Oqaluuserisassani immikkoortoq 10 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Ruth Heilmann, siunnersuuteqartoq, Siumut:
Qujanaq. Inatsisartut ukiakkut
1998-mi ataatsimiiinnissaannut oqaluuserisassatut siunnersuutigaara nunarput
tamaat isigalugu pilersaarusiornermik ataqatigiissaarisumik
ataatsimiititaliamik pilersitsisoqarnissaanik, tassa
Landsplanplanlĉgningsudvalgimik. Tamanna pisariaqarsoraara siusinnerusukkut
uanga nammineq ilisimaqqissaanngikkaluakkannik ataatsimiititaliamik taamatut
ittumik iluaqutaasimasumik ingerlasoqarsimagaluarmat atorunnaartumilli.
Maani Inatsisartuni suleriaaserput
atatsimiititaliallu suliarisartagaat akisussaaffiisalu agguataarnerat
suliassaallu naapertuuttuussorinaraluartut aammalu Aningaasaqarnermi
Ataatsimiititaliap taamatut aningaasartuutissanik agguaataarinermik
suliaqartarnera iluarinartuusoq nalunngikkaluarlugu taamaattoq suli
ullumikkornit pitsaanerungaartumik nalilersuisoqarluartarnissaa pingaaruteqarluinnartutut
isigileraluttuinnarpara. Pilersaarusiorneq eqqarsaatigalugu aningaasat
atugassat taamatut killeqartartigimmata amerliartoratillu.
Oqaatigineqartarpugut nunarput
tamaat isigalugu qinikkatut Inatsisartuni, naalakkersuisuni KANUKOKA-milu
sulissisussaasugut, uanilu naatsorsuutigaara siunertaq taanna pigalugu
selskabini kattuffinniluunniit qinikkatut inissisimanermi aamma anersaarineqartariaqartuusoq. Ullumikkut killiffigisatsinni tamanna
taamaappiarnersoq kialluunniiit nalilersorsinnaavaa uangalu nalilerusuppara
oqimaaqatigissaarisoqanngippallaartoq. Qinikkat ilaatigut oqartarput pissakinnerusut
isiginiarneqaqqullugit taamaattariaqarneralu isumaqatigiissutigisarparput.
Piviusumilu ilumut taamaattoqarnersoq nalilersortariaqarpoq, tassami maannakkut
kommunit pissaqarnerit suliffinnik nutaanik pilersitsivigineqarnerpaajuarmata
piugorneqakkajuppuli kommunit
pissakinnerusut allaat pissakkilliartortitaanerannik
kinguneqaleraluttuinnartumik.
Taamatut nalilersuisartuutitat
politikkikkut imaattariaqarsinnaassaaq attuumassuteqanngitsunik atorfilinnik
katitigaasinnaasoq imaluunniit politikkerinittaaq katitigaalluni, tamannalu
politikkikkut oqallisigineqarsinnaavoq qanoq iliortoqaruni
ajunnginnerpaassanersoq.
Isumaqarpungali naleqqunnerpaamik
inuttalersorneqarnera qanorluunniit siunnersuusiiorfigineqarsinnaassasoq
nalilersuilluartoqareerneratigut, uanili pingaarnepaasorinarpoq nunatta ineriartortinneqarnerani
innuttaasut naligiissumik iliorneqarnissaat, oqartussaassuseqarnerat inuttulli
allatulli naleqassuseqarnerat aamma qiviallaallugu nunatsinni tamatta
najugaqartuusugut eqqarsaatigaluta atugarisatsigut naligiinnerusumik
naammaginarnerusumillu atugaqarnissarput anguniartariaqalermat. Tamanna
tassuunakkut aqqutissiuunneqaqqullugu siunertaqartillugulu una siunnersuutitut
aalajangiiffigisassatullu ingerlatikkusuppara neriuutigalugu
tigulluarneqarumaartoq.
Jonathan Motzfeldt, Naalakkersuisut Siulittaasuat:
Aallartitsinnanga oqaatigissavara
nalunaarusiaq annertoqisoq innersuukiga aamma qularinnginnakku Inatsisartut
atuarluaqqissaarsimagaat soqutiginaateqaqimmat, taamaattumillu saqqummiussassama
ilaa pingaartumik naggataa tungaaniinnerusoq naalisalaarsimavara, uanili
aallartinnerani naalisaanngikkallarlunga.
Matumuuna naalakkersuisut
sinnerlugit Nuna tamakkerlugu pilersaarusiorneq pillugu nassuiaat
saqqummiutissavara.
1987-ip kingorna piffissaq aaqqissuusseqqiffiusutut
taagajuttarparput. Piffissami tamatumani angallannikkut kiisalu pilersuinikkut
attaveqaateqarnikkullu atortut annertuumik aaqqissuuteqqinneqarput,
taakkununnga ilaapput KNI, umiarsuartigut usinik assartuinermi containerersulerneq,
aalisarnikkut naammassisaqarsinnaanermik naleqqussaaneq aammalu nunap
immikkoortuini suluusalinnut mittarfiliortiterneq.
Suliat tamakku annertuut tamarmik
immikkut Inatsisartunut saqqummiunneqartarput, tamannalu pissutigalugu 90-ikkut
ingerlanerini naalakkersuisut ataasiaannarlutik nuna tamakkerlugu
pilersaarusiorneq pillugu nassuiaammik saqqummiussaqarput, tassa 1994-imi nuna
tamakkerlugu pilersaarusiorneq pillugu nassuiaat 1960-ikkunniit ullumikkumut
inuiaqatigiit pilersaarusiorneqarsimanerannik, kiisalu siunissami
inuiaqatigiit ineriartornerisa qanoq aaqqissuunneqarnissaannik imaqartoq.
Taavalu nuna tamakkerlugu
pilersaarusiorneq pillugu nassuiaatip immikkortua siulleq pillugu
oqaatigissavara sanaartugassanik pilersaarusiortarnerup nunaminertallu atorneqartarnerisa
qanoq ingerlasimanerannik taana imaqarmat.
Aaqqissuussaanerit
naleqqussarneqarnerisa annertuut saniatigut 90-kunni nuna tamakkerlugu
pilersaarusiortarneq aamma makkuninnga ilaqarpoq,tassa:
illut illoqarfiillu ilaasa
eriagisariaqartunik pigisaqarnerisa nalunaarsorneqarnerat,
Namminersornerullutik Oqartussat
suliffeqarfiutaasa qassiit Nuummiit sinerissami illoqarfinnut
nutserneqarnerat,
Nuummi Sisimiunilu illoqarfiit
ineriartortinneqarnerinut nunaminertat nutaat ilanngunneqarnissaasa
piareersarneqarnerat,
Kangerlussuarmi
sakkutooqarfiusimasup sakkutuujunngitsunit atorneqalernera,
kiisalu nunami inuussutissarsiutit
nutaat ineriartortinneqarnerat.
Naalakkersuisut ilisimavaat nunami
inuussutissarsiutit ineriartortinneqarnerannut atatillugu inuiaqatigiit iluanni
sanaartornermi najoqqutassanik nunamut tamarmut atuuttussanik aalajangersimasunik
siunnersuusiortoqarnissaanik pisariaqartitsisoqalersinnaasoq.
Kommunini pingasuni mikisuni, Kangaatsiami,
Qaanaami Ittoqqortoormiinilu kommuninut pilersaarusiornermi
Namminersornerullutik Oqartussat ikiuunnerisigut naatsorsuutigineqarpoq 1998-ip
naalernerani kommuninut pilersaarutit siullermeerutaasut kommuninut tamanut
atuuttussat akuerisat saqqummiunneqarsinnaajumaartut.
Taamaattorli kommuninut
pilersaarusiorneq ingerlaavartarpoq, kommuninullu pilersaarutit
nutarterneqartuarnissaat pingaaruteqarpoq. Taamaammat naalakkersuisullu
kaammattuutigaat kommunit kommuninut pilersaarutip nassuiaatitaa ukiut taamaasa
naatsunnguamik pilersaarutinut tunngasumik nassuiaateqarnermikkut
nutartertassagaat, tamatumalu peqatigisaanik naalakkersuisut kissaatigaat
aningaasaliinissamut immikkoortortanullu assigiinngitsunut pilersaarusiornikkut
Namminersornerullutik Oqartussat kommunillu akornanni pilersaarutit pillugit
ingerlaavartumik oqaloqatigiittarneq ineriartortinneqassasoq.
Nunaminernik Inniminnikkanik
Nalunaarsuiffik, NIN, kiisami 1997-imi januarip aallaqqaataani
ingerlanneqalerpoq, maannalu nunaminertat atugassiissutigineqarsimasut nutaat
1.000-it missaat nalunaarsorneqarsimapput.
