Oqaluuserisassani immikkoortoq 55_82_83 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders Andreassen, Inatsisartut
Siulittaasuat.
Otto Steenholdt, Inatsiseqarnermut Ataatsimiititaliap siulittaasua:
Inatsisartut
Inatsiseqarnermut Ataatsimiititaliaat ullormi oqaluuserisassat 55, 82 aamma 83
oqallissutigisimallugit.
Siullermik
oqaluuserisassaq 55-imut tunngatillugu siunnersuutip aappassaarneqarnissaanut tungasumik
tunniunneqartoq. Taavalu aamma immikkoortoq 82 aamma suliarineqarnerata
nanginneqarnera. Kiisalu immikkoortoq 83 aamma immikkoortup suliarineqarnerata
nanginneqarnera.
Tassani suliamik
suliarinninnermi Inatsisartut Inatsiseqarnermut Ataatsimiititaliaat ataatsimiittoq
inuttaqarpoq:
Otto Steenholdt,
Atassut, Anders Nilsson, Atassut, Niels Mattaaq, Siumut aamma Johan Lund Olsen,
Inuit Ataqatigiit.
Inatsisartut
Inatsiseqarnermut Ataatsimiititaliaata Inatsisartut siullermeerinnereerneranni
Inuit Ataqatigiinnit siunnersuutit pingasut oqaaseqaatitaat ilanngullugit
misissuataarpai. Ataatsimiititaliap suliamik suliarinninnerani KANUKOKA-miit
aallartitat tamatuminnga qinnuigineqarnermik kingorna suliassat
suliarineqartarnerat pillugu inatsimmut allannguutissatut siunnersuummut
saqqummiunneqartumut tunngatillugu isummersuutiminnik saqqummiussinissaminnut
aggersarneqarsimavoq.
Kiisalu
suliassat suliarineqartarnerat pillugu inatsisip 1994-imi
atortuulersinneqarnerata kingorna kommunit ingerlatsinerannut ataatsimut
isigalugu qanoq sunniuteqarsimanersoq kattuffik nalileeqquneqarpoq. Tamatuma
kingorna Kalaallit Nunaanni Kommunit Kattuffiata inassuteqaatai
ataatsimiititap aalajangiinermini ilanngullugit tunngavigisimavai.
Inatsiseqarnermut
ataatsimiititap erseqqissassavaa suliassat suliarineqartarnerat pillugu inatsimmut
allannguutissatut siunnersuutitut saqqummiunneqartut KANUKOKA-miit
akerlilerneqanngimmata. Ataatsimiititaliap isumaqatigiissup naapertuuttutut
isigaa innuttaasut oqaatsisigut pisortanit oqartussaasunit sullinneqarneranni
pisinnaatitaaffiisa suliassat suliarineqartarnerat pillugu inatsimmi
ilanngunneqarnissaat, taamaalilluni taamatut inatsisitigut piginnaatitaaffeqarneq
ersarissumik paatsuugassaanngitsumillu allassimalissaaq.
Inatsiseqarnermut
ataatsimiititap tassunga ilanngullugu KANUKOKA-alu kaammattuineratigut
Naalakkersuisut kaammattorpai suleqatigiissitamik pisortat oqartussaasut
ulluinnarni sullissinerannut sanilliullugu sulianik suliarinnittarnermut
inatsisip qanoq tulluartigineranik naliliisussamik
pilersitseqqullugit.Inatsimmi aalajangersakkat iluamik malitsinneqarnissaannut
aporfissaqartoq paasineqarpat suleqatigiissitaq aaqqiissutissanik
siunersuusiortariaqarpoq.
Taama
oqaaseqarluni ataatsimiititaliaq inassuteqarpoq pisortat ingerlatsineranni
suliassat suliarineqartarnerat pillugu Inatsisartut inatsisaata
allanngortinneqarneranik Inatsisartut inatsisissaattut siunnersuut
maannakkutut iluseqarluni aappassaaneerlugu suliarineqassasoq.
