Oqaluuserisassani immikkoortoq 54 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Anders
Andreassen.
Kristine Raahauge, siunnersuuteqartoq, Siumut:
Kalaallit oqaasiisa pisortaqarfinni
aammalu namminersortut suliffeqarfiutaanni atorneqartarneri pillugit
annertuumik oqallinneqartarpoq. Massakkullu kiisa ukiorpaalunngorput suli
oqallisaallutik. Taamaammat uanga periarfissaq manna atorlugu
siunnersuuteqarniarpunga Kalaallit Nunaanni Namminersoruneq pillugu inatsisip
29. November
1998-imeersup allanngortinneqarnissaanik ' 9-anut tunngasoq.
Siunnersuut Kapitali 2-mut Hjemmestyrip
suliassaanut tunngavoq '-imullu ilassutissatut
siunnersuutigineqarluni immikkoortut pingajuattut. Kalaallit oqaasii pisortat
namminersortullu suliffeqarfiinut saaffiginnissutitut atorneqartarnissaasa
qulakkeerneqarnissaa. Immikkoortoq siullermi allassimareerpoq Kalaallit oqaasii
pingaarnersaallutik oqaasiussapput aammalu Danskit oqaasii peqqissaartumik
ilinniartitsissutigineqassapput. Immikkoortut aappaannilu allassimalluni
oqaatsit taakkut tamarmik pisortaqarfinni atorneqarsinnaapput.
Siunnersuutima inatsisip imarisaa
allanngortinngilaa, taamaallaat ersarissarlugu oqaatsit pingaarnersaat, tassa
kalaallit oqaasii pisortaqarfinnut aamma namminersortut suliffeqarfiinut
saaffiginninnermi saaffiginnissutitut atorneqartarnissaasa
qulakkeerneqarnissaat. Pissusissamisuussaarmi kalaallisut oqaatsitta
kalaallisut oqaasillit tamarmik nunaminni najugaqartut nunami inunngorfimminni
oqaatsitik atorlugit saaffiginniffiusinnaasunut tamanut ammasunut
saaffiginnittassappata. Massakkut oqaatsinik ilinniarfik pilersissimalerparput
kikkulluunniit oqaatsinik assigiinngitsunik ilinniarfigisinnaasaat.
Kalaallisut oqaasillit tamarmik
nunaminni najugaqartut nunami inunngorfimminni oqaatsitik atorlugit
saaffiginniffiusinnaasunut tamanut ammasunut saaffiginnittassappata massakkut
oqaatsinik ilinniarfik pilersissimalerparput kikkulluunniit oqaatsinik
assigiinngitsunik ilinniarfigisinnaasaat aammalu Kalalllit Nunatsinni
najugaqartut inooqataallutillu suliffeqartut periarfissaqarput kalaallit
qallunaallumi il.il. oqaatsinik ilinniarnissamik. Soornami inoqartuassaaq
allamiut oqaasinik atuinissaminnik ajornartorsiuteqartartunik. Taakkualu
atorfinnut qinnuteqarnerminni nalunngiinnassavaat kikkunnilluunniit
saaffiginniffiusinnaasuni suliffissarsiorniarunik oqalutsimillu
suleqateqartinniarneqaratik taava atorfik taanna suliffissamittut
qinnuteqarfigissanagu.
Ataatsimiinnermik aqutsisoq: Finn Karlsen, Siulittaasoqarfimi
ilaasortaq, Atassut.
Jonathan Motzfeldt, Naalakkersuisut siulittaasuat,
Siumut.
Inuit maani isersimasut
arlaannaataluunniit qularutiginngilaa kalaallit oqaasii ilitsoqqussaralugit
oqaaserigatsigit, oqaatsit taakku atortarpavut Kalaallit Nunaanni
oqartussaasunut suliffimmulluunniit saaffiginnikkutta. Namminersornerulluni
Oqartussaaneq pillugu inatsimmi ' 9-ani atuarneqarsinnaavoq kalaalit oqaasii
Kalaallit Nunaanni pingaarnersaallutik oqaasiussasut aamma taamaattuassaaq.
Tamanna tamatta kissaatigaarput sulissutigalugu, qularnaarneqarnissaa aamma
nukittorsarneqarnissaa. Arlaannattaluunniit nalorsissutigissan-ngilaa kalaallit
oqaasii atorneqassammata atorneqarsinnaasariaqarlutillu innuttaasup kalaallisut
oqaasillip pisortani oqartussaasuni saaffiginninnerani. Kalaallit suliffiutaat
eqqarsaatigalugit soorunami siunertaavoq saaffiginninnerit kalaallisut
pisinnaanissaat. Kisianni aamma sulisorisavut tamarmik kalaallisut
pisinnaanissaat. Kisianni aamma sulisorisavut tamarmik kalaallisut
tamakkiisumik oqalussinnaanngillat. Tamannalu ajornartorsiutaavoq
ajornartorsiullu tamanna Inatsisartunut ilaasortap Kristine Raahauge-p
siunnersuuteqarneratut inatsisiliornikkut qaangerneqarsinnaanngilaq.
