Oqaluuserisassani immikkoortoq 16-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Pingasunngorneq 20. oktober 1999 nal. 19.30
Ataatsimiinnermik
aqutsisoq, Inatsisartut
Siulittaasuat Johan Lund Olsen:
Tassani
isumaliutissuussiortoqareerpoq, tassa Inatsisit Atortinneqarnerannut
Ataatsimiititaliap Isumaliutissiissummik saqqummiusseqqaassammat.
Ataatsimiititaliap siulittaasua.
Anders Andreassen, Inatsisit Atortinneqarnerannut
Ataatsimiititaliap Siulittaasua, Siumut:
Inatsisartut Inatsisit
Atortinneqarneranut Ataatsimiititaliaanit Isumaliutissiissut
saqqummiutissavara.
Saqqummiutsinnagu
siulittaasoq qinnuvigissavara agguaanneqareermat aammalu takkajaalaarluni
Isumaliuttissiissut. Ataatsimiititaliap Inassuteqaataa taanna aallaavigalugu
saqqummiunniarlugu, qujanaq.
Inatsisip
Atortinneqarneranut Ataatsimiititaliap Inassuteqaataa. Inatsisit
Atortinneqarneranut Ataatsimiititaliaq suliarinninnini tunngavigalugit,
imaattunik inassuteqassaaq.
Inatsisissatut
siunnersuutit kingunerisaanik aningaasaleeriaaseq atuuttoq ukiumut ilassutitut
aningaasaliissutinut inatsisini marlunnik imalik atorunnaarsinnaqassaaq.
Tamatumunnga peqatigitillugu Aningaasaqarnermut Ataatsimiititaliap
aningaasaliissuteqarsinnaanermut oqartussaanera ukioq tamaat ingerlasussanngorlugu
sivitsorniarneqarpoq, taamaalilluni Aningaasaqarnermut Ataatsimiititaliap
aammattaaq Inatsisartut Ataatsimiinnerata nalaani aningaasartuutissat
pisariaqartut sillimaffigeriinngisat kingusinnerusukkut
aningaasaliissuteqarfigineqarnissaat, naatsorsuutigalugu
akuersissutigisinnaassavai.
Ukiumoortumik ilassutitut
aningaasaliissutinut inatsimmi ukiup aningaasanik inatsisip atuuffiata
naanerata kingornatigut akuersissutigineqartartussanik. Aningaasaqarnermut
Ataatsimiititaliap aalajangiineri inatsisitigut tunggavissinneqartassapput.
Naatsorsuutigisariqarpoq
allannguutit taakku aningaasatigut aqutsinerup pitsaanerulernissaanik aammali
aningaasatigut tunngaviusumik tulleriaarinerup patajaallisarneqarnissaannut
kinguneqassasut.
Sanaartornermut tunngatillugu
inatsisissatut siunnersuutip kingunerisaamik sannartugassanut iluarsagassanullu
aningaasaateqarfik pilersinneqassaaq. Taamaaliornikkut missingersuusioriaatsit
annertuumik pisariillisarneqassapput. Taamaalillutimmi piffissat sanaartorfiit
allanngorneri aningaasaliissuteqarnissamik
aningaasaliissuteqaqqinnissamilluunniit qinnuteqartariaqalernerannik
kinguneqartariaarutissapput. Tamanna aqqutigalugu sannartukkat iluarsagassallu
aningaasaliissutit tamarmiusut iluanni eqaatsumik iluarsiivigineqarsinnaalissapput.
Peqatigitillugulu sannartornermik ingerlatsinerit suliassaqassutsikkut
ajornertorsiutit pinngitsoortinneqarsinnaanngorlugit pitsaanerusumik
ataqatigiissaarneqarsinnaalissallutik.
Aammattaq inatsisissatut
siunnersuutip kingunerisaanik atorfilittut atorfiit amerlassusilerneqartarneri
aningaasaliissutitut inatsimmi ilaatinneqartarunnaassapput. Taamaaliornikkut
tunngaviusumik aningaasatigut aqutsineq ajornerulersinngikkaluarlugu
annertuumik pisariillisaasoqassaaq.
