Oqaluuserisassani immikkoortoq 03 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataasinngorneq 1. november 1999
nal. 16.35
Ataatsimiinnermik
aqutsisoq, Johan Lund Olsen, Inatsisartut Siulittaasuat:
Tassunga atatillugu
saqqummiussassaqarpugut Siulittaasoqarfimminngaanniit, taanna uanngaanniit
saqqummiutilaassavara. Tassa naatsunnguuvoq aamma ilisimatitsissutigissavara
taanna agguaanneqareernikuummat.
Tassa Siulittaasoqarfiup
eqqartoreerlugu inassutigissavaa ukiumi 2000-ip affaani siullermi Inatsisartut
marloriarlutik ataatsimiissasut, ataatsimiinnerlu siulleq aallartissasoq
ataasinngornermi februarip 14-iani aappaalu pingasunngornermi aprilip 26-ani,
tassa poorskip kingunitsianngua.
Tamanna qanormita
oqaaseqarfigineqarumanerluni?
Anthon Frederiksen, Kattusseqatigiit oqaaseqartuat.
Tullianik ataatsimiinnissamut tunngasut
Siulittaasoqarfimminngaanniit inassutigineqartut Kattusseqatigiinninngaanniit
akuersaarpagut.
Per Berthelsen, Siumup oqaaseqartua:
Siumup tungaaninngaanniit
nuannaarutigaarput ujartugarput maanna ersarissumik angujartorneqarmat, tassalu
Inatsisartuni sulinitta illersoruminarnerusumik tunngaveqartumik
ingerlanneqarsinnaanissaa, taamaalilluta sullissassagut nunatsinni
innuttaaqatigut toqqissisimanarnerusumik tunulequtaqartumik sullissinnaanissaat
tikittussanngussagatsigu ukiumut pingasoriarluta ataatsimiittussanngornikkut
ukiumi 2000-imi aallartittumik.
Taamatut Siumup gruppia
sinnerlugu oqaaseqatsiarlunga, tassa Siulittaasoqarfimminngaanniit
ataatsimiinnissatut ulluliunneqartut akuersaarnerat nalunaarutigissavara.
Siverth K. Heilmann, Atassutip oqaaseqartua:
Atassutip gruppianinngaanniit
aamma siusinnerusukkut ataatsimiittarnissat ukiumut pingasoriarlutik
pisartussat isummersoreerluta pingaartissimavarput pingasoriartarnissarput,
taavalu aamma Siulittaasoqarfiup inassutigisai 14. februar aammalu 26. april
pisussat taakkua inassutigineqartut akuersissutiginiarpagut.
Paninnguaq Olsen, Inuit Ataqatigiit oqaaseqartuat:
Aap, Inatsisartut
Allattoqarfianinngaanniit ukioq 2000-imi Inatsisartut siullermeerlutik
ataatsimiinnissaat 14. februariminngaanniit aappaattullu aprilip
26-aninngaanniit innersuussutigineqartut Inuit Ataqatigiit aamma uagut
akuersaaqaataaffigissavagut.
Johan Lund Olsen, Inatsisartut Siulittaasuat:
Tassa erseqqarippoq, tassa Inatsisartut
ukioq 2000-imi tassa upernaakkut upernariartulerneranilu marloriarlutik
ataatsimiittussanngorput, tassa siullermik ataatsimiinneq aallartissaaq
ataasinngornermi februarip 14-ianni taavalu aappaa pingasunngornikkut 26.
aprilimiit aallartilluni, tassa poorskip kingunitsianngua.
Tassalu taamaalilluta ukioq
2000-imi Inatsisartut upernaakkut ataatsimiiffissaat taamaalillutik
aalajangiiffigineqarput.
Oqaluuserisaq naammassivoq.