Ajornartorsiut aatsaat
qaangerneqarsinnaavoq ilinniartitsinikkut Namminersornerullutik Oqartussat
kommunillu suliffiutaanni suliffiutillu ingerlanneqarnissaannut sulisut
pisariaqartitavut Inatsisartuni aalajangersimanerput malillugu
ilinniartissinnaanngikkallartillugit kalaallit oqaasiinik atuisinnaanngitsunik
sulisoqartariaqarnerput akuerisariaqarparput. Periarfissaq alla tassaavoq
Kalaallit Nunaanni eqqartuussinerup pitsaassusaata iluarsiivigineqarnissaa
maannakkut ilinniartitsinitta pitsaassusaanut naleqqussarlugu. Periarfissallu
taanna tamakkiisumik innuttaasunut neqeroorutigisinnaanngilarput, innuttaasunut
ajoqutaanerpaamik ajornartusiutinik qaangiinissaq maani Inatsisartuni
pisussaaffigigatsigu.
Isertuutissanngilara uanga nammineq
inuttut pissutsit taamaannerat naammaginartuutinngin-nakku. Aaqqiissutissat
nutaat pitsaanerpaat Kalaallit Nunaannut Kalaallit Nunaannilu innuttaasunut iluaqutaasussat
inuunera tamakkerlugu suliniutigisimavakka, ingerlatsiviup suulluunniit
kalaallit oqaasiinik atuiffiusup inuutissarsiornermillu ingerlatsinerup
kalaallisut oqaasiisa siulliusutut anguniarneqarnerat piffissarujussuarmik
nukippassuarnillu atuiffiusussaavoq. Kisiaani aamma aqqutissaasoq taanna
ingerlavigaarput.
Ilinniartitaanermut tunngasut
ineriartortitsivigineqarnerat uninngaannanngilaq arriikkaluartumik
qularnaatsumilli suliffippassuit ullumikkut avataanit tikisitanik
suliffigineqartut nammineq inuttalersinnaaleriartorpavut. Paasisimalersimasakka
imaapput inissialiaativut iluarsartuunne-qalersinnaanngillat Inatsisartuni
taamatut inatsiliorniarnerinnarput pissutigalugu. Kalaallit Nunaanni nakorsat
amerlalerunernavianngillat taamaattoqalernissaa maani Inatsisartuni
inatsisiliuinnarutsigu. Amerlanerusunik ilinniarsimasoqalernavianngilaq
taamaattoqarnissaa maanni Inatsisartuni inatsisiliuutiinnarutsigu.
Ingerlaavigisaq tassaavoq
ilinniartitaaneq, ilinniartitaaneq aammalu ilinniartitaaneq. Taamaammat
ilinniarfiutitta pitsaanerulersinneqarnissaat aalajangiisuulluinnarpoq.
Meeqqat atuarfipput
ilinniagaqarnissamut tunngaviuvoq. Ilinniartitsisoqarneq annertunerusumik
suliniuteqarfigisariaqarparput ilinniartitsisut kalaallit amerlanerusut
pilersissagutsigit. Ilisimatusarfik suliatigullu ilinniarfiit
pitsaanerulersinneqassapput, avaataaniit tikisitanit atorfinnik
tigusisinnaalersussannik. Ilinniarsimasunik amerlanerusunik peqalernisarput
anguniarlugu aammalu taakkuninnga avataanniit ilinniarsimasunik taarsiiartussagutta
Maannakkut tamakku tamarmik naammanngillat, aamma kallaallit oqaasii
atornerulersittariaqarpavut, allatigut soorlu naqitatigut TV-kkullu.
Tusagassiorfiit taakku kalaallit oqaatsitta atugaanerannut
sunniutilerujussuupput, kalaallillu oqaatsitta atorneqartariaqarnerannut
annertusaataalllutillu aamma annertunerusumik paasinnilernissamut
aqqutissaapput.
Inuit ullumikkut namminneq ilinniartissinnaasavut annertunerujussuarmik
sulisussatut atorumaneqarput, ilinniarnertillu naammassinaguluunniit suliffissaminnik
aamma allaat neqeroorfigineqartarlutik. Matumani ilaatigut eqqarsaatigaakka
EVU-mi, peqqissaanermut ilinniarfinni, Ilinniarfissuarmi Ilisimatusarfimmilu
ilinniagaqarsimasut. Nunarsuatsinni sumiiffiit
qassikattannguimmita inunnut ilinniarluarsimasunut
suliffissaqartitsiniarnermik ilerasuuteqaratik oqarsinnaappammita?
Oqartariaqarpunga Kalaallit Nunaanni taama oqarsinnaavugut.