Pisortat
ingerlatsineranni suliarineqartarnerat pillugu Inatsisartut inatsisaanni '7-ip
suliffeqarfinnut Namminersornerullutik Oqartussanit pigineqartunut
atortuulersinneqarnissaanik Inatsisartut aalajangiinissaannut siunnersuut
saqqummiunneqartoq aammalu suliffeqarfinni Namminersornerullutik Oqartussanit
pigineqartuni oqaatsisigut sullinneqarneq pillugu Inatsisartut aalajangiinissaannut
siunnersuut saqqummiunneqartoq Ataatsimiititap isumaqatigiilluni ilanngullugu
isumaqatigai.
Ataatsimiititap
isumaqarluinnarpoq pissusissamisoortuusoq piginneqatigiiffiit Namminersornerullutik
Oqartussanit pigineqartut oqaatsit atorluarneqarsinnaanerusut aallaavigalugit
sullissippata. Taamaattorli ataatsimiititaq isumaqarpoq suliffeqarfiit
Namminersornerullutik Oqartussanit pigineqarnerat tunngavigalugu immikkut
ittumik piumasaqaateqarfigineqarsinnaassasut minnerunngitsumik oqaatsisigut
sullinneqarneq eqqarsaatigalugu.
Aalajangiinissamik
siunnersuutit taakku marluusut Inatsisartunit akuersissutigineqarnerisigut innuttaasut
piginneqatigiiffinnut Namminersornerullutik Oqartussanit pigineqartunut
attaveqarnerminni oqaatsit pineqartut arlaasa atornissaat
piumasaqaateqarsinnaanerat inatsisit tunngavigalugit pisinnaanngussaaq.
Taamatut
oqaaseqarluni Inatsisartut Inatsiseqarnermut Ataatsimiititaliaata pisortat
ingerlatsineranni suliassat suliarineqartarnerat pillugu Inatsisartut
inatsisaanni '7 a-p
suliffeqarfinnut Namminersornerullutik Oqartussanit pigineqartunut
atortuulersinneqarnissaanik Inatsisartut aalajangiinissaannut siunnersuutip
aamma suliffeqarfinnut Namminersornerullutik Oqartussanit pigineqartuni
oqaatsisigut sullinneqarneq pillugu Inatsisartut inatsisaattut siunnersuummik
saqqummiisoqarnissaanik Inatsisartut aalajangiinissaannut siunnersuutip
Inatsisartunit siullermeerlugit suliarineqarnerisa nanginneqarnissaat
inassutigaa.
Taamatut
isumaliutissiissut Inatsisartut Inatsiseqarnermut Ataatsimiititaliaanniit maani
Inatsisartunut saqqummiuppara.
Jonathan
Motzfeldt, Naalakkersuisut Siulittaasuat:
Oqaluuserisassani
immikkoortut 55, 82 aamma 83 Inatsiseqarnermut Ataatsimiititaliap ataatsimut
suliarisimammagit naalakkersuisut akissuteqaamminni aamma ataatsimut
akissuteqarfigissavaat.
Pisortat
ingerlatsineranni suliassat suliarineqartarnerat pillugu Inatsisartut
inatsisaata allanngortinneqarneranik Inatsisartut inatsisissaannut
siunnersuutip massakkutut isikkoqarluni aappassaaneerneqarnissaa
Inatsiseqarnermut Ataatsimiititaliap isumaqatigiissup inassutigigaa naalakkersuisut
paasivaat.
Siullermeerinninnermi
siunnersuummut naalakkersuisut ilaliipput, matumanilu nalunaarutigiinnassallugu
siunnersuutip massakkutut isikkoqarluni
pingajussaaniigassanngortinneqarnissaanut naalakkersuisut isumaqataammata.
Naalakkersuisut
maluginiarpaat ataatsimiititaliaq isumaqatigiissoq naalakkersuisunut kaammattuuteqarmat
suleqatigiissitamik, pisortat oqartussaasut ulluinnarni sullissinerannut
sanilliullugu suliassat suliarineqartarnerat pillugu inatsimmi aalajangersakkat
qanoq tulluartigineranik naliliisussamik pilersitseqqulluta. Suleqatigiissitap
suliassarissavaa inatsimmi aalajangersakkat iluamik malitsinneqarnissaannut
aporfissaqartoq paasineqarpat aaqqiissutissanik siunnersuuteqarnissaq.
