, Q-23-t Q-30-llu Naalakkersuisoq
Amutsivinnut akisussaasoq, taanna oqaloqatigerusussavara taakkua qanoq
iliorneqarsinnaanersoq, immaqalu aamma Naaminersornerullutik Oqartussat
Amutsiviillu akornanni aaqqiissutissamik immaqa nassaarniarneqarsinnaasoq,
taannalu Naalakkersuisumut tassunga akisussaasumut
oqaloqatiginnissutigissavara.
Taava saattuaqassuseq eqqarsaatigalugu suli
misissuinerit ingerlapput. Ukiarmanna Maniitsup avannaa-tungaani Kangaatsiap
eqqaanilu misileraanerit ingerlanneqarput, paasisakka maannakkut malillugit
pitsaasuupput. Taamaalilluni siammasissumik aamma saattussanik atuineq, aammalu
nikerartumik, annertusiartortumik ingerlalertussaasoq naatsorsuutigaarput.
Aammalu angalaninni, pingaartumik
Qeqertarsuami paasisakka ilaatigut imaapput, aalisarfiit ungavariartuaarluni
ingerlanneqartartut, aammalu aallaqqaataaniit aallarteqqilluni aamma
aalisarfiginikuusat aalisarfingisimaariarlugit, aamma saattuaneqqittarnerat
pissutigalugit aamma aalisarfigeqqinneqarsinnaasut. Taamaattumik akullaraangata
ungavaqqillutik nikittartut taakkua aamma kingornatigut
uterfigeqqissinnaasaraat, taamaalilluni aamma nunguvissorlugit nunguvissorneqartarsimanngillat
sumiiffinni ataasiakkaani, soorunami nikissutissaqaramik.
Taava Kattusseqatigiit aammalu Akulliit
Partiiata ujartugaat tassa tunitsiviit nikittartut. Tassa massakkut tunitsiviit
pingasut saniatigut nunamiittut, Qeqertarsuup Tunuani nikittarlutik
tunitsiveqartitsineq ingerlanneqarpoq namminersortunit ingerlanneqartumik.
Taanna iluarisimaarneqarpoq Qeqertarsuarmiunit aammalu tunioraasunillu
tassunga angallammut. Taamaattumik nikerartunik tunitsiveqartarneq tassani
namminersortut aallaavigalugit ingerlareerpoq.
Kisianni misileraalluni
aalisartitsinialeratta pilersaarusiornermi Kangaatsiap eqqaani ajornartorsiutaasimavoq,
tunitsivimmik angalasumik pissarsiniarneq. Taamaattumik misileraaneq Kangaatsiap
eqqaani imatut ingerlanneqarpoq, Aasiannut aqqut takilaartukasik atoraluarlugu
tunisiartortariaqartarluni. Aamma taamaappoq Maniitsup avanaa-tungaani
misileraanermi.
Kisianni taakkua misileraanerit
tunngavigalugit naliliinerit pisussaassapput, misileraaneq naammasippat.
Tamatuma kingunerisaanik qanoq iliortoqarumaarnersoq nalilersorneqartariaqartussaavoq,
kisianni soorunami soorlu oqartunga misileraaffiit maannakkut
misilittagaqarfiupput manna tikillugu pitsaasumik. Taamaattumik aamma
uninngaannartoqarnavianngilaq paasereerlugu aalisakkanik imaluunniit
saattuanik peqarfiusut, tunitsivissaqarnissaalu pissusissamisuuginnarpoq.
Taamaatumik ajornartorsiut milliartussaaq
soorlu oqareersunga aalisariaaseq una nutaajuvoq, piffissap ingerlanerani pitsanngoriartuaassaaq.
Finn Karlsen, ataatsimiinnermik aqutsisoq:
Taamaalilluni ullormut oqaluuserisassaq
immikkoortoq 38, aalisarnermut, piniarnermut nunalerinermullu tapersiisarneq
pillugu Inatsisartut peqqussutaata nr. 8 ulloq 31. oktober 1996-imeersup
allanngortinneqarneranik Inatsisartut peqqussutissaannut siunnersuut,
aappassaaneerneqarnera naammassivoq.
Taava apeqqutigissavara siunnersuut taama
isikkoqarluni pingajussaaneerneqarnissaanut isumaqataasut nikueqqullugit. 30
(najuuttut tamarmik).
Oqaluuserisaq naammassivoq.