Kiisalu aamma
inatsisissatut siunnersuutip kingunerisaanik aningaasaqarnernikkut
inissisimanermi killiffiit pillugit Inatsisartunut nassuiaateqartarnerit
aqqutigalugit aningaasaliisarnermi paasissutissatigut tunngavissat kiisali
aningaasartuutaasartut nakkutigineri pitssanerulissapput.
Inatsisit
Atortinneqarnerannut Ataatsimiititaliap ilaasortai isumaqatigiillutik
isumaqarput inatsisissatut siunnersuummi nutaaliariniarneqartut pitsaasuusut
aammalu Naalakkersuinikkut aalajangiiniarnermi tunngavissanut
aningaasartuutaasartunillu nakkutiliinermut patajaallisaataassasut. Inatsisit
Atortinneqarnerani Ataatsimiititaliaq minnerunngitsumik isumaqarpoq
siunnersuutip ilassutitut aningaasaliisutinut inatsimmut kiisalu
Aningaasaqarnermut Ataatsimiititaliap oqatussaassuseqarneranut tunngasortai
nakkutigisaanngitsumik aammalu aningaasaqarnerup tungaatigut Naalakkersuinikkut
anguniakkat tulleriiaarinerillu sanioqqutaarlugit ingerlatsinermut
aningaasartuuteqartarnerit pinaveersimatinniarnissaannut sakkussatut
piukkunnarluartuusut.
Aammattaaq Inatsisartut
upernaakkut ukiakkullu ataatsimiinnerini aningaasarsiorneq pillugu
nassuiaatinut taakkulu aningaasarttuutinik ingerlatanillu nakkutilliinermut
tunngasutigut imarisartagassaannut tunngatillugu taamaappoq.
Aamma siunnersuutip
missingersuusioriaatsit pisariillisarneqarnissaannik imarisai
Namminersornerullutik Oqartussat aningaasatigut ingerlaasiata
Naalakkersuinikkut tamakkiinerusumik malinnaaffigilersinnaalernissaasa
patajaallisarneqarnissaanut aqqutissiuusseqataasinnaavoq. Taamaalillunilu
aalajangiiniarnerni tunngavissat pitsaanerulernissaannut
qulakkeriffiusinnaalluni. Peqatigitillugu pisariillisaanerit minnerunngitsumik
sanaartornerup tungaatigut aningaasanik atuinikinnerunermik kinguneqartussat
naatsorsuutigisariaqarput, tamannali Inatsisit Atortinneqarneranut
Ataatsimiititaliap pitsaalluinnartutut isigaa.
Taamaalilluni Inatsisit
Atortinneqarnerani Ataatsimiititaliap siunnersuummi immikkoortumut
pingaarnermut tapersiinini matumuuna nalunaarutigaa.
Siunnersuutip aaqqissuussaanermigut
ilusaanut tunngatillugu Inatsisit Atortinneqarneranut Ataatsimiititaliap makku
oqaatigissavai:
Inatsisissatut
siunnersuutip siullermeerneqarnerani tikkuarneqarpoq § 26-imi aalajangersakkat
ilassutitut aningaasaliissunut inatsimmut ilanngussisarnermut tunngasut ulloq
1. januar ukioq 2000 atortuulersinneqartariaqartut. Kisiannili inatsisissatut
siunnersuummi § 34-imi aalajangersakkat § 26-imiittut
atortuulersinneqarnissaannut aalajangersagaq amigaatigineqarpoq.
Aningaasaqarnermmut Naalakkersuisup oqaatigereerpaa Naalakkersuisut
siunnersuutip aappasaaneerneqarnissaanut tassunga naqqiutissanik
allannguutissatut siunnersuuteqarniartut. Inatsisit Atortinneqarnerannut
Ataatsimiititaliap tamanna taperserpaa.
Ilanngullugu
Ataatsimiititaliap Naalakkersuisut kaammattussavai inatsisissatut siunnersuut
misissuataaqqullugu taamaalillutik naqinnerliugartai ilaalu ilanngullugit
iluarsineqarsinnaaniassammata.Taamaalilluni Inatsisartut Inatsisit
Atortinneqarnerannut Ataatsimiititaliaata aaqqeqqilaagassat aaqqinneqarnissaat
kaammattuutigalugu inatsisissatut siunnersuutip saqqummiunneqartup
akuersissutigineqarnissaa inassutigaa.