Naalakkersuisut
isumaqarput inatsisit akuttunngitsunik nalilerneqartarnissaat pisariaqartoq,
taamatullu aamma inatsimmi aalajangersakkat ulluinnarni pissusiviusunut
naapertuunnersut nakkutigineqartariaqartoq. Taamaattumik naalakkersuisut
Inatsiseqarnermut Ataatsimiititaliap kaammattuutaa nuannaarutigalugu malinniarpaat,
suleqatigiissitamillu, pisortat oqartussaasut ulluinnarni sullissinerannut
sanilliullugu suliassat suliarineqartarnerat pillugu inatsimmi aalajangersakkat
qanoq tulluartigineranik naliliisussamik piaartumik pilersitsisoqarnissaa
isumaginiarlugu.
Oqaluuserisassani
immikkoortunut 82-imut 83-imullu naalakkersuisut ataatsimut isigalugu
oqaaseqaateqarput sunnersuutit siuliani taaneqartut Inatsisartuni
siullermeerneqarnerannut nangissutitut siunnersuut Royal Greenland A/S-imut,
KNI-mi ingerlatseqatigiiffinnut, NUKA A/S-imut Tele Greenland A/S-imut Royal
Arctic Line A/S-imullu oqaaseqarfigeqquneqarpoq.
Ataatsimut
isigalugu ingerlatseqatigiiffiit naliliipput IA-mit siunnersuutit
malitsigisaannik oqaatsitigut sullinneqarnissamut piumasaqaatit naammassineqarnissaat
ajornartorsiutigissagunarnagu. Ingerlatseqatigiiffiit pinngitsoqaratik
oqaatigaat ingerlatsinerminni tunngavigigitsik pisisartunut pilersuisunullu
oqaatsit taakku atugaat atortugit attaveqarsinnaanissaq.
Royal Greenland
A/S aamma NUKA A/S ataatsimut isigalugu isumaqarput, ingerlatseqatigiiffiit
Namminersornerullutik Oqartussanit pigineqartut inatsisinut
ingerlatseqatigiiffinnut namminersortunut allanut atuuttunut
ilaatinneqartariaqartut. Ingerlatseqatigiiffiit Namminersornerullutik Oqartussanit
piginneqartut "immikkut malittarisassaqartinneqassanngillat".
NUKA A/S-ip
oqaatigaa pineqartumi sakkortuvallaamik inatsisiliorneq kinguneqarsinnaasoq
suliassaqarfinni pisisartunut pilersuisunullu attaveqarfiusuni sulisunik
marluinnik oqaasilinnik ingerlatseqatigiiffiit annertunerusumik
atorfinitsitsiumalerunissatut. Taamaalilluni sakkortuvallaamik inatsisiliorneq
kinguneqarsinnaavoq inuit kalaallisuinnaq oqaluttut inuussutissarsiornikkut
periarfissaasa killilerneqarnerannik.
Royal Arctic
Line A/S-ip eqqaasitsissutigaa oqaatsigut ataasiinnaanngimmata ' 7a-p massakkutut
oqaasertalerneqarnerata ersersissinnaasaatut. Avanersuarmi Inughuit nunattalu
kangiani Iivit oqaasii imaaliallaannaq nunatta kitaani oqaatsitsinnut
sanilliunneqarsinnaanngillat, taamaattumik pisuni assigiinngitsuni Inughuit
Iivillu oqaasii atorlugit sullissineq ajornartorsiuteqarfiusinnaalluni.
Suliffeqarfiit
Namminersornerullutik Oqartussanit pigineqartut amerlanersaat inatsisit
tunngavigalugit ingerlataqanngillat/aalajangiineq ajorput, taamatullu aamma
ingerlatseqatigiiffiit ingerlatsineranni aningaasartuutit ikittuinnaat
Namminersornerullutik Oqartussanit matuneqartarlutik, taamaalillutillu
ingerlatseqatigiiffiit ajorinngilaat ' 7a
aamma atuutissappat inatsisit tunngavigalugit ingerlatsinermi
aalajangiisinnaatitaanermut ingerlatseqatigiiffiit ingerlassinnaasaannut.
Ingerlatseqatigiiffiit
nalinginnaasumik tunngavigaat oqaatsitigut allakkatigulluunniit saaffiginnissutit
oqaatsit saaffiginninnermi atorneqartut atorlugit akineqartarneri.
