Oqaluuserisassani immikkoortoq 01-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Johan Lund Olsen, Inatsisartut Siulittaasuat,
ataatsimiinnermik aqutsisoq::
Ja, ataatsimiinneq ammarpoq,
tassa ullumikkut ataatsimiiffiusut aappaat ataasinngorneq 27. september
Inatsisartut ullumikkut tassa oqaluuserissavarput immikkoortoq siulleq tassa
tallimanngormat Naalakkersuisut Siulittaasuata ammaanermini oqalugiaataa
ullumikkut maani oqallisigineqassaaq.
Tassanilu partiit oqaaseqartussai
tassa saqqummiussissapput aammalu partiit saniatigut sooru-nami aamma
Kattusseqatigiit aammalu Per Rosing Petersen oqaaseqartussaassalluni.
Siullermilli maannakkuut Siumut sinnerlugu oqaaseqartussaq tassalu Jørgen Wæver
Johansen, takanna.
Jørgen Wæver Johansen, Siumup oqaaseqartua:
Siullermik oqaatigilaassuara nutsernera suli naammassinngimmat qallunaatuua kingusinnerusukkut agguaanneqassaaq.
Siullermik Siumup gruppia sinnerlugu tallimanngormat ammaanersiornermut nutarteriffiuullunilu pingaartorsiornartumut - nuannersumut - qujarusuppugut. Aamma minnerunngitsumik naalagiaqatigiinnermi palaserisatta Emma Balslev-ip oqaasiinut qujavugut.
Aaamma pinngitsoorumanngilagut Inatsisartut Siulittaasussaattut amerlanerussuteqartunik qinigaaqqittoq, Johan Lund Olsen, pilluaqqussallugu. Juaat naatsorsuutigilluinnarparput Inatsisartut tamatta assigiimmik, partii apeqqutaatinnagu, Inatsisartut siulittaasuattut sullikkuumaaritigut. Aamma naatorsuutigilluinnarparput siulitaasoqarfik sinnera peqatigalugu, avaqqunnagulu sulinersi ingerlateqqikkumaarissi. Qularutiginngilarpummi sullarinnikkut isumaqatigiissitsiniartarnikkullu suliassat taakku naammissisinnaalluaritit - pilluaqqigit.
Siumumiit pinngitsoorumanngilagut Inatsisartut siulitaasuanut tullinngortut sisamat, siulittaasoqarfimmi ilaasortanngortut tamaasa pilluaqqussallugit sulilluarnissaannillu kissaakkumallugit. Aamma minnerunngitsumik Inatsisartunut ilaasortaq Hans Enoksen qutsavigerusupparput siullittaasoqarfimmi suleqataanermunut atatillugu sulilluarsimanera pillugu.
Naalakkersuisunut siulittaasup, Jonathan Motzfeldtip ammaanersiornermi oqaasiinut annertuunut imartuunullu aammattaaq Siumumiit qujajumavugut. Oqalugiaat oqariartuutinik siunnerfinnillu assigiinngitsorpassuarnik imaqartinneqarpoq, nunatta siunissaanut nalilersueqatigiinnisatsinni eqqaamassallugit pingaaruteqartunik.
Ersaripporlu Naalakkersuisut nunatta siunissai pingaarteqalugit ingerlatsereernertik ingerlatseqqikkumagaat. Tamatumani nunatsinni meeqqat inuusuttullu atugarisaat pitsanngorsaaviginiarneqarnerput. Aningaasarsiornikkut aningaaasaqarnikkullu aqutsinermi nutarterineq ingerlanneqarpoq ingerlateqqinniarneqarlunilu. Ilinniartitaanerit pitsanngorsaavigineqartuarput nutarterneqartuarlutillu. Peqqinnissaqarnermut aningaasartuutit ullumikkornit atorluarneqarnerulernissaat siunertaralugu suliniutit assigiinngitsut ingerlanneqartut nassuiaatigineqarpoq. Suliffissaqarniarnermut suliniutit nutaat aallarteruttorput. Inissaaleqineq tigussaasumik qanoq iliuuseqarfiginiarneqarpoq. Inuussutissarsiutinullu nutaanik ineriartortitsinerput tarpersersuinerpullu ingerlateqqikkumaneqarpoq.
Tamakku tamaasa, allarpassuillu naalakkersuisut siulittaasuata aammaanersiorluni oqalugiarnermini ilisimaarinnilluartumik taakkartugai nersualaassallugit Siumumiit pissutissaqarluarsorivugut. Taakkartorneqartummi tamarmik ersiutaapput naalakkersuisooqatigiit qimoqatigiilluarnerannik, aammalu tigussaasunik innuttaasunut tamanut iluaqutaasussanik suliniuteqarnerinik. Tamatta piisariaqartippavut naalakkersuisut utaqqiinnaratik, anngaaginnaratillu suliniuteqarsinnaasut.
Paasisinnaavarput naalakkersuisut pissutsit aaqqinniarneqarnerini kommunit pilersaarusiornerni peqataanissaat pingaartikkaat, tamannalumi pisariaqarpoq.
Ammaanersiornermi oqaatigineqartut Siumup tungaaniit taperserlugit, naqissusiisarluta, suliniutigineqartariaqarsorisatsinnik anguniarneqartariaqarsorisatsinnillu imaattunik ilassuteqarfigalugit oqaaseqarfigissavagut.
Nunatta isumalluutaasa pingaarnersaat - tassaapput nunatta meerartai. Oqariatuut tamanna miserratigineqarssinnaananilu assortorneqarsinnaanngilaq, pitsaanerpaamilli siunissaqartinneqarnissaat isumannaassagutsigu pingaaruteqarluinnarpoq meeraaqqeriveqarnikkut meeqqeriveqarnikkut, sunngiffimmilu sammisassaqartitsivinnik ineriartortitsinerput pitsanngorsarlugulu ingerlateqqissallugu, ullumikkut nunatsinni tamarmi, illoqarfinni nuunaqarfinnilu, ineriartortitsinissaq taamaattoq pisariaqartinneqarpoq.
Siumumiit aamma taamak isumaqarpugut, nunatta isumalluutaasa pingaarnersaat aningaasaliiffiginerusariaqarpagut, meeqqat inuusuttullu atugarisaannik pitsaanngorsaanernut aningaasaliissutit eqqanaarsaataapput, Nuummiusoorlugu investerinngiupput pitsassuit. Naatsorsuutigaarput apeqqutit tamakku aningaasaqarnermut inatsisissatut siunnersuut oqaluuserilerutsigu uterfigiumaarlutigit.
Kisianni puiussanngilarput meeqqat peroriartorneranni, ilinniartitaaneranni peqqissusiannullu akisussaaffik annertunerpaaq pisortaniinngimmat kommuniniinnanilu, akisussaaffik annerpaaq angajoqqaat tigummiarpaat.
Meeqqat atuarfimmi aallartilluarnissaat pingaaruteqarluinnarsoraarputtaaq. Taamaattumik Siumumiit nuannaarutigaarput atuarfitsialaap anguniarnerani siunissami imarisassai pillugit,, Kangerlussuarmi qanittukkut ataatsimeersuarneq aaqqissugaalluarlunilu peqataasunut pissarsiffiulluarsimammat.
Malunnarlualereerpoq nutaamik atuartitaanermut Naalakkersuisortaarsimanerput, tamanna aamma pisariaqartissimaqaarput.
Siumumiit qilanaarluta ataatsimeersuarnermit nalunaarusiap saqqummiunneqarnissaanik isummersueqataassaagut. Erseqqissassavarpullu Naalakkersuisut siulittaasuata oqalugiaataani ataatsimeersuarnermi ersersitat pingaarnerit tamaasa Siumumiit isumaqataaffigigatsigit.
Pingaartumik taakkartorneqarmat pisariaqartinneqartoq, tassaammat Nalaakkersuisut suliallit siumut isigisut aammalu atortussat, atuarfiup illutai, atuarfiullu avatangiisai ullutsinnut naleqquttut pigineqassasut.
Taamatuttaaq nuannaarutigitigaarput ataatsimeersuarnermiit oqariartuutigineqarmat, sapinngisamik piaartumik inuiaqatigiit oqaatsinik pingasunik piginnaasaqalernissaat. Oqaatsinimmi ilinniarneq atortorissaarummik ilinniarneruvoq, oqaatsit atortorissaarutaapput. Allamiut oqaasiinik ilinniarumannginneq imaluunniit inuiaqatigiit ataasiinnavimmik oqaaseqarnissaannik oqaluttarneq atortorissaarummik ilinniarnerunngilaq, imminut salloqittarneruvoq - imminut killiliineruvoq.
Soorunami nunatsinni oqaatsivut salliutinneqartuassapput, aamma maani nunatsinni nunaqartut tamarmik nunami maani oqaatsit pingaarnersaat atorsinnaasariaqaraluarpaat. Kisianni tamanna angusinnaanngilarput pimoorullugu tamatta tamatumuuna suleqatigiinngikkutta. Uagut Siumumi suleqataanissatsinnut pisarnitsitut piareersimavugut.
Inuussutissarsiutinut ilinniartitaanermut periaatsit eqaannerusumik aaqqissuunneqarnissaat ilinniartitsinerullu ataqatigiinnerulernissaata sulissutigineqarnerat nuannaarutigaarput, piviusun-ngortinneqarpatalu kusanartumik sunniuteqarluarnissaat naatsorsuutigaarput.
Aamma pissutissaqarsorivugut Oqaatsinik Ilinniarfiup ingerlalluarnera pillugu nuannaaruteqassalluta. Siumumiit neriuutigaarput taamatut pitsaasumik ingerlatsineq aamma siunissamut attattuarneqarumaartoq, oqaatsinimmi ilinniarfik ingerlalluartoq inuiaqatigiit kalaaliusugut pinngitsoorsinnaanngikkipput paasisimalerparput.
Taamatuttaaq Siumumiit anguniagarput teknikimut samminerusumik ilinniarnertuunngortaler-
sinnaanerup HTX-ip aqqutigalugu nutaamik periarfissamik suliniuteqarneq tamakkiisumik tapersersorparput.
Tassungalu atatillugu Sanaartornermik ilinniarfiup DTU suleqatigalugu issittumik teknologi pillugu ilisimasanik katersuiffimmik pilersitsisoqarnissaa isumaqatigilluinnarparput. Ilisimasammi aamma niuerutigineqarsinnaasut ilagivaat, nunatsinnullu aningaasarsiornikkut iluaqutaalersinnaasut ilagisaattut isigaarput.
Ilisimasusarfeqarfimmik pilersitsinissaq Siumumiit tamakkiisumik tapersersorparput, silatusaarneruvormi suliffeqarfiit ilisimatusarnermut ilinniartitaanermullu assigiinngitsunut ingerlaqqiffiusunik sammisaqartunut ataatsimut katersortinneqarnissaat, aamma tamanna ilinniartunut minnerunngitsumik ilinniartitsisunullu iluaqutaanissaa naatsorsuutigilluinnarparput.Taamaattoq kissaatigaarput ilisimatusarfeqarfissap annertunerpaartaa aningaasaateqarfiit assigiinngitsut suleqatigalugit aningaasaleeqatigalugillu pilersinneqarnissaa. Qularutissaanngilarmi 150 mio. kr-nit uagut nammineerluta nammassinnaanngikkallarigut.
Taamaattumik tamatumani tamanna annertunerpaamik suliniutigineqarnissaa kissaatigaarput, aammami naalagaaffeqatigiinnerup avataani aningaasaateqarfippassuaqarmat soqutiginnilersinneqarsinnaasunik.
Kulturimut tunngatillugu siullermik Siumumiit qutsavigerusuppavut nunatsinni tamarmi peqatigiiffinni kattuffinilu inuit sulilluartut, inuiaqatigiinni pingaartitatta ingerlaannarnissaannut ilissi isumannaarsuisut pingaarnersaraasi, taamatullu suliniuteqarluartuarnersi pillugu Siumumiit qutsavigerusuppatsigit. Oqaatigissallugulu Naalakkersuisut tapersersuinerorusunnerannut aamma uagut peqataassalluta piareersimagatta.
Nipilersornermut tunngatillugu uagut aamma Siumumi nuannaarutigaarput kommunini assigiin-ngitsuni nipiersornermut ilinniarfinnik pilersiortortitsisoqarmat. Taamaattorli immikkut nipilersornermik pikkoriffeqartunut ilinniarfik kalaallit piginnaaneqarfii eqqarsaatigalugit ilinniartussaaleqinavianngitsoq, siornatigut nipilersornerup Højskoleani pilersitsinissamut tunngatillugu suliniutit sumut killinnersut paaserusussavarput. Isumaqarluinnarpugummi Højskolet pioreersut ilaanni ilinniarfik taamaattoq pilersinneqarsinnaalluartoq.
Naalakkersuisut siulittaasuat Siumumiit isumaqatigaarput oqarmat, pisariaqarluinnarpoq kalaallit atuakkiortarnerisa, isiginnaartitsisarnerisa allatullu eqqumiitsuliortarnerisa pitsaanerpaamik tunngavissaqartariaqarnerat.Tassungalu tunngatillugu kissaatigaarput isiginnaartitsisarneq pillugu inatsisissap piaartumik naammassineqarnissaa piviusunngortinneqarnissaalu.
Taamatuttaaq kissaatigaarput paasissutissanik siammarterisarneq eqqarsaatigalugu, ullumikkut KNR TV-p ullup ilarujussuani aallakaatitsisannginnerata nalaata atorluarneqarnerunissaa.
Piffissami tamatumani lokal tv-qarfiit immiussaat
aallakaatinneqarsinnaapput, ilisimatusarfimmi ilisimatuut oqalugiaataat
aallakaatinneqarsinnaapput, ataatsimeersuarnerit assigiinngitsut
immiunneqarsimaneri aallakaatinneqarsinnaapput, oqaatsinik, matematikkimik
allanilluunniit ilinniartitsinerit aallakaatinneqarsinnaapput, ilami
periarfissanik akisoorsuuusariaqanngitsunik ulikkaarpoq. Periarfissarititaasut pioreersut
atorluarnerusariaqarpavut.
Taamaappoq aamma ullumikkut
radiokæderput digitaliseererneqarsimasoq eqqarsaatigissagaanni, ullumikkut
pioreersoq taanna tamakkiisumik atorluanngilarput. Ilami
inissaqartitsigaluarpoq tv-kut kanaalit amerlanerusut
aallakaatittalersinnaanissaannut. Taava sooq atussanngilarput, sooq innuttaasut
paasissutissanik aliikkutassiaagaluarpataluunniit amerlanerusunik
pigisaqalernissaannut periarfississanngilagut. Nalunngilarpummi
paasissutissanik peqarnerulerneq aamma tamatigorluinnaq kingunerisaraa
inuiaqatigiit paasisimasaqarnerullutik qaammaasaqarnerulernerat.
Tamannalu nunatta
arlaannaatigulluunniit ajoqutigisinnaanngilaa, naagga tamanna tamatsinnut iluaqutaassaaq.
Taamaattumik Siumumiit tamatuma sulissutigineqarnissaa kissaatigaarput.
Peqqinnissaqarfimmut
tunngatillugu nunap immikkoortuini, tassa Qeqertarsuup tunuani kujataanilu
kommunit pineqartut isumaqatigalugit napparsimmavinnik inissiinissaq nukiginnartutut
isumaqarfigaarput, taamaaliornikkut katsorsarneqartussat sumiiffimmi
aggerfimminni qaninnerpaamik katsorsarneqarsinnaasalernissaat
anguniarlugu.Tamanna miserratigineqarsinnaanngitsumik aamma pineqartunut
tamanut toqqissisimanarnerpaassaaq. Qularutiginngilarputtaaq piffissamik aamma
aningaasanik sipaarfiusinnaasut ilagimmassuk.
Siumumiit kissaatigaarput
peqqinnissaqarfimmi aningaasanik aqutsineq sukannernerusumik
ingerlanneqartalissasoq, ilumoorsinnaanngilarmi ukialerneri tamaasa
millionilikkaanik peqqinnissaqarfimmi naatsorsuinerlunnerit pissutigalugit
tassanngaannaq aningaasaliissuteqartariaqartarneq. Tamatumani sullissineq
pitsaanerusinnaasariaqarpoq.
Peqqinnisaqarfimmut
tunngatillugu ajornartorsiutit amerlaqimmata siunnersuutigerusupparput
Peqqinnissaqarnermut Naalakkersuisoq eqqarsartartoqatigiinnik pilersitsissasoq,
tamatumani aporfissaasut qanoq aningorneqarsinnaanerinik
siunnersueqataasinnaasunik.
Siumumiit
nuannaarutigaarput Naalakkersuisut missingersuusiornermut inatsisissamut siunnersuummik
saqqummiussaqarniarmata, tassanilu siunnerfigineqartut taperserpavut.
Aamma
pinngitsoorumanngilagut aningaasaqarnermut inatsisissamut siunnersuutip
saqqummiunneqarneranut atatillugu internetikkut toqqaannartumik kalaallisut
qallunaatullu pissarsiarineqarsinnaanngortinneqarnera Naalakkersuisunut
qutsatigissallugu. Siumumiit isumaqarpugut piumasaqaataasariaqartoq
Namminersornerullutik Oqartussaniit saqqummiussorneqartartut taamaattut tamaasa
internetikkut pissarsiarineqarsinnaanngornissaat
Siumumiit kissaatigaarput
nunatta karsiata aningaasaataasa inissisimaffiat maannamiit
unam-milleqatigiisitsinikkut nassaarineqartalernissaa, ima paasillugu nunatta
karsiata aningaasaatai aningaaserivimmi erniaqartitsinerpaami
inissisimasariaqarput, ullumikkummi aningaasaatigut erniakippallaartumi
inissisimasoraavut. Soorunami tassani aningaaseriviup nunatsinni inissisimasoq
ajungaanissaa naatsorsuutigaarput, ussassaarinerminnimi oqaatigisarmassuk
nukissaqarlutik pitsaajunerpaajunissaminnut.
Nunatta karsiata inuussutissarsiutinut
tapiissutinut aningaasartuutaasa ataatsimut isigalugu annikillilernissaat
Siumumiit isumaqataaffigaarput, pingaartipparpulli tamatumani imminut
akilersinnaasumik nunanut allanut tunisassiortuutitta
eqqornerlugaannginnissaat, aammalu unammillersinnaassutsimikkut ajornerusumik
inissisimalersinnginnissaat.
Tassani soorunami kallerup
innera erngullu akiisa aningaasartuutinut naapertuuttunngorlugit
ilusilerniarneri eqqarsaatigaavut. Tamatuma silatusaartumik inuiaqatigiinnullu
aningaasarsiornikkut, suliffissaqartitsiniarnikkut allatigullu
naapertuilluarnerpaamik ingerlanneqarnissaat kissaatigaarput. Taamaattorli
isumaqarpugut soorunami aamma pineqartut tamatta ullumikkornit
annertunerungaartumik kallerup inneranik imermillu sipaaruteqarsinnaanerput
matumani aamma eqqaamaneqartariaqarmat.
Siumumiit aamma
pingaartipparput tapiissutit tamarmik ersarissarneqarnissaat, tapiissutillu
takulertoruminarsinissaat. Tamann pisariaqarpoq, toqqorterisoqarnani
ersarissumik takusinnaasariaqarparput suna suullu tapiiffigisarnerlugit,
taamaattumik tamatumani Nalakkersuisut suliniutaat tamakkiisumik taperserpagut.
Aningaasaqarnermut
tunngatillugu oqariartuutigisinnaasagut suli amerlagaluartut taakku aqagu
aningaasaqarnermut inatsisissamut siunnersuutip siullermeerneqarluni
oqarluuserineqarnissaanut uterfigissavagut.
Siumumiit isumaqarpugut
piffissanngortoq sapinngisamik inissiat amerlanerpaat ineqartunit
tiguneqarnissaat sulissutigissallugu, tamatumani periarfissat arlaqaqaat
inissiarsuarni najugaqartut inissiarsuit andelsboligforening-itut
aaqqissuussillutik inissiarsuit tigusinnaanissaannut periarfissaqartariaqarput.
Aamma inigisat ataasiakkaat ineqartunit namminermit
pigineqarsinnaanngortinneqarnissaasa aqqutissiuunneqarnissaat
sulissutigineqartariaqarpoq.
Naatsumik oqaatigalugu
Siumumi isumaqarpugut, inigisamut tunngatillugu sapinngisaq naapertorlugu
akisussaaffik innuttaasunut tunniunneqartariaqartoq. Anguniarneqartariaqarpoq
innuttaasut inigisatik namminneq pigilissagaat, taamatuttaaq
aserfallatsaalineqarnissaat namminneq inuuttaasut akisussaaffigisariaqarpaat.
Nutarterinissanut
tunngatillugu naalakkersuisut naalagaaffimmut isuumaqatigiinniarnerminni
angusaat kusanartutut nalilerparput, Siumumiit aamma pingaatilluinnarparput
nutarterineq ingerlanneqassasoq sulisussat nunatsinneersut sulisorinerullugit.
Tamatumanilu sulisussanik piginnaanngorsaanerit ilinniartitaanerillu
tamakkiisumik taperserlutigit.
Sanaartornermut
tunngatillugu atortussat nunatsinneersut atorneqarnerulernissaat
salliuutinneqartariaqarsoraarput. Sikublok-ip misilerarneqarnera
naammassilerpoq, nunat tamalaat akornanni sanaartornermut atortussatut
atorneqarsinnaanerminut akuersissutit uppernarsaatit tamakkilerpai,
piffissanngorpoq misileeraaginnarnani nunatta pissarititai atorulugit
inissianik sanaartortalernerunissaq. Tamanna anguniartariaqarparput, tamanna
pimoorullugu Naalakkersuisut aamma sulissutigisariaqaraat Siumumiit
isumaqarpugut.
Sanaartornermut atatillugu
aamma nalilersorneqartariaqarsoraarput sineriatta ilaani
periarfissaqannginnersoq katiteriaannakkanik sanaartorfiliornissamut,
taamaaliornikkummi suliffissanik pilertitsisoqaannarnani aamma
qularninngitsumik sanaartugassat assigiinngitsut pilertornerusumik
aningaasartuutaannginnerusumillu naammassineqarsinnaanngussagaluarput.
Nuummi inissaaleqinerujussuup
qaangerniarneqarnissaanut atatillugu suliniutit tamakkiisumik taperserpagut.
Tamatumunngalu atatillugu kissaatigaarput narsaaqqami "Lille
Slette"-mi inissiat aserfallalluinnarsimasut pillugit piaartumik qanoq
iliuuseqartoqarnissaa. Aamma eqqaamaneqartariaqartoq immikkoortoq taanna
nunagissarneqareermat, taamaattumillu nutarterinissamut sanaartornermut
tunngatillugu akikinnerusumik sanaartortoqarsinnaassammat.
Ullumikkut kisitsisit
takutippaat nunaqarfiit Ilulissat avannaatungaaniittut amerlanerit
inunikkiartortut, akerlianillu nunaqarfiit Ilulissat kujataaniittut amerlanerit
inukilliartorlutik. Tamatta nalunngilarput tamanna pissuteqartoq nunaqarfiit
avannaaniittut aningaasarsiornissaminnut periarfissaat ullumikkut
pitsaasuummata, allatut oqaatigalugu avannaani nunaqarfimmi inuuneq imminut
akilersinnaalluarpoq.
Nunaqarfinni
kujasinnerusuniittuni ullumikkut aningaasarsiornissamut periarfissat
annikitsuinnaapput, taamaattumillu innuttaasut nunaqarfinni taakkunani
ikiliartorput - tamanna tupinnanngilaq. Kisianni kina oqarami ukiuni makkunani
nunaqarfiit imminnut akilersinnaanngitsutut isukkoqartut ukiut 15-it
qaangiuppata taamatut inississimaannassasut - ilami kina ukiut 15-init matuma
siorna eqqarsarpa Upernaviup eqqaaniittut nunaqarfippassuit imminut
akilersinnaalluartutut ingerlalerumaartut.
Taamaattumik Siumumiit
isumaqarpugut naalakkersuinikkut tunngaviusumik suliassaq pingaarneq
tassaasariaqartoq ullumikkut nunaqarfiit, aamma minnerunngitsumik illoqarfiit
ilaat, imminnut "akilersinnaanngitsutut" isikkoqartut nutaanik
aqqutissarsiuussinikkut imminut akilersinnaasunngortinneqarnissaat.
Inuit nussortarnerannut
peqqutaaqataalluinnartutut aamma taarusupparput meeqqat atuarfianni
ilinniartitaanerup nunaqarfinni amerlasuuni illoqarfinni pitsaassutsikkut
aappasinnerusariaqan-ngitsoq appasinnerummat. Tamanna aamma qanoq
iliuuseqarfigineqartariaqartutut isigaarput. Periarfissat ilaattut
taarusupparput aaqqissuussilluarnikkut nunaqarfinni ataasiakkaani
atuartitaanerup pitsaassusaa qitiusumiit malinnaaffigineqarsinnaasuuppat qanoq
iliuuseqarnissaq ajornan-nginnerussangaluartoq ajornartorsiutit annertuut
pilinnginnerini.
Siumumiit aamma
isumaqarpugut aappaagu nunaqarfimmiut ataatsimeersuartinneqarnissaanut
atatillugu nunaqarfiit siunissami qanoq sutigullu siunnerfigineqarnissaat
erseqqissumik isummerfigineqartariaqartoq nunaqarfimmiunit, aammalu
tamatsinnit.
Siumumiit Naalakkersuisut
sulisoqarnermut tunngatullugu suliniutaat tapersersorluinnarpavut,
suliffeqarnerlu pillugu siunnersuisoqatigiit pilersinneqarsimanerat
isumaqataaffigilluinnarlutigu. Suliniutit assigiinngitsut, pingaartumillu
Nanortalimmi "Inuusuttut ilatsiinnanngitsut" pillugit
iluatsilluartumik ingerlatsinerit nuannaarutigaavut, sineriattalu sinnerani
kommunet allat ingerlataannut tapertaalluarluni aamma taamatut
ingerlatsisoqartoqarnissaa kissaatigilluinnakkatta ilagivaat.
Siumumiit
isumaqarluinnarpugut sulisoqarneq nunatsinni suli eqaannerusumik
aaqqiivigisinnaasariaqaripput. Sumiiffinni suliffissaaleqiffiusuni
suliffissaaleqisut sumiiffinnut sulisussaaleqisunut
suliartortinneqartarnissaannut eqaannerusumik aaqqissuussisinnaasariaqarpugut.
Tassani pisortat kommunillu annertunerusumik suleqatigiinnissaat
kaammattueqataanerunissaallu pisariaqarsoraarput, aammami eqqaamaneqartariaqarmat
kommunimut najugaqarfigisamut aningaasatigut taamaaliorneq iluaqutaassammat.
Isumarput naapertorlugu
illoqarfiit sulisussaaleqisut inissaqartitsiniarnikkut nutaanik
periarfissarsiortariaqarput - nutaamik eqqarsartariaqarput ataavartumik
illoqarfimminni sulisinnaasut amerlanerusut pigilersinnaaniassagunikkit, aamma
tassani immaqa ullumikkut Namminersornerullutik Oqartussat tapeeqartaallutik
illuliortiternissaat utaqqiinnarneqarpallaarpoq.
Isumaginninnermut
tunngatillugu erseqqissarusupparput isertitakkaat ilanngullugit meeqqanut
ineqarnermut tapiiffigineqartarnerat siunissami attatiinnarneqarsinnaasutut
isiginnginnatsigu. Isertitakkaat meeqqanut ineqarnerminnut
tapiiffigineqartarnerat qimanneqartariaqarpoq, aningaasallu isertitakkaanut
tapiissutaasartut taakku ineqarnermut tapiissutinut
atorfissaqartitsineru-ngaartunut atorneqartariaqartutut isumaqarfigaavut,
soorlumi taamatut tapersiisimasugut Socialreformkommissioni 1997-imi
saqqummiimmalli.
Siusinaartumik
utoqqalinersiallit eqqarsaatigalugit Siumumiit allannguisoqarnissaa
kissaatigaarput, ilumoorsinnaanngilaq nunami maani taamak ikitsigaluta, taamalu
immitsinnut atorfissaqaqatigiitsigaluta ukiumut 200 mio.kr.-ingajaat
pineqartumut atortassagutsigit. Tassani soorunami inunnik
pisariaqartitsivissunik peqartoq nalunngilarput, taakkulu siusinaartumik
utoqqalinersiaqarnerat soorunami allanngortinneqassanngilaq, kisianni aamma
ilarpassuaqarput piginnaanngorsaqqinneqarnermikkut inuiaqatigiinni
nammaqataaqqilersinnaasunik. Tamannalu tamatta anguniartariaqarparput. Tassani
periaaserineqarsinnaasut ujartorneqartariaqarput, immaqa suliniummi
"Inuusuttut ilatsiinnanngitsut"-mi periuserineqarsimasut
isumassarsiorfigineqarsinnaapput.
Siumumiit pineqartut
tamakku pillugit pisariaqarsoraarput kommunenut tapit pillugit nutaamik ukioq
2000-imi isumaqatigiinniarnissaq. Isumaqartuarpugummi Kommunalreformkommisionip
kommunet nammineernerulernissaannut tunngatillugu oqariartuutai
ingerlateqqillugit, sapinngisamik akisussaaffiit tulluutut tamaasa kommunenut
nuukkiartuaarneqarnissaat. Aamma soqutigineqarsinnaavoq misissussallugu
kommunenut tapit nunap immikkortukkaarlugit tunniunneqartarpata tamatuma
kingunerisinnaannginneraa kommuuneqarfiit akornanni suli annertunerusumik
suleqatigiinnerulerneq.
Simumiit isumaqarpugut
nunatsinni pinngortitaq illersorniarlugu sulineq annertusarlugulu
pitsanngorsartuartariaqaripput, tamatumani aamma minnertaanngeqalutik
illoqarfinni ikuallaaviliornerit iluaqutaalluarput. Siumumi
anguniarneqartariaqarsoraarlut illoqarfinni annerni tamani ikuallaaviliornissaq,
ilaasa nammineq akilissallugu akissaqartippaat, Namminersornerullutik
Oqartussat tapeeqataanissaat utaqqisariaqanngikkaluarpaat, ilaasali ullumikkut
avitseqatigiilluni aningaasalersueriaaseq najoqqutaralugu pilersitsinissartik
akissaqartinngivippaat. Taamaattumik kissaatigaarput illoqarfinni annerni
ikuallaaviliortiternerit pillugit avitseqatigiilluni aningaasalersueriaaseq
nutaamik naliliiffigineqassasoq.
Tamatuttaaq isumaqarpugut nunaqarfinni
ikuallaaveeqqat pilersinneqarsimangaluarlutik asuli napaannartut piaartumik
atorneqarsinnaanngornissaat aqqutissiuunneqartariaqartoq. Tamanna
nunaqarfimmiut aamma pisariaqartippaat. Taamaattorli aamma
eqqaamaneqartariaqarpoq kommuneqarfiit ataasiakkaat tassuunatigut
eqeersimaarnerusumik ingerlatseqataasinnaanerat aamma periarfissaammat.
Siumumiit isumaqarpugut
inuiaqatigiit puiaasanik atuinerput killissani tikissimagaa, piaasat taakku
annertoorujussuarmik isorliunerusuni quersuarni inissamik tigusisarput,
utertinniarnerat pisariuvoq sulinarlunilu, assartornerat asuli akisoqutaavoq,
naatsumik oqaatigalugu inuiaqatigiinnut annertuumik akissaajaataapput.
Nunat tamalaat akornanni
qillertuusat pissutissaqarluartumik annertunerungaluttuinnartumik atorneqarput,
aamma qularnanngitsumik ukiuni qaninnerni Qallunaat nunaanni, EU-mut
ilaa-sortaanertik tunngavigalugu, pinngitsaaliissumik atorneqartarlernissaannut
periarffissiisussaapput. Malinnaanissarput tamatta
eqqoriakannereersinnaavarput. Taamaattumik maannangaaq
sulissutigilereertariaqarparput puiaasat atorunnarlugit qilllertuusat
utertinneqarsinnaasunngorlugit atorneqalernissaasa aqqutissiuunnissaat.
Naalakkersuisut
nukissiorfiit uuliamik ingerlatillit erngup nukinganik inaallagissiorfinnit
taarserneqarnissaannik sulissutiginninnerat Siumumiit taperserparput,
taamatuttaarlu Tasiilami Qorlortorsuarmilu erngup nukanganit
innaallagissiorfiliornissat pingaartilluinnarlugit suliarineqarnissaat
pimoorunneqartariaqarput. Nalunngilarpummi piffissaq aalajangersimasoq
qaangiuppat erngup nukinganit innaallagissiorfiit taakku imminnut
akilersinnaanngortussaasut, taamaattumik taamaattunut qaqugukkulluunniit
aningaasalersueqataanissarput pisariaqarpoq, pingaartumik siunissaq
eqqarsaatigalugu.
Siumumiit Nuka A/S-imik
pilersitsineq tamakkiisumik tapersersorparput, aamma malunnarmat Nuka
A/S-eqarlersimanera nunaqarfippassuarni kusanartumik malunniutilereersimasoq.
Taassu-ngalu tunngatillugu isumaqarpugut Nuka A/S-ip nunatsinni nunaqarfiit
arlaat avammut nioqqutissianik tunisassiorfiusinnaasunik misileraavittut
atorneqarsinnaannginnersoq misissortariaqaraa, Naalakkersuisullu
qinnuigissavagut inussiarnersumik piginnittutut piginnittut sinnerlugit Nuka
A/S-imi siulersuisunut isumassarsiaq taanna apuutilaaqqullugu.
Sinerissap qanittuani
raajarniarneq pillugu Naalakkersuisut iliuuserisimasaat, tassa pisassat 31. 000
tonsit tamakkerlugit ukioq manna pisarineqaqqullugit aqqutissiuinerat
pisariariaqartutut isigaavut taperserlugillu. Siumumiit 2000-ikkunni
raajarniarneq pillugu isumasioqatigiisitsinissaq oktoberip ingerlanerani
ingerlanneqartussaq peqataaffiginissaa qilanaaraarput, taamatut
isumasioqartigiisitsinissaq pisariaqartutut isigaarput taperserlugulu.
Raajarniarneq,
qaleralinniarneq, assagiarsuit, aalisakkat allat assigiinngitsut, Puisi A/S,
Sulisa A/S, takornariaqartitsineq, avammullu niuerluarnikkut ingerlaneq pillugu
Siumumi isumaqartuarpugut nunatta aningaasanik avataanit aanertunerpaamik
isertitsinissamik pisariaqartitsinerput, pisinnaasarput tamaat annertusarlugulu
patajaallisartuartariaqaripput.
Puisi A/S eqqarsaatigalugu
suliniutit tassaniittut tamakkiisumik tapersersorpagut, nalunnginnatsigu
suliniut iluatsippat nunatsinnut, nunaqarfinnut piniartukkormiunullu tamanut
qanoq annertutigisumik sunniuteqarsinnaasoq. Suliniut pissangalluta
malinnaalluarlutalu malittarissavarput, iluatsissappallu
ineriartortinneqarnissaanut suleqataassalluta piareersimavugut.
Siumumiit
nuannaarutigaarput malunnarmat Sulisa A/S patajaatsumik ingerlammat aammalu
aallartitseqataasartutut inissisimanera iluatsikkaluttuinnarmat. Tamatumani
aamma maluginiarparput Nuup avataani qullersaqarfiata inissinneqarsimanera
piginneqatigiiffiup ingerlanneranut ajoqutaasimanngivimmat.
Takornariaqartitssineq
eqqarsaatigalugu Siumumi upperiuarparput takornariaqartitsineq tassaammat
nunatsinnut aningaasarsiornikkut isaatitsiviusinnaasut ilaat,
ineriartortinneqartuartariaqartoq. Aamma Greenland Tourism-ip nutaamik
aaqqissuunneqarnissaa isumaqatigaarput, nunap immikkoortuini
takornariaqartitsiviit siunnersuisoqarfiattut ilusilerneqarnissaa nunatsinni
takornariaqartitsinerup suli ineriartortinneqarnissaanut
iluaqutaalluarsinnaasoq qularutiginngilarput.
Taamatuttaaq Leif-ip
iluanaarajuup nunatsinnut tikinneraniit ukiut 1000-nngornissaanut atatillugu
suliniutit malittarilluarpavut, aappaagulu nalliuttorsiornernut atatillugu
pilersaarutit iluatsilluarnissaat qularinngilarput. Tamatumani nunatta
kujataani takornariaqarnerup pitsaanerusumik periarfissaqarluni ukiuni
aggersuni ineriartortinneqarsinnaanera tunngavilerneqarluarmat.