Ilinniartitaanerup
pitsaanerulersinniarneqarnera kalaallit oqaatsitta atugaanerulernissaannut
kalaallisut kalaallillu oqaatsitta atorneqartariaqarnerannut
paasinninnerulernissatsinnut suliniuteqarfissat pingaarnersaraat. Tamannalu
aamma sunniuneqarpoq. Kalaallit oqaasiisa atugaanissaat pillugu
inatsisiliornissaq ajoraluartumik iluaqutaasinnaanngilaq. Pissutsit ilaqarput
inatsisiliornerinnakkut qaangerneqarsinnaanngitsunik.
Pissutsit inuunitsinnut
pingaaruteqartut amerlasuut naalakkersuinermi suliaqartut
nalunaaruteqarnerinnaatigut killeqanngiusartumilluunniit
inatsisiliornerinnaasigut qaangerneqar-sinnaanngillat. Pissutsi inuunitsinnut
aalajangiisuulluinnartut aatsaat qaangerneqarsinnaasarput ilungersorluni
qasujaallunilu sulinikkut. Aammalu Nunatsinni innuttaasut ataasiakkaat
piumassuseqarluarneratigut aamma sapiissuseqarneratigut. Namminersornerulluni
Oqartussaaneq pillugu inatsimmi allannguutissatut siunnersuut eqqarsaatigalugu
Inatsisartunut ilaasortap Kristine Raahauge-p siunnersuummini oqaatigisaani
immikkoortoq 3-mik nutaamik ilanngussineq Namminersornerulluni Oqartussaanermi
Inatsisip ' 9-ata imarisaanik allangortitsissanngilaq. Taaneqartumi ittumik
oqaasertaliilluni imaalilluni ilanngussineq ' 9-p imarisaata saniatigut allamik
sunniuteqartussaanngilaq.
Naalakkersuisut isumaqarput
kalaallisut oqaatsitta atugaaneri pillugit siunnersuut immikkuullarissoq una
ajornartorsiutit suussuserpiaanerannik taakkununngalu aaqqiutissamik
suunngitsuusaartitsisuusoq. Naalakkersuisut sulissutiginiarpaat
ingerlatseqatigiiffiit Namminersornerullutik Oqartusanit pigineqartut
suleqataalissasut Kalaallit oqaasiisa ulluinnarni sapinngisamik
atorneqarnerulernissaannut.
Tamanna tunngavigalugu
Naalakkersuisut Inatsisartunut inassutigaat Inatsisartunut ilaasortap Kristine
Raahauge-p siunnersuutaa saqqummiunneqarnermisut iluseqarluni
itigartinneqassasoq.
Ruth Heilmann, Siumup oqaaseqartua:
Qujanaq. Inatsisartuni ilaasortap Kristine
Raahauge-p, Siumut, siunnersuutigaa Kalaallit oqaatiisa pisortat
namminersortullu suliffeqarfiinut saaffiginnissutitut atorneqarnerat
qulakkeerneqaqqullugu. Taannalu oqaluuserisassamut immikkoortoq 37-mut
ilaatigut attuumassuteqartuummat ilanngullugu Kultureqarnermut
Naalakkersuisumit aamma ilaa akissuteqarfigineqarpoq.
Siunnersuut Siumumiit paasilluarparput
aammalu anguniartuagassatut Siumumiit isumaqarfigalutigu. Kisiannili ullumikkut
inuiaqatigiinni qallunaanik annertuumik akuuffigineqarnerput eqqarsaatigalugu
aammalu kalaallisut oqalussinnaanngitsunik suleqateqarlutalu
akulersuuffigineqarnerput suli taamak annertutigitillugu tamarmik iluarisaannik
ilumut iliorneq ajornakusoortuutipparput.
Qallunaat nunaminni kalaallisut
ilinniartinneqarnikuunngillat, taamalu aamma suliffimmi ulapinnartumi
piffissaasuaffigineqartarpoq kalaallisut ilinniarnissaq. Pingaartumik aamma
suleqatit qallunaatut piginnaagaangata imaluunniit kalaallinik qallunaatut
oqalukkumatuunik suleqateqaraangamik. Nutserisoqarnikkuttaaq amerlanerusumik
pikkorilluartunillu suli ullumikkut amigaateqarpugut, naak amerliartuaarlutillu
pikkorissiartuinnaraluartut, suli pisariaqartitavut anguneqanngikkallarput.
Siunnersuuteqartup isumagaa kalaallisut
oqaatsit saaffiginnissutaasut, taammalu aamma saaffiginnissutaasut kalaallisut
aamma soorunami akineqartassasut. Tamanna Siumumi pissusissamisoortuutipparput
taamatullu atortinneqartarsimassanngippata pitsaanngitsumik
ingerlasoqarsimassaaq, taamalu inatsisip tunngaviusup anguniagaanik
uniuinerusumik aamma
ingerlasoqarsimassalluni. Siumumiilli erseqqissaatigissavarput
ingerlatsinermi pitsaasunut ilaasussaammat inatsisip malinneqarnissaa. Kisiaanilu
taamatut unioqqutitsisoqartillugu aammma maalaartarfissanik peqareerpugut,
soorlu aamma Ombudsmand-erput piareersima-juartuuvoq saaffigineqarnissaminut.