Ilanngullugu
oqaatigissavara Inatsisartut taamaatullu Ombudsmandeqarfiup aningaasartuutinik
siumut naatsorsuutigeriinngisanik aningaasartuuteqarsinnaanerat Inatsisit
Atortinneqarnerannut Ataatsimiititaliap arajutsisumanngikkaa. Apeqqut taanna
Inatsisartut Naalakkersuisullu pillugit Inatsisartut inatsisissaatigut
aajajangersaavigineqarpoq. Tassani aalajangerneqarmat Inatsisartut ataatsimiinnerisa
avataatigut Inatsisartut Inatsisartullu Ombudsmandiata aningaasartuutaannik
siumut naatsorsuutigeriinngisanik akiliisarnerat Inatsisartut sinnerlugit
suleriaasissanut Ataatsimiititaliamit akuersissutigineqartarpoq.
Missingersuusiortarnermut
inatsisissatut siunnersuummut nassuiaatitigut siunertarineqanngilluinnarpoq
suleriaasissamut ataatsimiititaliap oqartussaaffimmik taassumannga
arsaarneqarnissaa akerlianilli missingersiisiortanermut inatsisissatut
siunnersuut akuersissutigineqarpat oqartussaaneq tamanna
annertusineqartussaavoq. Taamaalillunilu Suleriaasissamut Ataatsimiititaliaq
Aningaasaqarnermut Ataatsimiititaliaq assigalugu Inatsisartut ataatsimiinnerisa
aamma nalaanni aningaasaliinissamut pisinnaatitaalissalluni.
Inatsisit Atortinneqarnerannut
Ataatsimiititaliap naatsorsuutigaa apeqqut taanna Inatsisartut suleriaasiatigut
aalajangersarneqassasoq.
Ataatsimiititaliami
ilaasortaapput:
Anders Andreassen, Siumut,
Ataatsimiititaliap Siulittaasua.
Olga Poulsen, Inuit
Ataqatigiit.
Otto Steenholdt, Atassut.
Anthon Fredriksen, Kattusseqatigiit.
Josef Motzfeldt, Aningaasaqarnermut Niuernermullu Naalakkersuisoq:
Namminersornerullutik Oqartussat missingersuutaat pillugit Inatsisartut inatsisissaattut siunnersuutip aappassaaneerneqarnissaanut Inatsiseqarnermut Ataatsimiititaliap isumaliutissiissutaa Naalakkersuisut tiguaat.
Naalakkersuisut nuannaarutigalugu Inatsiseqarnermut Ataatsimiititaliap inatsisissatut siunnersuummut isumaqataanera maluginiarpaat, ataatsimiititaliammi oqaatigimmagu inatsisissatut siunnersuummi nutaaliarineqartut pitsaasuusut aammalu naalakkersuinikkut aalajangiiniarnerni tunngavissani aningaasartuutaasartunillu nakkutilliinernut patajaallisaataassasut. Inatsiseqarnermut Ataatsimiititaliap isumaliutissiissumminut aallaqqaasiullugu Naalakkersuisut Inatsisissatut siunnersuummik saqqummiinnginnerminni tusarniaasimanerat nalilersorpaat, tusarniaanerup sivikitsuinnaasimaneranut Naalakkersuisut isumaqataapput. Naalakkersuisuniilli inatsisissatut siunnersuutip piffissaq eqqorlugu Inatsisartunut nassiussuunneqarnissaa pingaartinneqarluinnarsimavoq inatsisissatut siunnersuutip siusinaartumik saqqummiunneqarnissaata pingaartinneqarneratigut amerlanerusut, Inatsisartut avataaneersullu missingersuutit pillugit inatsisissatut siunnersuummut isummersinnaasimapput.
Tjenestemandit pillugit inatsisip allanngortinneqartussaanerat pillugu Tjenestemandit Kattuffiat tusarniniarneqarnissaanut Inatsiseqarnermut Ataatsimiititaliap oqaaserisaanut Naalakkersuisut isumaqataapput. Tjenestemandit pillugit inatsisip allannguutissaattut siunnersuut aappaagu upernaakkut ataatsimiinnermi Inatsisartunit oqallisigineqarnissaa naatsorsuutigineqarpoq.