Nunatta killeqarffiinik
nakkutilliineq eqqarsaatigalugu Siumumi isumaqarpugut uagut kalaallit tassani
toqqaannarnerusumik peqataalernissarput anguniarneqartariaqartoq, taamaammat
nunatta imartaata kalaallinit namminernit nakkutigineqalernissaa
Naalakkersuisut Danmarkimi Naalakkersuisunut isumaqatigiinniutigisariaqaraat
isumaqarpugut.
Siumumi nuaannaarutigaarput
Napasorsuarmi Nalunami aasaq manna mississuinerup takutissimammagu
guulteqassuseq siusinnerusukkut ilimagisamit annertunerusutut nalilerneqarmat.
Taamaattumik Siumumiit pisariaqarluinnartutut nalilerparput
qulakkeerneqartariaqartoq aatsitassarsiortoqalerpat nunatta ungasinnerusoq
eqqarsaatigalugu annertunerpaamik iluanaaqataanissaa. Tamatumani
piareersimavugut misissueqqissaarnerit kingulliit ingerlanneqarnissaannut
atatillugu nunatta tamakkiisumik peqataanissaata aamma aningaasatigut
tapersersussallugu.
Fyllap ikkannerani
misiliilluni qillerinissat tamatta pissagalluta utaqqivagut, Siumumiillu
ilisimaaraarput qanoq annertutigisumik nunatsinnut iluatsitisoqassappat
tamatuma kinguneqarsinnaanera. Taamaattumik Naalakkersuisut TV-kkut
"Nunaqaqqaartut misilittagaat" pillugit aallakaatitassiorluni
suliniuteqarnerat silatusaarneruvoq, allammi kukkussutigisimasaat uagut
uteqqillugit kukkussutigissanngilagut. Akerlianik silatusaartariaqarpugut,
tamatumunngalu atatillugu Norge-miut uuliamit isertittakkami ilaat
aningaasaateqarfiliorsimanerat eqqarsaatigalugu maannangaaq
isumassarsiorfigalugu misissorneqartariaqarsoraarput.
Angallanneq eqqarsaatigalugu
siullermik Uummannarmiut eqqaamiuilu Qaarsuni mittarfittaarnerat pillugu
pilluaqqorusuppagut. Aamma Maniitsumi arfininngorpat mittarfiup
ammarneqarnissaa pillugu Maniitsormiut eqqaamiuilu periarfissaq manna
iluatsillugu pilluaqqoreerusuppa-gut.
Siumumiit isumaqarpugut
piffissanngortoq mittarfiliortiternerit aalajangerneqarmata
tunngavilersuutigineqartut pingaarnerit ilaat, tassalu ilaasunik
angallassinermi silaannakkut angallassinerup sallerpaanngortinneqarnissaa
piviusunngortissallugu.
Tamanna isumaqarpoq
Paamiuni Qaqortumilu mittarfiliortiternissat naammassineqartariaqartut, aamma
Nanortalimmi ujaraaqqanik qallersukkamik mittarffiliorsinnaaneq Nerlerillu
Inaata Ittoqqortoormiunut nuunneqarnissaa, Island-ermiut allaat
akileeqataafffigiumasaat, tamatumani ilaatinneqartariaqartut.
Ataatsimoorussamik aaqqiissuteqartariaqarlerpugut, nunatsinni angallannerup
tamakkiisumik aaqqiivigineqarnissaa eqqarsaatigalugu. Qulaani taakkartukkavut
tunngavigalugit ineriartortitsigutta nalunngivipparput, suliniutit taakku ukiut
aalajangersimasut ingerlanerini imminut akilersinnaanngussasut.
Taamaattumik
aningaasalersueriaatsit assigiinngitsut misissorneqarrtariaqarput. Aningaasat
aatsaat pigilerutsigit ineriartortitsissagaluarutta qaqugu taava
naammassisaqarsinnaassaagut, aningaasat pigeriikkavut pissarsiarisinnaasagullu
nunatsinnut iluaqutissanngortillugit sulisittariaqarpagut, nalunngikkutsigu
sinnilimmik siunissami uterumaartut. Matumani periarfissarititaasut Siumumiit
taamaannasoraagut taamaattumik utaqqiinnarata iliuuseqarniarta.
Qinersisinnaanngikkallarattali
paasivarput Dansk Lufthavns Væsenip malittarisassai nunatsinnut
tulluanngivissuusut ajoquteqanngillat kisianni annertunerpaamik Qallunaat
Nunaannut naleqqussagaapput soorunami. Siumumi isumaqarpugut piffissanngortoq
tamanna allanngortinniassallugu nunatsinnut tulluartunik silaannakkut
angallanneq pillugu malittarisassaqartariaqarpugut aamma oqartussaaffiup
tamatuma nunatsinni akisussaaffigineqarlunilu ingerlanneqartariaqalernera
tunngavigalugu misissuisoqarnissa kissatigaarput.
Siumumiit
pissusissamisoortutut isigaarput Royal Arctic Bygdeservicep ingerlataasa
suliariumannittussarsiuussinikkut namminersortunut tunniukkiartuaarneqarnissaat
akit pitsaanerpaat anguniarneqarnissaat siunertaralugu maannangaaq sulissutigineqalernissaa
kissaatigaarput.
Siumumiit isumaqarpugut
nunanut allanut sillimaniarnermullu tunngasutigut nunat annertunerpaamik
oqartussaaqataanissaa peqataanissaatalu sulissutigineqarnera
nanginneqartariaqartoq. Tamanna pissusissamisoorluinnarpoq aamma kikkut
tamarmik tamanna paasisinnaasariaqarpaat.
Taamaattumik nunanut
allanut sillimaniarnermullu tunngasutigut naalakkersuinikkut ingerlatsinermi
nunatta oqartussaaqataanerata annertusarnissaanut periarfissanik
qulaajasussamik naalakkersuisut kommisiuuniliorniarnerat tamakkiisumik
taperserparput kommissiuunimilu tassani naalakkersuinermi suliaqartugut partiit
kattusseqatigiillu tamatta peqataatinneqarnissaat pissusissamisoorsoraarput.
Tamatta soqutigisaraarput suliassap tamatuma piviusunngortinneqarnissaa.Taamaattumik
tamatta tassani suleqataasariaqarpugut
Franskit Canadamiullu
nunanut allanut ministeriini ukiuni kingullerni tikeraarneqartarnitta ilaatigut
takutippaat Nunatta nunarsuarmi inissisimanerata pingaaruteqassusia aamma
minnerunngitsumik Nato-mi suleqatigiinnut nunatta pingaaruteqassusia. Tamanna
qujanarpoq periarfissarlu arajutsinagu atorluartariaqarparput. Taamaattumik
Savalimmiuni misissuineq ilaarlugu Siumumiit kissaatigaarput misissorneqassasoq
Darmarkip Nato-mut akiliuteqartarnermini qanoq annertutigisumik nunarput
sipaaruteqarfigisarneraa.
Misissuinerit allat
tunngavigissagaanni eqqoriaasinnaanerput naapertorlugu Danmarkip tassuunatigut
aningaasat sipaartagai annikitsuinnaanngeqaat. Taamatut oqaaseqarluta
naalakkersuisut siulittaasuata aammaanersiornermi oqalugiaataa Siumumiit
oqaaseqarfigaarput.
Qanortoq ukiaq manna
ukiunut tuusintilikkaanut nutaanut pulannginnitsinni inatsisartut
ataatsimiinneranni kingullermi suleqatigiillutalu angusaqarluarisa tamanna
nunatta pisariaqartippa - qujanaq.
Otto Steenholdt: Atassutip oqaaseqartua:
Uaguttaaq Atassumminngaanniit inatsisartut aallarnerlutik qinersineraani pisimasut eqqaallugit pilluaqquserusuppugut. Tamatumunngalu aamma tunngatillugu maani nalunaarutigeriissavarput siulittaasoqartarneq imaluunniit siulittaasunngortitsisarneq naalakkersuisunngortitsiniarnermit kaanngartinneqarluinnassasoq.
Inatsisartut siulersugaaneranni inatsimmi ersarissumik allasimasoq tassa Inatsisartut namminneq akunnerminni siulittaasuminnik qinersisarnissaat piviusunngoqqullugu. Tamanna Atassumiit ataatsimiinnerup matuma ingerlanerani siunnersuutinngorlugu tunniuteriissavarput.
Naalakkersuisut siulittaasuata ammaarluni oqaaseqarnini aallarnerlugu oqaatigaa namminersornerunerup ukiuni 20-ni siullerni demokratiimi suleriaatsit atortullu pisariaqartut pilersissimagigut. ima naalakkersuisut siulittaasua isumaqarnerpa tassa illuartitaaginnarsinnaasugut oqarlutalu suliassaq taanna naammassisimalersoq.
Aperisariaqarpugut inuinnaat naalakkersueqataanerat naammaginartumik pilersissimavarput ? Naamerluinnaq inuinnaat naalakkersueqataanerat tassaavoq anguniagassaq anguniartuagassarput isumaqanngisaannassagullu angallatitaarnertut imaluunniit biilitaarnertut ilillugit oqartussaaqataaneq pisimagipput.
Aqutseriaaseq allaanerusoq sammivigeqqajaajuarneqarpoq. Kammalaatigiaarluni parteqatigiiaarluni isumaqatiginngisallu mattullugit aqutseriaattitut taanerqarsinnaasoq aqutseriaatsimmi tassani atorfimmik inuttaliisoqassatillugu imaluunnit ajungitsorsiassanik agguaasoqassatillugu.
Atuaqatigiissimaneq partiimut peqataaneq ilaqutaanerluunniit maani nalakkersueriaatsimi atorneqarpallaaqaat. Ulluinnarni politikkikkut sulinermi aqutseriaasissatut siunnerfigineqartoq eqqarsaatigalugu narlusuumik namminissarsiunngitsumillu ingerlatinneqanngilaq.
Taama Atassummi oqarpugut nukittuumik ammasumik sunniuteqarluartumillu ingerlaaseq inuinnaat oqartussaaqataaneranni tapersersugarigatsigu.
Meeqqat atuarfiat pillugu qanittukkut isumasioqatigiinnermit naliliinerit siunniussallu Atassummiit tapersersukkagut Naalakkersuisut siulittaasuata taakkartorpai. Pineqartut Atassutip politikkianut naapertuulluinnarput. Kalaallit Nunaata piaarnerpaamik pingasuinnik oqaaseqarfiulernissaanik siunniussaq Atassummiit ilassilluarparput Kalaallisut Qallunaatut Tuluttullu.
Tuluttut ilinniarsinnaanerup sapinngisamik atuutunngortinneqarnissaa eqqarsaatigalugu. Atassummiit siunnersuutigaarput KNR-rimit aallakaatitsiffiup ilaa immersorneqanngitsoq radiumut TV-mullu Tuluttut oqaaseqarfiusumut atorneqassasoq assersuutigalugu radiumut TV-mullu Tuluttut oqaaseqarfiusumut atorneqassasoq.
Assersuutigalugu radiumut TV-mullu BBC-meersunut taannami nunarsuarmi tassaagunarpoq tamanut kiffartuussiviit ataqqineqarnersaat. Inuussutissarsiutitigut ilinniartitaanerit HTX-millu ilinniartitsinerit pilersinnissaannik kiisalu issittumi teknologimut qitiusoqarfimmik pilersitsinissamut pilersaarutit eqqarsaatigalugit aningaasaqarnikkut kinguneqaataajumaartussat kiisalu pitsaasutikkut ajornartorsiutaajumaartussat Atassummiit mianersoqqussutiginiarpagut. Atassummi salliutikkkusupparput najukkani ataasiakkaani inuussutissarsiutitigut ilinniarfiit nunattalu avataani ilinniarfiit taakkua taamaaqatigisaasa akornanni suleqatigiinnerup annertusarneqarnissaa isiginiarneqarnerussasoq. Taamaalillunimi inuusuttortagut ilinniakkanut sapinngisamik pitsaanerpaamik periarfissaqalissagaluarmata najukkami ilinniarfiit nunattalu avataani ilinniarfiit paarlakaajaattut aqqutigalugit.
Ilanngullugu Nuummi ilisimatusarfeqarfimmik pilersitsiniarnissap ammaarluni oqalugiaami immikkut taaaneqarnera eqqumiiginartipparput tassami meqqat atuarfiannut inuussutissarsiutitigullu ilinniartitaanernut allanut sanilliullugu immikkoortinneqarmat. Siullermik ilisimatusarfeqarfissamik taama ittumik sananissaq Inatsisartuni maani oqallisigineqarnanilu aalajangiiffigineqarsimanngilaq. Taamaattumik maanngagaaq illussanik titartaasartunik unammisitsisoqalernera demokratiskimik isiginnittaaseq aallaavigalugu inissaminiinngilaq. Tamanna naatsorsuutigisaasumik aningaasaliissuteqaqqittoqarneratigut kiisalu ilisimatusarfilionissamik siunnersuummik inimi maani saqqumiisoqarumaarnissamut tunngatillugu qularnanngilluinnarluni amerlanerussuteqarluarnissamik naatsorsuutiginninnermik aallaveqarlunilu pissuteqartoq - taamaaliortoqassagunarmammi.
Aappaassanik ilisimatusarfeqarfik ilinniartitaanermi ilisimatusarnermilu ingerlattiveqarfittut ilinniartitaanerup tamarmiusup iluani tulleriaarinermut ilaasariaqarpoq.Ilisimatusarfeqarfiliornermut 100 million kruunit sinnillit atorneqassappata meeqqat atuarfiisa iluanni iluarsaassinerit pisariaqartinneqartut ukiuni qassini kinguartittariaqassappat ?Ilisimatusarfeqarfik pissusiviusunik tassaaginnartoq ingerlatsiviit ataatsimoortut . illutaqareerpoq pisariaqartinneqartunik Nuummi siammarlutik inissisimaannartunik. Ilussanik titartaasartut unammisinneqalersinnagit demokratiimik pissuseq pitsaasoq naaperstorlugu apeqqut tassunga tunngasoq inatsisartuni sukumiisumik oqallisigineqartariaqarpoq.
Soorluuna peqqinnissaqarfimmi ajornartorsiuterparujussuit utaqqisut amerliartuinnarnerannut peqqinnissakullu pinaveersaartitsinermmik naammaginanngitsumik imaqartut siunissamut nalunartumut suli ukiualunnut illikartiinnarniarneqalersut.
Naalakkersuisut isumaqarput suliassaqartoq salliutinneqartariaqartunik. Tamatumanilu Dronning Ingrid-ip napparsimavissuanut Rigshospitalimullu napparsimasunik aallartitsisariaqartarnermut ingerlatitsisariaqartarnermullu aningaasartuutit annertuut tikkuarlugit. Paasinnittaaseq tamanaana Atassummiit amiilaajummernarpoq. Tamatumani naalakkersuisut isumaat naapertorlugu ersersinneqarmat napparsimasunik passusisarneq soqutaanngitsoq pisariaqanngitsorlu ingerlanneqartartoq - taamaattoqanngilluinnarporli.
Peqqinnissarfitsinni napparsimasunik passussisarneq tamarmi
pisariaqartuuvoq. Qipinngut ilaasa inalugaaqqanik taasartagaat peerneqartut
tamarmik nissut naffakut suliarineqarneri tamarmik pisariaqarput.
Pisariaqanngitsut promillinngorlugit uuttugassaapput tassa imigassamik
patsiseqartumik uninngasarnerit tassa naatsorsueriaatsit atorneqartut
procentinut ikkuunnagit. Illuatungaatigulli peqqinnissaqarfimmi
ajornartorsiutit oqilisaanneqarnissaanut najoqqutassaq nalunngilluinnarparput. Imigassamik atornerluineq
appartinneqartariaqarpoq. Taama erseqqissumik Atassummiit oqarpugut
peqqinnissaqarfimmi piffissap atorneqartup nukiillu atorneqartut affaat
tikillugit imigassamik atuivallaarnerup kingunerisaanik ajoqusernernik
toqqaannartumik aallaaveqarmata.
Naalakkersuisut
siulittaasuata Qeqertarsuup tunuani kujataanilu napparsimaveqarfinnik
inissiinissap pisariaqassusia eqqartorpaa. Pisariaqalivinnera imaaliallaannaq
takujuminaappoq. Akerlianimmi nunap immikkoortuinut nussuinerup
ajornartorsiutit annerusut nassatariinnarsinnaammagit. Ilatigut illoqarfiit
sinnerini peqqinnissakkut sullissinerup iluani ilaatigullu Dronning Ingridip
napparsimavissuani ilinniarsimassutikkut naammattumik illersorneqarsinnaasumik
piareersimasuuteqarnissaq anguniarlugu sulisussanik pikkorissuseqarluartunik
pissarsiniarnermini ajornartorsiuteqartumut pisariaqartinneqarluinnarmat
Ukioq 2000-mut aningaasanut
inatsisissamut siunnersuummut atatsillugu naalakkersuisut iliuuseriniakkaminni
Atassummiit nersualaaarneqartariaqarput. Ilatigut aningaasanut siunnersuut
eqqarsaatigalugu ilatigut missigersuutissatut inatsisissaq
pilersaarutigineqartoq aamma eqqarsaatigalugu. Siunnersuutit
akuersissutigineqassappata paasiuminarsaaneq malittarisassallu ersarissut
atorneqartussat uvatinnut qulakkiisavaat nunatta aningaasaqarnikkut
pilersaarusiornissaanut aqunneqarnissaanullu sakkussaqalissasugut ullumikkornit
pitsaanerungaartunik. Aningaasaqarnikkut sukannersumik aqutsisoqarnissaa
pisariaqartutut pingaartutut erseqqissarneqarpoq. Ukiuni tulliutuni
illussaqarniarneq sanaartukanillu iluarsartuusinissarujussuit pissutigalugit.
Aningaasaannaalli atorfissaqartinneqanngillat aamma sulisoqartariaqarpoq.
Akissarsisoqarsimanera imaluunniit silaginnera pissutigalugit sulisut
suliartunngitsoortarsimanerisigut aalisakkat igiinnarneqartarsimanerat 1999mit
tusaqqillugu nakeriallannaqaaq. Taama pissusilersortarneq Kalaallini inuiaqatigiinni
nammaqataanngippaluppaluppallaartoq soqutigittaappaluppallaartorlu
akuersaarsinnaanagulu akissaqartinngilluinnarparput.
Atassummiit
naatsorsuutigisimagaluarparput pisimasut tamakkua naalakkersuisut
siulittaasuata aammaalluni oqalugiarnermini ilanngutissagai. Taamali
pisoqanngilaq naak allatigut ataataanerpaatut oqaaqqissarigaluarluni
tupaallatigisattinnik tamatumalu akerlianik ima inatsisartunut ima oqaaseqarpoq
issuaassaanga "Aammali ilaqarpugut pisussaaffimminnik
naammassisinnissinnaanngitsunik patsisigerpiarlugu suliffissaqannginnamik
tamakkua inakkumavagut ilinniarnissamut pikkorissaqqinnissamullu neqeroorutit
atorluaqqullugit imaluunniit peqatigiffinni sulinermut akuliuteqqullugit".
Taamatut oqartoq tassaavoq 1995-mi qinersineq sioqqullugu partiip ukiut
qassissunnguinngooq ingerlaneranni suliffissanik 7000nik pilersitsinissanmut
neriorsuuteqartup siulittaasua pissaaneq angorusutartik
pissarsiarissagaluarunikkku.
Maanna ammaarluni
oqalugiarnermi suliffissanik neriorsuisoqanngilaq allatunngooq
periarfissaqanngikkaanni peqatigiiffilerinermut ilanngutiinnartoqarsinnaavoq.
Nunami maani inuit
inersimasut kikkulluunniit akissarsisinnaajumallutik sulisariaqartut
nalunngilaat taamaaliornikkut atisassat nerisassat
pissarsiarineqarsinnaangitsut.
Suliffissanik
pilersitsisariaqarpugut suliffissat ataavartut naammassisaqarfiusut ullut
tamaasa sulisut ataasiakkaat inuiaqatigiillu pisuunnguallaffissat. Allatut
oqaatigalugu inuutissarsiornermi atugassarititaasut pitsaanerusut
pilersittariaqarpagut.
Inuussutissarsiornemi
aningaasartuutaasartut naliginnaasut appartittariaqarpagut isumaginninnikkullu
isumannaallisaatit aaqqissuuttariaqarpagut ajornartorsiortunut
iluaqutissanngorlugit. Imaanngitsoq suliffimmik paarsinermut taarsiullugu
ilorrisimaarnertut periarfissatut atorneqassasut. Tamanna isumaqarpoq
naalakkersuisut innaallagissap erngullu akiinik piviusunik inuutissarsionermut
Naalakkersuisut
innaallagissap erngullu akiinik piviusunik inuutissarsiornermut
atuutilersitsinissamik eqqarsaataat Atassutip sunnguamilluunniit
tapersersunngikkai Akit piviusut eqqartorneqartillugit akinit qaffaanissaq
pineqarpat. Inuutissarsionermi aningaasartuutit naliginnaasut suliffissallu
amerlassusiat imminnut toqqaannartumik ataqatigiipput. Akit
qaffasinnerutillugit suliffissat ikinnerusarput akit appasinnerutillugit
suliffissat amelanerusarlutik. Pisortat inissiaataanni ineqarnermut akiliutit
pissusiviusut naapertorlugit aningaasartuutaasunut naleqqussarneqarnissaat
naalakkersuisut kissaatigaat.
Politikki tamanna Atassummiit
tapersersorsinnaavarput taamaattoq ataatsimik piumasaqaateqarnitsigut.
Ullummikkut pissusiusut malillugit ineqarnermut akiliutip ilaanna ineqarnermut
akiliutivittut ilusilerlugu akiliutigineqartarpoq. Ineqarnermut akiliutissap
ilavia akileraarutit aqqutigalugit akilernerqartarpoq. Imaanngilarmi
sunaluunniit akeqanngitsoq. Taamaattumik Ataassutip kissaatigaa ineqarnermut
akiliut aningaasartuutinut naapertuuttumik qaffasissuseqalissappat tamanna
akileraarutit taamaaqatigisaannik appartinneqarnerannik malitteqartinneqartariaqartoq.
Taama pisoqanngippat tamatumani akileraarutit isertortumik qaffanneqarnerattut
isigineqartariaqarmat. Namminersortut inissianik
sanaartornerulersinnneqassappata allatut oqaatigalugu akileraarutit ilaat
pisortat inissiaataannik ineqarnermut akiliummut apparsaatitut atorneqartartoq
atorunnaarsinneqartariaqapoq. Taamaalilluni ineqartut ataasiakkaat namminneq
aalajangiisinnaassammata ineqarnermut akit qaffappata imaluunnit
qaffanneqarpata pisortat inissiaataanni najugaqaannassanerlutik imaluunniit
namminneq aningaasaatitik atorlugit namminerisaminnik illussaminnik
sanaartussanerlutik.
Ineqarnermut akiliutit
allanngortiterneqarneranni tamatumani isetitakinnerpaat
ajoquserneqannginnissaat Atassutip sakkortuumik kissaatigaa. Tamanna ineqarnermut
tapiissutisisinnaanermut tassa boligsikringimik taaneqartartumut
malittarissassat pitsanngorsaaffigineqarnerisigut pisinnaavoq.
Ilanngullugu Atassummiit
oqaatigissavarput inissaaleqinerujussuaq piginneqatigiilluni
inissiaateqarfissanut amerlanerusunut tapiissutit qaffannerisigut
aaqqivigineqarsinnaanngimmat. Piginneqatigiilluni inissiaateqarneq namminermini
taassaareerpoq tapiiffigisaareeqisumik ineqarneq tassami pisortanit tapiissut
66 procentiupput. Taakkualu ilanngullugit misissortariaqarpagut.
Nutaarluinnarmik
eqqarsartoqartariaqarpoq sorlumi atortulersuutinut naalakkersuisoq
ilimasaarereersimasoq tamanna pissangalluta Atassummiit utaqqissavarput.
Ukioq manna
soraarnerussutisiassanut aaqqissusseriaatsit assigiingitsut
sammineqarnerujussuanni. Atassummiit innuttaasut sinneruttut
aningaasarsiortuunngitsut ikittuinnanngitsullu soraarnerussutisiassanillu
aaqqissuuseriaatsit nutaajusut avataaniitinneqartut eqqumaffigeqquagut.
Pineqartut minnerunngitsumik tassaapput aalisartut piniartut savaatillillu.
Inuiaqatigiinni innuttaaqatigiinnut amerlalluartunut taakkununnga
soraarnerussutisiassatigut aaqqissuusinerit qanoq ittut naalakkersuisunit
eqqarsaatigineqarnersut Atassummiit apeqqutigissavagut. Qanoq aalisartut
piniartut savaatillillu ilisisimatinneqassappat allat tamarmik
soraarnerussutisiaqarnissamut ileqqaakkanik isumalluuteqarlutik
toqqissisimallutillu utoqqalinerminni atugaqartitaanissaanni.
Soraanerussutisiat aqqissussinerit akileraarutigut ilanngaataasinnaanermikkut
kiisalu inatsisitigut allatigut siunissami qulakkeerneqarnermikkkut
toqqissisimanartumik aaqqitaapat ?
Illoqarfinni nunaqarfinnilu
avatangiisitigut ajornartorsiutit naalakkersuinit qanoq
iliuuseqarfiginiarneqarnerat naalakkersuisut siulittaasuata ammaarluni
oqalugiarnerujussuarmini taanngimmagit Atassummiit maqaasivarput.
Nunarput tamakkerlugu
eqqakkat iluarsiiviginiarneqarnerat ajornartorsiutaaqisoq tamanit
ilisimanqarpoq. Ajornartorsiut tamanna iluarsiiviginiarneqarsinnaanngilaq
paasititsiniaanermik taallattaagaq kisiat aqqutigalugu. Illoqarfinni
nunaqarfinnilu anartarfiit imaannik eqqagassanillu allanik eqqaaviusinnaasup
ikuallaaviusinnaasulluunniit tungaannut isumannaatsumik
aqqusinniortoqartariaqarpoq. Suliassarli tamanna kommunit amerlanersaannut
aningaasaqarniarnikkut oqimaalluni aaqqikkuminaatsuuvoq.
Taamaattumik Atassummiit
siunnersuutigissavarput nunatta karsianit mandetiminut tapiissutit
aqqutigalugit aqquserngit eqqaaveqarnerup iluarsiivigineqarnissaanut
pisariaqartinneqartut piaartumik sananeqarnissaanut aningaasanik inniminneereeqqullugit.
Eqqaakkanut ulorianartunut
tigooqqaavissaq Qaqortumi pilersaarutigineqartoq siunissami atorluagassaavoq
pinngitsoorneqarsinnaanngitsoq. Saviminikunik eqqaaneq minnerunngitsumillu
eqqakkat nungutikkuminaatsunik akullit isumannaatsumik eqqaaveqarnissaat
aaqqiivigineqartariaqalivissoq ajornartorsiutigaarput. Eqqakkat ilarparujussui
suliffeqarfinnit landskarsimit tapiiffigineqartartunit ilami aamma
Namminersornerullutik Oqartussat ingerlatteqatigiiffiutaannik
piliarineqartuarput ilaalli ikinnerusut tassaallutik inuinnaat
piliarisartagaat. Eqqakkat tamakku katersorneqarnissaannut
assartorneqarnissaannullu isumanaatsumut naalakkersuisut qanoq ittunik
pilersaaruteqarnersut Atassumminngaanniik apeqqutigissavarput. Atassut
isumaqarpoq eqqakkat tamakku isumagineqarnerat aningaasartuutissaannartut
isigineqartariaaruttoq tassami atoqqinneqarsinnaasut immikkoortillugit
tuniniaqqinnerisigut aningaasanik isertitaqarsinnaaneq periarfissaqarmattaaq.
Tamanna naalakkersuisnut misissorluaqquarput.
Raajarniarnerup
allanngortiteriffigineqarnissaa inaarutaasuminngooq aalajangiiffigineqartinnagu
sukumiisumik kiisamiunngitsumik misissuiffigineqarnissaanik naalakkersut
neriorsuinerat Atassummiit kingumut maluginiarparput. Matumuuna Atassummiit
erseqqissassavarput sinerissap qanittuani raajartassat aalisarneqartarnerannik
ajornartorsiutinngortoq sinerissamut qanittumi aalisariutit kisimiillutik
pisuussutiginngimmassuk. Manna erseqqilluinnartumik paasineqassasooq Atassumiit
kissaatigaarput sinerissamut qanittumi aalisariutit manna tikillugu
suliffissuit nunamiittut amerlanersaat suliffissaqarniarnermi qujanaqisumik
suliassersortuarsimammatigit taakkuninngalu pisassat
ikilisikkiaartuarneqarnerata pinngitsorani kingunerisussaammagu nunami
suliffissuit amerlanerujartuinnartut suliassaarullutik
matooqqartariaqalernissaannik tamanna suliffinnik amerlanerusunik ukiuni
qaninnerpaani pilersitsiniarluni neriorsuisarnermut akerliulluinnartuuvoq.
Nunani aalisakkanik
tigooqqaaviit naammassisaqarfiulluartumik ingerlajuartariaqarput kiisalu
aalisartut akornanni immikkoortitsisoqanngisaannarli tassa aalisartut
namminersortut persinneqartassanatik "Royal Greenland-imi pisortat "
aalisartui pisaminnik tunisissagaagata.
Naaminersornerunerup
ukiuini tamani maanna 20-ngortuni aatsitassat lottomi eqqugassarujussuartut
isikkkulerlugit tamanut takorloortittuarneqarsimapput. Aatsitassanik
isumalluuteqarnissap ussassaarutigineqartuarnerata inuutissarsiutitigut
allatigut periarfissaqarnerup ineriartortinneqarnissaa ingiarsimaarneqalermat
Atassummiit toqqissisimanarinngilarput aallaammi maannakkut TV-kut
nangeqattaartumik aallakaatitsisoqalerpoq ineriartornerunngooq qanoq
aqunneqarsinnaanera oqariartuuteqalersunik tassagooq aatitassat aallaavigalugit
ineriartorneq qaquguussagaluarnersoq taakuteriataassagaluarpat.
Sillimmaassineq ajunngilaq
susaarluinnaraannili peqqissiminassaqaaq. Nunatta karsianit nunatta iluani
angallanneq aningaasarparujussuarnik tapiiffigineqartarpoq. Umiarsuarnut
sinersortaatinut 65 million kruunit tapiissutigineqartarput. Grønlandsflymut
aamma 65 million kruuni tapiissutigineqartarlutik mittarfeqarinnut 70 million
kruunit taamatut. Kisitsisit taakku tassaapput millionertaannaanik taasineq
taakkununngali tunngatillugit taasariaqartut ukuupput 200 million kruunit missarpiaat
Grønlandsflyp Arctic Umiaq Line-illu angallavigisartagaasa ilarujussuanni
ilaasussanik taakkuninngarpiaq unammilleqatigiinnissamut Landskarsimit
tapiiffigisaratsigit. Taamasiortarneq tassa tapiissutinik taama isikkulinnik
tunniussisarneq isumatusaarnerunngilaq.
Angallasseriaaseq
ataatsimik periuseqarfiusoq tassa timmisartunik suluusalinnik toqqaammaveqartoq
piaarnerpaamik naammassillugu piorsartariaqarpoq. Allanut akissaqanngilagut.
Taamaattumik Paamiuni mittarfissaq piaarnerpaamik naammasillugu sananeqartariaqarpoq
taamaalilluni timmisartut Dash Seven-inik taaneqartartu ullut
tamarluinnangajaasa Paamiut qulaatsiaannarlugit timmisartut
aqqusaartualissammata ilaasut ukiumut 6000-ingajaat Paamiuniit Paamiunullu
ilaasussat aqqusaaruttalissallugit naak ulloq manna tikillugu ilaasut
taakkorpiaat Grønlandsflyp Umiaq Line-illu unammilleqatigiissutigiuaraat.
Ataasiinnarmik periaaseqarluni angallasseriaatsip naammassineqarneratigut
aatsaat akit malunnartumik appartinneqarsinnaalissapput. Nunatta karsianit tapiiffigineqarnissamik
pisariaqartitsinerit malunnaatilimmik milleriarujussuassagaluarlutik.
Timmisartunut mittarfiliagut nutaat atorneqalereersut eqqarsaatigalugit
Atassummit isumaliutersuupput partiinut allanut isumaliutersuutigeqqullugu
innersuukkusutagut tassaapput Kangerlussuup Narsarsuullu timmisartunut
mittarfii taakkununngalu tunngatillugit qanga sanaartorneqarsimasut maanna
tamarmik pisoqalillutik iluarsaatariaqartualersut. Siunissaq ungasinnerusoq
eqqarsaatigalugu pitsaanerulinnginnerpoq atortut pisoqalisut
aserfallatsaaliortuarnissaat maanna akisullutik takkuttalereersut
aallaavigalugit mittarfiit nutaat marluk tallillugit taakkununnga siunissami
taartissatut siunniukkaani inuiaqatigiinnut manngangaaq akikinnerulerlunilu
pitsaanerulinnginnersoq.
Namminersornerullutik
oqartussat qarasaasiaqarfiaani tunngavissaqanngilluinnartumik aningaasanik
atuivallaarnerup matussuserneqaatissaanik 5 6 million kruuninik aningaasanut
ataatsimiititaliaq qanittukkut immikkut ittumik aningaasaliisariaqarlersimavoq.
Namminersornerullutik oqartussat qarasaasiaqafiaani naammaginanngilluinnartumik
ingerlasoqalerneranut atatillullugu naalakkersuisut inatsisartunit allakkatigut
oqaasiinnakkullu ukiuni kingullerni marlussunni sakkortuumik
mianersoqquneqartarsimapput tamakkuli tusaajumaneqarsimanngillat.
Atassumminngaanniik aallatut ajornartumik pisariaqartumilli ajunaarnersuartut
isikkkulimmut EDB-qarneq aqqinniarlugu aningaasaleeqqinnissaq
tutsuiginartinngilarput. Neriulluaraluarpugut kisianni suli ajornerusumik
takkuttoqarnissaa annilaanngatigisariaqarsoraarput.
Ammaanersiorluni
oqalugiaammi allaffissornerup naalakkersuisuni qanoq aaqqiviginiarneqarneranik
nassuiaat amigaatigaarput makku eqqaaginnarsinnaagatsigit umiarsuaq Disko
atorlugu angallassinermi kanngunartuliaq taama taatigu 33 million kruuninik
nalilik.
Peqqinnissaqarfimmi
akiligassaq puigorneqarsimasoq ilaa eqqanaraluttuaq 8,5 millioninik nalilik.
Peqqinnissaqarfimmi aningaasanik akuersissutigineqanngitsunik atuisimaneq 23
million kruninik aamma nalilik. Namminersornerullutik oqartussat
qarasaasiaqarfiaani amma iluarisaannarsorluni atuipilussimanermi
ajornartorsiutit akiligassat 5 6 million kruuniupput. Maani inimi
isertuunnagu Atassumiit ilimasaarutigissavarput misilittakagut nuanniitut
ilisimaaralugit kanngunartulianik allanik suli pisoqassappat
tupaallaatiginaviannginnatsigu.
Atassummiit naalakkersuisut
aperiniarpagut qanoq iliulersaarnersut allaffeqarfimminni aqutsineq
pisariaqartoq tutsuiginartorlu qulakkeerlugu siunissami qanoq
iliuuseqarniarnersut Atassummiit kissaatiginartikkatsigu ajornartorsiutit
mikisunnguunnguuneranni suliarineqartassasut ajunaarnersuartut
kanngunartuliaasimasutullu taaneqartariaqalernissaat aqqinneqassagunillu
millionerpassuarnik naleqalernissaat utaqqiinnarnagu.
Naalakkersuisut siulittaasuata
ammaarluni oqaseqarnermini inatsisartut atituumik suleqatigiinnissaanik
kissaappai. Suleqatigiinnikkuinnaq oqaloqatigiinnikkuinnaq allatullu allallu
soqutigisaannik mianerinninnikkuinnaq angusaqarluarsinnaanerpugut. Atassummiit
suleqatiginnikkusuppugut tamanik oqaloqatiginnikkusuppugut allallu
soqutigisaannik mianerinninnissamik ersersitsinissamut piumassuseqarluta.
Oqaasiinnaangitsutigut politikkikkulli sulinittigut inernerit takutikkusuppagut
suleriaaserput taamaattuujuarpoq tamaattuujuartussarlu Atassummiit
nipikisaarunnagu nalunaarutigaarput.
