Oqaluuserisassani immikkoortoq 18-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq
23. september, nal.15:20
Ataatsimiinnermik
aqutsisoq: Finn Karlsen, Siulittaasoqarfimmi ilaasortaq.
Daniel
Skifte, Aningaasaqarnermut Ineqarnermullu Naalakkersuisoq:
Inissiaatileqatigiiffimmik
pilersitsinissaq pillugu Inatsisartut peqqussutaata allanngortinneqarneranik
Inatsisartut peqqussutissaattut siunnersuut Naalakkersuisut sinnerlugit
matumuuna saqqummiuppara.
Peqqussutissatut
siunnersuummik matuminnga saqqummiussineq illuliortiternermut
aningaasalersuineq pillugu Inatsisartut peqqussutissaattut siunnersuummik
oqaluuserisassani immikkortumi 20-mi tassa aatsaannguaq pisatsinni, Naalakkersuisut
saqqummiusssaata kinguneraa, siunnersuutillu taassuma suliassat boligstøttimut
tunngassuteqartut taassumatut ittut kingunerisussaallugit.
A/S
Inissiaatileqatigiiffiup INI-p suliassat taamaattut boligstøttimut
tunngassuteqartuni suliassarereermagit illuliortiternernut aningaasalersuineq
pillugu Inatsisartut peqqussutaannik matuminnga aqutsinermik aamma
isumagisaqarnissaa pissusissamisoortussaavoq. Tassani assersuutigalugu
taarsigassarsisitsisarnermik aqutsineq, allakkianik assigiinngitsunik suliaqartarneq,
terminikkuutaartumik akiligassanik akiliisitsiniartarneq taakkulu assigisaat
pineqarput.
Naalakkersuisut
sinnerlugit taamatut oqaaseqarlunga inissiaatileqatigiiffimmik pilersitsinissaq
pillugu Inatsisartut peqqussutaata allanngortinneqarneranik Inatsisartut
peqqussutissaattut siunnersuut Inatsisartuni oqaluuserisassanngorlugu
saqqummiuppara, siunnersuutillu aappassaaneerneqannginnermini Inatsisartut
Ineqarnermut Ataatsimiititaliaani oqaluuserinissaa siunnersuutigissallugu.
Tage Lennert, Siumup oqaaseqartua:
Inissiaatileqatigiiffimmik
pilersitsineq pillugu Inatsisartut peqqussutaata allanngortinneqarnissaannik
Naalakkersuisut siunnersuutaat Siumumiit taperserparput.
Siumup pingaartippa inissialiornermut
tapiissuteqartarneq aningaasaliissuteqartarnerullu peqqussutaasunut
naapertuuttumik ingerlanneqarnissaa. Taakku atuisunut inuiaqatigiinnullu
pitsaanerpaamik periarfissiimmata.
Siumuminngaanniit siunnersuut aappassaaneerneqannginnerani
Inatsisartut Ineqarnermut Ataatsimiititaliaani suliarilluarneqarnissaa
innersuussutigissavarput. Qujanaq.
Jakob Sivertsen, Atassutip oqaaseqartua:
Inissiaatileqatigiiffimmik
pilersitsinissaq pillugu Inatsisartut peqqussutaata allanngortinneqarneranik
Inatsisartut peqqussutissaattut siunnersuut Atassummiit naatsunnguammik
oqaaseqarfigissavarput.
Peqqussutip
allanngortinneqarnissaanut saqqummiussaq, oqaluuserisamut immikkoortumut
20-imut attuumassuteqarmat annertunerusumik pulaffigissanngilarput,
taamaalilluta Atassummiit tamakkiisumik taperserparput. Aamma
Ataatsimiititaliami sammineqarnissaanut suleqataassaagut.
Lars Sørensen, Inuit Ataqatigiit oqaaseqartuat:
Inuit Ataqatigiinniit
immikkoortoq 20-mi illuliornermut aningaasaliisarneq pillugu Inatsisartut
peqqussutissaattut siunnersuummut oqaaseqaatigut innersuussutigalugit matumuuna
taassumap malitsigisassaannut pissusissamisuuginnartutullu isigigatsigit
aningaasaliinermut tunngasut aqutsinissaaq aamma A/S INI-miit suliarineqalissappat,
naleqanngitsutummi A/S INI-p inissialiornermut tapersiisarnermut tunngasut
aamma suliarereermagit. Annertunerusumik peqqussutissatut siunnersuummut
oqaaseqaqqinnata aappassaaneerneqannginnermini Ineqarnermut
Ataatsimiititalianut ingerlanneqarnissaa akuersaarparput.
Anthon Frederiksen, Kattusseqatigiit:
Kattusseqatigiinniit
siunnersinnerusukkut inissiaateqarnermut tungasutigut oqaaseqaatigisarsimasakka
innersuussutigalugit saqqummiunneqartumut oqaatigissavara siunnersuut
tunngaviatigut isumaqatigigakku. Matumanili kissaatiginartutut oqaatigissavara
inissiaatit aningaasalersorneqartarneranni sanaartornerinilu pissutsit
uparuarsimasakka atuisussaajumaartunut sunniuteqarsinnaasut immikkoortuni aamma
ullumikkut oqaluuserisatta ilaanni eqqartorsimasakka maluginiaqqullugit.
Taamatut naatsumik oqaaseqarlunga
innersuussutigissavara siunnersuut aappassaaneerneqannginnermini Inatsisartut
Ineqarnermut Ataatsimititaliaani oqaluuserineqassasoq.
Daniel Skifte, Aningaasaqarnermut Ineqarnermullu
Naalakkersuisoq:
Siullermik partiit
oqaaseqartut tamaasa ataatsimut qujassuteqarfigaakka. Tamarmik isumaqataapput,
taamaattumik annertunerusumik oqaaseqassanngilanga, (katiinermi) oqaannassaanga
aaqqissuussineq nutaaq taassumap piviusunngortinneqassagaluarpat taava taanna
inatsissatut siunnersuut kinguneriinnartussaavaa taamaattumik partiit
oqaaseqartuanut qujavunga, Siumumut, Atassummut, Inuit Ataqatigiinnut
Kattusseqatigiinnullu. Ineqarnermullu Ataatsimiititaliaq sulilluarnissaannik
kissaallugu.
Finn
Karlsen, atatsimiinnermik aqutsisoq:
Taamaasilluni
ullormut oqaluuserisaq immikkoortoq 18, Inissiaatileqatigiiffimmik
pilersitsineq pillugu Inatsisartut peqqussutaata allanngortinneqarneranik
Inatsisartut peqqussutissaannut siunnersuutip siullermeerneqarnera
naammassivoq, aappassaaneerneqartinnanilu Ataatsimiititaliami sammeqassalluni.
Oqaluuserisaq
naammassivoq.