Kalaallit Nunaanni Inatsisartut

Oqaluuserisassani immikkoortoq 55-3		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Tallimanngorneq 30. oktober 1998, nal. 12.11

 

Oqaluuserisassani immikkoortoq 55

 

Pisortat ingerlatsineranni suliassat suliarineqartarnerat pillugu Inatsisartut inatsisaata allangortinneqarneranik Inatsisartut inatsisissaannut siunnersuut.

(Inatsisartunut ilaasortat Josef Motzfeldt, Johan Lund Olsen, Lars Sørensen, Maliinnannguaq Markussen Mølgaard, Manass Berthelsen aamma Evald Brønlund)

(Pingajussaaneerneqarnera)

 

 

 

Ataatsimiinnermik aqutsisoq: Anders Andreassen, Inatsisartut Siulittaasuat.

 

Johan Lund Olsen, Inuit Ataqatigiit.

Qujanaq. Pisortat ingerlatsineranni suliassat suliarineqartarnerat pillugu Inatsisartut inatsisaata allangortinneqarneranik Inatsisartut inatsisissaattut siunnersuutigisarput aappassaaneerneqar­nerani Inatsisartut tamarmiusut isumaqatigimmassuk Inuit Ataqatigiit sinnerlugit inassutigissa­vara siunnersuut taamak iluseqarluni pingajussaaneerneqarnermini akuerineqassasoq.

Periarfissarli manna aamma iluatsillugu minnerunngitsumik inuiaqatigiit kalaallit eqqarsaatitsin­niitillugit partiit tamarmik Kattusseqatigiillu aamma qutsavigingaarniarpavut.

 

Anders Andreassen, ataatsimiinnermik aqutsisoq, Inatsisartut Siulittaasuat, Siumut:

Qujanaq, tassa oqaaseqartoqarnianngilaq. Taavalu taasissutigissavarput.Pisortat ingerlatsineranni suliassat suliarineqartarnerat pillugu Inatsisartut inatsisaata allangortinneqarneranik Inatsisartut inatsisissaannut akuersisut nikueqqussavakka.

Akuersisut: 30.

Isersimasut tamarmik akuersaarput. Taamaalilluni taanna inatsisissaq aamma akuerineqarpoq.

 

Oqaluuserisaq naammassivoq.