Maliinannguaq
Markussen Mølgård, Inuit Ataqatigiit oqaaseqartuat:
Naalakkersuisut
Siulittaasuata oqarneratuut ukiut tusintillit nutaat iserfigigaluttuarpagut
ataatsimiinnerlu manna 1900-kkunni inatsisartut ataatsimiinnerisa
kingullersaraat. Piffissaavoq killiffipput qissimigaarlugu siunissatta
ilusissaata nalilersorluarnissaa. Inuit Ataqatigiinniillu nuaannarutigaarput
taamatut nalilersueqataanissamut tikkuuseqataanissamullu inatsisartuni
periarfissaqarluaratta. Ilumoorpoq namminersornerulernerput nutaajoqaaq 20nik
ukioqarpoq. Inuusuttorli aamma silassorittarpoq nutaanik eqqarsarnissamut
tunuarsimanngilluinnartoq namminniilivinnissaminut piareersartoq aqqutissanik
siunissami illinersiusoq.
Inuiaqatigiit ullumikkut
killiffitsinni imaannanngitsunik aaqqitassasarpassuaqarpugut.
Suliassarpassuaqarpoq inatsiasartut Kommunillu kisimik aaqqissinnaanngisaannik,
inuiaqatigiilli nammaqatigiillutik aaqqinniagassaannik. Ukiuni qaangiuttuni
namminersornerulernitsiniit akisussaaffinnik tigooraanitsinni iluatsitat
kukkussutillu amerlasimaqaat. Inuiaqatigiit aaqqissuunniarneqarsimapput
nunatsinnut naleqqussarlugit. Amerlavallaarujussuaqaalli pissutsit avataaniit
eqqutiinnakkat. Allaffissornerujussuit, qanoq perorsaanissatsinnik,
atuartitsinissatsinnik ingerlatsitinissatsinnillu oqariartuutit.
Isumalluuteqarpallaarnerit akisussaaqataajumannginnerit ilatsiinnarnerillu.
Tupaallannaqaaq upernaaq
aallakaatitami ukiut 20-it matuma siorna Namminersornerulerneq eqqunneqarmat,
taamani politikeriusut radiokut apersorneqarlutik aaqqittariaqakkatut
taakkartugaat ullumikkutorluinnaq ilaatigut nipeqarmata. Aap, tigoorakkatsigut
ingerlariaqissimagaluaqaagut, ajornartorsiutilli ilaat, soorlu tikisitaqarnerup
annikillisarnissaa pikkorluffigisimavarput sulilu pikkorluffigalugu. Oqaatsit
ukiorpassuarni utertuartut, nuutitut kingarnikutut utertuassanngikkutigit,
nutaamik eqqarsartariaqalerpugut. Atorfinitsitisarnermut ersarissumik
politikkeqarnikkut, meeqqallu naqqaniit peroriartorneranut atuartitaanerannut
ilinniartitaanerannullu ersarissumik ataqatigiissumillu politikkeqarnikkut.
Ulluni makkunani
Kangerlussuarmilu atuarfitsialammik oqallisaasut soqutiginaqisut
kinguneqarluarnissaat Inuit Ataqatigiinniik isumalluarfigaagut
pingaartilluinnarparpullu meeqqat meeqqerivinniilli ersarissumik
anguniagaqartumik atuarfiillu suleqatigalugit atualernissaanut
piareersartinneqartarnissaat. Tamatumanilu pigaaruteqarluinnarpoq
perorsaasunngorniat ilinniartitsisunngorniallu ilinniartitaaneri aqqutigalugit
tamatumunnga piareersimalluinnarnissaq ataqatigiissaarinissarlu. Meeqqat
aaliangersimasumik siunnerfilimmik aqqutissiuutinngikkutsigit angusaat
annikinnerujuassaaq. Tassungattaaq ilanngullugu Inuit Ataqatigiinniit
pingaarluinnartutut isigaarput inuiaqatigiini ilinniartitaanerit
eqqarsaatigalugit nunatsinni ilinniarsimasunik amigaatiginerpaasatta
aallullugit qaammarsaatigalugit pilersaarutiginissaat, pilerisaarutiginissaat.
Iluaqutaanngilarmi aningaasarpassuit atorlugit aaliangersimasunut
ilinniartitsiniarutta uffa massa suliffissaqartinnagit. Tamakku erseqqissumik
nalunaarsorneqarlutillu nakkutigineqartariaqarput, suut amigaatigaagut
aallullugillu ilinniartitsiniutitariaqarpagut. Taakku saniatigut maannamut
ilinniarfiit qitiusut katersuukkiartornerini maluginiagassat
eqqumaffigisassallu ersarissut ilagaat ilinniartunut inissaaleqinerujussuit.
Ilumut ilinniarfiit pilersiortorlugillu eqiterniaraanni, inissat
qulakkeersimasariaqarput. Taamaanngippat iluaqutaanngilluinnarmat
inissaaleqinerit imaluunniit iniluttitaanerit pillugit ilinniakkamik
taamaatiinnartariaqartoqartassappat. Taava eqqarsar-toqartariaqalerpoq
illoqarfiit ilaat inissaatillit inissiivigineqarsinnaannginnersut tamannalu
inuiaqatigiinnut akikinnerpaannginnersoq.
Tassunga ilanngullu Inuit
Ataqatigiinniit avaqqunneqarsinnaanngittutut isigaarput, ilaqutariinnut
politikkip ukiuni tulliuttuni sukumiisumik eqqartorneqarlunilu
nalilersorneqarnissaa. Atuarfitsialammi ingerlalluarsinnaanngilaq,
inuiaqatigiit qiterisaat, ilaqutariit ingerlalluanngippata. Ilaqutariit
nukittuut meeqqallu toqqissisimasut pilersinniartariaqarpagut.
Ulluni kingullerni arnat
politikkikkut oqartussaaqataanerulerumallutik saqqummernerat Inuit
Ataqatigiinniit nuannaraarput, neriullutalu inuiaqatigiit atugaasa
oqallisiginerini immersueqataalluarumaartut. Ukiunili makkunani aamma
eqqumaffigisariaqartut ilagaat, anguterpassuaqarmat inuttut
ajornartorsiuteqartunik, oqaloqateqarnissaminnullu matoq-qasangaaramik
avatangiisiminnut ilungersortitsisartunik. Tamakkuuppullu suleqatigiinnikkut
aaqqiiviginiagaqartutut Inuit Ataqatigiinniit isigisagut. Inuiaat nukittuut
pilersinneqassappata kulturikkut nukittorsarnissarput
avaqqunneqarsinnaanngilaq. Kulturitta eriagisatta nunanut allanut
nittarsaattuarnissaa ineriartortinnissaalu pisariaqarluinnartuuvoq.
Tamannaavorlumi ukiuni makkunani, inuttut nammineq avammullu kiinnertarnitsinni
ineriartortittuariaqagarput. Pinngortitarsuaq kusanartoq naammanngilaq,
inuiattulli nunatta pissarititai atorlugit, pigeriikkatta saniatigut,
ineriartortitsisinnaanerput suli annertuneroqisumik aalluttariaqarparput.
Pisuussuterpassuaqarpugummi atorluarnagit eqqaannakkatsinnik. Tuttut, umimmaat
qimmillu amerpassui, neqit tunitsivissaqanngitsut aallaammi ilerrit
ujarattassaai avataaniit tikisittarpagut, uffa massa qaarsumik toqqaveqarluta.
Tamakkuupput atorluaannginerujussuit, iluaagalugit oqallisigiinnartakkagut
qanorlu iliuuseriffigisarialikkagut.
Isiginnaartitsinikkut
nipilersornikkullu ineriartortitsinerup suli annertusarnissaa Inuit
Ataqatigiinniit pingaaruteqartutut isigaarput. Isiginnaartitsinermulli
inatsisip atuutilernissaa qilanaaralugu. Nipilersornermik ilinniartitsinerit
pillugit, nunatsinni siammasinnerusumut atuutilernissai siunertaralugit,
qaammarsaanerit annertunerunissai Inuit Ataqatigiinniit kaammattuutigissavarput.
Mannamummi paasisagut malillugit kommunit ikittuinnaat tamanna aallummassuk.
Tusagassiornerup
nunatsinnut siammasissumik ingerlanneqarnissaa, Inuit Ataqatigiinniit
pigaartutut isigaarput. Sinerissamilu tusagassiornermik nammineerlutik
ingerlatsisut nersortariaqartutut isigalugit. Illoqarfiilli ilaanni,
avinngarussimasunilu TV-kut radio-kullu, tusagassiornerit eqeersarlugillu
aallartisarniartut kaammattortariaqarpavut. Taakkulu saniatigut
pikkorissaanerit suli annertusarneqartariaqarlutik. Tusagassiutit inuit tamat
oqartussaaqataanerannik tunngaviliisuupput, taakkulu pitsaasumik
ingerlassappata, tusagassiorfiit kiffaanngissuseqarlutik eqqummaarillutillu
ingerlanissaat pisariaqarpoq.
Inuiaqatigiinni oqaatsit
pingasunngorlugit inerisarniaraluttuarneranni eqqaamajuassavarput uagut
nammineq oqaatitta mianerilluarnissaat. Marlunnik oqaaseqarnermik oqaraangatta,
uangut kalaallit kisittalusooq piumaffigineqrtarpugut. Marlunnik
oqaaseqassagutta, kalaallit kisimik pinnatik piumaffiginninneq illuttut
ingerlasariaqarpoq. Siunissamilu inuit saaffiginnittarfimmi kalaallisut
oqaaseqarnerup pingaassusaa eqqumaffiginerusariaqarluni.
Peqqinnissaqarfimmi
ajornartorsiutit imaannaanngitsut atuupput. Sulisussaaleqinerup kingunerisaanik
ajornartorsiuterpassuit pilersimapput, aningaasarpassuillu
atortariaqalersimallutik. Naalakkersuisut isumaqatigaagut oqarmata inuit
nammineerluta peqqissusissarput annertuumik akisussaaffigigipput. Ingammik
tupa, imigassaq, ikiaroornartoq naamaarniutillu eqqarsaatigalugit. Inuillu
taamatut atuipilunnissaminnut qaninnerusut tassaakkajuttarput tarnimikkut
anersaakkullu aamma katsorsartariallit. Taamaattumik inuiaqatigiit ilumikkut
anersaamikkullu anniaatillit ikiorsinneqartarnissaasa
qaammaasaqarfiginerunissaat Inuit Ataqatigiinniit pingaaruteqarluinnartutut
isigaarput. Nuannaarutigaarpullu inatsisartuni siusinnerusukkut
oqariartuutigisimasarput maanna ingerlanneqarmat, tassalu sinerissami
tarnimikkut nappaatillit tarnit pissusaannik ilisimasalinnik
angallavigineqarnerat. Siunissamilu tamatumap suli annertusarneqarnissaa
inuillu tarnimikkut napparsimanngikkaluarlutik inuunerminni tarnimikkut
anniaatillit isumagineqalernerunissaasa aqqutissiuunneqarnerunissaat
kaammattuutigissallugu. Taamaaliornikkummi nunatta inuunera ilorleq ikerlu
imaaliallaannaq mamissinnaanngitsoq katsorsarneqarlersinnaammat. Tamannalu
pisinnaavoq kommunit, atuarfeqarfiit, ilagiit, peqqinnissaqarfiit
peqatigiiffiillu attuumassuteqartut suleqatigiinnerunerisigut.
Peqqinnissaqarfimmi
sulisussaaleqineq qaangerniarlugu Inuit Ataqatigiinniit
pingaaruteqarluinnartutut isigaarput. Ilinniartitaanikkut ersarissumik
politikkeqarnissaq. Peqqinnissaqarfimmi sulineq ilinniartuusinnaanerlu
ullumikkornit annertuneroqisumik pilerinarsartariaqarpoq. Aqqutillu
suulluunniit atorlugit, nunatsitut avinngarussimasunik inoqarfiusunut,
tulluartunik ilinniarsimasunik nakorsaqarlutalu peqqinnissakkut allatigut
sulisoqartariaqarpugut. Neriulluarfigaarput peqqinnissaqarfimmi
sundhedsassistentit ilinniarnerisa aallartinnissaat taassumalu saniatigut
nakorsanngorniartarnermut ilinniarnerup nunat avannarliit qanigisattalu
suleqatiginissaanut tunngasumik Inuit Ataqatigiinniit siunnersuutigisatta
oqaluuserinissaa maani inimi qilanaaralugu.
Qeqertarsuup tunuani, nunap
immikkoortuani sorlermi, qitiusumik napparsimaveqalissanersoq pillugu,
neriuutigaarput misissuinerit sukumiisut ersarissunillu nalilersugassallit,
inatsisartunut saqqummiunneqarumaartut. Taamatummi aaliangiiniarnermi
napparsimaviit nutarterlugillu ilanissaat kisimi toqqammaviunani sulisunut
inissaqartitsinerit, angallannikkut inissisimanerit ilaalu ilanngullugit
apeqqutaaqataalluinnassammata. Nunap immikkortuini napparsimaviliornissamut
atatillugu Inuit Ataqatigiinniit pingaaruteqartutut isigaarput sumiiffinni
eqqorneqartussani tusarniaanissaq qanimullu suleqateqarnissaq neriuutigaarpullu
aaqqissuussinissat nutaat sullissinermik ajornerulersitsinatik kommunit
suleqatigalugit piusunik atorluaanermik kinguneqarumaartut.
Nuannaarutigaarpullu Peqqinnissamut naalakkersuisoq kommunit pineqartut
tikillugit angalaarmat ilaatigut innuttaasunik ataatsimiisitsilluni.
Innuttaasut tikillugit tusarniaanerit aqqutaammata pitsaasut neriuppugut
naalakkersuisut aamma allat tamanna atorluartarumaaraat.
Isumaginninnermut
ataatsimiitsitaliarsuup sulinerata aallartinneraniit naammassineraniillu
piffissangaatsiaq ingerlareerpoq. Maannalu tupinnanngitsumik kommunit
innuttaasullumi utaqqikatapput, innersuussutigineqartut qaqugukkut
piviusunngortinniarneqarnersut pillugit. Utoqqarnut, innarluutilinnut
ilaqutariinnullu tunngasut iluarsaasseqqinnissami pilersaa-rusiorneqarnerat
sumut killippa? Qaqungulu tamakku allannguutissartalerlugit
saqqummiunneqassappat? Inatsisartuni allannguutissamik
isumallualitsitsissanngikkutta, ersarissumik oqaatigineqartariaqarpoq
qaqugukkut suut naatsorsuutigisinnaanerigut. Inuit Ataqatigiinniit
qilanaaralugu oqaatigisinnaavarput, naalakkersuisut upernaamut ininut
tapiissutaasartut ikiorsiissutaasartullu allat pillugit
saqqummiussaqarniarmata. Oqaatigeriikkatsituulli suliassarpassuit aamma allat
sumut killinneri paaserusunnarsipput. Meeqqanut siunnersuisoqatigiiliornissamut
atatillugu Inuit Ataqatigiinniit oqaatigissavarput, meeqqat sutigut tamatigut
sullinneqarnerisa pisinnaatitaaffiisalu ersarissumik sulissutigineqarnissaat
tapersersorluinnaratsigu.
Maannamullu
siunnersuisoqatigiiffissap pilersaarutigineqartup suna suliarissaneraa qanorlu
suleriaaseqassanersoq suli iluamik qulaajarneqanngilaq. Tassungalu atatillugu
nunatsinni attuumassuteqartut immikkualuttorpassuit, soorlu Sorlak, Red Barnet,
Foreningen Grønlandske børn pinaveersaartitsinermillu suliallit tamarmik
meeqqanut suliniuteqartut tamatumani qanoq inississimanersut paaserusunnarpoq.
Inuit Ataqatigiinniillu suliassat ataqatigiissaarluakkamik sapinngisamillu
aamma sinerissami sunniuteqarluartumik ingerlanissaa pingaartipparput,
imaanngitsoq siunnersuisoqatigiiffik qitiusumi allaffeqarfilerluni
quppersakkanik suliaqarujoortutut inissinneqassasoq. Taassuma
oqaluuserinissaanut saqqummiussassat pissanngatigaagut. Inuiaqatigiit
ataatsimut isigalugit ukioqqortusiartornerat Inuit Ataqatigiinniit
nuannaarutigaarput. Utoqqartatta ataqqineqarlutik inuiaqatigiinniillu
pisariaqartinneqarlutik misigiuarnissaat pisariaqarpoq. Ilisimasaasalu
ersialaartinneqarnerullutik katersorneqarlutik iluaqutissatut atorluarneqanerunissaat
pingaaruteqartutut isigalutigu. Tamatumallu sumiiffinni Utoqqaat peqatigiiffii
suleqatigalugit inerisartinneqarnissaat kaammattuutigissagatsigu. Naggueqatitta
Akilinermiut utoqqartaminnut pissusaat ataqqinninnerallu piussusaavoq
kusanartoq, tamannalu ilinniarfigisariaqarparput.
Namminersornerulernitsinniit
allannguutit annerpaat ilagaat, pisortat ingerlataasa
aktieselskab-inngortitserneri. Oqararaangut taakku inuiaqatigiit pigisarigaat,
illuatungaanili ingerlanneqarneri matoqqalluinnarmata, qanoq
iliuuseqarfiginissaat ajornakusoortaqalutik. Tikisitarpassuit
akissarsiarissaaqalutik, allaffigissaaqalutik atortorissaaqalutillu taakkunani
sulisuupput. Ilumut keermiaa kalaallit uagut tamakku sapersimaneratsigit.
Tusalissuagut INI A/S-imigooq pisortaq aningaasarpassuarnik tillippoq,
Disko-gooq ingerlanerlunnermigut amigartoorpoq, Qarasaasiaqarfinngooq
ingerlanerliorpoq piffissarlu kingulleq tutsiutillattaalerpoq Royal
Greenland-ip akiitsui amerlavallaalersimasut. Maanamullumi A/S-it nunatta
karsianut aningaasarpassuarnik naleqareerput.
Taamaattumillu
isumalluarfigaarput, Naalakkersuisut aktieselskab-it aningaasaqarnikkut
ingerlatsinerat pillugu, inatsisartut ukiakkut ataatsimiinneranni
saqqummiisalerniarmata taamalillutillu inatsisartut malinnaatinneqalissallutik.
Siunissap takutikkumaarpaa, tamatuma aqutsinerliornerujussuit
killilersimaarsinnaaneraat. Inuit Ataqatigiinniillu apeqquserusupparput, ilumut
ingerlatat taama-ittut A/S-itut ingerlanneri tulluarnersut. Maanna
Nukissiorfiit aamma A/Sinngortinniarneqarlersaarneqarput. Ilumut tamanna
aqqutissatuava? Nunaqqatigiikkaartumik piginneqataasinnaaneq
ammaaffigineqarsinnaannginnerpoq inuit atuisut piumasullu piginneqartaallutik
oqartussaaqataanermik misigisimatilerlugit. Pisortat ingerlatseqatigiiffiisa
suli annertunerusumik suleqatigiinnissaat pisariaqarpoq. Tassami
assersuutigalugu nunaqarfiit ilaanni kallerup inniliorfik allineqarpoq
sivisuumillu qerititsivissaq utaqqineqartoq aallartinneqaraluarpoq sunaaffa
taakku imminut naleqqutinngitsut. Taamaattumik atorsinnaanngitsut. Allami aamma
sikuliorfittaatoqarsimavoq aatsaallu aallartinneqalermat paasineqarluni
kallerup inniliorfimmut naleqqutinngitsoq. Tamakku aningaasarpassuarnik
nalillit, nunaqarfimmiullu isumalluarfigalugit utaqqisagaat, pitsaanerusumik
pilersaarusiorneqartariaqalerput.
Inuit Ataqatigiinniit
pingaartitarivarput pinngortitap nukii atorlugit sapinngisamik siunissami
nukissiorfeqalernissaq. Tasiilamut Qorlortorsuarmullu atatillugu erseqqissumik
paaserusupparput taamatut pilersitsiniassagutta aningaasatigut
illersorneqarsinnaanera qanoq isikkoqarnersoq, tassami qanorluunniit
sunilluunniit perusutsigigaluarutta ullumikkut aningaasaqarnerput
eqqarsaatigalugu allaallu pilersaarutaareersunik aallrtereersunillu
mittarfiliassanik kinguartiterinissaq oqallisigitillugu siunissami qanittumi
annertuunik nalilinnik sanaartornissap nalilersorluarnissaa
avaqqunneqarsinnaanngilaq. Tamaattumik neriuppungut taassumap tungaatigut
qulaajaasoqassasoq pilersitsisoqassappat aningaasatigut illersorneqarsinnaanerannut
tunngasunik.
Ukiuni makkuni A/S -it,
aqutsisoqarfiit ilinniarfiilllu eqiterlugit ingerlanneqarnerisa kingunerinik
malunnaqisumik illoqarfiit aalajangersimasut eqiteruffiupput inissatigullu
annertuumik ajornatorsiorfiullutik. Inissaaleqineq annertuumik
atornerlunneqarpoq, pisortaqarfiit kommunillu aningaasarpassuarnik akiliillutik
sulisuminnut inissiisariaqartalerlutik, tamanna Inuit Ataqatigiinniit
akuersaarneqarsinnaanngitsutut isigaarput, ininillu attartortitsinermut akit
qummut killiliivigineqartariaqartutut isigalugit, aningaasarpassuimmi nutaanik
inissialiornissamut atorneqarsinnaangaluit pisortat kommunillu ilaasa sulisunik
utaqqiisaasumik inissiisariaqarnerinut akiliutigisariaqartarmata. Taamaattumik
tamatumap piaartumik aaqqiivigineqarnissaa kissaatigaarput.
Ukiuni arlalinngortuni
inissiat nukissiorfiillu aserfallassimaqisut tusarsaajuarput
iluarsaannissaanullu aningaasat atorsinnaasut killeqaqaat. Inuit
Ataqatigiinniillu erseqqissumik piumasarissavarput taamatut qaffaaniarnerni
pissakkinnerusut eqqungaannginnissaat, tamatumanilumi boligsikringimik
pisinnaatitaanerup killingata qaffannissaa pinngitsoorneqarsinnaanngilaq.
Taamaattumik taakku ataqatigiissaakkamik nalilersornissaat pisariaqarpoq
isumaginninikkullu kommuninut sunniutissai aamma eqqumaffigineqartariaqarlutik.
Taamatut qaffaaniarnerni suliffeqarfissuarnik ingerlatsisunut
eqqorneqarnissaminnut aarleqquteqartunut kaammattuutigissavarput nammineq
iluminni aamma allaffissornikkut allatigullu sukkut
sipaarniuteqarsinnaanerlutik misissullaqqullugu, ullutsinnimi
piumasaqartuaannarsinnaanngilagut immitsinnut qiviaqqaartinnata soorlu aamma
maanna Namminersornerullutik Oqartussat allaffeqarfissuani misissuisoqartoq
sipaarniutissat sumi qanorlu pissarsiarineqarsinnaanersut.
Nuatsinni
sanaartorfigissaanermut aningasarpassuit atortariaqartarpavut ilaatigullu
nutaanik sanaartornissamut annertuumik taakku killiliisarput, taamaattumik
Inuit Ataqatigiinniit ilumut maanna periusiusut atuinnassanerigut
apeqquserusupparput kaammattuutigissallugulu sanaartorfigissaanerup
akikillisaavigineqarnissaa siunertaralugu nunatsinni teknikkikkut
ilinniagartuut suliassinneqassasut misissueqqullugit.
Inissaaleqineq taama
annertutigitillugu aningaasallu atugassat killeqartillugit pisariaqarluinnarpoq
pisinnaasatsinnut nunatsinnullu naleqquttunik nassaarsiortuarnissaq, Inuit
Ataqatigiinniillu kaammattuutigissavarput naalakkersuisooqatigiit
suleqatigiinnissami isumaqatigiissutaanisut pisortat ingerlatsiviisa sinerissamut
inissaaleqiffiunngitsunut nuunneqarsinnaanerisa maannangaaq
nalilersorneqarnissaat sulissutigineqassasoq, taamaaliornikkummi
inissaaleqiffioqisut aamma oqilisaanneqassammata.
NUKA A/S
isumalluarfigeqisarput neriuuteqarfigaarput mikinngitsumik, nunaqarfipassuarnimi
ingerlalluartunik ingerlatsilernissaa kissaatigeqaarput, Inuit
Ataqatigiinniillu kaammattuutigissavarput sumiiffinni pilersitsiortorlunilu
ingerlatsiniarnerni nunaqavissut ilisimasaasa atorluarneqarnerunissaat,
ajuusaarutigaarpullu suli maannamut nunaqarfinni erloqinartunik pisoqartarmat
soorlu Sisimiut eqqaani eqalunnik tunitsivissaaleqineq pissutaalluni
eqaluppassuit tuninngitsoorneqarsimapput uffa massa pisiniarfinni Isalndimiut
eqaluutaat tuniniarneqartut. Tamakku pissutsit aaqqinneqartariaqarput.
Isumalluarfigisatta ilagaat
PUISI A/S, tassunga maannamut aningaasarpassuit atoreerput, inuiaqatigiinnillu
atorluarneqarnerunissaa Inuit Ataqatigiinniit pingaarluinnartutut isigaarput,
ilami maanna sumiiffiit ilaanni puisit neqerpassui maangaannartarmata
tunitsivissaaleqissunneqarlutik. Taamaattumik tamatumuuna
aaqqissuussilluarnikkut ingerlatsisoqarnissaa pisariaqarluinnartutut isigaarput
ingerlatsiveqatigiiffinnullu tassa NUKA A/S-mut PUISI A/S-mullu
kaammattuutigerusunnarpoq maannamut killiffiup siunissamilu qanoq
pilersaaruteqarnerup inuiaqatigiinnut pineqartunullu ammanerusumik
oqariartuutigineqarnissaa, taamami pingaaruteqartunik suliaqarnermi
malinnatitsiuarnissaq pisariaqarmat.
Saattuarniarnerup
inerisaleruttornerani Inatsisartut immikkut aningaasaliillutik
tapiisariaqartarneranni tamanut assigiimmik tapiissutit atortinneqartarnissaat
Inuit Ataqatigiinniit pingaaruteqartutut isigaarput nalunartullu pillugit
ukiuni tulliuttuni saarulliit takkuteqqissagaluarpata maannangaaq sillimmartaarluni
eqqarsalereernissaq kaammattuutigissallugu.
Raajarniarneq pillugu
Qeqertarsuup tunuani isumasoqatigiittoqaqqammerpoq naalakkersuisullu
aaqqissugaaanik aamma qanittukkut isumasioqatigiissitisoqalerluni. Inuit
Ataqatigiinniit pingaarluinnartutut isigaarput raajarniarnerup siunissaa
eqqarsaatigalugu isumasioqataasut oqariartuutaasa pingaartillugit
tusarniarneqarnissaat. Siunissamut periusissanik nalilersueqqinnissaq
pisariaqavippoq, suliffisssuaqarnikkut, raajarniuteqarnikkut, pisassiisarnikkut
nutarteriniarnikkullu. Tamatumani aalisartut aasaagaluarpat
ukiorsuugaluarpalluunniit imarsuami imaannaanngeqisumi inuuniutillit isumaasa
tusarniarluarnissaat Inuit Ataqatigiinniit pingaartutut isigaarput taakkulu
saniatigut nalilersuinermi kommunit eqqorneqartartut tusarniartuarnissaat aamma
kaammattuutigissallugu.
Ukiuni kingullerni raajat
ikiliartorneri taakkartorneqartut Pinngortitaleriffimmiit aalaakkaasutut
oqaatigineqarput ukioq mannalu amerleriarsimaneri aalisartunut ersarissumik
oqaatigineqarlutik, allaallu Qeqertarsuup tunuani raajaleriffiit
marluinnaasinnaangitsut isumasioqatigiit paatsuugassanngitsumik oqaatigalugu.
Sinerissap qanittuani raajarniutit annikillisannginnissaat inuusuttullu
pisaarusuttut periarfissaqarluarnissaat kaammattuutinut ilaavoq, Inuit
Ataqatigiinniillu tamanna ilalernartipparput.
Suliffissuaqarfiit ilaanni
sulisussaaleqisarnerit ajornartorsiutaapput imaannaanngitsut, suliffissuarnut
raajarnianullu aningaasarpassuarnik naleqartut. Suliffissuarni sulisoqarneq
pillugu sulisitsisut sulisartullu akornanni ikioqatigiilluni pissutsinik
aaqqiiniartoqartariaqarpoq sulinngitsoortarnerillu aallaavii
qulaajarneqartariaqarlutik. Sulisut kisimik pisuunatik suliffeqarfinni
pissutsit sukkut pitsanngorsarneqarsinnaaneri tamaginnit eqqumaffigineqartariaqarput.
Taassumalli saniatigut nunatsinni sumiluunniit suliffeqarfinni naammalerpoq
pissusissamisoortutut isigiuassallugu akissarsinerup aqaguani
sulinngitsoortarnerit. Nunarput imminut napatittutut namminersortutullu
ingerlatilersinnaanngilarput akisussaaffimmik ilumoorussilluta
tigusisinnaanngikkutta. Naalakkersuisut siulittaasuata oqarneratuut allanik
pisuutitsinerit imminullu nalliginerit peerniartariaqarput inuttullu nammineq
inuunermi qanoq ingerlaneranut akisussaassuseq qaratsatsinnut isertariaqalerpoq
- uungaannaq isiginata iliuutsitta kingunissai
eqqarsaatigilluartariaqalerpavut.
Aningaasaqarnerput
ataatsimut isigalugu Inuit Ataqatigiinniit nuannaarutigalugu maluginiarparput
naalakkersuisut ammasumik isertuaatsumik pisariillisaanermillu anersaaqarlutik
ingerlatsiniartut tamatumanilu naalakkersuisut inuiaqatigiinnut ammasumik
pissuseqarluni suliniarnerat kusagaarput siunissamilu aamma taamatut
ingerlatsinissaat isumalluarfigalugu, tassungalu atatillugu siunissaq
eqqarsaatigalugu sunilluunniit sapinngisaq malillugu nunatta tunniussinnaasai
atorluarlugit ineriartortitsinissap aningaasallu nunatsinni
kaaviiaartinneqarnerunissaannik siunertaqartumik kommunit, SULISA A/S,
Namminersornerulutik Oqartussat siunissami suli annertunerusumik
suleqatigiinnissaat Inuit Ataqatigiinniit kaamamttuutigissavarput.
Ukiuni makkunani nunatta
avammut kiinnernerata annertusarnissaa pisariaqarluinnarpoq Inuit
Ataqatigiinniillu pingaaruteqarluinnartutut isigaarput namminiilivinnissatta
imminullu nunanut allanut tungasutigut oqartussaaffigilernissatta mannangaaq
piareersarnissaa, taamaattumik taassumap tungaatigut naalakkersuisut
kommissionimik misissuisussamik pilersitsinerat isumalluarfigaarput
suleqataaffiginissaalu qilanaaralugu, siunissamimi inuiattut nammineq
nunaqartutut imminullu oqartussaaffigisutut ingerlassagutta ullumikkutut
nunanut allanut tunngasutigut tamatigut allanik apereqqaartuarnissarput
qulangersimaneqartuarnissapullu aqqutissanngitsutut isigaarput. Nunanut allanut
tunngasutigut sillimaniarnikkut, niuernikkut, avatangiisinut tunngasutigut
naalagaaffinnullu allanut attaveqarnikkut nunatta pisinnaasi
oqariartuutissaallu nammineerluta ilisimanerusagut pillugit pissusissamisoorpoq
nammineq oqiartuutigisassagutsigit.
Inuit Ataqatigiinniillu
naggasiullugu oqaatigissavarput nuannaarutigigatsigu naalakkersuisuni
namminersulivinnissamik pimoorussilluni oqariartuutit timitaliiviginiarlugit
suliniartoqarmat, aqqulli suli takivoq inuiaallu maannamut minnerunngitsumik
anersaakkut nukitsorsarnissarput pisariaqavippoq - nukitsorsagassaaqaagummi,
meeqqat atugarliortut tusarsaavallaaqaat, imminortarnerit amerlavallaaqaat,
nuannaarniutinik atornerluinerit annertuallaarput, Kalaallit Nunaata inuunera
ilorleq pullavigalugu salinneqartariaqalerpoq tamatumanilu uagut Inuit Ataqatigiinniit
ukiut tusintillit nutaat iserfigileraluttuarnerini aallartinnerinilu nukivut
aamma atorussuppavut suleqataaffigerusullugillu.
Taama oqaaseqarluta
1900-kut naalernerani Inatsisartut naggammik ammaanermut atasumik oqallinnerup
eqeersimaartumik ingerlanissaa neriuutigaarput naalakkersuisullu
oqaaserisaannut qujalluta.
Anthon Frederiksen,
Kattusseqatigiit
oqaaseqartuat:
Siullermik
oqaaseqalinnginninni eqqaasitsissutigilaassavara tassa oqaatsit atorniakkata
aappaat qallunaat oqaasii ilaatigut pissutaallutik oqaaseqaatissara
kinguaattoormat, massa nammineq oqaatsigut kisiisa atortuugutsigit qangali
agguaanneqareersimassagaluartoq, kisianni tassa taanna
inooqataaffigisariaqarallarparsi.
Naalakkersuisut
siulittaasuata ammaalluni oqalugiaataa ilaatigut isumaqatiginartunik aammali
isumaqatiginanngittunik imalik Kattusseqatigiinniit imatut
oqaaseqarfigissavarput.
Siullermik
Kattusseqatigiinniit eqqaasitsissutigissavarput nunarujussuatta inuisalu
sapinngisamik pitsaanerpaamik sullinneqarnissaat isumannaatsumillu
ineriartortinneqarnissaat anguniakkatsinnut ilaatilluinnaratsigu, taamaattumik
ajunngitsussaq anguniarlugu suleqataarusunnerput taamaalilluta nalunaarparput,
tassami nuna inoqanngikkuni ineriartortinneqarsinnaanngilaq aamma inuk timikkut
tarnikkullu ajunngitsumik piginnaanngorsarneqanngikkuni kusanartumik
ineritaqarsinnaanngilaq. Taamaappoq aamma oqaatsini iluartuni orpiup
inerititaqarfiulluartup assersuutigineqarnera. Taamaattumik inuup
ineriartornermi pingaartinneqarnerunissaa pingaartumillu aamma anersaakkut
nukisorsarneqarnissaa avaqqunneqasinnaanngitsoq eqqaasitsisutigerusupparput
qanorluunniimmi atortorissaarusersortigigaluarutta anersaakkulli
nukissaqarnata, taava assigiinnassannginnerlugu orpiup inertitaqarfiunngitsup
piorsartuarniaraluarnera. Taamaattumik innuttaasut akisussaaffimminnik
pisussaaffimminnillu pingaartitsilluartut peqatigalugit ingerlavissatta
ajunngitsumik sammivilernissaa upperissagutsigu taava inuup
qalliinnakkuunngitsoq aammali anersaakkut piginnaanngorsarnissaa ersarissumik naalakkersuinikkut
suliniutigisariaqartoq ilanngullugu nassuerutigisariaqarpoq, tassalu orpimmut
inerititaqarfiusumut assersuunneqarpiarsinnanngikkaluartoq kisianni innuttaasut
akisussaaffimmik pisussaaffimmillu pingaartitsisut nunatsinni suli amerlanerusut
pilersissagutsigit siunissamilu isumalluutigissagutsigit
nassuierutigisariaqarparput kalaallit ullumikkut suli amerlavallaaqaagut
ilatsiinnartunngortinneqarsimasut ineriartornermullu isiginnaartutut
inissisimasut.
Nalunngilarput
kalaalerpassuaqartoq sapinngilluartunik ineriartornermullu peqataalluartunik
kisiannili ilaatigut nunani allani piumasaqaatit nunatsinni ilaarniarnermut
akimmiffissaqartinneqartartunik, tassami namminersornerulernermiik ukiut 20-it
qaangiussimalerput, aap akisunaarsimaqaarput tamaammat akisunaarinnissimanerput
ilinniarfigalugu kukkussutaasartullu nassuerutigalugit innuttaasut
akisussaaffimminnik pisussaaffimminnillu pingaartitsiinnaratik aammali imminnut
tatigisut nunattalu tunniussinnaasaannik atorluaasut suleqatigiilluta pilersittariaqarpavut.
Taamaaliussaguttalu Kattusseqatigiinniit kaammattuutigissavarput kalaallit
ilinniarsimasortavut tamakkiinerusumik ilinniakkaminnik
pikkorissartinneqartuarlutik qaffassarneqarnissaat tatigineqarnerullutillu
suliffimminni atorluarneqarnerulernissaat.