Taavalu illuutit pillugit tamanut
saqqummiussisarneq pillugu inatsisisatut naatsorsuutigineqatoq naapertorlugu
oqaatigissavara nunaminertat atorneqarnerat pilersaarusiorfigineqarnerallu
pillugu malittarisassat iluarsaanneqarnissaata pisariaqarpat
piviusunngortinnissaa naalakkersuisut piareersimaffigigaat, tamatumalu
peqatigisaanik malittarisassat allat tamatumunnga attuumassuteqartut
allanngortinneqarnissaat pillugu siunnersuutinik saqqummiinissaminnik
piareersimallutik.
Nuna tamakkerlugu pilersaarusiorneq
pillugu nassuiaatip immikkoortortaata aappaa tunngavigalugu innuttaasut amerliartornerat nunamut
agguataarneranik nassuiaammik imaqarpoq.
Naalakkersuisut maluginiarpaat
1990-imi nuna tamakkerlugu pilersaarusiorneq pillugu nassuiaammi illoqarfinni
sisamani Qaqortumi, Nuummi, Sisimiuni Ilulissanilu innuttaasut annertuumik
eqiterunnerat tikkuarneqartoq 1990-ikkut affaani siullermi unittoq, tamatumali
kingorna illoqarfinni annerpaani pingasuni Nuummi, Sisimiuni Ilulissanilu
aallarteqqittoq - naak 80-ikkut naajartorneranni amerliartornermit
annikinnerugaluartumik.
Tassa illoqarfiit mikisut
akunnattullu inukilliartorput illoqarfiillu angisuut pingasut taaneqartut
inuttusiartorlutik.
Nunaqarfinni inuit amerlassusiat
taamaaginnarpoq, innuttaasunullu tamarmiusunut naleqqiullugu inuttussusiat
appariartulaarluni. Taamaattorli nunamut aggorsimanerisa takutippaat Uummannap
Upernaviullu kommuniini nunaqarfimmiut amerliartupiloortut qaleralinniarnerup
ingerlalluarnera pissutigalugu, tamatumalu peqatigisaanik kommunini
qangaaniilli nunaqarfittuujusuni Nanortalimmi, Qaanaami Ammassalimmilu
nunaqarfimmiut ikileriarujussuarsimasut takuneqarsinnaavoq.
Pissutsit tamakku inuiaqatigiit
siunissami sanaartugassatigut aaqqissuunneqarneranni eqqumaffigisariaqarpavut.
Ajoraluartumik innuttaasut pillugit
immikkoortoq inuiaqatigiit sanaartugassatigut qanoq
aaqqissuussivigineqarsimanerata nunamut qanoq aggulussimanera pillugu nassuiaammik
ilanngussivigisinnaasimanngilarput. Taamaammat naalakkersuisut 1999-imut Nuna
tamakkerlugu pilersaarusiorneq pillugu nassuiaatissamut ukiunut tallimanut
takussutissaq ilannguniarpaat, kommuninut tamanut innuttaasut
allanngoriartornerat kommunit Namminersornerullutik Oqartussallu sanaartukkanut
aningaasaliisarneranni allanngoriartornermut sanilliussivigalugu.
Nuna tamakkerlugu pilersaarusiorneq
pillugu nassuiaatip immikkortuisa pingajuanniippoq illoqarfiit nunaqarfiillu
avataanni nuna sanaartorfigineqanngitsoq pillugu pilersaarusiornissamik
pisariaqartitsineq, nassuiaammi pingaarnerpaatut samminearsimasoq.
Ukiuni makkunani illoqarfiit
nunaqarfiillu avataanni nunaminertat sanaartorfigineqarsimanngitsut
soqutigisanut assigiinngitsunut atorneqarnissaat kissaatigineqaraluttuinnarpoq,
taamatuttaaq sunngiffimmi sammisassanut, piniarnermut, takornariartitsinermut,
nunalerinermut, atortorissaarutinut, aatsitassarsiornermut ikummatissanillu
ujarlernermut sammisinneqarlutik. Tamatuma kingunerisaanik soqutigisat
assigiinngitsut imminnut aporaattarput, tassa ilaatigut soqutigisaqartut
assigiinngitsut atuerusuttut akornanni, ilaatigullu atuinngikkaluarlutik
soqutiginnittut, tassa sanaartorfigineqanngitsunik sernissuerusuttut, soorlu
kulturikkut, pinngortitami avatangiisitigullu eriagisaqariaqartunik
soqutisaqartut akornanni.
Taamaammat kommunit nunaminertat
illoqarfiillu nunaqarfiillu avataaniittut pillugit pilersaarusiortarnerit
ikittuinnaapput sunniuteqarpiaratillu ullorlu manna tikillugu nuna
atorneqanngitsoq pillugu pilersaarut ataasiinnaq naammassineqarsimavoq
akuerineqarlunilu, tassalu Maniitsup kommuniani Apussuarni sisorartarfimmut
tunngasoq.
Nassuiaammi suliassap tamatuma suliarineqalernissaa
pillugu periarfissat qassiit tikkuarneqarput, soorlu:
! illoqarfiit
nunaqarfiillu avataannit sanaartorfiusimanngitsut pillugit kommunit pilersaarusiornissaminnik
pisussaaffeqalernerisigut,
! tamakku
pillugit oqartussaanerup sapinngisamik annersaata kommuninut tunniunneqarneratigut,
! tusarniaanerit
pisariillisarnerisigut nunaminertat aqunneqarnerata pitsaanerulersinneqarneratigut,
! tunngavissanik
aamma paasissutissanik oqartussaasut kommuninut ingerlatseqqittarnerata
ataatsimoortinneqalerneratigut.
Taama ataatsimoortitsilerneq
assersuutigalugu Namminersornerullutik Oqartussat ataatsimut nunap sananeqaatai
atorneqarneralu pillugit paasissutissiisarfimmik GIS-eqalersinneqarneratigut
pisinnaavoq, nunap assingi qarasaasiamut immiussat atorlugit paasissutissat
nunaminertanut aalajangersimasunut tunngassuteqartut tamaasa
saqqummiunneqarsinnaanngornerisigut.
Kiisalu illoqarfiit nunaqarfiillu
avataanni nunaminertat sanaartorfigineqanngitsut pilersaarusiorfigineqarnerat
inuiaqatigiit suliassaraat nutaaq, taamaaliornikkut
naatsorsuutigineqartariaqarpoq kommunit oqartussaasullu qulliunerusut
allaffissornerisa annertusinissaat. Ullumikkut Naalakkersuisut
aalajangersimasunik inerniliussaqanngillat, akerliannilli isumaqarlutik
suliassap qanoq pingaartinneqartiginissaa oqallinneq maanna naalakkersuisut
aallartitaat tunngavigalugu aalajangerneqassasoq.
Taama oqaaseqarlunga 1998-imut nuna
tamakkerlugu pilersaarusiorneq pillugu nassuiaat Inatsisartunut
oqallisigisassanngortippara.
Myrna Lynge, Siumup oqaaseqartua:
Nuna tamakkerlugu pilersaarusiorneq
pillugu nassuiaat naalakkersuisut saqqummiusaat, annertoqisoq,
suliarilluagaaqisoq paasinarluartorlu misissorluareerlugu Siumumiit imatut
oqaaseqassaagut:
Nassuiaat taammaattoq siornatigut
ataasiaannarluni 1994-mi saqqummiunneqarsimavoq. Siumumi nuannaarutigalugu
maluginiarparput siunissami ukiut tamaasa saqqummersittalernissaa
siunniunneqarsimammat. Siumumi isumaqarluinnarpugut, soorluttaaq
nassuiaammi taaneqareersoq pingaaruteqarluinnartoq makku
eqqummaariffigineqassasut nalunaarusiorneqartuartassallugillu, soorlu illut
illoqarfiit ilaasa eriaginartinneqarnerat - nunami inuussutissarsiorfiit nutaat
ineriartortinneqarnissaat il.il.
1990-sikkunni ineriartornerup
sukkasoorujussuunerata kingunerisaannik maannamut nalunaarsuisarneq
akulikinnerusumik - tassa ukiut tamaasa - ingerlattalerneqartariaqarpoq.
Nassuiaammi ataasiakkaat naatsumik
Siumumiit oqaaseqarfigissavavut.
Siumumi isumaqarpugut kommunit ataasiakkaat
akisussaaqataanerat pisussaaqataanerallu annertusarneqartariaqartoq kisiannili
kommunit mikisut akissaasuasut sulisutigullu peqataasinnaanngitsut
Namminersornerusunit tapersersorneqartariaqartut sulisutigut aningaasatigullu
eqqumaffiginerisigut. Tamatumunnga ilanngullugu kommuunit akissaqarniarnerminni
ajornartorsiortut pillugit aningaasaliissutit nutaamik naalakkersuisunit
nalilerniarneqartut Siumumit tapersersorpavut.