Taamaattumik Siumumiit
kaammattuutigissavarput saaffiginnittup oqaatsiminik akineqartarnissaa pisinnaatitaaffiummat,
tamanit sulisitsisunit suliffeqarfinnilu aqutsisunit malinneqartariaqartoq,
soorlu Namminersornerusuni, kommunini, nunaqarfinni allanilu suliffeqarfinni
tamani. Siumumiillu nammineq oqaatsit saniatigut qallunaatut tuluttullu
pisinnaasaqarnerup pingaaruteqassusia iluarinassusialu inassutigiuassavarput,
meeqqani inuusuttuni inersimasunilumi anguniarneqaqqullugu, illoqarfinni
nunaqarfinniluunniit ikikkaluaraanni piumassuseqartuni
ilikkarneqarsinnaasarmata.
Aamma maannakkut atortorissaarutit EDB-kkut
Internet-ikkullu periarfissap ammaanneqarnikuusup atorluarneqarnissaa
innersuussutiginarluinnartut ilagaat. Tassami oqaatsit atortorissaarutaapput
pingasuinnillu oqaaseqartut tassaapput silarsuarmik inunni
nuannaartorinarnerpaat. Tassuunakkut attaveqarsinnaanerat killeqanngiusarpoq
taamaattumillu aamma qallunaat nunatsinnik inuinillu nuannarisaqartut
kaammattuinnassavavut oqaatsitta ilinniarnissaat tunuarsimaarfigiinnarnagit
ilinniarniartaqqullugit, aamma oqaatsinik ilinniarfipput iluaqutaasinnaasut
ilagisaat atorluaqqunarmat.
Tassunga siunnersuummut tunngatillugu
Siumumiit taamatut oqaaseqarluta Naalakkersuisut siunnersuummik
itigartitsinissamik inassuteqaataat akuersaarparput.
Otto Steenholdt, Atassutip oqaaseqartua:
Siunnersuut imaluunniit qulequtaq takuinnarlugu isumaqatiginarluinnarpoq, pingaartumik saaffiginnittussat saaffigisassallu imminnut paaseqatigiilluinnarnissaat eqqarsaatigissagaanni.
Suli nunatsinni ilaqarpugut, oqarta pissusissamisoorluinnarlutik kalaallisuinnaq oqaluttunik.
Aaammali pisariaqarluinnartumik nunarput imaluunniit nunatsinni pissutsit ima ineriartorput suliffeqarfippassuaqarluni allatut ajornartumik tikisitanik pinngitsooratik sulisoqartariaqartunik. Tamakku oqaatigisarpagut uagut nunaqqatigut sulianik tamakkuninnga tigusisussat suli pisariaqartinnagit sulisuugallartunik.
Ilinniartitsusussaaleqineq, niviarsinik nakorsanillu amigaateqarnerujussuarput allaat siunissami pissusiulerumaartunik ernumalersitsivoq. Uku taagoriikkavut aamma saaffigineqartussaammata ATASSUT-mit isumaqatigilluinnarparput ima oqarmat: Aqqutissaa ingerlavigigipput.
Siunertaq assortuussutissaanngilaq ajoraluartumilli ingerlarusaarneq suli ukiuni arlaqaqisuni atuuttussaagunarpoq. Pissutsilli uparuartakkagut pitsaanerulersinniarlugit isumagisariaqarparput pisortat namminersortullu suliffeqarfiini saaffigineqartussat eqqaanniittoqartariaqassammat nalunartut pillugit oqaluttaasinnaasunik, tassa atorfilik saaffigisassaq kalaalisut paasisinnan-ngippat.
Aamma illuatungaanut saatissinnaavarput, saaffigisassaq qallunaatut paasisinnaanngippat.
Naggataagut ATASSUT-mit oqaatigissavarput,inuiattut kissaatigisartagarput ersarippoq anguniarnerali imaasiallaannaq, soorlu inatsisiliuussinikkut anguneqarsinnaanngilaq. Ilinniartitaaneq aammalu ilinniartitaaneq tamatumunna sakkussaasoq ilisimaaralugu ingerlattuarniartigu.
Allakkalli allakkanulluunniit pisariaqartunik akissutinik imallit kalaallimullu toqqaannartumik nassiussat, soorunarluinnaq kalaallisut allassimasariaqarput. Taamaanngippat allagsisup allagarsiani paasinavianngimmagit.
Taama naatsumik oqaaseqarluta siunnersuut ullumikkorpiaq piviusunngortitsinsinnaanngitsutut imaluunniit piviusunngortinneqarsinnasutut isiganagu nalilerparput.
Johan Lund Olsen, Inuit Ataqatigiit oqaaseqartuat:
Inuit Ataqatigiinni naalakkersuinikkut suliniaqataanermi sallerpaanut ilaatinneqartuarpoq inuup tunngaviusumik ataqqinassuseqarnera aammalu kiffaanngisuseqarnera, akisussaassutsimik annertuumik aamma nassataqartoq.