Kattusseqatigiinniit
isumaqarpugut nunatta aningaasaqarniarnera ilorraap tungaanut saatinneqassappat
siullermik naalakkersuinikkut ingerlatsineq pissutsinut piviusunut
naleqqussarneqartariaqartoq kaammattuugisiariaqaripput, minnerunngitsumik
ingerlatseriaatsip ukiorpassuarni ilaatigut Europamiut pissussaat ileqquilu
amerlanertigut issuaannarlugit maliinnarlugillu pissusseqartarnerup nunatsinni
pissutsinut naapertuunnerusumik aaqqissuunneqarnissaa aningaasaqarnermut
pingaaruteqarluinnarlunilu pinngitsoorneqarsinnaangitsoq isumaqaratta.
Taamaattumik Kattusseqatigiinniit sakkortuumik kaammattuutigerusupparput
Namminersornerullutik Oqartussat ersarissumik sulisoqarneq pillugu
politikkeqartariaqarnerat anguniakkanut ilangunneqartariaqartoq, naammanngilarmi
pissusissamisoornanilu naalakkersuisunut ilaasortaasimasut ilaasa kisimik
pitsaasumik atorfinitsinneqartarnissaannik annerusumik qulakkeerinninniartarneq
uffa massa tamakku ilaasa ilinniarsimasaannut atorfiit tunniunneqartartut
ilaatigut naleqqutinngivikkaluartut.
Kalaallit
ilinniarsimasortavut tatiginerullugit atorluarnerusariaqarpagut. Aammalu
tamatta nammaqatigiinnissatsinnik oqaluttilluta tulluanngivippoq
naalakkersuisut atorfillillu ilaasa akeqanngitsunik biileqartinneqartarnerat,
aammalu telefooneqartinneqartarnerat. Ilumut taama inuiaqatigiit inunnut
ataasiakkaannut akiliussisarnerat pissusissamisoornerpa? Uanga nammineerlunga
isumaqarpunga pissutsit taamaattut apeqqusertariaqartut, ilumut
pisariaqartitsineq qanoq annertutigiva, imaluunnit ilumut pisariaqartitsisoqarpaa?
Ilassutitut
aningaassaliissutissanut inatsisissap suliarineqarnernini takornartarineq
ajorparput pisortaqarfiit assigiinngitsut aningaasaliiffigineqaqqinnissaminnut
qinnuteqaataat. Qanorukua pisortaqarfiit naalakkersuisoqarfinniit nakkutigineqartut,
imaluunnit malinnaavigineqarpat?
Ilinniartitaanermut
tunngatillugu pingasoqiusumik oqaaseqartunngortitsiniarnermik toqqaannartumik
naalakkersuisut siulittaasuata oqarnera ajunngikkaluaqisoq kisianni tamatuma
aamma aningaasatigut qanoq kingunerisinnaasaai takorloorneqartariaqarut
Kattusseqatigiinniit isumaqarpugut, tassami apeqquserneqartariaqanngitsumik
kalaallisut oqaatsigut tassaapput nunami maani oqaatsit ilinniagassat
siullersaat. Apeqqutaaginnarporlu oqaatsit suut takornartat oqaasiitut
siullertut ilinniarneqartariaqarnersut, ilumut danskit oqaasii takornartat
oqaasiinik ilinniartitsinermi siullersaajuaannassappat? Tamannami nunatta
siunissaa ungasinnerusoq aamma nunarsuarmioqatitsinnik attaveqarneq
annerujartuinnartussaasoq aamma ilanngullugu eqqarsaatigalugit
aalajangertoqartariaqarnera soorunami atuarfiup siulersuisui peqatigalugit
avaqqunneqarsinnaanngitsutut isumaqarfigaarput. Imaanngitsoq danskit oqaasii
taamaatinneqassasut, kisannili nunatsinnut pitsaanerusussaq anguniarlugu tulleriiaarisoqartariaqarnera
miserratissaanngilaq.
Meeqqat atuarfianni
kinguaatoorutit amerlaqaat, iluarsaatassaannaalluunniit eqqaasagaanni.
Nalunngilarput 1980-ikkut naajartulerneranni meeqqat atuarfiat pillugu
iluarsaaqqinnissamik suliniuteqarluni nunarput tamakkerlugu
angalatitsisoqartoq, misissuinerit tamakku naak inerneri? Maanna atuarfitsialak
eqqartorneqarpoq, neriuppugummi atuarfitsialanngorumaartoq, kisianni
suliniutaareersut sumut killiffeqarneri qanorlu inerneqarneri inuiaqatigiinnut
aamma paasissutigineqartariaqarput. Soorunami atuarfitsialaap
pilersinneqarnissaa tamatta tapersersorparput, aammali naalakkersuisut
siulittaasuata oqalugiaatimini meeqqeriviit aamma meeqqat atuarfiannut
annertuumik sunniuteqaqataasinnaanerat isummersorfiginngimagu maqaasivarput.
Ukiuni qaangiuttuni
suliassaqarfinnik eqiterineq annertuumik oqallisaasarsimavoq, aammalu
tamatumunnga tunngatillugu qeqqaniit aqutsinerup iluarineqarneq ajornera
ilanngullugu eqqartorneqartarluni, taamaattumik sanaartornermut ilinniarfiup Danmarks
Teknologisk Universitetillu suleqatigiinnerasigut pilersaarutigineqartut
ataatsimut eqiterinerinnarmik siunertaqannginnissaat Kattusseqqatigiinniit
eqqaasitsissutigerusupparput, aamma nunatsinni minnerunngitsumik
inuutissarsiutinik ilinniartitaanerup nunatsinnut naleqqussartuarnissaa
pitsanngorsartuarnissaalu ilanngullugit eqqaarsaatigeqqullugit, soorlu
assersuutigalugu ullumikkut STI-mi ilinniartitaaneq siusinnerusukkut EFG-imi
ilinniartitaanermut naleqqiullugu taamaaginnartariaqarnersoq nalilersortariaqarnersoq
isumaqarfigaarput. Soorunami STI imaluunniit EFG issittumi teknologi
atorneqartoq pillugu ilisimasanik katersuinermut annerusumik
attuummassuteqanngikkaluartut, taamaattoq inuutissarsiutinut
ilinniartitaanermut tunngasut pingaaruteqaqimmata taamaalillugu ilanngullugit
oqaaseqarfigilaarpagut.
Aammalu inuiattut
kiffartuussisarnerup, tassa ungdomstjenestimik taaneqartartup
aallartinneqaqqissinnaanera qanoq isumaqarfineqarnersoq paaserusunnarpoq.
Peqqinnissaqarfiup
aaqqissuuteqqinneqarnissaanut akikillisaasoqarsinnaaneranullu tunngatillugu
nunap immikkoortuini napparsimaveqalernissat eqqartorneqarput, tamatumanilu
napparsimaviit pioreersut, soorlu assersuutigalugu Diskobugti eqqarsaatigalugu
Ilulissat napparsivissutata atorluarneqarsinnaanera saneqqunneqarsinnaanngitsoq
eqqarsaatigineqarsinnaavoq, tassami napparsimavik sutigut tamatigut
atortulersugaanermigullu atorluarneqarsinnaasoq, taamaallaat
nakorsassaaleqinikkut sygeplejerskissaaleqinikkullu ajornartorsiuteqartoq,
taamaattumik periarfissat taamaattut aammalu piffiit inuppassuarnik
aqqusaartorneqareersut aningaasaqarniarneq minnerunngitsumillu ingerlatsinermut
aningaasartuutikillisaanissaq ilanngullugit eqqarsaatigalugit atorluaanissaq
kaammattuutiginarpoq.
Kalaallit Danmarkimut
peqqisariartinneqartartut ilatigut atukkamikkut pitsaavallaanngitsumik
atugassaqartinneqartartut naalakkersuisut qanoq malinnaatinneqarpat, tassami
kaalaaliminertugassaanaalluunniit eqqarsaatigalugit naalakkersuisut qanoq
pilersaaruteqarpat.
Aalisarneq nunatta suli aningaasaqarniarnerata
qiterivaa, aammalu suliffeqarfissuup Royal Greenlandip ingerlanneqarnera,
minnerunngitsumillu akiligassai 2 milliardit sinneqartut eqqarsaatigalugit
aammalu ukiuni kingullerni amigartooruteqarfiusumi ingerlanneqarnera
eqqarsaatigalugu toqqissisimananngilaq, minnerunngitsumik aningaasaqarnermut
naalakkersuisup aasap ingerlanerani Royal Greenland pillugu tusagassiuutitigut
oqaaseqaatai isumaqatiginaqisut eqqarsaatigalugit. Taamaattumik naalakkersuisut
tamatumani aamma nunatta avammut niuernera pillugu qanoq isumaqarnersut assut
paaserusunnarpoq, minnerunngitsumillu avannaani ilaatigut qaleralinnut qassutit
januarip aallaqqaataani ukiup tullianiit atorunnaarsinneqarpata, tamatuma
naalakkersuisunit qanoq piareersimaffigineqarnera ilanngullugu
paaserusupparput.
Ineqarnermut tunngatillugu
nammineerluni illuliassat amerlanerusut sananeqartalernissaannut
aningaasaliissutit amerlineqarnissaat kaammattuutigerusunnarpoq, aammalu
inissiarsuit ilaasa nammineerluni pigilerneqarsinnaanerisa misissuiffigineqalersimanerat
pissusissamisoorpoq, pisariaqarlunilu, tassami taamatut
pilersaaruteqalersimaneq aamma Kattusseqatigiinniit siusinnerusukkut
inatsisartuni oqaluuserisassatut siunnersuutigineqareersimammat, aammalu
taamatut siunertaqarnermut naapertuummat.
Eqqartugassarpassuaqarnaraluaqisoq
naggataatigut erseqqissaatigissavarput kallerup innerata erngullu akiinik
qaffaaniarneq isumaqatiginngilluinnaratsigu, tassami assersuutigalugu Nuup eqqaani
erngup nukinganik nukissiorfissarsuaq massakkullu nukissiorfissuaq
suliarineqalermat innuttaasut neriorsorneqarput kallerup innera
akikillillarumaartoq, allarpassuillu akikillinissaannik
neriorsuutigineqartartut maani tamaasa taagunngikkaluarlugit, maanna
akitsuiniarneq akuerseqataaffigissannginnatsigu
ilisimatitsissutigereerusupparput. Aamma engerup nukinga atorlugu
nukissiuutinik pilersitsiniarnerit inuutissarsiutinik ingerlatsiviusuni
aallunneqarpata tunisassiornermut iluaqutaanerusumik pilersinneqarsinnaanerat
eqqarsaatigineqaqqittariaqartutut isumaqarfigigatsigu
kaammattuutigerusupparput. Sumummi annerusumik iluaqutaasava
nukissiorfipiluunersuarmik nunap ilaani tunisassiornermik
periarfissaqanngitsumi pilersitsissagaanni, illua-tungaannilli nunap ilaani
tunisassiornermi tunisassiassarpassuit akornanni innaallagissiorfimmik
pisariaqartitsisoqarfioqisumi tamaattumik amigaateqartoqarpat.
Tamaammat pilersaarutit
eqqarsaatigilluaqqinnissaat ilumullu imminut akilersinnaassuseqarnerisa sumi
pitsaanerunera ujartorneqartariaqartoq kaammattuutigerusupparput.
Naggaterpiaatigullu
soraarnerussutisiaqalernisamut aningaasaateqarfimmik pilersitsisoqarnissaanut
tunngatillugu apeqquteqaatigissavarput maannamut soraarnerussutisiassanut
aningaasat nakkaatinneqartut piginittunillu, tassalu sulisartunit
tiguneqarsinnaanngitsut, inatsisitigut qanoq periarfissaqartinneqarnerat
aammalu sulissutigineqarnerat sumut killinnersoq paaserusukkatsigu.
Sinneri soqutigalugit
malinnaaffigissavagut, kisianni naalakkersuisut siulittaasuata siorna
inatsisartut ukiakkut ataatsimiinnitsinni ammaanermi innuttaasut
anersaartorfissaqartinneqarnissaannut periarfissaqartitsinissaanik
oqariartuutini maannakkut qanoq isumaqarfiginerai paaserusupparput.
Taamatut oqaaseqarluta
oqalugiaat tusaatissatut tiguarput.
Per Rosing
Petersen,
kisimiilluni qinigaasimasoq:
Naalakkersuisut
siulittaasuata oqalugiaataa imartooq misissuataareerlugu tusaatissatut
neriunartutut timitalertariaqartullu tiguutigalugu imatut naatsumik
oqaaeqarfigilaarusuppara:
Aallaqqaammut immikkut
taarusuppara nuannaarutigigakku Naalakkersuisut siulittaasuat Inatsisartunut
ilaasortaasunut tamatsinnut suleqatigilluarnissamik ammaassilluni
oqariartuuteqarnera anguniakkat inuiaqatigiinnut tamarmiusunut
iluaqutaasappata, tamannalu pingitsoqarata aamma anguniartariaqarparput.
Tulleriiaarinera
malikannerlugu ingerlaqqissaguma malugisama siulliit ilagaat ukiuni 20-ini
Namminersornerulersimanitta eqqaaneqarnera, aammalu namminiilivinnissatsinnut
oqartarneq massakkut nalliuttorsiornerinnarni oqaasiujunnaarluni pimoorulluguli
timitalimmik inerisarisartariaqalernera. Tamannalu isumaqataanaqaaq, uangami
isumaqartuarsimagama ineriartorneq taamaattoq inuiannut kalaalini
akisuallaarsimasoq, tamannalu aatsaat aaqqinneqarsinnaasoq, inuiaat kalaallit
akisussaaqqataalutik namminersulivippata, maannakkutut annerusumik
isiginnaartuuginnaratik. Inuiaavugummi ikittunnguit ilinniarsimalluasortagullu
aamma killeqarlutik, taamaattumillu aamma pingaaruteqarluinnarpoq
ilinniarsimalluartut erligalugit iluamik atorluarnerunissaat aammalu
tikisitaniit siulliullugit inissittarnissaat.
Nukinik atorluaannissaq
taama ikitsigitilluni pisariaqarluinnarpoq aammalu immikkuullarissusitta
attattuarnissaa sutigut tamatigut ikinerunerput pissutigalugu
pisariaqartitsinerugumi inuiassuarnut amerlanerusunut naleqqiulluta.
Immikkuullarissusitta
piorsarsimassutsikkullu ilisarnaatitta pingaarnersaatut inissittarpagut
inuiattut oqaatsigut, soorlu aamma oqalugiarnermi tamanna ilanngunneqartoq.
Taamaakkaluartoq eqqumiiginarluinnarpoq uagut inuiattut nammineq uanngaanniit
oqaluttarfimminngaanniit inatsisitigut aalajangersarfigisinnaannginnatsigit,
tassami upernaaq qinersiviup nutaap aallartiffiani oqaatsigut pillugit
siunnersuuteqaraluarama inatsisartuni oqaluuserisinnaasimanngilarput
Namminersornerullutik Oqartussat inatsisaanni inissisimanerat pissutigalugu,
taakkulu folketingip kisimi aalajangiiffigisinnaammagit. Tamanna tupinnartuuvoq
akuerineqarsinnaanngitsorlu, tamattalu isumaginiartariaqarparput
killeqanngitsumik Inatsisartut tamanna aalajangiiffigisinnaanngorlugu
aaqqittariaqaraat, oqaatsittami eriagineqarnerat naammaginarunnaarpoq.
Assersuutigiinnarlugu TV-imi ussassaarutit qiviarutsigit takuneqarsinnaavoq
qanoq tamatigut danskit oqaasii atorlugit ussassaarisoqartiginersoq, taamatullu
kalaallisut oqaatsigut tunngavigalugit amigarluinnartarluni aammalu
takkuttoqaraangat malunnartaqaluni amerlanertigut danskit oqaasianiit
nutsiinnartarneqarsimaneranik. Pissutsit tamakkua kalaaliulluni
nunanninngillat, assersuutissammi taamaattut ajoraluartumik ulluinnarni
atukkatsinni amerlaqimmata.
Nunannaarutigaara
atuartitaaneq nalilersoqqinneqarluni nutarterneqarnialermat, aammalu kalaallit
eqqarsartaasianni immikkuullarissusiannullu nipeqartumik aallaaveqarlunilu
tunngaveqarmat. Tamanna pimoorullugu taperserlugulu kaammattorneqartariaqarpoq
tamanit.
Ilinniartitaanermullu
atatillugu immikkut annikitsumik maluginiarpara sanaartornermut atatillugu
ilinniartitaaneq maanna pimoorullugulusooq ingerlanneqarnialermat.
Nalunngilarpummi 1960-ikkunnili nunatsinni sanaartornersuaq
aallartinneqarsimasoq, mannalu tikillugu sanaartorfinni tamani
ajoraluarluinnartumik suli takussaammat sanasut tamarmiunngikkaangata
amerlanerussuteqarluinnartut suli tikisitaasartut. Tamassumalu takutippaa
ukiuni 40-ngajanni sanaartortoqarsimagaluartoq suli politikkikkut tamanna
aaqqinneqarsimanngitsoq. Tamannalu ajuusaarnarlunilu kanngunarpoq,
neriunarporlu takussaasumik siunissami qaninnerpaami aaqqinneqarumaartoq.
Naalakkersuisut
siulittaasuata oqalugiaatimi aallaqqaataani arlaleriarluni siumut isigaluni
pilersaarusiornissaq taakkartorpaa, tamannalu aamma pisariaqarsorinarpoq
peqqinissaq eqqarsaatigissagaanni. Naalakkersuisummi namminneq nassuerutigaa
aningaasatigut annernarnerpaaffissani angusimagaa, immaqa arlaatigut pissarsiaqarfigineqarsinnaagaluarpoq
Savalimmiuni ingerlaaseq takullugu uagutsitummi isorartutiginngikkaluarlutik
uagut isorartunerunerput 200-300 mio. kr.-inik naleqarnera
qularnartoqarsinnaammat.
Imigassamik atornerluineq
ilaatigut peqqutaasutut taakkartorneqarpoq, kisianni taamatut oqarutta
eqqaammassavarput imigassamik atornerluineq amerlanertigut inuttut
atugarliornermik aalaaveqartarmat, taamaattumillu peqqinnissaqarfimmut
aningaasartuuterpassuit ikilisarniarutsigit aamma inuiattut atugarisagut
nalilersorluinnartariaqaratsigit. Tamattami nalunngilarput tarneq
nukittuujulluni peqqissuuppat aamma timeq tamatigorluinnangajak
peqqissuusarpoq. Aningaasarsiornikkut ingerlatsinermi malunnarpoq
eqqumaffigineqartariaqarluinnalersoq aningaasartuutit sumut qanorlu atorneqartarnerat.
Tamannalu tunngavigalugu neriunnarpoq massakkut naalakkersuisut siunnersortinik
kalaallinik ilalerlutik sulisitsisarsimammata, allaffissornerujussuup
nalilersorneqarneranut. Neriunnarpoq nunatta karsiinnaanuunngitsoq kisiannili
kiffartuussinermut ajunnginnerusumik eqaannerusumillu kinguneqarumaartoq.
Nunatta karsia ukiumut
millioninik untritilinnik arlalinnik inuussutissarsiornermut
tapiissuteqartarpoq. Taakkuninngalu angallannermut 200-millioner koruunit
sinnillit tuttarlutik. Mittarfiit tamakkiisumik naammassiartorput, tamannali
ilutigalugu neriunarsimagaluarpoq aningaasartuutit milliartoqqaalernissaat
aammalu atuisartunut malunnaataalluartumik akitigut iluaqutaalernissaat.
Ernumanarsinnaasumik
ineriartornerup ingerlasinnaanera eqqumaffigineqartariaqarpoq, tassami
imaassannginnami, aningaasat kontomi ataatsimi ileqqaakkat angallannerup iluani
allami atorneqartut; taamaasioruttami ileqqaakkat sumiissagamik ?
Maluginiaqquuinnarpara silaannakkut angallannermi ileqqaakkat mittarfeqarnermi
ingerlatsinermut nuuginnarfeqartutut isikkoqassannginnerat.
Inuiaqatigiit
ikittunnguuvugut; soorlu aamma taanna taaneqareersoq, tamaattumik aamma
ineriartornermi akornatsinni peqataarusullutik iluaqutaasinnaasumillu
aallartitserusuttut ersarissumik timitalimmillu tapersersorneqarnerunissaat
piumasarisariaqaratsigu; akornatsinnimi kalaalersaqarpoq piginnaaneqarluartunik
kaammattorneqarluarunik tapersersorneqarluarunillu angusaqarluarsinnaasunik,
nunatta karsiinnaanuunngitsoq iluaqutaasinnaasumik.
Angallanneq eqqarsaatigalugu
aamma piffissanngorsorinarpoq nakkutilliiveqarnerup nunatsinnut naleqqussarlugu
nuunneqarnissaa suliniutigineqartariaqalermat; soorlu aamma uani
katersuunnitsinni siunnersuutigineqarumaartoq, aammalu angallannermut
atatillugu timitalerneqartariaqalerpoq mittarfiliornitsinnut atatillugu
aalajangiinermut tunngaviutitaq, tassa marloqiusamik ingerlatsinerup
ataasiinnarmik ingerlatsinermut nuukkiartugaarnissaa.
Tamannali
piviusunngortilluarneqarsinnaavoq annertuumik sutigut tamatigut sunniuteqarfiusoq.
Taamaattumik tupigineqarsinnaavoq Namminersornerullutik Oqartussat
piginneqatigiiffiutaat, Arctic Umiaq Line A/S, tamanna aalajangiisimaneq
akerlilerlugulu sooq umiarsuaatini tallisinniarlugit pilersaaruteqarmata.
Ineqarnermut tunngatillugu
annikitsumik eqqaalaaginnarusuppara nutaamik eqqarsarluni aamma anguniakkat
anguneqarsinnaammata, tassa amerlanerusumik inissialiortoqarnissaa.
Nammineerluni illuliorniartut, inissialiorniartut aningaasaliinissaminnut
nunanut allanut naleqqiulluta maani nammineq pigisatsinnik atorniartarfissanik
periarfissaqarnera killilerujuussuuvoq, politikkikkullu aamma anguniakkat
pimoorussassat ilaattut inissittariaqarluni. Aammalumi immaqa inissiat
sananeqareersut ilaat inigineqartunit pisiarineqarsinnaasunngorlugit periarfissanngoriarunik
tamanna arlalinnit atorluarneqarumaarpoq taamaasillutalu aningaasat nunatta
karsianut pituttorneqartut ikilisinneqarsinnaagaluarlugit. Tamanna immaqa
neqeroorusiornikkut "naaggaarneqarsinnaanngitsutut" kvadratmeterimut
assersuutigiinnarlugu 5.-7.000-kr.-inilerluguluunniit soqutiginnittunut
ammaassutaasinnaagaluarpoq.
Inuussutissarsiutit ataani
immikkut maluginiakkama ilagaat eqqumiiginarmat Greenland Tourism A/S
aalajangiiffigineqaraluartoq siunnersuisoqatigiiffittut ingerlaqqissasoq, manna
tikillugu A/S-itut ingerlatsinini attatiinnarmagu.
Naggataatigut tammanna
killilimmik oqalugiaat oqaaseqarfigereerlugu uteqqilaassavara
suleqatigiinnissamik oqariartuuteqarnera aammalu namminersulivinnissamik
arlaleriarluni taakkartuinera immikkut nuannaarutigigakkit. Qujanaq.
Johan Lund Olsen, Inatsisartut Siulittaasuat,
ataatsimiinnermik aqutsisoq:
Tassalu taamasillutik
maannakkut partiit kattusseqatigiit kiisalu tassa kingullermik kisimiilluni
qinigaasimasoq naalakkersuisut siulittaasuata tallimanngormat ammaalluni
oqaatigisaanut saqqummiussaqarput, naatsorsuutigaaralu tassa naalakkersuisut
siulittaasuat maannakkut aamma taakku saqqummiussat aamma
akissuteqarfigissammagit. Jonathan Motzfeldt takanna.
Jonathan Motzfeldt,
Naalakkersuisut
Siulittaasuat:
Qujassutigaakka maani
oqaaserineqartut tamaasa, aamma tamarluinnaasa oqaaseqarfigissaanngilakka.
Kisianni oqaaseqarfigisassanni ilaatigut erseqqissaatit aammalu
naqqiissutigerusutakka oqaaseqarfigissavakka.
Tassa partiit oqaaseqartui
pingasut, aammalu Kattusseqatigiit kiisaalu aamma kisimiilluni
qinigassanngortittup oqaaserisaminni tamarmik ammaallunga oqaaserisakka
tunngavigeqqissaarlugit oqaaseqarput. Tamarmik erseqqissaateqarput, aammalu
oqaaserisama saniatigut innersuussuteqarlutik uanga taasimanngisannik ilaatigut
aamma eqqarsaatigisinnaasannik. Aammalu naalakkersuisunut
eqqarsaatigeqqusaminnik.
Soorlu Siumup oqaluttuata
Jørgen Wæver Johansen-ip oqaatigisamini eqqaasai arlallit maluginiarsimavakka
aamma oqaaseqarninni allaat erseqqissaatigisimanerusariaqaraluarlugit. Jørgen
Wæver Johansen-ip oqaatigisamini ilannguppaa ilaatigut Kalaallit Nunaata
Radio-ata aallakaatitsisarnermini naqqallisaarnerujussua KNR-tv-ip
atorneqannginnerujussua.
Tamakkuupput KNR suleqatigalugu,
oqarpunga suleqatigalugu! aaqqissuussinissanut atorluaanermik, piffissamik
aammalu inuiaqatigiinni iluaqutaasussanik, qaammarsaatinik, oqallinnernik,
ilinniartitsinernik allanillu atorneqarsinnaasunut noqqaassutaasinnaasut.
Isumaqarpunga taama oqariartuuteqarneq assorujussuaq pitsaasuusoq. Aammalu
qularinngilara aamma Kalaallit Nunaata Radio-ata tusagassiuinermut
atorneqarnera, nutaarsiassaqartitaanerput maani inimi, immikkut
oqallisigilerutsigu apeqqutit taakku uterfigineqarumaartut, nunatsinni
nutaarsiassaqartitaanitta radioavisip tungaatigut aamma tassani
oqallisigisassatsinni nutaarsiassat pillugit nassuiaateqarnermi
oqallinnissatsinnut periarfissaqarumaaratta.
Aamma oqaaseqaatigisama
saniatigut alla, Jørgen Wæver Johansen-ip taasaa, nalunngilara aamma taanna
Jørgen Wæver-ip allallu akunnerminni oqallisigisaat, inuusuttut akornanni
oqallisigisatut kusanartutut isigaara oqaatigineqarmat. Ukiuni makkunani aamma
suliassanik suli amerlanerusunik tigusinissarput Danmarkimiit eqqartorneqarpoq,
ilaatigut eqqartuussiviit tiguneqarnissaat, kriminalforsorgi allallu, soorlu
taamaatuut.
Kisianni aamma Jørgen Wæver
Johansen-ip oqaatigisaa, Kalaallit Nunaata imartaani kalallini namminermi
nakkutigineqarnissaa, naalakkersuisut Danmarkimi oqaloqatigiissutigisinnaannginneraat;
oqarusuppunga taamaaliorusuppugut. Isumaqarpunga uniffissaanngitsoq Kalaallit
Nunaani aamma immatsinni nakkutilliineq ullumikkut sakkutuut
ajunngilluinnartumik suliaat aammalu nersunaqisumik, imarsuaq nammineq
perorfiginngisartik suliffigaat, uagut timaaninngaanniit isiginnaarpagut
nakkutilliinerilu malinnaaffigalugit soorunami.
Sooq uagut nakkutilliineq
taanna tiguniassanngilarput, inuusuttut tassani sakkutuutut pinngikkaluarlutik,
kisianni ilinniartinneqarlutik sinerissami nakkutilliinermut, taassumalu
saniatigut annaassiniarnernut allannullu, taamak ittoq eqqarsaat soqutiginarpoq
aamma isumaqarpunga inuusuttut siunissami nunatsinni sullissiniarnerannik
eqqarsaataasoq kusanartoq.
Ammalu manna piffissaq
iluatsillugu oqaatigissavara, siornatigulli Danskit naalaakkersuisuinut
saqqummiuttarsimasarput, maannakkut sakkutuut professioneliusut, tassa
atorneqaleriartorput sakkutuut sakkutuuiit sakkutuujujuartussat. Taavalu
taakkua aamma Danmarkimut pissarsiariniartarnerat ilanngullugu sooq Kalaallit
Nunaanni aamma inuusuttut neqeroorfigineqanngillat?. Neqeroorfigineqarnissaat
maannakkut piviusunngortinniarlugu admirali maanngartussaavoq, kalaallisut
allassimasut neqeroorutit aamma nassarlugit, taannalu tamakkununnga
periarfissanik aamma ammaassiniarneq eqqarsaatitsinni aamma inuusuttunut
neqeroorutaasinnaapput.
Aamma Jørgen Wæver
Johansen-ip erseqqissaatigisamini arlalinnik oqaatigisai,
naalakkersuisuninnganniit tusaatissatut tigorusuppakka, kiisalu aamma una
oqaatigilaarusullugu oqaaseqarnermini aammalu allat oqaaseqarneranik
tikitassanni oqaatigeriissagakku, tassa kallerup innera erngullu akiisa, ilaasa
qaffaaneqarnissaannik oqaatsit atorpaat aamma soorlu Kattusseqatigiit
oqaluttuata, Anthon Frederiksen-ip, kisianni aamma malugaara uani oqaatigineqarmat
akiisa naleqqussarneqarnissaat - reguleringimik taanna taaneqartarpoq -
Nuummiutoorlugu, taava tassani akinik naleqqussaanissami Naalakkersuisut
aallaavigaat ukiuni arlalinni akit akiusunut akissarsianullu
naleqqussarneqarsimanngimmata.
Niuertup kialluunnit
niuertarfimminik ingerlatsilluartup ukiumut akit akitsuutillu malittaralugit
nioqqusiami aamma tamakkununnga naleqqussartarneri isumagisassarai,
taamaaliunngikkuni aamma fallit-teriartornissaminut ingerlassammat. Aamma
pisortatigut ingerlasut taamaapput aamma pinngitsooratik akinut akitsuutinullu
naleqqussartariaqarput, taamaalilluni iluarsagassat allallu tassaniittut aamma
taakkartorneqarmata.
Taanna immikkut
tikikkumaaratsigu taanna erseqqissaatigiinnarpara aamma nuannaarutigigakku
aamma Siumumit taanna
taperserneqarluni oqaaseqarfigineqartoq.
Nunaqarfinnut tunngatillugu
Siumup aamma oqaatigisaa aamma allat oqaatigisaanut pitinnanga Jørgen Wæver
Johansen-ip oqaaseq una atugaa: nunaqarfiit akilersinnaanngitsutut isikkoqartut
, tassani eqqartorneqartut aammalu qassissaa pinerpoq nunaqarfimmiut uagut
illoqarfimmi ilinniakkatigut pitsaanerusut appasinnerusumik
ilinniagaqarsimanigut eqqaaneqartuartartut, oqaatigilaarlara ataatsimoortumik
nunaqarfimmiunut oqaatiginninnissaq mianersuuttariaqarpoq. Aamma ilagut
ilinniarluarsimallutik ilinniarsimasutullu malinnaallutik inuupput. Ataatsimut
nunaqarfimmiunut taamak taasisarneq mianersuuttariaqartutut uanga
isumaqarfigaara.
Nunaqarfiit ilaanni
sulisussat amigaatigineqarput aamma illoqarfiit ilaanni amigaatigineqarput
sulisussat ilinniarsimasut. Aamma nunaqarfiit ilaanni
ilinniartitsisorissaarpugut sulisorissaarlutalu allatigut, taammaattumik
nunaqarfimmiunut taanna ataatsimoortillugu ilinniakkatigut appasinnerusutut
taaneqartarnerput mianersuuttariaqarpoq. Pinngitsoorani ilinniarnitsigut
allatigullu assigiimmik illoqarfimmiutulli ilinniagassanik
neqeroorfigineqartutut misigisimassaagut, aamma taamaaliorpugut. Aamma
nunaqarfiit suut akilersinnaasut akilersinnaanngitsutulluunniit
nalunaarsorneqanngillat naalakkersuisuniit.
Nunaqarfiit
inuuffigineqartut tamarmik periarfissaqartitaapput sapinngisamik
ineriartornissaminnut, aamma taanna inuiaqatigiit akilersorparput. Taamaattumik
akilersinnaanngitsutut nalunaarsuisoqanngilaq naalakkersuisuninngaanniit; kisianni
soorunami aningaasartuutitta erseqqinnerulernissaat pingaaruteqarpoq aamma
erseqqissumik taassallugu.
Aamma Jørgen Wæver
Johansen-ip oqaaseqarnermini immikkut erseqqissaatigisaa kommunit aamma
soorunami suliassanik ullumikkut aallartitsinitsinni peqataanissaanik
oqaaserisanni tapersiinera nuannaarutigaara.
Nunatsinni amerlaqisut
maanimi inimi oqaatigineqartut oqaatigineqartarsimasullu
oqaatigineqartarumaarpullu iluatissinnaanngillat kommunit namminersinnaanertik
aamma tamakkiisumik atunngippassuk. Utaqqiinnartoqarsinnaanngilaq nunap qinigai
kisimik qanoq iliuuseqassasut. Inatsiseqarpoq kommunalstyrelseslovimik,
kommunit nammineersinnaanerannut inatsimmik tassanilu kommunit
nammineersinnaanerat allassimavoq, innuttaasunut kiffartuussinissaat, allassimavoq
ulluinnarnilu isumaginninneq aamma kommunerpassuit ajunngitsumik suliaraat
ilaasalu aamma ajunnginnerusumik soorunami uattulli suliarisinnaallugu.
Taamaattumik nunatta
nammineerluni ingerlaniarneranut aamma ilaalluinnaqqissaarpoq kommunit aamma
suliamikkut uagutsitulli annertutigisumik piumaffigineqarnerata
erseqqissuunissaa. Taammaattumik tassani kommuninut aamma suliassiinermi Jørgen
Wæver Johansen-ip taasaa; tapiissutit qimerlooqqinneqarsinnaaneranik
aviffigeqatigiinneq eqqornerusoq - taamak paasigakku, naniniarneqarnissaanik
innersuussutai aamma patsisissaqarluartumik kissaateqarnertut isigaakka.
Taavalu aamma takornariaqartitsinermut tunngatillugu ilumoorpoq, Leifip
Iluanaarajuup aappaagu nalliuttorsiutigineqarnissaa annertuumik Nunat
Avannarliit, Killiit peqatigalugit; pingaartumik Islandi, suliarineqarmat.
Takornariaqartitsinermi
kujataanut qimusserfiunngitsumut, massa uagut qimussernermik
nuannarisaqaraluaqaluta, qimussersinnaangitsumut neqeroorutigisinnaanngilagut
qimussernerit allallu soqutiginartut, taamaattumik takornariaqartitsinermut
ikiuutaanissaa aamma siunertaralugu suleqatigiinneqarpoq taqqavani aammalu
qallunaatsiaat kujataani tamarmi siaruarsimapput. Ilaatigut eqqoriarneqartarput
8000-missaani, illukuini qassiunissaat najoqqutaralugit kisitsigaanni,
kinguaariinni ukiuni 300-ni ingerlaneranni sinnerlugit inuit 8000-it tungaanut
ingerlasimasinnaanerat, 6000 - 8000-it akornanni.
Taamaattumik kujataani
tamarmi qallunaatsiaqarneq siaruarnikuummat, aamma Qassiarsummi
soorunami maannakkut pilersaarutit
kisimik ingerlanneqanngillat aamma eqqaani Qassiarsummut qanittuni
pilersaarutit ingerlanneqarput.