Isumaliutissiissummi eqqaaneqartut aappaat tassaavoq Inatsiseqarnermut Ataatsimiititaliap Kukkunersiuinermut Ataatsimiititaliamut Aningaasaqarnermullu Ataatsimiititaliamut saaffiginnissimanera. Kukkunersiuinermut Ataatsimiititaliaq oqaaseqarnissaminut pissutissaqarsimanngilaq, Aningaasaqarnermut Ataatsimiititaliap aningaasaqarnermut inatsisissatut siunnersuutip piffissaq akuerineqartarfissaa kinguartinneqartariaqartutu isigaa, ataatsimiinnerit sivitsorneqartarsinnaanerat periarfissillugu.
Naalakkersuisut inatsisissatut siunnersuummi § 10-mut nassuiaammini tassa ukiup tulliani aningaasanut inatsisip akuersissutigineqartarnissaanut november-ip aallaqqaataata piffissaliunneqartarnissaanut aalajangiineq pillugu nassuiaammi oqaatigaat ulloq taanna aalajangiunneqarsimasoq kommunit missingersuumminnut sunniutaasussanik oqallisiginnilluarnissaannut piffissaliinissaq anguniarlugu. Oqaatigineqarpoq kommunit missingersuutaat kingusinnerpaamik december-ip aallaqqaataani akuersissutigineqartussaasut. Aamma ilanngullugu oqaatigerusuppara Naalakkersuisut aningaasanut inatsisissanut siunnersuutaat pisarnermit siusinnerusukkut saqqummiunneqartalerniarmat, tassami inatsisissatut siunnersuummi matumani piffissarititaq september-ip aallaqaaataanut aalajangiunneqarsimammat, tassa kingusinnerpaamik september-ip aallaqqaataanut. Taamaammallu Aningaasaqarnermut Ataatsimiititaliaq kaammattorumavara september-ip aallartiinnartoq Aningaasanut Inatsisissaq pillugu oqallinnermik aallartitsisaleqqullugu, taamaaliorunik Aningaasanut Inatsisissatut siunnersuutip oqallisiginissaanut piffissaqarlualissapput, tamannalu tunngavigalugu Aningaasanut Inatsisissap akuersissutigineqartarnerannut piffissaliussap allanngortinneqarnissaanik Naalakkersuisut siunnersuuteqalersaanngillat.
Aammattaaq Aningaasaqarnermut Ataatsimiititaliaq pingasunik siunnersuuteqarpoq isumaliutigeqqusaminnik.
Siullermik Aningaasanik Inatsit pillugu qarasaasiatigut paasissutissiiviliortoqarnissaa siunnersuutigineqarpoq. Soorunami teknik-ikkut periarfissanik akuersaartuunerput Naalakkersuisut sinnerlugit oqaatigissavara. Kiisalu Aningaasanut Inatsisissatut siunnersuutip Naalakkersuinermut sulialinnit allaffissornikkut aqutsisunit innuttaasunillu ajornannginnerusumik pissarsiarineqarsinnaalernissaa sulissutigigatsigu oqaatigissallugu. Aningaasanut Inatsisissaut siunnersuutip ukioq manna internet-ikkut pissarsiarineqarsinnaalernissaa Naalakkersuisut aallaqqaammik salliutissimavaat, taamaaliornikkut kikkut tamarmik Aningaasaliissutissanik Inatsimmik siunnersuummut soqutiginnittut aningaasaliissutissatut siunnersuutinik kiisalu missingersuutinik ilanngussanik takunnissinnaalerniassammata. Aammattaaq oqaatigissavara Aningaasanut Inatsisissatut siunnersuut pernaataasumik internet-ikkut pissarsiarineqarsinnaalersimammat aamma missingersuutit pillugit Inatsisissatut siunnersuut internet-ikkut takuneqarsinnaavoq.
Aamma suliffeqarnermi illuatungeriit sanaartugassanut iluarsagassanullu aningaasaateqarfiup aningaasaataasa pingaarnersiuilluni tulleriiaarneqartarnerini toqqaannartumik akuutinneqartarnissaasa anguniarneqarnissaat Aningaasaqarnermut Ataatsimiititaliamit siunnersuutigineqarpoq.
Tassa sulisitsisut sulisullu kattuffii tassani pineqarput.
