Kalaallit Nunaanni Inatsisartut

Oqaluuserisassani immikkoortoq 66		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 7. oktober 1998 nal. 13.30

 

Oqaluuserisassani immikkoortoq 66

 

Tasiilap umiarsuaqartarnera pillugu pingasunngornikkut apeqquteqaat.

(Jakob Sivertsen)

 

 

 

Ataatsimiinnermik aqutsisoq: Finn Karlsen, Siulittaasoqarfimmi ilaasortaq, Atassut.

 

Jakob Sivertsen, Atassut:

Naluneqanngilaq Tasiilap sikuartumiinnera peqqutaalluni nioqqutissanik Danmarkimiit pilersui­neq taamaallaat qaammatini sisamani ingerlanneqarsinnaasarpoq, qaammatillu arfineq-pingasuni tikinneqarsinnaasarani. Taamaammat ukiut tamaasa nioqqutissanik pinngitsoorneqarsinnanngit­sunik amigaateqartarneq takornartaanngilaq, innuttaasullu akornanni naammagittaalliutigineqar­taqaluni.

 

Ukiuni kingullerni silaannaap allangoriartornera peqqutaalluni Tunumi ukiukkut alaakkaasumik sikusaarnera qaqutiguulersimavoq, taamaalilluni upernaakkut sikuiaarnerusalersimalluni, kiisalu aamma ukiakkut siornatigornit naleqqiullugu kingusinnerusukkut sikorsuit takkuttalersimallutik. Isumaqarpunga nioqqutissanik pilersuineq eqqarsaatigalugu umiarsuit nioqqutissanik assartuutit Tasiilamut siusinnerusukkut tikisinneqartalernissaat kiisalu umiarsuaq nioqqutissanik pajuttoq kingusinnerusukkut aamma tikisinneqartalernissaa periarfissaqartoq.

 

Matumuuna apeqqutiginiarpara Tasiilamut umiarsuit nioqqutissanik assartuutit tikittarnerat siuartinneqarsinnaanersoq umiarsuarlu kingullerpaat aamma kingusinnerusukkut tikittalernissaa aqqutissiuunneqarsinnaanersoq, oqareernittuut qaammatit sisamaannaat nioqqutissanik pilersui­nerup ukiup sinneranut nioqqutissanik pinngitsoorneqarsinnaanngitsunik amigaateqartuarneq atuisunit naammagittaalliutigineqartuartarmat.

 

Peter Grønvold Samuelsen, Takornariaqarnermut, Angallannermut, Niuernermut Attaveqaati­nullu Naalakkersuisoq:

Inatsisartunut ilaasortap Jakob Sivertsenip apeqqutiga Tasiilamut umiuarsuit nioqqutissanik assartuutit upernaakkut tikittarnerat siuartinneqarsinnaanersoq umiarsuullu kingulliup ullumikku­mit kingusinnerusukkut tikisinneqartalernissaa aqqutissiuunneqarsinnaanersoq. Tamatumunnga patsisaatinneqarput ilaatigut ukiuni kingullerni silaannaap allangoriartornera kiisalu pilersuiner­mut tunngasut akuersaaruminaatsuunerat pillugu atuisartut naammagittaalliuteqartarnerat.

Royal Arctic Line A/S-ip angalanissanut pilersaarutai ukiut tamaasa Namminersornerullutik Oqartussanit akuersissutigineqartarput. Tasiilap Tunullumi umiarsuartigut angallavigineqartar­nerat pisarpoq ukiorpassuarni umiartorfigineqarnerani sikuusarnera pillugu paasisimalikkat tunngavigalugit. Nunarsuatsinni silaannaap allanngoriartornera Tasiilap eqqaata sikusarnerata allannguuteqarneranut patsisaanersoq uppernarsineqarsinnaanngilaq.

 

Danmarks Meteorologiske Institut Sikumik alapernaarsuisoqarfik aqqutigalugu aamma Royal Arctic Line A/S naliliipput Inatsisartunut ilaasortap inerniliinera uppernarsaatissaqanngitsoq. Umiarsuaatileqatigiiffiup umiarsuarni naalagaatitai nunatsinni ukiuni 20-25-ni umiartorsimasut taaamatuttaaq isumaqarput. Assersuutigalugu AKista Arctica@ ukioq manna augustip qaammataa­ni ulluni sisamani sikumi saperseqqasimavoq.

 

Silaannaap allanngoriartornera pissusiuvoq immikkoortoq, anorili sarfarlu sikuusarnermut aalajangiisuulluinnartuupput. Taakkuli saniatigut immami sikooqisumi angalanermi isumannaal­lisaanermut tunngassutillit soorunami aalajangiisuulluinnarput.