Nunarput taamak angitigisoq
isorartutigisorlu pilersaarusiorluakkamik iliuuseqanngikkuta innuttaasut
suliffeqarfiillu eqqarsaatigalugit kukkuluttorsinnaaneq qanitsuararsuuvoq,
taamaatumik uteqattaarinngikaluarluni oqaatigiinnarneqarsinnaavoq nuna
tamakkerlugu pilersaarusiornerup qanoq pingaaruteqartigineranik.
Nuna tamakkerlugu
pilersaarusiornermi pingaaruteqarluinnarpoq inuit nuttarnerisa malinnaaffigilluinnarnissaa
aamma suliffiit piorsarnerini inuttaasut nunattalu pissarititai uummaatsut
uummassusillillu ataqatigiissilluarnissaat pingaaruteqarluinnarpoq.
Nalunaarusiami ersarissumik
oqaluttuarineqarpoq illoqarfiit aalajangersimasut alliartortut allallu
kigaatsumik ineriartortut sulilu allat milliartorlutik, taammaatumik
qularnanngilluinnarpoq naatsorsuutigisariaqartoq mittarfiliortiternerup
aammattaaq inuit nuttarnerat suliffissanillu pilersitsiortornerannut
sunniuteqaqataanngitsoornavianngitsoq, taammaattumik nuna takkerlugu ukiut
tamaasa nalilersuisarnissaq suli pingaaruteqaraluttuinnassaaq.
Ilanngullugu Ruth Heilmann-ip
siunnersuutaa Siumumiit taperserlugu, Naalakkersuisut piumaffigissavagut
ataatsimiititaliorsinnaaneq misissoqqullugu.
Taamatut naatsumik oqaaseqarluta
Siumumit Naalakkersuisut nuna tamakkerlugu pilersaarusiorneq pillugu
nassuiaataat qutsatigalugu tusaatissatut tiguarput sulisullu pilersaarusiornerup
ingerlattuarnissaanik sulilluarnissaannillu kissaallugit.
Peter Ostermann, Atassutip oqaaseqartua:
Nuna tamakkerlugu pilersaarusiorneq Naalakkersuisunit saqqummiunneqaqqammersoq imartoqaaq soqutiginaqalunilu.
Piffissaq eqqortoq atorlugu
Naalakkersuisut saqqummiussaqarput, tamannalumi saqqummiussami aamma
erseqqippoq, taaneqarlunilumi.
Ukiuni qaangiuttuni ingerlatsivinni
annertuunik allanngortiterisoqarpoq tunisassiorfinnillu naleqqussaaneqarluni.
Maanna nunap immikkoortortaani mittarfiit siulliit atulereerput, sinnerilu
malinnaassallutik. Atassummiit
qularinngilarput tamarmik atuutilerunik nunap immikkoortortaani
arlaqartuni piorsaanermut annertuumik sunniuteqarluarumaartut.
Nassuiaatip immikkoortortaa
siulleq annertunerusumik sammissallugu Atassut-miit pisariaqartinngilarput, ullumikkumut ineriartortitsisimanermut nassuiaataammat, erseqqissaasoq
ullumikkumut annertunerusumik ineriartorfiusut tassaanerusimasut illoqarfiit
annerit sisamat aammalu nunap immikkoortortai qaleraleqarfiulluartut.
Soorunami piorsaaneq ingerlajuassaaq,
isumaqarpugulli komuunit pineqartut ineriartornerup ingerlateqqinnissaani
peqataanerunissaminnut
periarfissarissaarnerusut, peqataanerusariaqartullu. Isumaqarpugut
komuunit aningaasarissaarnerusut ineriartornerup ingerlateqqinnissaani
peqataanerunissaannik
pisussaaffilerneqarnerusariaqartut.
Soorunami aammattaaq aatsitassarsiorluni uuliasiorniarlunilu suliniutaasut ingerlatiinnarneqassapput.
Kommunit aningaasaqarnermikkut ajornartorsiulernerminni
amerlaqisutigut annertuunik ajornartorsiuteqalertarnerat
misilittagaqarfigeqaarput, siunissami sapinngisaq tamaat pinngitsoortittariaqagarput.
Tamanna tunngavigalugu naalakkersuisunut nalilersoqquarput piffissanngunnginnersoq
nunat immikkoortortaani ineriartortitsinissaq
pillugu
inatsiseqalertariaqannginersugut, isumaqaratta taamaaliornikkut nunat immikkoortortai
aningaasaqarnermikkut sanngiillisimasut aningaasarsiornikkut
aaqqiiniarnissamut pitsaasumik periarfissinneqassassut, siunissamilu
ajornartorsiutinik pinaveersaartitsinissamut iluaqutaasinnaasumik.
Imaatigut angallateqarnikkut ukiuni
qaangiuttuni annertuumik ineriartorneqarsimavoq. Angallatit
sukkatsikkaluttuinnarput sivikitsuaqqamillu
sunarujussuaq tikinneqarsinnaalerpoq. Tamanna uumasoqarnermut
timmiaqarnermullu kingunerlukkiartorpoq iliuuseqarfigisariaqartoq.
Taamaattumik Atassut-miit
Naalakkersuisunut inassutigissavarput, illoqarfiup avataani pilersaarusiortarnermi
eqqissisimatitsivinnik pinngitsoorani pilersitsisoqartalernissaanik piumasaqaatigineqartariaqalissasoq
piumasaqaatigineqassasoq, pinngortitamik mianerinninnerulernissaq
pisariaqalermat nujuartanik tuttoqarfinni eqqissisimatitaqarnissamik
piumasaqarneq naammakkumaartutut isigigatsisu.
Oqaaseqarnitsinni komuunit
aningaasarsiornikkut pilersaarusiugaanikkullu kinguariartulersimasut
annerusumik samminerussavavut.
Nassuiaammi ersarippoq
allanngortiterinerujussuit
naleqqussaanerillu kingunerilersimagaat komuunit arlaqartut
aningaasarsiornikkut
nukilaalliartornerat suliffissaaleqinermik annertusiartortumik
kinguneqaleriartortoq, taamaalillutillu nammineersinnaanerat
killeqaleriartorluni.
Tamanna
Atassut-miit ilimagereersimavarput taamaattumillu nunami suliffissanik
nutaanik pilersitsiniarnermi atugassarisaasut pitsaanerunissaat qangalili ilungersuutigisarsimavarput.
Maannakkut tamanna nuannaarutigeqisatsinnik pisussanngorpoq, qularinngilarpullu
komuunini aningaasarsiornikkut sanngiillisimasuni aamma iluaqutaajumaartoq.
Tamannali kisimi naammanngilaq qanorli
iliussaagut?
Ingerlaqqinngitsinni
ersarissalaarusupparput nuna tamakkerlugu pilersaarusiortarneq inuiaqatigiittut ineriartornitta
aqunnissaannut sakkussat pitsaanersarimmassuk, taannami aqqutigalugu
nunap immikkoortortaani assigiingitsuni ineriartorneq aqunneqarsinnaavoq-
aqunneqartariaqarlunilu.
Atassut-mi tamakkiinerusumik
aningaasaqarnitsinullu isiginiarnerulluni isumarput naapertorlugu
imaaliortariaqarpugut:
1. komuunit
aningaasarsiornikkut sanngiillisimasut peqatigalugit piaartumik
pilersaarusiorneq aallartinneqassaaq, isumaginninnermi aningaasartuutit ilaasa Asulisinneqarnerulernissaat@ anguniarlugu komuunimilu periarfissaasut
aallaavigalugit takornariartitsinikkut,
allatigullu tunisassiornikkut, soorlu Nanortalimmi puisip neqaanik
tunisassiornissamut suliniutaasoq
2. timmisartunut
mittarfissuit, Kangerlussuup Narsarsuullu siunissaat piaartumik aalajangerneqassaaq
siunissami qanoq inissisimanissaat pilersaarusiorneqalissammat
3. sanaartornermi
atortussanik sunik sumilu tunisassiornissaq piaartumik pilersaarusiorneqassaaq
soqutigisaqaqatigiit komuunillu suleqatigalugit
4. aalisakkanik
inereerlugit tunisassiornerunissaq anguniarlugu tunisassiortut peqatigalugit
piaartumik pilersaarusiorneq aallartinneqassaaq inuit amerlanerusut
sulisinneqalernissaat tunisassiorfiillu pigineqartut atorluarnerulernissaat
anguniarlugit.
Immikkut ittunik
aaqqiissuteqarnianngikkutta komunnit arlaqartut aningaasarsiornikkut
sanngiilliartornerat unitsinnavianngilarput. Illoqarfinnut, pingaartumik
anginerusut eqqarsaatigalugit,
nutserneq annertusiartuinnassaaq ,
inissaqarnikkut, atuarfitsigut sullissivitsigullu allatigut
ajornartorsiutaasut annertusiartuinnarnerannik kinguneqartumik.