Taamaattumik Inuit Ataqatigiinni naallakkersuinikkut sullissiniarnitsinni sumiluunniit inuit pisinnaatitaaffeqarnermikkut illersorneqartuarnissaat aallaaviujuarpoq. Taamaattumik inuup kialuunniit inatsisit tunngaviusut tunngavigalugit pisinnaatitaaffeqarlunilu akisussaaffeqarnera ataqqiumavarput qaqugorsuarmullu ataqqiuassallugu.
Inuit kiikulluunniit naligiimmik periarfissaqarlutillu pisinnatitaaffeqarnissaat aamma taamaattumik salliutinneqartuassaaq suliniutigineqartuarneralu naalakkersuinikkut oqartussaaqataanermi, aqutsinermi kiffartuussinermilu periarfissani tamanna ersersinneqartuar-tariaqarluni.
Taamaattumik pingaaruteqarluinnartuuvoq innutaasut inuiaqatigiinni sullinneqarnerminni periarfissaminnik naligiimmik paasitineqartarnissaat nammineq oqaaserisatik aamma aallaavigalugit.
Taamatullu Inatsisartunut ilaasortap Kristine Raahauge-p siunnersuutaanut tunngatillugu aalarniuteqareerluta INUIT ATAQATIGIINNIIT siunnersuuteqartoq tunngaviusumik taperserusussavarput, siunnersuuteqartummi kalaallisut oqaatsivut pillugit maannakkut qaqiligai Inuit Ataqatigiinniit qangaaniili saqqummiussortuartagaannut naapertuulluinnartuupput.
Taamatulli oqaseqareerluta oqaatigissavarput siunnersuuteqartup Namminersorne-rulersimanerput pillugu inatsisitta aatsaat allannguuteqartinneqaqaarneratigut anguneqarsinnaasutut matumani tikkuagaa INUIT ATAQATIGIIT aqqutissaasorinngimmasuk, tassami danskit naalagaaffiat akulerutiteqqaanngikkaluarlugu isumaqarluinnaratta Nammersorneruluersimanerput pillugu inatsisitta allannguuteqartinneqaqaarneratigut anguneqarsinnaasutut matumani tikkuagaa INUIT ATAQATIGIIT aqqutissaasorinngimmasuk, tassami danskit naalagaaffiat akulerutiteqqaanngikkaluarlugu isumaqarluinnaratta Nammersornerulersimanerput pillugu inatsisitta maannamut sinaakkusiussai saneqqutaanngik-kaluarlugit namineq oqaatsivut pillugit Inatsisartut aamma inatsisiliorsinnaareeratta - taamaattumilu maannakkut aamma apeqqutaaginnalermat naalakkersunikkut timitaliinissamut aamma piumassuseqarnissaq.
Tamanna oqaluuserisassatsinni tullinnguuttuni immikkoortuni 55-imi, 82-imi kiisalu immikkoortoq 83-imi sammisaqarnissatsinni takujumaarparput ajornanngitsoq, Inuit Ataqatigiinniillu taamaattumik neriuutigalugulu naatsorsuutigivarput matumani siunnersuuteqartup oqaluuserisassani taakkunani aamma INUIT ATAQATIGIIT uagut ilalersorumaaraatigut - pingartumik immikkoortoq 82 aammalu 83 isumerfigineqartusanngorpata. Inuit Ataqatigiit siunnersuutaat taakku tamarmik alloriarnerupput kalaallisut oqaatsitta atuganerisa annertusarneqarnissaannut nukittorsarneqartuarnissaannullu suliniuteqartuartariaqarnitsinnut, tamakkuuppummi Inatsisartut naalakkersuinikkut suliaqarniarnerminni piumassuseqarunik namminneq inatsisiliuussiffigisinnaasaat Namminersornerulernerput pillugu inatsit allanngortinniaqqaanngikkaluarlugu.
Namminersornerulernerpunni pillugu inatsit Inatsimmut tunngaviusumut (Grundloven) nallersuunneqaqqajaareersimammat, imaaliallaannaq Naaminersornerulersimanerput pillugu inatsit allanngortinniarsinnaanngilarput - naak aamma uagut allangortikkusukkaluaqalutigu. Tassami siullermik Inatsisartut tamanna tamarmiulluta noqqaassutigeqqaartariaqarparput kingornalu aamma danskit folketing-iannut saqqumissinnarlugu Folketing-i tamarmiusoq aamma isumaqataalersinniaqqaartariaqarparput. Taamaalillutalu qularutissaanngilaq ukiorpaalukasiit aamma tassungaannaq atulussinnarsinnaassagatsigit, naak nammineq aamma aaqqiissuteqareersinnagaluarluta.
Namminersornerulernerpummi pillugu inatsit allangortinniassallugu ajornaatsuinnaanngimmat Naalakkersuisut siunnersuuteqartumut akissuteqaataannii ersersinneqarpoq - Naalakkersuisummi partiinit arlariinneersut Inatsisartut taamatut noqqaassuteqarnissarput maannakkut akuersaarnartuutinnginnerarpaat.