Naalakkersuisut sinnerlugit tassunga tunngatillugu oqaatigissavara pissusissamisoormat pilersaarusiornermi pilersaarutillu piviusunngortinneqarnerini kattuffiit akuutinneqartassappata. Pingaarnersiuillunilu tulleriiaarineq Naalakkersuinikkut akisussaaffiuvoq aningaasanut tunngasuugami, Naalakkersuisut kisimik Aningaasanut Inatsisissamik siunnersuummi pingaarnersiuilluni tulleriiaarinissamut siunnersuuteqartarput, Inatsisartullu aningaasanik inatsisisip akuerineqarneratigut tassaallutik aalajangiisartut. Naalakkersuisut isumaqarput inuiaqatigiinni suliassat pisariaqartinneqartut aallaavigalugit Naalakkersuisnikkut tulleriiaarineq tamatumani pineqartoq, akisussaaffillu tamanna Naalakkersuisut Inatsisartullu suliffeqarnermi illuatungeriinnut tunniussinnaanngilaat. Kiisalu Inatsisartuni suliassaqarfinni atatsimiititaliat aningaasanut inatsisip suliarineqarnerani peqataatinneqartalernissaat Aningaasaqarnermut Ataatsimiititaliamit kaammattuutigineqarpoq tamanna pissusissamisuuginnartussatut Naalak-kersuisunit isigineqarpoq Inatsisartullu aamma Siulittaasoqarfiup kisimik tamanna aalajangigassaraat.
Naalakkersuisut aamma maluginiarpaat Aningaasaqarnermut Ataatsimiititaliap siunnersuutai Inatsiseqarnermut Ataatsimiititaliap tapersersunngikkai taarsiullugulu Naalakkersuisut kajumissaarlugit aaqqitassanik tamakkuninnga aaqqiiniaqqullugit.
Oqaatigineqareersutut Inatsiseqarnermut Ataatsimiititaliaq isumaqarnerarpoq Inatsisissatut siunnersuummi nutaaliarineqartut pitsaasuusut, aammalu Naalakkersuinikkut aalajangiiniarnerni tunngavissanut aningaasartuutaasartunillu nakkutilliinernut patajaallisaataassasut. Tamatuma saniatigut Inatsiseqarnermut Ataatsimiititaliamit oqaatigineqarpoq siunnersuut ilassutitut aningaasaliissutinut inatsisinut kiisalu Aningaasaqarnermut Ataatsimiititaliap oqartussaassuseqarneranut tunngasortai nakkutigisaanngitsumik aammalu aningaasaqarnerup tungaatigut Naalakkersuinikkut anguniakkat tulleriiaarinerillu sanioqqutaarlugit ingerlatsinermut aningaasartuuteqartarnerit pinaveersimatinneqarnissaannut sakkussatut piukkunnarluartuusoq.
Isumaliutissiissummi naggasiullugu oqaatigineqarpoq Inatsisissatut siunnersuutip siullermeerneqarnerani § 26-imi aalajangersakkat Ilassutitut Aningaasaliissutinut Inatismmut tunngasut 2000-imi ukiortaamiit januar-ip aallaqqaataaniit atortuulersinneqartariaqartut.
Siullermeerininnermi Naalakkersuisut tamatuminnga isumaqataanerminnnit ersersitsipput taamaammallu Naalakkersuisut Inatsisissatut siunnersuutip aappassaanerneqarnerani allannguutissatut siunnersuutaat ilaatigut § 26-ip 2000-imi januar-ip aallaqaataani atuutilernissaanik nassataqartussaq innersuussutigissavara tassa ukioq 2000-imi Ilassutitut Aningaasaliissutinut Inatsisissatut siunnersuuteqartoqarnavianngilaq tamatuma saniatigut Naalakkersuisut teknik-imut tunngasuinnarnik marlunnik allannguutissatut siunnersuuteqarput. Inatsisissatut siunnersuutip kalaalisuuani naqinnerliukkat partiit oqaaseqartuini oktober-ip tallimaani siullermeerinninnermi tikkuarneqartut eqqarsaatigalugit oqaatigissavara nutserisoqarfiup kukkunerit aaqqereeramgit iluarsaatarlu Inatsiseqarnermut Ataatsimiititaliamut ingerlateqqillugu. Tamakku tunngavigalugit Inatsisartut Inatsisissatu isunnersuutip taama isikkoqarluni akuersissutigineqarnissaanik Inatsiseqarnermut Ataatsimiititaliap inatsiseqaataata akuersissutigineqarnissaa Naalakkersuisut kaammattuutigiumavaat tamatuma saniatigut allannguuutissatut siunnersuutit pingasut Naalakkersuisunut saqqummiunneqartut akuersissutigineqarnissaat Naalakkersuisut aamma inassutigissavaat.