Suliffeqarfinnit
Namminersornerullutik Oqartussanit pigineqartunit akissutit tiguneqarsimasut
tunngavigalugit Pisortat ingerlatsineranni suliassat suliarineqartarnerat
pillugu Inatsisartut inatsisaanni ' 7 a-p suliffeqarfinnut
Namminersornerullutik Oqartussanit pigineqartunut atortuulersinneqarnissaanik
Inatsiseqarnermut Ataatsimiititaliap inassuteqaataa taamaalillutik
naalakkersuisut isumaqatigaat.
Suliassat
suliarineqartarnerat pillugu inatsimmi ' 1, imm.
2 naapertorlugu nalunaarusiornissaq naalakkersuisut piaartumik aallartissavaat,
suliffeqarfiit Namminersornerullutik Oqartussanit pigineqartut inatsimmi ' 7a-mut
ilaatinneqartussanngorlugit.
Oqaluuserisassani
imm. 83-imut naalakkersuisut oqaaseqaatigaat Ingerlatseqatigiiffiit Namminersornerullutik
Oqartussanit pigineqartut amerlanersaasa ataatsimut isigalugu pissusissamisoorsorinngilaat
aktiaateqarluni ingerlatseqatigiiffiit pisortanit oqartussaasunit tamakkiisumik
ilaannakortumilluunniit pigineqartut qanoq pigineqarnertik pissutigiinnarlugu
aktiaateqarluni ingerlatseqatigiiffiit pillugit inatsimmi
nalunaarneqarsimasunit allaanerusunik amerlanerusunillu
pisussaaffilerneqassappata.
Ingerlatseqatigiiffiit
oqaatigaat ingerlatseqatigiiffiit Namminersornerullutik Oqartussanit
pigineqartut inatsisitigut ingerlatseqatigiiffittut allatulli
inissisimasariaqartut. Taamaattoqanngippat ingerlatseqatigiiffiit
Namminersornerullutik Oqartussanit pigineqartut ingerlatseqatigiiffinnut
allanut sanilliullugu unammillersinnaassusiat ajorseriassaaq. Ilanngullugu
oqaatigaat ingerlatseqatigiiffinnut Namminersornerullutik Oqartussanut
pigineqartunut "immikkut malittarisassat" niuernermit isigalugu
ajoqusiilluinnarsinnaammata.
IA-p toqqarlugu
siunnersuutaanut ingerlatseqatigiiffiit oqarput, saaffiginnissutit
sapinngisamik oqaatsit saaffiginninnermi atorneqartut atorlugit akineqartartut,
apeqqutaatinnagu Upernavimmi qalerallinnik tunisisoqarnersoq Kinamiluunniit
raajanik tuniniaasoqarnersoq.
Ingerlatseqatigiiffiillu
oqaatigaat nunaqarfippassuarni kalaallisuinnaq oqaluttunik sulisoqarneratigut
danskisut sullissinissaq ajornassammat, taamaattumillu innuttaasut danskisut
sullinneqarusuttut kommunimi nunalluunniit immikkoortuani illoqarfimmut,
pisariaqassappallu Nuummi qullersaqarfimmut innersuunneqartariaqartassasut.
Ingerlatseqatigiiffiit
oqaatigaat inatsisiliortoqassappat inatsisip atuuffia sumiiffimmut killilerneqartariaqartoq,
ingerlatseqatigiiffiit Namminersornerullutik Oqartussanit pigineqartut nunatta
avataani suliaat inatsisip avataaniittussanngorlugit. Ingerlatseqatigiiffiit
oqaatigaattaaq pineqartumi sakkortuvallaamik inatsisiliorneq
kinguneqarsinnaasoq suliassaqarfinni pisisartunut pilersuisunullu
attaveqarfiusuni sulisunik marluinnik oqaasilinnik ingerlatseqatigiiffiit
atorfinitsitserusunnerulernerannik, ingerlatseqatigiiffiummi nunaqarfinni
sulisuisa amerlanersaat kalaallisuinnaq oqaluttuummata. Taamaalilluni
sakkortuvallaamik inatsisiliorneq kinguneqarsinnaavoq inuit kalaallisuinnaq
oqaluttut inuussutissarsiornikkut periarfissaasa killilerneqarnerannik.