Taakku akissuteqareernerminni ilinniartitaaneq, ilinniartitaajuarnerpullu kisiat aqqutissaasorivaat, tassamigooq kalaallit oqaasiinik atuisinnaanngitsunik sulisoqartariaqarnerput aamma suli ukiorpassuarni akueriinnartariaqaratsigugooq.
Taamaakkaluartorli INUIT ATAQATIGIIT oqaatiginngitsoorusunngilarput, imaattariaqarmat kalaaleq kalaallisuinnaq oqaaseqartoq inunnguuseralugu oqaatsini atorlugit aamma pisortanit sullineqarumalluni noqqaassuteqarsinnaanissaminut pisinnaatitaaffeqassasoq - tamannaavorlu oaluuserisassatsinni tullinnguuttuni aamma angunagasarput.
Tamanna ajornanngilaq Naaminersornerulernerput pillugu inatsit aamma allanngorteqqaanngikkaluarlugu - periarfissarmi tamanna oqaatigeriikkatsituut inatsisip sinaakkutitaliussaasa iluaneereerpoq. Apeqqutaaginnalerporlu pisortat allaffeqarfiisa avataatigut pisortat ingerlatseqatigiiffittut suliffeqarfiutaannut kiisalu nammersortut suliffeqarfiinut aamma taamatut innutaasut pisinnaatitaaffeqarnissaasa qulakkerniarnissaannut maannakkut aamma politikkikkut piumassuseqartoqarnersoq.
Oqaatigeriikkatsituut piumassuseq tamanna INUIT ATAQATIGIIT ilumoorupparput. Taamaattumik maannakkut pisortat allaffeqarfiinut kiisalu pisortat ingerlatseqatigiiffittut suliffeqarfiinut tunngatillugu oqaatsitsinnut tunngasunik alloriarnerut siullertut, siunnersuuteqarpugut immikkkoortoq 55-imi, 82-imi kiisalu immikkoortoq 83-imi.
Tullinnguutisapput namminersortut suliffeqarfii - tamannalu kingusinnerpaamik pisariaqarpoq tullisssaani Inatsisartut nutaat qinersereernerup kingorna katersuuteqqaalerpata - aamma Nammersornerulernerput pillugu inatsit allangortinniaqqaanngikkaluarlugu.
Taamatullu oqaaseqarluta INUIT ATAQATIGIIT siunnersuuteqartoq kiisalumi partiit allat Kattuseqatigiillu kaammattorumassavagut oqaluuserisassatsinni tullinnguuttuni aamma tapersersorniarumaaraatigut.
Anthon Frederiksen, Kattuseqatigiit:
Inatsisartunut ilaasortap Kristine Raahauge-ip siunnersuutaanut assingusunik oqallinneq ukiuni arlaqalersuni timitalerneqanngitsutut illuni oqallisaajuarpoq.
Oqartarpugut inuunerput tamarmi ilinniarfiuvoq. Aammami tamanna ilummoorluinnarpoq. Soorlu assersuutigalugu; ukiaq manna ataatsimiinnissarput sioqqullugu inatsisartuni suleriaatsimut inatsisiliornermulu tunngassuteqartut pillugit pikkorissartinneqarnerat ilisimatuut pikkorisartitsisut ilaat oqarpoq; inatsisiliornermi mianerisassat ilagilluinnaraat, inatsisip inatsisinut allanut imaluunniit nunatta tamat akornanni isumaqatigiissutaannut il.il. akerliunnginnissaa ilanngullugu eqqaamasiaqaripput.
Tassami inatsimmut allanguutissatut siunnersuummi piumasaqaatit ilaatigut siuliani oqaatigineqartunut attuisuupput, taamaattumik pissutsit piviusut isigalugit aammalu taammakkallartillugit siunnersuut tamakkiisumik atortinneqarsinnaanngitsoq nassuerutigisariaqarparput.
Taamaattumik Naalakkersuisut akissuteqaamminni ilinniartitaanerup suli annerusup, ajornatorsiutinik ilaatigut annerusumik qaangiiniarnermi sakkugineqarsinnaanera sanioqqukkuminaatsoq oqaatigivaat. Taamaamma ilinniartitaanerup aammalu ilinniartitaaneq annerusumik ingerlanneqartariaqarpoq suliffeqarfinni kalaallit oqaatsitta atorneqarnerat, kalaallillu ilinniarluarsimasut annertunerusumik sulisorineqarnissaat anguneqassappat.
Massakkummi ajornartorsiut oqaluuserisami auni pineqartoq inatsisiliornikkuinnaq aaqqinneqarsinnaanngilaq.
Sumummi iluaqutaassua maannamut inatsisiliarpassuatta ilaatigut tamakkiisumik atorneqarsinnaanngitsut amerlisaannassagutsigit. Inatsisiliornermimi inatsisit atuutsinneqarlutik malitsinneqarlutillu atorsinnaaneri aamma eqqaamasariaqarpoq.