Per Berthelsen, Siumup oqaaseqartua:
Namminersornerullutik Oqartussat Missingersuusiornermut Inatsisissaanut siunnersuutaanut Inatsiseqarnermut Ataatsimiititaliap isumaliutissiissutit pillugit Siumumit makku taajumavagut.
Aningaasaqarnermut Ataatsimiititaliap Aningaasanut Inatsisip akuerineqarneranik kinguartitsinissamik kissaateqarnera paasilluarparput. Suliammi taama angitigisup piffissaq maannatut sivikitsigisoq atorlugu naammassiniarneqartarnera illersoruminaatsuuvoq allannguisinnaanerlu pitinnagu attuumassuteqartut kommunit allallu tusarniaavigineqaqqaarnissaannik isumasiorneqaqqaarnissaannullu pisariaqartitsineq Siumumiit aamma paasilluarparput.
Nuannaarutigaarput Inatsiseqarnermut Ataatsimiititaliamit Aningaasaqarnermut Ataatsimiititaliap ukioq naallugu aalajangiisinnaassuseqartitaalernissaanik kissaateqarneq akuersaarmagu, Siumumimmi tamatuma aningaasaqarnikkut aqutsinerup iluani pitsaasumik sunniuteqarnissaa qularinngilluinnaratsigu. Iluarisimaarparpullu sanaartornermut nutarterinermullu aningaasaateqarfiliornissamik isuma poneqartut iluini missingersuusiortarnermut suleriaaseqarnissamut ataqatigiissaariniarnissamullu iluaqutaalluinnartussatut nalulertariaqarunartoq ammaakkumaneqarmat.
Naammagisimaarparpullu upernaakkut ukiakkullu aningaasaqarneq pillugu nalunaarusiortoqartarnissamik Aningaasaqarnermut Ataatsimiititaliamit siunnersuutigineqartoq Inatsiseqarnermut Ataatsimiititaliamittaaq tikilluaqqulluarneqarmat.
Naggasiullugu Siumumit ilanngullugu oqaatigerusupparput manna Inatsisartut Ataatsimiititaliaat pingaartumillu Aningaasaqarnermut Ataatsimiititaliaat nunatisnni angalanerminni nalunnarusiaat Naalakkersuisut sulinerannut ilaliunneqartarput, taamatullu suleqatigiinnissaq Siumumit pingaartilluinnartuugatsigu suleqatigiinnermi matumani ataqatigiissaarineq pitsaasoq nangeqquarput, taamaaliornermi aamma nunatsinni kommuninut iluaqutaasussaassammat.
Taamatut oqaaseqarluata Inatsisartut Inatsiseqarnermut Ataatsimiititaliaanit inassutigineqartutut Inatsisissatut siunnersuutip akuerineqarnissaa Siumumit inassutigiumavarput.
Anders Nilsson, Atassut:
Inatsisissamut
siunnersuutip saqqummiunneqartup allanguutissatut siunnersuutit pingasut
ilanngullugit ajuersissutigineqarnissaat Atassutip akuersaarpaa.
Olga Poulsen, Inuit Ataqatigiit:
Inuit Ataqatigiinniit
matumuuna nalunaarutigissavarput Namminersornerullutik Oqartussat
missingersuutaat pillugu Inatsisartut Inatsisissaattut siunnersuutip
aappassaanerneqareerluni taamatu isikkoqarluni aammalu isumaliutissiissummut
ilassutitut oqaatigineqartut ilanngullugit taamatut isikkoqarluni
pingajussaaneerneqarnissaanut akuersaaratta.