Soorlu
ingerlatseqatigiiffiit akissuteqaataasigut ersertoq
ajornartorsiutaassangatinneqanngilaq Suliassat suliarineqartarnerat pillugu
inatsimmi ' 7a-mut
ilaatinneqalerneq, illuatungaatigulli suliffeqarfinni Namminersornerullutik
Oqartussanit pigineqartuni oqaatsitigut sullinneqarneq pillugu
inatsisiliortoqarpat tamatuma ajornartorsiutinik assigiinngitsunik
pilersitsinissaa ingerlatseqatigiiffinnit ilimagineqarpoq.
Oqaluuserisassani imm. 83-imut atatillugu
naalakkersuisut tusarniaaneranni ingerlatseqatigiiffiit akissutaat,
Inatsiseqarnermullu Ataatsimiititaliap isumaqatigiissup isumaliutissiissutaa
tunngavigalugit Inatsisartunut saqqummiussassamik inatsisissatut
siunnersuusiorneq naalakkersuisut aallartissavaat, tassanilu
ingerlatseqatigiiffiit uparuaataat allatigullu ingerlatsinerminnilu
tunngavigisaat pissusissaatut eqqaamaneqarumaarlutik.
Ruth Heilmann, Siumup oqaaseqartua:
Naatsunnguamik Siumuminngaanniit oqaaseqassaagut.
Saqqummiunneqartut aallaavigalugit
ataatsimiititaliap isumaliutissiissutaani isummersuutaasut Siumumiit
tusaatissatut tigussavavut aammalu maluginiarlugu KANUKOKA isummersortinneqarami
akerliliissuteqarsimanngitsoq. Taamaattumik Siumumiit inatsisissamut
erseqqissaataasunik sumik siunnersuuteqarneq inatsisaareersumut
allannguutaasussamik kinguneqartussaasutut isumaqarfiginanngimmat
annertuuliuutiginagu ersarissaataasumik siunnersuutaasoq tapersiinnassavarput.
Taamatut ataatsimiititaliap immikkut paragraf
7a-mut tunngatillugu siunnersuusiornissamik suliaqaqqusinerata
nalilersorluarnissaa kissaatigissallugu taamalu ataatsimiititaliap nangittumik
suliaqaqqusinera tusaatissatut Siumumiit tiguarput.
Peter Ostermann, Atassutip oqaaseqartua:
Siunnersuut aappassaaneerlugu saqqummiunneqarmat
Atassummiit tamakkiisumik tapersersimavarput. Taamaattumik assut
nuannaarutigaarput Sulisoqarnermut Ataatsimiititaliap partiit inatsiseqarnermut
ataatsimiititaliami ilaasortaatitaqartut isumaqatigiissilersinnaasimammagit
tapersersuisilerlugillu tamaasa.
Aamma paasiniarparput Naalakkersuisut
akissuteqarnerminni siunnersuutip tunngavigisaa tamakkiisumik
isumaqatigilersimagaat. Taama naatsumik oqaaseqarluta Ataatsimiititaliap
isumaqatigiissup isumaliutissiissutaa akuersaarlugu taaseqataassaagut.
Johan Lund Olsen, Inuit Ataqatigiit oqaaseqartuat:
Inuit Ataqatigiit nuannaarutigaarput Inatsisartut
Inatsiseqarnermut Ataatsimiititaliani partiit sinniisuutitaqartut
tamarluinnarmik isumaqatigiilluinnarlutik maanna aappassaaneeerisoqarnerani
siunnersuutigisavut tamakkiisumik tapersersormatigik.
Taamatuttaaq nuannaarutigisatsituut Inuit
Ataqatigiit maluginiarparput Naalakkersuisut taamatut aamma
isumaqalersimammata, taamaattumillu immikkoortoq 82-imi kiisalu imm. 83-imi
Inatsisartut aalajangigassaattut Inuit Ataqatigiinniit aamma
siunnersuutigisimasavut maannakkut tapersersorsinnaalersimammatigik.
Taamaalilluni kissaatigisatsituut matuma kingorna
inatsisitigut illersorneqartumik aqqutissiuussineqarsinnaalersoq nunatsinni
oqaatsit pingaarnersaat atorlugit pisortani sullissisoqarsinnaalissasoq
kalaallisut oqaatsitta pisortanit maannamit annertunerusumik
atugaanerulernissaannik aamma kinguneqarumaartussamik. Tamanna kalaallisut
oqaatsitta patajaallisaaffigineqartariaqarnerannik
qulakkeerinnissutaajutigaluni minnerunngitsumik inuiattut aamma
nukittorsaatigingaassavarput.