Tassami pissutsit piviusut qiviasagutsigit inatsiartunut ilaasortap Kristine Raahauge-p siunnersuutaa assersuutigalugu akuerineqarluni atortinneqalissagaluarpat aatsaat uluamik nakorsassaaleqineq suli annerungaartumik ajornartorsiutiginerulissagaluarparput.
Taamaattumik aamma ilaatigut iluaqutaasarpoq qanoq iliuuseqalertinnani eqqarsarluaqqaalaarnissaq.
Taamatut naatsumik oqaaseqarlunga Naalakkersuisut inassuteqaataat akueraara, naatsorsuutigilluinnarlugulu Naalakkersuisut neriorsuutertik, tassalu suliffeqarfinni Namminersornerullutik Oqartussanit pigineqartuni kalaallit oqaatsitta ulluinnarni atorneqarnerulernissaannut suleqataanerulernissartik eqquutikkumaaraat.
Jonathan Motzfeldt, Naalakkersut Siulittaasuat:
Nannaarutigaara tunngaviatigut partiit tamarmik akerlerinngisaannik maani saqqummiussaqarmat, naak Inuit Ataqatigiit oqaaseqarnerminni aamma nalunngilara tulliuttumi oqaaseqarnissaminni apeqqut taanna annertuumik suli iserfigiumaaraat. Kisianni nuannaarutigaara Siumup oqaaseqartuata aammalu Atassutip kiisalu aamma nuannaarutigisannik Kattusseqatigiit oqaaseqartuata oqaaserisakka Naalakkersuisut sinnerlugit saqqummiussakka isumaqatigimmatigit. Tassami oqaatsit tungaatigut ajornartorsiutaasinnaasut isumaqarpunga inuiaqatigiinni eqaatsumik ikioqatigiinnikkut qaangerniarneqartariaqartut, sumi naapinneqaraangata taava pisinnaasortatta qanngali ikiuuttarput paaseqatigiinnissamik ajunngitsumik angusaqarnissaq anguniarlugu. Aamma taamaalilluni periarfissamik atuisarneq siunissami atorneqartuassaaq.
Inuiaat silarsuarmi ataasiinnarmik oqaasillit tassaagunarput amerikkarmiut, kisianni tamatta amerikkamiuunngilagut aamma amerikkamiunngornaviarnata. Inuiannut ilaavugut ikitsunnguanut silarsuarmi taamaakkattalu oqaatsinik allanik aamma ilinniartariaqarluta. Aamma taamaaliussaagut uanga aamma nalunngilara tamakku pillugit oqallinnermi peqataagaangama erseqqissartariga uanga isigigakku oqaatsinik allanik atuisinnaaneq atortorissaarutinik ilinniagaqarneq atortorissaarutinik ilikkarumasarpugut EDB-kkut allaat ilinniarumallugit, atortorissaarutit pisariunngitsumik pitsaasumillu suliumalluta. Oqaatsinik allanik ilinniagaqarneq aamma atortorissaarutinik ilinniarneruvoq. Annertunerusumik artornarnerusunngorlugu pissusilimmik oqaatigissallugu uanga merserisarpara. Taamaattumik aamma katersuuffigaarput taanna oqaatsit taama ittut atortorissaarut oqaatsinik allanik atuisinnaaneq aamma innersuunneqarmat nuannaarutigaara.
Taamaalillugu tassa eqaatsumik aammalu persuarsiornanngitsumik oqaatsinik allanik atuisinnaanerup nalinginnaanera atortariaqarparput maani. Soorunami aamma ajuusaarutigisarpara oqaatsit uagut nammineq danskinit inuiannillu allanit ilinniarniarneqarnerisa pisariussusiat/artornassusiat ilikkanngitsoorneqartarnerat. Ajuusaarutigisarpara aamma taanna nammineq uanga. Kisiaanili aamma iluariunnaartarpara oqaraangata oqaatsivut kalaallit oqaasii artornaqisut ilinniarlugit. Akornanni kalaallit kalaallisuinnaq oqaasillit inuunngikkaanni ilinniarnera artornarput, allaat uagut kalaaleqatitta atuffarlunnersui naammagineq ajorpavut, namminneq aamma naammattumilluunniit oqaatsivut ilikkarneq ajorsimavaat, ilikkarnerlu ajorpavut. Atuffarluttugut amerlavallaaqaagut aamma tusarninngilagut atuffarlunnersuarput. Tamakkunatigut aamma iluarsisassagut nammineq amerlaqaat, iluarsisariaqarput tassaniipput aamma amerlasuut naammassiniagassavut.
Qujassutigaara taama periarfissaqartitaagama Naalakkersuisut sinnerlugit erseqqissaateqalaarnissannut. Aammalu oqaatsivut nuannersut, sulilu aamma ilinniartariaqartut, aamma uagut nammineq taakkuninnga atugaqartugut suli aamma ilinniarluassagivut qularinagu.