 

Paasisimalikkat takutippaat qaqugukkut sikuertarnera assigiinngisitaartorujussuusoq. Pilersaaru­tit suliarineqartarnerat aallaavigalugu naliliilluni aammalu pilersuinermi isumannaallisaanikkut mianerisassat mianeralugit ilimagisariaqarpoq 1999-imi angalanissamut pilersaarut maannakkut suliarineqartoq ullumikkut Tunup umiarsuaqarfigineqartarneranut pilersaarutaasuniit allaanerus­sanngitsoq.

 

Assersuutigalugu eqqarsaatigigaanni Tasiilamut umiarsuup kingulliup tikinissaa kingusinneru­sukkut pisussanngorlugu kinguartinneqarpat sikulu pissutigalugu umiarsuaq 3000 tonsinik usisoq apuussinnaajunnaartoq, taava tasiilarmiut atupiluuisussanngortitaassapput.

 

Siunissamili qaninnermi sikuusarnera malunnarluartumik allannguuteqassappat Naalakkersuisut Royal Arctic Line A/S suleqatigalugu piareersimapput Tunup siunissami umiarsuaqartinneqartar­nissaata nalilersuiffigeqqinneqarnissaanut.

 

Jakob Sivertsen, Atassut:

Naatsunnguamik.

Apeqquteqaammi oqaatigineqarpoq Danmarkimi silasiornermi qullersaqarfik, Sikusinik  alapernaarsuisoqarfik kiisalu Royal Arctic Line A/S naliliisimasut apeqquteqaatiga tunngavissa­qanngitsoq. Tassunga tunngasumik erseqqissaatigissavara Telep angallataa atassuteqaatinik ikkussuinermik suliaqartartoq 1996-imi majimi Tasiilamut tikissimammat, kiisalu ukioq manna sinerissami alapernaarsuut Vædderen januarip 28-anni aamma Tasiilamut tikissimalluni. Naak siornatigut ukiup taamaalinerani ukiup sikua aalaakkaasoq sikkorisseruttortaraluartoq, taamaattu­mik apeqquteqaatiga tunngavissaqanngitsutut nalilerneqarnera akissuteqaammi tunngavissaqar­nerusutut uanga nalilerpara.

 

Kiisalu akissuteqaammi oqaatigineqarpoq umiarsuup ukiakkut tikittarnerata kinguartinneratigut nioqqutissat 3000 tons Tasiilamut apuutinngitsoorsinnaasut. Uanga taamak sianiitsiginngilanga.

 

Tasiilamut nioqqutissanik pilersuinerup ajorisinissaanik anguniagaqanngilanga, pitsaanerulernis­saaguna anguniarlugu apeqquteqaateqartunga. Taamaakkaluartoq assortuunnissaq pisariaqartinn­gilara, taamaattumik akissuteqaat tusaatissatut tigugallarpara.

 

Finn Karlsen, Ataatsimiinnermik aqutsisoq:

Taava suleriaaserput tunngavigalugu tassunga apeqquteqaatimmut tunngasumik oqaaseqartoru­suppat siulittaasup akuersineratigut oqaaseqartoqarsinnaammat Evald Brønlund oqaaseqarumam­mat akuerivara.

 

Evald Brønlund, Inuit Ataqatigiit:

Qujanaq akuerineqarama. Tassa Naalakkersuisup akissuteqaataani malugineqarsinnaavoq tamanna siunissami aamma naliliiffigineqaqqikkumaartoq.

 

Kisiannili aamma uagut innuttaasut akornganni eqqartortarsimavarput, silap allanngoriartornera aamma ullumikkut pissutsit allanngorsimasut. Tassa upernaakkut imaroriarnerusalersimalluni, tamanna malugisimavarput.

 

Taamaattuminguna Jakob Sivertsen-ip apeqquteqaataanut tunngatillugu aamma tamanna uanga naliliisoqaqqittussaammat tapersiisunga. Tassami umiarsuaq siulleq massakkut tikittarnera ulluni 14-ni sioqqullugu massakkut tikissinnaagaluarpoq. Tassani eqqarsaatigaara sivikitsumik aasaa­sarnera Ittoqqortoormiini, taavalu sanaartugassat eqqarsaatiginerullugit taakku ullut 14-it malunnartupilorujussuarmik sunniuteqartussaagaluarput ukiakkut apiaartarnera eqqarsaatigalugu.

 

Taavalu umiarsuaq kingulleq tikittarnera eqqarsaatigalugu, sep. 10-ata missaani aallartarpoq, taavalu tamatuma nalaani umimmanniarneq ingerlanneqartarluni. Taavalu taakku umimmaat neqai allatut ajornartumik nassiussinnaanngisagut timmisartukkut nassiunneqartarput, tassuunak­kullu aamma soorunami akii eqqarsaatigalugit akisunerusumik nassiunneqartarlutik.

 

Taannaana oqaatiginiaannarlugu Jakob Sivertsen-ip apeqquteqaataanut, ukua tapiliussamik oqaaseqaannartunga kingunissamilu naliliisoqarnissaanut oqaaseqaatikka aamma Y.toqarnissaa­nut kissaatigigikka.

Oqaluuserisaq naammassivoq.