Aningaasarsiornikkut inissisimanerput
ilungersunarsiartortillugu, isertittakkattalu amerliartulersinnaanerat
arlalitsigut qularnarallartillugu, aningaasaatitta pilersaarusiorluarnikkut nunatsinnit annissuinnarnagit
atorluarnerunissaat sapinngisaq tamaat anguniartariaqarparput.
Siunissami aalisarnerinnavimmik
aningaasarsiornitsinni tunngaveqarunnaarluta arlaqarnerusunik
tunngaveqarnissarput aalajangiusimallugu nuna tamakkerlugu pilersaarusiortariaqalerpugut ersarissunik
tikkuussisunik una uku
uani ingerlanneqassapput piorsarneqarlutillu, tamattami
assigiiginnavinnik suliaqarsinnaanngilagut.
Pilersaarusiorluarnikkut pitsaasunik
angusaqarsinnaavugut soorlu maanna paasivarput, puisip orsua atorlugu uuliamik
nakorsaasiornermi atorneqarsinnaasumik
tunisassiorniarneq aallartinissalersoq.
Imaassanerpoq tigoqqaara pissasoq,
angusassarli pitsaanerpaaq angussannginnerparput pilersaarusiornikkut sumi
tunisassiornissaq aalajangerlugu pitsaasunillu periarfissillugu.
Ruth Heilmann -ip siunnersuutaanut
naatsumik oqaatigilaassavara Atassummi ullumikkut ingerlatsineq uagut
tutsuviginerugatsigu eqaannerusumik pilertornerusumillu pilersaarusiortarnerit
ingerlanneqartarmata.
Taama oqaaseqarluta Naalakkersuisut
nassuiaataat tusaatissatut tiguarput.
Johan Lund Olsen, Inuit Ataqatigiit oqaaseqartuat:
Qujanaq. Nuna tamakkerlugu
pilersaarusiorneq nassuiaat matumani oqaaseqarfigitsiarnissaani siullermik
nuannaarutigalugu oqaatigisariaqarsorivarput taamatut maannamiit ukiut
tamaviisa Inatsisartunut nassuiaasiortoqartalernissaa Inuit Ataqatigiinniit
pissusissamissortuusorilluinnaratsigu. Nassuiaat manna Inatsisartut nunarput
ataatsimut isigiumanerullugu siunissamut pilersaarusiorfigineqarnissaanik
tunngatillugu paasissutissanik iluatinnartunik toqqammavigineqarsinnaasunik imaqartiterpoq
taamaattumillu aamma sakkussatsialassuulluni.
Nassuiaammi pingaarnertut
inassutigineqartoq tassalu illoqarfiit nunaqarfiillu avaataanni nuna
sanaartorfigineqanngitsoq pillugu maannakkut pilersaarusiorfigineqalernissaat
Inuit Ataqatigiit ajoriffissaqartinnginatsigu taamaattumik tamanna
annertunerusumik oqaaseqarfiginatigu nassuiaammi illoqarfinni annerpaani
pingasuussuni tassalu Nuummi, Sisimiuni Ilulissanilu innuttaasut eqiterunnerat
aamma erseqqissumik tikkuarneqartoq unikaallattiniarneqartariaqarnera
siunertaralugu oqaatigeqqittariaqarparput Inuit Ataqatigiit
pingaartuutilluinnaratsigu innuttaasut sumi najugaqaraluarunilluunniit
assigiimmik atugassaqartinneqartuartariaqarsorigatsigit. Tamanna
pilersorneqarnikkut, angallannikkut isumagineqarnikkut, peqqinnissap
tungaatigut isumagineqarnikkut minnerunngitsumillu inuussutissarsiornikkut
suliffissaqartitsiniarnikkullu qitiusumit piorsaaniarnitsigut, taamaattumik
maannamit eqqumaffiginerusariaqalerparput.
Isorliunerusuni illoqarfinnilu mikisuni
inuuniarnermi atukkat pillugit oktoberip 14-ani Inuit Ataqatigiit
siunnersuuteqarsimanerput tunngavigalugu oqallissimanitsinni oqaaserisavut
taamaattumik innersuussutigalugittaaq uteqqillugu piumasareqqittariaqarparput
Nuup, Siusimiut Ilulissallu avataatigut aamma illoqarfiit allat
nunaqarfippassuillu maannakkut siunissami annertunerusumik qitiusumiit
piorsaavigineqartariaqalermata, tamannalu ukiuni tullinnguuttuni maannamit
sakkortunerusumik ingerlatilertariaqaratsigut.
Taamatullu naatsoralaannguamik
oqaaseqarallaannarluta 1998-mut nuna tamakkerlugu pilersaarusiorneq pillugu
nassuiaat Inuit Ataqatigit tusaatissatut tiguarput, naatsorsuutigeqqussavarpulli
kommuninut assigiinngisitsineq unitsinniarlugu sulissuteqartuarnerput
ilungersuutigalugu ingerlattuarumaaratsigu maannakkut siunissamilu.
Anthon Frederiksen, Kattusseqatigiit:
Nuna tamakkerlugu pilersaarusiorneq
pillugu nassuiaat Kattusseqatigiit sinnerlugit soqutigalugu misissorsimavara.
Siullermik eqqaasitsissutigissavara suliaq
soqutiginartoq pissanganartorlu piffissaqarfigilluarnerullu
suliarineqartariaqarmat, tassami nuna tamakkerlugu pilersaarusionermut
tunngasut sukumiisumik suliarineqassappata iluamik isummernissamut
eqqarsarluarnissamullu piffissaq annerusoq atortariaqarmat, minnerunngitsumillu
paasissutissat, pingaartumik sanaartornermut, aningaasarsiornermut,
inuussutissarsiornermut, ilinniartitaanermullu tunngasut ukiuni kingullerni
minnerpaamik qulini qanoq ineriartortinneqarlutillu ineriartorsimanerannut
tunngasut.
Taamaattumik saqqummiussaq ataatsimut
tamaat isigalugu eqqornerusumik taassagaanni oqartariaqarpoq, nuna tamakkerlugu
ilaannakuusumik pilersaarusiornerneq pillugu nassuiaat, imaluunniit nuna
tamakkerlugu pilersaarusiornerup immikkoortuata siullia.
Taamaakkaluartoq soorunami suliap
ingerlariaqqinnissaanut, minnerunngitsumillu kommuneni illoqarfiit avataanni
nunaminertanik atuineq pillugu aalajangersakkat ilaatigut amigaatillit
ersarissarneqarnissaat ingerlanneqartariaqarput, saqqummiussaq
annertunerusutigut inuit nuuttarnerannut illoqarfiit sisamat annerusut
annerusumik ineriartortinneqarnerannut, ilaatigut aamma pissuteqartoq, kiisalu
aamma nunaqarfiit, pingaartumik inuussutissarsiornikkut periarfissagissaartut
aammalu inuttusiartornerat ilanngullugu eqqartorneqarluni. Taakkua saniatigut
illoqarfiit avataanni nunaminertanik atuinermut eriagisassatullu soqutigisanut
assigiinngitsunut tunngasut aamma eqqartorneqarlutik.
Soorunami aamma Namminersornerullutik
Oqartussat suliffeqarfiutaasa ilaasa illoqarfinnut allanut nuunneqarsimanerat
kommuneqarfinnut nuuffigineqartunut annertuumik sunniuteqarpoq,
sulifeqarfissuillu angisuut ilaat allanngortiteriffigineqarsimapput,
inuiaqatigiinnut akisoqisumik.
Kommuneni assigiinngitsuni illoqarfiit
sumut alliartornissaat soorunami kommunet nammineerlutik
aalajangersinnaannertik tunngavigalugu aalajangigassaraat, aamma nuna
tamakkerlugu pilersaarusiortut akuersisillugit.
Nassuiaammi paasinarpoq nuna tamakkerlugu
pilersaarusiornermut ilaatigut kommuneqarfinni ilooqarfiit avataanni
nunaminertat aalajangersaavigineqartarneri pillugit aalajangersimasumik
malittarisassaqanngitsoq, soorlu nuna, kuuk imaluunniit nunaminertaq suna
eriagisassatut sanaartorfigisassaanngitsutullu aalajangiiffigineqassanersoq
pillugu.
Oqaatigineqarportaaq illuaqqat illoqarfiit
avataanni sananeqarsimasut 1.000-it missilioraat, kisiannili tamakkiisumik
nalunaarsuineq aamma nunap assingatigut, taakku qanoq inissisimanerat
tamakkiisumik nalunaarsorneqarsimanngitsut.Taamaammat aamma tamakku pillugit
malittarisassaliornissanut pilersaarusiornissamullu tunngatillug kommuneqarfiit
allallu soqutigisaqaqatigiit, soorlu assersuutigalugu savaatillit,
takornariartitsinermik suliaqartut allallu illuaraatillit, minnerunngitsumillu
kommunet qanimut suleqatigalugit aaqqiinniartoqarnissaa Kattusseqatigiit
sinnerlugit kaammattuutigissavara, tamannami aamma nalunaarusiami suleqatiginnikkumanermik
ersersinneqareermat.