Iluatsillugu
oqaaseqarfigilaaginnassavara aamma partiit tamarmik oqaaseqarfigimmassuk
amerlanerilluunniit maani oqaaseqartut, angallannikkut pissutsit tassani
Atassutip oqaaseqartuanut naqqiissuteqalaassaanga, tassa Paamiuni
angallannermut tunngatillugu oqaatigissavara aamma aqagu saqqummiunneqartussami
takuneqarsinnaammat Paamiut Qaqortullu mittarfiuliornissaat
kinguartinneqarallartut, taamaareerpoq Qaqortoq kisianni imaanngilaq
peerneqartut, suli eqqarsaatini maannakkut aningaasat aamma ataatsimiinnerup
matuma ingerlanerani nalilersorneqarneri ilanngullugit ukiuni tulliuttunut
qaqugu ikkunneqarsinnaaneri suli ammasumik oqallisigaagut, taamaattumik
peerneqarsimasutut misigisimasoqassanngilaq tassani suliassat
tulleriaarneqarnerinut ilaatillugit sulianerineqarput, Paamiuni immikkut 30
mio.-nit suliffissat tungaatigut pilersitsiniarnermi immikkoortikkumallugit
Naalakkersuisut siunnersuutigaat, umiarsuarni angallassineq aamma
pitsaanerusumik aappaagu ingerlanneqassaaq, utaqqinerup nalaa
atorluarniarneqarpoq ilaasunut angallassinermut, aamma Otto Steenholdt-ip
angallannermut tunngasunik kisitsisit taasaanut tunngatillugu
erseqqissaatigilaassavara 1998-imi umiarsuarmik Paamiuninngaanniik
aallarsimammata inuit 3500-ut taavalu aamma Paamiunukarsimallutik aamma
taamatut inuit amerlassuseqartut, tassa 3500 missaanik, tassa taavalu
timmisartukkut Paamiuniit Paamiunut ingerlasoqarsimalluni 292-it, tassami soorunami
helikopteriinnaat angallataammata aamma taakku pissavagut. 98-imi
Paamiuninngaanniit timmisartorsimapput. Inuit 220-it kisianni umiarsuarmik
angallanneq soorunami angeqaaq, taanna qaninnerusumik angallaviummat.
Taanna oqaatigissavara
aamma paatsuuvisoqaqqunagu tamakkunani suliniarneq unittoortitaasutut
isigineqanngimmat. Taamaalillunga aamma Siumup oqaaseqartuanut
uterfigilaagassannut marlunni uani Atassut oqaaseqarmat, annertunerusumik
taanna oqaaseqarfigilaarusuppara.
Atassutip oqaaseqartuata
hr. Otto Steenholdt-ip oqaatigisaa atuaraanni oqartariaqarpunga uanga
oqariartuutinninngaanniit allaanerungaatsiartutut oqaatigisariaqarpakka. Uanga
oqaatigisanni ilumoormat una innuttaasut massa ilaasa oqaaqqissaarinertut
taagaluaraat, avisit ilaasa oqaaqqissaarinertut taagaluaraat -
moralprædiken-imik taagorlugu - oqaatigissavara innuttaasut akornanni
pinngitsoorneqarsinnaanngilaq oqaatigisassallugu akisussaaffik annerpaaq
inuttut ilaquttanut inuiaqatigisanut tassaammat inuk nammineq tassani
akisussaaffigisai. Taakku avaqqullugit iliuuseqarnialeraangatta allanik
isumalluutinik aallartitsisarpugut.
Tassani isumalluutigut
qangarsuarli aamma sungiussimasagut, pisortat tungaannut isumalluarnersuarput
ukiuni qaangiuttuni atorsimasarput naalagaaffiullu aamma namminersornerulernitta
iluani an-nertusimaqaaq, sulilu annertuallaarluni. Aamma ilaatigut
oqaatigineqarmat namminersorne-rulersimanerput ukiuni 20-ini ilaatigut
peqqissimissutissaasoralugu. Taanna oqartariaqarpugut uanga nammineq taanna
oqaatigisarpara; aap, peqqissiminerusimassagaluarpoq una
aallartissimanngikkaluarutsigu ukiut 20-it matuma siorna. Taamaattumik
aallartissimanerput ukiut 20-it matuma siorna piffissami eqqortumi
aallarnernertut isigisariaqarpoq, isigaarput aamma uagut tassanilu aamma
naammassiniagassat kusanartut suli ingerlasut katersuuffigalugit.
Nuummi
ilisimatusarfeqarnissaq pingaartillugu Naalakkersuisut saqqummiussaat
suliassanik ingerlatseqqinneruvoq, tassami 1997-imi Atassutikkut
naalakkersuinermi ilinniartitsinermi naalakkersuineq tigummigallarmassuk,
Konrad Steenholdt-ip saqqummiussaa eqqaamalluarpara inuuinni ukiut marluk
matuma siorna, arkitektkonkurrence-qarnissaq universitetspark-iliornissaq
pillugu Konrad Steenholdt-ip saqqummiussaa.
Taamanikkut nuannaarluta
suleqatigiit taakkua taamanikkut universitetspark-imik påskepakkemik maannakkut
taaguuteqartumi saqqummiussassaq akuersaarluarsimavarput, maannakkullu
Naalakkersuisup Lise Lennert-ip suliassaq ingerlateqqikkasuarmagu aamma
nuannaarluta tapersersorsimavarput tassani allaat maannakkut oqaatigineqarluni
arkitekt-inik unammisitsinermi Hjemmestyre tassani aningaasartuuteqassanngitsoq
tassa Ove V. Jensen Fond -ip aningaasartuutit taakku matussammagit
taamaasilluni unammisitsineq ingerlanneqarluni.
Imaappoq Naalakkersuisut
Atassutikkut tassani akisussaalluarmata eqqaasitsiarpakka puigortaannarata
kisianni uagut nuannaarluta eqqaamasagut puigornaveersaartaratsigit.
Taamaattumik maannakkut suliassaq taanna ingerlalluareersimammat taamaalillugu
apuutitsiarpara Otto Steenholdt-imut eqqaamatsiaqqullugu aamma
puigornaveersaalaaqqullugu. Tassami nuannaarutigigatsigu taamaalillugu
suliassaq ukiut marluk matuma siornatigut ingerlasoq maannakkullu
Ilinniartitsinermut Naalakkersuisup saqqummiukkasuarmagu taanna
qujassutigisimavarput.
Taavalu aamma
oqaatigilaassavara Otto Steenholdt-ip oqaaserisamini massa oqaaseqartut allat
ilaatigut Kattusseqatigiit aamma tusarnaarniarpakka napparsimaviit
regionalsygehus-inik taaguuteqartut - tassa napparsimavimmik qitiusussamik
inissiiniarneq - taakku aalajangernissaat aamma Peqqinnissamut
Naalakkersuisunngortup Alfred Jakobsen-ip aamma noqqaassutigisimavaa
uagutsinnut Naalakkersuisunut taanna piffissaq maannakkut saqqummiunneqartussaq
iluatsillugu kaammattuutigalugu aalajangiinissaq qanilliartormat, aamma sipaarutaasinnaanera
ingerlatsinikkut sipaarutaaginnarani aamma piffissamik sipaarutaarutaaginnarani
kisianni aamma Naalakkersuisut aallaaviannut - napparsimasoq qitiuvoq - inuk
kinaluunniit napparsimalersoq, napparsimalerutta paaserusupparput suna
nappaatigalugu, aamma katsorsarneqarsinnaagutta sumi katsorsarneqassaagut.
Taakku marluk imminnut ataqatigiipput. Taamaattumillu taakku isigalugit
pitsanngorsaatissat aamma maaniittut oqallisigissavavut, naammassiniarlugillu.
Taava aamma Otto
Steenholdt-ip oqaatigisamini, suliffissaqanngitsunik
innersuussutigineqarsimasoq, eqqaagamiuk 7000-inik suliffissanik
neriorsuigaluarluta eqqortitsisimannginnigut aamma soorunami tamakkua aamma
siornatigut, uanga taammanikkut partimut siulittaasuunnginnama aamma
akisussaaffigisinnaarpianngikkaluarlugit, kisianni ilumoorpoq parti taamak
oqaatigisimavaa, aamma tamakku eqqartussagutsigit eqqaamalluarpara Atassutip
siunersuutigimmagu namminersornerunerup allaffeqarfii tamarmik Kangerlussuarmut
nuunneqarumaartut , taanna suli piviusunngortitaanngilaq aamma immaqa
piviusunngortinnissaa aamma Atassutip allanngortissimassavaa.
Taamaattut siornatigut
oqaatigineqarsimasut eqqaanngikkaluarlugit maannakkut eqqaaneqarmata
taamaalillugit oqaatigiinnarlugu, oqaatigissavara Naalakkersuisut, suliffissaqanngitsut
maannakkut sulinissaannut iliuuseriniagaat aallartittut aamma
Isumaginninninnermut Suliffissaqarnermullu Naalakkersuisup suliniutigalugit
aallartitai maannamut isumalluarnartunik kinguneqareermata. Inuusuttut siulliit
30-it sinneqartut taakkua Danmarkimi aamma tamakkunatigut ilinniartitsiviit
suleqatigalugit aallartittut aamma ukiarmi aamma 30-it sinnillit aamma
aallartinneqarsinnaasut anguneqarsimapput - tamakkuupput aamma suliniarnerit
maannakkut aallartereersimasut alliartortinniakkagut - aammalu oqaaseqartut
nuannarivaat iluarsaassinissanut assigiinngitsunut aningaasat Nalagaaffiup
tunniussaasa ilaat atorneqassammata ilinniartitsinernut Sisimiuni Bygge- og
Anlægsskole peqatigalugu. Taavalu aamma saniatigut Nanortalimmi pisimasut
inuusuttut ilatsiinnanngitsut aamma nalunngilarput Nanortaliinnaanngitsumi
aamma kommunini allani inuusuttut pillugit suliniutit ingerlanneqartut.
Inuusuttunik sulinermut sungiusaanerit kommunit aamma namminneq
aallartinniagaat isumaqarpunga aamma soqutiginarlutillu nuannersuusut aammalu
tapersersorluinnartariaqarlutik.
Aamma immikkut
oqaaseqarfigerusullugu misigisimavara Otto Steenholdt-ip oqaatigisaa
aatsitassat tungaasigut aningaasanik immikkoortitsisarsimanerput aammalu
paasisitsiniaanissatsinnut tunngasumik, oqaatigissavara erseqqissumik; aappaagu
Statoil-ip qillerinissaa maannakkut ima tassa qularnanngitsigisumik
oqaatigineqarsinnaavoq; Statoil sapinngisaminik tassa neriorsuivoq aappaagu
aallartinniarluni.
Tassani maannakkut pisussat
sillimaffiginiarnerat annertoorujussuuvoq aammalu ukiaru novemberimi Norgemut
uanga pisortatigoortumik qaaqqusaaninni immikkut tassani aamma Statoil-ip
naapinnissaa kissaatigisimavara. Aamma paasisakka maannamut imapput: Philips
Group-imik taaneqartartoq tassa Statoil-ip Nuup avataani qillerilissaaq taava
Philips Group-imik taaneqartartut ukioq 2002-imi qillerinissaminnik
pilersaaruteqartut maannakkut suli aalajangiiffigineqanngikkaluartumik 2001-imi
qillerinissartik siunnerfigimmassuk.
Tamakku pissutigalugit
mingutsitsinermut avatangiisinullu tunngasut paasisitsiniaanerit
ingerlaqqittariaqarput. Tusagassiivipput allaffeqarfia annertuumik
tamakkunatigut suliasinneqarsimavoq aammalu Statoili nammineerluni aggerniarpoq
inatsisartunullu, aamma katersortitsilluni oktober-ip ingerlanerani
sillimaniarnerit taamatut avatangiisit pillugit isumaqatigiissutinut
tunngaveqartut nassuiaateqarfiginiarpai. Aamma oqaatigilaarlara
aatsitassarsiornermi aningaasaliissutit tassaapput aamma soorunami
neriuuteqarluta piiaanissamut aqqutissiuiumaartut. Aalisarnermut
aningaasarparujorujussuit atorsimavagut, aningaasat millionerparujorujussuit
atorsimavagut aalisarnermut, sooq? Upperigatsigu aalisarneq siunissaqartoq
Kalaallit Nunaani.
Maannakkut
aatsitassarsiornermut atugassagut aningaasat annikeqaat aningaasallu
immikkoortittakkagut, aamma uagut upperinngikkutsigu avataani selskabit
upperinavianngilaatigut ilumoortumik oqalunnersugut tamakkunatigut.
Taamaattumik uppernassusitsinnut aamma ilaavoq uagut upperigutsigit aatsitassat
maannakkut misissorneqarnerat nunatsinni ilumoorukkipput aamma aalisarnertullu
ilillugu aningaasanik immikkoortitsivigisinnaasariaqarparput, aningaasanik
aviffiginnissinnaatilluta, tamanna taamaattumik nunatsinninngaanniit aamma
pisussaaffiuvoq, kusanartoq, avataanilu aamma
maluginngitsoorneqarsinnaanngitsoq pingaartikkipput taamaalilluni aamma
takuneqassammat.
Taava aamma Atassutip
EDB-qarnermut tunngatillugu oqaatigisaa oqaatiginngitsoorumanngilara,
ilumoorpoq! taanna suliassaq, oqartariaqarpunga - imaanngilaq uagut maannakkut
suliarisinnaanagu ingerlakkipput, maannakkut iluarsilerpoq. 1993-imili,
oqarpunga ullumikkut ukioq 1999-iuvoq, 1993-imili suliassaq taanna
aallartinneqarsimavoq, suliassarlu 1997-imi qarasaasiaminngaanniit
qarasaasiaqarfimmit taavalu uagutsinnut naalakkersuisuninngaanniit
nakkutigineqalerluni tiguneqarsimavoq. Suliassaq tassaniitoq mannakkut
iluarsilersutut uanga nalilerpara, suleqatigut tassaniittut, EDB-miittut,
KIP-mut aammalu napparsimaveqarfimmut isumaqatigiissutaat suliniutit tunngavigalugit
naatsorsuutigaarput maannakkut sammivissaq eqqortoq kiisami nassaarisimagipput.
Taava aperineqassaanga; sooq siusinnerusukkut aaqqinneqarsimanngillat ?. Uagut
aamma oqassuugut - sooq 1993-imili aaqqinneqarsimanngillat ?. Sooq ullumi
1999-imi 77-iminngaanniit aatsaat aaqqinniagassagut taakku taamak
pimoorunneqartigippat?.
Aaqqiiniarnerit
suulluunniit pileraangata EDB-mi, tassani proffeterpassuit saqqummertarput,
tamarmik immikkut paasisimasaqaqqissaartut, EDB-millu paasisimasaqarneq inuup
nammineq oqartariaqarpugut; atortorissaarutinik paasinnilluinnarsimanerannik
tunngaveqarpoq.
Taamaattumik ilaannikkut
paasisassat sivisuumik paasiniaqqaarlugit pisariaqartarpoq ilumut eqqortumik
oqaluttut taamaalillugit naniuminarnerusarmata, kisianni isumaqarpunga,
naatsumik oqaatigalugu: maannakkut pissusissamittut ingerlaneq periarfissamut
tassunga aallartissimavoq. Tassa taakku atortorissaarutit taamaalillutik
kiisami naammassineqarsinnaalissasut qularinngilara.
Atortorissaarut taanna
tikeriarakku taava oqaatsit pillugit oqaaserineqartunut aamma akissutissannut
Jørgen Wæver Johansen-ip oqaaseq atugaa tulluarigakku aamma tassani, aamma
allat. Ilumoorpoq oqaatsigut tassani atortorissaarummik taaneqarneri ilumoorput
aammalu oqaatsit allat atortorissaarummik taaneqarnissaat ilimoorpoq. EDB aamma
atortorissaarutaavoq, ilinniarumagaanni, ilikkaraanni nuannaarutissaavoq
inummut aamma oqaatsit taamaapput, oqaatsinik ilinniagaqarneq ilikkagaqarnerlu
allanik aamma atortorissaarutinik ilikkarnerummat. Taamaattumik aamma taanna
oqaatsitta ilikkaruminassusiat ilikkaruminaassusialluunniit pigaluartoq,
ilumoorpoq illugiinnut aamma piumasaqaat taanna atussaaq. Uaguinnaanngitsut
aamma oqaatsinik allanik ilinniassagatta, aamma allat oqaatsitsinnik
ilinniarnissaat periarfissittariaqarmat tassanilu nuannerpoq Sisimiuni
maannakkut oqaatsit tungaatigut ilinniarfik taamaasilluni periarfissiisoq
qujassutigalugu.
Aamma
naqqiissutigilaassavara ataaseq - kanngunartuliaq umiarsuaq Disko aamma
peqqinnissaqarfimmi aamma 8,5 kiisalu aamma akuersissuteqanngitsunik
atuisimanerit; taakku qarasaasiat eqqartoreerpakka.
Oqaatigissavara
naalakkersuisut akisussaaffipput soorunami, inatsisitigut akisussaaffigut
tassaniittut nalunngilagut aamma sumut killeqartut. Disko naalakkersuisunik
pisiarineqarsimanavianngikkaluarpoq inimi maani akuerineqarsimanngikkaluarpat,
kisianni inimi maani akuerineqarpoq Disko pisiarineqassasoq, taamaalillunilu
aamma takornariartitsinernut siulersuisui taamaallillutik
periarfissisitaasimallutik atortitaalernissa.
Umiarsuup taassumap
pisoqaanera maani finansudvalgimi ilaasortaasimasut tamarmik nalunngilaat,
uanga aamma nalunngilara, aamma akigineqarnissaanut taamanikkut
naatsorsueqataasunut aamma ilaavugut, taamaattumik umiarsuaq taamanili
akigineqarsimasariaqaraluarpoq, qularnanngilaq aamma ilaatigut taama
isumaqartoqarpoq, eqqaaqqinnagulu; kisianni tassa taamaalilluni
pisiarineqarsimavoq, taamaalillunilu aamma aningaasartuutissai uagut inimi
maani pitutseqataaffigisimavagut assigiinngitsutigut, kisianni
oqaatigisariaqarpoq maannakkut Greenland Tourismep takornariartitsinermi
ingerlatsinera nammineerluni tassa tassunga killeqarpoq.
Maannaminngaanniit
Greenland Tourisme Grønlands Tourist-råditut ingerlanissaa siulersuisut aamma
akuersissutigaat, tassalu siunnersuisutut ingerlatsinissaa taamaalilluni
qularnaarneqarpoq. Taamaattumik tassuunakkut aamma ilaatigut aalajangiinigut
torrallataarujussuarneq ajoraluarmata, taanna ilanngullugu
eqqaassutigilaarpara.
Inuit Ataqatigiit
oqaatigisaanni arlallik aamma oqaaseqarfigissallugit kajuminnartutut aamma
isumaqarfigigaluarpakka, kisianni oqaaserisanni amerlaqisut erseqqissaataapput
aammalu Inuit Ataqatigiit tungaanninngaanniit isigalugit uanga oqaaserisannut
ilassutitut isigerusuppakka.
Aamma oqaatigalugit
erseqqissaatigineqartup aamma Inuit Ataqatigiit tungaanninngaanniit ammaanermi
oqaaserisannut, tassa naalakkersuisut oqaaserisaannut, naalakkersuisut
paaseqatigiillutik oqaaserisaannut.
Tassani taassuma saniatigut
tikkuarneqartut uku oqaaseqarfigilaarusuppakka: Peqqinnissaqarfimmut
tunngatillugu, Inuit Ataqatigiit aamma oqaatigisakka taperserlugit
oqaatigisaat, tassa inuunitsinni nammineq pisuussutigisatsinnik
peqqiilliartornivut, aamma ilaatigut tupamik imigassamik, ikiaroornartumik
nuannaarniutillu allat ilagalugit atuipilunnermik pinngorfeqartut
erseqqissarneqarput.
Isumaqarpunga tassani
maanakkut oqariartuut nalunaarutigineqarsimasoq imaaliinnarlugu
qangeruminaatsorujussuartut killiffigigipput. Allaat uanga nammineq
naalakkersuisuni ukiuni arlalinni suliaqarlunga, killiffigisaq una maannakkut
peqqinnissamut 700- millionit killikkatsigit , aamma una, inuttut allatulli
allarpassuit peqatigalugit aamma Inuit Ataqatigiit oqaluttuata Maliinannguaq
Markussen-itut oqassaanga: Tassani inuit nammineq pisuulluta nappaatit tassani
atukkavut aningaasartuutit amerlavallaarujussuaqaat.
Aningaasartuutit
700-millionit amerlanerpaartaat, inuit namminneq pisuussutigisaminnik,
nappaatigiligaannik pinnatik namminerli pisuussutigisaminnik pinerliornerit
allarpassuillu aqqutigalugit aningaasartuutaapput.
Taanna isumaqarpunga
eqqarsaatissaasoq annertooq. Soorunami nalunngikkaluarparput inuit
tupatornerluunniit ajortut aamma nappaammik eqqorneqarsinnaasut, inuit imerneq
ajortut nappaammik eqqorneqartarput.
Kisianni
taamaakkaluarpalluunniit paasisinnaavarput imigassamik patsiseqartumik
qinerlinerit pinerliinerillu qanoq amerlalluinnartigisut peqqinnissaqarfimmi
aningaasartuutaasut. Allaat uisaallaatigisara atsaannguaq oqaatiginiagara,
tassa allaat tulleriissaarisariaqalerneq tikissinnaaneripput qularnanngilaq
qanittunnguuvoq. Tassa inuit napparsimasut, napparsimasuviit siulliullugit
peqqissartinneqassappat inunnik namminneq pisuullutik taamatut
katsorsartariaqalernermik killiffigisaaninngaaniik. Aningaasat allaat
sipaarniarneranni tamakkua killiffigineqartalissappata, taava pissutsit
erloqinarlilersimassapput.
Taanna nuannaarutigaara
aamma immikkut taamatut Inuit Ataqatigiinni allanillu aamma taakkartorneqara
pillugu. Kiisalu aamma oqaatigissallugu apeqqutit tassaniittut Paarisakkut
aammalu Naalakkersuisut pisortaninngaanniit Paarisa aammalu Qaqiffik allallu
aqqutigalugit tassani peqataaffigineqarmata ajunaarneq minnerulersinniarlugu.
Taava aamma
aktieselskabinut tunngatillugu Maliinannguaq M. Markussen-ip oqaatigisaanut
tunngatillugu oqaatigilaarusuppakka marluk. Aktieselskabini aamma
oqilisaassinerit aamma uagutsinnut pisortanut aamma
maluginngitsuussanngilarput. KNI assersuutigissagutsigu, nammineq KNI
sanaartugassani nammineq akilersorpai. Pisiniarfiit iluarsarneri, nutaanik
sananerit allanillu nammineq ingerlatsivimmi iluaninngaaniik akilersugassani
taakku nammappai. Taamaalilluni inuiaqatigiit sanaartugassaanut
tulleriiaarinermut akornutaanngilaq. Aamma KNI-p nammineerluni sulisunik
ilinniartitseqqinerit aamma suliarai, aamma tassuuna uagutsinnut pisortaninngaaniit
sulinermut imatut kinguarsaasuunngilaq.
Tamakkunatigut aamma
selskabit sulisuminit ilinniartitsineritigullu namminneq suliffiminnik
pitsanngorsaanermikkut suliai, isumaqarpunga kusanartumik aviffiginninnerusut
taakkuna tungaannut.
Aamma taamaappoq
Nukissiorfiit aamma selskabinngorpata periarfissaanut taamaattumik
tuniniarneqarsinnaanerat. Tassa Qorlortorsuaq Tasiilarlu maannakkut tulliummata
nukissiorfinnik sanaffigisinnaallutik, taakkua saniatigut aamma
misissorneqareersut Kalaallit Nunaanni arlalissuupput. Ilulissat eqqaanni
taavalu aamma Sisimiut eqqaanni, Maniitsup eqqaani, Narsarsuup eqqaani allanilu
misissukkat aamma ilisimaneqarput. Tulleriiaarinemilu ukua tullinnguuttut
maannakkut taaneqartut kisiisa taaneqarsimallutik. Kisianni tunngaviatigut
allannguuteqanngilaq una nammineq uuliamik atuinerup milliartortinnissaa
Inatsisartuni aamma noqqaassutigineqarnerat tusartareersimagatsigu.
Aalisarneq, nammineq
Aalisarnermut Naalakkersuisup aamma Naalakkersuisut allat susassaqarfitsik
oqaaseqarfigiumaarmatigit una ataaseq oqaatigilaarusuppara.
Suliffissuit unittarneri,
massa tamarmik taamaaliunngikkaluartut, ilaatigut Ilulissani aasaq
Ilulissaniinninni sulifffissuaq pulaarlugu pisortaa paasiniaavigalugu
kommuunillu ataatsimeeqatigalugit paasiniarsimavagut sooq suliffissuaq taanna
unittarsimanersoq. Kisianni taanna paasiniaanitsinni aamma nassuiaat saniatigut
maluginngitsoorneq aana ajornartoq. Illoqarfik Ilulissatut ittoq aalisarnikkut
ineriartorfioqisoq, taanna sulisussat tungaatigut pissarsiniarnera
ajornartorsiornartorfiusimavoq. Tassa imaappoq sulisussat illoqarfimmiittut
suliffiup qalaaruttulernerani, nalleruttornerani tamarmik atorneqarput.
Taamaattumik uani
taaneqartut ilaatigut, oqaaseqartuninngaanniit ammaffigisariaqarluinnartutut
isumaqarfigisakka tassa illoqarfinnik allaninngaanniit suliartorsinnaasunut
oqilisaallilluta, pingaartumik suliffiit naleeruttorneranni
aaqqissuussinnaanigut isumaqarluinnarpunga uterfigisariaqartutut
misigisimallugit. Ullumi aamma oqallinnermi taakkua taaneqarmata. Ilaatigut
sulisussanik amigaateqarneq aamma fabrikini aamma pissutaavoq.
Aamma Maliinannguaq M.
Markussen-ip nammineq taava suliffimminik paarsinnginnerit allallu
akissarsinerit aqaguani sulinngitsoortarnerit, taakkua akunnerminni sulisut
iluarsiniagassaraat sulisitsisut peqatigalugit namminnerlu sinniisut
peqatigalugit. Kisianni illoqarfinni sulisussanik amigaateqarfiulersimasuni
taakunga suliartortussanik ikioqatigiissinnaanerput isumaqarpunga
tunngavissaqarluinnartoq uterfigissallugu, aammalu naammassiniassallugu.
Nunanut allanut
tunngatillugu aamma ataatsimut partiit oqaaserisaat akissuteqarfigilaassagukkit
oqassaanga kommissioniliornissaarpullu pillugu. Maannakkut ukiut 20-it
ingerlareersimagatta malugereerparput, aammalu Naalakkersuisunngortitsilernitsinni
Namminersornerulluni oqartussaanerup ukiuni 20-ni ingerlanerani inatsisitut
allatulli aamma ililluni soorunami ippinnartui oqallisigisariaqartut. Aamma
ippinnartoqarpoq, imaaginnanngilaq nunanut allanut tunngasutigut apeqqutit
kisimik.
Kisianni aamma allat
apeqqutit ukiuni 20-t matuma siorna takorloorsimanngilagut, assersuutigalugu
taamak amerlatigisunik Kalaallit Nunaat utoqqaqalereersimassasoq.
Utoqqarparujussuit akornanni aamma akornatsinni inuulersimapput aammalu
isumagineqarneratigut aamma Danmarkip suleqatiginissaa aamma soorunami aamma
pissusissamisuussaaq aamma. Tamakkuuku tungaatigut naligiinerup aamma
aallaavigisimasagut ukiut 20-t matuma siorna, nutaamik nalilertariaqartutut
isikkoqalereersimapput. Aamma allanik ilinniartitaanerup iluani allatigullu
naliligassat ilaqarput.
Taamaalilluni Kalaallit
Nunaanni oqartussaassuseq aamma annerpaaq maannakkut noqqaassutigisarput
pilertortumik naammassiniarneqarsinnaammat. Oqaatigineqarpoq ilaatigut
inuttalersornissaa siunnersuusiorfigineqarluni, oqaatigissavara kikkunnik
inuttalersornissaa qanorlu taakku aalajangiiffigineqanngimmata piffissamik
qanittumi taakku uterfigineqartussaapput. Kisiannili piffissami aamma
kommissionip sulinera imaassanngimmat ukiuni qulini imaluunniit tallimani sulisoq.
Naatsorsuutigaarput ukiup ataatsip imaluunniit ukiut sivisunerpaamik marluk
ingerlaneraani suliassani tassaniittuni naammassiniarumaarai. Aamma
isumaqarpunga taamaalilluni periarfissaq ajunngitsoq atorluarneqarumaartoq.
Anthon Frederiksen-ip oqaaserisaanut
assersuutaanullu kusarnartumut orpimmut inerisitaqartumut assersuutit
kusagalugit misiginiarpakka. Aammalu oqaaserisaanut nammineq titarsimasaa aamma
isumaqatiginarluinnartitara Kattusseqatigiinninngaaniit Anthon Frederiksen-ip
oqaatigisaa kalaallit ullumikkumut suli amerlavallaaqaagut
ilatsiinnartunngortinneqarsimasut. Ilatsiinnartunngortinneqarsimavugut aamma
ilagut suli ilatsiinnarput, taakku marluk taamaalillugit malugisariaqarpagut.
Ukiorpassuarni
Naalagaaffiup nalaani suli aamma ikaarsaarnitsinni suut tamarmik
annanniusereerlugit inuuneq tamarmi ingerlanneqartutut ilaasa
misigisimasarpaat. Taamaattumik inuit namminneq aallartitsiniarnerminni,
suliffimmik aallartitsiniarnermini allatigulluunniit ilinniarnerminni
ingerlassinerminni aamma namminneerlutik kukkussutigisatik ilinniarfigalugit
ingerlaqqissinnaaneranut periarfissinnissaat aallaaviusariaqarput.
Inatsisiinnalernermut aamma pissutaasarmat periarfissanik piginnaassutsinik
peqaraluarluni aamma tapersersoneqannginneq. Taamaattumik tassuunakkut
oqariartuut aamma kusanartoq tassaniittoq takorusuppara.
Ukiut 20-t
qaangereerneranni akereerpara, aamma oqarpunga nammineq akisusimasoq.
Kisiannili aamma ukiut 20-t matuma siorna Namminersornerulerneq
aallartissimanngikkaluarutsigu aamma suli akisunerusimassagaluartoq
annilaangatigaara. Maannakkut isumaqarama periarfissaqartugut
pitsanngorsaanissamut aallaavissatsinnik aammalu periarfissaqarluartugut.
Oqaatsivut aatsaannguaq
oqaaseqarfigereerakkit, tassunga ilanngullugu Anthon Frederiksen-ip oqaatigisaanut
oqassaanga danskit oqaasii imaluunniit tuluit oqaasii salliutissallugit
qinigassaqassagaanni, qularnanngilaq amerlaqisugut oqassagaluarpugut uagut
tuluttut siulliullugu ilinniarusuppugut uagut nalunnginnatsigu taakku
silarsuarmi sumiluunniit atorsinnaallugit amerlanerpaartaani. Taanna
siulliullugu taamak oqarnissaq inuusuttorparujussuit oqariartuutigippassuk
tupinnanngilaq. Silarsuarmi sumiluunniit tuluttut oqalussinnaagaanni, aamma
tassani paatsuunganartumik angalariarfissaqarfiunngimmat.
Naalagaaffiup attavigisatta
iluani danskit oqaasii atorlugit nunat avannarliit aamma pulaffigisinnaavagut,
taamaattumillu aamma tassani ilinniakkatsinnut ilaavoq. Kisianni
qularnan-ngilluinnarpoq siunissami aamma tuluttut oqalunneq annerulerumaartoq.
Kiisalu qallunaat EU-mut atatillugu annilaangatigigaat aamma ilaatigut
malugisarparput ukiut 5o-it qaa-ngiuppata marluinnaanngoq ilimagineqarmata
europami, qanoq ilumoortiginerpoq tassa tuluillu spaniamiullu oqaasii kisianni
franskit aamma tyskit oqaasii puigorneqarunanngillat. Taakku
siulittuutigineqartareertaluarput aamma atuukkiartorumaartut.
Danmarkimi
peqqinnissaqarfimmut tunngatillugu aaqqissuussiniarnerit ilutigalugit Lukas
Templetimi maannakkut aaqqissuussinerit nalilersuutigisariaqarput. Aammalu
tassani oqaatigisariaqarluni napparsimasut isumagineqarat pitsaanerulersussatut
qularutigineqanngitsoq.
Aamma Anthon Frederiksen-ip
oqaatigisaanut erngup nukissiorfissuit pillugit oqaatigilaassavara. Nunami
maani avataaninngaaniik isumalluuteqarnerujussuarput uulia eqqarsaatigalugu.
Kangerluarsunnguami taamak ittoq suliarineqarmat naatsersuutigineqarpoq taamani
Kalaallit Nunaani uulia eqqussorneqartoq, atorneqartoq 25 %-ia taamaalilluni
matuneqartoq. Taamaalilluni qanoq ilisami uulia aamma tassaanngimmat qaqugorsuarmut
nuguttussaanngitsoq. Aamma taamaalilluni takusariaqarpoq inuiaat allat tamarmik
isumannaallisarniarmatigit qaqugorsuarmut atorsinnaasunik nukissiuuteqarnissaq.
Taamaattumik nukissiornikkut qaffassaaneq isumaqarpunga Kalaallit Nunaani
asoorunneqarani ingerlattariaqartoq. Aammalu maannakkut Naalakkersuisut taanna
suliariniarpaat.
Taavalu aamma
oqaatigilaarlara anersaartorfeqarnissatsinnut oqariartuutinnut apeqqutaanut
ilanngullugu. Ilaannikkut aamma isumaqarnartarpoq Kalaallit Nunaanni suut
tamaavimmik allaanngiivippugut qimussinut inortuilersut, imaluunniit
angallammut aallalersumut ilaalersugut inortuilersugut. Suna tamaavimmi
nukingersupilorujussuarmik inerniagaapput. Naalakkersuisut ukiut tamaasa
aningaasartuutissaasa misissornerani, sipaarutissallu ukiut tullianut
kinguartittariaqartut misissoraanni allaaneq ajorpugut ukiup taanna aappaguani
sananeqanngippata suut tamaavimmiik tassa unittuussasut. Taamaanngilluinnarpoq,
suliassat tulleriiaarneqartariaqarput. Allatumik ajornartumik aningaasat sulisussat
aammalu qanoq iluaqutaatigisinnaaneri najoqqutaralugit.
Ilaannikkut
anersaartorfeqarnissami kalaallit misigisimanissaannik eqqartuisarnerput uani
pissuteqanngilaq sorparujussuit tamaviisa kinguartiterniaratsigit.,
sanaartugassat allalluunniit pilersaarutit. Kisianni inuup aamma nammineq
inuttut anersaartorfissaqartutut misigisimanissaa aamma tassuunakkut
eqqarsaatigisarparput. Qularutissaanngilluinnarpoq inersimasut angutit arnallu,
utoqqaat meeqqallu assersuutigiinnarlugu Katuaq pilersitaammat inuiaqatigiit
kalaallit maani Nuummiittulluunniit eqqarsaatigalugit qanoq uagutsinnut tamanut
nutaannguallaataati-gisoq.
Ulluinnarni taakkuinaaviit
sammigunnaarlugit illorsuaq taanna iserutsigu inuuneq allarluinnaq,
eqqumiitsuliat allallu takusassagut tusagassagut tassaniittut tikittarpagut.
Anersaartorfissatta pitsaassusia, sapaatit akunnera naallugu ulapittoq
oqaluffimmut ingerlarusuttut nalunaaqutaq akunnera issiaguni
allarluinnaqqissaamik anersaartorfissaminik aamma pissarsisarpoq.
Tamakkuupput tamaavimmik inuiaat
ullumikkut suna tamatta ulapputtorsuartut pissuseqarfiginitsinnik unitsitsisut,
eqqaasitsitsisut allanik aamma inuuneq imaqarpoq. Taamaattumik aamma uani
oqaaserineqartut ullumi erseqqissarpaat anersaakkut aamma inuuneq aamma
piffissaqarfigisariaqarpoq, anersaartorfigisariaqarparput. Kristumiutut
kingornussarsiagut inuunitsinnik pinngitsoorsinnaanngisagut tamatta
nalunngilarput taanna., aamma anersaartorfissanik taakkuninnga qaaqqusisuupput.
Taava Per Rosing
Petersen-ip oqaasii agguaanneqartut tigunnginnakkit, uani oqaaserisaa
najoqqutaralugu oqaaserisaanut naatsumik akissuteqalaassaanga. Per Rosing
Petersen-ip oqaaseqarnermini kalaallinik ilinniarluarsimasunik
atorluaanissarput aamma noqqaas-sutigisaa isumaqatigilluinnarpara, aamma
taamaappoq. Aammalu apeqqutaavoq nunatsinnut uterusuppat inuusuttut taakku
aamma taamak iliorusuppata periarfissaat tamaasa atorlugit utertinneqarnissaat
kissaatigisariaqarpoq. Aamma kisianni uterusunngippata aamma taamaattoqarpoq,
aamma pinngitsaalineqarsinnaanngillat nunatsinnut uternissaanut.
Kiisalu aamma Savalimmiut
assersuutigineqaraangata aamma Per Rosing Petersen-ip taanna taava. Savalimmiut
imaaliinnarlugit assersuutigineqaraangata naleqquttutut uanga isigineq
ajorpara, aamma qularnanngilaq savalimmiormiut namminneq kissaatigissanngilaat
Kalaallit Nunaannut sanilliunneqarnissartik. Nunatta inissisimanera,
annertussusia qeqertat silarsuarmi annersaat, avissaatsimanerput akornatsinnut
eqqarsaatigalugit imaalillugu piffimmiik piffimmut Savalimmiunut
imaaliinnarlugu sanilliukkuminaatsorujussuupput.