Kristine Raahauge, siunnersuuteqartoq, Siumut:
Taanna siunnersuut aamma uanga
siunnersuutigigakku naatsorsuutiginngivippara, tassa siunnersuutigineqarpat
tassa imaasiinnarluni atuutilissasoq. Soorlu Inuit Ataqatigiit
oqaaseqarnerminni nassuiaatigigaat una inatsit augut
allanngortissinnaanngikkipput, tassalu aatsaat danskit folketing-ianni
allanngortinneqarsinnaasoq. Kisiannili taakkununnga oqariartuutimik
oqariartuuteqarutta ataatsimoortumik tulluarnerutillugu taama siunnersuut
allassimavara. Oqallissaarutaavoq aammalu oqallisigineqarnera isumaqarpunga
nuannersoq. Tamassimi qulequtaa isumaqatigaarsi, kisianni iliuuseriniakkat
taakku akuersaaruminaatsillugit. Uani inatsimmi ilumut allassimavoq tassa
kalaallit oqaasii pingaarnersaasut, kisiannili taamma allassimariarluni
sanngeequtaagami immikkoortut aappaanni allassimanera tassa kalaallit oqaasi
danskillu oqaasii pillugit: oqaatsit taakku tamarmik pisortaqarfinni
atorneqarsinnaapput. Tassa taamaasilluta aalajangersimanngilaq sorleq
atorneqassasoq, taannalu tassa ullutsinni ajornartorsiutaasoq
atorfinitsitsisarnermi aamma tassani peqqutaallutik ila
nutserisoqarfiunngitsuni. Taamaattumik naak periarfiusinnaasumik inatsit
tunngavia allanngortinngikkaluarlugu siunnersuusiorsimagaluarpunga.
Ersarissaaneruinnarmat oqaatsit taakku atorneqassappata taava ersarinnerusumik
aamma tamarmik periarfissaqarnissaat.
Allaasimassagaluarpoq immaqa
allassimasuuppat oqaatsit taakku tamarmik pisortaqarfinni atorneqassapput.
Taava tassa ajornartorsiuteqassanngikkaluarpugut pinngitsoornata taakku
kalaallisut qallunaatullu saaffiginninnermi piareersimasoqartuassammat.
Kisianni taamma allassimasoqanngilaq. Aammalu eqqarsaatigilluarsimavara soorlu
immaqa oqaaseqaatit ilaat atuaraanni Kattusseqatigiinninngaanniit taanna
eqqaaneqarmat. Periarfissat massakkut atorfinitsittakkavut nalunnginnakkit
aamma oqaatsinik aammalu uagut kalaallit ilagut oqaatsinik, qallunaat
oqaasiinik ilinniarsimanerput amigartoq, taamaattumik aamma taakku
eqqaasimavakka, tassa nutserisoqarneq allallu eqqartorsimavakka, aamalu
ilinniartitaaneq
taanna annerusumik taanna Naalakkersuisut
tikkuartugaat, aamma tassani eqqaasimavara oqaatsinik ilinniarfimmik
pilersitsinikuugatta tassanilu neqeroorutit, tassa kalaallisut oqaatsit,
qallunaatut, tuluit oqaatsillu allat ilinniarsinnaasavut aamma tassani
taakkartorsimavakka periarfissat.
Taavalu siunersuuteqarnermut
tunngavigisimavara tassa april-imi 1996-imi Siumut siulersuisuunerisa
ataatsimiinneranni Inatsisartunut ilaasortat uagut peqataasaratta, tassani
piumaffigineqarsimavugut Naalakkersuisunut aammalu Inatsisartunut ilaasortat
kalaallisut oqaatsitta saaffiginninnermi illersugaanissaat, tassami
atorneqartarnissaannut illersugaanissaat suliffeqarfinni aammalu namminersortut
suliffeqarfiutaani. Peqqutigalugu ilaatigut saaffiginninnerit allaat
allakkatigut saaffiginninnerit qallunaatuinnaq akineqarsimaneri. Tamakku
annertuumik ajornartorsiutitut isiginiarneqarsimammata. Tassalu taanna
aallavigalugu kissaatigineqarsimavoq suliniutigissagipput, soorlu
siunnersuuteqarnermut kalaallit oqaasii pisortaqarfinni suliffeqarfinnut
saaffiginninnerni atorneqarnissaasa qulakkeerniarneqarnissaat. Taanna april-ip
14-ianni 1996-imi tusagassiutitigut Siumup siulersuisuunerisa
saqqummiussimallugu.
Finn Karlsen, Ataatsimiinnermik aqutsisoq, Inatsisartut
Siulittaasuata tullia:
Tassalu taamaasilluni
immikoortoq 54 suleriaatsimi ' 41
naapertorlugu apeqquteqaat tunngavigalugu kalaallit oqaasisiisa pisortat
inuillu ataasiakkat suliffeqarfiutaannut saaffiginninermi atorneqarnissaat
pillugu siunnersuutip Kristine Raahauge-mit siunnersuutigineqartup
oqaluuserineqarnera tamaanga naammassivoq.