Isumaqarpunga maannakkut
aallarnisaataasumik oqallinnermi inuiaqatigiit akornanni oqallinneq annerusoq
pilersinneqartariaqartoq, inuit ataasiakkaat, kommuneqarfiit allallu
soqutigisaqaqatigiit tamarmik peqataaffigisaannik ingerlanneqartariaqartoq,
taamaalilluni aamma paasisassat annertunerusut 1999-imi naalakkersuisut saqqummiussassaannut
ilanngullugit saqqummiunneqarsinnaaniassammata.
Eqqaamasariaqarpoq Landskarsi kommunenut
sanaartornikkut, isumaginninnikkut, ilinniartitaanikkut allarpassuartigullu tapiissutigisartagaat
kommunet ataasiakkaat ineriartortinneqarnerannut annertoorujussuarmik
sunniuteqartarmata, tamaattumik naligiimmik ineriartortitsisoqassappat
illoqarfiit naligiinerusumik kommuneqarfiillu paaseqatigilluarlugit
ingerlatsisoqartariaqarpoq.
Inissaaleqineq qanoq annertutigisumik
ajornartorsiutaasoq assersuutigineqarsinnaavoq. Kommunet ilaat
ingerlalluarput, ilaatigut Namminersornerullutik oqartussanit ajunnginnerusumik
pineqaramik, soorlu sanaartornerup tungaatigut Namminersornerullutik Oqartussat
suliffeqarfiutaasa nussorneqarnerannik anerusumik isiginiarneqaramik, ilaallu
ilanngullugit, tamanna miserratissaanngilaq.
Nuup kommunea assersuutissaqqippoq,
inuppassuit Nuummut noorarput, sanaartorneq annerusoq, suliffeqarfiit
amerlanerusut, nioqqutissat sinerissap sinneranut naleqqiullugit amerlanertigut
akikinnerummata, periarfissat aamma atortorissaaruteqarnerup tungaatigut,
sutigut tamatigut sinerissap sinneranut naleqqiullugit pitsanngoriartormata,
tamatumalu ilaatigut kinguneraa inissaaleqinerujussuaq, tassa Nuummi,
atuarfinni tattoqisaanerit, meeqqivinnik amigaateqarnerit ilaallu
ilanngullugit.
Taamaakkaluartoq ukiup matuma
aallartilaarnerani kommune nalunaarpoq 200 mio. kr.-it missaanik karsimi
aningaasanik uninngasuuteqarluni. Aningaasanik sillimateqarneq soorunami
ajunngilaq, kisianni kommunet ilai, Aperlilertut@,
ilaalu qaarsilaarlutik ingerlasut Namminersornerullutik Oqartussanit
isiginiarneqartariaqarput, oqartoqarsinnaanngilarmi uagut taakku
susassarinngilagut, nammineerlutik ingerlaniarlik, aammami
taamaattoqavinngikkaluarpoq, kisianni naligiinnerusumik ineriartortitsineq
pisariaqarpoq.
Taamatut oqaaseqarlunga nassuiaat
siulliugallartoq akuarsaarlugu tusaatissatut tiguara.
Jonathan Motzfeldt, Naalakkersuisut Siulittaasuat:
Qujassutigaara partiit maaniittut tamarmik
manna nassuiaat inussiarnermik ilassimmassuk, aammalu Kattusseqatigiit
takkajaarsuarmik oqaaseqarlutik, soorunami aamma ilaatigut isumaqatigisannik
aammalu ilaatigut isumaqatiginngisannik oqaaseqaatai aamma malugaakka.
Soorunami oqaatigissavara
Kattusseqatigiinnut ilaannakuusumik saqqummiinermilluunniit taaneqaraluarpat,
maluginiarpara allat partiit oqaaseqartuini, Siumukkut aammalu Atassutikkut
tungaanninngaanniit ilaatigut imartuumik taaneqarmat, aamma imartoqaaq, uanga
isumaga najoqqutaralugu paasissutissat uaniittut oqaloqatigiissutissallu
annertoqisut, ilaatigut Inatsisartunut ilaasortap Ruth Heilmann-ip aamma
saqqummiussaani, toqqaannartumik akinngikkaluarlugu aamma
isumaliutigisassatsinnut innersuussutigineqartunut matumani nassuiaammi
oqaatigisai ilanngullugit aamma eqqarsaatigineqarumaarmata. Suliassap
ingerlaqqinnissa tunngavilerneqartutut oqaatigisariaqarpoq.
Aammalu Siumup oqaaseqartuata, allallu,
isumaqarpunga una nassuiaat akulikinnerusumik saqqummertarnissaanik
noqaasuteqarneq ilumoortoq, Siumup tungaanninngaanniit ukiut tamaasa
saqqummertarsinnaanera Myrna Lynge-p Siumup oqaluttuata noqqaasutigisaa
eqqarsaatigineqarsinnaavoq, naammassineqarsinnaappat soorunami, kisianni
pinngitsoorani Inatsisartunut akulikinnerusumik saqqummiisoqartarnissaata
naammassineqarnissaa malugineqarsinnaavoq, aamma Inatsisartunut ilaasortap Ruth
Heilmann-ip oqaaseqarnera aamma taamatut paasisariaqarpoq, ataavarnerusumik
pilersaarutit saqqummertarnissaat noqqaassutigineqarmat.
Aamma Inuit Ataqatigiit
annertunngikkaluamik oqaaseqarlutik kaammattuutigaat suliassap matuma aamma
ingerlateqqinneqarnissaa, pingaartumillu kommunet ilaasa ineriartortinneqarnissaannut
periarfissat erseqqinnerusut tunngavissiorneqartarnissaat.
Aamma partiit ataasiakkaat oqaasii
annertunerusumik iserfiginngikkaluarlugit malugisakka ilaatigut ukuupput,
Siumup oqaluttuata Myrna Lynge-p oqaaseqarnermini kommunet aammalu allat
kommunet ajornartorsiortut aningaasatigut tamakkunatigut pilersaarusiornermik
katataan-nginnissaat eqqarsaatigalugu. Ilumoorpoq maannamut kommunet,
kommuneplanertik tamakkiisumik inersimavaat, amigaatigineqarpoq Nanortalik,
Ivittuut, Paamiut maannakkut tunniussaqarsimavoq Qeqertarsuarlu, taamaattumik
taakkua aamma naammassineqarpata kommuneplanit tamakkiisumik kommunit
pigineqalernissaat naatsorsuutigisariaqarpoq. Isumaqarpunga malinnaasut
kommunit taamatut naammassisaqarniarlutik.
Una kommunit aningaasatigut
aviffigeqatigineqartarnerat kommunit aningaasatigut ajornartorsiuteqarnerusut
pillugit, taanna naalakkersuisuninngaanniit oqaatigisimavarput aappaagumut
KANUKOKA-p sijnnersuutaa malinneqarsimapput agguaassinermi, kisianni
nalunaarutigisimavarput ukioq 2000-iminngaanniit kommuninut aningaasanik
ajornartorsiornerusunut tapiissutigisartakkatta allaanerusumik
aaqqissuunneqarnissaat atorfissaqartitsinerit kommunit nalileqqinnerisigut,
oqaloqatiginnissutiginiaripput KANUKOKA-mut, taanna aamma naammassiniarparput.
Atassut-ip oqaluttuata Peter Ostermannip
erseqqissumik kommunit pilersaarusiorneqarneranni oqaaserisai
naunnaarutigalugit oqaaseqarfigilaarusutara tassa, Peter Ostermannip kommunit
pilersaarusiorneqarneranni erseqqissumik, oqassaanga allanit erseqqinnerusumik,
uagut inuit tassani kisitta najugaqarnerput pinnagu, kisianni aamma uumasut,
timmissat uumasullu allat kommunimi aamma inoqatigisagut pilersaarusiornermi
aamma innimigalugit aaqqissuussinernik pilersaarusiornermullu
ilanngutissagigut.
Tamanna naalakkersuisut aamma tamakkunatigut
suliniarneranut naleqquppoq, oktoberimilu avatangiisit pillugit
ataatsimeersuarnermi aamma innersuussutinut naleqqulluni, eqqaammassavarput
nammineq aamma kommuneqarfitsinni killeqarfimmiit killeqarfimmut
pilersaarusiornerni aamma uumasut eqqisisimaarfissaat, erniorfii allallu,
uagutitulli aamma ataqqineqarnissaat aamma pingaarutilerujussuummat, taanna
aamma pilersaarusionermi oqaatigineqarnera naleqquttuutippara
kusanartuutillugulu.