Savalimmiormiut
qeqertarpaalunnguupput Atlantikumi, nuannersut alianaatsut taakkuli imminnut
qanittuarannguamik suleqatigiissinnaallutik ullormiit ullormut. Uagut maani
avinngarusimaqaluta kalaaleqatigiittut ingerlaniarnerput, maannakkut
tupinnaannartumik paaseqatigiissinnaalluta ingerlakkatsigu qujanaqaaq.
Tassanilu nunarujussuarmi taamaalilluta immitsinnut oqaatsit ataatsit atorlugit
oqaluussinnaalluta allaat. Massa Europamut iligutta Danmarkiminngaanniit
Afrikap avannaanut mittussaagaluarluta, tassanilu annertussutsimi oqaatsit
qassit assigiinngitsut atorneqarpat Danmarkimi.
Taamaattumik Savalimmiunut
sanilliutiinnanngikkaluarluta isumaqarpunga nunatsini uagut aaqqiiniarnerput
Kalaallit Nunaanni pissutsit aallaavigalugit aaqqiiniarnigut, tassaasariaqartut
aallaavigisassavut. Aammalu sanilliussiniarnitsinni Savalimmiut soorunami
sanilliussinnaavagut inatsisip allallu Hjemmestyre-mi inatsisaat allallu
misissussagutsigit. Kisianni taanna qaangerlugu nunaat, inuusaasiat allallu aamma
assigiinngissuserput annertoorujussuuvoq. Kisianni suleqatigiinnerput
pitsaasutut uanga isumaqarfigaara.
Naggataatigut aamma Per
Rosing Petersen-imut oqaatigissavara. Uangattaaq isumaqatigaakkit tapiissutit,
inuiaqatigiinninngaanniit tapiissutit assigiinngitsunut angivallaarujussuartut.
Pingaartumnik angallannermut allanullu tunngatillugu aningaasat inupparujussuit
timisartunngisaannartut timmisartunut angalasunut tapiissuteqarput. Aamma uagut
taamaaliorpugut tassa assigiinngitsunut tikinngisaannakkatsinnut aamma
tapiissuteqartaratta. Kisianni ataatsimut isigalugit
millilertariaqarluinnarput. Tassanilu timmisartunik kisiat angallassineq -
ilaasunik angallassineq siunissami tassaasariaqarpoq qularnanngilaq
aaqqiissutissaq. Taava takornariat umiarsuernik tallisimasunik
tallisimanngitsunilluunniit angallateqarlutik nunatsinni takornariarsinnaanerat
ammatinneqassammat.
Taama oqaaseqarlunga
nuannaarutigalugu taama annertutigisumik oqaaseqarfigineqarmata oqaaserisakka
tallimanngormat aammalu qujassutigalugu partiinit soqutiineqarmata
assigiinngitsut kisiannili titarneq aamma malittariniagarput naalakkersuisunit
aamma malinneqarmat. Uaguinnaat suliarisinnaasagut killeqarput innuttaasut,
kommunit kattuffiit allallu ilaatigut aamma oqariartuut taanna sakkortusarneqartoq
partiit ilaannit. Innuttaasut namminneq suliassaminnik naammassinninnissaat
ilaanngippat suliassat artornarnerusapput. Qujaqaanga taamatut oqallinnermut
peqataanersi pillugu imaluunniit aallartinneranut.
Simon Olsen, Inuussutissarsiornermut Naalakkersuisoq:
Nuannaarutigaara Atassutip
oqaaseqartuata sinerissap qanittuani raajarniarnerup naliliiffigineqaqqinnissaa
imaluunniit naleqqussaqqinneqarnissaa iluarisimaarmagu. Aammattaaq iluareqalugu
oqaatigissavara nioqqutissiorfiit sulisussaaleqisarnerat uparuartuiffigimmagu,
tassami avammut nioqqutissiatta imaluunniit nioqqutissiornitta
annertunerpaaffimminiinnissaa pingaartumik aasarisseruttulernerani
pisariaqartilluinnarparput tassaniimmata aningaasat isertitassavut.
Taamaattumik aasarissinerani sulisussaaleqisarneq qanorluunniit iliorlugu
anigortariaqarparput soorlu naalakkersuisut aamma siulittaasuata taamatut
oqaatigigaa.
Ukiaq manna raajarniarneq
pillugu oktoberip 16-ani 17-nianilu maani naalakkersuisut anguniagaat, tassa
killiffiusup isumasioqatigiinnissamut raajarniarnermut tunngatillugu sammiviata
sumiissusersivinnissaa, taamaaliornikkut naleqqussaanissaq anguneqassappat
taava pitsaaqutaasimasut aammalu kukkuluttuutaasimasut
nalilersorneqarsinnaaqqullugit pitsaanerpaamik.
IA-p oqaaseqartuata NUKA
A/S-mut tunngatillugu oqaatigisai avaanngunnanngitsuunngillat, kisianni
paasisarput malillugu eqaluit angissutsit kiilup ataaniittut
pisiariumaneqarsimanngillat taannalu misissortariaqarpoq. Taamaassimappammi
taava qassutit nigartaat aamma ilanngullugit msissugassanut ilaajumaarmata.
PUISI A/S
aallartilluariarpat malinnaaffigeqqissaarnissaa naalakkersuisuni
siunniusimaarluavipparput.
Saattuarniarneq
qujanartumik pitsanngoriartorfiuvoq. Aasaq manna akit ajornartorsiutaapput,
ajornartorsiutilli pilerfeqarput tassa nioqqutissiortut ilaasa
tapiiffigineqaratik ingerlatsinerat ilaasali tapiiffigeqqullutik, taamaammat
taanna sumiissusersisariaqarpoq aamma ukioq naannginnerani
pingaaruteqarluinnarmat. Ilai tapiiffigeqqoqaat ilai
tapiiffigisariaqarsorinngillat.
Partiit tamarmik
isumaqataaffigisaannik 1997-mioqqooqaaq ukiakkut nioqqutissiorfiit ilaasa
naammassisaqarsinnaassutsimikkut naleqqussarneqarnissaat aalajangiiffigivaat,
tassa partiit tamarmik peqataaffigisaannik. Ukiup tullia, tassa ukioq 2000-ip
qiteqqunnera pillugu naliliisoqartussaavoq taannalu tamanit
atorluallaqunartorujussuuvoq, ilumut sumiuna
makittarissaasoqartaraiqassanersoq.
Kattusseqatigiit
oqaaseqartuannut oqaatigissavara Royal Greenland-ip imaluunnit
Grønland-unerporluunniit taassunga tunngatillugu naalakkersuisut
paasiniaaqqissaarnermik ingerlataqarmata taannalu paasiumaarparput
kingusinnerungaatsialaartukkut ilumut sumi inissisimasoqavinnersoq.
Aammattaaq qassutinut
tunngatillugu apeqqummut atatillugu oqaatigissavara 1994-mi aallartinneqartumik
qassutit asoorneqarnisaat oqaluuserineqarpoq, taannalu
kinguartittsisaqattaarnikkut pilersitsiffiusimavoq ukiullu marluk missaani
qaangiupput taamanikkut peqassutsimik naliliinermi tunngavigineqarsimasut
allanngungaatsiarsimasut, kisiannili KNAPK suleqatigilluinnarlugu
aalajangiisoqarpoq naalakkersuisut siulivut januari aallaqqaataani ukioq 2000
qassusersorneq asoortinneqassasoq. Iluliarminut tunngatillugu qaammatip uuma
ingerlanerani isumasioqatiiinneranni paasivarput peqquteqavissumik
naalakkersuisut isummertariaqartut, tassalu qassusersorfiusartup aammalu
ningittagarsorfiusartup annikippallaarnera pissutigalugu taava qassutit
qaammatini aalajangersimasuni atoqqinneqarallarsinnaanersut misissoqqullugu.
Tamanna naalakkersuisuni piffissami uani qanittumi ulluni tullerni
aalajangiiffigisussaavarput, aamma oqaluuseralugu aallartereerparput.
Ilanngullugu
oqaatiginngitsuussanngilara nuannaarutigigakku partiit tamarmik
nioqqutissiornermut tunngasunik aalisarnermullu tunngasunik ilanngussaanni
erseqqimmat ilumut siunissaq pitsaasumik siunnerfeqarluni ingerlattariaqartoq,
tassami nioqqutissiassanik pilersuinerup sumerpiaq nanertuutissartaqarfiunera
nassaariniartariaqavippoq taannalu ilungersuullugu naalakkersuissunit
ingerlanniarneqartoq nassuerutigissavara.
Mikael Petersen, Isumaginninnermut Suliffeqarnermullu
Naalakkersuisoq:
Periarfissaq manna
iluatsillugu siullermik Qaarsuarsunni mittarfittaartut, tassa Uummannap
kommuniani najugaqartut tamaasa uummammik pisumik pilluaqquakka. Soorlu
naluneqanngitsoq Qaarsuarsunni mittarfittaarnissaq pillugu aamma
ilungersuuteqartut aamma ilagisimagakkit, aamma naatsorsuutigaara nalunagulu
Uummannap kommunia aammalu Uummannap kangerlussua assigiinngitsorpassuarnik
pisuussuteqarmat, siunissami mittarfiup atorluarneqarnissaa taanna
qularutissaangitsoq, taamaattumillu suleqataasimasut tamaasa uangattaaq aamma
qamannga pisumik qutsavigaakka.
Partiininngaanniit
oqaaseqartut assigiinngitsut oqaasii suliffeqarnermut tunngatillugu aammalu inunnik
isumaginninnermut tunngatillugu assigiiaarput, taamaattumik tamaasa
ataatsimoortillugit naalakkersuisut siulittaasuata akissutaanut
ilassutissaqalaassaanga.
Suliffeqarneq pillugu
oqaatigineqartut partiininngaanniit suliffissuarni sulisunut tunngassuteqarnerupput.
Soorlu aamma naluneqanngitsoq, naalakkersuisuni suliffeqarneq pillugu
iluarsaaqqinneq annertooq massakkut aallarteruttorpoq, aamma Inatsisartut
piumasaat inassuteqaataat naapertorlugit suliarput ingerlapparput.
Kingusinnerusukkut matuma atatsimiinnerup
ingerlanerani suliffeqarneq pillugu oqallittussaagatta, matumani oqallinnermi
erseqqissaatigiinnassavara naalakkersuisuni pilersaaruteqaratta ersarissunik
suliffissuarni sulisartut kiisalu aamma suliffissuarni piginnittut
ingerlatsisullu suleqatigalugit aaqqissuussinernik nutaanik, suliffissuarni
sulisut siunissami aalajangersimasumik aalaakkaasumillu suliffeqalernissaat
siunertaralugu. Taamaattumik aningaasatigut aammalu akisussaaffiit
pisussaaffiillu tassaniittut aallaavigalugit naatsorsuutigaara piffissami
ungaserujussuanngitsumi suliffissuarni sulisut atugarisaat ullumikkornit
pitsaanerusumik iluseqartumik aaqqiivigineqarsinnaajumaartut. Tamatumani
SIK-kut, sulisitsisut kiisalu aamma naalakkersuisuni pilersitarput, tassa
suliffeqarneq pillugu siunnersuisoqatigiit peqatigilluinnarlugit suliassaq
ingerlakkumaarparput.
Siumup oqaaseqartuata
Jørgen Wæver Johansenip ilanngullugu taasaa immikkut taasaqarfigilaarusuppara
tassa siusinaartumik utoqqalernersiuteqartarneq pillugu ullumikkut nunatsinni
annertuumik aningaasartuuteqaratta, aap ilumoorpoq, tassa 200 mio.-it
sinnerlugit ukiumut atortalernikuuvagut, siusinaartumik
utoqqalernersiaqartitsisarneq pillugu, taamaattumik naalakkersuisuni
pingaartipparput, utoqqalinersiaqartitsinermut aammalu siusinaartumik
utoqqalinersiaqartitsineq eqqarsaatigalugu akisussaaffiit pisussaaffiillu
nutaamik nalilersorneqarsinnaanissaat. Tassaniipporlu soorlu aamma oqaaseqartup
ilanngullugu taagaa, Namminersornerullutik Oqartussat kommunillu akornitsinni
akisussaaffiit pisussaaffiillu agguataarnerat nutaamik
nalilersortariaqarparput, taamaaliornikkut pisussaaffeqaqatigiinnerup aammalu
aningaasatigut nammakkersoqatigiinnerup paasiuminarnerusumik aaqqinnissaa
siunertaralugu. Tassami ilaatigut nalunnginnatsigu, isertuanngitsumik
oqaatigisariaqartarmat kommunit assigiinngitsut siusinaartumik
utoqqalernersiatigut tunioraasarnerat kommuninut allanut naleqqiullugu
annertunerusartoq, kommunini ataasiakkaani suliffissatigut aamma allatigut
periarfissat aallaavigalugit. Taamaattumik tassani aamma eqqarsaatissaqarpugut
aaqqinniagassatsinnik, akisussaaffiit agguataarnerat minnerunngitsumik aamma
eqqarsaatigalugu.
Kommuninut tunngatillugu
suliffeqarnikkut iluarsaaqqinnermut atasumik aamma kommuninut ataatsimoortumik
tapiissutit eqqarsaatigalugit nutaamik eqqarsariaqqinnissatsinnik Siumut
oqaaseqartuata aamma oqaasernera taanna ilumoorluinnarpoq,
taamaaliortariaqarpugut inunnik isumaginninnikkut suliffeqarnikkullu
aaqqissuussinerit aningaasatigut pisussaaffilersorneqarnerinni nutaamik
kinguneqarluarnerusumillu isumaqatigiissuteqartarnissarput siunertaralugu,
tassa kommunit Namminersornerullutik Oqartussallu akornatsinni.
Ilaatigut naatsumik
oqaatigalugu sulerusussutsip annertusarneqarnissaa kommunini ataasiakkaanni
suliffissatigut pilersitsiniarnermi aningaassalersueriaatsit eqaannerunissaat
aammalu taamatut iliuuseqartarnissamut kajumissutsip
annertusarneqarsinnaanissaa aamma eqqarsaatigalugu, aamma inunnik
isumaginninnikkut inatsisigut suliffeqarnermut inatsissanut nutaassanut naaperstuuttuunissaat
avaqqussinnaanngilarput isumagissallugu, tassa ilaatigut ullumikkut inunnik
isumaginninnikkut inatsisit atuuttut paasinarluartumik ersarissiartuinnarmat
sulerusussutsimik ilaatigut killilersuisuusut. Tamanna uppernarsarneqarpoq
Narsami tamanut ammasumik ataatsimiisitsigatta ungasinngitsukkut, ilaatigut,
tamatumanilu oqaatigineqartut innuttaasuninngaanniit oqaatigineqartut
ersarissut makku saqqummiunneqarput:
Inatsisit ullumikkut
atuuttut aallaavigalugit aallaat imminut akilersinnaanerusoq sulifeqanngikkaanni.
Tamakku pissutsit
ilumuunngaarmata uanga nammineerlunga naalakkersuisutut tamanna pillugu
oqaaseqarpunga taamanikkut, ilumoorluinnarpoq tamanna, aamma tamanna
arajutsisimanngikkipput, massakkullu iluarsaaqqinnermut atatillugu inatsisit
imminnut kaammattoqatigiissinnissaat, tassa suliffeqarnermi aammalu inunnik
isumaginninnermi, taakku aallaavigalugit inatsisartuni naalakkersuisusunilu
ilusilersuisariaqartugut. Taamaattumik kommuninut isumaqatigiinniarnerit
pisariaqassapput, aningaasalersueqatigiinneq aammalu akisussaaffiit
sulinissamut kaammattuinerusut anguneqassappata.
Atassutip oqaaseqartuata
taasaa pinngitsoorusunngilanga aamma oqaaseqarfigilaassallugu, tassa
mandetimenut aaqqissuussinerup nunaqarfinni, ilaatigut aqqusiniornerit eqqarsaatigalugit,
atuunnerata uterfigineqaqqissinnaanera, tassa siusinnerusukkut
aqqusinniornermut nunaqarfinni atorneqartarput mandetimet, ukiunilu
kingulliunerusuni inatsisit tassunga tunngassuteqartut aaqqissuusseqqinnerat
imaluunniit aaqqissuuteqqissimanerisa kingunerisaanik tamakkununnga atuineq
killilerujussuanngorluni, tassa kommunit namminneq 100 procentimik
akilertaraanngassumik mandetimet atorlugit aqqusiniornernut atuisarlutik.
Taamaattumik nutaamik aaqqissuusseqqinnissaq eqqarsaatigalugu naalakkersuisuni
misileraanissat naatsorsuutigaagut kommunit peqatigalugit ingerlatsissallugit,
tassa mandetimenik atuinerup nutaamik aaqqissuuteqqinneqarsinnaanera
siunertaralugu. Isumaqarpunga tassani assortuussutissaqanngitsugut mandetimet
atorneqartarnerisa imaqarnerusumik aammalu immaqa avatangiisit
eqqarsaatigalugit aamma nunaqarfinni aqquserngit ilanngullugit
tamakkiinerusumik atorluarneqalernissaat siunertaralugu
pivisunngortitsisinnaasalluta.
Inuit
Ataqatigiinninngaanniit oqaatigineqartut, soorlu aamma partiit oqaatigisaat
suliffeqarnermut
tunngatillugu immikkut taasaat tikisitanut politikkeqarnerup
pikkoriffiginerulernissaa, tassa neriuutigaara imatut paasisariaqartoq, tassa
tikisitat ikiliartuaartinneqarsinnaanissaat siunertaralugu. Soorunami
tikisitsisarneq pikkoriffigaarput ullumikkut, tikisitsivallaaqqaagut ilaatigut
pisariaqanngitsumik, taamaattumik taassumap pikkoriffiginissaa atornagu,
kisianni tikisitanik atuisarnitta ikiliartuaatinneqarnissaa,
milliartortinneqarnissaa, taanna pikkoriffigisariaqarparput.
Tamanna pillugu
naallakkersuisuni aamma oqallinnigut ingerlapput, ilaatigut
atorfinitsitseriaatsit qanoq piumasaqartut nunatsinni ullumikkut nutaamik
aaqqissallugit aamma eqqartuinigut ingerlappagut. Maluginiartagara uaniippoq
suliffeqarfinni assigiinngitsuni aammalu allaat Namminersornerullutik
Oqartussat suliffeqarfiutitsitsinni sulisussarsiortaraanngatta piumasaqaatigut
ilaatigut sakkortuallaartartut, immaqa nunatsinni ilinniagaqartut pisinnaasaat
qulaatiallalaanguarlugit piumasaqartarluta. Tamanna soorunami
nalilersugassaasariaqarpoq, nunatsinni najugaqartut naammassisinnaasaat
aallaavigalugu sulisitsineq ingerlassappat.
Tamakku eqqartukkagassat
ilagivaat maani ataatsimiinnermi, aamma uterfigiumaarpagut suliffeqarneq
pillugu oqallisilerutta, kisianni tassa atorfinitsitseriaatsit tamakkua aamma
naleqqussartariaqarpagut, nunatsinni suliassat naammassiniagassallu
aallavigalugit ilusilerlugit. Tamanna avaqqukkuminaassaaq, tikisitatigut
atorfeqartitsisarnerput ikiliartortissagutsigu.
Inunnik isumaginninnikkut
iluarsaaqqinneq eqqarsaatigalugu Inuit Ataqatigiinninngaanniit Maliinannguaq
Markussen Mølgaard-ip taasaa paasilluarpara, tassa utoqqaat pillugit,
innarluutillit pillugit aammalu ilaatigut nutaamik politikkeqarnerup
ilaqutariit pillugit ilusilersorneqarsinnaanerat pillugu suliniutigut
arriippallaartut. Soorunami oqartoqarsinnaavoq sukkanerusinnaagaluarput,
kisianni inatsisiliornerit aamma sulissussatigut pisussaaffilersuinerit
pinngitsooratik aamma malitseqartarput allatut ajornartumik immaqa sukkavallaanngitsumik
suliassat ingerlaneranni. Taamaattumik paasilluaraluarlugu
erseqqissaatigilaasavara uagut naalakkersuisuni sulisoqarnikkut aammalu
suliakkersuinitsinni piumasaqaatigut sakkortusaraluartut, naammassisinnaasarput
aamma killeqartarmat, sulisut eqqarsaatigalugit. Taamaattumik neriuutigaara
kommunet uagullu pisussaaffitta pitsaanerusumik agguataarneratigut aamma
naammassisagut immaqa sukkanerusumik ingerlasinnaajumaartut.
Inunnik isumaginninnikkut
iluarsaaqqinnermut atatillugu suliassat ingerlaasiat naalakkersuisuni
arajutsisimanngilarput, tassa soorunami uagut suliassat uagut ingerlakkatsigu,
tamatigorluinnarlu kingumut qivialaartarpugut Inatsisartut akuerisaat,
suleriaasissarput aallaavigalugu suli ingerlagatta, tassa Inatsisartut maani
taamanikkut 97-imi inunnik isumaginninnikkut iluarsaaqqinnissamut
ataatsimiititaliarsuup isumaliutissiissutaa suliarigamikkut suliassa
tulleriiaarneqarnerannut tunngavigisaat suli malippagut, aammalu
allanngortissagutsigit saqqummiiumaarpugut, kisianni tassa piffissaliussat
aallaavigalugit tassani naalakkersuisut ingerlatsipput.
Taavalu naggataatigut
Kattusseqatigiinninngaanniit apeqqutigineqartoq immikkut, tassa inuusuttut
kiffartuussisarnerat qanoq isumaqarfigineqarnersoq, Kalaallit Nunaat
tamakkerlugu taanna ingerlanikuusoq, taanna pineqannguatsiarmat, Kalaallit
Nunaat tamakkerslugu kiffartuussisarneq, tassunga tunngatillugu oqaatigissavara
naalakkersuisuni, soorlu aamma naalakkersuisut siulittaasuata oqaatigigaa,
inuusuttut nunarput tamakkerlugu kiffartuussisarnerata aallarteqqissinnaanissaa
siunertaralugu naalakkersuisut suleqatigiissitamik pilersitsiniarmata.
Ullumikkut inuusuttut kiffartuussisarput kommunekkaartumik, kommunet
tamangajavimmik inuusuttut sulliviinik peqarput, soorlu aamma "Inuusuttut
ilatsiinnanngitsut" Nanortalimmi aallartereersimasut, iluatsilluartumik,
soorlu naalakkersuisut siulittaasuta oqaatigigaa, inuusuttut 40-t aallartimmata
ukioq, taakkunannga 38-it ilinniarfissaanik suliffissaanillu
innersuunneqareersimapput. Tamakkua misilittagaalersut pitsaasut, inuusuttut
tunngaatigut aaqqissuussinerit ingerlassapput, kisianni una nunarput
tamakkerlugu ataatsimut kiffartuussisarnerup qanoq ilusilernissaa pillugu
suleqatigiissitaliortussaassuugut, kommunet tassani aamma peqatigalugit.
Suliassaarunnavianngillat, ilaatigut savaatillit siunnersuisoqatigiiffiat
imaluunniit siunnersuisarfiat peqatigalugu massakkut nalilersuisunerit
aallartereerpagut, savaateqarfinni inuusuttut ataatsimoorussamik
suliarisinnaasaat nalunaarsortillugit. Nunaattit annertusarneqarsinnaaneri,
savaateqarfinni aqqusiniornerit ingerlanneqarsinnaaneri, immaqalu allaat
nunaqarfinni aqquserniorsinnaanerit ilanngullugit tamakku tikinneqarumaarput.
Tassa naatsumik oqaatigalugu kiffartuussisarnerup nunarput tamakkerlugu
aallarteqqissinnaanissaa siunertaralugu naalakkersuisut suliniuteqarput.
Josef Motzfeldt, Aningaasaqarnermut Niuernermullu
Naalakkersuisoq:
Inatsisartoqarnerup
naalakkersuisoqarnerullu atuuffissamigut tamakkiisumik atuunnera
maluginiartarpara Inatsisartut naalakkersuisut siulittaasuata ammaanerni
ukiakkut ataatsimiinnerup ammarneqarneranut atatillugu oqalugiaataanut
tunngatillugu oqallikkaangatta. Pissusissamisoorpoq, aamma uagut
naalakkersuisuni inuit arfineq-marluinnaalluta takkuitsuukavut, sinerissamilu
pisunut inuiaat uummataasa tilerinerinut arajutsisinnaasagut Inatsisartut
naalakkersuisunut apuuttarmatigit, aammalu naalakkersuisut suliniutitsitut,
tassa Inatsisartut inassutigisaat najoqqutaralugit suliniutitsitut ingerlatagut
nalilersortarmatigit. Tamanna pissusissamisoorpoq, imaattariaqanngilarmi
naalakkersuisut umiaasaaqqatut pituussaarluta saavittutut suliniutit
ingerlatsissagigut, siutigut ammatippagut, soorlu aamma Inatsisartuni ilasortat
siutitik ammatikkaat, innuttassut piumasaqaataannut oqaatigerusutaannullu oqaluttarfik
manna atorlugu Inatsisartuni oqallinnermut apuussisarnermikkut.
Arlallit oqaseqartut
innaallagissamut taavalu aamma imermut akitsuisinnaanermut naalakkersuisut
eqqarsaatigut oqaaseqarfigaat, tassani Atassutip minnerunngitsumik aammalu
Kattusseqatigiit taanna peqataaffigisinnaanagu oqaatigaat. Naalakkersuisut
susassaqarfigaat akinik tamakkuninnga aalajangersaanermi akuersisartuullutik,
imaluunniit itigartitsisartuullutik, tamanna isumagissavarput, mannalu
erseqqissaatigerusuppara aalisakkerinermut tunngatillugu, tassa nunatsinni
suliffiit arlaqartut aalisakkeriviit, amutsiviit ilaat, taavalu aamma
platsikkinik suliffik maaniittoq, immikkut tassani akikittunik
akiliisinneqartarmata. Innuttaasut nalinginnaasumik innaallagiaq kiloWattimut 2
kroner 15-eqartikkipput aalisakkerinermut allanullu suliffinnut taakkununnga
taariikkannut 58 ooriinarmik akeqarpoq, taavalu imeq kubikmeterimut innuttaasut
16 kroner 70-ilertaripput aalisakkerinermut suliffinnilu allani 2 kroner
86-eqarpoq. Naalakkersuisut isumaqanngillat aalisakkerinermi suliffinnilu
allani akigititaasut nalinginnaasumik akiliisarnitsinni qaffanneqassasut,
kisianni nalequssarneqartariaqartut isumaqarpugut, qaffaallaminernissaat
isumaliutigaarput tamannalu ataatsimiinnerup ingerlanerani naalakkerusisut
naammassissajunnarsimavaat. Tamatumani eqqumaffigineqartariaqartoq tassavoq
Inatsisartut kissaatigisaat aningaasarpassuarnik nalillit tamakkerlugit
suliariniassagutsigit ullumikkorpiaq 500 mill. missaanik amigaateqarpugut.
Taamaattumik innaallagissiorfiit,
imermut aqqutit innaallagissallu aqqutaat akissaqartinniassagutsigit
ullummikkut Nukissiorfiit ukiumut atortagaat 50 miil. missaaniipput, sulili
malinnaaniassaguni 50 mill. missaanik amigaateqarput. Taamaammat
nammaqatigiilluni ataatsimoorluni akitsuiallannikkut taakkua aningaasat
pissarsiarineqarnissaat ajunaartoornersuarmi Sisimiuni siornaak ittunik
pisoqassanngippat pisariaqarput, taannali Inatsisartut ilaannut
oqaatigineqartutut orniginartinneqanngippat soorunami naalakkersuisuni
tusarsussaqaarput allatigut qanoq ililluta taakkua akilersornissaat
akissaqartissaneripput.
Soraarnerussutisisqalernissamut
aningaasateqarfimmut tunngatillugu naalakkersuisut siulittaasuata
oqalugiaammini oqaasii ilaatigut Atassummiit oqaaseqarfigineqarput tassani aalisartut,
piniartut uumasuutillillu eqqarsaatigalugit. Naalakkersuisut naatsorsuutigaat
aappaagu soraarnerussutiaqarnissamut selskabimik nalinginnaasumik
akissarsiaqartunut atuutilersussamik pilersitsinissaq akuerineqassasoq
piviusunngortinneqarlunilu. Tassanngaanniit oqaloqatigiinnerit massakkut
pilersaarusiornermi Aalisarnermi Piniarnermilu Kattuffiup taavalu aamma
Savaatillit Peqatigiit Suleqatigiissut siulersuisui attavigineqalersaarput
tassani nammineq akileeqataasarnerat pisortat akiliussissagutta taakkua
akileeqataasarnerat qanoq ilillugu aaqqinneqarsinnaanersoq paasiniarlugu.
Kiisalu Atassutip oqaluttua
Otto Stennholdt-mut oqaatigissagukku oqaatigai aatsitassat lotto-mi
eqqugasarujussuartut takorloortinneqartuarsimasut. Ilisimasakka
najoqqutaralugit 1979-minngaanniit aatsitassat pillugit siunnersuisoqatigiinni
taamatut oqaaseqartoq ilaasortaasimavoq. Kikkunukua taamatut
takorloortitsinermut aqqutaasut, Otto Steenholdt nammineq peqataannginerluni
takorloortitsinertut oqaatigissaguniuk. Naalakkersuisunut sualummik uannut
Anigaasaqarnermut naalakkersuisumut pingaaruteqartorujussuuvoq innuttaasut
aningasarsiornikkut inuiaqatigiit ineriartortinneqarneannut peqataanissaata
annertusarneqarnissaa. Ullumikkut suliffissaqanngitst arlalissuummata
ilisimaneqarpoq, taamaattumik aatsitassarsiorfipatarnaat kisiisa pinnagit
kisiannili aamma innuttaasut annikkaluamik namminneerlutik
aatsitassarsiornikkut annikkitsumik aatsitassarsioqataanikkut
peqataasinnaanerat isumaqarpunga suliniutaasoq ajunngitsoq aammalu suut nalusavut
nutaat takkukkaangaa kaasimaavut kaallugit isiginnaaginnassanngikkutta
aatsitassarsiorneq ilaatigut nutaarluinnarnik atortoqarluni ingerlanneqarmat
ilinniartitsinerit massakkut ilaatigut siunertaralugit tv-kut
takoqqusaaruteqartarnera Otto Steenholdt-ip isorisinnaammagu assut
uggornartutut isigaara.
Kiisalu soorunami qamuuna
attorneqaatigalugu nuannaarutigaara naalakkersuisut sinnerlugit
missingersuusiortarnermik inatsisiliassaq aamma Atassutip oqaluttuata
eqqaammagu, taamatullu pitsanngoriaatissat aningaasallu aqunneqarnerat
iluarnerusoq pissusissamisoornerusoq nersualaariarlugu oqalugiaammi naggataani
Disko, peqqinnissaqarfimmi siorna akiligassaagaluaq akilerneqanngitsoorsimasoq
taavalu aamma ilinniartuunersiuteqarnermut qarasaasiatigut atortulersuutiti
siornatigulli atuussimasut iluarsiniarneqarneranut aningaasartuutit
tikkuartorsinnarlugit, tassa taakkua pisimasuupput Atassutip aningaasaqarnermut
naalakkersuisuutitaqarnerata nalaani, ajunaarnersuartut
kanngunartuliaasimasutullu takkorliuunneqarnissaat utaqqiinnarnagu
naalakkersuisut qanoq iliulersaarnersut aperimmat tupigeqaara aallaqqaataani
taanna missingersuusiortarnermut inatsisiliassaq tassuunakkullu aqutsineq
kusanartussaq takorluukkersaarutigisinnarlugu. Tassani isumaqarpunga
ataqatigiinngittoqalaartoq.
Kiisalu Siumup oqaluttuanut
ukua Landskarsip aningaasaataasa isumannaannerpaamik pissarsiviunerpaamillu
inissinneqarsinnaanerannut tunngatillugu oqaaserisai arajutsisimanngilagut
massakkullu Landskarsip ukioq maannga killinnerani tigoriaannarnik740 mill.
missaanik aningaasaateqarpoq, taakkulu agguataarlugit inissinneqarsimapput 320
mill. ulluinnarni ingerlatsinermi atugassat, tassa erniakinnerpaat 2,5%
missaani erniaqartut akissarsianut, tapiissutinut, allanullu. suliffeqarfinnut
kommuninullu tunniuttakkatsinnut tigoriaannartut ingerlattavut. Taavalu arlaat
140 mill. koruunit missaani 3% angullugit erniaqartut tassapput
siusinnerusukkut nalunaarutigereerlugu tiguneqarsinnaasut, naggataatigullu
pappialanik nalillit obligationinik taaneqartartut 280 mill. koruunit missaani
nalillit pigivavut taakkulu 5% - 6%-llu akornanni erniaqarput.
Siumup oqaluttuanut
oqaatigissavara taakkua soorunami nalilersorneqartuartariaqarput
pissarsiviunerpaaffissaat siunertaralugu ullumikkullu naalakkersuisut
imaluunniit Aningaasaqarnermut Pisortaqarfik bankinik allanik nunani allamiunik
assigiinngitsunik siunnersorteqarluni ingerlavoq, taakkulu siunnersuutaat
malillugit sunik pissarsivigiffiunerpaaffissaanut aningaasat immikkoortut
taakkua inissiortorneqartarput nikerartumik.
Kiisalu Siku blok-mik
misileraaneq naammassilersoq Siumup oqaluttuata oqaatigisaa. Tassunga
tunngatillugu oqaatigissavara naalakkersuisut novemberi aallartilaarpat
niuernikkut inuussutissarsiornikkullu isumasioqatigiinnermik maani Nuummi
ingerlataqarniarmata, tassani aallartitsiniartut suliffeqarfinnik
aallatitsiniartut nunatta nammineernerunissaanut siunnerfeqarluni
ingelatsiniarnermi qiimmassarneqarnissaat najoqqutassaqarnissaallu
qulaajaavigineqassaaq ilaatigullu avammut nioqqutaasinnaasut suuneri oqaluuserineqassapput,
tassungalu naleqqulluinnartutu ilaatinneqartussat ilagivaat sanariaaseq Siku
Blok -mik taaneqartartoq.
Siumup oqaluttuata
kommuninut aningaasaliissutaasartut eqqarsaatigalugit siusinaartumik
pensiuuninik pisartagaqalersartut eqqarsaatigalugit aappaagu KANUKOKA-mik
isumaqatigiinniarnissatsinnut innersuussutaa tusaatissatut tigussavara.
Soorunami illuatungerisata qanoq isumaqarnerat apeqqutaassaaq uagut
kisiimiilluta kommuninut aningaasaliunneqartartut aalajangersorsinnaanngilagut
isumaqatigiinnikkut pisarput. Aammalu nunat immikkoortukkaartumik kommuninut
aningaasaliunneqartartut tunniunneqartarsinnaanerata isummap taassumap
nutaajunnginnera uppernarsarsinnaavara 1990-kut aallartilaarnerani
Inatsisartunut taanna nunat immikkoortukkaartumik ineriartortitsinermut
aningaasanik aningaasaliisarnissamik siunnersuuteqarsimagama, taamaattumik
isuma taanna KANUKOKA-kormiunut nerliutissavarput. Annilaarutigineqarsinnaasoq
soorunami immaqqa siutinni akisuasoq tusaalereerpara kommunit kattussulernissaanni
qulaanngaanniit naalakkiiniartutut nipeqartinneqartut isumaqartinneqaqinammat,
kisianni isuma ajunngitsutut unga nalilerpara.
Kiisalu Niuernermut
naalakkersuisutut puiaasaaqqat utertinneqartartut, taakkua ajornartorsiutitut
Siumuminngaanniit saqqummiunneqarput imaluunniit pisariullaartutut. Tassunga
oqaaserineqartumut uppernasaatitut oqaatigisinnaavara nunatsinni nunatsinnut
nunatsinninngaanniillu immakkut assartuinermi assigiimmik akeqartitsinermut
tunngatillugu Danmarkiminngaanniit maanngaanneqartut 50 mill. sinnerlugit
ukiumut aningaasarsissutigisarpavut taava 12 mill. missaanioqqooqaaq
manngaanniit Danmarkimukartut nunanut allanukartut assigiimmik akeqartitsinermi
akitsuutikkut isertitsissutaasarput. Nunattalu iluani tassunga assigiimmik
akeqartitsinermi aningaasat nunatta iluani assartorneqartunut aningaasat
isertitsissutaasartut 10,3 mill. missingi taakkunanngalu 45%-ii tassa 4,6 mill.
tassaapput puiaasaaqqat assartorneqarneranninngaanniit pissarsiarineqartartut.