Anthon Fredriksen, Kattusseqatigiit:
Missingersersuutit pillugit Inatsisartut Inatsisissatut siunnersuutip siullermeerneqarnerani Kattusseqatigiinniit oqaaseqaatigut innersuussutigalugit Inatsisartut Inatsiseqarnermut Ataatsimiititaliaata isumaliutissiissutaa annerusumik oqaaseqarfiginagu tamakkisumik taperserparput. Aammalu nuannaarutigalugu maluginiarparput Aningaasaqarnermut Ataatsimiititaliap suleriaatsiminut atatillugu Inatsisartut Ataatsimiititaliat ataavartut allat ukiumut tulliuttumut missingersersuutit Ataatsimiititaliamut attuumassuteqartut pillugit tusarniaasarneq aallartissimammagu.
Kattusseqatigiinniillu kaammattutigissuarput Aningaasaqarnermut Ataatsimiititaliap ukiumut tulliuttumut missingersersuutit pillugit ataatsimiititalianut susassaqartunut tusarniaasarneq Inatsisartut upernaakkulli ataatsimiinneranni tusarniaasarnerit aallartinneqartarnissaat angerlateqqeqqullugu.
Taamatut kissaateqarnitsinnut soorunamu Aningaasanut Inatsissamut suli pitsaanerusumik pilersaarusiortalersinnaaneq taamaalillunilu aamma suli ajunnginnerusumik ingerlatsisinnaanermik kinguneqrasinnaanera anguneqarsinnaasoq takorloorsinnaagatsigu. Tassami Ataatsimiititaliat assigiinngitsut suleqatigiillualernerisigut suliassat suulluunniit pilersaarusiorneqarnerat pipallataanngitsumik patajaatsumillu ingerlanneqartalersinnaammat.
Taamatut naatsumik oqaaseqarluta missingersersuutit pillugit Inatsisissatut siunnersuut tamakkiisumik taperserlugu taamatut isikkoqarluni pingajussaaneerneqarnissaminut ingerlaqqinnissaa Kattusseqatigiinniit akuersaarlugu taaseqataaffigissavarput.
Josef Motzfeldt, Aningaasaqarnermut Niuernermullu Naalakkersuisoq:
Inatsiseqarnermut Ataatsimiititaliap isumaliutissiissutaa Naalakkersuisut siunnersuutaanut annertuumik tamakkiisumik taperserneqartoq paasisinnaavara. Taamaallaat Siumup oqaaseqartuata Inatsisartut ataatsimiinnerisa sivitsorneqarsinnaaneranik isumaa, Aningaasanik Inatsisissap akuerineqartarnerata oktober-ip naanerani pisartussatut KANUKOKA-mut isumaqatigiissutigineqarsimasup allanngortinneqarnissaanik kissaateqarnera Naalakkersuisuninngaanniit paasivarput.
Neriorsuutigisinnaanngilarput pingajussaanerinninnissamut KONUKOKA-p ilaasortani tunuliaqutaralugit isummernissaa pisinnaassanersoq, taamaattumik Naalakkersuisuninngaanniit akissuteqaatitsinni oqaatigisarput Aningaasaqarnermut Ataatsimiititap Aningaasanut Inatsisissaq saqqummerniariaraangat suliaqarnini aallartittassappagu taanna naaperiaanertut Naalakkersuisuninngaanniit isigivarput, isumaqarluta kommunit aningaasanik missingersuusiornermi ukiut tulliannut kommuninut piffissarititaasoq ataqqineqartariaqartoq, tassami Aningaasanik Inatsit aallaavigalugu akileraarutinik isummernissat sanaassat suut aningaasaleeqataaffigineqartussat kommunit ataatsimiittarnerini november-imi arlaleriarluni suliarineqartartoq eqqarsaatigissagaanni tamatuma attatiinnarneqarnissaa Naalakkersuisuniit orniginarnerutikkatsigu.
Per Berthelsen, Siumup oqaaseqartua:
Aningaasaqarnermut Niuernermullu Naalakkersuisup naaperiarfissatut siunnersuutigisaa tusaatissatut tigullugu akuersaarparput.
Lars-Karl Jensen, Ataatsimiinnermik aqutsisoq:
Taamaalilluni uani oqaluuserisatsinni immikkortoq 16-imi Namminersornerullutik Oqartussat missingersuutai pillugit Inatsisartut Inatsisissaattut siunnersuut taamatut isikkqarluni pingajussaaneernissaanut ingerlaqqinniissaanut isumaqataasut nikueqqussavakka: 27-it.