Taavalu aamma una aamma
oqaaseqarfigilaarusullugu nunap ilaani ilaatigut fabrikkit sumi
inissinneqartarneri allallu eqqarsaatigalugit, ilumoorpoq nunap tassani
ataatsimut pilersaarusiornerani tamakkua aamma nalilerneqarnissaat
pingaaruteqarmat, sumi inissikkaanni, puisip orsuanik tunisassiornermut apeqqut
naleqqunneruva, sumi sulisussaqarpa, sumi pisassat amerlaneruppat, qanoq
piaartigisumik katersuiffigineqarsinnaava nioqutissanik, tamakkua naliliinermut
aamma ilannguttariaqarput.
Taavalu aamma ukiuni makkunani aammalu
kommunit namminneq minnerunngitsumik saqqummersittuartarmassuk apeqqut, qanoq
uagut naalakkersuisuninngaannit qulaanninngaanniit qanoq annertutigisumik
killiliisaagut kommunit namminneq ineriartorsinnaanerannut, aamma taanna
nalilerniagassaavoq, Uagut, uanga aamma nammineq eqqarsartaatsinnut aammalu
partiima anguniagaanut naleqquttutut oqaatigisarpara, aammalu inimi maani
assortorneqanngimmat, kommunit ineriartornissaminnut periarfissaqarluartut,
ineriartortinniarlik, ineriartornissaanullu periarfissinniarlik,
aningaasarsiornikkut allatigullu pieriarfissatik atorluarlisigit, pilersaarusiorluarnikkut,
aammalu kommuniminnik namminneq atortorissaarutitigut allatigullu ussassaaruteqarsinnaanermikkut.
Kommunit kiffaanngissuseqarlutik namminneq
aamma kommuneqarfimminnik avammut ussassaaruteqarsinnaasut, taavalu suliffinik
pilersitsiniarnerni assigiinngitsutigullu aamma ikiuukkumallutillu
ammaasiniartut, taakku isumaqarpunga periarfissaqartilluinnartariaqartut,
aammalu ineriartornitsinnut periarfissat taama ittut ammatittariaqartut.
Oqaaseqarnermi arlalippassuit
iserfigineqarsinnaagaluartut una oqaatigissavara aamma aningaasaatitta
pilersaarusiorluarnikkut nunatsinnit annissuinnarnagit atorluarnerunissaat
Peter Ostermannip aamma oqaaseqarnermini oqaatigisaa maluginiarpara. Kalaallit
Nunaanni aamma aningaasat sulisinneqarsinnaanerat ammatissavarput,
avataaninngaanniit aningaasalersuineq suliffinnik, tunisassiornernik
imaluunniit sunik assigiinngitsunik nunatsinni aallartinneqarsinnaasunik
periarfissat ammatinneqarnissaat aamma pingaaruteqarpoq. Aningaasat aamma
nunatsinnut sulisinneqarsinnaanerat kommunit suleqatigalugit aammalu kommunit
aamma namminneq avatiminni suleqatissarsiornerminni anguniagaat
iluatinnaaneqarput.
Unani pingaarneruvoq naggataatigut
oqatigerusuta aammalu oqaaseqartut tamarmik partiit aammalu Kattusseqatigiit
ilanngullutik oqaatigisaat, saqqummiineq una aallarniineruvoq,
aallaarniineruvoq suliassat ataavarnerusumik Inatsisartunit
suliarineqalernissaanut, ukiut tamaasa nunatta pilersaarusiornera inimi maani kissaatigineqarpoq
oqaluttunit ilaatigut saqqummiivigineqartalissasoq, aamma taanna
naalakkersuisunut naalakkersuisungortussanullu innersuussut taama ittoq
ullumikkut tusarneqartoq ingerlatseqqinneqassaaq.
Ruth Heilmann, siunnersuuteqartoq, Siumut:
Nuannaarutigaara aamma uanga
siunnersuutiga taamatut, ilaatigut immaqa tamakkiisumik
isumaqatigineqanngikkaluarluni annerpaartaa isumaqatigineqarmat aamma
paasilluarneqarlunilu, tassami uani pineqarpoq nunarput tamakkerlugu
pitsaasumik siunissami pilersaarusiornissarput.
Ullumikkut killiffigisarput
eqqarsaatigalugu ersaripput, aamma uani saqqummiunneqartumi nunaqarfiit
ikiliartorsimapput, ikiliartulersimapput annertuumik, inui aammalu illoqarfiit
mikisut akunnattullu aamma pingaartumik taakkua uani tikkuartorneqarlutik.
Taamaattumik maannakkut killiffigisarput
aammalu ingerlariaqqinnissaq pillugu nalilersuilluarnissarput
pingaaruteqarpoq, nutaamik eqqarsartariaqarpugut, aammalu uani
oqaatigerusuppara nutaamik eqqarsarnikkut NUKA A/S pilersinneqarpoq, taanna assorujussuaq
pitsaassaaq, aamma nunaqarfinnut imatut kinguneqassaaq nunaqarfinni inui
tassaniiginnarusussuseqalissapput, aammalu uani eqqaarusuppara qanittukkut
SUME-kkut nipilersornerminni atugaat ANunaqarfiit nappaqqillugit@, tassani eqqaanngitsoorusunngilara nuanneqimmat
NUAK A/S-ip pilersinneqarnera.
Uani oqaatigineqarpoq uumasut,
naalakkersuisut tungaanninngaanniit, uumasut sumiissusaat, erniorfii,
pingaaruteqartut, aamma uanga isumaqarpunga inuit taamatulli sumiiffii
sumiinneri, iniorfii, tunngavii aamma pingaartigaat,
ataqqineqartariaqarlutillu.
Taamaattumik aalisagaarunneratigut
nalunngilagut aamma uteqattaartuarpagut sorliit illoqarfiit eqqugaanersut,
taamaattumik tassuunakkut annertunerusumik iliornissarput uagut
Inatsisartuni pisussaaffigaarput tassani
annaassaqaataat aamma eqqarsaatigalugit pitsaasumik aaqqiiviginiassallugit.
Siusinnerusukkut aalisagaqarluarnerata
nalaanni nalunngilarput illoqarfiit aalisagaalatsiffiusut ilinniarfinnik annertuunik suliffissanillu
pilersitsiffigiorsimapput, taannalu tunngaviuvoq ulloq manna tikillugu
napalluarmata. Tamakku ilinniarfigalugit aamma eqqarsaatigalugit massakkut
eqqugaasut, pingaartumillu aalisakkat tammakarnerisigut eqqugaasut
eqqumaffiginiartariaqarpagut aammalu selskabinik nuttartitseqqinnikkut
kommunit eqqugaasut, akuerineqarsinnaanngilarmi ukiut marluk
ingerlanerinnaanni ilaqutariit 100-it nussappata allamut illoqarfimmut
alliartortumut aammalu inunnik amigaateqanngitsumut. Tamakkua
eqqarsaatigilluartariaqarpagut. Ilaatigut aamma illoqarfinni allaat
sanaartorneq aningaasarsiornikkut unittoornermik peqquteqartumik ukiut qulit
ingerlanerani inissianik sanaartorfigineqartanngillat.
Tamakkua eqqarsaatigalugit una siunnersuut
siunnersuutigisara qujavunga paasilluarneqarmat, aamma uani naalakkersuisup
akissuteqaammini maluginiarpara imatut allaqqammat: Issuaalaarpunga
siulittaasoq: ATamarmut atuuttussamik aalijangersimasunik
siunnersuusiortoqarnissaannik pisariaqartitsisoqalersinnaasoq.@ Taanna tassa neriulluarpunga
siunnersuuteqarnikkut aamma taanna taamatut oqarnera neriullualersitsivoq
aammami manna saqqummiunneqartoq ukiut tamaasa pilersaarusiortut nuna tamakkerlugu saqqummiunneqarneranut
tunngatillugu oqallittoqartassasoq qularnanngilaq killiffiusut pillugit
ingerlariaqqinnissarlu.
Taavalu Atassut uani oqaaseqarami
nuannaartorujussuuvunga assorussuaq toqqissiallallunga, imatut oqarmat,
issuaavunga: Aimmikkut ittumik
aaqqiissuteqarnianngikkutta kommunit arlaqartut aningaasarsiornikkut
sanngiilliartornerat unitsinnavianngilarput.@
Kisiannilu pakatsivunga naggataatigut nuannaaruttorlunga oqarmat, Aullumikkut ingerlatsineq Atassutip iluarinerugaa@ uanga siunnersuutinnut tunngatillugu,
taamaattumik paatsuungavunga Atassutip tungaanut qanoq isumaqarnera. Partiillu
sinneri qutsavigaakka tapersersuimmata.