Nunatsinni assartuinermi initussusia tassuunakkut takuneqarsinnaavoq.
Assigiimmik assartuinermi akeqartitsinermi akitsuut tamakkerluni 74,9 mill.
koruuninik 98-mi Landskarsimut aningaasarsissutaavoq.
Taavalu Kattusseqatigiinnut
akeqanngitsumik biileqartitsineq aammalu akeqanngitsumik oqarasuaateqartitsineq
naalakkersuisunut tunngatillugu uparuarpaa. Taanna ilumuuvissutut
oqaatigineqarsinnaanersoq apeqquserneqarsinnaavoq. Ilaatigut biileqartitaaneq
inuup nammineq aalajangigassaraa biileqarusunnerluni imaluunniit allatigut
assartuunneqarusunnerluni. Manna tikillugu naalakkersuiuusarsimasut
Inatsisartuusarsimasulu allajangersimavaat skatterådip allajangigaa tassa
20.000,00 koruuninik suliffimmut atatillugu ukiumut isertitsissutaassasoq.
Pingasunngorpat naalakkersuisut siunnersuuteqassapput taassumap
qaffanneqarnissaanik, tassa imaappoq akeqanngitsumik biileqartitaanivittut
taaneqarsinnaanngilaq. Kiisalu oqarasuaateqarnermut tunngatillugu sulinermut
atatillugu Antuut aamma Kattusseqatigiit sinnerlugit Kattusseqatigiinnilu
ilaasortat Inatsisartuni ataatsimiinnerup nalaani sulinerminni aamma sulinerup
nalaani akeqanngitsumik oqarasuaateqartinneqarput, taassumalu saniatigut
Inatsisartuni ilaasortat qaammammut akileraarutaasussaanngitsumik 4.145,00
koruuninik pisarput, taakkulu oqarasuaateqarnernut allanullu allaffissornermut
ingerlatsiniarnerminni atugassarivaat. Tassa imaappoq 50.000-it ukiumut aamma
oqarasuaatinut ikiorsiissutitut Inatsisartuni sulinermut pisariaqartinneqartut
nalilerneqarsimammata Inatsisartut tamanna aalajangersimavaat.
Inuit Ataqatigiit
oqaaseqartuanut tunngatillugu ataasiinnaq erseqqissaateqarfissavara
pingaaruteqartutut isigigakku aammalu qularinnginnakku
nunaqarfimmiorpassuarsuarni immaqalu aamma illoqarfimmiut ilaannut
ilisarineqartussat taanna ingerlatseqatigiiffiit Namminersornerullutik
Oqartussalluunniit tamakkiisumik pigisaat arlaqarlutik nunaqarfinni
illoqarfinnilumi suleqatigiinnerisa killeqassusiat Maliinannguaq Markussen
Mølgård -ip uparuarmagu. Eqqaamavara 80-kunni nutaraalluta naalakkersuinikkut
ingerlatsinitsinni ilaannikkut aalisaakeriviliortaratta kallererup inneqara
imeqarnissaalu annertunerusumik niaqorluutissatut isiginagit nappareeraangallu
tamakku ilaannikkut eqqaasarlugit. Kisianni ullumikkut 2000-mut isilerpugut
ukiullu taakkua 20-ngulersut ingerlaneranni kukkuluttuutaasarsimasut tamakku
ilinniarfigisimassanngikkutsigit tupinnaqaaq.
Assersuutigineqartut
nunaqarfimmi ukiuni arlalinni qerititsiveqalernissaq puisit neqaannik
tuniniaanissaq eqqarsaatigalugu pilersaarutaasimsoq naammassiniarlugu innaallagissiorfiit
nutaanik nunaqarfinni taarserneqartut kallerup innerata innaallagissap
aqqutaanut amippallaanik patsiseqarluni atorsinaannginneranik pissutsit
Nukissiorfiit taavalu tunisassiorfiit Puisi A/S kinaagaluarnersulluunniit
akornanni suleqatigiinneq amigarsimavoq. Taamatut ittoq nunaqarfimmi allami
assersuutitut taasaani tassalu sikuliorfik taavalu aamma nillataartitsivik
nunaqarfimmiut aallisartortaasa nunaqarfimmi aqutsisut sivisuumik
sorsuutigereersimasaat aasaq tamarmik tikisinneqarsimasut, ikkussorneqarmatalu
kallerup inniliorfik artorsarluni suut tamarmik qaaralermata piiariarlugit
nunaqarfimmut allamut aallarunneqarsimapput. Suleqatigiinnginnerit tassani Nuka
A/S Nukissiorfiillu akornanni pisut Namminersornerullutik Oqartussat tamarmik ignerlatsivigimmassuk
tamakku oqqersuutit Inuit Ataqatigiinniinngaanniit takkuttut isumaqarpunga
ilungersorluta tamaattaalluta Inatsisartut naalakkersuisullu
pinaveersimatinnissaat suleqataaffigisariaqaripput.
Alfred Jakobsen, Peqqinnissamut, Avatangiisinut
Ilageeqarnermullu Naalakkersuisoq:
Ja, qujanaq. Tassa
naalakkersuisunut ilaasortat aamma naalakkersuisut siulittaasuat
oqaatigeriigaannut ilassutitut ukua manna tikillugu oqallinnermut
saqqummiussaqarsimasut nalunaarsorsimasakka saqqummiutilaassavakka.
Tassalu siullermik Atassut
sinnerlugu oqaaseqartumut Otto Steenholdtimut erseqqissaatigilaarusuppara tassa
peqqinnissaqarfimmi atuinerusariaqarnermik tunngaveqarluni immikkut
aningaasaliisariaqalersinnaanerit kanngunartuliatut naalakkersuisut isiginngimmassuk.
Tassami manna tikillugu taakkununngarpiaq Otto Steenholdtip uparuagaanut
pissutsit nassuiaatigineqartariaqartut ukuummata: aggustimi qaammatikkaartumik
peqqinnissaqarfimmi pisortaqarfimminngaanniit malinnaaffigiuarparput
sinerissami aammalu Sanami atuinerit qanoq ingerlanersut, taavalu aggustimi
kingulleq saqqumminneqartoq tunngavigalugu atuineq taamatut ingerlaannassappat
naatsorsuutigineqarluni ukiup naanerani aningaasat tamassuma missaaniittut
amigaatigineqalerumaartussat. Taakkuuppullu tassa maannakkut
naalakkersuisuninngaanniit inatsisartunut immikkut aamma
aningaasaliissutissatigut kingusinnerusukkut eqqartorneqalerumaartumut
qinnutiginiakkatsinnut ilaasut.
Tassa imaappoq:
aningaasanik suli atuipiluttoqarsimanngilaq, kisiannilu manna tikillugu atuinerup
ingerlarnga taamaaginnassappat taava ukiup naanissaata tungaanut tamassumap
missaanik atuinerusariaqarnissamik pisariaqartitsisoqarnissaa taamatut
inissisimammat.
Aappaattullu uparuagaanut,
tassalu 8,5 million ´98-imut tunngasut aamma aningaasaqarnermut naalakkersuisup
eqqaareeraluaraa, soorunami ajuusaarnarput taakkua taamatut
takkuteriataarsimammata, siornalu akerlerneqareersimasussaagaluit, kisianni
tassa inuit arlallit kukkunerannik taanna peqquteqarpoq. Tassa napparsimasut
pisariaqartumik katsorsartariallit uagut naalakkersuisuninngaanniit
sullikkusoqaagut, aamma taakkua katsorsartariallit isumaqarpunga
kanngunartuusariaqanngitsut katsorsarnissaannik immikkut amma akiliinissamik
pisariaqartitsissagutta. Taamaattumik naalakkersuisunit pingaarluinnartutut
isigaarput napparsimasortatta sulissunneqartuarnissaat.
Aamma naalakkersuisuni
ilumut taama pikkorikkusukkaluaqaagut allaat
eqqoriarusussinnaagaluarparpulluunniit inatsisartuni naalakkersuisunilu
ilaasortat qaqagukkut perulullutik napparsimalissanersut allaat immikkut
timmisartuussinermik pisariaqartitsillutik assartuunneqartariaqarlutik
kinguneqartussanik, kisianni tassa peqqinnissarput ajuusarnararluartumik
taamatut pilersaarusiorsinnaanngilarput.
Taamaattumik
pisariaqartumik immikkut ittumik taamatut takkuttoqartarnera isumaqarpunga
tupinnartuunngitsoq, tassa inuunitta ilagivaa peqqinnissara uanga
nammineerlunga qaqugukkut ajalusoorluinnassanersoq aqussinnaanngilara. Taavalu
nakorsassaaleqinerput taanna ingerlajuarpoq. Tassa ilaatigut taassuma
iluarsiiviginissaata tungaanut aamma naalakkersuisuninngaanniit tassa
siunnerfigivarput ilaatigut naalakkersuisut siulittaasuata aamma oqaatigivaa
nunap immikkoortuini qitiusumik napparsimaviit pilersinneqartussat
taakkuussussaapput aamma aqqutissiuussisussat peqqissaavinni aamma
nakorsaqarfinni, napparsimaveqarfinni nakorsassaaleqinitsinnut
ikiorsiissutigisinnaasagut. Tassami taamaaliorutta taava aamma nakorsat
amerlanerit assigiinngitsunik piginnaassusillit isumalluutigilersinnaassavagut.
Aammalu taamaaliorutta aamma periarfissaqarnerulissuugut nakorsanik
assigiinngitsunik piginnaassuteqartunik nunap immikkoortuini qitiusuni
napparsimaveqarfinnut neqeroorsinnaalissalluta.
Tamatumalu aamma
kingunerisussaavaa imaluunniit kingunerisinnaavaa piffinni pineqartuni
pilattaasartunerit annikinnerusut suliarineqarsinnaanngornerat. Tassa manna
tikillugu ilaatigut aamma uparuartorneqarpoq peqqinnissaqarfimmi
suliaritinniarlutik utaqqisunngooq amerliartuinnartut, kisianni upernaaq
kisitsisit nalunaarsorneqartut tunngavigalugit 3400-it sinnillit utaqqisutut
nalunaarsorsimapput. Taakkunanilu 40%-it missaanniittut ulloq ataasiinnaq
atorlugu suliaritinneqartussatuut inissisimapput, taakkualu aamma
suliaritinneqarnissaat tassa siusinnerusukkut inaarsarumallugu aamma maannakkut
naalakkersuisuninngaanniit immikkut tassami aningaasaliiffigineqarneratigut
maannakkut ingerlanneqarpoq sanaartorneqarlunilu Sanami pilattaasarfiup
allineqarnissaa, taassumalu naamassinissaa tassa naatsorsuutigivarput
upernaamut majimi junip missaaniluunniit naammassisinnaajumaartoq,
taamaalilluta aamma pilattarneqartariallit ilarparujussui tassani ulloq
ataasiinnaq atorlugu taamatut suliarineqartariallit tassani
suliarineqarsinnaanissaat aamma tikissinnaajumaarlutigu.
Taavalu aamma Qeqertarsuup
tunuani nunap immikkoortuani qitiusumik napparsimavissap illoqarfimmut
sorlermut inissinneqarnissaanut tunngatillugu aalajangersinnissaq, tassa aamma
erseqqissaatigilaaginnassavara tassa aalajangersinnissamut tunngavissaq
naalakkersuisunut maannakku piareersarlugu ingerlakkatsigu, taavalu aamma
neriorsuutiginngikkaluarlugu, kisianni neriuutigaara oktoberip qeqqata missaani
tamatumap aalajangernissap tunngavissarpiap piareernissaa pisinnaajumaartoq.
Aammalu manna tikillugu naalakkersuisuninngaannniit tassa Vordingborgimiittup
amthospitalimut isumaqatigiissut taanna nutartersimagatsigu taavalu taassuma
aamma kingunerisussaavaa ilaatigut manna tikillugu
aningaasaliissutigineqartartut taassumunnga ilaat 3- 4- 5million akornanni
nunatsinnut angerlaanneqarnissaannik kinguneqartussaammat taamaalilluta aamma
sinerissami imikkut tarnip pissusaannik ilisimasallit nakorsat
iliuuseqarsinnaaneri kiffartuussisinnaanerallu aamma tassuunatigut aamma
ikiorserneqartussaalluni.
Kiisalu eqqaavinnut
tunngatillugu aamma soorlu isumaginninnermut aamma sulisoqarnermut
naalakkersuisup eqqaareeraluaraa kommunet isumaqatigiissuteqarfigineqarsimapput
ukiut marluk kingulliit iluanni. Tassalu nunaqarfinni mandtimit atorlugit
aqqusinniorsinnaanerit aammalu eqqaaviit tungaannut aqqusinniorsinnaanerit
taakkua sanaartorneqassasut, tassalu suliaq taassumunngarpiaq tunngasoq
isumaqarpunga oqaatigisariaqartoq ingerlasoq. Taavalu eqqakkanik
isumaginninnerit tamakkiisumik kommunenit akisussaaffigineqarnerat
erseqqissaatigerusuppara, tassami ullumikkut taamatorpiaq inatsisitigut
inissisimasoqarpoq tassalu kommunet eqqanik isumaginninnerit tamakkiisumik
akisussaaffigalugit. Naalakkersuisuni uagut piareersimavugut aamma nuna
tamakkerlugu eqqakkat assigiinngitsut immikkut siumagisariaqartutuut
isigisariaqartut aamma taakkununnga iliuuseqarnissamik ikiuunissamut. Aamma
nalunngilara qanittukkut KANUKOKA tikeraarneqarsimavoq Danamarkiminngaanniit
eqqanik immikkut atoqqinneqarsinnaasunik katersuisartut sinniisuanninngaanniit.
Kiisalu
qujassutigerusuppara aamma immikkut Siumukkormiut oqaaseqartuanninngaanniit
oqaatigineqartut aammalu Inuit Ataqatigiinninngaannniit oqaaserineqartut, tassa
naalakkersuisut peqqinnissaqarfiup iluani iliuuseriniagaanut tunngasut
sulissutigineqartut taakkunatigut aamma kaammattuutigineqarmata immikkullu
aamma maluginiarpara Siumup oqaaseqartuata Jørgen Wever Johansenip immikkut
aamma taammagu illoqarfiit ilaat imminnut akilersinnaanngortinnissaannut aamma
tunngasut taakkua maani aamma eqqumaffigisariaqaripput. Qujanaq
Johan Lund Olsen, Ataatsimiinnermik aqutsisoq,
Inatsisartut Siulittaasuat:
Taavalu maannakkut tassa
tullinnguuppoq kultureqarnermut ilinniartitaanermut ilisimatusa-rnermullu
naalakkersuisoq. Naalakkersuisoq taanna oqaaseqareerpat taava aamma
ineqarnermut attaveqarnermut pilersuinermullu naalakkersuisoq, taassuma
saniatigut suli allanik aamma oqaluttussanik aamma nalunaartoqartareerpoq.
Tassa partiit oqaluttui, taavalu aamma partiit oqaluutuisa avataatigut aamma
oqaaseqartoqarumalluni.
Kisianni mannakkut
kultureqarnermut ilinniartitaanermut ilisimatusanermullu naalakkersuisoq,
takanna.
Lise Skifte Lennert, Kultureqarnermut
Ilinniartitaanermut Ilisimatusanermullu Naalakkersuisoq:
Naalakkersuisut
siulittaasuata partiit oqaaseqaataannut oqaatigeriigai ilassutitut ukua
oqaaseqarfiginiarpakka, taavalu misikkaluassavara taamatut eqikkaalaarlunga
takisuuliorniarnanga, partiit tamarmik Kattusseqatigiit Per Rosing Petersenillu
oqaaseqarfigisimassat tassa oqaatsinut tunngatillugu ilassuteqalaassallunga.
Tassa inuiaqatigiit
oqaatsinik pingasunik piginninnasaqalernissaat ujartorneqartualersoq
malunnarpoq, aammalu pisariaqalersutut malunnarluni, tamanna kingullermik
uppernarsivarput Kangerlussuarmi isumasioqatigiissitsigatta. Tassani
angajoqqaat, ilinniartitsisut, atuarfiit ittui ningiuilu, taavalu kulturikkut
ilinniartitaanermullu, aamma udvalgininngaanniit poliitikerit peqataasut
tamarmik ersersippaat qanoq pingaartitsigalugu taamatut pingasuinnik
oqaaseqarnerup angulertornissaa. Taavalu aamma uanga isumaqarpunga merserinagu
nakimaatsumillu pissuseqarluta taanna anguniartariaqaripput. GU-ni, tassa
Ilinniarnertuunngorniarfinni qutsinnerusunilu ilinniarfiusuni tamani taamatut
oqaatsit pingasut atorneqarnerat saperunnaareersimavarput, aammalu
ataasimeersuartitsisarnitta ilaat, tassalu soorlu kingullermik Kangerlussuarmi
taanna takutipparput taamatut oqaatsit pingasut atorlugit
ingerlassinnaasimavarput ikkarnanngi-ngajavissumik, iluatsilluartumillu. Tassa
aamma nunanut allanut attaveqarnerput annertusiartuinnartillugu aamma taanna
pinngitsoorsinnaanngilarput.
Paasissutissat
pisariaqartut amerlaqisut tuluit oqaasii atorlugit nalunaarsorneqartarput.
Paasissutissanik atuisinnaaneq pitsanngorsassagutsigu pingasunik
oqaaseqartariaqarnerput pisariaqarpoq. Taavalu aamma taalaarusuppara oqaatsinik
pikkorissarfiup pilersinneqarneratigut allamiut oqaasiinik, aammalu soorunami
pingaartinnerullugu kalallit uagut oqaatsitsinnik ilinniarsinnaaneq
annertusarneqarmat.
Kalaallit oqaatsitsinnik
ilinniartitsineq soorunami inunnguuseralugu oqaatsitut, kiisalu aamma allamiut
oqaasiitut oqaatsitta pikkorissaatigineqarnerat iluatsilluarsimavoq. Ataatsimut
oqaatigalu oqaatsinik pikkorissarfik ingelalluarpoq, nuannaarutigisatsinnillu
oqaatsivut soqutigineqarluaqaat tassani . Kiisalu aamma tuluit oqaasiinik
qallunaallu oqaasiinik pikkorissartitsinerput nunatsinni nunanilu allani
ingerlanneqartartoq iluatsilluartumi ingerlanneqarpoq.
Tulliullugu oqaaseqarfigilaarusuppara issittumi teknologi pillugu ilisimasanik katersuiffik, tassani Siumup, IA-p, Kattusseqatigiit, Per Rosing Petersenillu tamarmik aamma sammisimammassuk. Issittumi teknologi pillugu katersuiffimmik pilersitsiartuaarneq massakkut tassa ingerlallualersimavarput. Anguniarneqarpoq teknikkikkut ineriartorneq nunatsinni pinngortitap nammassinnaasai kiisalu inuiaqatigiit piumasaat aallaavigalugit ingerlalissasoq. Tamannalu tunngavilerneqassaaq issittuni teknikkikkut ilisimasat misilittakkallu katersornerisigut, kiisalu ilisimatusarnikkut nutaanik ilisimasaqalernikkut, aammalu misileraanikkut. Maanna ingeniørinik teknikerinillu pikkorissaaneq aallartereerparput. Katersuiffimmik pilersitsiartuaarnerup ilagilluinnarpaa maanna sanaartornerup iluani illussaqarnikkut, avatagiiseqarnikkut, imeqarniarnikkut aamma kiassaateqarnikkut nutarterinissarsuaq, aamma illoqarfinni pilersaarusiiornermi atortuni nutaanik iluaquteqarsinnaaneq pikkorissaaffigineqartassaaq. Katersuiffiup teknikerit ingeniørit meeqqat atuarfianni aamma ilinniartitsisut ingeniørinngorniat 1998-imi aamma 1999-imi pikkorissarsimavai. Pikkorissaanerit taakkua katillugit arfinillit ingerlareersimapput. Danmark tekniskuniversititip ingeniørinngorniarluni piareersarluni pikkorissartarneq sanaartornermi ilinniarfimmi 1999-imi aggustimi aallartippaa. Taamaaliornikkut anguniarneqarpoq kalaallit inusuttut soorunami amerlanerusut ingeniørinngorniarnissaat. Taava immikkut Siumumut ujartugaannut nipilersorneq pillugu oqaaseqalaassaanga.
Nipilersornermik ilinniartitsinerit naalakkersuisut pingaartitaraat, taamaattumik kommunet ilinniartitsinermik aallarniisarnerat takullugu nuannerpoq. Ilulissani nipilersornermik ilinniarfimmik pilersitsisoqarsimavoq. Maniitsumi, Nuummi aamma Narsami ilinniarfinnik pilersitsisoqalerpoq. Taannalu aamma nuannerpoq taamatut kommunet ataasiakkaat ingerlatsinerat paasillugu, aammalu pimoorunneqartoq paasigatsigu. Illoqarfinni allani sunngifimmi atuartitsineq aamma meeqqat atuarfianni atuartitsineq aallaavigalugit nipilersornermik ilinniartitsisoqartarpoq. Taava aamma Siumup ujartugaa alla tassaavoq isiginnaartitsisarneq pillugu inatsisissaq. Tassani isiginnaartitsisarnerup siunissaa pillugu nassuiaatip pisortaqarfimmi kulturikkut sulisut naammalerniariarpata malitseqartinnissaa siunertarilluinnarpara. Isiginnaartitsisoqarneq pillugu nassuiaat, tassa aatsaannguaq taasara suliaavoq siulleq, suleqatigiissitaliap kaammattuutaanik pingasuusunik suleriaqqinnermi atorneqartussaq. Ukunatigut, siullermik: isiginnaartitsisoqartarneq pillugu inatsisiliornikkut, aappaattut: nunatta isiginnaartitsisoqatigiivinik pilersitsinikkut, tassa Nationalteater tassani eqqarsaatigineqarpoq.
Taavalu pingajussaanik isiginnaartitsisartunik Kalaallit Nunaani ilinniartitsilernissap iluani. Taakku tulleriinneri killormut malillugit ingerlanneqartariaqassapput, taamaalillutik isiginnaartitsisartunik Kalaallit Nunaanni ilinniartitsinissamut aamma nunatta isiginnaartitsisoqatigiivinik pilersitsinissamut periarfissat killigititallu naliliiffigineqaqqaartariaqarlutik, tamakku pillugit inatsisiliunnginnermi. Ilaatigut isiginnaartitsisoqarnerup siunissaa pillugu suleqatigiissataliap nassuiaasiaani tunniummaguli ukiut pingasut ingerlareersimapput. Pissutillu ilaatigut Kulturip illorsua eqqarsaatigalugu piffissami qaangiuttumi allanngorsimapput.
Taamaattumillu kaammattuutit pingasuusut taakku ullumikkut piviusut aallaavigalugit naliliisoqaqqittariaqarluni. Pissutsit tamakku misissorluarneqareerpata nalilerneqarlutillu isiginnaartitsisarneq eqqarsaatigalugu immikkut inatsisiliortoqassanersoq isummerfigineqarumaarpoq.
Taavalu tulliullugu oqaaseqarfigilaarsuppara KNR-TV. Tassani ujartorneqartut erseqqipput. TV-ikkut aamma atuartitsisinnaanermik isumassarsiaq misissorneqarsinnavoq. Taamaaliortoqassappalli immikut aningaasaliinissaq pisariaqassaaq. TV-ikkut aallakaatitassiat atuarfimmi atorneqartartut Pilersuiffimmiit atuarfeqarfinnut nassiussuunneqartarput. Immikkut aallakaatitsisarnissaq ilumut iluaqutaassanersoq apeqquserneqarsinnaavoq. Kisianni tassa tusagassiuutit pillugit nalunaarusiaq pillugu oqallinnissaq tassani innersuukkumavara, tikikkumaaratsigu. Aamma uani ilinniagaqarnerit ilinniartitsinerillu iluani eqqaaneqanngitsoq ilanngutilaarusuppara, tassalu peqqinnissami ikiortitut ilinniartitaaneq. Taanna ilinniartitaaneq nutaaq peqqissaasutut ilinniartitaanermi inatsisartut peqqussutissaattut siunnersuummi ilaavoq. Taannalu marlunngorneq oktoberip taallimaanni saqqummiunneqassaaq. Ukiortaamut 2000-miit aallartinneqarnissa siunertaalluni.
Naggataatigullugu oqaaseqarfigilaarusuppara aamma meeqqat atuarfiata imarisaanik iluarsaaqqiinermut tunngasoq. Aamma partiit Kattusseqatigiillu tamarmik oqaaseqarfigimmassukkut. Tassa meeqqat atuarfiata imarisaanik iluarsaaqqiineq pilersaarut malillugu ingerlavoq. Kangerlussuarmi ataatsimeersuarneq nutaamik anguniagassanik peqataasunik saqquummiiffiuvoq. Peqataasut tamarmik soqutiginnilluarlutik immersuipput, taakkualu tunngavigalugit suleqatigiissitat sisamat pilersisimavakka. Suleqatigiit isumagissavaat ataatsimeersuartut piumasaasa kissaataasalu anguniarneqarnissaat qanoq qulakkeerneqarsinnaanersoq. Suliaq tamanna inatsisartunut nalunaarusiarineqareermat ilaasortanut tamanut nalunaarusianngorlugu agguaanneqarsimasoq innersuussutigerusuppara.
Taavalu manna periarfissaq iluatsillugu inatsisartut kultureqarnermut
ilinniartitaanermullu ataatsimiititaliaat qujaffigerusuppara, suliamut
kajumissuseqarluarlutik peqataasimammata, aammalu peqataalluaqalutik. Tassa
Kangerlussuarmi peqataalluarnersi suliap inuiaqatigiinnut tamatsinnut qanoq
pingaaruteqarluinnarnera naqissuserparsi. Tapersersuinersi tassa assorujussuaq nukittuallaataavoq. Taannalu
qujassutigivara.
Qujanaq.
Steffen-Ulrich
Lynge,
Ineqarnermut, Attaveqarnermut Pilersuinermullu Naalakkersuisoq:
Tassa naalakkersuisut
siulittaasuata, taavalu aamma Aningaasaqarnermut naalakkersuisup saqqummiussai annertoorujussuarmik
uanga akisussaaffinnut pigisannut aamma taakku tunngammata uteqqissanngilakka.
Taamatut oqaaseqarnissara annikitsuussaaq. Tassa imatut paasivara, siullermik
nuannaarutigalugu maluginiarpara naalakkersuisut siunnersuutaat taanna tassa nammineq
inuit namminneq inigisaminnik pisisinnaanerat, taavalu aamma taakku
andelsboliginngortissinnaanerat taanna tamanik tapersersorneqarmat taanna
nuannaarutigaara. Taava aamma imatut paasivara Siumumit piumasarineqartoq
mittarfiliornissanut tunngatillugu aamma naliliiffigineqaqqissasut Qaqortumi,
Nanortalimmi aamma Illoqqortoormiini mittarfiliorsinnaanissaq.
Taava Siumup
oqaaseqartartuata Jørgen Wevær Johansennip taavalu aamma Per Rosing Petersenip
taavaat Statens luftfartvæsen taanna aallaavigalugu, imaluunniit oqarta
trafikministeriep taavalu taamaalilluni nalagaaffiup akisussaaffia taanna aamma
misissorneqartariaqartoq Kalaallit Nunaannut arlaatigut
inississinnaannginnersoq. Taamaalilluni aamma tassani maleruagassat, soorlu
timmisartornermut tunngasut, taavalu aamma immaqa timmisartut atortui
assigiinngitsutigut mittarfiliornissamut tunngasut taakku maleruagassartaat
maanga naleqqussarnissaat aamma tassani misissorneqarsinnaassammata.
Taamaalillunga naatsumik
saqqummiussivunga.
Ole Lynge, Inuit Ataqatigiit:
Ammerinermut oqallinnermut
atatillugu soorunami immaqa apeqqutit ilarpaalui aamma susassaqarfitsinni
allani kingusinnerusukkut pulaffigisussaavagut tamarsuisa
oqaaseqarfigisinnaan-ngilagut. Soorunami apeqqutit ilai maanngangaaq
naalakkersuisut akissuteqarfigisaasa inerippallaannginnerini, taamatut
oqarsinnaangaanni, oqaaseqarfigisariaqarsoraakka. Ataaseq pingaartumik
eqqarsaatigalugu. Suliffissuit unittoortarnerat, sulisussaaleqisarnerat
eqqartorneqangaatsiarpoq, aamma tupinnanngilaq.
Tassa sinerissami
Avannaaniinnaanngitsoq, Kujataani Qeqqanilu tamanna ajornartorsiut
saqqummertuartarpoq. Aamma upernaaq qinigaanitta kingorna qinersisartunik
aammalu assigiinngitsunik isumasioqatigiissitsisarnerni peqataasarnitsinni
arlaleriarlungu tikinneqartartut ilagaat. Inatsisartullu aalisarnermut
piniarnermut nunalerinermullu ataatsimiititaliaata aamma najuuffigisaat
Qeqertarsuarmi raajarniarneq pillugu isumasioqatigiinneq eqqaassagaanni aamma
kingusinnersukkut Ilulissani aamma aalisartut piniartullu peqatigiiffiinik
ataatsimeeqateqarneq eqqarsaatigigaanni tamanit nalilersoqqittariaqartut
oqaatigineqarput.
Aamma immaqa qularnanngilaq
maani Inuussutissarsiornermi naalakkersuisup qanittukkut 16.
Oktoberiminngaannnik raajarniarneq pillugu isumasioqatigiissitinissaani
taamatut isikkulimmik saqqummiisoqarumaartoq, kisianni oqaatigerusuppara
inatsisartut siulitta aalajangersaat najoqqutaralugit suliffissuaqarneq
maannamut aaqqissuuneqartoq ingerlavoq, aamma soorunami taanna
ataqqisariaqarparput uagut. Kisianni tassa malunnarpoq pissutsit
allanngorarnerat sukkasoorujussuummat sulisoqarniarneq kisiat eqqarsaatiginagu,
kisianni nunap immikkoortuini pisuussutinik uumassusilinnik peqassusaa
eqqarsaatigalugu nalileqqinneqartariaqartoq, nunamuna immikkoortuini sorlerni
suliffissuit suut amigaatigineqartut. Aamma taamatut uumassusilinnik
inuutissarsiutini pisariaqartitat najoqqutaralugit piorsaanerit sumiuku
piorsaavigineqartariaqartut. Piffiit ilaanni pisuussutit arlalippassuit
ataatsikkoortumik aallunniarneqartoq naak immaqa sulisussat
amigaatigineqaraluartut.
Aamma uani oqaatigineqarmat
tassa massakkut periarfissaq aamma sulisoqarnermut tunngasunik eqaatsumik
tikisitsisarsinnaanermut apeqqut, tassa illoqarfimmiit illoqarfimmut, taakkua
kisiisa isumalluutigissallugit naammannavianngillat. Piffissap ilaannaararsua
taamaallaat ajornatorsiut tassuuna millisiartussaavaa, kisianni allamut
nuussingallarniaraanni sulisussanik aamma inissat, meeqqeriveqarnerit
allarpassuillu tamarmik eqqarsaatigineqartussaapput, taamaattumik kaammattuutigerusuppara
uanga naalakkersuisunut aappaagu 2000-imi upernaakkulluunniit sineriatsinni
inuussutissarsiornikkut ineriartorneq tamaat naliliiffigisariaqartoq,
nutsertitsinerit imaluunniit allatut aaqqissuussinerit allannguinerit
annertuumik kingunerisassai pinaveersimatinniarlugit. Aamma naggataatigut
nuannaarutigaara Inuussutissarsiornermut naalakkersuisup akissuteqarnermini
ilaatigut eqqaammagu Ilulissani qaleralinniat immikkut qassusersorlutik
qaleralinniarsinnaanerannut piffissamik sivittuisinnaasoqarneranik eqqarsaatai
malunnarluinnarpoq taakkua ukioq 2000 januarip aallaqqaataani
atorunnaarsitsinissamik eqqarsaatit qeerarniartunit assut apeqquserneqartut,
imaanngitsoq qassusersornermi taamatut atortorissaarutinik atuinermi
inerisaanissaq naleequssaanissarlu piumaneqanngitsut, kisianni tassa
pisariaqavippoq taassuma aaqqinneqarnissaa.
Jørgen Wevær Johansen, Siumup oqaaseqartua:
Tassa Siumut sinnerlugu partiit allat Kattusseqatigiillu, kisiillunilu qinigaasimasup oqaaseqataat naatsunnguamik oqaaseqarfigissuakka. Siullermik isumaqarpunga tamatta Kangerlussuami ataatsimeersuarnermi oqariartuutigineqartoq eqqaamassallugu pitsaasuussasoq, tassa pisariaqartinneqarluinnartut ilaattut taakkartorneqarmat naalakkersuinikkut sulisut siumut isigisut. Tassa siunissaq pillugu suliniuteqarsinnaasut. Tassaapput inuiaqatigiinni pisariaqartinneqartut. Taamaattumik pisimasorpassuit assigiinngitsut equngasut ajunngitsullu tamaasa eqqartorsinnaagaluarlutigit isumaga naapertorlugu sammisatta pingaarnissaat tassaasariaqarpoq qanoriliorluta siunissami pitsaanerusumik aaqqissuussisinnaavugut.
Tassungalu tunngatillugu ukiorpanngulersuni oqaluuseriuarsimavarput Kalaallit Nunaanni inuusuttut ilinniartullu teknikkumut samminersumik ilinniarnertuunngortalersinnaanerat eqqunneqartariaqaraluartoq. Massakkullu isumassarsiaq taanna HTX aqqutigalu Sisimiuni pilersinneqarnissaa sulissutigineqarpoq, kisianni tassani Atassutikkormiut Hr. Otto Steenholdti aqqutigalugu mianersoqqusipput, akerliliinerat taanna uanga paasiuminaatsippara. Inuit taakku kalaallit taamatut ilinniarsimasut pisariaqartippavut, taamaattumik tassuunatigut pitsanngorsaanissat aamma pisariaqartinneqarpoq. Suliffissat 7000-it pillugit Ottop ataasiaannarnani uteqattaarisarnera akisussaaffik allanit tiguneqarumanngippat uanga tigusinnaavara. Kisitsit taanna piviusunik tunngaveqarmat, imaammat ukiut qulit qaangiuppata suliffissaaleqineq nungutivissagutsigu, taava suliffiit pilersitassagut 7000-it missaanniipput. Taamaattumik naalakkersuinikkut suliaqartutut tamatta anguniagaqarutta, uagut Siumumi anguniagaqarpugut, taamaattumik suliffissaaleqinerup nungutinneqarnissaa taanna anguniarparput, sapinngisarpullu naapertorlugu suliffissat taakkua pilersinneqartariaqartut pilersinniarlutigit.
Otto Steenholdtip oqariartuutai allat naalakkersuisuniit akineqareermata sammissanngilakka, kisianni oqaatigerusuppara nuannaarutigalugu maluginiaratsigu angallanneq pillugu Atassutikkormiullu isumaqatigiilluinnaratta. Tassa ilaasunik angallassinermi silaannakkut angallissinerup sallerpaanngortinneqarnissaa pillugu oqariartuutigineqartoq aamma Atassummiit aamma Siumumiit taanna isumaqatigilluinnarparput. Ilumoorpoq marloqiusamik nuna tamakkerlugu ingerlatsineq akissaqartinngilarput, taamaattumik inuiaqatigiinnut pitsaanerpaaq toqqartariaqarparput, taannalu sallerpaatillugu ineriartortitsineq ingerlallugu. IA-kkomiut oqaaseqataannut tunngatillugu ininik attartortitsinermi akit qaffasippallaarnerujussuat pillugu oqariartuutigineqartoq aamma ilumoorpoq, ilumoorsinnaanngilaq inissaaleqineq taama annertutigisumik atornerlunneqarsinnaammat.
Taamaattumik tassuunatigut soqutiginnippugut aamma akit qummut killiliivigineqarnissaannut ujartuinermut peqataassalluta. Aamma ilumoorpoq oqariartuutigineqartoq ilaatigut naalakkersuisut siulittaasuata oqarneratut allanik pisuutitsinerit imminullu nalliginerit peerniarneqartariaqarmata, inuttullu nammineq inuunermi qanoq ingerlaneranut akisussaassuseq qaratsatsinnut ilumut pulasariaqalerpoq. Taanna ilumoorpoq. Maliinannguaq Markussen Mølgård-ip IA sinnerlugu oqaaseqataani uanga amigaatiginerpaasara tassaavoq siunissami angallanneq qanoq aaqqissuussivigineqarnissaa annertunerusumi isummerfigineqanngimmat. Taamaattumik IA-kkormiut tassuunatigut qanoq isumaqarnersut aamma tusassallugu pissanganarpoq.