Taamaattumik ukiormanna 1948-mi Naalagaaffiit
Peqatigiit inuttut pisinnaatitaaffiit pillugit silarsuarmioqatigiinnut
nalunaarutigisaata ukiut 50-it qaangiunneranni pissusissamisoorluinnarpoq
maannakkut pimoorussamik kalaallisut oqaatsitta inuiattullu ilisarnaatitta
pingaarnersaat namminersornerulersimanerput pillugu inatsisitta saniatigut
erseqqilluinnartumik aamma pisortani oqartussanut Namminersornerullutillu
Oqartussat ingerlatseqatigiiffittut suliffeqarfissuinut saaffiginnissutitut
atorluarsinnaalissagatsigik aammalu piumasaqarnitsigut taamatut
sullinneqartuarnissatsinnut maannakkut paatsuugassaanngitsumik aamma
pisinnaatitaaffeqalissagatta.
Taamatullu Inuit Ataqatigiit immikkoortoq 55-imi,
82-imi kiisalu 83-imi siunnersuutigisatsinnut Naalakkersuisunit partiinit
tamanit Kattusseqatigiinniillu tapersersorneqarnerput qutsatigiutigalugu
oqaatigiinnassavarput Inatsiseqarnermut Ataatsimiititaliap inassuteqaatai
tamakkiisumik ilalersoratsigik, taamatullu aamma aappassaaneerinninnermi
erniinnannguaq akuersilluta taasissamaaratta.
Anthon Frederiksen, Kattusseqatigiit:
Suliat siullermeerneqarneranni Kattusseqatigiit
sinnerlugit oqaaseqaatikka innersuussutigalugit erseqqissassavara
Kattusseqatigiinniit pingaartilluinnaratisigu innuttaasoq kinaluunniit nammineq
oqaatsini atorlugit sullinneqarnissaminik piumasaqarsinnaanera
pissusissamisoorluinnarmat.
Taamaattumik pissusissamisuuginnarpoq kalaaleq
nammineq nunamini oqaatsini atorlugit pisortanit Namminersornerullutik
Oqartussat suliffeqarfiutaanni kommuniniluunniit sullinneqarnissani
piumasarissappagu. Aamma tamanna soorunami danskimut nunami allamiumulluunniit
atuutissaaq, imaluunniit eqqortumik oqaatigalugu, taakkununnga atuutereerpoq.
Taamaallaalli kalaallimut pingaartumillu ataasiinnarmik oqaasilimmut tamatigut
maannakkut atuutinngilaq.
Taamaattumik suliat nanginneqarneranni ilaatigut
suliffeqarfissuit ilaasa siunnersuutigineqartut atorsinnaanngitsutut allaallu
ilaatigut kinguarsaataasinnaasutut isumaqartumik oqaaseqaateqarsimanerat
kalaallit oqaatsitsinnik suusupaginninnertut utoqqatsissutissarsiuinnarnertullu
akissuteqaatigisimasaat nalilertariaqarsorinarpoq.Inuttaasummi tamarmik
assigiimmik sullinneqartariaqarput.
Naggataatigut Inatsiseqarnermut Ataatsimiititaliap
isumaliutissiissutaa tamakkiisumik taperserakku erseqqissaassutigissavara.
Anders Andreassen, ataatsimiinnermik aqutsisoq:
Eqqaasitsissutigissavara erniinnarluinnaq
taasisussagatta.
Inatsiseqarnermut Ataatsimiititaliap
isumaliutissiissutaa taamatut isikkoqarluni pingajussaaneerneqarnissaanut
akuersisut nikueqqussavakka: 25.
Tassalu isersimasut tamarmik akerliusoqaranilu
taaseqataasoqanngilaq.
Taamaalilluni suliat uku pingasut
ataatsimoortuusut tassalu 55, 82 aammalu 83 pingajussaanut
ingerlaqqinnissaminnut piareerput.
Ullumikkullu aamma oqaluuserisassavut
tamakkerpavut.
Ataatsimiinneq tamaanga killeqarpoq.