Maliinannguaq Markussen Mĝlgċrd, Inuit Ataqatigiit:
Siullermik oqaatigissavara tassa
ilisimaneqartutuut oktoberip 14-ani ilaatigut siunnersuutiga toqqammavigalugu
oqallittoqarmat, tassanilu oqallinnermi aalaljangiinissaq imaluunniit
siunnerfeqarnissaq ullumikkumut tikkuussutigineqarluni. Nuannaarutigisama
annerpaat ilagivaat massakkut taamanikkut naalakkersuisut saqqummiineranni
aammalu partiit ilaasa saqqummiineranni oqariartuut ima nipeqarmat, inuit
kiffaanngissuseqarput sumut nuussallutik soorlu piniagassatik malittaraat.
Taanna ataatsimilluunniit ullumikkut eqqaaneqanngilaq. Aamma isumaqarpunga
paasineqartoq, aap, ilumoorpoq inuit kiffaanngissuseqarput sumunnassallutik, kisianni
sarfap sumut ingerlanissaa maani inimi aalajangerneqartarpoq. Aamma
suliffeqarfiit sumiinniissai maani inimi aalajangerneqartarput, taamaattumik
taassumap oqaatigineqaqattaartup massakkut nipangiussimanera paasisariaqarpoq.
Isumaqarpunga aamma paasineqalersoq, taamatut inuiaqatigiit
ineriartortinneranni aammalu ineriartortitsinitsinni isiginngitsuusaaginnarsinnaajunnaaripput
aaqqissuussaanersumik aammalu nuna tamaat ataatsimut isigalugu ineriartortitsiviunerusumik
ineriartortitsinissarput, tassami naluneqanngitsutuut aamma soorlu oqaatigeersimagipput
aammalu ilisimaneqartoq taamatut ineriartortitsisimanerup ukiuni kingullerni
aammalu selskabit assigiinngitsut pilersiortorneranni eqiterinerujussuup
kinguneranik suliffeqarfippassuit sinerissamiittut eqiterneqarsimapput
taassumallu kinguneranik kommunit namminneq pisuussutiginngisaminnik
annertuumik ajornartorsiulersimallutik, tassa suliffeqarfinnik piiaaffigineqarnermikkut.
Taavalu eqiteriffiusuni
inissaaleqinerujussuit pilersimapput Nuummi inissaaleqisut massakkut 2000-it
sinneqarput, Sisimiuni Ilulissani 400-it tungaanut, taavalu tamatuma
kinguneranik aningaasarpassuit maanngaannartutut oqaatigineqarsinnaasut
tassaapput vacantinut tassa inissiigallarnernut aammalu hotelinut atortariaqartartut
immaqa uffa taamatut pilersaarusiornerit pilersaarusiorluagaanerusimagaluarpata
taakku aningaasat suliffissanut pilersitsinermut atorsinnaagaluartut.
Massakkut inuiaqatigiit
aaqqissuussaaneranni equngasoqarpoq annertuumik, Landskarsi amigartooruteqarluni
naatsorsuuteqarpoq, illuatungaanilli aningaasarpassuit maanngaannartarput
tattoqisaannerujussuup kinguneranik. Taamaattumik ilumoorpoq nutaamik
eqqarsartoqartariaqalerpoq aamma eqqarsaatigilluartariaqalerpoq ilumut
suliffeqarfiit tamarmik taakkunani eqiteruffiusuni inissisimasariaqarnersut,
nunammi immikkoortuisa ilaanni illorpassuit inoqaratik uninngaannarput aamma
INI A/S-ip akiliiffigisariaqagaannik, taamaattumik imminut annertuumik
ineriartornerup equnganerani aningaasat maanngaannartut amerlavallaaqaat
nutaamillu eqqarsartoqartariaqalerluni aammalu illoqarfiit eqqugaasimasut
immikkut qanoq iliuuseqarfigineqartariaqalerput.
Pisut kingulliit eqqarsaatigiinnarlugit
assersuutitut taaginnarsinnaasama ilagivaat soorlu aap, imigassaajartarfik
Ilulissanut inissinneqarpoq aamma suliaq taanna ingerlareerpoq soorunami
pisariaqartitsisoqarsimammat, kisianni apeqquserneqarsinnaasut ilagivaat sooq
Iluissani, soormi illoqarfimmi allamiissinnaanngila, inissaaleqisut
amerlareertigisut. Aamma assersuutigiinnarlugu taasinnaavara aap,
pilersinneqareersut ilaat NUKA A/S aamma maani allaffilerneqarpoq, sinerissami
isorliunerusut sullivissatut, taava sooq Nuummiissava? Assersuutitut taanna
apeqqutigerusuppara.
Taamaattumik ineriartortitsineq ataatsimut
isigalugu pisariaqalerpoq tassa isiginngitsuusaaginnarsinnaajunnaarparput
tattorliortitsinerit, meeqqanik paaqqinniffissaaleqinerit, inissaaleqinerit,
atuarfinni tattoqisaannerit taakkua aaqqiivigissagutsigit aammalu
aningaasarpassuit atussanngikkutsigit immikkut sanaartornerujussuarmut,
taakkua aaqqiiviginiarlugit aammalu illuatungaani illoqarfiit ilaanni
inissarpassuit atorneqanngitsut. Taamaattumik nuannaarutigaara partiit maani
tamarmik siunnerfiat ersarissoq tusarliunneqarmat aammalu oqariartuutigineqarmat,
isumaqarpunga taamaaliornikkut aamma illoqarfiit pineqartut imaluunniit
eqqugaasimasut neriuutissaqarnerulersut maannakkut.
Anthon Frederiksen, Kattusseqatigiit:
Nunaannaalertarlutalu
nuannaarunnaartarpugut, kisianni nuannaarutigaara naalakkersuisut
siulittaasuata oqaatigisaa tassa kommunit kiffaanngissuseqarlutik
ineriartortitsisinnaanissaminnut periarfissaqarnerat taamaattuassasoq.
Nuannerpoq tamanna tusarlugu, kisianni ippassaaniinnan-nguaq angallanneq
pillugu oqallikkatta tassani kommunit nammineerlutik ineriartortitsisinnaanerat
killilerneqareerpoq inimi maani. Taamaattumik maannakkut naalakkersuisut
siulittaasuata oqarnera ippassaanilu angallanneq pillugu oqallinnermi
oqaaserineqartut imminnut assortuupput, tassami angallanneq pillugu nassuiaat
saqqummiunneqarmat apeqqutigivara kommunit nammineersinnaanerat soorlu
mittarfiliortitsinermut tunngasut qanoq periarfissaqarpat? Tamanna
oqaluttarfimmi uanngaanniit akineqanngilaq, kisiannili akineqanngimmat
nammineerlunga saaffiginninnikkut paasivara Angallanermut
Naalakkersuisuminngaanniit tamanna taamaattoqassagaluarpat nuna tamakkerlugu
angallannerup aaqqissuussaaneranik equngasoqartitsilissasoq, taamaattumik
kommunit nammineerlutik periarfissaqarsinnaanerat tamakkiisumik akuerissariaqarpoq.
Kommunit ineriartorusuttut killilersorneqassanngillat namminneq periarfissatik
atorsinnaasariaqarpaat, soorunami allaalluinnarpoq nunap karsia Landskarsi
isigalugu uagut maani sulisussaagatta, aamma kommunit namminneq karsertik
isigalugu suliniartussaapput, taamaakkaluartorli puigortariaqanngilaq aamma
Landskarsip aningaasaliuttagai kommuninut assigiinngitsunut kommunit
aningaasaqarnerannut assorujussuaq sunniuteqartarmata.
Assersuutiginnarsinnaavarput 1994-mi
utoqqalinersiutinut tapiisarneq pillugu aaqqiisoqarmat kommuninut 300 mio.-nit
pallingajallugit aningaasat tunniunneqartalerput, tamatumalu kinguneraa
kommunit aningaasarissaariartulernerat, tassa taamannak kommunit
aningaasaqarnerat Landskarsip tapiissutai aqqutigalugit pitsanngoriartarput.
Aamma kommunit sanaartorfigineqartut Landskarsiminngaanniit
aningaasaliiffigineqarrneri annertoorujussuarmik kommunit aningaasaqarnerannut
sunniuteqarput.
Taamaattumik uatsinnut illersorluta
assortorlutalu oqalussagutta aamma aappaatigooqarpoq. Soorunami suna tamarmi
killeqartoq nalunngilarput. Aamma nuna tamakkerlugu ineriartortitsinermi
aningaasat nunatsinniittut qivianngitsoorneqarsinnaanngillat nunatta
aningaasaqarnera qanoq ingerlava? Tamakku tamaasa puiguinnarlugit
ingerlaniarsinnaanngilagut. Aamma kommunini taamaappoq, aamma kommunit
nammineerlutik aningaasaqarnertik isigalugu ingerlasariaqarput.