Kattusseqatigiinniit Diskobugtimi nunap immikkoortuani napparsimmavimmik inissiinissaq pillugu Ilulissat avaqqunneqarsinnaanngitsutut oqaatigineqarpoq, kisianni aamma tassani isumaga naapertorlugu nunarput tamaat ataatsimut eqqarsaatigalugu ineriartortitsineq eqqarsaatigissagutsigu, taava aamma eqqaamaneqartariaqarpoq Ilulissat illoqarfinnit allani Qeqertarsuup tunuani periarfissagissaarnerpaammat, takornariaqartitsinikkut, inuussutissarsiornikkut allatigullu. Taamaattumik aamma tassani isumaqatigiilluta ingerlatseqatigiinnissarput taanna pisariaqarsoraara. Naalakkersuisut nunaqarfiit pillugit oqariartuutaannut tunngatillugu oqaatigerusuppara uanga aamma nunaqarfimmi peroriartorsimagama, taamaattumik isumaqarpunga isertuarnata illoqarfiit nunaqarfiillu imminut akilersinnaanngitsutut oqaatigineqartaraluarpataluunniit oqaatigisariaqarigut. Pissutsit piviusut oqaatigineqartariaqaramik, pissutsit iluarsiivigineqarnissaat orninniassagutsigu.
Otto Steenholdt, Atassutip oqaaseqartua:
Siullermik ajuusaarutiginarluinnarpoq Naalakkersuisut Siulittaasuata oqaasissani allakkamigit pinngitsoorani naalakkersuisut assigiinngitsunut atassuteqarfigisimassavai, oqaasissami tamassa aaqqissuunneranni. Taamaattumik aamma akissuteqaataa tassaasoraara nammineerluni akissutai, naalakkersuinermut ikkussani sinnerlugit, taamaattumik taassuma saniatigut nassuiaanerparujussuit maani piffissaajaataapput, tassa akuersaarneqarsinnaanngitsut. Piffissaajaatissat naalakkersuinermut ilaasortap allaganngorlugit inatsisartunut saqqummiussinnavai pissutsit pissusiviusut aajukua aallaavigalugit nassuiaatigai.
Tamakku inissaqarput maani oqallinnermi tulleriiaarlutik imminnut qaleriiaqattaaginnarneq oqalunnersuat inissaminiinngilaq. Tullianik isumaqarpunga Naalakkersuisut Siulittaasuata isumagisariaqaraa. Partiit oqaasii oqarseqarfiginiaraluartillugit 5 minutsinnaat takuat uannut tunniunneqarput. Oqaaseqarfissakka tassaanerulermata naalakkersuisut siulittaasuata sinnerlugit oqaaseqarnermini oqaaseqaassutai aamma taakkua akineqassappata naalakkersuisut siulittaasuata aamma isumagisassaralua. Piffissaarutilerpunga kiisa. Nuannarilluinnarpaat marloriarlutik Atassutip naalakkersuisooqataasimanerani inuit naalakkersuisooqataasimasut. Pisuutitassamik ujarlerneq erseqqarissoq.
Siullermik atuartitaanermut, tullianik aningaasaqarnermut Tuusikkut tamaani qungujulaannguarlutik oqassapput uagut pisuussutiginngilagut taakkuuku pisuussutaat, Jontaarlu aamma uannut oqarluni eqqaamalluaqqullugit tamakkua. Sunaluunniit naalakkersuisup siulittaasuata akissussaaffigaa, nammineq ministerimi qanoq iliuusiat. Pisuutitsisoqassanngilaq! Taamani Atassut naalakkersuisuutitaqarmat aamma inuk taanna nammineerluni qullersaavoq, ministerimi qanoq iliornerat akisussaaffigalugu. Aamma ullumi taamaappoq. Taammaattumik kukkussutinik taaneqarsinnaasutut tikkuakkat isumaqarpunga pissutissaqanngilluinnaqqissaartut.
Allaat sanaartortitsiniarnermik aningaasanik akuersissutitaqanngitsumik oqalunnerput saassutaraa. Atassutikkununa taanna naalakkersuisuutitaata suliaa. Ila soorluli tassa qullersaqarsiman-ngitsut, statsministeriunngikkuni naalakkersuisut qullersaannik. Taamanikkut maanga saqqummiunneqarmat akuersissutigineqartutut ullumikkut aamma oqaatigineqarmat maani najuuttut akuerisimavaat, nassuiaaneq naalakkersuisuninngaanniit aamma naalakkersuisut siulittaasuata akisussaaffigisaa aallaavigalugu. Pitsaasorisimagunikku inatsisartut akuerilissuk, kisianni ullumikkut takkummat uagullu oqaatsivut najoqqutaralugit oqartariaqarpugut, qallunaatuuinassagaanni, misinformation.
Taamatut naalakkersuinermi eqqunngitsumiktunngaveqarluni inatsisartunik akuerisitsisimaneq tassaavoq naalakkersuisuni qullersaasoq kukkussutaasa annersarisinnaasaat. Eqqunngitsumik akuerisitsisimaneq, Atassutikkulluunniit taamanikkut naalakkersuisuutitaata taanna maanga nerliussimappagu ittuata oqarfigisimasariaqarluarpaa, hov aqqutissaq uniorlugu iliortoqassanngilaq, uanga akissussaaffiga taamatut tunngavilerlugu inatsisarntunut tunniunneqassanngilaq. Taanna eqqaamalluinnaqqissaartariaqarpoq naalakkersueriaatsikut aqqutissat pitsaasut atortariaqakkagut taamatut ingerlatittuassagutsigit.
Suli qiviannginnamma
ingerlaqqilaarallarlanga.
Aamma soorlu Mikael Petersen-ip
mittarfittaartut pilluaqquai, isumaqarluinnaraluarama angallannermut
naalakkersuisup tamakku isumagissagai, soormi tulliani takkutileriallarami
aappa ingakkaluarujoq aamma taamatut qujassuteqarniarluni.
Makkua tikitassaraluagut,
ajoraluaqaaq piffissaaruffigaavut. Oqarfigiinnartariaqarpavut assut uanga
IA-kut saqqummiussaat nuannaraara, saniatigut titartartaarpakka
isumaqatiginarluinnartunik saqqummiussallit, taanna siullermeerluta taamatut
nalilinngilarput, nuannaarutigisaannarpakka IA-kunninngaanniit qeqqata
tungaanut nooriamisaarnerit, allaat massakkut illut namminersortunut
pisiarineqarnissaat nuannaarlutik saqqummiussinnaanngormassuk,
taamaatoqanngisaannarniartoq alloriarneq taamak pitsaatigisoq
qujassutigisariaqarparput. Sumilluunnit siunnersuuteqarutta
nipangersitsiniutaasutullusooq naalakkersuisut oqartarput, akissaqartippisiuk?
ullumikkut akissutissarput aajuna, kukkuallannerinnannguanik taasasi 70
milliuuninik naleqartartillugit, taakuninngaluunnit siunnersuutigut
aningaasalersorneqarsinnaapput.
Lars Karl Jensen, ataatsimiinnermik aqutsisoq:
Assortuutoqaqqunagu
eqqaasitsissutigissavara kalaallit nunaani inatsisartut suleriaasissaat pillugu
3. Juni 1993-mi, taavalu aamma 13. Maj 1996-mi kiisalu kingusinnerusukkut 1.
November 1996-mi ilassutaasut najoqqutaralugit piffissat oqaluttuuffisat
aalajangersareernikuummata, taakulu inatsisartut akuerisarimmatigit
malittariaqaratsigit.
Anthon Frederiksen, Kattusseqatigiit:
Nuannaarunnaassanginnatta,
nuannaaruteqarpunga aamma uanga naalakkersuisut akissuteqaataassa ilaannut,
minnerunngitsumik aalisarnermut naalakkersuisup akissuteqataanut, tassa
paasinarmat aalisarnermik inuutissarsiuteqartut tikillugit isumasiorlugit
aamalu taakkua isumaat tusaaniarlugu, isummaminnik allanngortitsisinnaanertik
aamma nalilersorniarsimammassuk, isumaqarpunga aalisarnermut
inuutissarsiornermullu naalakkersuisoq kusanartumik takutitsisoq,
eqqsarsariaqikkumalluni nalunaarmat.
Taava ukiut 20-it qaangiunnerat
aamma isumaqarpunga eqqaalaartariaqartoq, naak ilaasa kingumut qiviarneq
nuannarivallaarunanngikkaluaraat, unaana eqqumiigilaaginnarlugu, tassunga
tunngatillugu ukiormanna namminersornerulernermiit ukiut 20-inngornerat
annerusumik malunnartinniarneqanngimmat, kisiannili aappagu qallunaatsiaat
nunatsinniissimanerantk ukiut 1000-inngortorsiornerat ilumut soorlu aatsaat
tassa nalliuttorsiorfissatut isigineqalersimasoq, taakutia
pakatsissutigilaarpara, uanga eqqarsaatigalugu, eqqarsaraluarama immaqa ukiut
20-inngortorsiorneq taanna pingaarnerutillugu nalliuttorsiorneqarsimappat
tulluunerussaagaluartoq, kisianni tassa taamaaniarli taamaattussaasimavoq.
Ilisimasat ilisimatusarnermilu
katersuinissamut tunngasut, eqiterinissamut tunngasut aamma siusinnerusukkut
maani oqallinnerit ingerlattarsimavagut, minnerunngitsumik ilisimatusarfinnut
tungatillugu aamma maani oqaluttarfimmiik oqaatigineqarsimavoq, ilaatigut
Qeqertarsuarmi angakkussarfiup atorneqarsinnaanera ilisimatusarnermut
tunngatillugu aamma iluatinnateqarmat, tassa nalunngilarput siusinnerusukkulli
aamma uagut siulitta maani inatsisartuni ilaasortaasarsimasut arlaleriarlutik
oqallisigisarsimavaat eqiterineq, aammalu qeqqaniik aalajangiisarneq taanna
qimakkiartuaarneqassasoq, isumaqarpunga eqqarsaatigeqqittariaqartoq aamma
pissutsit taamaattut.
Akeqanngitsumik
telefon-qartitaanerput ataatsimiinnitta nalaani nuanneqaaq aamma qujanaqaaq,
pisariaqarpoq, inatsisartut tamarmik, kisianni uanga apeqqusiininnut pissutaavoq,
ilumut naalakkersuisut naalakkersuisuunertik pissutigalugu ukiut tamaat
taamatut akeqanngitsumik, immaqa taanna isaasalerlugu tulluunerussagaluarpoq
akileraarutitigut isertitaminnut ilaasa nalunaarutigisarsimasuuppassuk, taanna
apeqqutaavoq aammalu ataasiakkaat taanna eqqarsaatigisariaqaraat,
tusagassiuutitigut annertuumik eqqartorneqareernikuuvoq. Biilinullu tunngasut,
taakua eqqaavakka minnerunngitsumik eqqarsaatigalugu inuiaqatigiit aammalu
inuiaqatigiinni qinikkat imminnut aningaasarsiornikkut atukkatigullu
avissaangavallaarnerat millisikkiartornissaat taanna eqqarsaatiginerullugu,
taamaattumik inatsisartut massakkut atugaat aammalu
akileraarutaassussaanngitsunik isertitaqartarnerat taanna
pisuutitsinianngikkaluarlunga uagut sioqqulluta aalajangersarneqarsimavoq,
qanga pisimasuunerpoq, kisanni tassa isumaqarpunga aningaasarsiaqarnermut
tunngasut sammineqalerpata aamma tamakkua uterfigeqqinneqartariaqartut, uani
uanga isumaqannginnama qinigaasimagaanni taava inuiaqatigiit allat atugaannik
pitsaanerusumik inissisimasariaqartugut, taanna uterfigineqarnissaa
pissangalluta utaqqissavarput.
Kiisalu Royal Greenland-mut
tunngatillugu nuannaarutigaara aalisarnermut naalakkersuisup tamanna pillugu
kingusinnerusukkut nalunaaruteqarumaarluni oqaaseqarmat.
Ruth Heilmann, Siumut:
Uanga
erseqqissaateqarfigerusullugu una Atassumminngaannit oqaatigineqartoq
suliffissat 7000-it naak siumumi pilersinneqarsinnaasimanngitsut, isumaqarpunga
Jørgen Wæver Johansen, siumuminngaanniit oqaluttuusup ilumoortumik oqaatigigaa,
taanna akisussaaffittut uagut siumumiit tigummivarput aammalu tigummerusullugu.
Ikioqatigiikkutta aamma ikioqatigiissinnaagutta isumaqarpunga ajornanngitsumik
suliffiit taakku pilersissinnaagigut, tassami uani ilaatigut oqartoqarmat aamma
Sisimiuni immaqa allaat suliffissaaleqineq ima annikillisimatigisoq 100-t
immaqa palliinnarlugit taamaallaat sulifissaaleqisoqartoq, naak ukiuni
siusinnerusuni amerlasoorujussuit suliffissaaleqigaluartut, aammalu Ilulissani
oqarput suliffissaaleqisoqanngitsoq, allaat suliffissaaleqisunik illoqarfinnit
allaninngaanniit pissarsiniartarlutik, taamaattumik erseqqissumik isumaqarpunga
misissorneqartariaqartoq suliffissaaleqisunuku qaaserpiaanersut, imaluunniit
suliffinnik ataavartunik pilersitsinerit qanoq amerlatigisut ukiuni taakkunani
pilersissimanerigut, isumaqarpunga suliffeqarnermut naalakkersuisup
saqqummiukkumaarai.
Uanga pingaarteqaara
takornariaqarneq inuutissarsiutini pingaaruteqartuni sukat pingajuattut
inissinneqarsimanera, tassunga tunngatillugu sinerissatsinni aalisarnikkut
kinguariarfiusut pingaartumik aamma nunaqarfinni illoqarfinnilu
takornariaqartitsinermi ineriartortitsinermik pilersitsivigineqarnissaat,
taasuunakkut isumaqarpunga peqataatinneqarunik aamma Greenland Tourism-mimit
siunnersorneqarunik nunaqarfiit inuutissarsiummik taamaattumik
ingerlataqalerunik aamma nunaqarfimmiut nammineq peqataanerisigut
annertoorujussuarmik takornariaqarnikkut siuarsaaneq ingerlanneqarsinnaasoq,
tassunakkullu aamma nunaqarfiit ikiliartornerat allaat unitsinneqarsinnaalluni.
Tassani
pingaaruteqartorujussuuvoq angallannikkut aamma aaqqiissuteqarnissarput,
taamaattumik uani mittarfiliortiternermi killifigisavut maannakkut
ajornartorsiutaasut isigineqartut, isumaqarpunga imminnut akilersinnaassappata
mittarfiit, imminnut akilersinnaassapput mittarfiliortiterutta, taamaattumik
maannamut amigartumik aaqqiiniarnertut uanga isumaqatiginngilara, tassami uani
kissaatitut pingaarutilinnut ilaapput sinerissami angallanerup
aaqqinneqarnissaa, taannalu akissaaleqissunneqarpat siumumi oqaaseqartartutta
isumaqarpunga torrallallugu oqaatigigaa, tassani aningaasat
pissarsiarineqarsinnaapput, taakulu sulisikkutisigit aamma kingunerissavaat
innuttagut aammalu suliffissanik pilersittissagatta tassanilu aamma
pisuunnguallassaaq nunarput pingitsoorani, taamaattumik uani suliffissanik
pilersitsinissaq pingaarteqaarput, tassanilu Sulisap aamma ingerlalluarnera
uani nassuerutigineqartoq isumaqarpunga eqqarsaatigalugu Sulisap suliniarnera
tapersersornerusariaqaripput.
Hans Enoksen, Siumut:
Tassaana isuginninneq eqqarsaatigalugu sulerusussutsip annertusarneqarnissaa isumaqarama killup tungaanut ingerlanneqartoq, assersuutiginnarlugu akissarsianik killelersuisoqartarpoq, oqarfigineqartarput innuttaasut 128.000 tikillugu inorlugu aningaasarsiaqaruit ineqarnermut tapissavatsigit, taava tamakku pissutigalugit ilaatigut sulerusukkaluartut uniinnartarput, ajunngitsorsiassaq taanna perusukkaluarlugu, allanngortinneqartariaqarput tamakku aningaasarsianik killilersuinerit. Imatut aaqqiisoqarsinnaasariaqarpoq, akissarsiassatit ima amerlatigisut angugukkit, oqarutta soorlu minnerpaamik 170.000-it aatsaat angugukkit pisortaninngaannit ajunngitsumik pineqarsinnaassaatit, taava taamaalippat inuit sulerusuttut amerlissapput, pisortanit ikiorserneqarnissaq utaqqiunnaarlugu misigisimalissagamik, aatsaat taanna anguniagaq angugukku uanga pisortaninngaanniit ikiorserneqarsinnaanngussaanga, taamalippat aatsaat uanga suliartorsinnaanngussaanga piumassuseqarlunga, pissutigalugu uannut taamaaliornikkut ikiussagama.
Inuusuttut sullivii eqqartorneqartut ajunngeqaat, kisiani aaqqissorneqarnerat aamma allanngortinneqartariaqarpoq. Kommuunit iluani piorsaanissamut periarfissat pitsassuugaluartut, unammilleqqusaannginneq peqqutigiinnarlugu illatigut naammasineqartartut inuiaqatigiinnut akisoorujussuusarput, pisutigalugu unammilertoqartussaanngimmat, namminersortunut suliassaq tunniunneqartarpoq, akillu pavungarujussuaq inissineqartarlutik, uffa inuusuttut sullivianni aamma taaku sulisinnaasutsiarsuit atorsinnaagaluarigut akinik appasinnerungaatunik.
Taavalu taasuma saniatigut Nuka A/S eqqarsaatigalugu illoqarfinni qeeqqat, eqaluit, nataarnat, saarulliit tunineqarsinnaanngillat uffalu aamma taakkunani umiatsiaarassortorpassuit inissisimagaluartut, taanna sukkasuumik allanngortinneqartariaqarpoq, aammalu assersuutigiinnarlugu, ilaatigut uanga imatut paasisarpara pisinaveersaartitsisoqartartoq nunaqarfinni, soorlu uanga nammineerlunga aalisakkerivimmut takkuppunga oqarlunga eqalunnik marlunnik pisiniarpunga, aap pisisinnaavutit kisianni minnerpaamik 150 koruuninik atsaat akiliiguit, soorunami ingerlaannaq qimappara, pissutigalug taama amerlatigisunik eqalussinaviannginnama igaasagassatsinnik. Eqaluit tuniniarneqartussat aalajangiiffigineqarput minnerpaamik 1 kg-luussapput, taava taamalimmat soorunami tunineqarsinnaasut ikittuaraarakasinngorput, soorlulimi tassa tinisinaveersaartitsillutillu pisinaveersaartitsisut, taamatut misigisimanartarpoq massakkut nunaqrfinni najugarluni. Selskab-it ineriartortitsinerat ajunngeqaaq, kisianni amerlavallaaqaat pisariaqanngitsumik aporfilersuisarnerit, tassani eqqaaginnarsinnaavagut Nuka A/S-ip, Royal Greenland-ip, KNI-p pilersuisup pisiffiullu akornanni pissutsit, erloqinartumik ilaatigut atuutinneqartartut, assersuutigiinnarlugu Nuka A/S-i karsinik attartorsinnaatitaanngilaq Royal Greenland-minngaanniit, uffalu tamarmik inuiaqatigiit suliffeqarfiutigigaluaraat.
Soorlu tamakku pissutsit ilungersunartut naalakkersuinikkut sukkasuumik aaqqinneqartariaqarput, aamma nuannaraara aningaasaqarnermut naalakkersuisoq oqarmat siutitik ammatillugit,
kisianni oqarfigisariaqarpakka tutsrinnerusariaqarpusi, pissutsit sukumiisumik aaqqinneqarnissaannut.
Gudmand Rasmussen, Atassut:
Isummannut
uniuutinngitsuunngilara Nnaalakkersuisut Siulittaasuata ammanermi oqaaseqaa-
taa, uanga isumaqaraluarama taanna ileqquliutiinnarsimasarsi immaqa
kusagisarsi, kisianni isumaqarpunga immikkut oqaallisigissallugu
pisariaqanngikkaluartoq, isumaqavippunga uani taakartorneqartut
ataatsimiinnitsinni tikikkiartuaagassagut arlaqarput aalajangiiffigisassat,
taanna nassuerutigisariaqarparput, inissami allami atugassaraluarput tassunga
atorparput, taava aallartereeratta aallartilluaannarniarta.
Naalakkersuisut siulittaasuata
ammanermini oqaaseqaammini, soorlu oqaatigineqartoq oqaaqqissaarerpaluttumik
oqaaseqartoq aamma ajunngilaq, kisianni maqaasigisara uaniippoq, IA-p
qujanartumik attutsiagaa, tassa ikiaroornartoq, ullumikkut Kalaallit Nunaani
inuusttagut napparsimapput ikiaroornartumik, IA-p oqaaseqarnermini oqaaseq
atorpaa inuit sanngiiitsut allatigullu taanna atoraat, taava Kalaallit Nunanni
inuusuttagut tamangajammik sanngitsuungorsimassapput, ammasumik taanna
nioqqutaavoq, inuiaqatigiit tamatta qanoq iliuuseqarfiginiartigu, avataani
pisussat tassani isumalluaatigivallaarnagit, immitsinnut piumaffigaluta
ikorfartoqatigiilluta taanna sorsuutiginiartigu, inuusuttorpassuit
annaassanngikkutsigik.
Aamma oqaaseqarnermi tassani
oqaatigineqarpoq suliffisaqarniarneq ilaatigut ilinniartitaaneq aamma
eqqaaneqarluni, ukiut 20 kuseriarnertut nalilerneqarput. Qanitsuararsuarmi
Qanoruumi takuarput dirtektøri nammineq qullersaat oqaaseqartoq,
namminersornerullutik oqartussat nammineq allffeqarfianni kalaalinngorsaaneq
tassaasoq ajornartorsiutit annerpaartarisimasaat, uanga taanna upperinngilara,
nassuerutigisariaqarparput ukiut 20it kina inuk qaqisinngitsoornikuua,
pisussaaffik iluamik atorneqarsimanngilaq, ukiut nutaami massakkut
alloriarnermi tamakku eqqumaffigisariaqalerpavut. Inuit kalaallit
sulisinngitsunik oqaluttut immaqa soorlu assersuutigiinnarlugu eqiasuttunik
allatulluunniit oqaluttoqarpoq, taamaanngilaq.
Assersuutissaqarpunga, kalaallit
skipper-it ullumikkut 1500-t sinnerlugit allagartaqarput kalaallit, kalaallit
nunaannaanni, kisianni atorneqartuni qassiuvugut. Allaffimmiut qassit ilinniarsimasut
nunatsinni ullumikkut atungilagut, kalaallinik kaamattuinngippallaarnerput
qaangertariaqalerparput. Inuk tatigineqarluni paasigaangami
tinnersarneqarnermini pimassusia sakkortortarpoq, inuinuku taqitsiinnakkagut
amerlavallaalersut, taanna peertariaqarparput, kalaalinngorsaanerup aqqani
iluamik atussagutsigu.
Atsaannguaq oqallinermi iluamik
ersersinneqarpoq disko, uanga oqartariaqarpunga naatsunnguamik, upernaaq
oqaluttarfimmut qaqeqqaarama oqarpunga inuit ataqqisarivakka kukkunerminnik
nassuerutiginnittartut. 33 milliuunit aningaasarpasuupput, immaqa qangali
issiasuusimasut aamma tassani pilersitseqataasimasut nassuerutigisariaqagaat
aana, kukkusimavugut ersarissumik immaqaluunnit taamanikkut
naalakkersuisuusimasut akuliarmissimavai ajortortai, aamma ilimanarpoq
akuliarmissimasinnagai.
Uani siumut oqaaseqartuata
eqqaavaa, TV aamma lokalradio-t tassani assorsuaq isumaqigivakkit, aamma taanna
oqallisissiaq uanga ingerlatereerpara, isumarpunga pimoorullugu taanna
oqallisigisariaqaripput. Kisianni aatsaannguaq siumup oqaaseqartuanut
ataatsimik akissuteqalaarniarpunga aamma, Ruth Heilmann-i aatsaannguaq oqarpoq,
suliffissanik pilersitsiniarneq pingaartitaraara. Uanga isumaqarpunga taanna
eqqortuunngitsoq, suliffissanik pingaartitsigaanni suliffissat ataavartut
pilersinneqarniarneri tapersersugassaapput, puigunngilara upernaaq taxa-tillit
pillugit saqqummiusininni qanoq pisoqarpa, tapersersuinngilatit.
Taava una aamma naalakkersuisut
siulittaasuata oqaaseq atugaa, katuaq, isumaqatigilluinnarpara allamut pinitsinni
silaannaq tassani allannguallattarmat, kisianni katuap pilersinneqarniarneranni
tunngavik ullumikkut aamma salloqittaataavoq. Aningaasanik assigiingitsunik
agguataarinikkut aningaasalersorneqarsimavoq, imatut oqarfigineqarpugut,
pissutsit Nuummiittut usgut avataaniittugut aamma isiginnaartassagigut,
kisianni susoqanngilaq, katuaq Nuummiuinnarnut atorpallaaqaaq.
Maliinannguaq M.
Mølgaard, Inuit
ataqatigiit:
Uani siumup oqaaseqartuata
angallannermut tunngasut eqqaannginnatsigit, ujartormagu, tassa soorunami
angallannermut tunngsunik aamma eqqarsaatersuutigaavut, aammalu
aningaasaqarnermut inatsisissap eqqartornerani iserfigisussaavarput, aamma
iserfiginngitsuukkagut arlaqarput, ilaatigut avatangiisinut eqqakkanut
tunngasut, kisianni oqaatigissavara tassa, silaannakkut angallannermut
tunngasut taakku eqqartorneqarmata, silaannakkut angallanneq kisiivimmi
isumalluutigineqartussatut siunissami nalilersorneqassappat Inuit
ataqatigiinninngaanniit pingaartipparput, misissorluarneqassasoq, ingammik
aasaanerani umiarsuatsigut angallanneq, utaqqisorpassuit ima
ulikkaaqqatigisarpoq allaat ilarpassui ilaanngitsoortarlutik, tassanilu ilumut
silaannakkut angallatitsinerup pisariaqartitai tamakkersinnaanerai,
isumaqarpunga tamatumani aamma misissuiffigineqaqqaartariaqartoq,
erseqqissumik. Taamaattumik inuit ataqatigiinninngaanniit taanna
pingaartipparput, taamatut aalajangiiniaraanni kingunissai aammalu
angallannerup ingerlariaasia iluamik misissorneqartariaqartoq.
Paamiuni mittarfissamut
tunngatillugu kinguartitsiniarnermut atasumik oqariartuutigissavarput aamma
ilaatigut uagut inuit ataqatigiinninngaanniit pingaartikkatsigu
misissorneqassasoq, aningaasat suminngaanniit pissarsiarineqarsinnaanersut,
tamatumap kinguartinnginnissaa anguniarlugu, tassami angallanikkut maani aamma
oqariartuutit ilagivaat, taamatut pilersaaruteqarnerup
oqariartuutigineqarnerani, kinguartiteriniarutta aamma illua-tungani
naleqartussaavoq aningaasanik, taamaattumik inuit ataqatigiinninngaanniit
aningaasatigut inatsip oqallisiginerani saqqummiunneqartussaavoq ilanngullugu
misissugassanngorlugu.
Siumup oqaaseqartua
isumaqatigilluinnarparput NATO-mut tunngatillugu ilaatigut, Savalimmiut
misissueqqusinerat qallunaat naalagaafiata qanoq amerika-miunik
sakkutooqartitsineratunngatillugu pissarsisarnera, imaluunnit akiliisarnera
tunngasut taakkua misissorneqarnissaanut tunngasut isumaqatigilluinnaratsigit
inuit ataqatigiinninngaannit oqaatigissavarput.
Illoqarfinni
sulisussaaleqiffiusuni aamma inissaaleqineq annertoqimmat, qanorluunnit inissat
amerlasuut suliaritigigaluaraanni, imaaliallaannaq tamarmik allanik
inissaaleqisunik ulikkaarneqareertussaammata taamaattumik
nalilersuillaqqunarput nalilersuisussat ilumut taamatut sulisussaaqiffiusuni
suliffissuit ilaasa inissaaleqiffiunngitsuni aammalu sulisussaaleqiffiunngitsuni
nuutissinnaaneri akilersinnaanginnerunersut inuiaqatigiinni.
Olga Poulsen, Inuit ataqatigiit:
Ilinniartitaanermut
naalakkersuisup oqaseqarnermini pingasuinnik oqaaseqarnissamik pingaartitsinera
taanna soorunami aamma inuit ataqatigiinninngaanniit tapersersorparput,
kisiannili aamma tikkuarlugu sakkortuumik uagut oqaatitta nammineq
mianerineqarluinnarnissaat, tassungalu atatillugu kalaallisut ilinniutit meqqat
atuarfianni ingerlatinneqartartut qanoq annertutiginerat iluamik immaqa taanna
misissullaqqunarpoq, arlaatigut qanoq isillugu paaserusunnarpoq meeqqat
atuarfianut ilinniutit nassiunneqartartut, qanoq annertutigisut
kalaallisuujuppat, bibiliotikkini atuarfinni assigiinngitsuni kalaallisut
atuakkat qanoq annertutigippat ,atuakkiorfimminngaanniit inuiaqatigiinnit
ingerlateqqinneqartartut kalaallisut atuakkiat qanoq annertutigippat, taavalu
tassunga atatillugu soorlu nunatsinni atuakkiortut tapersersorneqarnerunissaat
taamaalilluta aamma uagut oqaatitsinnik annertunerusumik siarmassaanissamut
aamma taakua atorsinnaagatsigik.
Otto Steenholdt-ip inuit
ataqatigiit ima oqarfigai, immaa talerpimmut saakiartuinnartugut oqaratta inuit
illunik pisisinnaanissaannut tunngasunik, isumaqarpunga taanna taamatut
taaneqarsinnaangitsoq, kisiannili inuit ataqatigiit nalilersuisinnaanerat
tassani isumaqarpunga ersertoq, ukiuni kingullerni inuiaqatigiit ingerlaneranni
nalilersuisinnaanngorsimavut aamma taanna pisariaqalersimasoq ullumikkut
inuiaqatigiinni, pisinnaasorpassuaqarpoq, taamaattumik ukua aamma pisinnaasut
atortariaqarpagut.
Isiginnaartitsinermut
inatsisip qangarsuarli isiginnaartitsisartut kissaatigivaat taanna inatsit
atulersinneqarnissaa ammalu isumaqarpunga Nuummi inissinngikkaluarlugu
nunatsinni arlaanni taanna isiginnaartitsinermut ilinniarfik
pilersinneqarsinnaasoq. Guulumaat isumaqatigivara katuaq
nuumiunuinnaavallaartoq, uagut nammineq isiginnaartitsinermi pilersisinnaasavut
katuami annertunerusumik katuami atorneqartariaqarput.
Vittus Mikaelsen, Atassut:
Maani oqallinnermi naalakkersuisut siulittaasuata oqaaseqaataani atatillugu oqallinnermi maluginiagara isumaqarpunga ammaatilaartariaqartut, maani isersimasuusugut tamatta kissaatigivarput meqqatta pitsaanerpaamik ilinniartitaanissaat aallaaqqaataaninngaanniit, kisianni maani oqallinnermi isorliunerusut nunaqarfiit ataatsimilluunniit eqqaaneqangillat ilinniartitsisussaaleqinerujussuannik, taanna uanga ajuusaarutigaara, assersuutigalgu taasinnaavara nalunngisakka, sineriammi tamaat angalaartuartuunnginnama, Ammassallup kommuunia qiviarukku, Ammasallup kommuuniani nunaqarfeqarpugut tallimanik. 1990-ip aallartinneraninngaannit nunaqarfiit pingasut ilinniarsimasumik ataatsimilluunniit ilinniartitsisoqanngillat, taamaattumik takorloorsinnaavarput aamma taakku angajoqqaat uattutuulli ilissitulli meqqanik ilinniarsimasumik ilinniartitsisoqarnissaat pisariaqaritkkaluaraat, taamaattumik isumaqarpunga taanna isorliunerusunik ullumikkut ingerlatsineq sukumiisumik misissuiffigineqartariaqartoq, maannakkut maanngaanniit oqaluppugut qasseeriarluni oqaluttoqarpoq nunatta siunissai pisuussutivut tassaapput meeqqat, sooq taakkua qulaaninngaanniit taamatut inissisimasuulluta isiginnitsuusaaginnassavagut aamma angajoqqaanik taamaattunik pisariaqartitsisoqartoq, isumaqarpunga taanna itinerusumik misissuiffigineqartariaqartoq, isorliunerusut eqqarsaatigalugit.
Ruth Heilmann, Siumut:
Aatsaannguanguna Guulumaap
uparuaanera paatsungassutigilaaraluarlugu uku taxa-tillit
akileraasunerneqarnissaat pigunarmagu, tassani imatut eqqaamavara
isumaqatigiittoqarnikuusoq, tassa naalakkersuisut ataqqivagut imatut oqarmata
taxa-tillit akornanni oqaloqatigiinneq aallartereersimasoq taamaattumik
kingusinnerusukkut saqqummiinissaat taanna inatsisartuni
neriuutigilluinnarparput aamma pissasoq, uani uparuaaniutitut suliffissanik
pilersitsiniarnerani akerliliisimasunga imaluunnit tapersersuisimannginnera
taanna uanga ataatsimilluunniit pinngimmat, tassa uanga suliffissanik
pilersitsiniarneq sutigut tamatigut tapersersorpara , uani oqaatigivara takornariaqarneq
uani annerusumik eqqartorneqanngimmat, taanna pingaaruteqartutut
siumaqarfigigiga, soorlu aamma ilaatigut kattusseqatigiinninngaanniit
oqaatigineqarmat una Leif-ip iluanaarajuup ukiut 1000-inngornerat
nalliuttorsiutigineqarnissaa, taanna soorlu tapersersunngitsutut illugu
isumaqarpunga tapersersortariaqartoq, tassani aningaasat annertuut atorlugit
kujataani takornariaqartitsineq annertusarniarlugu taamatut iliortoqarpoq,
siumut isigaluni, tassaammata avataaninngaannit tikittussat alakkaasartussat kujataanut
takornariarpassuit taamatut takorloorlugu pilersaarusiorneqarpoq, taamaattumik
immitsinnut naalleqattaassagutta ikioqatigiinnatalu isumaqarpunga
qineqqusaarnitsinni naapertuutinngitsumik angusaqassasugut,
ikioqatigiittariaqarpugut suliffissanik pilersitsiniarnluta , aamma uani
oqaatigineqartut arlallit siunnersuutitsialassuupput, element-iliornissat
arlaatigut tapersersorneqarnissaat TV-kut oqartaqartaarput nunatsinni
pilersitavut tapersersortariaqarivut, aamma igalaaliorfittut massakkut aallartittut
oqaatigineqarsinnaapput aamma inimit tapersersorneqartartut.
Arlaqarput, ikioqatigiikkutalu
isumaqarpunga tamakku anguneqarsinnaasut, aamma iluatsillugu oqaatigerusuppara
uani Atassutip oqaatigisaani aatsitassarsiorneq pillugu nuanniitsumik uani
allakkat tigumminngikkaluarpakka, kisianni utaqqikatattutut ittumik
oqaaseqarnera taanna uanga illua-tungilerusuppara, tassani pingaaruteqarpoq
politikeriussagaanni aamma pingaartumik Ortu eqqarsaatigalugu aamma nanmmineq
ukiorpassuarni polikkeriuvutit aamma nikallujaatsuunissaq aamma pisariaqarpoq,
taamaattumik aatsitassarsiornikkut ussassaarineq imaluunniit takoqqusaarineq
taanna qatsunneqartariaqanngilaq, tassaavoq pilerilersitsiniarneq inuit aamma
nunatsinniittut aatsitassarsiornermi peqataanerulernissaat, ilinniartitaanerulernissaat,
ingeniør-inngorusussuseqalernissaat allatigullu inuusuttut pilerisaarlugit
aamma uuliasiornermik qaqugu peqataalerumaarnissaannik taamaattumik
paasititsiniaaneq annertooq ingerlanneqartussaq neriuppunga aamma Atassutip
tungaaninngaanniit peqataaffigineqarumaartoq.
Oqaluuserisaq
naammassivoq.