Oqallinneq nuannersoq aammalu
pissanganartoq ingerlanneqarpoq, aamma kipitinneqassanngilaq aamma uanga
kipitinniarsarinngilara, kisianni isumaqarpunga oqallinneq sukumiisumik aammalu
paasisassat assigiinngitsut tamaasa saqqummesinneqassappata taava ajortortai
ajunngitsortaalu tamaasa oqaluuserisariaqarpavut. Sunaluunniit nassuiaat
saqqummeraangat niaqquvut katangajallugit anngaasarnerput aamma
eqqaassariaqarparput, taamaaliuinnaraluaruta ajortuusinnaasut aqqutigisinnaasai
pinngitsoortissinnaanngilavut. Taamaattumik aamma tikkuaasinnaaneq arlaatigut
periarfissaqartariaqarpoq.
Tamatta kissaatigaarput nunatta ajunngitsumik
ineriartornissaa, pitsaasumik sapinngisamik kukkuneqarpallaanngitsumik,
taamaattumik maanngaanniit oqartoqarsinnaappat una ajorpoq, una immaqa ajorpoq
aaqqittariaqarpoq, taava naalakkersuisut pisussaapput tamakkuninnga tikkuartuutinik
aamma aaqqinniassallutik. Neriuppungalu aamma 1999-mi maani immaqa amerlanerit
peqataanngikkalaurpataluunniit allat nutaat sulilluarniarumaartut.
Taamatut naakkaluartumik
oqaaseqaqqilaarlunga neriuutigeqaara aamma inuiaqatigiinni oqallinneq manna
pillugu annerusoq ingelanneqassasoq, tassami taakkuupput uagut sulisitsisugut,
taakkua aamma alajangiisinnaanerat tusaaniartariaqarpoq.
Peter Ostermann, Atassut:
Naatsuaqqamik, tassa Ruth Heilmann
paatsuulaarsimannguatsiarmat. Uagut isumaqatigisarput unaavoq ullumikkut
pilersaarusioriaaseq ineriartornerput arlalitsigut ima sukkatigaaq ingerlaavartumik
ataatsimiititaliunngikkaluarni ingerlaavartumik pilersaarusiornerup
ingerlannissaa, uagullu tulluarnerutipparput naalakkersuisut tassani
pilersaarusiortutut inissisimassappata pilersaarusiorneq ingerlaavartumik
ingerlanneqarsinnaaniassammat.
Jonathan Motzfeldt, Naalakkersuisut Siulittaasuat:
Nalunaarusiamik uani
atuarluaqqissaarsimasut tamarmik, aamma inimi maanittut tamarmik taamaapput,
malugissavaat naggataatigut naalakkerusisut ataatsimoorlutik
oqaaseqaatigisaannik aamma imaqarmat. Tassani naalakkersuisut ataatsimoortumik
oqaatigisaanni kalaallisuani qupperneq 127-mi takuneqasinnaavoq tassani nuna
tamakkerlugu qanoq naalakkersuisut oqaaseqaateqarsimanersut, aamma taanna
Kattusseqatigiinnut malugitsiaqqullugu taanna innersuussutigissavara qupperneq
kalaallisuuani 127-mi allassimammat. Tassani ilaatigut takuneqarsinnaavoq
naalakkersuisut maannakkorpiaq pilersaaruteqanngitsut Namminersornerullutik
Oqartussat suliffiutaannik allanik nuussinissamut taamaattorli ingerlaavartumik
malinnaaffigineqartut illoqarfiit pingaarnersaat, aamma sinerissami
illoqarfiit allat akornanni sanaartugassatigut ineriartornermut atatillugu
oqimaaqatigiissitsinissamik pisariaqartitsisoqarnersoq. Taanna qallunaatuani
qupperneq utoqqatserpunga103-usoraara allassimavoq, kisianni kalaallisuuani
127-mi.
Nalunaarusiaq taanna nunap tamarmi
pilersaarusiorneranut tunngasoq erseqqissaatigissavara aamma, taakku aamma
tunngaveqarput nuna tamarmi ataatsimut karsia najoqqutaralugu aamma
tassuunakkut pilersaarusiornerit aamma peqataaffigineqarmata. Mittarfiit
ilaatigut tassunga killilimmik sananeqarsimaneri pilersaarutaareersut
malillugit ingerlavoq, taavalu allat naammassineqarpata taava
uterfigineqarsinnaaneri periarfissikkumaneqarluni aamma.
Taamaattumik aamma malugeqqunaqaaq
maannakkut oqaloqatigiinnerit uunga killiffianni nunamut tamarmut
pilersaarusiorneq ilumut nunamut tamavimmut pilersaarusiornermut
sammititaammat. Taamaatumillu naliliinissani assigiinngitsuni inuit sumut
katersuuppat, suliffissuit sumi soqutigineqarpat, qanoq ittumik illoqarfiit
periarfissaqarnerat kialluunniit inuup suliffimmik aallartitsiniartup
misissoruniuk Kalaallit Nunaata nunapassingani piinnarani nunap inissisimaneri,
taava aamma misissussavaa tassani suliffissaqartitsinissaq, suliffissap
tungaatigut qanoq ittut naapitassaralugit, kiffartuunneqarnissamut periarfissat
illoqarfiup pisortaasa neqeroorutaat allarpassuillu.
Pisortaninngaanniit aallartitsiniarnigut
uagut landskarsiminngaanniit tunngavilimmik suliffinnik aallartitsioniarnigut
ajornakusoortorujussuupput. Maannakkut soqutigaarput inuit namminneq
isumassarsiullaqqissusertik najoqqutaralugu suliffinik
aallarniiniarsinnaanerat. Tamakkuupput maannakkut isiqarfigalugit
ingerlaviginiarneqartut, taammaattumik sungiuttariaqarparput aamma illoqarfiit
ilaat kajungernarnerupput Kalaallit Nunaanni, ilaat kajungernannginnerullutik.
Innuttaasut, IA-p oqaluttuatulli oqaatigisariaqarput, kiffaanngissuseqarput tamarmik
sumi najugaqarusunnerlutik.
Naalakkersuisuninngaanniit
naalakkersinnaanngilagut inuit sumut ingerlaasasut pinngitsaalillugit.
Ornikkumasaminnut sullivinnullu nuannarisaminnut kalaaleq kinaluunniit aamma
maani najugaqartoq uniffissaminut unittassaaq, uagut qulaanninnganniit taanna
nalakkersinnaanngilarput. Kisinanni peqataaffigisassaraarput uniffigisamini
illussaqarnissaa, meraasa aturtitaanissaat, peqqinnissakkut isumagineqarnissaa
allat tamakku inuiaqatigiinnit kiffartuunneqarnissaat, taakku suliassaraagut,
kisianni inuk pinngitsaalisinnaanngilarput sumi najugaqartissallugu.
Ruth Heilmann, Siumut:
Unaana oqaatigerusukkiga, tassami kommunit
pilersaarusiortarnerat taanna pingaartorujussuuvoq, aammalu soorunami nunatta
pilersaarusiorneqarnera aamma taanna pingaartorujussuuvoq, taakku imminnut
avissaartinneqarsinnaanngillat, taamaattumik suleqatigiinnissaq oqaloqatigiittarnissat
pingaaruteqarput kommunit Namminersornerusullu akornanni. Aamma uani ilaat
allamut nuunniarlutik kajunginngikkaluartut aamma nuutsinneqartarput
ullumikkut, tassami soorunami KNI eqqarsaatigiinnarlugu, tassani suliffik
allamut nuunneqarmat aamma sulisui malinnittariaqaramik, naak taanna inummut
namminermut kissaataasimanngikkaluartoq. Taamaattumik tamakkua
eqqumaffiginiarlugit neriuppunga siunissami taamatut pisoqaqqissan-ngitsoq.
Maliinannguaq Markussen Mĝlgaard, Inuit Ataqatigiit:
Naatsunnguamik, tassa una
oqaatigiinnassavara aap, ilumoorpoq kommunit isumassarsiullaqqissusiat aamma
tassani apqqutaaqqataalluinnarpoq, kisianni kommuni suliffissanik
arsaartorneqarsimappat aningaasassaqanngilaq qanorluunniit
isumassarsiarpassuit pitsaatigigaluarpata karsi imaarukkiartuinnarsimappat
aamma pilersitsinissaminnut periarfissaat annikilligaluttuinnassapput.
Aap, inuk pingitsaalineqarneq ajorpoq,
aamma kiffaanngissuseqarpoq, kisianni suliffeqarfia nuannarisaa matuneqarpat,
allamullu illoqarfimmut nuunneqarluni uninngaannarsinnaanngilaq allamik
suliffissaqanngikkuni illoqarfimmini, taamaattumik inuk pinngitsaalisaavoq
allamut nuunnissaminut, suliffissani malillugu.
Anders Andreassen, Inatsisartut siulittaasuat:
Allanik oqaluttussaqanngilaq.
Taamaalilluni ullumikkut oqaluuserisassaq,
tassalu Nuna tamakkerlugu pilersaarusiornermut nassuiaat tusaatissatut
tiguneqarpoq.
Oqaluuserisaq naammassivoq.